Mataupu 17

O Se Molimau o le Upumoni

O se molimau o le talalelei a Iesu Keriso, o le meaalofa aupito sili lea ona paia, ma taua i o tatou olaga, lea e na o le tumau ai i aoaoga faavae o le talalelei e maua ai, ae le maua i le mulimuli i auala o le lalolagi.¹

Folasaga

E masani lava ona aoao mai Peresitene Tavita O. MaKei e uiga i le taua o le mauaina e le tagata lava ia o se molimau o le talalelei, ma folafola mai ai e faapea “e le mafai ona tuulafoaiina e le Alii i latou o e saili atu ia te ia.” Ao talavou o ia, na manao Tavita O. MaKei e maua sana lava molimau o le upumoni. I le faamatalaina o lena vaitaimi o lona olaga, na ia tusia ai e faapea:

“Sa ia te au se manatu a o ou talavou e faapea, e le mafai ona tatou maua se molimau sei vagana ua oo mai se faaaliga ia i tatou. Sa ou faitau e uiga i le uluai faaaliga na oo i le Perofeta o Iosefa Samita, ma sa ou iloa o le mea na ia maua o se mea mai le Atua. Sa ou faalogo i le molimau a lo’u tama e uiga i se leo na oo mai ia te ia, ma na faapea ai ona ou maua se lagona, o le faapogai la lea o molimau uma. Sa ou iloa i le taimi o lo’u talavou, o le mea aupito sili ona taua e mafai ona maua e se tagata i lenei olaga o se molimau i le paia o lenei galuega. Sa ou matelaina mo se molimau; sa ou lagonaina, afai e mafai ona ou maua se molimau, o lona uiga o isi mea uma o le a foliga mai e leai se taua.

“Ou te lei faatamala i au tatalo. Sa ou lagonaina lava o tatalo lilo, pe o totonu o se potu po o fafo i le togavao po o luga foi o mauga, o le a mafai lava ona oo mai ai lena molimau. Ma a o avea au ma se tamaitiiti, sa ou tootuli e tatalo i le silia ma le faatasi i le togavine a o tutu la’u solofanua ua uma ona faagutu i talaane o le auala.

“Ou te manatua lo’u tietie atu i la’u solofanua i luga o mauga o Huntsville i se tasi aoauli, ma ou mafaufau i nei mea, ma sa tonu ai ia te au o iina i le taaligoligoa o atumauga o se nofoaga aupito lelei lea e maua ai lena molimau. Sa taofi la’u solofanua, ma uiese faagutu i luga o lona ulu, ma ou savali ese i se mea e le mamao tele, ma ou tootuli ai i tafatafa o se laau. E fou ma mama le ea, sa susulu matagofie le la, sa manogi foi le ea i laau lanulauava ma fugalaau. …

“Sa ou tootuli ma le malosi atoa o lou loto, ma sasaa atu lou agaga i le Atua ma ole atu ia te ia mo se molimau e uiga i lenei talalelei. Sa ou mafaufau o le a oo mai se faaaliga; ma e tatau ona ou maua se suiga ou te le toe masalosalo ai.

“Na ou tu ae i luga, ma faagutu lau solofanua, ma a o savalivali atu le solofanua i le auala, ou te manatuaina le tuufesili o lou lava mafaufau ma lulu lou ulu i le faanoanoa, ma ou faapea ifo ia te au lava, ‘E leai alii, e leai se suiga ua oo mai; o au lava o le tama e tasi lea sa i ai muamua ae ou te lei tootuli e tatalo.’ E lei oo mai le faaaliga sa ou faamoemoe e tatau ona oo mai.”²

E ui lava ina e lei vave ona ia mauaina le faaaliga na ia talia, ae na faaauau pea ona saili ia Peresitene MaKei mo sana lava molimau patino. Mulimuli ane, na ia saunoa mai ai e faapea “o le faaaliga faaleagaga na faapea ona ou tatalo atu ai a o itiiti i lo’u talavou, na oo mai o se faasologa masani lava o le faataunuuina o o’u tiute.”³

Mai i ona lava aafiaga, na aoao mai ai Peresitene MaKei o le usiusitai i mataupu faavae o le talalelei o le ki lea i le mauaina o se molimau. Sa ia molimau mai: “Afai o le a amata ona e taliaina le mataupu faavae o le ola faavavau, o le a e iloa ai ua tuuina atu i lou loto se faamaoniga o le Agaga Paia, o le a faapea ona tuuina atu ai ia te oe se molimau e aunoa ma sina tau masalosalo o loo soifua le Atua, o ia moni o lo tatou Tama, ma o lana galuega lenei ua faatuina e ala i le Perofeta o Iosefa Samita. O la’u molimau lena—o le mea aupito sili ona pele i lo’u olaga!”⁴

O Aoaoga a Tavita O. MaKei

O se molimau o le upumoni o le meatotino aupito sili lea ona taua i le lalolagi.

E leai se mea e mafai ona maua e se tagata i lenei lalolagi, e aumaia ai le faamafanafanaga sili, le faamoemoe ma le faatuatua sili nai lo se molimau i le i ai o se Tama Faalelagi e alofa ia i tatou, po o le moni o Iesu Keriso, o Lona Alo Pele e Toatasi, ma o na tagata faalelagi na faaali mai i le Perofeta o Iosefa ma faatuina ai le Ekalesia a Iesu Keriso, ma e faataga aloaia ni tagata e fai ma sui o le Atua.⁵

O le mea aupito sili ona taua i le lalolagi o se molimau i le upumoni. … E le mafai lava ona toeaina le upumoni, ma o le mea moni o le Atua o le faapogai lea [o le] Perisitua … ; o loo soifua o Ia, o Iesu Keriso, o le Faitaulaga Sili maoae, o le ao o lenei Ekalesia.⁶

Ua molimau mai le Agaga ia i tatou o i tatou o fanau a lo tatou Tama i le Lagi. Ua i ai a tatou molimau o le Atua o se tagata soifua. Ua i ai a tatou molimau o Keriso, o le na faasatauroina ma sa toetu ae i le aso tolu o se tagata toetu, o le ao o lana Ekalesia. Ua ia i tatou le molimau a le Agaga, ua ia faaalia mai i lenei tisipenisione le talalelei a Iesu Keriso, ma ua toe faatuina i luga o le fogaeleele i lona atoatoaga. O le talalelei a Iesu Keriso, e pei ona faaalia i le Perofeta o Iosefa Samita, e moni lava i soo se itu, o le mana lea o le Atua mo le faaolataga [tagai Roma 1:16]. Ua aumaia ai i tagata uma le ola atoatoa iinei, ma o le usiusitai i mataupu faavae o le talalelei e aumaia ai ia i tatou le ola faavavau.⁷

Ia teuina i o outou loto le molimau i le upumoni; ia faia ia malosi ma mausali ma ia le maluelue, ia pei o fetu i le lagi. Tau ina ia oo mai i loto o tagata uma faapea ma totonu o o tatou aiga uma ia le Agaga moni o Keriso, o lo tatou Togiola, o le ua ou iloaina le moni o ana taitaiga musuia.⁸

Tatou te maua se molimau e ala mai i le Agaga, pe a tatou usiusitai.

O le mama o mafaufauga, ma se loto faamaoni e sailia i aso uma le taitaiga a le Faaola o le a taunuu ai i se molimau o le upumoni o le Talalelei a Keriso, e pei o le mautinoa ma le tumau e pei foi o le molimau na ia Peteru … ina ua mavae ona ia vaai i le liuaina o Keriso, ma faalogo i le siufofoga o le Atua o molimau mai i Lona paia [tagai Mataio 17:1–5].⁹

Sa ou mafaufau pe toafia i tatou ua faaali atu … [i le autalavou] le ala e mafai ai ona latou [maua se molimau]. Pe o tatou matuai faamamafaina atu ea le mea moni e faapea, o le a le mafai lava ona latou iloaina, pe afai latou te gauai i le agasala; o le a le mafai lava ona latou iloa pe a latou ola e faamalie o latou tuinanau ma manao. “E le uunaiina pea le tagata e lou agaga.” (Kenese. 6:3; MFF 1:33; Mose 8:17.) O le a le mafai ona mafuta Lona agaga i malumalu eleelea. (“E le afio le Agaga o le Atua i malumalu e le paia.” Helamana 4:24.) Ma e le mafai ona e maua se molimau e aunoa ma le Agaga o le Atua. …

… O le fesili ua tulai mai—E faapefea ona ou iloa? Ua taliina e Iesu lea fesili, a o ia faaalia mai le ala i soo se mea lava o le olaga. O se tasi aso, ina ua tuuina mai lana molimau i lona paia, e faapea o ana aoaoga o aoaoga a le Atua ia, na faapea mai ai le au faresaio ma isi na siomia o ia, “Pe faapefea ea ona poto o lenei tagata ae lei aoaoina o ia?” E faapefea ona tatou iloa (o le latou fesili lena), o oe ua paia? Ma na ia tuuina mai se tali faigofie: “Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava au.” (Ioane 7:15, 17.) O loo i ai se tali mautinoa—o se saunoaga manino. … “Afai tou te faia le finagalo, o le a outou iloa.” Ma le, “ina ia iloa le Atua, ma Iesu Keriso, o le na ia auina mai, o le ola faavavau.” [Tagai Ioane 17:3.]¹⁰

Ua fetalai mai le Alii i le Mataupu Faavae ma Feagaiga, ua foaiina atu i nisi e le Agaga Paia ia iloa ai o Iesu Keriso o le Atalii o le Atua, ma sa faasatauroina o Ia mo agasala a le lalolagi [tagai MFF 46:13]. O i latou ia ua ou fai atu ai o e tutumau i luga o le papa o faaaliga i molimau latou te tuuina atu i le lalolagi. Ae peitai o loo fetalai mai le Alii, ua foaiina atu i nisi ia talitonu i a latou upu, ina ia latou maua foi le olaga faavavau pe afai latou te tumau pea i le faatuatua [tagai MFF 46:14]. Ae peitai, e pei o nei mea uma, o le a oo mai foi le molimau o aafiaga i aso taitasi.

E maua e le Au Paia uma i le lalolagi atoa ia faamaoniga o a latou molimau i faataunuuga uma o tiute. Ua latou silafia o le talalelei ua aoaoina ai i latou ina ia avea ma ni tagata sili atu ona lelei; o le usiusitai i mataupu faavae o le talalelei e avea ai i latou ma alii malolosi, ma tamaitai amiotonu. O aso taitasi e oo mai ai lena malamalama ia i latou, ma e le mafai ona latou faafitia lena mea; ua latou silafia o le usiusitai i le talalelei a Iesu Keriso e avea ai i latou ma tane e sili atu ona lelei ma faamaoni, ma ni ava amiotonu ma le faamamaluina, ma ni fanau usiusitai. Ua latou silafia o le usiusitai i mataupu faavae o le talalelei e avea ai i latou i soo se tulaga o ni tagata e fausia ni aiga lelei; o loo i ai le lelei iina, latou te lagonaina i o latou mafaufau, e le mafai ona latou faafitia, latou te iloa lelei, ma ua latou iloa foi o le solia o nei mataupu faavae, o le a i ai ni taunuuga e le lelei i o latou olaga ma olaga o o latou aiga. Latou te iloa o le usiusitai i le talalelei e uunaia ai le faiuso ma le faaaumea i tagata uma; latou te iloa o i latou o ni tagatanuu sili atu ona lelei e ala i le usiusitai i tulafono ma sauniga. O lea la, a o latou agai atu i a latou galuega masani o aso taitasi, ma faaaoga le lotu i a latou galuega, ona atagia ai lea o le moni o le Talalelei i o latou olaga.¹¹

O le mea moni, ua outou feiloai atu foi i tagata o e … manatunatu pe aisea ua faaalia ai e lenei Ekalesia lea malosi ma le ola tele. O le mea lilo lenei, o tagata moni lava o le Au Paia o Aso e Gata Ai, o loo latou maua le faamautinoaga, o le galuega lenei a le Atua, o lena lava foi mana e tasi na tuuina atu ai ia Peteru ma Ioane le malosi e tutulai atu ai i luma o i latou na tuuaiina i laua ma folafola atu ma le manino ma le lototetele i le au Satukaio e faapea, “O Iesu o le na faasatauroina e outou o le mana lea ua tu mai ai lenei tagata ua malolo ai o ia, ” ua na o Lona suafa lava ua foaiina mai i tagata e mafai ona faaolaina ai i latou [tagai Galuega 4:10, 12].

O le mea lilo o loo i molimau ua i ai i tagata taitoatasi o e o loo faamaoni i le Ekalesia a Keriso, e faapea o le talalelei o loo aofia ai mataupu faavae moni uma. … O lenei molimau ua faaalia mai i alii ma tamaitai faamaoni uma o e o loo ola e tusa ai ma mataupu faavae o le talalelei a Iesu Keriso, usitaia ia sauniga ma agavaa ma maua le Agaga o le Atua, o le Agaga Paia, e taitaiina i latou. O tagata taitoatasi uma e tutoatasi lava i lona lava tulaga e uiga i lena molimau, e pei lava [o le] afe o matauila o pou moli lea e [avea] ai le Aai o Sate Leki … ma aai matagofie i le po, e taitasi lava le matauila ma susulu mai i lona lava tulaga, ae peitai o le malamalama o loo i ai ua maua mai i lena lava mana e tasi, i le malosiaga e tasi, o loo faapea ona maua uma ai e isi moli lo latou malosiaga.¹²

Afai tatou te maua le molimau a tagata, e sili atu le molimau a le Atua, aua o le molimau lenei a le Atua e pei ona ia molimau mai ai i lona Alo: “O le faatuatua i le Alo o le Atua ua i totonu ia te ia le molimau.” [1 Ioane 5:10.] O loo i ai se molimau o le Agaga. E faaalia mai e le Atua i aso nei i le tagata soifua le moni o le toetu o le Alii, o le paia o lenei galuega maoae, o le upumoni, o le upumoni paia ma faavavau, o loo soifua le Atua, e le o se mana, e le o se agaga, e le o se malosiaga, e le o se eletise, ae o lo tatou Tama i le lagi. … E faaali mai e le Atua i le agaga o loo soifua o ia. Na te faaalia mai le tulaga atua o le Alii o Iesu Keriso, o le na afio mai i le lalolagi ina ia tuuina atu i tagata le moni aiai o loo i ai le Atua ma lona Alo.¹³

O le avea o le upumoni ma o tatou taiala, o la tatou soa, o la tatou uo, o lo tatou uunaiga, atonu tatou te tetei i lo tatou mafaufau i la tatou faia ma le Silisiliese, ma tofotofoga laiti uma, o faanoanoaga, ma mafatiaga o lenei olaga o le a mou ese o ni mea e le tumau, e pei o ni faaaliga e le afaina ai i se miti. O lo tatou avanoa lena e ala mai i faamanuiaga ma le taitaiga a le Atua pe afai tatou te faaaogaina i a tatou gaoioiga i aso taitasi ia faamanuiaga faaleagaga ma avanoa o le talalelei a Iesu Keriso.¹⁴

O Se Molimau o le Talalelei o se taula lea i le agaga.

O le molimau o le talalelei o se taula lea i le agaga i le totonugalemu o le fenumiai ma fefinauaiga. … O le malamalama i le Atua ma Ana tulafono, o lona uiga o le mausali, o lona uiga o le faamalieina, o lona uiga o le toafilemu, faatasi ai ma se loto e tumu i le alofa e aapa atu i o tatou uso a tagata ma ofoina atu ai foi na faamanuiaga e tasi, faapea ma na foi avanoa.¹⁵

E le mafai ona tatou talitonu moni e faapea o i tatou o fanau a le Atua, ma o loo i ai se Atua, e aunoa ma le talitonu i le manumalo faaiu o le upumoni o le talalelei a Iesu Keriso. Afai tatou te talitonu i lena mea, o le a le tele so tatou popole i le faatafunaga o le lalolagi ma le olaga i le taimi nei, aua ua faatuina e le Atua lana Ekalesia ma o le a le toe lafoaiina lava pe tuuina atu i nisi tagata. Ma a o soifua le Atua, ma faamaoni ona tagata ia te ia ma le tasi i le isi, o lea e le tatau ai ona tatou popole e uiga i le manumalo faaiu o le upumoni.

… Afai ua ia te oe lena molimau [o le upumoni], ua mafai ona e laasia ia vanu pogisa o faamatalaga sese e faasagatau mai ia te oe, o tuuaiga sese, ma faiga faatautala, ma le le fefe, ma ua pei ai o loo e laeiina se ofutau faamaneta, e le mafai ona ati ai se pulu, e le mafai foi ona ati ai se u fanafana. E mafai ona faaea maualuga lou ulu, ia felafoai ma le le fefe ma le toa, ia tagai totoa atu i fofoga o tagata uma ma le toafimalie ma le lototele. … O le a e iloa ai o le a lelei lava mea uma i le iuga; ma e tatau lava ona oo mai; ma o mea uma lava e sosola ese i luma o le susulu malamalama maoae o le upumoni, a o mou malie ese atu le pogisa i le oso mai o le la susulu.¹⁶

Fautuaga mo Suesuega ma Talanoaga

O le a le uiga o le i ai o se molimau ia Iesu Keriso ma Lana talalelei? Aisea ua avea ai le molimau ma meatotino e sili ona pele e mafai ona tatou maua? (Tagai i itulau 183.) Aisea e taua ai le mauaina o a tatou lava molimau?
O a ni mea e tatau ona tatou faia e maua ai se molimau o le upumoni? (Tagai i itulau 184–86.) Aisea ua avea ai le usiusitai ma vaega taua o se molimau malosi? O le a le vaega a le Agaga Paia e faia i lo tatou mauaina o se molimau?
Aisea e taua ai ona faaauau pea ona faamalosia a tatou molimau i o tatou olaga atoa? O a ni auala ua e maua e fafagaina ai lau molimau?
O a ni mea e mafai ona tatou faia e fesoasoani ai ia tatou fanau ia maua ni a latou molimau ia Iesu Keriso ma Lana talalelei?
Na aoao mai Peresitene MaKei e faapea o se “molimau o le talalelei o se taula lea i le agaga” (itulau 186). Aisea tatou te manaomia ai ni molimau e taula ai o tatou agaga? (Tagai itulau 186.) Na faapefea ona puipuia ma faamalosia oe e lau molimau i taimi o tofotofoga o le olaga?
Aisea e taua ai le faasoaina atu o a tatou molimau i isi? O a ni faamanuiaga ua e maua o se taunuuga o le tuuina atu o lau molimau?

O Mau e Faatatau I Ai:Mataio 16:13–17; Luka 22:32; Ioane 7:17; 14:26; Eteru 12:4; Moronae 10:3–5; MFF 1:39; 93:24–28

sister bearing testimony — “O le mea e aupito sili ona taua i le lalolagi o se molimau lea i le upumoni.”