Mataupu 4

O Elemene o Tapuaiga

Ou te tatalo ina ia tatou maua le malosi e ola ai ina ia tatou agavaa mo taitaiga ma musumusuga faalelagi; ia avea foi tapuaiga, manatunatuga loloto, fesootaiga, ma le faaaloalo ia mafai ai ona lagonaina le moni aiai o le mafai ona tatou maua se fesootaiga vavalalata ma lo tatou Tama i le lagi. E tuuina atu lau molimau e moni lenei mea; e mafai ona tatou fesootai ma lo tatou Tama Faalelagi.¹

Folasaga

Na vave ona lagonaina e Tavita O. MaKei a o laitiiti, le filemu e maua i le fesootai ma le Atua. “Ou te manatua a o ou taoto [i le moega] i se tasi po, ” na ia tomanatu ai, “ma le gatete i le fefe. A o ou laitiiti, ou te fefe lava a’u ia, pe te’i foi ua ou fefe i le pogisa, ma e tele taimi ou te taoto ai ma mafaufau i tagata talepe fale, aitu o le po, ma mana le vaaia. Ma sa ou taoto i lea po ma le fefe tele, ae peitai sa aoaoina au e tali mai le Atua i tatalo. Ina ua maua lo’u malosi, sa ou nofo ae i luga mai le moega, tootuli i le pogisa, ma tatalo atu i le Atua e aveese lena lagona fefe; ma sa ou faalogoina ma le manino e pei ona outou faafofoga mai i lo’u leo i lenei aoauli, ‘Aua le fefe; e leai se mea o le a e tiga ai, ’ Oi, ioe, o nisi o le a faapea ane—‘ua na o se mafaufauga.’ Fai pea le tala e te manao ai, ae ou te iloa na oo mai i lo’u agaga le lagona filemu matagofie o se tali o le tatalo a se tamaitiiti. O le faatuatua lena lea e totoina i mafaufau o [tamaiti] i aiga uma o le Au Paia o Aso e Gata Ai i le lalolagi atoa. Ou te manatu o fanau e tausi ma aoao e fesootai vavalalata ma le Tama e Faavavau, e le mafai foi ona i ai se agasala tele po o se leaga tele i totonu o lena aiga.”²

E le gata i le sailia o “fesootaiga ma le faavavau”³ i taimi sa tuua ai na o ia, ae sa fiafia foi Peresitene MaKei e tapuai faatasi ma isi Au Paia o Aso e Gata Ai. Sa ia faamatalaina se mea na tupu i se sauniga faale-Ekalesia lea e le mafai ona galo ia te ia:

“O se tasi o sauniga e sili ona matagofie sa ou auai, o se aofia e sili atu ma le valuselau tagata sa tufatufa atu i ai le faamanatuga, ma a o faia lena faamanatuga, e leai ma se leo sa mafai ona lagona sei vagana ai le tata o le uati—e valuselau tagata, sa tofu maua e i latou uma se avanoa e fesootai ai ma le Alii. Sa leai se mea na faalavelave, leai se leo o mea faimusika, leai se pese, leai se tautala. Sa maua e tagata uma taitoatasi le avanoa e iloiloina ai ia lava ma mafaufau pe o agavaa pe le o agavaa foi e ‘ai ma inu i le faamanatuga. O se avanoa paia e latalata atu ai i lona Tama i le lagi. O se faataitaiga maoae lena!”⁴

Sa uunaia e Peresitene MaKei tagata uma o le Au Paia o Aso e Gata Ai e sailia lenei faataitaiga i a latou sauniga tapuai ma o latou olaga faaletagata. Sa ia saunoa, “O le maua o le fesootaiga ma le Atua, e ala i le Agaga Paia, o se tasi o manaoga silisili ona tamalii o le olaga.”⁵

Aoaoga a Tavita O. MaKei

O le migao o le faaaloalo aiai lea e fefiloi ma le alofa.

E i ai se uiga faaalia o le migao, e le matuueseeseina ma le talitonuga o loo i ai se Atua, lea ou te manao nei lava e faagauai atu i ai ma le loto atoa le Ekalesia atoa. O le faailoga silisili lava o le faaleagaga, o le migao lea; o le migao o le faaleagaga ia. O le migao o le faaaloalo a’ia’i lea e fefiloi ma le alofa. O se “lagona lavelave e aofia ai lagona fefiloi o le agaga.” Na fai mai [se tasi tusitala] o le “uiga e silisili ona maualuga o lagona faaletagata soifua.” Sa i ai foi se nofoaga sa ou fai atu ai, afai o le migao o le uiga e silisili ona maualuga, o lona uiga o le le migao o le uiga lea ua silisili ona maualalo e mafai ona ola ai se tagata i le lalolagi. …

O le migao o loo opogi ai lagona lelei, faaaloalo, mamalu, ma le faaeaea. O le mea lea, afai e leai se vaega o le migao, o lona uiga, o le a leai se ava fatafata, leai se agamalu, leai se manatu i lagona o isi, po o aia tatau a isi. O le migao o le uiga tausaafia faavae lea i totonu o lotu. O “se tasi lea o faailoga o le malosi, o le le migao, o se tasi foi o faailoga mautinoa o le vaivai. E leai lava se tagata e oo i se tulaga maualuga, ” o le tala lea a se tasi tagata, ”se tagata e ula i mea paia. O faamaoni silisili o le olaga, ” na faaauau ai lana tala, “e tatau lava ona ava ma migao i ai aua a leai, o le a teena i le aso o le faamasinoga.”

Matua, o le Migao, e faapei foi o le alofa mama, e amata i le aiga. I le popofou o le olaga faatamaitiiti, e ao ona aoaoina fanau ina ia faaaloalo, ia ava —ia faaaloalo le tasi i le isi, o tagata ese ma tagata asiasi mai—faaaloalo i tagata matutua ma e ua vaivai— faaaloalo i mea paia, o matua ma le alofa faamatua.

E tolu faatosinaga i le olaga faaleaiga e fagua le faaaloalo i fanau ma fesoasoani e faatupuina lena faaaloalo i o latou agaga. O mea nei: muamua, o se Taitaiga Agamalu ae mausali; lona lua, Ava Fatafata e faaalia e matua o le tasi i le isi, i le ma fanau; ma lona tolu o le Tatalo lea e auai tamaiti i le faatinoga. I aiga uma lava i totonu o lenei Ekalesia, e tatau ona taumafai matua e faatino ma le poto le uunaia o fanau i na faavae e tolu.⁶

O le migao e taitai atu ai mafaufauga i le Atua. A aunoa ma le migao e leai se lotu.⁷

Ou te vaai i le migao o se tasi o uiga e sili ona tausaafia o le agaga. O se tagata e le migao o se tagata le talitonu lea. …

E faaalia e le migao le aganuu maualuga, ma le faatuatua moni i le Atua ma lana amiotonu.⁸

Ua uunaia au e tuu le migao i tafatafa o le alofa. Na muai taua e Iesu i le tatalo a le Alii: “Lo matou Tama o i le lagi, ia paia lou suafa. … ” [Mataio 6:9.] Paia—faia ia paia—ia faia ma le migao.⁹

Afai o le a tele atu le migao i loto o tagata, o le a itiiti se avanoa mo le agasala ma le faanoanoa ma o le a tele atu foi avanoa e maua ai le olioli ma le fiafia. Ina ia sili atu ona alofagia, sili atu ona mau fetuunaiina, sili atu ona matagofie, o lenei oloa taua o loo i ai faatasi ma uiga tausaafia matagofie, o se galuega faatino aoga o taumafaiga silisili tuufaatasi uma ma tatalo a taitai taitasi, o matua uma, ma tagata uma o le Ekalesia.¹⁰

O le manatunatu loloto e oo atu ai i fesootaiga faaleagaga ma le Atua e ala i le Agaga Paia.

Tatou te faale-amanaiaina lava le taua o le manatunatu loloto, o se mataupu faavae o le tapuai. E lua lava elemene o a tatou tapuaiga: Muamua o se fesootaiga faaleagaga e tupu ae mai o tatou lava manatunatuga loloto, o le isi, o faatonuga mai isi, aemaise lava mai ia i latou o e o i ai le pule e taitai ma aoaoina i tatou. Mai nei elemene e lua, o le mea e sili ona aoga mo o tatou lava mafaufauga, o le manatunatu loloto lea. O le manatunatu loloto o se gagana a le agaga. Ua faauigaina e faapea, “o se ituaiga tapuaiga patino, po o gaoioiga faaleagaga, e aofia ai le vaavaai loloto faalemafaufau i se autu faalelotu.” O le manatunatu loloto o se ituaiga o tatalo. …

O le manatunatu loloto o se tasi o faitotoa sili ona faalilolilo, ma e sili foi ona paia tatou te ui atu ai i le afioaga o le Alii Sa faaali mai e Iesu se faataitaiga mo i tatou. O le taimi lava na papatisoina ai o ia ma maua le faamaoniga a le Tama, “O lou Atalii Pele lena, ua ou fiafia lava ia te ia, ” [Mataio 3:17] Sa [malaga] Iesu i le mea ua tatou iloa nei o le mauga o faaosoosoga. Ou te fia mafaufau i ai o se mauga o manatunatuga loloto, o i, i le fasefulu aso o anapogi, sa fesootai ai o ia lava ma lona Tama, ma manatunatu loloto ai i matafaioi o lana misiona tele. O se tasi o tali o lenei fesootaiga faaleagaga o le malosiaga lea na faatagaina ai o ia e fai atu i le tau faaosooso:

“… Ina alu ese ia oe Satani: aua ua tusia, e te ifo atu i le Alii lou Atua, ua na o ia lava e te auauna i ai.” (Mat. 4:10.)

Ao lei ia tuuina atu … le lauga matagofie i luga o le mauga, sa na o ia lava, o faasolo ai ona mafaufauga. Sa ia faia foi le mea e tasi ina ua tuanai lena Sapati pisi, ina ua ala po ae i le taeao, sa talimalo ai Peteru ia te ia. E alu atu Peteru i le potu e tali ai malo ua leai se isi o i ai, ma ina ua latou saili ia [Iesu] sa latou maua o ia ua na o ia lava. O le taeao lena na faapea atu ai Peteru:

“… O loo saili tagata uma ia te oe.” (Mareko 1:37.)

Na faapena foi, ina ua uma ona fagaina e Iesu o le lima afe, sa ia faatonuina le Toasefululua e faataape le motu o tagata, ae maliu ae o Ia i le mauga sei nofo ai na o ia. Fai mai le tusitala, “ua oo i le afiafi, ua na o ia sa i ai.” (Mataio 14:23.) Manatunatu Loloto! Tatalo!¹¹

Ina tatou tuu ia le Atua i le totonugalemu o o tatou olaga. … O le fesootai ma le Atua, e ala i lona Agaga Paia, o se tasi o faanaunauga aupito tamalii o le olaga. O le taimi lea e ulufale mai ai le filemu ma le alofa o le Atua i le agaga, pe afai e avea le auauna atu ia te ia ma faatosinaga autu i le olaga o le tagata ma lona ola ai i le fogaeleele.¹²

Tatou te o i le fale o le Alii e fesootai ai ma Ia i le agaga.

Tatou te ulufale atu i se falelotu e tapuai ai i le Alii. Tatou te mananao ia maua lona Agaga, ma o le mauaina o lona Agaga tatou te atiina ae ai lo tatou lava malosi faaleagaga.¹³

E faapaia falesa ma faamanuia o ni fale e tapuai ai. O lona uiga, o i latou uma lava e ulufale atu i ai e tapuai, pe tau foi ina faafoliga e tapuai, faatasi ma se faamoemoe ia latalata atu ai i le afioaga o le Alii nai lo le tulaga latou te mafai ai i le alatele po o le lotolotoi o popolega o le olaga i aso fai soo. I se isi faaupuga, tatou te o i le fale o le Alii e feiloai ai ma ia ma fesootai ai ma ia i le agaga. O lona uiga, o lena ituaiga o nofoaga e feiloai ai, o le mea muamua e tatau ona fetaui ma talafeagai i soo se itu, pe fuafua faapea o le Atua o le malo faaaloalogia, po o tagata tapuai foi o ana malo faaaloalogia ia.

Pe o le nofoaga e tapuai ai o se falelotu faatauvaa po o se “fale e matagofie sona ata na tusia e pei o se solo e susua ona faaupuga” ma o loo fauina i le maamora iila ma e fola totonu i maataua, e leai lava se eseesega i o tatou uiga e faaalia i le Afio ai o le Silisili Ese. A iloa o loo afio ai le Atua iina, ua lava lea e uunaia ai i tatou ina ia tatou amio lelei ma faaaloalo.

O lea la, o le avea ai o i tatou ma tagata o le Ekalesia i a tatou potopotoga tapuai, e tele naua avanoa e ao ona tatou faaleleia. E tatau i taitai pulefaamalumalu i siteki, uarota, ma fonotaga a korama, aemaise lava o faiaoga o vasega, ona latou faia ni taumafaiga faapitoa e tausisia lelei ai le tulaga mamalu ma ia sili atu ona migao i le taimi o tapuaiga ma iloiloga. O le faaitiitia o le talatalanoa i tua atu o le pulelaa o le a matua fesoasoani tele mo le aofia o loo faasasaga atu i ai. E tatau ona iloa e tamaiti e ala i faataitaiga ma mataupu, e le tatau ona i ai le fenumiai ma amioga e le talafeagai i se faapotopotoga tapuai. E tatau ona latou iloa a o laiti, ma faamamafaina i le talavou, o se tulaga e le faaaloalo le talanoa pe taumusumusu foi i le taimi o se lauga, ma e sili atu ona le migao le tulai ma alu, a o lei faatuuaina, sei vagana ai o se faalavelave faafuasei.¹⁴

E lua lava faamoemoega e ala ai ona fausia falelotu taitasi: muamua, ina ia avea ma nofoaga e aoaoina ai tagata uma i ala a le Atua, ma le lona lua, ina ia taufai vivii atu ai tagata uma i lo tatou Tama o i le lagi, e leai se isi mea o finagalo ai mai lana fanau ae tau ina ia avea i latou ma alii ma tamaitai e aga faatamalii ina ia latou toe foi atu ai i lona afioaga.¹⁵

Pe a e ulufale atu i se fale o le Ekalesia, ua e ulufale mai i le afioaga o lo tatou Tama i le lagi; ma ua tatau ona lava lena manatu e faatosinaina ai oe e saunia i ou laei, ina ia mafai ai ona e saofai ma le tatau i lona afioaga.¹⁶

Ia aua nei o tatou faia le Aso Sa ma aso malolo. O se aso paia, ma i lena aso tatou te o ai i le fale o tapuaiga ma saili lo tatou Atua. Afai tatou te saili o ia i lena aso Sapati, ma oo atu i lona afioaga i lena aso, e tatau ona itiiti se faigata tatou te i ai i lona afioaga i aso mulimuli mai o le vaiaso.¹⁷

O le faamanatuga e maua ai se avanoa e fesootai ai ma le Alii.

O le faamafanafanaga silisili o lenei olaga o le mautinoa lea o loo i ai se sootaga vavalalata ma le Atua. … O le taimi o le faamanatuga e ao ona avea ma se taimi e fafaguina ai lenei lagona o fesootaiga.

“… o lea lava po na faalataina ai le Alii o Iesu, na ia tago ai le areto:

“ua ia faafetai, ona tofitofi ai lea, ma fai atu, Ina tago ia, ina aai, o lou tino lenei ua tofitofi ma sui o outou, ia outou faia lenei mea ma faamanatuga ia te au.

“Ua ia faapea foi i le ipu ina ua uma ona aai, ua faapea atu, O le ipu lenei o le feagaiga fou lea i lou toto, ia outou faia lenei mea ma faamanatuga ia te au i aso uma tou te feinu ai.

“Aua o aso uma tou te aai ai i lenei areto, ma feinu i lenei ipu tou te faailoa atu ai le maliu o le Alii seia afio mai o ia.

“O lenei ai se ai lenei areto pe inu i le ipu a le Alii ma le faaletatau, e nofosala o ia i le tino ma le toto o le Alii.

“A ia suesue ifo le tagata ia te ia, i le ai ai o ia i lenei areto, ma inu i lenei ipu.” [1 Korinito 11:23–28.]

E leai se sauniga e sili atu ona paia o loo faatinoina i totonu o le Ekalesia a Keriso nai lo le faatinoga o le faamanatuga. …

E tolu ni mea e ogaoga le taua e aofia i le sauniga o le faamanatuga. Muamua o le iloiloga faaletagata lava ia. O se suesuega. “Ia faia lenei mea ma faamanatuga ia te au, ” ae peitai e ao ona ai ma le agavaa, o tagata taitoatasi e iloiloina ia lava e faatatau i lona agavaa.

Lona lua, o loo i ai se feagaiga ua osia, o se feagaiga e sili atu nai lo se folafolaga. … E leai se mea e sili ona taua i le olaga nai lo lena. … O se feagaiga, o se folafolaga, e ao ona paia e pei lava o le ola. E aofia ai lena mataupu faavae i Aso Sa uma pe a tatou aai ma feinu i le faamanatuga.

Lona tolu, o loo i ai se isi faamanuiaga, ma o lena faamanuiaga o se lagona vavalalata ma le Alii. O loo i ai se avanoa e fesootai ai ma oe lava ma fesootai ai foi ma le Alii. Tatou te potopoto i totonu o le fale ua faapaiaina mo ia; ua tatou tuuina atu ia te ia; ua tatou faaigoaina o lona fale. O lea la, e mafai ona e talitonu i ai o le a i ai o ia iina e musuia i tatou pe afai tatou te o mai i laei e tatau ai e feiloai ma ia. O le a le saunia i tatou e feiloai ma ia pe afai tatou te aumaia i lena potu o tatou manatu e uiga i a tatou pisinisi, aemaise lava pe a tatou aumaia i totonu o le fale tapuai lagona inoino i o tatou tuaoi, po o le faatautee ma le loto leaga i Taitai o le Ekalesia. E matua mautinoa lava, e leai se tagata e mafai ona faamoemoe e maua se fesootaiga ma le Tama pe afai o i ai i lena tagata lagona faapea. O i latou e le o ni tagata tapuai, e matua le talafeagai lava, aemaise ai o le aai ma feinu i le faamanatuga. …

Ou te talitonu o le taimi puupuu o le faamanuiaina ma le tufatufaina atu o le faamanatuga o se tasi o avanoa sili ua tatou maua e … manatunatu loloto ai, ma e le tatau ona i ai se mea i lena taimi paia e faalavelaveina ai lo tatou taulai atu i le faamoemoega o lena sauniga. …

… E [tatau] ona siomia lenei sauniga paia i le migao e sili atu, ma le faatulagaga atoatoa, ina ia mafai e i latou o e o mai i le fale o le Atua ona manatunatu i lona lelei i le agaga tatalo ma le filemu e faaali atu ai le faafetai mo le agalelei o le Atua. Ia avea le itula o le faamanatuga e fai ma se aafiaga se tasi o le aso e taumafai ai le tagata tapuai ia iloa e ia lava, e mafai ona la fesootai ma lona Atua.

E i ai ni mea maoae na tutupu i lenei Ekalesia ona o nei fesootaiga, ona o le tali atu o le agaga i le musumusuga a le Silisili Ese. Ou te iloa e moni lenei mea. Sa i ai ia Peresitene Uilifoti Uitilafi lena meaalofa. Sa mafai ona ia tali atu, sa ia iloaina le “leo filemu ma le itiiti “ lea e fou pea i nisi. O le a e iloa pe afai e oo mai ia te oe nei taimi sili ona musuia o le a tuua ai na o oe ma lou Atua. E oo mai ia te oe atonu i se taimi o loo e feagai ai ma se faigata sili, pe afai o loo tu se pa sima i lou ala, ma foliga mai o lo o lua fetaiai ma se puniala tele, pe a o mamafa foi lou loto ona o ni faanoanoaga i lou olaga. Ou te toe fai atu, o le faamafanafanaga sili e mafai ona oo mai ia i tatou i lenei olaga, o le lagona o le iloa o fesootaiga ma le Atua. O molimau maoae e oo mai i na taimi. …

… Pe a e mafaufau i ai i le mataupu, e te iloa ai i le taimi o le faamanuiaina ma le tufatufaina atu o le faamanatuga, e leai se isi mea o le lalolagi e taua atu nai lo le manatuaina o lo tatou Alii ma le Faaola, e leai se isi mea aoga e taulai i ai nai lo le mafaufau i le taua o le folafolaga o loo tatou faia. E tatau i se a ona i ai se isi mea e faalavelave ia i tatou? Pe i ai ea se mea e sili atu ona musuia? O loo tatou molimauina iina, a o faatasi ai foi ma isi, ma luma o lo tatou Tama, tatou te loto ina ave i o tatou luga le suafa o Keriso, ma o le a tatou manatua pea o ia, i taimi uma, o le a tatou tausia ana poloaiga na ia tuuina mai ia te i tatou. Mata e te mafaia, pe mafai foi e soo se tasi o ola, e manatu i se taimi, ona tuu mai i o tatou luma se mea e sili atu ona paia pe sili atu ona aafia ai o tatou olaga? Pe afai tatou te fetagofi atu i ai faasamasamanoa, ua tatou le faamaoni, pe tatou te faapea ane, ua tatou faatagaina o tatou mafaufauga e faalavelaveina mai le sauniga sili ona paia. …

… Ia tatou avea lena itula o le faamanatuga o se tasi o avanoa sili tatou te mafuta ai ma le agaga o le Atua. Ia avea le Agaga Paia, lea ua ia i tatou le aia tatau e maua ai, e taitaiina i tatou i lona afioaga, ma talosia ia tatou lagonaina lona latalata mai, ma ia i ai se tatalo i o tatou loto lea o le a ia faafofogaina mai.¹⁸

Fautuaga mo Suesuega ma Talanoaga

O le a lea uiga o le i ai “o se uiga faaalia o le migao”? (Tagai i itulau 35–36.) E sili atu faapefea le migao nai lo le filemu? E faapefea ona tatou atiina ae lenei “migao aiai e fefiloi ma le alofa”?
E mafai faapefea ona tatou aoao atu le mataupu faavae o le migao i o tatou aiga ma le lotu? (Tagai i itulau 35, 38.)
Aisea e faigata ai i nisi taimi ona maua se avanoa e manatunatu loloto ai i mea a le Atua? O a ni mea e mafai ona tatou faia e maua ai taimi e manatunatu loloto ai? O a ni faamanuiaga e mafai ona tatou maua ona o lo tatou manatuanatu loloto? (Tagai i itulau 37–38, 39–41.)
O a ni mea e mafai ona tatou faia e saunia ai i tatou lava e “o atu i le maota o le Alii … [ma] fesootai ai ma ia i le agaga”? (Tagai i itulau 38–42.) E mafai faapefea ona tatou saunia i tatou lava e aai ma feinu i le faamanatuga? (Tagai i itulau 38–42.)
O a ni ala e mafai ona tatou fesoasoani atu ai i a tatou fanau ma isi ina ia faateleina le migao i totonu o le malumalu, o sauniga faamanatuga, ma isi sauniga a le Ekalesia? (Tagai i itulau 38, 39.) E faapefea ona faalavelavea le migao ona o le tuai mai i se sauniga po o le vave tulai foi ma alu ae le i uma le sauniga?
O le a le taua o le faamanatuga i lou olaga?

O Mau e Faatatau I Ai:Salamo 89:5–7; MFF 20:75–79; 63:64; 76:19–24; 109:21; 138:1–11

girl taking sacrament — “Ou te talitonu o le taimi puupuu o le faamanuiaina ma le tufatufaina o le faamanatuga o se tasi o avanoa sili ua tatou maua mo le … manatunatu loloto.