Mataupu 15

O Le Lagonaina o le Fiafia i le Faaipoipoga

O le talitonuga maualuga o loo tausisia e le Ekalesia e uiga i le faaipoipoga, o loo faamatala manino mai i ni upu se fitu o loo i le vaega e fasefulu iva o le Mataupu Faavae ma Feagaiga: “o le faaipoipoga e faapaiaina lea e le Atua.” (MFF 49:15.)¹

Folasaga

Na faaipoipo ia Tavita O. MaKei ma Ema Ray Riggs i le Malumalu o Sate Leki i le aso 2 o Ianuari 1901, o le ulugalii muamua lea na faamauina i lena malumalu i lena tausaga. O le 69 tausaga o le la faatasiga ua fai ma faataitaiga o le faamaoni faifai pea o se tane ma se ava o le tasi i le isi. O le malosi o le la faaipoipoga na matauina e a laua uo ma tagata latou te le masani. Sa faamatalaina e Tuafafine MaKei lea aafiaga i se tasi taimi:

“Sa ma o ma lo’u toalua mo le faapaiaga o se falelotu i Los Angeles. Sa ma tutu i le Magaala o Wilshire e fufulu ai le ma taavale. Sa ou saofai i se nofoa umi a o tutu le Peresitene i talaane o le taavale. Na faafuasei lava ona ou faalogoina se leo itiiti i ou tua o faapea mai, ‘Ou te matea e alofa tele le tamaloa lale ia te oe.’ Sa ou faliu atu ma le te’i ma vaaia ai se tamaitiiti aulelei pe tusa ma le fitu ona tausaga, e migimigi uliuli lona lauulu ma ona mata eena lapopoa. ‘O le a lau tala?’

“ ‘Sa ou fai atu, ou te matea e alofa tele le tamaloa lale ia te oe.’

“ ‘Oi, ioe, e alofa o ia ia te au; o lou toalua. Aisea ua e fesili ai?’

“ ‘Oi, ‘ona o lana ataata atu ia te oe. E te iloa, semanu ou te tuuina atu soo se mea lava o le lalolagi pe a na fai e ataata faapena lou Papa i lou Mama.’ ”²

E oo lava i le taimi ua feaveai ia Peresitene MaKei i le nofoa faataavalevale, o fai lana masani o le tulai pe a ulu atu lona faletua i totonu o le potu, tuu i tua lona nofoa ma taofi, ma tatala le faitotoa o le taavale mo ia. O taimi uma foi e faafeiloai ma faatofa atu ai o ia i se sogi alofa. Sa faifai pea lava lenei aga i le taimi ua feaveai uma ai Peresitene ma Tuafafine MaKei i nofoa faataavalevale. Sa i ai se taimi ao tulei atu ia Peresitene MaKei i lona nofoa faataavalevale i se fonotaga, sa toe faapea mai o ia: “E tatau ona ta toe foi. Ou te lei sogi faatofa ia Ray.” Na toe tulei atu o ia mo lenei aga o le alofa ua faapea ona avea o se vaega o le la mafutaga.³

Sa tuuina atu se faamalo tele i le faaipoipoga a le au MaKei, e se ulugalii talavou na sauni e faaipoipo. Na faamatalaina e se tasi o atalii o Peresitene MaKei o Tavita Lawrence MaKei, lenei aafiaga e faapea:

“A o nonofo ia Tama ma Tina i 1037 East South Temple [i le Aai o Sate Leki], na taunuu mai se ulugalii talavou i se taavale, ma feosofi i fafo, ona la saofafai lea i luma o le fale. O iina, na talosagaina ai e le alii talavou ia le tamaitai talavou ina ia la faaipoipo. Mulimuli ane, sa ia faamatalaina ai le tala i se tagata o le aiga e faapea, sa ia faia lea mea ona ‘sa ou manao ina ia matagofie lo ma olaga faaipoipo e pei o Peresitene ma Tuafafine MaKei.’ ”⁴

O Aoaoga a Tavita O. MaKei

O feagaiga o le faaipoipoga e faavavau, e aumaia ai le olioli ma faamalosia ai le alofa.

I aoaoga a le Ekalesia a Iesu Keriso, o le aiga e avea ma tulaga aupito sili ona taua i le atiina ae o tagata taitoatasi faapea ma tagata lautele. “E fiafia ma e faateleina le fiafia o i latou o e olioli i se mafutaga e le faalavelaveina, ma o lo latou alofa, e le motusia i ni faitioga, e le mafai ona tatala seia oo i le aso mulimuli.” O le a le tatalaina pe a faamauina e le pule o le Perisitua Paia e oo atu i le faavavau atoa. O le sauniga o le faaipoipoga, pe a faamauina, e maua ai le fiafia ma le olioli e le mafai ona faatusalia i soo se isi lava aafiaga i le lalolagi. “O lenei, o e ua faatasia e le Atua, aua le faateaeseeseina e se tagata.” [Mareko 10:9.]⁵

O le faavavau o le feagaiga o le faaipoipoga o se faaaliga mamalu, ua tuuina mai ai le faamautinoaga i loto ua noatia faatasi e le fusi auro o le alofa, ma ua faamauina e le pule o le Perisitua Paia le la faatasiga e faavavau.⁶

O se upu e uiga i le faavavau o le feagaiga o le faaipoipoga. … Sei o tatou vaavaai i lona mataupu faavae. Pe mafai lava ona outou faaigoaina i o outou mafaufau le uiga aupito sili ona paia o le tagata soifua? … O le alofa o le uiga aupito sili lea ona paia o le tagata soifua, ma afai e te taliaina le ola pea o le agaga, o lona uiga, afai e te talitonu e i ai pea lena uiga o le tagata pe a mavae le oti, e tatau foi ona e talitonu e ola foi le alofa. Pe le talafeagai ea lena mea? Ma ou te fesili atu ia te outou i le mea lenei: O ai o le a tatou alolofa atu i ai pe a tatou iloaina e i ai na uiga i le lalolagi a sau?

E moni, ua apoapoaiina i tatou ina ia tatou alolofa atu i tagata uma. Ioe, e tatau ona tatou alolofa atu i tagata uma i le taimi nei; peitai ua outou silafia ma ou iloa o loo tatou alolofa atu ia i latou e sili atu ona tatou masani i ai. … Pe a tatou fetaiai ma tagata o i ai nei uiga i le malo e faavavau, o le a mafai ona tatou manatuaina i latou, ma iloa i latou ona o nei aafiaga i le olaga nei. Ma o lena faatasiga o loto e i ai le alofa, o le a faaauau pea pe a mavae le olaga. O le mafuaaga lena tatou te faaipoipo ai—faamauina— mo le taimi nei ma le faavavau. Ua le na o se aoaoga a le Ekalesia—o se upumoni taua o le olaga ma le fiafia o tagata soifua uma. O se vaega o le atamai e filifilia le Maota o le Alii e [tautino atu ai] lou alofa ma faapaia ai au tautoga.⁷

Faatasi ai ma le faamoemoega maualuga o le faaipoipoga e pei ona faaalia mai i le Perofeta o Iosefa Samita, e tatau ona i ai i tagata o le Ekalesia se sini se tasi, o lena sini ia latou manatuaina le mea moni o le faaipoipoga, o le faavae o faalapotopotoga, ua “faapaiaina e le Atua” [MFF 49:15] mo le fausiaina o aiga mautu ina ia mafai ona faafailele ma aoaoina lelei ai fanau i mataupu o le talalelei.⁸

Ia tatou suia le manatu o loo i ai i le taimi nei, o le vaai maualalo i le faaipoipoga, i se vaaiga maualuga lea e tuuina mai e le Atua. O ananafi na ou tu ai i le fata faitaulaga o le malumalu, e pei ona ou tu ai i le tele o taimi, ma vaaia ai ni loto se lua—agaga se lua—ua tasi, e pei o ni mataua se lua o le sau i le vaveao i luga o se tumutumu o se rosa ina ua oso ae le la i le taeao, ona solosolo malie ifo ai lea ma avea ma mataua e tasi. O lena vaaiga maualuga o le faaipoipoga i le mafaufau o lena alii faaipoipo talavou, ma le talisapaiaina o le paia o le faaipoipoga e le tamaitai faaipoipo, ou te manatu o se tasi lea o mea e sili ona faagaeetia i le lalolagi atoa. Sa ia i laua se vaaiga maualuga e uiga i le faaipoipoga, ae le o se vaaiga maualalo o le faamalieina o tuinanau. Ia tatou vaai atu i le faaipoipoga o se tautinoga paia ma o se feagaiga e mafai ona avea ma se faaipoipoga e faavavau.⁹

O le noataga o le faaipoipoga e tatau ona faavavau e pei lava o le alofa, o le uiga aupito sili lea ona paia o le tagata soifua. O le mea moni lava, o lena noataga e tatau ona faaauau i le umi e avea ai le alofa ma se uiga o le agaga.¹⁰

E tatau ona tatou malupuipuia mai mea matautia o lo o lamatia ai faaipoipoga.

O faailoga o taimi ua faaalia manino ai ua matuai lamatia le paia o le feagaiga o le faaipoipoga. O loo i ai ia nofoaga ua faataunuuina ai sauniga o faaipoipoga i soo se itula lava o le aso po o le po e aunoa ma ni sauniuniga e muai faataunuuina. E faia le laisene ma faataunuuina le sauniga ao faatalitali ai le ulugalii. O le toatele o ulugalii o e ua faaseseina i na ituaiga o faatosinaga ua faamutaina a latou faaipoipoga i le faanoanoa ma le tiga. I nisi tulaga, o nei ituaiga o nofoaga ua na o ni avanoa ua faatagaina ai faaletulafono le ola le mama. Talofa e, i lo latou matuai le malamalama lava i le mea moni! O le a lava le mamao po o le malosi tatou te mafaia, e tatau ona tatou lapataia ia alii ma tamaitai talavou ina ia aloese mai faaipoipoga faalilolilo ma faatatope.

E taua foi ona tetee atu i faatosinaga taufaasese o tusitusiga ua lomia o loo faamatala mai ai “e le taua le faaipoipoga, “ o loo lagolagoina ai le nonofo muamua faatoa faaipoipo ai, ma ua faapea ona faatulaga tutusa ai ia faiga aiga ma se tasi e ese mai i le toalua ma faiga aiga i le taimi o faauoga.¹¹

O le faaipoipoga o se sootaga paia e osia mo faamoemoega ua aloaia lelei—e faapitoa lava mo le tausiaina o se aiga. Ua tautino mai e nisi o tagata na matauina ma le faaeteete e faapea, o lo o taumafai lo tatou olaga i le taimi nei e faatoilaloina nei faamoemoega.¹²

O nisi taimi, e faatagaina ai e alii ma tamaitai e maualalo lo latou aoaoina ma ua lotovaivai, o latou tuinanau, e faapei o solofanua e le faagutua, e faataatia ese ai la latou faamasinoga ma le amio pulea, ma mafua ai ona latou faia agasala e ono mu ai o latou loto fuatia ifo ma tuua ai i o latou loto se faanoanoaga e faavavau.

O le taimi lenei, ina ua lafoai i tuafale le amio tauagafau, ma ua manatu ai o le ola mama o se uiga o aso anamua ua le toe aoga i aso nei, o lea ou te aioi atu ai ia te outou ina ia tausia o outou agaga ia le faaleagaina ma ia le pisipisia lava i lenei agasala, aua o le taunuuga o lenei agasala o le a matuai faatamaiaina ma tulituliloaina ai oe seia oo ina galala ai ou lagona ma tauvalea ai lou tagata. … Ia manatua foi, le taua o le fetalaiga a le Alii e faapea, ai se vaai i se fafine ina ia manao i ai, pe afai e mulilua nisi i o latou loto, o le a le ia te i latou le Agaga, a o le a faafitia le faatuatua ma matatau [tagai MFF 63:16].¹³

I le luasefulufa tausaga ua mavae, ina ua taula le vaa karasini o le Marama i tua mai o le aau na siomia ai le atumotu o Rarotoga, na fesili se tagata malaga o le na manao e fia alu i uta i le matafaga i le kapeteni pe aisea na le folau latalata atu ai i le uafu. I lana tali atu, na taua ai e le kapeteni poto masani le matautia o lea ogasami, ma faasino i le afi o se tasi o vaa o le Maitai, ma le taumua o se tasi vaa, o loo lala mai pea i luga o vai—o nei vaa o faamaoniga ia o le matautia o le taula latalata i le matafaga o lenei atumotu amua. “Tatou te taula iinei, ” o le tala lea a le kapeteni, “aua e sili atu ona saogalemu, e faasaoina ai mai le nuti liliiina e galu, e pei ona i ai na vaa e lua, o loo taatitia o laua tino i luga o na aau matautia.”

O se uiga e faaalia ai le manatu mama i le faaipoipoga, o fautuaga faavaivai loto o ni “faaipoipoga e le manaomia ai ni fanau ma e mafai ona tetea pe a malilie faatasi i ai, ” o le talitonuga ma le manatu faatiapolo o le “faia o faiga aiga ma soo se tasi lava, ” ma teteaga faigofie, o aau matautia ia o loo faaleagaina ai le tele o sa o aiga.¹⁴

O le tele lava o le taimi lua te mafuta ai ma lou toalua, o le tele foi lena o lou fiafia. O pisinisi e aveesea mai ai oe mai le aiga. E nofo lava na o ia. Aua nei e faatagaina le galulue faatasi ma isi tamaitai e vaeluaina ai lou alofa, ma e faatatau foi lena faamatalaga i tamaitai e pei foi o alii. Na i ai se taimi na ou manatu ai e leai; o le alii lava o le faapogai e tuuaia i ai le le mautonu, o feeseeseaiga ma le faanoanoa o loo tutupu soo mai, ae na tatau ia te au ona toe fetuunai lo’u manatu. O le mafuta faatasi o le auala lea e faaauau ai lena alofa lea na mafua ai le lua faatasiga.¹⁵

O le isi tau faamatau i lo tatou lalolagi o le faateleina lea o le fuainumera o ulugalii tetea ma le tulaga o le vaai atu i le faaipoipoga ua na o se maliliega faigofie e mafai ona motusia i se faafitauli po o se feeseeseaiga muamua lava e ono tulai mai.

O se tasi o a tatou meatotino e sili ona pele, o o tatou aiga. E muamua lava a tatou sootaga faaleaiga, ma i lo tatou tulaga o loo i ai nei, e sili atu lona taua nai lo isi fegalegaleaiga faalauaitele uma. Latou te tuuina atu i le fatu ona uluai lagona, ma tatalaina ai vaipuna loloto o le alofa o le fatu. O le aiga o le faleaoga autu lea o uiga faaletagata soifua. O ana matafaioi, fiafiaga, faanoanoaga, ataata, loimata, faamoemoega, ma manatu popole, latou te fausia ai ia uiga autu o le ola o le tagata. …

Afai e faamuamua e se tasi ia pisinisi po o fiafiaga nai lo lona aiga, ua ia amataina i lena lava taimi ona faasolosolo ifo i lalo seia oo atu ina faavaivaia le agaga. Pe afai ua sili atu i se alii le matagofie o se fale kalapu nai lo lona aiga, ua tatau loa lava ona ia tautau atu ma le tiga lona faalumaina, ua toilalo o ia i lona le mafai lea ona maua avanoa maoae o lona olaga ma ua toilalo ai i le suega faaiu o le avea moni ma se tama. … O se faleoo faatauvaa o loo i ai le alofa i se aiga ua faatasia ma le fiafia, ua sili atu ona taua i le Atua ma le lumanai o tagata nai lo nisi lava oa. I se aiga faapena, e mafai ma o le a faia ai e le Atua ni vavega.¹⁶

O se faaipoipoga faamanuiaina e manaomia ai faigauo, taumafaiga, ma tautinoga faifai pea.

Ou te fia uunaia ia faigauo faifai pea, ma e faatatau i tagata matutua. Ua toatele naua ulugalii ua faaipoipo ma faapea o le sauniga o le faaipoipoga o le mutaaga lea o faigauo nai lo le amataga o faigauo o le faavavau. Aua nei galo ia i tatou, i le taimi o le mamafa o avega o le olaga faaleaiga—ma e oo mai lava—e sili atu ona talisapaia upu malu o le loto faafetai, ma aga tausaafia nai lo na aso ma masina matagofie o faigauo faamasani. O le maea ai o le sauniga o le faaipoipoga ma le taimi o tofotofoga e tulai mai ai i aso taitasi i totonu o le aiga lena upu o le “faafetai, ” po o le “malie lou loto, ” “pe a e loto i ai, ” i le tane po o le ava foi, e i ai lona sao i lena alofa lea na mafua ai ona oulua oo mai i le fata faitaulaga. E taua ona manatua, o le alofa e mafai ona matelaina seia iu ina mate, e faapei lava foi o le tino pe a leai se meaai e maua. O le alofa e fafaga i le agalelei ma le faaaloalo. E maoae le fuaiupu muamua ua lauiloa i le lalolagi Kerisiano o le Salamo o le Alofa, e faapea, “E onosai le alofa e agamalu.” [Tagai 1 Korinito 13:4.] O le mama faaipoipo e le tuuina atu ai i se alii se aia e limatete ai pe le alofa ai, ma e le tuuina atu ai foi i se tamaitai le aia e faainaelo ai, faalii, pe tetee ai.

O le isi tulaga aoga e fiafia ai lau faaipoipoga, ou te faaigoaina o le pulea o le tagata lava ia. O mea laiti e tutupu e te ita ai, ma vave ai ona e lafo atu ni upu, ma le maatiati, ma le leoleoa, ma faatiga ai le loto o le tasi. Ou te le iloa lava se isi uiga tausaafia e fesoasoani e maua ai le fiafia ma le filemu o le aiga e sili atu nai lo le uiga tausaafia maoae o le pulea o upu e lafo. Ia aloese mai le lafoina o le uluai upu maai e oo atu i lou mafaufau i le taimi lava e te tiga ai po o le taimi lava e te vaaia ai se mea i se isi tagata e te ita ai. Ua faapea mai, ia matuai faaatoatoa lau pupula i le taimi e fai ai le faigauo faamasani, ae a uma ona e faaipoipo, ona faaafa lea o lau pupula. …

“O le faaipoipoga o se sootaga e le mafai ona ola ai le manatu faapito, mateletele, fiapule, faailoga tagata, ma le leai o se faaaloalo. O le faaipoipoga o se sootaga e faamanuiaina i le talia aloaia, tutusa tagata uma, fetufaai, foai atu, fesoasoani atu, faia o le matafaioi a le tagata, aoao faatasi, fiafia i tausuaga.”¹⁷

Ia faaitiitia ia sese, ia viia uiga lelei. A mavae atu uiga lelei o le uluai taimi na faatoa nonofo ai, ona amata lea ona vaaia e ulugalii ia ni vaivaiga, o ni uiga e patino i le tagata lava ia sa lei vaaia muamua. Ua oo mai tiutetauave faatina i le tamaitai. Ua oo mai foi faigata i le totogiina o aitalafu. Ona tauau ai lea ina tatou vaavaai masei. E ao ina tatou aoao ina ia pulea i tatou lava i lea tulaga. …

Ou te manatu e le mafai ona faafitia le mea moni, e leai se lio o se faaipoipoga e mafai ona maua i ai le filemu moni, alofa, mama, ola mama, ma le fiafia, pe afai e le i ai le agaga o Keriso, ma taumafaiga i aso taitasi, i itula taitasi pe a mavae ona usitaia ma le alofa ia ana poloaiga paia, aemaise lava, o le tatalo i po taitasi e faailoa atu ai le agaga faafetai mo faamanuiaga ua maua.

E fesoasoani le Atua ia i tatou i le fausiaina o aiga ina ia mafai ona i ai le agaga o le lagi i luga o le fogaeleele. Ua e silafia ma ou iloa e mafai ona tupu lena mea, e le o se miti, e le o se manatu. E mafai ona tatou maua lena fegalegaleaiga matagofie o le tane ma le ava lea e saga faateleina ai le alofa pe a oo mai faafitauli o le olaga. E mafai ona tatou maua ni aiga e le mafai lava ona faalogoina ai e fanau se tauaimisa po o ni feupuaiga a se tama ma se tina. E fesoasoani mai le Atua ia i tatou … e fausia na ituaiga o aiga, ma ia aoaoina ai o tatou alii ma tamaitai talavou o e e fiafia i olaga faale-aiga, ina ia teuloto lena aoaoga.¹⁸

Fautuaga mo Suesuega ma Talanoaga

O le a se mea e te fiafia ai i fegalegaleaiga a Peresitene ma Tuafafine MaKei? Ua faateleina faapefea lona agavaa ona o la laua sootaga, na te tuuina mai ai fautuaga e uiga i faaipoipoga?
Na aoao mai Peresitene MaKei e faapea o le alofa o le “uiga sili lea ona paia o le tagata soifua” (itulau 165). Aisea e te manatu ai ua sao lena manatu?
O le a sou manatu i le uiga o le “faaipoipoga ua faauuina e le Atua”? (Tagai i itulau 161–63.) O le a se aafiaga o o tatou lagona e uiga i le faaipoipoga ona o lena malamalama? O le a le aoaoga a le tusiga, “O Le Aiga: O Se Folafolaga i le Lalolagi” e uiga i le faaipoipoga?
O a ni mea matautia ua lamatia ai faaipoipoga i aso nei? (Tagai i itulau 163–65.) O le a le eseesega i le va o le mafaufau i le faaipoipoga o se feagaiga ma le mafaufau i ai ua na o se “maliliega faigofie”? E faapefea ona tatou foiaina ia faafitauli ma feeseeseaiga e tulai mai i faaipoipoga? (Tagai i itulau 166–67.)
Aisea e tolopoina ai pe le fia faaipoipo ai isi tagata? E faapefea ona tatou fesoasoani i isi ia mafaufau i le faaipoipoga o le “mataupu maualuga” lea na saunoa i ai Peresitene MaKei?
Aisea e taua ai le faaauau pea o faigauo faamasani i le taimi atoa e faaipoipo ai? (Tagai i itulau 165–67.) O a ni auala ua e maua e faamalosia ai a oulua sootaga ma lou toalua? O a ni faataitaiga ua e vaaia i nisi ulugalii o e o loo faaauau pea ona faamalolosia a latou faaipoipoga?
Aisea e leaga ai upu malolosi i se sootaga o le faaipoipoga? E mafai faapefea ona tatou maua se loto pulea e sili atu i lenei tulaga? (Tagai i itulau 165–67.)
Na aoao mai Peresitene MaKei e leai se faaipoipoga e mafai ona manuia e aunoa ma le “agaga o Keriso” (itulau 167). O a ni auala e mafai ona tatou aumaia ai le agaga o Keriso i se faaipoipoga?

O Mau e Faatatau I Ai:Mataio 19:3–8; Efeso 5:25; MFF 25:14; 42:22; 49:15–17; 131:1–4

President and Sister McKay — E fiafia tele Peresitene ma Tuafafine MaKei “i lena mafutaga matagofie o le tane ma le ava, lea e saga faateleina ai le alofa, pe a oo mai faafitauli o le olaga.”