Mataupu 3

O Le Faamoemoega o le Ekalesia

O le Ekalesia, faatasi ai ma lona faatulagaga atoatoa, e ofoina atu auaunaga ma musumusuga i tagata uma.¹

Folasaga

Sa i ai ia Peresitene Tavita O. MaKei se lagona alofa tele mo le Ekalesia ma sa i ai foi sana molimau malosi i lana misiona e saunia mo le faavaega mulimuli o le malo o le Atua. A o i ai o ia i le Korama a Aposetolo e Toasefululua, sa ia toe manatuaina le mea lea o loo ta’ua i lalo:

“I luga ae o le pulelaa i le falelotu sa ou auai ai i sauniga o le Aso Sa a o ou laitiiti, sa faatautau ai iina mo le tele o tausaga se ata tele lava o Peresitene Ioane Teila o le ua maliu, ma o lalo ifo, o i ai mataitusi sa ou manatu o ni mataitusi auro, o tusia ai le faaupuga lenei:

“ ‘O Le Malo o le Atua po o le Leai’

“Sa faafiafiaina au i lenei fuaitau a o ou laitiiti, a o le i taitai ona ou malamalama i lona taua moni lava. Sa foliga mai sa ou vave iloaina i lena taimi e leai lava se isi ekalesia po o se faalapotopotoga e mafai ona oo atu i le atoatoaga pe ua mauaina le paia lea e faailoga ai le ekalesia a Iesu Keriso. A o ou tamaitiiti sa ou lagonaina lenei mea i totonu; ina ua ou talavou, sa ou talitonu atoatoa i lenei mea; ma o le taimi nei ua ou faapelepele i ai o se tautinoga maumaututu a lo’u. …

“O le paia o le Ekalesia a Iesu Keriso o le Au Paia o Aso e Gata Ai o loo faaalia i lana faatulagaga faapea foi ma ana aoaoga. O le Aiga Atua, usoga, auaunaga—o mataupu faavae taiala nei e tolu. …ua aofia uma ai i a tatou gaoioiga faale-Ekalesia.”²

O le taitaiga a Peresitene MaKei e atagia ai lona talitonuga maumaututu. I le taimi o lana taitaiga a o avea ma Peresitene, sa matuai iloga ai le olaola ma le alualu i luma o le Ekalesia i le lalolagi atoa, ma sa faatoateleina le faitau aofai o tagata o le Ekalesia mai le tusa ma le tasi le miliona seia toetoe ina a atoa le tolu miliona. I le faamatalaina o le sao o Peresitene MaKei i lenei alualu i luma, sa tusia ai e ni tusitala se toalua o talafaasolopito upu nei:

“O Peresitene Tavita O. MaKei, o le Peresitene muamua lea o le Ekalesia sa tele lona femalagaai, ma i le popofou o lana taitaiga, sa ia malaga asiasi ai i misiona i totonu o Europa, Amerika Latina, Aferika, ma le Pasefika i Saute, ma sa ia faapaiaina ai ni nofoaga se lua mo malumalu i totonu o Europa ma sa faasilasila ai foi o le a fausia se malumalu i totonu o Niu Sila. I le 1955 sa ia faasilasila mai ai e ao i le Ekalesia ona tuuina atu taumafaiga uma e talafeagai ma tulaga uma e mafai ai ina ia maua ai e tagata uma o le Ekalesia i nei misiona vavamamao … avanoa faaleagaga uma e mafai ona ofoina mai e le Ekalesia’ [Lipoti o le Konafesi, Ape. 1955, 25]. O le fausiaina o malumalu, o le faateleina o le aofai o misiona, o le faatulagaina o siteki i le lalolagi atoa, o le faatauanauina o le Au Paia e atiina ae Siona i totonu o o latou lava atunuu nai lo le malaga atu i Amerika, ma oo ai lava ina tuu atu taitaiga faale-Ekalesia i lima o tagatanuu o atunuu taitasi, o laasaga taua uma ia mo le faataunuuina o lena sini.”³

Sa faaauau pea lava le faatuatua o Peresitene MaKei i le misiona paia ma le taunuuga o le Ekalesia seia oo i le faaiuga o lona soifuaga. I se lauga o se konafesi aoao ae ua le toe atoa se tausaga ae maliu o ia, sa ia aoao mai ai: “Ua faatuina e le Atua lana Ekalesia ina ia le lafoaia i lalo pe tuuina atu i nisi tagata. Ma ona o loo soifua le Atua, ma faamaoni pea ona tagata ia te ia faapea foi le tasi i le isi, e le tatau ona tatou popole i le manumalo a’ia’i o le upu moni.”⁴

Aoaoga a Tavita O. MaKei

O le misiona a le Ekalesia o le sauniuni lea mo le faavaega mulimuli o le malo o le Atua.

O le misiona a le Ekalesia o le saunia o le ala mo le faavaega mulimuli o le Malo o le Atua i luga o le fogaeleele. O lona faamoemoega o le, muamua, o le atiina ae i totonu o olaga o tagata o uiga faaKeriso; ma le, lona lua, o le faaliliuina lea o tagata ina ia avea le lalolagi ma se nofoaga sili atu ona lelei ma filemu e nonofo ai.⁵

O le a le mea sa [faamamafa] i aoaoga a Keriso ina ua ia maliu mai i le lalolagi? O le uluai tautinoga sili lava o le faasilasilaga ua latalata mai lava le malo o le Atua.“Ina salamo ia, ua latalata mai le malo o le Atua.” [Tagai Mareko 1:15.] O le teuteu ala o Ioane le Papatiso, sa ia talaiina atu lena mea. Sa ia talai atu le afio mai o le Alii. Sa ia faailoa maia le tulaga o le a umia e le Alii i lena malo, ma sa molimauina e le Faaola ma sa ia talai atu foi lenei lava mea e tasi. Ma o le a le malo? E le o se malo faafagogo, ae o se malo moni lava; ua le na o se lagona i totonu, ae o se faailoga vaaia o le amiotonu. O se malo paia i le lalolagi. O le mea lena sa finagalo ai le Faaola, o le faatuina o se malo faalelagi i le fanauga a tagata.⁶

O le upu [malo o le Atua] e aofia ai tulafono faalelagi i loto ma mafaufau o tagata ma le lalolagi. O le tagata na te faailoaina se pule ma se mana e maualuga atu nai lo lana pule. “E le o le tulafono le faavaea a se Atua pulepule tutu, ae o loo faavae i le gauai atu e le tagata o lona loto i lana lava faitalia, i le finagalo o le Atua.” Sa fetalai Iesu i se tasi taimi, ”Ua i ai lava ia te outou le malo o le Atua.“ [Luka 17:21.] E moni lena mea, aua o totonu o le loto o le tagata e afua mai ai le avea ma sui auai i le malo i fafo. …E na o se vaega faapena e tulimatai atu i le lagi i se mafaufau e tasi mo le taitaiga, e mafai ai ona faaliliuina le fanauga a tagata.

O le Malo o le Atua e atagia ai foi se usoga aoao, lea e aloaia ai e tagata le Atua o lo latou Pule Aoao ma latou faatauaina ai le naunau e usitai i Lona finagalo paia.⁷

O loo i ai i latou i le lalolagi o e fai mai o le lotoleaga, matau-’a, [ma le] manatu faapito i loto o tagata o le a taofia ai pea lava le faatuina o lena sosaiete lelei e taua o le Malo o le Atua. Po o a lava mea e fai mai ai le au le talitonu ma le au faatauemu, ae o le misiona a le Ekalesia a Keriso o le aveesea lea o le agasala ma le amioleaga mai loto o tagata, ma ia mafai ona liuaina le lalolagi, o le a manumalo le filemu ma le manuia i le fogaeleele.⁸

Ua fuafuaina korama o le Perisitua ma le faatulagaga o ausilali e fesoasoani ai e faataunuu le misiona a le Ekalesia.

Ia mafaufau i le perisitua a le Ekalesia. Ia vaai faalemafaufau i tamaloloa ma tama talavou ua faatulaga i ni faavasegaga po o vaega galulue, mai le tama e ivasefulu tausaga le matua, seia oo ifo i le tama talavou e sefululua tausaga. O nei vaega e te maua ai mea uma o loo sailia e le lalolagi o tagata soifua i faalapotopotoga lautele ma sosaiete. O loo i ai avanoa i totonu o nei vaega o korama mo faauoga, faausoga, ma auaunaga faatulagaina lelei. …

O i latou e malolosi o loo galulue i se auala faatulagaina mo le faaleleia atili o tagata taitoatasi, mo le soifua solo lelei o le au paia, ma le lelei o le lalolagi. Afai e na o korama tatou te mafaufau i ai, pe le o se ata lelei ea lena, o se nofoaga e potopoto ai tamaloloa ma tama talavou, e faamasani ai, ma faifai mea faatasi mo le auaunaga i tagata soifua, lea foi e manatu ai tagata uma o i latou uma o se uso? I totonu o lena korama e nofo ai le fomai i tafatafa o se kamuta, e tofu gauai atu i laua i le faanaunauga silisili—o le tapuai i le Atua ma auaunaga fesoasoani i le tagata soifua!⁹

O le matafaioi a le Aualofa o le fesoasoani i le perisitua e faatuina le malo o le Atua, i le faamama avega i e mafatia ma ave fesoasoani i e matitiva, ma o le tele lava o itu, latou te saofaga i le filemu ma le fiafia o le lalolagi. …

O le tasi folafolaga sili ona faamalosiau na tuuina mai i tagata e fiafia e auauna atu, sa tuuina mai e le Faaola i upu nei, “aua na faia e outou i le tasi o e aupito itiiti o ou uso nei, o au lea na outou faia i ai.“ (Mat. 25:40.) … Na ou tupu ae ma avea ma se tagata matua, ae ou te lei iloa le taua o le auaunaga lea e tuuina atu e o tatou tuafafine i lenei Ekalesia.¹⁰

Ina ua iloa e le Ekalesia, le mana malosi o isi faatosinaga e ese mai le aiga, i le olaga tuputupu ae o le tamaitiiti ao lei taunuu i tausaga e malamalama ai i ana faaiuga, o lea ua ofoina atu ai se siosiomaga faalelotu e toetoe lava ina a amata mai le taimi e faatoa fanau mai ai. O le Aoga Sa, o le Peraimeri, o [faalapotopotoga a Alii Talavou ma Tamaitai Talavou] ua saunia aoaoga talafeagai, ma taitaiga tatau mai le taimi o laitiiti seia oo lava i le tagata matua.¹¹

O le Au Paia o Aso e Gata Ai o se nuu moni lava e fesoasoani le tasi i le isi i le olaga atiina ae, o se olaga e faananau atu i le faaolataga o le tagata. O lena faaolataga ou te le o fai atu ua na o se nofoaga i le olaga atali lea e uma ai o tatou atuatuvalega ma popolega uma, a o se faaolataga e faasino i le tagata, o le aiga ma le lalolagi iinei ma le taimi nei. O le Talalelei a Iesu Keriso, ma le faatulagaga atoatoa o le Ekalesia e pei ona faaalia i lenei tisipenisione i le Perofeta o Iosefa Samita, o loo tatou taufai fesoasoani ai o le tasi i le isi i le faaleagaga e ala i le faaaogaina o avanoa e tele e auauna ai i totonu o le Ekalesia. O loo tatou atiina ae le usoga faauso e ala i gaoioiga ma fegalegaleaiga i totonu o korama o le perisitua, o totonu o mafutaga i ausilali ma potopotoga e faamasani ma fegalegaleai ai.¹²

A o faataunuuina e le Ekalesia lana misiona, e faamanuiaina ma faaatoatoa ai tagata taitoatasi.

Mo tagata o le Ekalesia a Iesu Keriso o le Au Paia o Aso e Gata Ai, o le taua o le tagata e i ai sona uiga faapitoa. O korama, ausilali, uarota, siteki, e oo lava i le Ekalesia lava ia ua faatulaga e faalautele ai le ola manuia o le tagata. O nei vaega uma e i ai ni o latou taunuuga, ma o lena taunuuga o le fiafia ma le ola manuia e faavavau o fanau uma a le Atua. O le mea lea ou te aioi atu ai i tagata uma o le Ekalesia, aemaise lava i Peresitene o korama ma taitai o ausilali, ina ia tuuina atu se taumafaiga tuufaatasi ina ia atili manuia ai olaga o tagata.¹³

O loo i ai i totonu o le tagata se lagona, ae o se faapaiaga foi lea e uunaia o ia e agai i luma ma agai i luga. E aofia tagata uma i lea lagona, ma e i ai se taimi i le olaga, e iloa ai e tagata uma o loo i totonu o i latou lenei mea.

E o faatasi ma lenei uunaiga faaleagaga ni tulaga manaomia tele e tolu ia e tumau e le suia lava i le gasologa o senituri: (1) E faananau tagata soifua masani uma ia iloa se mea e uiga i le Atua. E faape’i o ia? Pe fiafia ea o ia i le fanauga a tagata, pe na te le amanaiaina i latou? (2) O le a le olaga silisili ona lelei e ola ai i lenei lalolagi ina ia sili ona manuia ai ma maua le fiafiaga sili? (3) O le a lena mea e le maalofia o le oti? O le a se mea o i tua atu o le oti?

Afai e te fia maua ni au tali mo nei faanaunauga o le agaga o le tagata, e tatau ona e sau i le Ekalesia e maua atu ai. E na o le lotu moni lava e mafai ona faamalieina faanaunauga o le agaga.¹⁴

Aisea e tatou te faia ai nei fonotaga faakonafesi ma isi fonotaga i totonu o le Ekalesia? Ua faia mo le lelei o le tagata—mo lou atalii ma lo’u atalii, o lou afafine ma lo’u afafine. Na fetalai mai le Alii, “… afai foi e faapea ona oulua galulue i o oulua aso uma i le alagaina o le salamo i lenei nuu, ma aumaia, tau lava o se agaga e toatasi ia te au, faauta i le tele o lo outou olioli faatasi ma ia i le malo o lou Tama!” [MFF 18:15.] …

O le … faamoemoega o le faatulagaga o lenei Ekalesia maoae, ua matua maopoopo lelei, ma ua matua atoatoa lelei, ia faamanuia ai le tagata.¹⁵

Sa faatuina lenei Ekalesia i le auala e tasi e mafai ona faatuina ai le Ekalesia a Keriso, e ala i le pule tuusao mai le Atua. Ona o lea la faavae, ua valaaulia ai le lalolagi atoa e o mai i se Ekalesia e faamaonia e le Atua lava ia, ma e na te ofoina atu ai avanoa uma e mafai ai e le mafaufau o le tagata soifua, o lagona foi ma faanaunauga, ona manatunatu i le faataunuuina o misiona taitasi i lenei fogaeleele. “O se galu sili ona lautele o faatosinaga patino faaletagata, o le faamoemoe maualuga lava ia pai atu ma suia tagata uma, ina ia latou avea e faapei o le Atua, e pei lava o Iesu.” O le “faa-Mamona, “ i le avea ai ma Kerisiano moni, ”na te faatoilalo i le manatu faapito, e faatulafonoina lagona malolosi, e le faatauaina le naunau i meaai, e fafaguina le atamai, e faaeaina le alofa. E na te faalauiloaina le galue punouai, faamaoni, mea moni, mama, ma le agalelei. E na te faalotomaualaloina le faamaualuga, faaeaina le faamaualalo, tausisia le tulafono, fiafia i le saolotoga, e taua tele i ai, ma o le a tuufaatasia tagata i se usoga tele e tasi.”¹⁶

A o faataunuuina e le Ekalesia lana misiona, o lona sao lea i le soifua manuia o tagata.

E toatele tagatanuu o loo matuai popole tele ona o le faateleina o solitulafono, ua maualuga le fuainumera o faaipoipoga ua tatala ma tamaiti e fananau i tina e le i faaipoipo, o le faateleina o faalavelave tau faamai pipisi ona o feusuaiga, o faiga faalilolilo i ofisa maualuluga, ma isi faailoga o le le faamaoni o tagata tumaoti ma tagata lautele.

Pe ua i ai ea se lape i le ola mama? Pe ua i ai ea se mafuaaga e fagua ai? O le lalolagi e faatatau ia i tatou, ma o faamaumauga faafuainumera o lo o tatou faitau i ai ua matua taufaafefe moni lava, ma o ni lapataiga ia ua tatau ai. …

O le misiona a le Ekalesia o le faaitiitia ma, pe a mafai, ia aveeseina nei mea leaga mai le lalolagi. Ua iloa lelei lava lo tatou manaomia o se autau tuufaatasi e aveesea ai nei mea leaga. O lena autau tuufatasi, o lena mataupu sili, o le talalelei lea a Iesu Keriso, e pei ona toefuataiina e ala mai i le Perofeta o Iosefa Samita. E na te faamatalaina le olaga o le tagata ma lona faamoemoega ma e i ai i totonu elemene taua e laveai ai, o manatu sili ma le mamalu, ma le tulaga faagaeetia faaleagaga lea e faananau i ai le loto o le tagata.

O loo i ai i soo se nofoaga ia alii ma tamaitai e sa’o lelei o latou mafaufauga, o loo naunau e aveesea mai o tatou nuu ia elemene leaga o loo fevaevaeai ai pea sosaiete—o faafitauli o ava oona ma onaaga, o mausa faanikotini ma ana faiga faatiapolo, o le ola le mama, mativa, ma isi mea faapena. O loo taumafai le Ekalesia ia sili atu ona lelei ma matagofie le siosiomaga o le aiga ma le alalafaga.¹⁷

Ia tatou faaalia iinei i le taimi nei le agaga faafetai mo le Ekalesia a Iesu Keriso ma korama ma ausilali faatulagaina faapitoa e tineia ai nei mea leaga. Sa faatuina e ala i faaaliga mamana a le Atua le Tama ma lona Alo o Iesu Keriso. O lana misiona ofoofogia o le talaiina atu o le upu moni o le talalelei toefuataiina; e siitia ai i luga le lalolagi ina ia mafai e tagata ona fegalegaleai i se tulaga faauo o le tasi i le isi; ina ia faatuina i totonu o o tatou alalafaga se siosiomaga lelei e mafai ai e a tatou fanau ona maua le malosi e tetee atu ai faaosoosoga ma maua faamalosiauga e taumafai ai ia ausia tulaga faaleaganuu ma faaleagaga.¹⁸

O le Ekalesia, sa faatuina e ala i musumusuga paia i se alii talavou e le i lelei se aoga, ua ofoina atu i le lalolagi le tali o ona faafitauli lautele. Na faamanuiaina lona taulimaina o le suega o le senituri muamua. I le lotolotoi o mataupu mananaia a tagata i lenei senituri e luasefulu, o e o loo saili ma le mataalia i fesuiaiga ma ua taitaiina tauaso agai i le lumanai e faitauina le taunuuga o le tagata, ae o loo susulu pea le Ekalesia e pei o le la i le lagi, e siosiomia e isi tino faalelagi e pei o ni satelite e le taua tele. E moni o le Ekalesia o le foafoa ma le puipuiga o uiga aupito tausaafia o le tagata. O lana matafaioi moni lava, o le faaolataga o lo tatou lalolagi o tagata soifua. “O le malamalama o le upumoni lea e susulu i soo se mea o le lalolagi, ma o lenei malamalama e le mafai ona toilalo e faaali atu i le tagata, i se taimi e le o toe mamao po o se taimi mulimuli ane foi, ia mataupu paia e tatau ona ola ai.”¹⁹

O le Ekalesia, i ana faatulagaga atoatoa, e ofoina atu auaunaga ma musumusuga i tagata uma. …Eleole aveesea o tagata mai le lalolagi, ae e saili e atiina ae tagata atoatoa faapei o le Atua i totonu o nuu, ma e ui atu foi ia i latou le foiaina o faafitauli o nuu.²⁰

Fautuaga mo Suesuega ma Talanoaga

Faatusatusa i aoaoga a Peresitene MaKei, e faapefea ona e faamatalaina le faamoemoega o le Ekalesia? (Tagai i itulau 27–28.) Aisea tatou te faatinoina ai fonotaga faale-ekalesia ma konafesi? (Tagai i itulau 30–31.)
E faapefea ona fesoasoani le Ekalesia i le sauniuniga mo le faavaega mulimuli o le malo o le Atua? (Tagai i itulau 27–31.) O a ni auala o loo tutusa ai ma foliga i ai le Ekalesia i le malo o le Atua o le a faatuina? (Tagai i itulau 27–28.)
O le a se mea o loo tuuina mai e le Ekalesia e taitai atu ai le au paia faamaoni i le ola e faavavau? (Tagai i itulau 27–31.) E faapefea ona e iloa o le faatulagaga o le Ekalesia, ma ana korama ma ausilali, e fesoasoani e faaatoatoaina tagata? (Tagai foi Efeso 4:11–13.)
O a nisi o faafitauli o loo fetaiai ma le lalolagi i aso nei? (Tagai itulau 31.) O a ni ala e mafai ona fesoasoani ai le faaaoga o mataupu faavae o le talalelei, e foia nei faafitauli? (Tagai i itulau 31–32.)
O a ni mea ua faamanuiaina ai lou olaga ona o lou auai i le Ekalesia? O a ni mea e mafai ona e faia ma lou aiga ina ia saga faamanuiaina atoatoa ai outou i mea o loo ofoina mai e le Ekalesia?
O a ni mea e mafai ona tatou faia e fesoasoani ai i le Ekalesia e tauave ana matafaioi i nei aso e gata ai?

O Mau e Faatatau I Ai:Efeso 2:19–22; 4:11–15; Moronae 6:4–9; MFF 10:67–69; 65:1–6

President Mckay holding a sister — “O le …faamoemoega o le faatulagaga o lenei Ekelesia maoae, maopoopo lelei, atoatoa lelei, ia manuia ai le tagata.”