Mataupu 11

Tausi i le Upu o le Poto

O le Upu o le Poto o se vaega taua o le talalelei, o le “mana lea o le Atua i le faaolataga”—faaolataga faaletino e faapena foi i le faaolataga faaleagaga.¹

Folasaga

Na aoao atu ma molimau atu ia Peresitene MaKei faapea o le Upu o le Poto o se poloaiga na tuuina mai e le Alii ina ia faamanuiaina ai i tatou e le gata i le faaletino ae faapea foi i le faaleagaga. I ana aoaoga e faapea foi i ana mea e fai, sa ia matuai usitaia ai lava lenei poloaiga. I se feiloaiga ma le masiofo o Netalani i le 1952, sa faapea ona maua ai e Peresitene MaKei ma lona faletua se faatasiga manaia. Na fuafuaina e le tupu tamaitai se feiloaiga ma i laua mo le 30 minute. Sa matauina lelei ma le faaeteete e Peresitene MaKei le taimi, ma ina ua uma le afa itula, sa ia faafetai atu loa ma le faaaloalo i le tupu tamaitai ma amata loa ona tuumuli ese. “Lau Susuga MaKei, ” o lana saunoaga lea, “alala mai i lalo! Ua sili atu ona ou fiafia i le tolusefulu minute lenei nai lo se isi tolusefulu minute na ou mauaina i se taimi umi. Ou te manao ina ia faaumiumi teisi atu la tatou feiloaiga.” Na toe nofo ifo o ia i lalo. Ona aumaia ai lea o se tamai laulau i totonu, ona ligi lea e le tupu tamaitai ia iputi e tolu, ona avatu ai lea o le tasi ia Peresitene MaKei, o le tasi i lona Faletua, ae tuu le isi ia te ia. Ina ua matauina e le tupu tamaitai e leai ma se tasi o ana malo faaaloalogia o taumafaina le ti, o lea sa ia fesili atu ai, “Lua te le fia taumafa ti faatasi ma le Tupu Tamaitai?” Sa faamalamalama atu e Peresitene MaKei, “E tatau ona ou tauina atu i lau afioga, o o matou tagata e le talitonu i le inuina o ni meainu vevela, ma e matou te manatu o le lauti o se meainu vevela.” Sa tali atu o ia, “O au o le Tupu Tamaitai o Netalani. O lona uiga o lau tala ua e ta’u mai ia te au e le mafai ona oulua taumamafa i le ti faatasi ma se tasi e oo lava i le Tupu Tamaitai o Netalani?” Sa tali atu Peresitene MaKei, “Pe poloaiina ea e le Tupu Tamaitai o Netalani le taitai o ni tagata se miliona, toluselauafe ina ia faia se mea o loo ia aoaoina atu i ona tagata e aua le faia?” “O oe o se tagata lelei tele, Peresitene MaKei, ” o lana tala lea. “Ou te le fai atu ia te oe e te faia lena mea.”²

Aoaoga a Tavita O. MaKei

O le Upu o le Poto o se poloaiga manino na tuuina mai i se faaaliga mai le Alii.

O le aso 27 o Fepuari, 1833, na maua ai e le Perofeta o Iosefa Samita le faaaliga o loo tusia i le vaega e 89 o le Mataupu Faavae ma Feagaiga. … Ou te fia faitauina atu ni nai [fuaiupu] mai lena vaega:

“Faauta, e moni, ua faapea mai le Alii ia te outou, ona o mea leaga atoa ma togafiti ua faia ma o le a tupu pea i loto o tagata faatuputupu leaga i aso e gata ai, ua ou lapataiina outou, ma mua’i lapataiina outou, i le tuuina atu ia te outou o lenei upu o le poto i le faaaliga.

“O le inu e so outou o le uaina po o se mea inu malosi, faauta e le lelei lea, e le lelei foi i le silafaga a lo outou Tama, tau lava o lo outou potopoto faatasi e faia a outou faamanatuga i ona luma.

“A e faauta, o le uaina lava lenei, ioe, o le uaina mama o le fua o le vine, o la outou lava faiga.” [MFF 89:4–6.] …

O le fuaiupu ou te manao e taulai atu i ai o lenei: “O le inu e so outou o le uaina po o se mea inu malosi … faauta e le lelei lea, e le lelei foi i le silafaga a lo outou Tama.” O le afioga lena a le Atua i tagata o lenei augatupulaga. E pei lava lona malosi o afioga a le Faaola, “Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava a’u.” [Ioane 7:17.] Le Au Paia e o Aso e Gata Ai, ua outou iloa lenei saunoaga a le Faaola e moni; tatou te molimau atu faapea afai o le a faia e soo se tagata le finagalo o le Atua o le a ia maua le molimau, i lona loto ma lona olaga, e faapea o le Talalelei a Iesu Keriso e moni. Tatou te taliaina afioga a le Faaola, “A e afai tou te le salamo, e faapena lava ona fano outou uma.” [Luka 13:3.] O na upumoni e faavavau, e matuai maoti ma manino lona faailoa mai, tatou te taliaina foi e moni. Atonu e le mafai ona tatou ola atoatoa ai, ae tatou te taliaina uma, aua o le afioga ia a le Atua. E matuai malosi lava, e tumau foi e faavavau lenei upumoni …, “O mea inu malolosi e le lelei mo le tagata.” [Tagai MFF 89:7.] Ae peitai [i le tele o tausaga] ua tuanai, ma i le gasologa o lena taimi sa talaiina atu ai lenei mataupu i vaiaso taitasi, pe afai e le o aso uma, i nisi o faapotopotoga a Isaraelu, ae o loo tatou iloaina pea nisi o loo vagavagaia i tatou o e o loo faapea mai e ala i a latou mea e fai, e lelei mo le tagata.

Ua ou fiafia ina ua ou suesueina lenei fuaiupu, ina ia saili i ai e lei faapea mai le Alii, “E le lelei le inu tele i mea inu malolosi;” e lei fetalai mai foi “o le ona e le lelei.” Ana faapea na Ia faavaivaiina lena faamatalaga e ala lea i le toe suia ma faapea mai, “O le soona inu tele i mea inu malolosi, po o le soona inu tele i ai, e le lelei lea, ” semanu e vave lava ona tatou faamaoniaina i tatou faapea o sina inu laitiiti i ai e lelei. Ae e pei o isi upumoni e faavavau o loo tumau pea e le masuia; o mea inu malolosi e le lelei.³

Ou te manatu o le tapaa e faapena foi le tatau ona aloese mai ai e pei o le utia a se gata uogo. … Ua fetalai mai le Alii o le tapaa e le lelei mo le tagata. Ua lava lena mo le Au Paia o Aso e Gata Ai.⁴

O tagata o le Ekalesia ua faia ni mausa a le o le tapaa po o le lauti ma le kofe, o loo matele i latou e tau saili ni faamaoniga o lo latou faaloloto i mea ua fetalai manino mai ai le Alii e le lelei mo le tagata. Soo se taimi lava latou te taumafai ai ina ia faia faapena, ua latou faaalia ai le vaivai o lo latou faatuatua i afioga a le Alii, lea ua tuuina mai o se apoapoaiga ma se “atamai, ” ma le usiusitai lea o le a aumaia ai faamanuiaga mautinoa e pei ona ia fetalaia, “Aua e te.”⁵

O le le Usiusitai i le Upu o le Poto e aumaia ai taunuuga leaga i le faaletino ma le faaleagaga.

O loo i ai se vaega i totonu o le lauti ma le kofe lea afai e tuuina i totonu o le tino o le tagata, e matele atu ai ina faateleina le tata o le fatu; lea e faateleina ai foi le saoasaoa o le sosolo o le toto ma le manava. E mafua ai ona mafanafana le tino ma faateleina ai ona soona fiafia. Ae peitai, a mavae sina taimi, ona mavae ese atu lea o lea fiafia le tumau, ma e matuai moomia ai lava e le tino le malolo ma le toe faaolaolaina nai lo le taimi muamua a o lei faaaogaina le mea inu. O mea inu vevela i le tino e pei o le sasa e sasa ai le solofanua ua vaivai—e faaoso ai agai i luma ae le maua ai se malosi tumau po o se tausiga e masani ai. O le sasaina soo o le solofanua e faateteleina ai le paie o le solofanua; ma o le fai ma amioga le faaaogaina o mea inu malolosi, tapaa, lauti, ma le kofe, e na o le faavaivaiina ai o le tino ma faalagolago atili ai i mea inu vevela lea ua avea ma mausa.

Na fetalai mai le Alii i ni upu e vave lava ona iloaina e faapea o nei mea e le lelei mo le tagata. Ua faapea foi ona faailoa mai e le faasaienisi lea lava mea e tasi. O afioga a le Atua ua lava lea mo tagata faamaoni uma o le Au Paia o Aso e Gata Ai.⁶

O le tali atu a se tagata i ona tuinanauga ma lagona pe a tutupu a’e e fuatiaina ai lena tagata. O lea tali atu e faaalia ai le mana o le tagata e pulea ai, po o le tuuaulafo atu foi i ai. O lea la, o le vaega lea o le Upu o le Poto, lea e faatatau i mea inu malolosi, fualaau, ma mea inu vevela, e sili atu le loloto nai lo ma’i e aafia ai le tino, ma e matuai taia ai lava le faapogai o loo atiina ae ai ia uiga o le tagata. …

I le gasologa o le selau tausaga ua mavae, o le ofoofogia o le alualu i luma o le faasaienisi na mafaia ai e le tagata ona iloiloina e ala mai i ni faataitaiga ia aafiaga leaga o mea inu oona ma fualaau oona i neura ma le ‘afu’afu o le tino o le tagata. O le matauina ma le faataitaia na faaalia ai o latou aafiaga i le tagata. O ia faataitaiga uma faapea ma mea na matauina na faamaonia ai le moni o le … faamatalaga: “O mea inu malolosi ma le tapaa e le lelei mo le tagata.”⁷

A o o’u toe manatunatu i aafiaga sa i ai i lo’u olaga talavou, ou te talitonu o le aafiaga sili sa i ai o le taulotoina lea o lena faaupuga taua: “E le afio lo’u agaga i se malumalu eleelea.”

Ona i ai lea ma … isi, ma e foliga uma mai lava i ni lapataiga. O le vaega muamua lava na oo mai ia te au i lo’u laitiiti a o o’u nofonofo i luga o se nofoa sipuligi i tafatafa o lo’u tama a o ma tietie atu i se taavale solofanua e agai atu i Ogden. Na toeitiiti lava ma sopoiaina le ala laupapa e sopoia ai le Vaifate o Ogden, ae savali mai loa i fafo se tamaloa mai le fale pia e i le auvai i matu o le vaitafe. Ou te iloaina o ia. Ou te fiafia ia te ia aua na ou vaai i ai i se tala faatino. Ae i lea vaaiga i lea taimi sa aafia o ia i le ava malosi, ma ou te matea ua tele ni aso o inu pia.

Ou te le iloa … o loo ona o ia, ae ina ua tagi o ia ma aioi atu i lo’u tama mo se limasefulu sene e toe alu ai i totonu o le pa pia, sa ou vaaia ai lona tautevateva ese atu. A o ma tietie atu agai i luga o le ala laupapa sa faapea mai lo’u tama: “Tavita, sa masani ona ma o faatasi ma le uso le la ma te asiasi i aiga.”

Na pau lava lena o lana tala na fai mai, ae o se lapataiga ia te au lea e le mafai ona ou faagaloina, e uiga i aafiaga o le soona inu ava le mafaufau.

E lei leva lena, ae [tofi] i matou e se faiaoga e faitau se tala e uiga i se vaega o tagata talavou o e na folau atu i le Vaitafe o Sagato Loleni. … E le mafai ona ou tauina atu ia te outou le tusitala, e le mafai ona ou tuuina atu le autu, ae e mafai ona ou tuuina atu ia te outou le mea na ou manatuaina lea o loo tumau pea ia te au, e uiga i na talavou o e sa inu pia ma saoloto ai ma maua ai se taimi fiafia i luga o le vaa a o folau i lena vaitafe lauiloa. Ae o se tagata sa i le pa’umatu, sa ia iloaina, le tulaga matautia o loo i luma atu o i latou, sa tauvalaau atu: “Sole, o le vaega aave lena o le a outou oo i ai.”

Ae sa latou le amanaiaina lana lapataiga, sa latou faatuatuanai ia te ia. “O lea lava matou te saogalemu, ” ma faaauau pea o latou uiga femitai ma le latou inuga. Sa ia toe tauvalaau atu foi: “O vaega aave na o le a outou oo i ai, ” ae sa latou le faalogo i lana lapatai atu.

E lei leva lava ae latou oo loa i vaega aave. Ona latou faanatinati loa lea ona latou toe taualo atu i le pa’umatu, ae ua tuai. Ou te le manatuaina ae na o upu o le parakalafa mulimuli, o le malomaloa, tuualaga, i luga o vaega aave, ma sa latou oo atu i luga o le afu ma latou fano ai.

E sese? Ioe. Ae ou te tauina atu ia te outou faapea o loo toatele naua i latou o loo i ai i le vaitafe o le olaga o e o loo taualo atu i le itu lena. E lei galo lava ia te au lena tala.⁸

E tatau ona tatou mataala i “togafiti ma mea leaga a tagata faatuputupu leaga.”

O se tasi o faamatalaga sili ona taua o loo i totonu o le Mataupu Faavae ma Feagaiga, o le faamatalaga lea o loo momoli mai ai le faamaoniga o le musuia o le Perofeta o Iosefa Samita, o loo maua lea i le Vaega e 89 … :

“Ona o mea leaga ma togafiti ua faia ma o le a tupu pea i loto o tagata faatuputupu leaga i aso e gata ai, ua ou lapataiina outou, ma mua’i lapataiina outou, i le tuuina atu ia te outou o lenei upu o le poto i le faaaliga … ” (MFF 89:4.)

“O mea leaga ma togafiti o loo i ai ma o le a i ai pea lava i loto o tagata faatuputupu leaga. … ” O le tulaga ese o lena mea na faagaeetia ai au i le vaitau o le luasefulu ma le tolusefulu o le senituri [20]. E na ona ou talosaga atu lava ia te outou … ina ia toe manatunatu i metotia na faaaoga e nisi o e fiafia i le tapaa ina ia faatosina ai tamaitai ina ia ulaula tapaa.

Tou te manatuaina lelei le auala na latou amataina ai faatogafiti le latou fuafuaga. Na muamua lava ona latou faapea mai, e tuuitiitia ai le mamafa. E i ai sa latou anaga faapea: “Ula se sikareti nai lo se lole.”

Mulimuli ane, na vaaia ai e nisi o i tatou o e fiafia i tifaga lo latou tuuina atu i se tamaitai talavou e tutuina se sikareti a se alii. Na sosoo mai ai ma le faaalia o le lima o se tamaitai i luga o ni laupapa tetele o loo tusia ai le tutuina po o le ulaina o se sikareti. Po o se tausaga pe lua foi na tuanai ai lena mea ae lei pine ae latou matuai faaaliina mai lava se tamaitai i luga o le tifaga po o ni laupapa tetele e tusia ai ni ata o loo ulaina le sikareti. …

Atonu e sese au, ae sa ou manatu na ou vaai i se faailoilo talu ai nei lava e faapea o tagata faatuputupu leaga o loo i ai nei ni a latou fuafuaga leaga mo o tatou tupulaga talavou. Ia matuai mataala lava i ai.⁹

Ua i ai i tagata o le Ekalesia se tiute mo i latou lava ma le Ekalesia ina ia ola ai ma aoao atu le Upu o le Poto.

Soo se alii, soo se tamaitai, e tatau ona tauaveina se vaega o le tiutetauave a lenei Ekalesia. … E tusa lava po o fea tatou te i ai, … po o a lava tulaga po o mataupu faapisinisi e valaauina i ai i tatou, pe o totonu o vanu po o fea lava, afai e faaosoosoina i tatou, i se taeao malulu, ina ia solia le Upu o le Poto e ala i le inuina o ni nai ipu lauti po o le kofe se lua pe tolu, ia tatou lagonaina ai le tiutetauave e faia le mea tonu.

Ia faapea ane le tagata ia te ia lava, “O le tiutetauave o le avea ma tagata o le Ekalesia o loo i o’u luga; o le a ou le gauai atu i ai. E tusa lava pe leai se tasi o vaai mai ia te au, ou te iloa o loo silafia e le Atua pe a ou gauai atu i ai, ma o taimi uma lava ou te gauai atu ai i se vaivaiga ou te vaivai ai foi lava ma au ma ua ou le faaaloalogia ai lo’u lava tagata.” Afai o loo e i ai i se tulaga faapisinisi, ae faapea atu au paaga, “Sau, tatou o e fai se tatou mea inu e sami ai lenei faatauga, po o lenei pa’u, ” ia faapea atu lau tali, Leai, leai! E tusa lava po o lou matuai fia inu lava i ai, ia avea pea ma Au Paia o Aso e Gata Ai, ma faapea atu, “Leai; o le tiutetauave o le avea ma tagata auai i totonu o le Ekalesia o loo i o’u luga lea.”¹⁰

E matuai tautino atu ma le mausali e le Ekalesia a Iesu Keriso o le Au Paia o Aso e Gata Ai i le mataupu faavae e faapea o le lauti, kofe, tapaa, ma mea inu oona e le lelei mo le tagata. O tagata faamaoni o le Au Paia o Aso e Gata Ai e aloese mai le faaaogaina o le tapaa ma le inuina o mea inu vevela po o mea inu oona, e ala i faataitaiga ma upu, latou te aoao atu foi i isi ina ia faia foi faapea.¹¹

O le ola ai i le Upu o le Poto e faamalosia ai le tagata ma aumaia ai le fiafia.

Ua uunaiina e le Ekalesia ia alii ina ia pulea i latou lava i le faatonutonuina o mea latou te faananau i ai, o lo latou ita, ma a latou upu e fai. E le oo se tagata i se tulaga sili ona lelei pe afai e nofo pologa o ia i se mea ua fai ma ona mausa. E le oo se tagata i se tulaga sili ona lelei pe afai e ola e na o le faamalieina o ona manaoga. O se tasi lena o mafuaaga ua tuuina mai ai e le Alii i le Ekalesia le faaaliga o le Upu o le Poto ina ia mafai e alii talavou ma tamaitai talavou mai lava i lo latou laiti ona aoaoina ina ia puleaina i latou lava. E le faigofie pea lena mea. O loo feagai talavou i aso nei ma fili—o manatu sese ma uiga le mama. … O tapenapenaga mautu e moomia ina ia faafetaiaia ai nei fili.¹²

O alii talavou uma lava i Siona, afai e tulai a’e o ia mai le vai papatiso, e ao ona ia iloa o se vaega o lona tiute o le teteeina lea o le ulaina o se sikareti, e tusa lava po o fea e i ai o ia. Soo se tagata talavou lava i totonu o le Ekalesia e tatau ona aoaoina, afai e tulai a’e o ia mai le vai papatiso, e tatau ona ia teteeina soo se mea inu oona pe a tuu faasolo atu i faatasiga e i ai. Soo se tagata talavou lava o le Ekalesia e tatau ona iloa o le tapaa i soo se ituaiga e le tatau lava ona faaaogaina. E tatau ia te ia ona teenaina nei amioga uma, e le gata mo le faamanuiaga ua folafolaina mai e lo tatou Tama, ae ona o le malosi lea e moomia ina ia tetee atu ai i faaosoosoga e sili atu.¹³

O se tasi o aoaoga faatino e sili ona taua a le Ekalesia e faatatau lea i le [pulea o le tagata lava ia] o le Upu o le Poto. E moni. E faatatau tonu lava i le fia ai. Ia e faaali mai ia te au se tagata ua matuai pulea atoatoa lona fia ai, o le e mafai ona ia teenaina ia faaosoosoga uma ina ia faaloloto ai i mea inu vevela, ava malosi, tapaa, mariuana, ma isi fualaau oona, ona ou faaali atu lea ia te oe o se talavou po o se tagata faapena ua atinaeina se mana e pulea ai ona lagona ma manaoga.¹⁴

E tusa lava po o le a le faalogo soo o le Ekalesia ma le lalolagi e uiga i le Upu o le Poto ae o le a latou manaomia pea lava. O se mataupu na tuuina mai i le tagata mo le fiafia ma le manuia o le tagata. O se vaega o le olaga. … O le tagata e toilalo ai i le ola ai ua faoa foi le malosi o le tino ma le malosi o le tagata lea e mafai ona ia mauaina. O le upumoni o le faamaoni lea i aia tatau e pei ona tatou vaaia ai; o le lototele lea e ola e tusa ai ma o tatou sini faamoemoeina o le mana lava lea.¹⁵

Fautuaga mo Suesuega ma Talanoaga

Oa ni auala e mamao ai i luma le Upu o le Poto nai lo lona taimi?
Aisea e taumafai ai tagata i nisi o taimi e faamaonia le faaaogaina o mea o loo faasaina mai i le Upu o le Poto? O a nisi o tulaga matautia i lea ituaiga o mafaufauga? (Tagai itulau 116–17.)
Aisea e taua ai le tausia faalelei o o tatou tino? O a nisi o aafiaga leaga faaletino o le le usitaia o le Upu o le Poto? (Tagai itulau 117–19.) E faapefea ona aafia i tatou i le faaleagaga i le le usitaia o lenei poloaiga? (Tagai itulau 117–19.)
Na saunoa ia Peresitene MaKei i metotia na faasalalauina ai le tapaa i le vaitau o le 1930 (tagai itulau 120). O a ni faataitaiga o loo tatou vaaia i aso nei o “tagata faatuputupu leaga” o loo faalauiloaina le faaaogaina o ni mea oona? E mafai faapefea ona tatou fesoasoani i le autalavou ia iloa le aoga o le usitaia o le Upu o le Poto?
E faapefea ona avea le Upu o le Poto ma se poloaiga faaletino ma le faaleagaga? (Tagai itulau 117–19, 121–22.) O a faamanuiaga ua folafolaina atu ia i latou o e usitaia lenei poloaiga? (Tagai MFF 89:18–21.) O a faamanuiaga sili ona taua ua maua e oe ma lou aiga mai le usitaia o le Upu o le Poto?
O le a se mea e mafai ona tatou faia ina ia faateleina ai lo tatou malosi e tetee atu ai i faaosoosoga ina ia soli le Upu o le Poto? E faapefea ona fesoasoani le Upu o le Poto e puipuia ma faamalosia le tagata? (Tagai itulau 121–22.)
O a ni mea oona ma le faatosina o loo maua i aso nei lea e le o ma’oti ona tauina mai i totonu o le MFF 89? E mafai faapefea e aoaoga o loo i totonu o le MFF 89 ma afioga a perofeta o aso e gata ai ona fesoasoani e taialaina ma faamalosia i tatou e tetee atu i nei mea?

Mau e Faatatau I Ai:Tanielu 1:3–20; 1 Korinito 3:16–17; MFF 89:1–21

President McKay — O ana aoaoga ma ana faataitaiga, na faaali atu ai e Peresitene MaKei ia faamanuiaga o le ola ai i le Upu o le Poto.

mother and son blessing food — Ua uunaiina e Peresitene MaKei ia le Au Paia o Aso e Gata Ai ina ia aoao a latou fanau ma isi tagata i le Upu o le Poto “e ala i faataitaiga ma upu.“