Folasaga

Ua faavaeina e le Au Peresitene Sili ma le Korama a Aposetolo e Toasefululua le faasologa o Aoaoga a Peresitene o le Ekalesia e fesoasoani ai i tagata o le Ekalesia ia faalolotoina lo latou malamalama i mataupu faavae o le talalelei ma faalatalata atili ai ia Iesu Keriso e ala i aoaoga a perofeta o lenei tisipenisione. O lenei tusi o loo faalauiloaina ai aoaoga a Peresitene Tavita O. MaKei, o le sa auauna atu o le Peresitene O Le Ekalesia a Iesu Keriso o le Au Paia o Aso e Gata Ai, mai ia Aperila 1951 ia Ianuari 1970.

E Faapefea Ona Faaaoga Lenei Tusi

O mataupu taitasi o lenei tusi o loo aofia ai ni vaega se fa: (1) o se upusii amata o loo faailoa faapuupuu mai ai le mea o loo taulai atu i ai le mataupu; (2) o se “Folasaga, ” o loo faapupula mai ai le savali o le Mataupu faatasi ai ma se tala po o se fautuaga mai ia Peresitene MaKei; (3) “O Aoaoga a Tavita O. MaKei, ” o loo aumai ai aoaoga faavae mai le tele o ana savali ma lauga; ma le (4) “Fautuaga mo Suesuega ma Talanoaga, ” o loo i ai fesili e faamalosiauina ai iloiloga ma suesuega a le tagata lava ia, o le faaaogaina o mataupu faavae o le talalelei, ma talanoaga i le aiga faapea foi i le lotu. O le iloiloina o fesili a o le i suesueina upu a Peresitene MaKei, o le a mafai ona maua ai se malamalamaaga faaopoopo i ana aoaoga. E le gata i lea, o se vaega o punaoa mo suesuega faaopoopo ma talanoaga, e tofu foi mataupu ma se lisi puupuu o mau e faatatau i ai.

O lenei tusi e ao ona faaaogaina i tulaga nei:

Suesuega a le tagata lava ia po o suesuega faaleaiga. O le suesue ma le agaga tatalo ma le manatunatu i ai, e mafai ai e tagata taitoatasi ona mauaina sana lava molimau i upumoni o loo aoao mai e Peresitene MaKei. O le a faaopoopo atu foi lenei lomiga i le potutusi faaletalalelei a tagata o le ekalesia, ma o le a avea ma se punavai taua mo aoaoga faaleaiga ma suesuega i le fale.

Mo talanoaga i sauniga i Aso Sa. O lenei tusi e mo sauniga po o fonotaga i Aso Sa a faitaulaga sili, korama a toeaina, ma le Aualofa, e masani lava o le Aso Sa lona lua ma le tolu o masina taitasi. O nei sauniga i Aso Sa, e tatau ona avea ma ni talanoaga e faaautu i mataupu autu ma aoaoga faavae o le talalelei. E tatau i faiaoga ona taulai atu i le aano o le tusi ma mau e faatatau i ai, ma e tatau foi ona faaaoga nei aoaoga i tulaga o le a feagai ma tagata o le vasega. E mafai ona latou aumaia fesili o loo i le faaiuga o le mataupu e uunaia ai le talanoaga a le vasega. A talafeagai ai, e tatau i tagata o le vasega ona tuuina atu ia molimau ma fetufaai ni faataitaiga a le tagata lava ia e faatatau i lesona. Pe a sailia ma le lotomaualalo e faiaoga le Agaga i le sauniuniga ma le tuuina atu o le lesona, o le a faateleina le malamalama o i latou uma e auai, i le upumoni.

E tatau i taitai ma faiaoga ona uunaia tagata o le vasega e faitau i mataupu e sauniuni ai mo sauniga po o fonotaga i Aso Sa, ma ia aumai le tusi i le lotu. E tatau ona latou aloaia sauniuniga a tagata o le vasega e ala i le aoao atu mai i saunoaga a Peresitene MaKei. Pe a faitauina e tagata o le vasega mataupu a o lei oo i le Aso Sa, o le a latou saunia e fea’oa’oa’i ma fefaamalamalamaa’i.

E le tau manaomia ma e le fautuaina foi le toe faatauina e tagata o ni tusi faaopoopo o faamatalaga, po o nisi tusi e faaopoopo i mataupu ua i ai i lenei tusi. Mo nisi suesuega atili i le aoaoga faavae, ua uunaia ai le au paia ina ia sue ia mau e faatatau i ai, o loo avatu ai i le faaiuga o le vaega o “Fautuaga mo Suesuega ma Talanoaga”.

Talu ai o lenei tusi ua fuafuaina mo suesuega a le tagata lava ia, ma o loo maua ai faamatalaga o le talalelei, e tele mataupu ua tele naua aoaoga o loo avatu ai, ma e le mafai ona faia uma i sauniga po o vasega i Aso Sa. O le mea lea, e taua ai lava le suesue i le aiga ina ia maua ai le atoaga ma faamanuiaga uma o aoaoga a Peresitene MaKei.

O Le Aoaoina Atu o Lesona Mai Mataupu o Lenei Tusi

O mataupu o lenei tusi, e tele naua aoaoga o loo i ai, ma o le a le mafai e le toatele o faiaoga ona aoao atu i se piriota po o se vasega se tasi. E tatau i faiaoga ona tatalo mo se fesoasoani, ia saili le taitaiga a le Agaga Paia, ma galulue ma le maelega a o latou filifilia ni upusii po o saunoaga, o mau, ma fesili e aupito sili ona fetaui ma tulaga o loo manaomia e tagata o le vasega.

Sauniunia o se Lesona

O fautuaga o loo tuuina atu i lalo, o loo faapupula atu ai se tasi o auala e mafai ona fesoasoani i faiaoga e saunia ma tuuina atu lesona mai lenei tusi (e mafai foi ona faaaoga nei taiala e matua i le sauniaina o lesona mo afiafi faaleaiga):

1. Ia suesue le mataupu ma le agaga tatalo. Maka palakalafa e aupito faagaeetia ma musuia ai oe.

2. Mafaufau pe o le a le mea e tatau ona tupu i olaga o i latou o loo e faiaoga ai ona o aoaoga mai lenei mataupu. Saili le taitaiga a le Agaga Paia a o e manatunatu loloto i mea o loo manaomia e i latou o loo e faiaoga ai.

3. Filifili pe o le a le mea e aoao atu. Toe faitau le mataupu, ma filifili palakalafa po o fuaitau o le a sili ona fesoasoani ia i latou o loo e faiaoga ai.

4. Filifili pe faapefea ona e aoao atu. Fuafua ni auala e aoao atu ai palakalafa po o vaega na e filifilia. O loo i ai ni fautuaga o loo mulimuli mai.

   • Faafoe ia talanoaga e faavae i fesili o loo i le “Fautuaga mo Suesuega ma Talanoaga” i le faaiuga o mataupu taitasi.

   • Talanoaina mau filifilia mai le lisi o mau o loo i le faaiuga o mataupu taitasi.

   • Fuafua lelei se auala e faagaua’i mai ai le vasega i le amataga o le lesona. Mo se faataitaiga, e mafai ona e faamatalaina se tala mai le folasaga o le mataupu, pe tusi se fesili i luga o le laupapa e faaala ai le mafaufau, pe faaaoga foi sina lesona e faaaoga ai ni mea faitino.

   • Faaaoga viiga ma pese o le Peraimeri e fesoasoani ai ia maua e le vasega le Agaga.

   • Tuu atu le molimau i soo se taimi e uunaia ai oe e le Agaga, ae le na o le faaiuga o le lesona.

   • Tofi se toatasi pe toalua e o mai sauniuni i le vasega e fai ni molimau pupuu e uiga i mataupu faavae o loo aoaoina i le lesona.

   • A talafeagai, faamatala ni aafiaga e faatatau i mataupu faavae o loo i le lesona. Tofi foi nisi e faia le mea lava lena e tasi.

   Mo fautuaga pe faapefea ona faaaoga nei metotia ma nisi foi metotia faafaiaoga, tagai i le O Le Aoao Atu, E Leai Se Isi Valaauga e Sili Ai (36123); o le Tusitaiala Faafaiaoga (34595); ma le “Aoaoina Atu o le Talalelei ma le Taitaiga, ” vaega 16 o le Tusitaulima o Faatonuga a le Ekalesia, Tusi 2: Taitai Perisitua ma Ausilali (35903). E le gata foi i lea, ae ina ia fesoasoani atu ia te oe ia manuia lou valaauga, e uunaia oe ina ia e auai i le vasega e 12-vaiaso o le Aoaoina Atu o le Talalelei i lau uarota po o le paranesi, faapea foi ma fonotaga faalekuata o le faaleleia atili o faiaoga.

5. Faatulaga lelei ou manatu. Atonu foi e te manao e tusi se aotelega e taialaina ai oe i le taimi e faatino ai le lesona.

Faafoeina o Talanoaga E Tumu i Mea Aoga

Pe o le aiga po o le potuaoga, ua saunia e lesona o lenei tusi se avanoa matagofie mo tagata taitoatasi e fefaamalosia’i ai e le tasi le isi e ala lea i le auai i talanoaga faaletalalelei. E mafai ona fesoasoani taiala nei e te faafoeina ai ni talanoaga e tumu i mea aoga:

• Fai ni fesili e manaomia ai le mafaufau ma talanoa ae le o ni fesili e mafai ona tali i le ioe po o le leai. O fesili e amata i le Po o le a, pe faapefea, pe aisea, po o le pe o fea, e sili atu ona lelei e uunaia ai ia talanoaga.

• Ia uunaia isi e faamatala mai ni aafiaga e iloa ai le auala e faaaoga ai mataupu faavae o le talalelei i le olaga i aso fai pea. Ia uunaia foi i latou e faamatala mai o latou lagona i mea o loo latou aoaoina. Ia faalogologo ma le loto ma faailoa atu lou agaga talisapaia mo o latou manatu.

• Ia nofouta e tali atu i le uunaiga a le Agaga Paia. O le a fesoasoani ia te oe e te iloa ai po o le a le fesili e fai, o ai e tofi, po o le auala foi e faaaofia ai isi i le talanoaga. Afai e te manatu ua agai ese faamatalaga mai le autu, ona toe faatonutonu lea ma le faaaloalo le talanoaga.

• Ia faaeteete aua nei vave faamutaina se talanoaga manaia ona o lou taumafai e aoao uma ni au sauniuniga sa fai. O le mea e aupito sili ona taua, o le maua lea e tagata o le Agaga, faateleina lo latou malamalama i le talalelei, faaaoga mataupu faavae o le talalelei i o latou olaga, ma faamalolosi a latou tautinoga e ola ai i le talalelei.

Tala e uiga i Punavai na Maua Mai ai Faamatalaga o loo Ta’ua i le Tusi

O aoaoga a Peresitene MaKei i lenei tusi, sa aoina mai i punavai eseese. O upusii po o saunoaga, o loo tausisia pea ia faailoga, sipelaga, ma faamataitusi tetele e pei ona i ai i uluai tusiga, sei vagana ai suiga mai le faatonu ma faasaoga sa tatau ona fai ina ia faigofie ai ona faitau. O le mafuaaga lea, atonu o le a matauina ai e le aufaitau ia ni nai eseesega i le tusi.

E tele taimi e faaaoga ai e Peresitene MaKei ia faaupuga e pei o tamaloloa, tamaloa, po o tagata e faasino ai i tagata uma, e le gata i tane ae faapea foi fafine. E masani foi ona ia faaaoga le suinauna o le o ia e faasino ai i kenera uma e lua [alii ma le tamaitai]. O se tulaga lea sa masani ai le gagana i ona taimi. Ae ui lava i le eseesega o le gagana i nei potopotoga ma le faaaogaga i ona po nei, ae o le a silafia lava e le aufaitau e tutusa lava le faatatauga ma le taua o aoaoga a Peresitene MaKei i tamaitai ma alii.

E le gata foi i lena, ae e faitautusi tele Peresitene MaKei, ma e tele taimi na te ta’ua ai isi tusitala i ana aoaoga. O le tele lava o punavai amata o ana faamatalaga, o loo faailoa atu i faailoga pe afai e sii mai e Peresitene MaKei se isi tagata, ae seasea lava ta’ua le igoa o le tusitala. Ina ia aua nei faalavelaveina ia lesona o lenei tusi i le mau faaupuga faapea “[e le o iloa le tusitala], ” o lea ua na ona faaaoga sa’o ai o faailoga na muai i ai, ina ia faailoa atu ai o loo sii mai e Peresitene MaKei ia upu a se isi tagata.

Na faauuina ia Tavita O. MaKei e fai ma Aposetolo i le 1906 ma sa lagolagoina o se Peresitene o le Ekalesia i le 1951.