Mataupu 14

Saunia mo se Faaipoipoga ma se Aiga e Faavavau

E leai se mataupu e sili ona maualuga e faatatau i le faaipoipoga e mafai ona teu loto e le au talavou, nai lo le vaai atu i ai o se faatasiga paia faaleatua.¹

Folasaga

Na faamalamalama atu Tavita O. MaKei i le o le a avea ma ona faletua i le lumanai, o Ema Ray Riggs, ina ia la faaipoipo i le amataga o Tesema i le 1900, ma sa fesili atu [Ema] ia te ia, “Ua e mautinoa lava o au le tagata sao?” Na tali atu o ia, ua na mautinoa lava o ia lea. Mulimuli ane i sana tusi na tusi atu ai ia Dr. Obadiah H. Riggs, le tama o Ema Ray, na faamatalaina ai e Tavita O. MaKei ia nisi o uiga o [Ema] na te faatauaina ai o ia:

“O lana amio solia, o ona uiga, o lona atamai, o ona uiga le manatu faapito, i se faapuupuuga, o ona uiga atoatoa, na ia manumalo ai i lou alofa. Ina ua faapea mai [Ema] na faapena foi ona lagona e uiga i lenei alofa, na pei ai ua atoatoa lou fiafia. … Na ou fesiligia lou afafine ina ia ma faaipoipo, ma o lenei ua ou talosagaina ai lau susuga Dr. Riggs, o lona tuaa, pe mafai ona tuuina mai lau faatagaga. Ua malie mai o ia. … O le taui mo lenei mea, e leai se mea e mafai ona ou tuuina atu ia te ia sei vagana se alofa moni ma le manao e tasi o lou loto ma lou mafaufau ina ia faafiafiaina o ia.”

O tusi a Tavita O. MaKei ia Ema Ray i le taimi o le la faamauga na atagia ai le tulaga tamalii o le laua mafutaga ma uiga na ia [Ema] musuia ai o ia. I se tusi na tusia i le aso 11 o Tesema, 1900, na ia tusia ai e faapea: “E te silafia talu ona o ou alofa faamaoni, ua mafai ona ou malamalama lelei i le mafuaaga e tatau ai lava ona i ai se tamaitai lalelei e mafua ai ona tau fitafita totoa o aso anamua. O le mananao lava ina ia faafiafiaina le tamaitai lalelei e totoa ai o latou lima, ma malolosi ai a latou pelu, ma lå faamatauina ai lo latou lototele. E taumafai i latou taitoatasi e atiina ae se malosi sili na te mafaia ma ni gaoioiga e oo i ai lona mafai, ina ia mafai ona sili atu ona agavaa [le tagata lava ia] mo le taliaina e lana manamea. O le aga faatamalii foi, e sili ona faatauaina e fitafita totoa, ina ia mafai ona latou maua le faauoga ma i latou, o e, ua latou manatu, o loo i ai ni agaga faamaoni ma mama.”²

I se tasi tusi na tusi atu ai ia Ema Ray i le aso 22 o Tesema, na tusi atu ai Tavita O. MaKei e uiga i le faatasiga ua la vaai faalemafaufau atu i ai ma lana manamea: “Na e fai mai o le ta mafutaga o le a avea ma se mafutaga e faavavau. O le faavavau lava ia, e mafai ona faamalieina ai le alofa o loo ou faananau i ai, ma le alofa e tatau ona ou tuuina atu. … Ou te lagonaina lava le tuua toatasi pe a aunoa ma oe Ray, ma ou te talotalo lava ia oo maia le aso o le a faapea ona e nofo ai i taimi uma lava i ou tafatafa.”³ Talu ai ona o le ola amiotonu ma evaga faamasani mamalu ma le atamai, na mafai ai ona silafia e Uso ma Tuafafine MaKei la laua sini. I le taimi o lana auaunaga, e masani lava ona aoao mai ia Peresitene MaKei e uiga i le saunia mo se faaipoipoga ma se aiga faavavau.

E ui lava ina o aoaoga a Peresitene MaKei i lenei mataupu e faasino tonu i le autalavou o e o loo sauniuni atu e faaipoipo, ae e tele foi se aoga o nei mataupu faavae i tagata ua faaipoipo, aemaise lava, ao latou aoaoina ma fautuaina a latou fanau ma isi talavou e uiga i tafaoga ma evaga faamasani.

O Aoaoga a Tavita O. MaKei

E tatau ona aoaoina le autalavou i le uiga paia o le faaipoipoga ma le avea ma ni matua.

Ia aoao atu i tagata talavou e faapea, o le faaipoipoga e le na o se aga masani ua faia e tagata, ae ua faapea ona faauuina e le Atua, ma o se sauniga paia, ma e tatau ona latou matuai mafaufau loloto i ai ae latou te lei ulufale atu i se maliliega o le a faapea ona aafia ai lo latou fiafia po o le faanoanoa i aso uma o o latou olaga. O le faaipoipoga e le o se mea e manatu mama i ai se tasi … pe faamutaina foi i sina tamai faafitauli lava e ono aliae mai. Na o le pau le mea e mafai ona fai e tagata talavou o le taulimaina lea faatasi ma ni faamoemoega faamaoni ina ia fausia ai se aiga o le a faapea ona i ai se sao i le lagolagoina malosi o ni tagata lelei.⁴

O tagata talavou o ituaiga uma [tane ma fafine], e tatau ona aoaoina i matafaioi ma tulaga o le faaipoipoga, ina ia mafai ona latou silafia o faaipoipoga e aafia ai tautinoga ae e le o se fuafuaga e faamutaina i soo se taimi lava e mananao i ai. E tatau ona aoaoina i latou e faapea, o le alofa mama i le va o le tane ma le fafine o le tasi lea o mea e aupito sili ona tamalii i luga o le fogaeleele ma o le fanauina ma le tausiaina o fanau o le tiute aupito maualuga lea o tiute uma o le tagata soifua. O lenei la tulaga, o le tiute o matua o le faia lea o faataitaiga i totonu o le aiga, ina ia mafai ona tagai i ai le fanau ma malamalama ai i le paia o le olaga faaleaiga ma ona matafaioi e i ai.⁵

[O le faamoemoega o le faaipoipoina] ina ia maua ni fanau ma tausia se aiga. Ia tatou manatua lena mea. E toatele tagata ua fai mai, ma e toatele foi o le a fai mai—“E mafai faapefea ona ou faaipoipo ma tausia se toalua i le tulaga na masani mai ai o ia? E mafai faapefea ona ou aoga ma tausi se aiga? E leai foi sou fale ou te nofo ai.”

O ni fesili moni nei.… Ou te manao lava ina ia ou iloa nei mea ma isi faafitauli ma faafetaiaia, ma le manatuaina o le fetalaiga a le Alii e faapea “o le faaipoipoga e faapaiaina lea e le Atua i tagata.” [Tagai MFF 49:15.] Ma ou te toe faapea atu o le faamoemoega autu o le faaipoipoga, ina ia tausia ai se aiga ae e le na o le faamalieina o le tane po o le fafine.⁶

E i ai se faaupuga e faapea o olaga sili ona lelei ma tamalii, o olaga ia ua faavaeina i ni mataupu sili ona maualuluga. O le mea moni, e leai se mataupu maualuga e faatatau i le faaipoipoga e mafai ona faapelepele i ai tagata talavou, nai lo le vaai atu i ai o se faatasiga paia. I mafaufau o le autalavou, o ia tulaga o se puipuiga mo i latou i taimi o evaga faamasani, o se aafiaga tumau latou te manatuaina ina ia taofia mai ai i latou mai le faia o se mea atonu e punitia ai lo latou ulufale atu i le malumalu ina ia faaatoatoaina ai lo latou alofa i se faatasiga e tumau ma faavavau. O le a taitaiina atu ai i latou e sailia ni taitaiga faalelagi i le filifiliaina o a latou soa, o ia filifiliga poto o le a faapea ona faamoemoe tele i ai lo latou fiafia i le olaga nei ma le olaga a sau. E mama ma lelei ai o latou loto; e siiae ai i latou i luga i lo latou Tama oi le Lagi. O nei lagona fiafia e mafai ona oo atu i ai le toatele o alii ma tamaitai, pe afai [o loo] lelei ona faafoeina ma teufatuina ia mataupu maualuluga o le faaipoipoga ma aiga.⁷

E tatau ona saunia le autalavou mo ni faaipoipoga ma le avea ma ni matua e ala i le ola i ni olaga mama.

E masani lava o le soifua maloloina o fanau, pe afai e faamanuiaina se ulugalii i ni fanau, e faalagolago lea i amioga a matua ao lei faaipoipo. I nusipepa, mai le pulelaa, aemaise lava i totonu o le aiga, e tatau lava ona tagitagi soo ai le savali e faapea, o tama ma teine i o latou taimi o le talavou, ua latou faataatitiaina ni faavae mo lo latou fiafia po o le faanoanoa i le lumanai. E faapitoa lava, o alii talavou uma e tatau ona saunia mo le matafaioi o le avea ma se tama e ala i le tausia o ia lava ia mama faaletino, ina ia mafai ona ia ulu atu i lena matafaioi e le o se tagata palaai po o se tagata pepelo, ae o se tasi ua faamamaluina ma agavaa mo le faavaeina o se aiga. O se alii talavou o le e le ola maloloina, ua na tauaveina le matafaioi o le avea ma se tama, e sili atu ona leaga nai lo se tagata pepelo. O le fiafia i le lumanai o lona toalua ma lana fanau e faalagolago i lona olaga a o talavou.

Ia tatou aoaoina foi tamaitai e faapea o le avea ma se tina e paia, aua a tatou talanoaina loa le vaega o le foafoaina o le ola, ua tatou ulufale atu i le malo e faavavau. O le mea lea, e taua ai ona silafia e tamaitai talavou le taua o le tausia o o latou tino ia mama atoatoa. … E le i ai i se tina le aia e taofiofia ai se tamaitiiti i le olaga mo se mea na foliga mai o se faapasi taimi sa fiafia i ai a o talavou, po o lana aia e aafia ai i vailaau faasaina ma isi amioga faasolitulafono.⁸

O le fiafia e le amataina i le fata faitaulaga; e amata i le taimi o talavou ma le taimi o evaga faamasani. O nei fatu o le fiafia e totoina, i lou mafaia lea ona pulea o ou tuinanau. E tatau ona avea le legavia ma uiga maualuga i olaga o tagata talavou—o le mataupu e lei taliaina lava e le lalolagi, ma o le toatele i le lalolagi o le a latou le talitonu e i ai po o teuina foi i loto o le autalavou.⁹

O le amioleaga iloga o le lalolagi i aso nei o le ola le mama. … O se alii e le i ola mama a o avea ma se alii talavou laitiiti, ua le faamaoni i se faatuatuaga e tuuina atu ia te ia e matua o le teine; ma o le tamaitai e lei ola mama a o avea ma tamaitai talavou ua le faamaoni i lana tane i le lumanai ma ua faataatiaina ai se faavae o le le fiafia, masalosalo, ma feteenaiga i totonu o le aiga. … Ia manatua lenei upumoni e faavavau e faapea, o le legavia o se uiga e tatau ona faatulagaina o se tasi o ausiga sili ona mamalu o le olaga. … O se vaega aupito sili lea ona taua mo se aiga fiafia. E le aveesea le tulaga mamalu ma le tauleleia i le tausisia o tulaga faatonuina o le Ekalesia i se auala mamalu. E mafai ona e “i ai” i lenei lalolagi ae le “o ni e o le lalolagi.” Ia faamuamua lou legavia nai lo isi mea uma! Ua poloaiina i tatou e le Atua ina ia tatou amio mama.¹⁰

I le Ekalesia a Iesu Keriso o le Au Paia o Aso e Gata Ai e na o le tasi lava le tulaga faatonuina o le ola mama, i lenei olaga faaletino. E le sili atu se aia a se alii talavou e le ola mama ai nai lo se tamaitai talavou. O se alii talavou e talosagaina se pepa faataga e ave ai se tamaitai mama atoatoa i le fata faitaulaga, e tatau foi ona ia tuuina atu lena lava tulaga mama atoatoa e pei ona ia faamoemoe na te maua mai [i le tamaitai talavou].¹¹

O le ola mama, ae le o le faamalieina o manao o le tino i le taimi e lei faaipoipo ai, o le pogai lea o le filemu ma le fiafia i le aiga ma o le itu aupito taua foi lea e maualuga lona sao i le ola maloloina ma le faatumauina o le tagata soifua. O amioga mama uma e maua ai se uiga matagofie, o le lotonuu, faalagolagoina, faatuatuaina, faamoemoeina, alofa o le Atua, ma le faamaoni i tagata, o mea uma ia ua aofia faatasi i le palealii e faapaleina ai se tamaitai amiotonu ma se alii [malosi]. O le afioga a le Alii i Lana Ekalesia o le: “Ina ia e tausi atili ai ia te oe lava ia mama nai le lalolagi.” (Tagai Iakopo 1:27; MFF 59:9)¹²

Ia faamanuia outou e le Atua ina ia tausia o outou olaga ia le eleelea, ia mafai ona outou o atu i le Atua e ala i le tatalo, ma ole atu ia te ia e taialaina outou i le sailia ma le filifilia o a outou paaga, ma a oo ina filifilia, o le a mafai ona oulua ola ina ia mafai ona ulu atu i le maota o le Atua. Ma afai o loo i ai o ia iina ma fesili atu e uiga i o oulua olaga, o le a mafai ona oulua tali atu ma le faamaoni, “Ioe, e mama i maua.” O se faaipoipoga e amata i lena tulaga, o le a aumaia ai ia te oulua le fiafia, o le olioli sili i lenei olaga, po o le faavavau atoa foi.¹³

E tatau i talavou ona tafafao faamasani lelei ma ia iloiloina ma le faaeteete o latou lagona.

O tupulaga talavou, o teine talavou i aoga maualuluga, e [feoai] i evaga faamasani i aso taitasi ma tama talavou latou te tupulaga, ma teineiti talavou foi latou te tupulaga, i le popofou o lo latou talavou, ma ua taofia ai i latou lava mai le faamasani lelei atu i isi paaga; ma o na evaga faamasani i le popofou o lo latou talavou, [e oo] ina mafana ma faaosofia ai o latou lagona malolosi e na o sina itula e faamalie ai, ma aumaia ai i o latou luga lo latou lava faanoanoa i le olaga atoa. Ua le na o ni mafaufauga lena mea! O outou na alii o loo i Au Peresitene o Siteki ma Au Epikopo o Uarota, ma outou tama ma tina o nisi o i latou na, ua outou silafia e le na o ni mafaufauga lena mea.¹⁴

Alii talavou, ia e manatua i taimi uma lava, o soo se taimi lava e te aveina ai [se] tamaitai lua te tafafao i se pati, e tuuina atu ai foi ia te oe e lona tama ma lona tina le faatuatuaga e vaai faalelei ai o ia. O ia o la laua meatotino e sili ona faapelepele i ai. Afai la te tuuina atu ia te oe se tupe e afe tala e te vaavaaia, o le a e le mafaufau e faaaoga sese pe faaaogaina foi. Ua la tuuina atu ia te oe e te vaavaaia se mea e le mafai ona faatauina i tupe, ma e tauleagaina oe pe a e le faamaoni i lena faatuatuaga. … ou te manatuaina ia apoapoaiga a lou tama ina ua amata ona ou faamasani atu i se tamaitai a o ou talavou: “Tavita, ia e faia i lena tamaitai e pei ona e manao e faia e se isi alii talavou i sou tuafafine.” Alii talavou, ia outou mulimuli i lena fautuaga, ma o le a outou ola ai i lenei olaga ma ni loto fuatiaifo e manino, ma o se taimi mulimuli ane i lou olaga, o le a mafai ona e faapea mai ma le faamaoni, o mea sese uma sa e faia, e te lei faia lava se mea sese i se tamaitai.¹⁵

I le filifilia o se soa, e tatau ona sailiili … i le tagata ua e mafaufauina e te lua faimalaga faatasi i le olaga. Ua e tagai i le matuai taua o le vaai mo uiga o le faamaoni, o le faaaloalo, o le legavia, ma le migao. Ae a maea ona e mauaina—“E faapefea ona e fesili atu pe o i ai pe le o i ai foi se sootaga, o se mea o le a tutusa ai oulua uma?” “Pe o i ai se taiala?“ E ui lava o le alofa e le o se taiala moni, aemaise lava pe afai o lena alofa e femoumouai pe ua tuuina atu foi i se tagata amio mataga po o se manu, ae peitai, e le mafai lava ona i ai le fiafia e aunoa ma le alofa. “O lea la”, e mafai ai ona fesili atu faapea, “e faapefea ona ou iloa ua ou alofa i se isi?” O se fesili taua tele lena fesili. …

Pe a oulua faatasi ma se tamaitai ua e alofa faamaoni i ai, e le ia te oe se lagona faapea e te tauanauina pe manatu faapea e maualuga lona tulaga nai lo oe; pe a oulua faatasi e te le taumafai e pulea o ia; a i ai o ia e te lagona lou manao e faia mea uma e tatau ona faia e se [alii lelei tele], aua o le a ia musuia oe i lena uiga tausaafia. Ma ou te fai atu ia te outou tamaitai talavou ina ia outou teulotoina lena taiala e tasi. O le a se mea na te musuia ai oe … ? Afai e te lua malaga faatasi ma se alii pe a maea se fonotaga, po o se siva ma afai na te faaali atu ni uiga e faaaogaina ai oe e faapasi ai le taimi pe faamalieina ai foi ona tuinanau, ona e iloaina lea e le o uunaia o ia e le alofa.

O na tulaga, e tusa lava pe o le a lou lalelei, tamaitai talavou, tusa lava pe o le a lou lagona mautinoa ua e alofa ia te ia, ae ia e tuu atu i lau lava faamasinoga e puleaina ma faatautaia ou lagona. Atonu e te faanoanoa ai i lou le mulimuli atu i le mea o loo faananau i ai lou loto, ae e sili atu sina tiga itiiti mo oe i lou talavou nai lo le faatauga o oe i mafatiaga i se taimi mulimuli ane.¹⁶

E maoae faamanuiaga o loo faatalitali mai mo i latou o e saunia lelei mo se faaipoipoga e faavavau.

O alii ma tamaitai talavou o e o le a ola i ni olaga e sili ona fiafia, e lelei ona saunia lelei i latou lava ina ia agavaa mo lena ituaiga o faaipoipoga ua faauuina e le Atua—o le tuufaatasiga o se alii ma se tamaitai agavaa e faapaiaina la laua faaipoipoga i totonu o le malumalu o le Silisili Ese. O iina a o tootutuli ai se uo mamae moni …, e tofu teulotoina ai e i la’ua ma le mautinoa mea nei:

Muamua, ua amata i le mama lo la’ua olaga faaulugalii. O ni fanau o le a faamanuiaina ai le tuufaatasiga, e mautinoa lava o le a fananau mai ma le mamalu, e tusa ai ma le mauaina o se tino mama.

Lona lua, e tutusa o la manatu faalelotu. O le faigata o le tausiga faalelei o fanau e atili ai pe a eseese ia manatu o Tama ma Tina e uiga i aoaoga faavae ma fesootaiga faalelotu. …

Lona tolu, o a la’ua tautoga e faia ma le manatu o se faatasiga e faavavau, o le a le motusia i ni feeseeseaiga po o ni nai faafitauli faatauvaa.

Lona fa, o se feagaiga na osia i luma o le Atua ma faamauina e le Perisitua Paia, e sili atu ona mausali nai lo se isi lava sootaga.

Lona lima, o le faaipoipoga ua amataina e faavavau e pei lava o le alofa, aua o le uiga aupito sili lea ona paia o le tagata soifua.

Lona ono, o le iunite o le aiga o le a le mafai lava ona motusia e oo lava i le faavavau.¹⁷

Fautuaga mo Suesuega ma Talanoaga

E mafai faapefea ona tatou fesoasoani i tupulaga talavou ia malamalama i matafaioi paia o i ai i le faaipoipoga? (Tagai i itulau 151–53.) O a ni mea e mafai ona tatou faia e fesoasoani ai e saunia ia tupulaga talavou mo luitau e oo mai i se faaipoipoga?
Aisea ua taua ai le ola mama i le saunia mo se faaipoipoga ma se aiga e faavavau? (Tagai i itulau 153–55.) E aafia faapefea i le ola le mama se tulaga gafatia o se tagata e filifili ai ma le poto se soa e faavavau? O le a le auala e tatau ona uia e se tagata ina ia salamo ai ma le atoatoa i le ola le mama? O a nisi o faamanuiaga o le tumau i le amio mama?
Sa aoao mai Peresitene MaKei e masani ona aafia fanau i amioga a matua a o lei faaipoipo (Tagai i itulau 153–55). E le gata i le tumau ai i le ola mama, o a nisi mea e mafai e tupulaga talavou ma matua ona fai ina ia mama ai o latou olaga ma puipuia ai a latou fanau o le a maua i le lumanai?
O a ni auala o loo taumafai ai nusipepa ma faasalalauga e suia o tatou manatu e uiga i faigauo ma faaipoipoga? O le a lou manatu, aisea na lapatai mai ai Peresitene MaKei e uiga i faigauo tumau a o lei matutua? O a isi puipuiga saogalemu e tatau ona mafaufau i ai tagata pe a tafafao faamasani? (Tagai i itulau 155–56.)
O le a se fautuaga e te tuuina atu i tupulaga talavou o e ua tau i ai manatu ua alolofa moni i a latou uo? (Tagai i le itulau 156.) O a ni uiga tausaafia e taua i se mafutaga?
O le a le faamoemoega o le faaipoipoga? (Tagai i itulau 151–53.) O a ni toatuga o le vave faaipoipo? O a ni toatuga o le saga faatuatuai ona faaipoipo? E mafai faapefea ona iloa e se alii ma se tamaitai le taimi tatau e faaipoipo ai?
Na aoao mai Peresitene MaKei e faapea, o i latou o e manatu o le faaipoipoga o se “faatulagaga paia” e faamalolosia ma taialaina i le taimi o faigauo. Aisea e te manatu ai ua sao lenei mea? O a ni auala ua e iloa ai le faamanuiaina o tagata ina ua latou ola i tulaga faatonuina o le talalelei i le taimi o a latou faigauo?
O a ni mea e tutusa ai aoaoga a Peresitene MaKei mo le autalavou ma tulaga o loo maua i le Mo le Malosi o le Autalavou? E mafai faapefea ona e fesoasoani i lau fanau ia malamalama e tutusa lelei lava tulaga faatonuina na aoaoina ai oe ma tulaga foi o loo aoaoina ai i latou?

O Mau e Faatatau I Ai:Iakopo 2:28; Alema 37:37; 39:3–5; MFF 132:15–19

couple in front of temple — “O alii ma tamaitai talavou o e o le a ola i ni olaga e sili ona fiafia, e lelei ona latou saunia lelei i latou lava ina ia agavaa mo lena ituaiga o faaipoipoga ua faauuina e le Atua.”