Mataupu 6

“O Tagata Uma o le Ekalesia o ni Faifeautalai”

O loo matelaina le lalolagi i le fia faalogologo i le upumoni. … O loo ia te i tatou. Pe o tatou mafaia ea ona faia le galuega—i le tiutetauave ua tuuina mai e le Atua ia i tatou?¹

Folasaga

Omatua uma o Peresitene Tavita O. MaKei o ni tagata liliu mai i le Ekalesia, o le taunuuga o galuega talai a faifeautalai na tofia e galulue i Peretania Tele. O le aiga o lona tama, o Tavita MaKei, na auai i le Ekalesia i Sikotilani i le 1850 o nisi o uluai tagata liliu mai i le Ekalesia i lena eria. O le aiga o lona tina, o Jennette Evans, na auai i le Ekalesia i Uelese pe tusa o le taimi lava lea e tasi e ui i le malosi o le tetee mai aiga.

Mai le talatuu amiotonu sa tuuina atu e ona matua ia te ia, o lea sa i ai se molimau malosi a Peresitene MaKei i le taua ma le lautele o aafiaga o le galuega faafaifeautalai. I le 1953, i se malaga taamilo i Europa, sa asiasi atu ai Peresitene MaKei i le fale faatauvaa i Sikotilani sa ola ae ai lona tama. Na tusia e le atalii o Peresitene MaKei, o Llewelyn, o le sa malaga faatasi ma ia i lea faigamalaga ia le vaega lenei:

“[A o ma taulalata atu i le fale], na ati mai le susulu o le la i ao ma ataata mai ia i maua e pei o loo manatunatu i le olioli ma le fiafia o loo i le loto o tama. A o matou tutu uma ai i luma o le fale, na oo ifo loimata i mata o tama a o ia vaai atu i le faitotoa. ‘Ana le seanoa ia le tuitui a faifeautalai e toalua i luga o lenei faitotoa i le 1850, semanu e le tatau ona ou i ai iinei i lenei aso!’ ”²

Aoaoga a Tavita O. MaKei

Ua poloaiina tagata o le Ekalesia ina ia faia le galuega faafaifeautalai.

“O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tama, ma le Atalii, ma le Agaga Paia:

“Ia outou aoao atu ia te i latou ia tausi i mea uma ua ou fai atu ai ia te outou; faauta foi, ou te ia te outou i aso uma lava, e oo lava i le gataaga o le lalolagi. …” (Mataio 28:19–20.)

O le apoapoaiga lea na tuuina atu i le uluai toasefululua. E faapena foi le apoapoaiga ua tuuina atu i tagata i lenei tupulaga i totonu o le Mataupu Faavae ma Feagaiga ina ia avea ma se malamalama i le lalolagi. “Ua faapea lava ona ou auina atu la’u feagaiga e faavavau i le lalolagi, e fai ma malamalama o le lalolagi, ma e fai ma tagavai mo lo’u nuu, ma nuu ese e saili i ai, e avea ma avefeau mo a’u e teuteu le ala i o’u luma.” [Tagai MFF 45:9.]

E lei atoa lelei se tausaga o le matua O Le Ekalesia a Iesu Keriso o le Au Paia o Aso e Gata Ai ae tuuina mai lena musumusuga i le Perofeta o Iosefa Samita. Sa faatoa luasefuluono lena o ona tausaga. O se mea ofoofogia le faia o se folafolaga faapena, e matuai maoae lona malosi, e lautele i le vaai atu i ai. …

… O le talitonuga faaMamona, e pei ona taua ai, ua faatuina se tagavai i malo, ma o upu e pei o le lautele o na upu na ou faitau ai i le faaaliga, o loo valaaulia ai le lalolagi i le filemu, i le malologa, i le faamalieina.³

O le faamatalaga … “o atu ia outou i le lalolagi uma” o le poloaiga faafaifeautalai moni lea na tuuina atu e le Keriso toetu i ana Aposetolo. O le taunuuga na ia fetalai ai:

Mafaufau e le maea lenei galuega seiloga ua taliaina e atunuu uma le talalelei ma e ao ona tusia i latou o ou soo. …

O lea lava poloaiga tuusao mai le Alii toetu o le na faaali uma mai ma le Tama i la le tino i le amataga o le senituri sefuluiva, o lea ua faia ai e Le Ekalesia a Iesu Keriso o le Au Paia o Aso e Gata Ai le talaiga o le talalelei i “atunuu uma, ituaiga, gagana, ma nuu” i le saoasaoa e mafaia e tagata ma soo se auala ona momoli atu ai i luma.⁴

E Tatau i le Au Paia uma o Aso e Gata Ai ona aofia ai i le galuega faafaifeautalai.

Afai ou te faamatalatalaina i ni upu patino ia talitonuga sili ona malolosi e lua i loto o le Au Paia o Aso e Gata Ai, ou te faaigoaina: Muamua, o se mautinoaga mausali lea o le talalelei, e pei ona aoaoina e le Togiola a o soifua o ia faatasi ma tagata ma sa toe fetuunaia mulimuli ane, suia ma faaleagaina e tagata, ua toefuatai mai e ala i le Togiola i lona mama ma le atoatoa; ma lona lua, i le mulimuli ai i le vaega muamua, o se talitonuga i le loto o soo se tagata o lenei Ekalesia faapea o le tiutetauave o loo i luga lea o tagata auai o le Ekalesia ina ia talai atu le talalelei toefuataiina i atunuu uma, ituaiga, gagana, ma nuu.⁵

E faamanatu mai ai ia te au, ao i ai Keriso i le lalolagi, sa Ia fetalai atu i nisi o alii o e sa iloaina foi Lona paia, e faapea o loo i ai se matafaioi i luga o i latou uma o e o loo i ai se malamalama i le i ai o le Atua faapea upumoni o le talalelei a Keriso. “A o le ua le iloa, ua faia foi e ia mea e tatau ina sasaina ai, e mama ona sasaina o ia. Aua o le ua foaiina atu i ai o mea e tele, e sueina atu foi ia te ia o mea e tele; o ia foi ua tuuina atu i ai o mea e tele, latou te fai atu ia te ia e au mai mea e sili ona tele.” [Luka 12:48.] Faatasi ai la ma lea malamalama o loo i ai i le Au Paia o Aso e Gata Ai ua oo mai ai foi ma se matafaioi tele. O loo tautalagia tagata o le Atua i tusitusiga paia, i aso anamua ma ona po nei, o le tupulaga filifilia, o tupu ma ositaulaga, o le nuu paia, ma le nuu na faatauina mai, ina ia outou tautau atu ona lelei na ia valaau ia te outou nai le pouliuli e oo i lona lava malamalama e matua ofo ai. “O outou o le malamalama o le lalolagi outou. E le mafai ona lilo le aai ua tu i luga o le mauga. Latou te le tutuina foi le lamepa i le tuu ai i lalo o le mea e fua a’i saito, a e tuu i luga lava o le tuugalamepa ia pupula atu ai i e o i le fale uma. Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le lagi.” [Tagai Mataio 5:14–16.]⁶

E maeu se tiutetauave … o le taitaia o alii lelei ma tamaitai lelei i le lalolagi atoa ina ia iloa le Atua, ma ia iloa po o le a le latou misiona i le lalolagi! Tama ma tina, uso a faigaluega, pe ua outou iloaina atoatoa ea i le taimi nei le uiga o le tauaveina o le tiutetauave e momoli atu le savali o le filemu ma le finagalo alofa i tagata uma?⁷

O loo matelaina le lalolagi i le fia faalogologo i le upumoni e sili atu nai lo se isi taimi muamua i lona talafaasolopito. O loo ia i tatou. Pe o tatou mafaia ea ona faia le galuega—i le tiutetauave ua tuuina mai e le Atua ia i tatou?⁸

O tagata uma o le Ekalesia e tatau ona liuaina ma maua se malamalama o le talalelei, e aofia ai se malamalama i tusitusiga paia. E maeu le matagofie o le a i ai pe afai e mafai e tagata uma o le Ekalesia ona pei o Peteru anamua, “ia paia le Alii le Atua i o outou loto. Ia saunia pea lava outou e tali atu ma le agamalu ma le mata’u ia i latou uma o e fesili mai ia te outou i le uiga o le faamoemoe o loo ia te outou. …” (1 Peteru 3:15.) …

O le tiutetauave o le Ekalesia o le folafola atu lea o le talalelei a Iesu Keriso e pei ona toefuatai mai i le Perofeta o Iosefa Samita, e le gata e talai ma folafola atu i le upu, ae o le tufatufaina atu foi o tusitusiga, ae o le mea e sili atu nai lo soo se mea o le ola lea i le talalelei i o tatou aiga ma a tatou feutagaiga i pisinisi, ia i ai le faatuatua ma le molimau i o tatou loto, ma faasusulu atu i soo se mea tatou te i ai. … E leai se mea e mafai ona taofia le alualu i luma o le upumoni sei vagana o o tatou lava vaivaiga po o lo tatou toilalo popo e faia lo tatou tiute.⁹

O tagata uma o le Ekalesia o ni faifeautalai. Ua ia te ia se tiutetauave o le aumaia o se tasi: o se tina, o se tama, o se tuaoi, o se uso a faigaluega, o se e masani ai, o se tasi e faafeiloai atu i avefeau o le talalelei. Afai o le a tauaveina e tagata uma o le Ekalesia lena tiutetauave ma afai o le fuafuaga ina ia feiloai atu lena tina po o lena tama po o se tasi i sui faatagaina o le Ekalesia, e leai se mana o i le lalolagi e mafai ona taofia lenei ekalesia mai le faatupulaia. Ma o sootaga faaletagata o le mea lena o le a aafia ai na tagata sailiili. O lena sootaga faaletagata, o lona natura, e faalagolago ona aafiaga ia te oe. Ma o le isi lena mea ou te fia faamamafaina atu. E tasi lava le tiutetauave e le mafai e se tasi ona solaese mai ai, o le tiutetauave o aafiaga faaletagata. … O le mea lena e i ai oe, e le o le ituaiga tagata e te faafoliga i ai o le a aumaia ai tagata ina ia sailiili.¹⁰

O tagata uma o le Ekalesia e tatau ona avea ma se faifeautalai. Atonu e le o faatagaina o ia e alu atu mai lea fale i lea fale, ae ua faatagaina o ia, ona o lona auai, e faia se faataitaiga lelei i le avea ai ma se tuaoi lelei. O loo mata’ituina o ia e tuaoi. O loo mata÷ituina e tuaoi lana fanau. O ia o se malamalama, ma o lona tiute o le aua nei nanaina le lamepa i lalo i le mea e fua ai saito, ae tatau ona tuu i luga o se mauga ina ia mafai ona taialaina ai tagata e ui ane ai. …

… Afai o le a outou ola e tusa ai ma na mataupu faavae faigofie e tusa ai ma feagaiga na outou osia i le vai, ma e talu mai lena taimi i sauniga Faamanatuga, ma faapea ma le toatele o outou i totonu o le Fale o le Atua, o le a outou faataunuuina se misiona mamalu, ma o le a tauia outou e le Atua.

Tau ina ia iloa e tagata uma o le Ekalesia lenei suiga i lenei olaga, ma ia ola ai ina ia vaai atu ai isi i a latou galuega lelei, ona taitaiina atu ai lea o i latou e viia lo tatou Tama o i le lagi.¹¹

O le Talalelei o lo tatou taula lea. Ua tatou iloa lona faamoemoega. Afai tatou te ola ai, lagonaina, ma tautatala lelei e uiga i le Talalelei, i le Perisitua, i pule o loo i ai i totonu, ia tautala lelei atu foi i o tatou fili, e tatau ona tatou lagonaina lo tatou fiafia, ma e tatau ona tatou folafolaina atu le Talalelei a Iesu Keriso. E mafai e tagata uma ona faia lenei mea. E mafai. E le faapea e fesili mai le Atua ia i tatou e faia ona aveeseina lea mai ia i tatou o le mana e fai ai.¹²

E tatau ona agavaa faifeautalai faamisiona e auauna atu.

I le Vaega e 4 o le Mataupu Faavae ma Feagaiga, na maua ai e le Perofeta o Iosefa Samita se faaaliga faapea “o lenei faauta, e le pine ona oo mai se galuega ofoofogia i le fanau a tagata.

“O le mea lea, o outou o e o atu i le galuega a le Atua, ia outou auauna atu ia te ia ma o outou loto atoa, ma mafaufau atoa, manatu atoa ma le malosi atoa, ina ia mafai ona outou tutu ma le le pona i luma o le Atua i le aso gataaga.” (MFF 4:1–2.) …

[O se] vaega taua o lenei faaaliga, faapea ma isi na tuuina mai i le vaitaimi lava lea e tasi, o le faaigoaina lea o tulaga agavaa moomia o i latou o e auai i le faataunuuina o lenei galuega ofoofogia. O nei tulaga agavaa e le o le umiaina o le oa, e le o le lauiloa i le lautele, e le o ni faiga faaupufai, e le o mea na ausia i le militeli, e le o le taualoa o le tupuaga; ae o se manao e auauna atu i le Atua ma lou “loto atoa, manatu atoa, mafaufau atoa, ma le malosi atoa”—o uiga faaleagaga lea e tofusao atu i le mamalu o le agaga. Ou te toe fia fai atu: E leai se lauiloa, leai se mauoa, leai ni aoaoga faalelotu i lotu a le malo—ae peitai “e le pine ae oo mai se galuega ofoofogia i le fanau a tagata.”¹³

E i ai tulaga patino e tatau ona taialaina ai [epikopo ma Peresitene o siteki] i le valaauina o o tatou faifeautalai. Muamua, aua nei valaauina se [faifeautalai] mo le faamoemoe e faasaoina mai ai o ia. Ua faapiopio le alii talavou ma ua e manatu e aoga se misiona mo ia. O le a aoga. Ae le o le mafuaaga lena na e auina atu ai o ia. Filifili ia [faifeautalai] o e e agavaa e fai ma sui o le Ekalesia, ia mautinoa ua lava lo latou amio faatagata matua, ma, le mea silisili, o o latou uiga faaalia.¹⁴

E lelei mo i tatou le manatua pea le tele o le faamanuiaina o i latou na e fai ma sui a o latou saunia ma malolosi e tauave ia tiutetauave o loo moomia ai se valaauga faamisiona. I le filifilia o se faifeautalai e lelei pe a teu i le mafaufau fesili nei:

Pe ua agavaa ea o ia e fai ma sui o le Ekalesia?

Pe lava lona malosi naunau e tetee ai faaosoosoga?

Pe na ia tausia ea o ia ina ia mama a o i ai i le fale, ma o lena tulaga faatonuina ua faamaonia ai lona gafataulimaina ona tetee atu ni faaosoosoga e oo mai i le galuega?

Pe sa toaga ea o ia i faalapotopotoga a le Ekalesia a o i ai i le fale?

Pe ua ia tau mauaina ea le mea e ofoina atu e le Ekalesia i le lalolagi?

Pe ua ia tau iloaina o le Ekalesia o le mea silisili lea o loo i le lalolagi, ma e na o le pau lea o le vaega faatagaina e fai ma sui o le Alii o Iesu Keriso i le faaolataga o tagata? …

Pe na ia lagonaina ea, e ala i le tatalo, po o se aafiaga na oo i ai, le latalata atu o le Atua ia te ia, ina ia mafai ai ona ia faalatalata atu i le Alii e pei ona ia faia i lona tama faalelalolagi?¹⁵

Soo se alii faifeautalai lava e alu atu i le lalolagi e talai lenei talalelei e tatau muamua lava ona ola i le talalalei i le mea sili e gata ai lona malosi, ma maua se talitonuga i lona loto o loo ia talaiina atu le upumoni. E moni lava, o le mea muamua lava o lenei molimau o se mea e faavavau; ae o a tatou fanau uma lava ua i ai sina vaega. … O le suesue, auauna atu, lotomaualalo ma le tatalo, o le a faatupulaia ai lenei molimau.

O le isi tulaga agavaa lenei: Soo se alii faifeautalai lava e tatau ona avea pea ma se alii Kerisiano tauagafau. O se alii tauagafau— o ai o ia? “O ai lava e mafaufau mama”—e leai se mea e nanaina, e leai se ‘alo ona o le tausalaina; “o ai lava e faamaoni”—faamaoni i le upumoni, i le ola mama, i le Upu o le Poto—“e moni, le agalelei ma le amio ma uiga, e faamamaluina o ia lava ma ana faa-masinoga i isi, faamaoni i lana upu e pei ona faamaoni i le tulafono, ma faamaoni i le Atua ma tagata—o se tagata e faapea o se tamalii moni lava o ia, ” ma o se ituaiga tagata faapea e tatau ona i ai se alii faifeautalai o lenei Ekalesia e alu atu e faaKerisianoina le lalolagi.¹⁶

Soo se tiakono, aoao, ma ositaulaga, soo se toeaina i totonu o le Ekalesia ua malamalama, ina ia agavaa e avea ma se sui o le Ekalesia a Keriso, e tatau ona tauleleia o ia i ana amioga ma ola mama. Ua aoaoina o ia e le lua ni faatulagaga o le legavia, e ao i soo se alii talavou, ma soo se tamaitai talavou, ona tausia o ia ina ia saoloto mai feusuaiga le mama. …

O nei alii talavou ua poloaiina ina ia o atu o sui o le Ekalesia, ma o se sui o soo se faalapotopotoga—o mea tau tupe po o le faalelotu—e tatau ona umia ia le itiiti ifo ma le tasi se uiga tulaga ese, ma o lena uiga o le: faatuatuaina. E sao le tagata lea na faapea mai, “O le faatuatuaina o se faaviiviiga sili lea nai lo le alofagiaina.” Ae o ai o loo fai ma sui o nei faifeautalai? Muamua, o loo fai ma sui o o latou matua, o loo tauaveina le tiutetauave o le tausia o lo latou igoa tauleleia ia aua nei faalumaina. Lua, o loo fai i latou ma sui o le Ekalesia, aemaise lava i le uarota o loo latou nonofo ai. Ma lona tolu, o loo fai i latou ma sui o le Alii o Iesu Keriso, o ana auauna faauuina i latou.

O nei amepasa, aua o i latou moni ia, o loo fai ma sui o nei vaega e tolu ma tauaveina i lena tulaga o loo avea ai ma sui se tasi o tiutetauave silisili i o latou olaga.¹⁷

E tele faamanuiaga e maua mai le auaunaga faafaifeautalai.

Afai o le a faamalolosia a outou molimau, ina ia faaali atu nei taitoatasi ia te outou faapea o loo fesoasoani Keriso i la outou galuega, taialaina o lana Ekalesia, o le auala sili lava ona lelei e fai o le … faia lea o lou tiute, … auai atu i lau galuega faafaifeautalai.¹⁸

Ina ia tuuina atu le auaunaga … i totonu o le misiona o se faamanuiaga lea i soo se tasi. Ua iloa e le fia afe o matua i le lalolagi atoa o e e talisapaia se galuega faapea a o latou atalii ma afafine, o e na toe fafaguina e lenei aafiaga se talisapaiaina o le aiga ma le talalelei. E iloa foi e matua o le galuega faafaifeautalai e aumaia ai i le mafaufau lelei se malamalama o le upumoni o le talalelei, lea atonu ua lagona e alii talavou ae lei faailoaina atu.¹⁹

O le toatele o i tatou ua le mafai ona iloa le taua ma le malosi e mafai ona oo i ai lenei lala maoae o gaoioiga a le Ekalesia [galuega faafaifeautalai].

1—E avea o se faataitaiga o le auaunaga e ofo fuaina atu i le galuega a le Matai, e le o se mea e matuai iloga.

2—E avea o se uunaiga i le ola mama o le autalavou, e avea o se sao aoga i le atiina ae o uiga, o lona aafiaga e le maafaatusalia.

3—E avea ma se faamalosiaga tau aoaoga ma se aafiaga faagaeetia i o tatou nuu, o lona lelei o loo matuai manino mai lava.

4—E avea o se vaega aoga e malamalama lelei ai i atunuu, ma le faavaeina o faauoga faalevaomalo, e matuai taua sona aafiaga.

5—E pei ona avea ma faamoemoega o le Silisiliese le laveaiina o tagata taitoatasi, … o le auaunaga faafaifeautalai e tele lava ina galulue faatasi i le faataunuuina o lenei fuafuaga faavavau!

“Ia manatua e taua tele le aoga o agaga i le silafaga a le Atua; …

“Afai foi e faapea ona oulua galulue i o oulua aso uma i le alagaina o le salamo i lenei nuu, ma aumaia, tau lava o se agaga e toatasi ia te a’u, faauta i le tele o lo outou olioli faatasi ma ia i le malo o lo’u Tama!

“Ma o lenei, afai o le a tele lo outou olioli faatasi ma se agaga e toatasi ua oulua aumaia ia te a’u i le malo o lo’u Tama, faauta i le sili atu o lo outou olioli pe afai lua te aumaia ni agaga e toatele ia te a’u!” (MFF 18:10, 15–16.)²⁰

E tatau ona suia loto o tagata. Na afio mai Keriso i le lalolagi mo lena lava faamoemoega. O le mafuaaga autu lava mo le talaiina o le talalelei ina ia suia ai loto ma olaga o tagata, ma o outou uso e o loo malaga atu mai lea siteki i lea siteki ma faalogo i le faamaoniga ma le molimau a i latou o e e lei leva ona liliu mai … e mafai ona molimau i le auala na suia ai e le liuaina o latou olaga, a o latou tuuina atu a latou molimau. O se liuaina faapea latou te aumaia ai le filemu ma le finagalo alofa i le lalolagi nai lo le feteenai [ma le] pagatia.²¹

O a tatou faifeautalai … o loo folafolaina atu nei i se lalolagi fesouaina e faapea o le savali na fofogaina i le fanau mai o Iesu— “o le manuia i le lalolagi, ma le finagalo alofa i tagata” [tagai Luka 2:14]—e mafai ona avea ma se mea moni iinei ma le taimi nei e ala i le usiusitai i mataupu faavae o le talalelei.²²

Fautuaga mo Suesuega ma Talanoaga

E masani ona faailoa atu e Peresitene MaKei le agaga faafetai mo taumafaiga a faifeautalai o e na aoaoina ona matua. Na faapefea ona faamanuiaina oe po o se tasi e te iloa e ala i le galuega faafaifeautalai?
O fea o taoto ai le tiutetauave mo le galuega faafaifeautalai i aso nei? (Tagai i itulau 56–61.) O a avanoa o loo ia i tatou e mulimuli ai i le faatonuga a Peresitene MaKei faapea e tatau ona avea tagata uma ma se faifeautalai? E mafai faapefea ona tatou saunia e faataunuuina lenei tiutetauave?
O a punaoa ua saunia e le Ekalesia e fesoasoani ai ia i tatou ina ia fetufaai atu le talalelei? O a ni auala ua aoaoina ai i tatou ina ia fesoasoani i faifeautalai faamisiona ma faifeautalai o Uarota i o tatou eria?
O a tulaga agavaa o loo moomia mo le auaunaga faafaifeautalai? (Tagai i itulau 61–64.) Aisea e taua ai le agavaa ma le faatuatuaina i le galuega faafaifeautalai?
O a mea e mafai e tagata talavou ona fai ina ia saunia ai i latou e auauna atu i ni misiona? O a mea e mafai e tagata matutua ona fai e fesoasoani ai i le autalavou ia saunia ai e auauna atu faamisiona?
E mafai faapefea e tagata taitoatasi e i ai ni tulaga faaletonu i le tino po o le mafaufau ona agaigai ai i luma i le galuega faafaifeautalai? O a nisi vaega o le auaunaga ua saunia e le Ekalesia mo i latou e auauna atu ai?
O a ni auala e mafai ai e ulugalii matutua ona avea ma se punaoa taua i totonu o le misiona?

Mau e Faatatau I Ai: 3 Nifae 12:14–16; MFF 4:1–7; 18:15–18; 75:2–5; 88:81; 90:11

man sharing Book of Mormon — O le tiutetauave e fetufaai atu ai le talalelei o loo i luga lea o tagata o le Ekalesia.

bishop interviewing member — Na aoaoina e Peresitene MaKei ia epikopo ma peresitene o siteki ina ia “filifilia [faifeautalai] o e e agavaa e fai ma sui o le Ekalesia.”