Mataupu 18

Lototele e Ola Amiotonu Ai

O le mea aupito sili ona moomia i le lalolagi i aso nei o le faatuatua i le Atua ma le lototele e fai Lona finagalo.¹

Folasaga

I se lauga o se konafesi aoao, na faamatala ai e Peresitene Tavita O. MaKei se tala sa faamatala e se tamaloa e igoa ia Semi L. Korotona (James L. Gordon):

“Na tonu i se alii talavou … e avea o ia ma tagata o matataeseese i se tasi o au kamuta. O ia o se alii talavou atamai i lona laitiiti ma sa fiafia tamaloloa e talia o ia. Na latou fai atu, ‘Se topetope, tatou inu e sami ai le ulufale mai o lenei alii talavou i la tatou au kamuta!’ Sa latou sasaa ifo le pia [ma] tuu atu ia te ia le ipu malamalama.

“Sa fai atu o ia, ‘Leai, faafetai, ou te le inupia.’

“ ‘Ia, ’ le tala a se alii matua faaletaupulea, ‘matou te le talia i la matou vaega ni tagata e le inupia.’

“ ‘Ia, ’ le tala a le tama talavou, ‘ia o le a i ai la se tasi e le inupia pe afai tou te talia a’u.’

“Na kola mai o ia e se tasi ma fai atu, ‘Taule’ale’a, e te inua le pia lea i totonu po o lou alu i fafo!’

“ ‘Manaia tele, o lea na ou sau iinei ma se peleue mama ma se loto e mama. E mafai ona e faaeleeleaina lo’u peleue pe a e manao ai, ae le mafai ona e faaeleeleaina la’u amio.’

O le ta’ua o le alii talavou i lea tala, na saunoa ai Peresitene MaKei:

“Ua uma ona koleni o ia—ua sa’o lo’u faaaogaina o lena upu— e le gata sa aoaoina, ae sa koleni o ia e aloese i le faaaoga o le tapaa ma le ava malosi, o se pia oona. O lona uiga lena o la’u tala o le lototele mo le amio mama. O le mea aupito sili ona moomia i le lalolagi i aso nei o le faatuatua i le Atua ma le lototele e fai Lona finagalo.”²

Aoaoga a Tavita O. MaKei

O le Faaola o le faataitaiga silisili o le lototele.

O Ia lava o Le pe o Le foi e ao ona avea ma taiala i o tatou olaga, o se tasi e sili ona lototele o tagata uma. “Ia Iesu tatou te maua ai le lototoa sili; o le lototele aupito maualuga; o le lototoa i lona faatumutumuga.” O le lototoa moni na te puipuia le mea tonu ma faafetaiaia puapuaga e le poi. I lenei la tulaga sa avea le Faaola ma faataitaiga o le lototele moni ma le lototoa. O le faatusa o lenei mea ou te manao e na ona ta’ua ai le faamamaina o le malumalu [tagai Mataio 21:12–13]; po o lona ta’u atu foi ma le le fefe o le upumoni ina ua le talia o ia e lona lava nuu i Nasareta [tagai Luke 4:16–32, 43–44]; po o le taimi foi na [faaitiitia ai le aofai] o le lima afe o tagata i Kapanaumi … ma sa faliu atu ai o ia [i le Toasefululua] ma fetalai atu, “Pe tou te fia o ese foi?” [Tagai Ioane 6:66–67.] E ui i lea, sa lei i ai lava se taimi sa faavaivai ai le Matai pe liliuese ai foi mai lona ala faamoemoeina. O le ituaiga lototele lea tatou te moomia i le lalolagi i aso nei.³

A’o o atu fitafita e faaoo o latou lima ia Iesu, na oso atu … Peteru e laveai lona Matai, “ua sei e ia lana pelu, ma taia ai le auauna a le ositaulaga sili ua tipiesea lona taliga.” [Tagai Ioane 18:10.] … “Ina sulu ia lau pelu i lona faamoega, ” o le poloai atu lea a le Faaola, “ou te le inu ea i le ipu ua aumai ia te a’u e lo’u Tama?” [Ioane 18:11.] E maeu lea lesona ia Peteru! E ui lava o lona tiute e tau atu i puapuaga ma le maliu, ae sa lei fetoa’i lava le Alii i Lona malosi. …

O le malosi o Peteru ma lona faamaoni sa fetoa’i; ae sa ia le mafai ona ia faatagaina ia lava e sosolaese ma isi. Sa le mafai foi ona ia filifili e sili ona la o ma Iesu; sa ia le faia se mea o na mea, ae sa ia “mulimuli mamao atu foi ia te Ia, ua o’o lava i le maota o le ositaulaga sili.” [Mareko 14:54.] O le taimi muamua, sa nofonofo ai lava i fafo o ia, ae sa ia alu atu mulimuli ane i le mea sa nonofo ai auauna. …

[Ina ua mavae ona faafitia faatolu e Peteru lona iloa o le Alii], sa faliu atu le Faaola … “ma silasila atu ia Peteru.” Ona ia manatua lea o le fetalaiga a lona Alii, “E le vivini moa seia e faafiti faatolu mai ia te a’u, ” ona alu ai lea o Peteru i fafo ua tagi lotulotu. [Tagai Luke 22:54–62.]

Ua ta’ua e faapea na ulu fafo Peteru “ua le gagana mai luma o tagata uma … ma sa suia le leai o se pisa, i le tagi lotulotu, ” sa faanoanoa na’ua o ia ma sa nofo toatasi ai i le aso atoa i le Aso Faraile e aofia ai ma le Aso Toonai ina ua mavae le faasatauroga o le Faaola. Afai o lea, o lona faanoanoa i le mea sa ia faia sa sili ona matuitui i lona manatua o afioga alofa e tele sa fetalai mai ai le Faaola ia te ia, faapea ma le tele ma tele o taimi fiafia sa la mafuta ai ma le Alii. O upu uma lava ma galuega ma vaaiga e uiga i lona Matai na toe oo mai i lona mafaufau faatasi ma se uiga fou. … I le lotolotoi o ona loimata tiga matuitui, sa ia vaai ai i uiga faatamatane moni uma sa faaalia e Iesu—o le Migao, Faiuso, Onosai, Faamaoni, Lototele.⁴

O le faamoemoe ma le taunuuga o le lalolagi ua faaautu i le Tagata o Kalilaia, lo tatou Alii ma le Faaola, o Iesu Keriso. I lou taimi pe a e tauina le taua o le aso, ia e vaai ifo ma iloilo e oe lava ia ou mafaufauga ma lagona ma vaai pe e te talitonu moni i lena mea? [O se tusitala] i se tasi aso na ia faia le fesili: “Pe o Iesu ua na o se tagata i talafaasolopito, o se tagata Paia o valiina lona ata i tioata vali o faamalama o falesa, … e le faafetaiaia ma e tau le ta’ua lava lona suafa, pe o loo avea pea o ia ma tagata e pei ona sa i ai a o i ai o ia i la le tino, o se mea moni, o se tagata e pei lava ona lagona e i tatou, o se uso matua, o se taiala, o se fautua, o se faamafanafana, o se leo e sili o loo valaau mai ia i tatou mai le taimi ua tuanai ia ola faatamalii, ia taitai ma le lototoa, ma ia tumau lo tatou lototele e oo i le iuga.” O ai ea o Ia ia te oe, lo’u uso faigaluega?⁵

E puna ae le lototele mai le faatuatua ma le faamoemoe.

Ua sili atu se tiutetauave ua ia i tatou nai lo se isi lava taimi ia aoao ma ola i le Talalelei a Iesu Keriso. Ua sili atu tiute ua i o tatou luma. O le galuega mulimuli e lei mae’a atoa. … Tatou te manaomia le lototele e ulufale atu ai i na lotoa fou; tatou te moomia le lototele e faafetaia’ia ai o tatou tulaga o i ai nei ma tuutuuga, ma o le ala lena ua ou filifilia ai le matua lea, “O outou na uma lava, o e faamoemoe ia Ieova, ina faalototetele ia, e faamalolosia foi e ia o outou loto” [Salamo 31:24.]

I lenei folafolaga o loo i ai ni mataupu se lua na e tatau ona faananau i ai tagata lotu moni uma o le—faatuatua ma le lototele. O le a se mea ua faatatau i ai lenei fuaitau? Ua tatou iloa ma le mautinoa o loo tausia e le Alii le faatuatuaina o lona nuu; o le mea lea, ia ‘aua ai le faavaivai, a ia lototetele ma o le a le faivale lo tatou faamoemoe. O le faatuatua i le Atua, faalagolago, talisapai o tatou uso a tagata, lototele i o tatou talitonuga, o le a oo ai ina mafai e i tatou ona ausia soo se taumafaiga amiotonu.⁶

O le faatuatua i le mana pule aoao, i le puipuiga patino, ma faapitoa a lo tatou Tama—ma e tatou te mananao ia manatu faapena ia te Ia, o se Tama alofa—ia tatou faafetaia’i ai o tatou tulaga faigata ma le lototele.⁷

E tatau i tagata talavou ona atiina ae le lototele e faatumau ai mataupu taua faaleagaga.

[O le faatumauina] o a tatou faataitaiga lelei o se tasi lena vaega e mafai ona tatou faaalia ai le lototele, ma maua ai le faamaoniga a le Atua o Le tatou te faalagolagoina. O taimi nei e ao ai i tagata ona mafaufau manino, ae ‘aua le tafiesea mai i o latou faavae manatu le taua uma na e ofoina mai faapei o se vaifofo i o tatou tulaga faafatiatama’i i le taimi nei. O tulaga i nei vaitaimi ua manaomia ai lava se autalavou lototetele e uumau i luga tulaga faatonuina o le ola mama. I lena eria e mafai ona tatou maua ai le lototele moni pito sili faaleamio. Ua ta’ua mai e faapea o le lototoa o se lototele faapitoa lea. Ia e le faapea o toa aupito maoae e maua i taimi uma i le malae o le taua. Ou te manatu tatou te maua foi toa aupito maoae i a tatou autalavou. O alii talavou ma tamaitai talavou, pe a tuu atu i vaega faalevafealoai, o le a tutu atu ma le le fefefe ma ta’uleagaina mea na tatou te iloa e faavaivaia ai le amio, o le ola moni malosi o le autalavou.

“E leai se tasi taimi i le talafaasolopito o le lalolagi, ” le tala a se [tasi alii tusitala], “ua sili ai ona manaomia ni toa o le amiolelei. O loo faatalitali mai le lalolagi mo ni toa faapena. I le faautaga poto a le Atua ua poloaiina ai saienitisi e galulue ma saunia le ala mo lena tulaga. Mo i latou, ua ia faataatia ai ni ona asaga u’amea, ma toso faasasa’o ona uaea, ma faafesootaia vasa. Ae pe o fea ea i latou? Pe o ai ea o le a ia manavaina atu i o tatou vafealoai faalealalafaga ma faaupufai o malo, le manava o se ola e maualuga atu?” “O le mea e sili ona taua i le lalolagi, ” le tala a se saienitisi maoae, “e le o le maua o Kalelio, Faratei, (Galileo, Faraday), ma isi, a o le talitonu i le moni o mataupu taua faaleamio ma faaleagaga.” Ou te aioi atu i le autalavou ia lototetele i le faatumauina o amioga mama ma faaleagaga o le Talalelei a Iesu Keriso. Pe a mavae ia mea uma, “Se a le aoga i le tagata, pe afai na te maua le lalolagi uma ae maumau lona ola? se a foi se mea e avatu e le tagata e togiola a’i lona ola?” [Mataio 16:26.]⁸

O le faamoemoega o aoaoga o le faatupuina lea o punaoa i le tamaitiiti na o le a fesoasoani i lona manuia i le umi lava e mafai ai ona ola ai; ia faatupuina le malosi o le amio pulea ina ia le mafai lava ona avea o ia ma pologa i le faatuutuu poo isi vaivaiga, ia faatupuina tulaga faatamatane [malosi], o le tulaga matagofie faatamaitai, ina ia maua ai e tamaiti taitasi ma autalavou uma le folafolaga a se uo, o se soa, o se tasi atonu o le a talafeagai mulimuli ane ona avea ma tane poo se ava, o se tama e fai ma faataitaiga poo se tina alofa ma le atamai, o se tasi e mafai ona ia faafetaia’ia le olaga ma le lototele, faafetaia’ia puapuaga ma le malosi, ma faafetaia’ia le oti e aunoa ma le fefe.⁹

Sa ou faitau mai le MATAUPU e limasefulu ma le tolu o le Alema, lea ua ia faamatala maia se tala e uiga i taulelea ua matua totoa foi i le lototele ma le malosi atoa ma le atamai—o ni alii o e sa faamaoni i taimi uma i soo se mea sa faatuatuaina ai i latou. O ai ea nei alii talavou? O i latou o ni atalii o ni matua sa faapena foi le faamaoni i faatuatuaga uma. O latou matua o ni sa Lamana na liliu mai o i latou ia, ina ua oo mai le Agaga o le Atua i o latou luga, sa latou tuuina atu o latou ola i le galuega auauna i o latou uso a tagata, ma i la latou auaunaga i le Ekalesia sa latou osifeagaiga ai latou te le toe faasagatau atu lava i o latou uso, latou te le toe tauina lava se taua. Sa faapena la latou tautinoga; faapena la latou feagaiga; ma sa faamaoni i latou i ai seia oo i le oti.¹⁰

Ou te aioi atu i le autalavou ia lototetele i le faatumauina o mataupu taua o le talalelei a Iesu Keriso o le amio mama ma le faaleagaga. E moomia e le lalolagi ni toa amio mama!¹¹

I upu a se[tasi tusitala]: … “E lua ala ua tatala mai mo outou—e tasi e tau atu i se nofoaga e faasolo i lalo lona maualalo, lea e faalogoina ai le tagi o le atuatuvale … ; a o le isi e tau atu i alatanu o le taeao lea e faalogoina ai le alalaga fiafia o tagata ma le tauia o taumafaiga faamaoni i le tino ola pea.” …

I le faia o le filifiliga, … e tuu atu e le Atua ia te outou se tofa manino, se vaaiga manino, ni loto malolosi, ni agaga lotototoa. I le filifili ma le poto, talosia ia outou savavali atu ma ulu e ea i luga, ma loto ua matala e faailoa ai e te lei sese i se tasi. E ui lava o tiute o le olaga e oo ina mamafatu ma oo mai ai faanoanoaga i o outou luga, talosia ia avea le sulu o le olaga faapei o Keriso na te uunaia pea oe e aunoa ma le atuatuvale.¹²

O le lototele faaleamio, e mafai ona tatou faatoilalo ai faigata o le olaga.

O le lototele o se uiga lena o le mafaufau lea na te faafetaia’ia tulaga matautia poo mea tuufaafeagai ma le toto’a ma le maua’i, lea e mafai ai e se tagata ona faafetaia’ia faigata na e folasia mai i lona ala agai i sini amiotonu. … O le lototele e aofia ai le faafetaia’ia o faigata ma faatoilaloina.¹³

O le a lava se faigofie e fai ai le mea sa’o pe a lelei tagata tou te faatasi, ae e le faigofie ona puipuia le mea tonu pe afai o le toatele o le motu o tagata o loo tetee i ai; peitai ane, o le taimi lena e faailoa atu ai le lototele moni. O le Perofeta o Iosefa, mo se faataitaiga, sa tauemuina ma sauaina i lona fai atu sa ia maua se faaaliga, ae sa tumau pea lona faamaoni i lana molimau. E ui lava “sa inosia o ia ma sauaina peitai na fai mai o ia e moni na fetalai mai le Atua ia te ia, ” ma “E le mafai e le lalolagi uma ona uunaia o ia e mafaufau pe talitonu i se isi mea.” [Tagai i le Talafaasolopito o Iosefa Samita—2:24–25; ua faaopoopo le faatusilima.]

E faapena la le lototele ma le mausali e tatau ona maua e tagata uma. A iloa loa e se tasi le mea sa’o, ona tatau lea ona ia maua e le aunoa le lototele e puipuia ai lena mea sa’o, tusa pe ua faafesagai ma tauemuga po o le faasalaga.¹⁴

Ia tatou lototetele i le puipuia o le mea sa’o. Ia ‘aua le fefe e ta’u atu le mea sa’o. Ia tatou faamaoni.¹⁵

Tau ia ina ia tuuina mai ia i tatou e le Atua le lototele e filifilia ai le sa’o, o le agavaa e talisapaia ai mea lelei o le olaga, ma le mana e auauna atu ai ma le faamaoni ia te Ia faapea ma o tatou uso a tagata.¹⁶

O le upumoni o le faamaoni lea i le mea sa’o pe a tatou vaai i ai; o lo tatou ola lototetele i o tatou olaga ia tusa ai ma a tatou sini; o le mana lea e le aunoa.¹⁷

Fautuaga mo Suesuega ma Talanoaga

O le a ea le lototele? (Tagai itulau 191.) Aisea e taua atu ai le lototele faaleamio nai lo le lototele faaletino? E mafai faapefea ona tatou faateleina pe faamalosia lo tatou lototele faaleamio? E mafai faapefea ona tatou ola i le talalelei ma le lototele filemu, i aso taitasi?
O a nisi o faataitaiga mai tusitusiga paia a le Faaola ma isi o faailoa mai ai le lototele atoatoa faaleamio? (Tagai itulau 192–93.) Sa faamalosia faapefea outou i lenei faataitaiga?
O le a le faia i le va o le faatuatua ma le lototele? (Tagai itulau 192–93.) E faapefea ona fesoasoani mai le Alii ia i tatou e faafetaia’ia mea tuufaafeagai ua foliga mai ua lofituina faapena? O le a se mea e ao ona tatou faia ia maua ai Lana fesoasoani?
O le lotovaivai e alu ese ai le lototele o se tasi. Aisea e avea ai le lotovaivai ma auupega matautia a le fili? E mafai faapefea ona puipuia mai ai i tatou ma faatoilaloina le lotovaivai?
O a ituaiga feoeoeaiga po o isi tulaga e manaomia ai le lototele e sili atu? E mafai faapefea e le Au Paia o Aso e Gata Ai ona faailoa atu le lototele i nei tulaga? E mafai faapefea ona tatou fesoasoani ma uunaia le fanau ma le autalavou o le Ekalesia ia lototetele i le faatumauina o tulaga faatonuina o le talalelei? (Tagai itulau 194–96.) E mafai faapefea e le lomiga o le tusi Mo le Malosi o le Autalavou ona fesoasoani i lenei taumafaiga?

O Mau e Faatatau i Ai:Teuteronome 31:6; 2 Tupu 6:16; Roma 15:13; 1 Nifae 3:7; MFF 121:7–9

“I totonugalemu o ona loimata oona, na vaai ai [Peteru] i uiga moni uma faatamatane e pei ona sa faaalia e Iesu o le—Migao, Faiuso, Onosai, Faamaoni, Lototele.”

two thousand stripling warriors — E faapei foi o le autau totoa talavou a Helamana, e ao ona tatou “matua totoa i le lototele, ma le malosi atoa ma le atamai” ma ia “faamaoni i taimi uma” (Alema 53:20).