Faatuatua ia Iesu Keriso

Na aoao mai le Aposetolo o Paulo e faapea, “a o le faatuatua, o le faalagolago [tautino] lea i mea ua faamoemoe i ai, o le mautinoa lea o mea e le o vaaia” (Eperu 11:1). O le faatuatua o se mataupu faavae o faatinoga ma le mana. Soo se taimi tatou te galulue ai agai atu i se sini ta’uaogaina, ua tatou faatinoa le faatuatua. E faaali atu lo tatou faamoemoe mo se mea e le o mafai ona tatou vaaia.

Vaaiga Lautele

Na aoao mai le Aposetolo o Paulo e faapea, “a o le faatuatua, o le faalagolago [tautino] lea i mea ua faamoemoe i ai, o le mautinoa lea o mea e le o vaaia” (Eperu 11:1). Sa saunoa foi Alema i se saunoaga faapena: “Afai ua ia te outou le faatuatua, tou te faamoemoe i mea e le o vaaia, a ua moni ia” (Alema 32:21). O le faatuatua o se mataupu faavae o faatinoga ma le mana. Soo se taimi tatou te galulue ai agai atu i se sini ta’uaogaina, ua tatou faatinoa le faatuatua. E faaali atu lo tatou faamoemoe mo se mea e le o mafai ona tatou vaaia.

Tusifaamaumau Ou Lagona Uunai

Faatuatua i le Alii o Iesu Keriso

Ina ia mafai e le faatuatua ona taitai atu i le faaolataga, e tatau ona faaogatotonu i le Alii o Iesu Keriso (tagai i le Galuega 4:10–12; Mosaea 3:17; Moronae 7:24–26; Mataupu Faavae o le Faatuatua 1:4). E mafai ona tatou faaalia le faatuatua ia Keriso, pe a tatou maua le faamautinoaga o loo i ai o Ia, o se manatu sa’o o Lona uiga, ma se malamalamaaga o loo tatou tauivi e ola e tusa ma Lona finagalo.

O le i ai o le faatuatua ia Iesu Keriso o lona uiga o le faalagolago atoa atu lea ia te Ia—faalagolago i Lona mana, atamai, ma le alofa e faavavau. E aofia ai le talitonu i Ana aoaoga. O lona uiga o le talitonu e tusa lava pe tatou te le malamalama i mea uma, e malamalama i ai o Ia. Ona sa oo o Ia i o tatou tiga, mafatiaga, ma lē atoatoa uma, ua Ia silafia ai le ala e fesoasoani ai ia tatou tutu i luga a’e o o tatou faafitauli i aso taitasi (tagai i le Alema 7:11-12; Mataupu Faavae ma Feagaiga 122:8). Ua Ia “manumalo i le lalolagi” (Ioane 16:33) ma sauniaina le ala mo i tatou e maua ai le ola e faavavau. Ua le aunoa ona saunia o Ia e fesoasoani mai ia i tatou pe a tatou manatua Lana valaau mai: “Vaai mai ia te aʼu i mafaufauga uma; aua le masalosalo, aua le fefefe” (Mataupu Faavae ma Feagaiga 6:36).

Ola i le Faatuatua

O le faatuatua e sili atu nai lo na o le talitonu. Tatou te faaali atu lo tatou fatuatua e ala i faatinoga—i le ala tatou te ola ai.

Na folafola mai le Faaola, “Afai tou te faatuatua mai ia te au o le a outou maua le mana e fai ai soo se mea e tatau ai ia te au” (Moronae 7:33). O le faatuatua ia Iesu Keriso e mafai ona faaosofia ai i tatou e mulimuli i Lana faataitaiga atoatoa (tagai i le Ioane 14:12). O lo tatou faatuatua e mafai ona taitai atu ai i tatou e faia galuega lelei, usitai i poloaiga, ma salamo i a tatou agasala (tagai i le Iakopo 2:18; 1 Nifae 3:7; Alema 34:17). O lo tatou faatuatua e mafai ona fesoasoani tatou te manumalo ai i faaosoosoga. Sa fautuaina e Alema lona atalii o Helamana, “Aoao atu ia te i latou ia tetee atu i faaosoosoga uma a le tiapolo, faatasi ma lo latou faatuatua i le Alii o Iesu Keriso” (Alema 37:33).

O le a galueaiina e le Alii ni vavega tetele i o tatou olaga e tusa ai ma lo tatou faatuatua (tagai i le 2 Nifae 26:13). O le faatuatua ia Iesu Keriso e fesoasoani ia i tatou ia maua ai le faamalologa faaleagaga ma le faaletino e ala i Lana Togiola (tagai i le 3 Nifae 9:13–14). Pe a oo mai taimi o tofotofoga, e mafai e le faatuatua ona aumaia ia i tatou le malosi e fetaomi ai i luma ma faafetauia o tatou luitau ma le lototele. E tusa lava pe foliga mai le lumanai e le mautonu, o lo tatou faatuatua i lo tatou Faaola e mafai ona aumaia ia i tatou le toafilemu (tagai i le Roma 5:1; Helamana 5:47).

Faateleina o lo Tatou Faatuatua

O le faatuatua o se meaalofa mai le Atua, ae e tatau ona tatou fafaga lo tatou faatuatua ia tumau ai le malosi. O le faatuatua e pei o se maso. Afai e faagaoioia, e tuputupu malosi. A tuu e le faagaoioia, e oo ina vaivai.

E mafai ona tatou fafagaina le meaalofa o le faatuatua e ala i le tatalo i le Tama Faalelagi i le suafa o Iesu Keriso. Pe a faaali atu lo tatou agaga faafetai i lo tatou Tama ma a o tatou augani atu ia ia te Ia mo faamanuiaga tatou te manaomia ma manaomia e isi, o le a tatou latalata atu ai ia te Ia. O le a tatou latalata atu i le Faaola, o Lana Togiola lea ua mafai ai ona tatou tagi atu mo le alofa mutimutivale (tagai i le Alema 33:11). O le a faapea foi ona tatou nofouta i le taitaiga filemu a le Agaga Paia.

E mafai ona tatou faamalosia lo tatou faatuatua i le tausia o poloaiga. E pei o faamanuiaga uma mai le Atua, o le faatuatua e maua ma faateleina e ala i le usiusitai o le tagata lava ia ma amioga amiotonu. Afai tatou te mananao e faatamaoaiga lo tatou faatuatua i le tikeri aupito maualuga e mafai ona oo i ai, e tatau ona tatou tausia feagaiga ua uma ona tatou faia.

E mafai ona tatou atinaeina le faatuatua i le suesue i tusitusiga paia ma upu a perofeta o aso e gata ai. Na aoao mai le perofeta o Alema, o le upu a le Atua e fesoasoani e faamalosi ai le faatuatua. O le faatusaina o le upu i se fatu, sa ia fai mai ai, o le “fia talitonu” e mafai ona taitai atu ai i tatou e “tuu ane o se avanoa” mo le upu ina ia “toto ai o se fatu i [o tatou] loto.” Ma o le a tatou lagona e lelei le upu, aua o le a amata ona malena ai o tatou loto ma faamalamalama ai o tatou malamalamaaga. O lenei mea o le a faamalosia ai lo tatou faatuatua. A faaauau pea ona tatou fafaga le upu i totonu o o tatou loto, “ma le filiga tele, ma le onosai, ma tepa taulai i luma i lona fua, o le a mauaa; ma faauta o le a avea ma laau e puna ae i le ola tumau-faavavau.” (Tagai i le Alema 32:26–43.)