Mataupu 12

O Le Perisitua, o le Tiutetauave e Avea ai ma Sui o le Atua

O le perisitua o se mataupu faavae faavavau lea sa i le Atua mai le amataga ma o le a i ai pea e oo atu i le faavavau. O ki na tuuina mai mo le faaaogaina e ala mai i le perisitua na aumai mai le lagi, ma o lenei mana o le perisitua o loo faagaoioia i totonu o lenei Ekalesia i aso nei a o faapea ona faaauau ai ona faalauteleina i le lalolagi.¹

Folasaga

Ao saunoa atu i se sauniga a le perisitua o le konafesi aoao, sa faamatala ai e Peresitene MaKei se mea na oo i ai a o auauna faamisiona o ia i Sikotilani i le 1898. Sa la savavali atu ma lana soa, o Elder Peter Johnston, i tafatafa o se fale sa tosina atu ai le la vaai i se faitotoa maa faaofuofu i le pito i luma ma se faaupuga o loo vaneina ai i luga o le faitotoa faaofuofu. Na toe faamatalaina e Peresitene MaKei:

“Sa ou faapea atu i la’u soa: ‘E tulaga ese lena mea! O le a ou alu e vaai po o le a le la faaupuga.’ Ina ua ou latalata atu i ai, na oo mai ai ia te au le savali, e le gata i totonu o maa, peitai sa foliga mai na oo mai i Le ana le galuega o loo ma galulue ai:

“ ‘Po o Le a Lava Lau Galuega, Ia Fai Lelei Lau Vaega.’ …

“E fesoasoani le Atua ia i tatou ina ia tatou mulimuli i lena faaupuga. O se isi lena faaupuga o afioga a Keriso: ‘Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava au, ’ [tagai Ioane 7:17] ma o lena molimau e taitaiina uma atu ai i tatou i le taitaiga a le Agaga Paia i le olaga. Ou te tatalo faamaualalo ina ia tauaveina e le au Perisitua ua faapotopoto mai i lenei afiafi … io latou luga ia tiutetauave ua tuuina atu e le Atua ia i latou, ma faia lo latou tiute i soo se mea o i ai.”²

Na faamanuiaina ia Peresitene MaKei ina ua faatinoina ma le amiotonu e nisi e umia le perisitua ia le mana o le perisitua mo ia. Ia Mati o le 1916, na pa ai i luga le Vaitafe o Ogden ma na le saogalemu ai le ala laupapa e sosoo ai le vanu ma le tafa. Na ia toe faamatalaina: “Na ma feosofi [o ia ma lona uso o Thomas E.] i totonu o se tamai taavale o le ituaiga o le Ford ma faataalise atu loa i le timu ma le palapala. … Sa ou vaaia se faaputuga maa iina i le ala laupapa, ma na foliga mai sa matuai lelei atoatoa e pei ona sa i ai i le aso ua tuanai. Sa ou talasua atu faapea, ‘O le a ou kolosia le ala laupapa. E mafai ona e aau?’ O la’u tala lena na ou tu malosi ai loa i le vae penisini ma lele atu loa i le isi itu o le ala laupapa, ae ou faalogoina ia Thomas E. o faapea mai, ‘Auoi, sei vaaia! O loo i ai se maea!’ O le leoleo po na aluese i le itula e fitu na tosoina le maea uamea lenei e faalava i le auala, ma o le leoleo po na sui atu i ai, le tagata lea e tiute i le ao, e lei taunuu atu. Sa ou aapa atu i le taofi lima ae ua tuai. Na nutililii e le maea le tioata o le taavale, ma ato mai i tua, ma maua lelei ai lo’u auvae, ma motu ai lo’u laugutu, ma touluese ai o’u nifo i lalo, ae ta’e lo’u auvae a luga. Na punou i lalo ia Thomas E. ma solaese e aunoa ma se manua, ae tuu ai na o au ua ou matapogia. …

“E ta ane le iva i lena taeao o o’u taoto lava i luga o le laulau e fai ai taotoga. … Sa latou toe su’iina lo’u auvae a luga faapea ma ni filo se sefulufa na su’i ai lo’u laugutu i lalo ma lou alafau na manua. O se tasi o tagata sa i ai na faamatala mai, ‘Leaga tele; o le a le atoatoa lona tino mo le olaga atoa.’ E mautinoa lava sa matuai le mafai lava ona iloa po o ai au. Ina ua toe toso atu au i lo’u potu i le falemai, sa talanoa faamafanafana mai ai se tasi o tamaitai tausi mai, ‘Ia, le Tuagane MaKei, e mafai ona fai sau soesa, ’ o lona uiga ina ia mafai ai ona ou nanaina o’u ma’ila. … E toatolu ni au uo lelei lava … na asiasi atu ma faauu ia te au. I le faamauina o le faauuga, sa faapea mai ai [se tasi o i latou], ‘Matou te faamanuia ia te oe ina ia aua nei suia ou foliga ma ia aua nei e lagona ni tiga.’ …

“O le afiafi o le Aso Toonai na asiasi atu ai ia Dr. William H. Petty e vaai pe o sao ia nifo ia sa totoe i le auvae a luga. O ia lea na faapea mai, ‘Ou te matea o loo e matuai tigaina lava.’ Sa ou tali atu, ‘Leai, e leai ma so’u tigaina.’ … O le taeao o le Aso Sa na susu atu ai ia Peresitene Heber J. Grant mai le Aai o Sate Leki. … Na ia ulufale atu ma faapea mai, ‘Tavita, aua e te tautala; O le a na ona ou tuuina atu lava o se faamanuiaga ia te oe.’ …

“O Oketopa na sosoo ai, … sa ou nofo ai i se laulau e latalata i le mea sa nofo ai ia Peresitene Grant. Sa ou matauina lona vaai mai ma le toto’a, ona faapea mai lea, ‘Tavita, mai le mea o loo o’u nofo atu ai e leai ma se ma’ila e mafai ona ou iloaina atu i ou foliga!’ Sa ou tali atu, ‘Leai, Peresitene Grant, e leai ni ma’ila.’ ”³

Aoaoga a Tavita O. MaKei

O le perisitua o le mana ma le pule lea e fai ai ma sui o le Atua.

Soo se taimi lava e tuu atu ai le perisitua i se alii, e le tuuina atu i ona luga ina ia avea o se faamamaluga o le tagata lava ia, e ui lava e avea ma se tulaga faapena a o ia faamamaluina, ae o se pule e fai ai ma sui o le Silisili ese ma o se matafaioi e lagolago atu ai i le Alii e faataunuu le faaofuina o le tagata i le tino ola pea ma le ola faavavau [tagai Mose 1:39].⁴

O outou o alii o e o loo umia le perisitua a le Atua, o e o loo umiaina le pule paia e fai ai ma sui o le Silisili ese i soo se tofiga ua tofiaina i ai outou. Afai, e faamanuiaina se alii e masani ai e avea o se leoleo i lona nuu, e i ai se mea faapitoa ua faaopoopo atu ia te ia. Afai e sii i luga le lima o se leoleo i luga o nei auala, i le kolosi, e te tu. E i ai se isi mea e sili atu o loo i ai ia te ia, nai lo na o se tagata, o loo i ai le mana lea na tuuina atu ia te ia. Ma e faapena i le olaga atoa. E leai se tagata e mafai ona tuuina atu i ai se tofiga e aunoa ma le faalauteleina. E matuai moni lava. E faapena foi la i le mana o le perisitua.⁵

O le perisitua o se vaega lava o le Aigaatua. O le pule ma le mana lea e na o le Tama Faavavau ma Lona Alo o Iesu Keriso e maua mai ai. …

I le sailia o le faapogai o le perisitua, … e leai se isi mea e mafai ona tatou manatu i ai e sili atu nai lo le Atua lava ia. O loo totonugalemu ia te ia. E tatau ona faapogai mai ia te ia. O le perisitua la, e pogai mai i le Tama, ma e na o ia lava e mafai ona tuuina atu i se isi. O lea la, o le perisitua, e pei ona umia ai e le tagata, e tatau lava ona tuuina atu i le tagata e ala i le pule. E lei i ai lava se tagata i le lalolagi ua i ai le aia tatau e [tuuina] atu ai ia te ia lava le mana ma le pule o le perisitua. E i ai nisi o e na mananao latou te [tuuina] atu ia i latou lava lena aia tatau, ae lei silafiaina e le Alii. I le avea ai ma amepasa mai soo se malo, e faaaoga ai e ia na o lena lava pule na tuuina atu ia te ia e lona malo, o se tagata la ua faatagaina e avea ma sui o le Silisiliese e na te faia lea i le na o mana lava ma aia tatau ua faamatuu atu ia te ia. Ae peitai, afai e tuuina atu lena pule, e i ai foi ma ni ona tapulaa, o aia tatau uma e tuuina atu e avea ai ma sui o se tasi i le tulafono, lea e faamalosia ai se tasi e fai ma sui o le isi. O gaoioiga aloaia uma e faatinoina e tusa ai ma lea mana e sui ai e tutusa lelei lava le malosi e pei lava o loo faatinoina e le tagata lava ia. …

I le iloaina o le Foafoa o le faapogai lea e faavavau ma le tumau o lenei mana, ma e na o ia lava e mafai ona faatonutonuina, ma o le mauaina o le i ai lea o le aia tatau e avea ai ma se sui faatagaina e fesootai sao ai ma le Atua, e maeu le taua o avanoa ma faamanuiaga e maua mai ai e ala lea i le mauaina o le mana ma le pule o le Perisitua Mekisateko—o mea silisili ona mamalu lea e mafai e le mafaufau o le tagata ona mafaufau i ai.

O se tagata la e fesootai ma le Atua o le a ia iloaina le manaia o lona olaga, o le a matuai malosi lona iloatinoina o mea ina ia vave fuafua ai le va o le sao ma le sese, o ona lagona e malu ma toamalie, ae peitai e malosi ma toa i le puipuia o le mea moni; o le a ia iloaina o le perisitua o se faapogai e le muta o le fiafia—o se vaipuna ola e puna pea e tau atu i le ola e faavavau.⁶

O le mana o le perisitua e faatinoina e ala i korama faapea foi ma tagata taitoatasi.

I le faamamafaina ona tautalagia, o le perisitua ua tuuina mai e avea o se mana, o se mea lea e ausia e le tagata lava ia. Ae peitai, o le poloaiga mai le lagi, o alii o e ua tofia e auauna atu i ni tofi patino i totonu o le perisitua e tuufaatasia i totonu o korama. O lea la, o lenei mana e maua i totonu o vaega e faapea foi i tagata taitoatasi. O le korama o se avanoa lea mo alii e tutusa o latou faamoemoega ina ia iloa, ia alolofa, ma fesoasoani le tasi i le tasi.⁷

Afai o le uiga o le perisitua o le mamalu, faamanuiaga, po o le siitiaina i luga o le tagata lava ia, semanu e le manaomiaina ni vaega po o korama. O le i ai o ia vaega na faavaeina lea e le pule mai le lagi o loo folafola mai ai lo tatou felagolagomai, o le moomia lea o le fesoasoani ma le lagolago a le tasi i le tasi. O lea la, o i tatou o ni tagata e felagolagomai.⁸

Na silafia [e le Alii] o i latou nei e [umia le perisitua] e moomia le fefaauoai, faaaumea, o le malosi o le vaega; ma o lea na ia faatuina ai korama ma tofia i ai se aofaiga mai le tiakono e oo atu i le fitugafulu.

O nei vaega e feiloai faatasi, muamua, ina ia aoaoina ma faamalamalamaina, ia faaleleia le iloa, aemaise lava ina ia aoaoina ia le malamalama mama ma mataupu faalelotu, i le faatuatua, i le paia, ae ia faatumauina foi le malosi, ina ia ola amiotonu ai. O nei vaega e tuuina ai se tulaga moomia lea o loo lagonaina e le toatele o tagata. … O korama a le perisitua … o le a tuuina atu le lagolago i soo se tasi o moomia le faaaumeaina, faauoina, ma le auauna atu pe afai o le a faia e tagata lo latou tiute.⁹

O sui o le perisitua Arona, ma sui o korama a le Perisitua Mekisateko, ua i ai so tatou tiute e atiina ae a tatou korama; aua ne’i o tatou tosoina i lalo e ala lea i lo tatou le auai atu i sauniga a le [perisitua], po o le le saunia, po o le le amanaiaina o le tiute. Ia tatou taufai lagona uma, e i tatou taitoatasi, … o lo tatou tiute le faia o se mea e atiina ae ai le Ekalesia, e pei o le tiute o le Ekalesia le atiina ae o le upumoni ma le togiolaina o tagata mai le agasala. Alii e o le perisitua, ua tatou lotogatasi i lenei atinaega; ia avea i tatou ma tagata e faia mea lelei; ma aua nei i ai se alii, mai le faitaulaga sili e oo i le tiakono, i lenei taumafaiga sili a le perisitua …, e pa’u atu i le vaega o tagata e faia mea leaga po o e muimui.¹⁰

O se tasi e umia le perisitua e tatau ona magafagafa i ana mea e fai ma ana upu i tulaga uma.

O le perisitua o le pule lea e fai ai ma sui o le Atua. O se alii ua tuuina atu i ai le perisitua o se sui faatagaina lea o le Alii i soo se vaega ua tofia o ia i ai. O le tiute o se tasi ua fai ma sui i soo se vaega po o se faalapotopotoga o le taumafai lea e fai ma sui e faamamaluina lena vaega po o lena faalapotopotoga. O le auala sili lava e avea ai ma ni sui tauaogaina o le ola lea ina ia mafai e sui taitoatasi ona gauai atu i musumusuga a le Alii o le o loo fai o ia ma ona sui. Ia mafaufau nei i le uiga o lena mea e faatatau i se olaga mama.

“ … e le uunaiina pea le tagata e lo’u Agaga, ” (MFF 1:33) ua fetalai ai le Alii. O tagata uma lava la, o e ua umia lenei perisitua e tatau ona ola i se ituaiga olaga e faatagaina ai o ia e maua musumusuga a le Alii. Ma ou te fia faapea atu e tusa ai ma lenei tulaga, o le fesootai ma le Agaga Paia e matuai moni lava e pei lava o lou fesootai atu e ala i le leitio ma leo e le o lagonaina ma musika o loo faatumulia ai le ea. O loo i ai iina ia uunaiga.

E faapena foi i le Agaga o le Atua. E saunia pea o ia e taitai ma faatonuina i latou o e e fesootai atu e ala i le ola amiotonu ma i latou o e saili atu ma le faamaoni ia te ia. Ou te toe fai atu, o le tiute o tagata taitoatasi ua faatagaina e avea ma sui o ia, o le ola ai lea ina ia gauai atu i lena Agaga.¹¹

O le umiaina o le perisitua a le Atua e ala i le pule mai le lagi o se tasi lea o meaalofa sili e mafai ona oo mai i se alii, ma o le agavaa o le mea taua muamua lea. O le natura faavae lava o le perisitua ia e faavavau. E matuai faamanuiaina lava le tagata na te lagonaina le tiutetauave o le avea ma sui o le Silisili ese. E tatau ona ia lagonaina i se tulaga o le a magafagafa ai o ia i ana aga ma upu i mea uma lava. E leai se alii e umiaina le Perisitua Paia e tatau ona le faaaloalo i lana ava. E leai se alii e umia lena perisitua e tatau ona toilalo e talosagaina ia faamanuiaga mo ana meaai po o le tootutuli faatasi ma lona toalua ma lana fanau ma ole atu mo le taitaiga a le Atua. E mafai ona suia e le perisitua le eseesega i totonu o o tatou aiga. E le tatau ona tatou faaaogaina e pule ai ma le saua, aua ua fetalai mai le Alii e faapea “pe a tau ufiufi a tatou agasala, pe faamalie lo tatou loto maualuga, lo tatou fia sili le aoga, pe faatonuina pe pulea pe faamalosia i agaga o le fanau a tagata, i soo se faiga lava o le amiotonu, faauta, e punitia lava le lagi; e tiga le Agaga o le Alii; pe a aveeseina foi, Amene i le perisitua po o le pule a lena tagata.” (MFF 121:37.)

O lena faaaliga, na tuuina mai e le Alii i le Perofeta o Iosefa Samita, o se tasi o lesona sili ona matagofie i aoaoga ua tuuina mai e le faasaienisi ma le malo, ma e tatau ona tatou faitau pea lava pea i ai i le vaega e 121 o le Mataupu Faavae ma Feagaiga.¹²

E leai se tagata o lenei Ekalesia, e leai se tane po o se tama, ua i ai le aia e faaaoga ai le gagana masoa i totonu o lona fale, po o le faaaoga foi o se upu ita i lona toalua po o lana fanau. O lou faauuga ma lou tiutetauave, e le mafai ai ona e faia i le avea ai ma se alii o loo umiaina le perisitua ma e faamaoni i le agaga o loo i totonu ia te oe. E te faaopoopo atu i se aiga lelei e ala i ou uiga, le puleaina o ou lagona, o lou ita, o le pulea o lau gagana, aua o na mea o le a avea ai lou aiga ma tulaga e ao ona i ai, ma o le ituaiga foi lena o le a atagia atu i lou vaiaai. E mafai ona e faia le mea e te mafaia ina ia faatupuina ai le filemu ma le lotogatasi, e tusa lava po o le a le mafatia e te oo i ai.¹³

Ou te tatalo ina ia mafai ona tatou … lagonaina le taua o le perisitua, ma ia iloa e tiakono uma i totonu o lenei Ekalesia e faapea, ina ua tuuina atu ia te ia le Perisitua Arona ua tulaga ese o ia mai ana uo, ma ua ese o ia mai isi tagata. E le mafai ona ia palauvale atu e pei ona mafai e isi tamaiti ona palalauvale e aunoa ma ni taunuuga, e le mafai ona ia auai i ni faafitauli i totonu o le nuu e pei ona mafai e isi tamaiti ona auai atu i iai, e tulaga ese lava o ia. O lona uiga lena i se tamaitiiti ua sefululua tausaga le matua, ma, epikopo, o le mea lena e tatau ona e faamatalaina atu ia i latou pe a e filifilia i latou e avea ma ni tiakono. Aua le na o le valaauina o i latou ma faauuina i latou, ae ia talatalanoa atu ia i latou ina ia latou iloaina le uiga o le tuuina atu i ai o le Perisitua Arona. I le tulaga faataulealea, o nei tamaiti ua filifilia ma aoaoina e tatau ona aumaia ai se aafiaga mo le lelei. …

… O la tatou matafaioi pe a tatou taliaina le perisitua, le faia o ni faataitaiga mama e faataitai mai i ai a tatou uo. E le o mea tatou te tautatala atu ai o le a aafia ai i latou. O mea tatou te faia. O tagata e i ai i tatou.¹⁴

Afai lava e tatau ai i tagata o loo i ai le perisitua ia le taitaiga a Keriso e ala i feutagaiga faamaoni ma le malamalama ma o latou uso a tagata, e ala i le teenaina o le tiapolo i soo se ituaiga, e ala i le faatinoina ma le faamaoni o lo latou tiute, o le a leai se mana faatautee i lenei lalolagi e mafai ona taofia le alualu i luma o le Ekalesia a Iesu Keriso.¹⁵

E aoga le mana o le perisitua pe a faaaoga e auauna atu ai i isi.

E mafai ona tatou mafaufau i le mana o le perisitua e pei o se faatanoa vai tele. O sea ituaiga mana e avea ma se taunuuga o mea lelei pe a oo mai le malosi e faamatuuina atu ai i vanu, fanua, togalaau ma aiga fiafia. E faatoa faaalia la le mataupu faavae o le mana pe a aoga i olaga o tagata, ma liliuina ai o latou loto ma manaoga e agai i le Atua, ma uunaia ai le auauna atu i o latou uso a tagata.¹⁶

O o tatou olaga o loo afifiina faatasi ma olaga o isi. E sili atu lo tatou fiafia pe a i ai so tatou sao i olaga o isi. Ua ou fai atu lena tala aua o le perisitua o loo outou umia o lona uiga e ao ona outou auauna atu i isi. O loo fai oe ma sui o le Atua i le vaega ua tofia oe i ai. “A o le faamaumau lona ola ona o a’u, e maua ai e ia.” (Mataio 16:25.)¹⁷

Atonu e i ai se toeaina o outou e ma’i, ae ua tatau ona selesele fua o lana faatoaga. Ia outou o faatasi ma seleseleina lea faatoaga. Atonu e i ai se tasi o outou e i ai se atalii o loo fai sana misiona ma ua tau le maua se tupe e tausi ai o ia. Ia tau lava ina ia outou fesili atu pe mafai ona outou fesoasoani atu ia te ia. O le a le mafai ona galo i lea tagata lo outou manatu mamafa atu ia te ia. O galuega faapea o mea lava ia sa mafaufau i ai lo tatou Faaola ina ua ia fetalai mai, “Aua na faia e outou i le tasi o e aupito itiiti o ou uso nei, o au lea na outou faia i ai.” (Tagai Mataio 25:40.) E leai se isi auala e mafai ona e auauna atu ai ia Keriso. E mafai ona e tootuli i lalo ma tatalo atu ia te ia, e lelei lena. E mafai ona e ole atu ia te ia ina ia tuuina atu ia te oe le taitaiga e ala i le Agaga Paia—ioe, tatou te faia lena mea ma e tatau ona faia. E ao ona tatou faia. Ae o nei faatinoga e oo mai i le olaga i aso taitasi, o le puleaina o o tatou laulaufaiva, i le le taufaaleaga i se uso, ae ia tautala i mea lelei e uiga ia te ia, lea e taua e le Faaola o le auaunaga moni.¹⁸

“Po o le a lava lau galuega, ia fai lelei lau vaega.” Afai o oe o se tiakono, ia fai faalelei ia tiute o se tiakono. Afai o oe o se aoao, ia fai faalelei lau galuega. O se ositaulaga e leoleo i le Ekalesia, e asiasi atu ia i latou—o alii talavou i lenei Ekalesia, afai e mafai ona tatou faia ia tiute o le aoao ma le ositaulaga, i le aoaoina o tagata i lo latou tiute, e maeu lea mana mo le lelei i alii talavou ua sefuluvalu ma sefuluiva tausaga le matutua. E le o le fai ma amio [le musu e talia se fautuaga], e le o ni tagata taufaalata, ae o ni taitai. Uso e, e leai se mea o i le lalolagi e sili atu lona malosi i le taitaiina o le autalavou nai lo le faatinoina lelei o a latou vaega i le perisitua.¹⁹

Ua i ai ia i latou o loo umia le perisitua le tiutetauave e fai ai ma sui o le Atua i le avea ai ma faiaoga o aiga.

O loo ta’ua i le Efeso, mataupu e fa, e faapea na tuuina mai e Keriso nisi e fai ma aposetolo, o isi foi e fai ma perofeta, o nisi foi e folafola le talalelei, o isi foi e fai ma leoleo atoa ma aoao; “ina ia faaatoatoaina le au paia, latou te fai ai le galuega a auauna, ia atiina ae ai le tino o Keriso.” [Efeso 4:12.] O faiaoga o [aiga], i totonu o le Ekalesia, e umia le perisitua paia, ua i o latou luga le tiutetauave tele o le faaatoatoaina o le Au Paia, ma le atiina ae o le tino o Keriso; o lea la, ou te manatu ai e le lava le faapea atu o lo latou tiute, o lo latou tiute, le momoliina atu i aiga taitasi se agaga faalelagi faapea e pei ona tatou iloaina i nei sauniga o le konafesi. E leai se tiutetauave e sili atu e mafai ona lafo atu i soo se tagata nai lo le avea ma se faiaoga o fanau a le Atua.

… O nisi o [faiaoga o aiga] e lagonaina o lo latou valaauga e pei e le taua, e faapea e le mamalu tele, ae o le mea moni lava, e leai se galuega e sili atu ona taua i totonu o le Ekalesia. E le mafai ona tatou faapea atu i soo se tasi e valaauina i totonu o le Ekalesia e faapea, e sili atu o ia nai lo le isi, aua o valaauga uma e tuuina uma atu i le atinaega, i le faaolataga o fanau a le Atua. E faapea foi i le valaauga o le faiaoga; ae afai e i ai se faamuamua, ona o le maualuga o le avanoa e manumalo ai i nei tagata i le faaolataga, o le a ave lea i alii o loo umia le perisitua a le Atua, o e latou te fesootai tonu lava ma tagata taitoatasi o le Ekalesia. …

O le mea muamua lava e fai, o’u uso e, o le vaai ifo lea ia te outou lava, ia vaai pe ua e saunia e aoao atu pe leai. E leai se tagata e mafai ona aoao atu se mea na te le iloa. Ua avea ma ou tiute le aoao atu o Iesu o le Togiola o le lalolagi, o Iosefa Samita o le perofeta a le Atua, ma o ia i lenei tisipenisione sa faaalitino mai i ai le Atua le Tama ma Lona Alo. E te talitonu ea i ai? E te lagona ea lena mea? O mafai ea ona faaalia mai ia te oe lena molimau pe a e ulufale atu i totonu o le fale? Afai o lea, o le a faapea ona avea lena tulaga o le faasusuluina atu ma mea e tuuina atu ai le ola i tagata e te aoaoina. Ae afai e le o lena le tulaga, o lona uiga o le a matua leai lava se tulaga faaleagaga o tuputupu ae ai le Au Paia. …

… Uso e, o le savali, aemaise lava i le tulaga e tuuina atu ai lena savali atonu e le tutusa pe a tuuina atu e se tasi na ia faaaluina lona olaga atoa e galue faamaoni ai i le Ekalesia, e pei ona tuuina atu e i latou o e faatoa liliu mai. E pei ona eseese o aiga taitasi …, o a tatou savali ma a tatou metotia, aemaise lava i a tatou metotia, e ao ona fesuisuiai. Ua ou taua lenei mea ina ia faagaeetia ai i tatou i le manatu lenei, e faapea o lo tatou tiute le iloa lea o i latou o e o le a tatou aoaoina.²⁰

O le tiute o le faiaoga o [aiga] e le o faataunuuina pe afai e na o le faatasi i le masina ona alu atu i fale taitasi. Ou te manatuaina ina ua faia e se tasi o Epikopo ma tiute o le faiaoga o [aiga] le alu atu lea i se fale o loo faanoanoa ai nisi ona o se tasi e pele ua maliu ma vaai i ai po o a mea e mafai ona faia ina ia aumaia ai le faamafanafanaga ia i latou o e o loo faavauvau ma ia faia fuafuaga mo le maliu. O le tiute o le faiaoga o [aiga] o le vaai lea e le o i ai se mea o manaomia; afai o i ai se ma’i iina, alu i ai e faauu—ia leoleo pea i na aiga.²¹

Ou te talitonu o loo i ai i aoaoga i [aiga] ia ni avanoa silisili i le lalolagi atoa e fafagu ai i latou o e ua tuulafoaiina, lotovaivai, mafatia, ma faanoanoa, e faafouina le olaga ma se naunautaiga ina ia toe foi mai i le malosi atoatoa i le Ekalesia a Iesu Keriso. O sea ituaiga malosi o le a toe taitaiina atu ai i latou i le siosiomaga faaleagaga lea o le a siitia ai i luga o latou agaga ma tuuina atu ai ia i latou le mana e faatoilaloina ai vaivaiga ia o loo lofituina ai nei i latou.

Ina ia tuuina atu le fesoasoani, faamalosiau, ma uunaiga i tagata taitoatasi, o le tiutetauave sili ma le avanoa lea o faiaoga o [aiga].²²

Fautuaga mo Suesuega ma Talanoaga

O le a le mana o le perisitua? (Tagai itulau 128–29.) O a faamoemoega na tuuina atu ai e le Alii i le tagata ia le pule o le perisitua? (Tagai itulau 129–31, 133–34.) O le a le eseesega i le va o le na o le mauaina o le pule o le perisitua ma le i ai o le mana o le perisitua?
Mafaufau i se aafiaga na oo ia te oe ina ua faaaogaina le mana o le perisitua ia te oe. Na faapefea ona aafia ai oe ma tagata o lou aiga i lenei mea? E mafai faapefea ona tatou faaaogaina ia aafiaga faapea e avea o ni “taimi e aoao atu ai” mo a tatou fanau ma a latou fanau?
Aisea e moomia ai le ola agavaa o se tasi e umia le perisitua ina ia taialaina e le Agaga o le Alii? (Tagai itulau 131–33.) O a faamanuiaga ua folafolaina atu ia i latou o e faamaoni i feagaiga ma tiute o le perisitua? (Tagai foi MFF 84:33–34.)
Aisea e taua tele ai ia aoaoga i aiga i totonu o le Ekalesia? (Tagai itulau 134–35.) O a mea e mafai ona tatou faia ina ia avea ai i tatou ma ni faiaoga o aiga lelei tele? E mafai faapefea e le fautuaga a Peresitene MaKei i faiaoga o aiga ona faatatau i faiaoga asiasi? O a ni mea e mafai ona tatou faia ina ia fesoasoani ai i faiaoga o aiga ma faiaoga asiasi ina ia lagonaina le talileleiaina i totonu o o tatou fale ma ia faamanuiaina i o latou valaauga?
E faapefea e le tatalo, suesueina o tusitusiga paia, ma le avea atili ia faapei o Keriso ona fesoasoani ia i tatou e faamamaluina le perisitua? O a ni auala e mafai ai e tama ma tina ona saunia o latou atalii ina ia mauaina le perisitua?
E faapefea ona fetufaai e tamaitai ia faamanuiaga ia e maua mai le mana o le perisitua?
O le a le faamoemoega o korama a le perisitua? (Tagai itulau 129–31.) O a tiutetauave e o faatasi ma le avea ai ma se tagata o se korama? (Tagai itulau 129–31.)

Mau e Faatatau I Ai:1 Peteru 2:9; MFF 84:33–48; 121:34–46

motto stone in Scotland — E masani ona uunaia e Peresitene MaKei i latou o loo umia le perisitua ina ia ola i le anavatau na ia vaai o vaneina i luga o se maa i Sikotilani: “Po o Le a Lava Lau Galuega, Ia Fai Lelei Lau Vaega.”

priesthood quorums — “O alii ua tofia e auauna atu i ni tofi patino i totonu o le perisitua e tuufaatasia i totonu o korama.”