Mataupu 21

O Mataupu Muamua ma Sauniga o le Talalelei

Ou te iloa o le talalelei e faaleatua, ma e manaomia e le lalolagi.¹

Folasaga

O Peresitene Tavita O. MaKei sa agalelei ma faaaloalo e le aunoa i tagata o isi faatuatuaga, ma sa ia viia galuega lelei a isi ekalesia uma. Peitai, sa mausali o ia i lana molimau o le atoatoaga o le talalelei e na O Le Ekalesia a Iesu Keriso o le Au Paia o Aso e Gata Ai e maua ai. Ina ia aoao atu le taua o le usiusitai i mataupu ma sauniga o le talalelei toefuatai, o lea sa ia saunoa ai e uiga i le auai i le Ekalesia o se tagatanuu i se malo sili:

“O ekalesia uma ma talitonuga uma ua aofia ai se mea lelei e taitaiina atu ai i le malo o lo tatou Tama; ae ina ia avea ma se tagatanuu o lena malo e tatau i tagata uma ona tausi i tulaga manaomia e faia e le Tupu. E moni, e na o le tasi lava le ala e mafai ona maua ai le faitotoa i le Ekalesia a Iesu Keriso, ma o lena ala sa faailogaina e Iesu Keriso, le Alii. ‘O a’u nei le ala, ma le upumoni, ma le ola: e le alu atu lava se tasi i le Tama, pe a le ui mai ia te au.’ (Ioane 14:6.)

“O auala e maua ai le avea ma tagatanuu i le Ekalesia a Iesu Keriso e manino naua; e matua manino lelei, e moni lava, o se mea e matua maofa ai ona e toatele naua tagata ua foliga mai e atamamai ma lava ni aoaoga ua maua… [ua manatu faapea] e mafai e i latou ona maua le faitotoa e ala atu i nisi auala ma mea eseese.

“E na o le toatasi lava Le e i ai le aia e faataatia maia le auala i le faaolataga o le tagata. E moni e le i faapea e le i anoa lana fetalaiga i mea e tatau ai mo le avea ma tagatanuu i lona malo.

“Tagai i le manino naua o ana afioga: ‘A le toe fanau le tagata, e le mafai ona iloa e ia o le malo o le Atua.’ [Ioane 3:3; ua faaopoopo le faatusilima.] I se faamalamalamaga o lenei fuaitau e foliga mai e le mafaamatalaina lenei fetalaiga ia Nikotemo, sa faaauau ona fetalai atu ai le Matai:

“ ‘Afai e le fanau se tasi i le vai ma le Agaga, e le mafai ona sao o ia i le malo o le Atua.’ [Ioane 3:5; ua faaopoopo le faatusilima.]

“Ua manino mai sa faaopoopo e Peteru, le Aposetolo sili, le taua i lenei tulaga manaomia e avea o se auala taua e maua ai e le na o le avea ma tagatanuu i le Ekalesia, a o le faaolataga foi i le malo o le Atua, aua, ina ua tuia loto o le motu o tagata sa latou alalaga atu, ‘Sema e le au uso e, se a se mea matou te faia?’ [Galuega 2:37] sa ia tali ma fetalai atu:

“ ‘Ina salamo ia, ma ia taitasi ma papatisoina outou uma i le suafa o Iesu Keriso mo le faamagaloina o agasala, ona maua lea e outou o le mea e foaifua mai o le Agaga Paia lea.’ (Galuega 2:38.) Ua faapea ona tuuina mai tulaga manaomia e fa, o mataupu taua e fa ma sauniga, o le usitaia e taua i le auai i le Ekalesia a Keriso: [o le] faatuatua, salamo, papatisoga, ma le mafutaga a le Agaga Paia. …

“E tele auala ua faasino mai e taitai atu ai i le malo o le Atua, ae na o le tasi lava le faitotoa e mafai ona maua ai le ala ma avea ai ma tagatanuu. Sa faasino manino mai e Keriso lenei ala a o i ai faatasi o ia ma tagata; ma sa ia toe faaali mai foi e ala mai i le Perofeta o Iosefa Samita. O le ala e faatauvaa ma e faigofie foi ona maua, ma e matua maoae lava ma mamalu e pei ona faavavau.

“E tele auala … e taitai atu ai tagata faamaoni agai i le ekalesia ma le malo o le Atua, peitai o i latou o le a auai i avanoa ma faamanuiaga o le avea ma tagatanuu i lena malo, e tatau ona usiusitai i mataupu ma sauniga o le talalelei a Iesu Keriso.”²

O Aoaoga a Tavita O. MaKei

O le Faatuatua ia Iesu Keriso o le mataupu faavae aupito muamua lea o le Ekalesia.

O se faatuatua e le maluelue ia Keriso o se mea pito sili lea ona manaomia e le lalolagi i aso nei.³

O le a lona uiga ia tausi le faatuatua? O lona uiga muamua, tatou te talia Iesu Keriso, e le ona o se faiaoga maoae, o se taitai mamana, ae ona o ia o le Faaola, o le Togiola o le lalolagi. … O le na te tausi le faatuatua e talia Iesu Keriso o le Alo o le Atua, o le Togiola o le lalolagi. Ou te faapea atu i tagata uma ia tausia lena faatuatua. Ou te manatu e taua i le fiafia o le tagata, e taua i le filemu o lona mafaufau. Ou te manatu o le uluai mataupu faavae lea o le Ekalesia a Iesu Keriso.⁴

O se faatuatua faapena lea atonu sa lagolagoina le Aposetolo e toasefulutasi ma soo e tusa e fitugafulu sa feiloai ma Keriso ina ua mavae le toetu. I o latou mafaufau e mautinoa sa leai se masalosalo i lona uiga patino. Sa avea i latou ma molimau o lea mea moni. Sa latou iloa aua sa vaai i ai o latou mata, na faalogo o latou taliga, ma pai atu o latou lima i le [tino] faaletino o le Togiola toetu.

O le faatuatua tumau lena na aumaia le faaaliga vaaia lenei na tuuina atu i le Perofeta o Iosefa Samita:

“O lenei, ina ua uma ona faia molimau e tele e uiga ia te ia, o le molimau tupito lenei i molimau uma lava, ma te faia ia te ia: O loo soifua o ia!

“Aua na ma vaaia o ia, i le itu taumatau lava o le Atua; na ma faalogoina foi le siufofoga o molimau mai o ia lava lea o Le Toatasi na Fanaua e le Tama—

“E mai ia te ia, ma ui mai ia te ia, ma o ia, na foafoaina ai lalolagi uma, o e nonofo ai foi o atalii ma afafine na fanaua e le Atua.” (MFF 76:22–24.)

O i latou ua i ai se mautinoa faapena i o latou loto e talia o ia “O le Ala, ma le Upumoni, ma le Ola“ o se taiala saogalemu lea i lenei atulaulau le mautonu.⁵

O le Faatuatua i le Talalelei o le uluai laasaga lea i le poto moni, ma e taitaiina i le ositaulaga, agai atu i le poto ma le fiafia.⁶

O le faatuatua i le Atua e moni e le mafai sei vagana e patino. E tatau ona avea mou; e tatau ona avea ma’u; ma, ina ia aoga, e tatau ona puna ae mai le mafaufau ma le loto.⁷

O le mea o loo tatou manaomia i aso nei, o le faatuatua i le Keriso soifua, lea e sili atu nai lo na o se lagona, a o se mana lena e uunaia i tatou e faatino—o se faatuatua lena na te tuu le faamoemoe i le ola ma le lototele i le loto. E manaomia e i tatou le talalelei o le faatinoga.⁸

E le talia e le Ekalesia le mataupu faapea na o se talitonuga lava ia Iesu Keriso e faailoa atu i upu ona pau lena o le mea e taua i le faaolataga. Atonu e faapea mai se tagata e talitonu o ia, peitai afai na te le faia se mea e avea ai lena talitonuga po o le faatuatua ma mana faagaeetia e fai ai se mea, e faataunuu ai, e faatupuina ai le agaga, o lona ta’u atu e talitonu o le a le aoga lea ia te ia. “Ia outou galulue punouai ina ia faaolaina outou”, o se timaiga lea e faailoa atu ai e ala i galuega, e ala atu i taumafaiga mafaufau ma le usiusitai, e moni le faatuatua.⁹

O le Salamo e aofia ai se sui o le olaga, mafaufauga, ma galuega.

E le matalitonuina le manatu faapea e mafai e soo se tasi ona fesiligia le taua o le salamo. O mataupu uma lava o le talalelei pe a suesue faalelei i ai e faaalia ai le talafeagai ma le upumoni lena e silisili. O mataupu taitasi e foliga mai e malamalama uma lava, pe taitaiina atu pe opogi maia foi isi mataupu. Ua faapea la le faatuatua i se tagata e atoatoa, e musuia ai se tasi e ola amiotonu, ma e foliga mai e aofia ai le salamo.¹⁰

O le savali a [le Ekalesia] ia fesoasoani i tagata ia iloa o latou vaivaiga ma ia fesoasoani i tagata e faatoilalo na agasala ma vaivaiga. E leai so tatou taimi e talanoa ai pe o le a lona uiga o le agasala, ae sa tuuina mai e le tina o Ioane Uesele [O Ioane Uesele o se tagata tomai aoaoina i aoaoga tau le Atua] le faamatalaga lenei ia i tatou:

“Pe faamasinoina ea oe i le faatulafonoina pe o le le faatulafonoina o le fiafia? Ia faaaoga le tulafono lenei: Tagai nei i ai—po o le a lava se mea e faavaivaia ou manatu, lepetia le vaivai o lou loto, faanenefua ou lagona e uiga i le Atua, aveesea lou sagisagi i mea faaleagaga, po o le a lava se mea e faateleina ai le pule a le tino i le mafaufau, o lena mea o le agasala ia te oe, e tusa lava pe o le a le ta’umamaina i lona foliga mai.”

O le savali a [faifeautalai] o loo malaga atu i vaega uma o le lalolagi, o le savali a le Ekalesia i le lalolagi uma o le: Salamo i mea na e fesoasoani e faasilia ai lagona faaletino i luga atu o lo tatou alofa (fiafia) i le faaleagaga. O le pogai lena latou te alagaina ai le salamo! O le a lona uiga o le salamo? O se suia o le olaga, o se suia o mafaufauga, o se suia o faatinoga. Afai sa tumu oe i le ita ma le inoino, ia suia lena ita ma le feitagai i le alofa ma le manatunatu. Afai sa e olegia se uso, ia tuu atu i lou loto fuatia ifo na te taia oe ma suia lena uiga, ma ole atu mo lana faamagaloga, ma ‘aua lava nei toe faia. Ma faapea ona suia ai lou olaga mai mea na e i le tulaga o meaola po o manu, ua e salamo i au agasala. Afai e te upuvale i le Atua, ia ‘aua lava nei toe faia! Nai lo le upuvale i lona suafa, tapuai atu ia te ia! Ma a oo mai loa lena lagona o le suia i lou agaga, ona e manao loa lea ia e toe fanaufouina, ia maua se olaga fou. …

O lenei suia o le olaga, lenei salamo o se mea lea o loo manaomia e le lalolagi. O le suia lea o le loto. E ao i tagata ona sui ala latou te mafaufau ai! Sui ala latou te lagona ai! Nai lo le inoino ma taua’imisa ma osofai e le tasi le tasi, e tatau ona latou aoao ia alolofa!¹¹

O le salamo o le liliuese lea mai le mea lena e maualalo ma taumafai mo le mea lena e maualuga atu. I le avea ma se mataupu o le faaolataga, e aafia ai ia le le na o se faanaunauga mo se mea e lelei atu, a o se faanoanoa foi—e le o le faavauvau—a o le faanoanoa moni i le faatama’ia i soo se tulaga i mea e agasala ai, o mea e leaga, po o le manatu faatauvaa.

E le o se mea e le masani ai i tagata ona faanoanoa ona o mea sese sa faia, mo amioga valea ma agasala sa faia, peitai ua le liliuese mai na vaivaiga ma mea leaga. Atonu foi latou te lagona le faanoanoa; ae o le “faanoanoa, ” na ta’u mai ia i tatou, “ua na o sina taimi e le tumau, ma atonu e aofia ai le le suia o uiga po o le amio.” O le salamo, i le tasi itu, “o le faanoanoa lea i agasala atoa ma le tausalaina e le tagata o ia lava, ma le liliuese atoatoa mai le agasala.” O lea la, o se mea e sili atu nai lo na o le faavauvau; “e aofia ai le suia o le natura o le tagata ia talafeagai ma uiga faalelagi.”¹²

O le faatuatua moni ma le salamo e tau atu i le papatisoga.

Pe a tu le tagata talosaga mo le papatisoga i le auvai o le vai, a o lei tanumia o ia faatasi ma Keriso i le papatisoga, ua ia te ia se faatuatua mausali ua faavaeina le Ekalesia a Iesu Keriso i luga o le fogaeleele, ma o lenei faalapotopotoga o se faalapotopotoga sili lea i le lalolagi i aso nei mo le tausia o le olaga faaleagaga, mo le mauaina o le tuputupu ae moni faalelotu, mo le faaolataga o le agaga.

Ou te toe fai atu e faapea o lenei faatuatua mausali sa i totonu ia te ia; ma o lena, sa i ai le salamo moni, ma o lena salamo na tauaveina faatasi ma se faanaunauga e tuuese mea uma o le olaga ua tuanai na sa le tusa ai ma aoaoga o le talalelei po o le Ekalesia. O lona olaga tuai, ma agasala, pe afai sa i ai e tusa ai ma na tulaga, sa ia salamo moni ai. Sa ia tulimatai atu i le taimi o le a toe fanaufouina ai o ia i le malo o le Atua. Ua toe o se aga ona uia lea e ia o le sauniga o le papatisoga, o le tanumia lea o lona olaga tuai, faatasi ai ma uiga le atoatoa uma, o vaivaiga, o mea leaga, ma agasala na e o faatasi ma lena olaga tuai. Sa tatau ona tanumia o ia i le papatisoga, e pei ona toe tu mai o Keriso nai le oti e ala mai i le mana ma le mamalu o le Tama, ina ia tulai mai o ia i se olaga faafouina, o se uso o le Ekalesia a le Atua, o se atalii o le Tama, o se tagatanuu i le malo o Keriso. O le papatisoga na ia toe fanau mai ai, ma avea ma se uso e talia le Agaga Paia. Na tulai mai lona tino faafouina, ma sa faaeeina atu le Agaga Paia i ona luga; sa faamauina o ia e avea ma uso o le Ekalesia a Iesu Keriso. O iina lea sa tatou tutu ai i se tasi taimi. O lagona na, o lo tatou faatuatua, ma lo tatou faamoemoe.¹³

Na fetalai atu Iesu ia Nikotemo, “Afai e le fanau se tasi i le vai ma le Agaga, e le mafai ona sao o ia i le malo o le Atua.” (Ioane 3:5.)

Na tusi atu Paulo ma Peteru i uso o le Ekalesia, “Aua o atalii o le Atua outou uma lava i le faatuatua ia Keriso Iesu. Aua o outou uma lava na papatisoina ia Keriso ua outou oofu ia Keriso.” (Kalatia 3:26–27.) “O le faatusa foi lea mea o le papatisoga o loo faaola mai ai nei ia i tatou … i le toe tu mai o Iesu Keriso.” (1 Peteru 3:21.)

O nei mea e tolu ua tatou faatuina manino ai le faamoemoega tafatolu o le sauniga o le papatisoga, [ua ta’ua]:

O se sauniga na faatuina e le Atua lava ia ma e vaavaalua ma mataupu e faavavau o le amiotonu, e tusa ai ma le tulafono, o le mea lea, o le faamautuina lea mo le faaolataga o le tagata.
O se sauniga o le mulumuluga—o le faitotoa e tau atu i le avea ma uso i le Ekalesia i le lafu a Keriso.
O se faatusa matagofie ma le sili ua faatusa i le tanumia o le tagata “tuai” faatasi ai ma ona vaivaiga uma ma eleelea, ae tulai mai i se olaga ua faafouina.

O le sauniga o le papatisoga o se tulafono a le Atua, o le usiusitai i ai, i le naunautai, i le mama, i le faigofie, e aumaia ai ma le le ma’alofia faamanuiaga folafolaina a le Fesoasoani, o se Taiala faaleatua. … E ui atonu o le a amusia e tagata, tauemuina, ma masalosalo i lona aoga, ae e tumau pea lava le papatisoga i lona faigofie, e le gata o se tasi o faatusa aupito i matagofie ua lauiloa, ae o se tasi foi o tulafono pito sili ona aoga o loo faagaoioia mo le faaolataga o le tagata.¹⁴

Ia fesoasoani mai le Atua ia i tatou uma e folafola atu i le lalolagi e tatau ona salamo, o le taua o le papatisoga, muamua ia faataunuu le amiotonu uma, lua e avea ma faitotoa i le malo o le Atua, o le ala i le faitotoa i lana Ekalesia, ma lona tolu ia tanumia lo tatou olaga tuai ma ia taitaia e lona agaga paia.¹⁵

A uma loa ona tatou faaaoga ma le faamaoni le faatuatua, salamo, ma ua papatisoina, ona tatou maua lea o le meaalofa o le Agaga Paia.

Na o i latou e talitonu faamaoni ia Iesu Keriso i le avea ma Togiola o le Lalolagi ma salamo i a latou agasala, e maua le Agaga Paia. O i latou e papatisoina e aunoa ma le faatuatua ma le salamo o ni tagata moni ua na ona faafoliga mai.¹⁶

O loo matala le laina o fesootaiga, ma o loo saunia le Alii e taiala, ma e na te taialaina, lona nuu. … O le molimau a le Agaga Paia o se avanoa faapitoa. E pei lava o le ki o le leitio ma faalogologo atu i se leo i le tasi itu o le lalolagi. O tagata e le o i ai i lena malamalama e le mafai ona faalogo atu i ai, ae tatou te faalogo atu i ai, ma ua ia i tatou le aia e lagona ai lena leo ma lana taitaiga. E oo mai ia i tatou pe afai tatou te faia la tatou vaega.¹⁷

“Ia fesoasoani mai le Atua ia i tatou uma ia tausia ia mama o tatou loto, ia le pona o tatou uiga, ia gauai atu i musumusuga a le Agaga Paia, lea e moni, pe afai tatou te uai atu i ai o tatou taliga ma faalogo i ai.¹⁸

Ou te molimau atu ia te outou o musumusuga faaleatua o se mea moni. O alii ma tamaitai o e usiusitai i mataupu o le olaga ma le faaolataga, ma salamo faamaoni i a latou agasala, ma a o taumafai ma le faamaoni e ola e tusa ai ma mataupu o le talalelei, e taitaia ma musuia e le Agaga Paia, ma e faaalia i ai mea o le a oo mai. Ou te molimau atu o lena taitaiga o loo i ai i lenei Ekalesia ma sa i ai lava talu mai ona faavae e le Perofeta o Iosefa Samita.¹⁹

Ua iloa e le Au Paia o Aso e Gata Ai le upumoni o le Talalelei e faavavau ua uma ona toefuatai mai. Ma o le a se mea ua aumaia ai e lenei malamalama ia i latou? Ua aumaia ai i tagata uma, ua usiusitai ma le faamaoni ma le naunautai i mataupu o le salamo ma le papatisoga, le mea foaifua o le Agaga Paia, lea e faamalamalamaina o latou mafaufau, faapupulaina o latou malamalamaaga, ma tuuina atu ia i latou se malamalama o Keriso.

Ua i ai i le Au Paia o Aso e Gata Ai se taiala, se fesoasoani, se auala e fesoasoani latou te maua ai le upumoni, o lo latou faanaunauga ia iloa po o le a lo latou tiute, e le maua e le lalolagi. Ma o lenei taiala e manaomia; e le mafai e le tagata ona maua le upumoni; e le mafai ona ia maua le Atua i le na o le poto lava ia. Na ta’ua mai e faapea e leai se tagata e mafai ona maua le Atua i se tioata faamatatetele (microscope). O le faautaga lava ia e le o se taiala ua lava i le sailiga o le upumoni. O loo i ai se isi taiala e maualuga atu, ma sili ona mautinoa nai lo le faautaga. …

O le [faatuatua o le] mataupu lena e tosina atua o tatou agaga e mafuta ma le Agaga Maualuga atu lea e faamanatu maia i o tatou mafaufau mea uma, faailoa mai ia i tatou mea o le a oo mai, ma aoao mai ia i tatou mea uma. Ina ia maua lena Agaga o le tiutetauave lea o se Au Paia o Aso e Gata Ai o le e fia iloa le upumoni.²⁰

Fautuaga mo Suesuega ma Talanoaga

O le a le faatuatua ia Iesu Keriso? (Tagai itulau 219–20.) Aisea e avea ai le faatuatua ia Iesu Keriso ma mataupu faavae taua o le talalelei? (Tagai itulau 219–20.) Se a se mea e ao ona tatou fai ia e faatupuina ai ma faamalosia lo tatou faatuatua ia te Ia?
O a ni auala e mafai ai ona tatou faatinoina lo tatou faatuatua ia Iesu Keriso? Sa faamanuiaina faapefea oe a o e faaaogaina se faatuatua faapena ia Iesu Keriso?
Aisea e taitaiina atu ai le faatuatua moni ia Iesu Keriso i le salamo? E faapefea ona lautele atu le salamo nai lo na ona tuu o se amioga faapitoa e le toe faia? (Tagai itulau 220–22.) Se a se mea e ao ona tatou fai e salamo atoatoa ai i a tatou agasala? O a ni tulaga matautia o le le salamo?
O le a le faatusa o le sauniga o le papatisoga? (Tagai itulau 222–24.) O le a le feagaiga po o le folafolaga tatou te osia i le papatisoga? O le a se mea ua folafola mai e le Alii e taui mai ai? E mafai faapefea ona tatou manatua la tatou feagaiga o le papatisoga ma faaauau ona olioli i faamanuiaga e aumaia faatasi ai?
O le a le misiona a le Agaga Paia? (Tagai itulau 224–25.) O le a se mea e manaomia mai ia i tatou ina ia lagona ai musumusuga a le Agaga Paia? (Tagai itulau 224–25.) Aisea e avea ai le maua o le meaalofa o le Agaga Paia ma mea e manaomia e toe foi atu ai i lo tatou Tama o i le Lagi?
E mafai faapefea ona tatou iloa le taimi ua taitaia ai i tatou e le Agaga Paia? O a ni aafiaga sa oo ia te oe sa taitaia ai oe e musumusuga mai le Agaga Paia?

O Mau e Faatatau i Ai: Ioane 14:26; Iakopo 2:14–20; 2 Nifae 2:21; 32:5; Mosaea 18:8–10; Alema 32:21; Moronae 10:5; MFF 11:13–14; 58:43; 121:26

sister — “O le salamo o le liliuese lea mai se mea e maualalo ma taumafai mo le mea e maualuga atu.“