Faatuatua: O le Faavae o le Amiotonu Uma

O le faatuatua i le Atua le Tama ma Lona Alo o Iesu Keriso, o le mataupu faavae muamua o la tatou ekalesia ma le faavae o le amiotonu uma.

Mai le soifuaga o Iosefa F. Samita

Na taula’i atu le faatuatua o Iosefa F. Samita i lona Tama i le lagi, i le Alii o Iesu Keriso, ma i le faigofie ma le upumoni o le talalelei. Ao itiiti Iosefa F. Samita, sa faamalosia lona faatuatua mai le faamaoni o lona tina i ona tiute ma le amiotonu.

Sa ia fai mai: “Ou te matua manatuaina lelei se mea na tupu i le taimi o ou laitiiti. O lou tina ua oti lana tane ma toatele se aigana te tausia. I se tasi o tautotogo [i le va o le 1849 ma le 1852] ina ua eli ae a matou pateta, sa ia auina atu lana fanau tama e ave le avega pateta sili ona lelei i le ofisa mo le sefuluai; sa tau le maua se pateta i lea vaitaimi. O au o se tama laitiiti i le taimi lea, ma sa ou aveina le solofanua e toso ai le taavale. Ina ua matou oo atu i faasitepu o le ofisa o le sefuluai, ua sauni e tuu i lalo la matou uta pateta, sa sau se tasi o failautusi ma faapea mai i lo’u tina, Tina Samita, ou te ofo i le totogi o lau sefuluai. … Sa ia otegia lo’u tina ona o le totogiina o lana sefuluai, sa ia ta’u atu isi faaupuga ia te ia [lo’u tina] ae leai ma se faaupuga faapea ua atamai pe ua faautauta [lo’u tina]; ma sa ia faapea mai e i ai isi tagata e malolosi ma mafai ona faigaluega ae o loo fesoasoani atu i ai le ofisa o le sefuluai mo le tausiga. Sa liliu atu lo’u tina ia te ia ma faapea atu: E te manao e taofia o’u faamanuiaga? Afai ou te le totogi la’u sefuluai, o lona uiga ua ou manao i le Alii e taofia ana faamanuiaga mo au. Ou te totogi la’u sefuluai, e le gata o le poloaiga a le Atua, ae ona ou te manaomia se faamanuiaga e ala i lo’u faia.”

Sa faamatala mai e Peresitene Samita: “Sa faamanuiaina o ia ona sa usiusitai i tulafono a le Atua. … O lena tina ua leai sana tane ua tusia lona igoa i le tusi tulafono a le Alii. Sa faamanuiaina o ia i le maota o le Atua. E leai se sauniga o le talalelei e taofia mai ia te ia, aua sa usiusitai o ia i tulafono a le Atua, ma e le faatamala o ia i ona tiute.”¹

Aoaoga a Iosefa F. Samita

E mafai ona i ai le faatuatua i le Atua ma Lona Alo, o Iesu Keriso

Tatou te talitonu i le Atua, le Tama o lo tatou Alii ma le Faaola o Iesu Keriso, o le na faia le lagi ma le lalolagi, le Tama o o tatou agaga. Tatou te talitonu ia te ia e aunoa ma le masalosalo, tatou te talia o ia i o tatou loto, i lo tatou faatuatuaga faalelotu, i o tatou lava tagata. Tatou te iloa e alofa o ia mo i tatou, ma e tatou te talia o ia o le Tama o o tatou agaga ma le Tama o lo tatou Alii ma le Faaola o Iesu Keriso.²

Muamua. … e tatau ona i ai le faatuatua i le Atua, faatuatua o le mataupu faavae muamua i le talalelei faaalia, ma le faavae o le amiotonu uma.

O le faatuatua i le Atua o le talitonu o loo i ai o ia, ma “na o ia lava le Pule Aoao ma e tutoatasi, o lē ua i ai le atoatoaga uma ma meaalofa lelei uma ma mataupu faavae uma,” ma o ia foi e ao ona taulai atu i ai le faatuatua ma le faaolataga o isi tagata soifua uma, ma le isi, o Ia o Le na faia mea uma lava, o ia e ona le mana uma, na te silafia mea uma, ma o ana galuega ma le mana o lona Agaga e oo atu ai i mea uma [tagai Iosefa Samita, com., Lectures in Faith (1985), 10].

E le gata e tatau ona i ai le faatuatua i le Atua, ae faapena foi ia Iesu Keriso, lona Alo, le Faaola o tagata ma o le Puluvaga o le Feagaiga Fou; ma i le Agaga Paia, o lē molimau i le Tama ma le Alo, “e tutusa i augatupulaga uma ma le faavavau.”³

O lo tatou faatuatua ia Iesu Keriso o loo i le faavae o lo tatou talitonuga faalelotu, o le faavae o lo tatou faamoemoe mo le faamagaloina o agasala, ma le faaeaina pe a mavae le oti, ma le toetu mai le oti i le ola e faavavau. O lo tatou faatuatua i mataupu faavae ua toefuataiina e ala i le tufugaaao o le Perofeta o Iosefa Samita, ua faamaonia ma faamalosia ai i tatou ma faamauina ai e aunoa ma se fesili ma se masalosalo, i lo tatou faatuatua ma le talitonuga i le misiona paia a le Alo o le Atua.⁴

Ua ta’u mai e Paulo, o le faatuatua, o le faalagolago lea i mea ua faamoemoe i ai, o le mautinoa lea o mea e le o vaaia [tagai Eperu 11:1]. O le faatuatua i le Atua [o le] talitonu o loo soifua o ia, o ia foi na te tauia mai o ē matua saili ia te ia ma alofa ia te ia. O le faatuatua i le Atua o le a taitaiina ai tagata i le malamalama uma ma le atoaga o mea moni uma i o latou luma…

E faapei i tatou o pepe meamea i lo tatou malamalama i lenei mataupu faavae o le talalelei. O lea faatoa tatou amata, ona tatou iloa se mea i lenei mataupu faavae o le olaga ma le faaolataga, lenei mataupu faavae o le mana. Ua ta’u mai ia te i tatou, sa faia lalolagi, e ala i le faatuatua. O ai o i tatou e i ai le faatuatua e fai ai se mea? E vaivai lava lo tatou faatuatua ua tau le mafai ai ona ola i mataupu faavae laiti o le talalelei ua faaali mai e le Atua ua alagatatau mo le filemu ma le fiafia. Ua tau leai se faatuatua e faataunuuina ai nei mataupu faavae laiti ua faaali mai ia i tatou mo le puleaina o o tatou olaga i aso uma. O le Alii e onosai o ia ia i tatou ma aoao i tatou i sina mea itiiti iinei ma sina mea itiiti iina, o le fuaiupu ma lea fuaiupu, o le mataupu ma lea mataupu ina ia mafai ai ona tatou maua lena faatuatua sa tuuina mai i le au paia, lea sa punitia ai gutu o leona ma ua faaitiitia ai le vevela o le ogaumu e mu ai le afi.. … O lo tatou faiaoga sili, o Iesu Keriso, … o loo taumafai e aoao i tatou i mataupu faavae o le ola ma le faaolataga o mataupu faavae o le mana, e aoao ai tagata ina ia tutulai mai le loloto o le faanoanoa, mai le loloto o le ola maulalo; i le maualuga o le mamalu ma le malamalama o le Atua.⁵

O le mea moni, e ao i atalii ma afafine uma o le Atua ona i ai muamua le faatuatua i le Atua—faatuatua o loo soifua o ia, e amiotonu o ia, e silisiliese o ia, na te pulea mea uma, ma o ia o loo i ai le atoatoaga uma. Atonu e leai sou malamalama i lenei mea, ae tatau ona i ai lou faatuatua e moni. O le mataupu faavae muamua lenei o le talitonuga faaalia. Ua tusia a leai se faatuatua e le mafai ona faafiafiaina le Atua. Ua tusia foi o le amiotonu e ola i le faatuatua. O lea ou te faapea atu ai e alagatatau mo tagata uma ona i ai le faatuatua i le Atua, o le na faia mea uma lava, o le pule o le lagi ma le lalolagi. A aunoa ma le faatuatua e le mafai ona fausia lalolagi; a aunoa ma lenei e le mafai ona faatu i o latou tulaga; ae o le faatuatua e mafai ai mea uma e le Atua ma tagata.⁶

O le Atua, i lana faaaliga i le tagata, ua faafaigofie ai lana upu o le tagata sili ona lotomaulalo, e aunoa ma se aoaoga faapitoa, na te olioli i le faatuatua sili, malamalama i aoaoga o le talalelei, ma e fiafia i lo latou talitonuga faalelotu e aunoa ma se faalavelaveina.⁷

E leai se faatuatua o se tagata, e leai se lotu a se tagata, e leai se faalapotopotoga faalelotu i le lalolagi atoa, e sili ae i le upumoni. O le upumoni e i le faavae o le talitonuga, a leai ua le aoga ma o le a le faataunuuina lona faamoemoe. Ou te fai atu o le upumoni o loo i le faavae, o loo i le pito i lalo ma le pito i luga, ma e sosolo atoa i lenei galuega sili a le Alii sa faatuina e ala i le tufugaaao o Iosefa Samita, le perofeta.⁸

O le faatuatua, o le meaalofa a le Atua, e maua mai le usiusitai.

O le faatuatua o le meaalofa a le Atua i le tagata, e maua mai le usiusitai, e pei foi o isi faamanuiaga. O le alii poo le tamaitai i lenei Ekalesia o loo naunau e faamauoaina lona faatuatua i le sili e mafai ai, e manaomia ona usitaia tulafono uma ma sauniga o le Ekalesia ia talafeagai ma le tulafono o le usiusitai i le finagalo o le Atua. I nei mea, ma e ala atu ai, e maua ai e le tagata le malamalama sili i le faamoemoega o le Atua i le lalolagi. O le faatuatua ua faamauoaina, o lona uiga o le mana faateleina, ae ui atonu e le maua e le tagata le avanoa i lenei olaga e faatino ai ia mana uma e oo mai ia te ia e ala i le faamauoaina o lona faatuatua, o nei mana e mafai ona faatinoina i lo latou atoatoaga i le faavavau, pe a lē o le taimi nei.⁹

Ua faapea mai o le faatuatua o le meaalofa a le Atua, ma o lea lava; ae le maua le faatuatua pe a leai ni galuega; o le faatuatua e le oo mai e aunoa ma le usiusitai i poloaiga a le Atua.¹⁰

O le misiona muamua a le Ekalesia o le aoao atu lea o le talalelei a Iesu Keriso i le lalolagi. O loo i ai le feau taua e tuuina atu, e le gata o loo aofia ai le faaolataga faaleagaga o tagata, ae faapea foi ma lo latou manuia faaletino. Ua le na ona aoao e alagatatau ona i ai le faatuatua, ae faapea foi ona manaomia galuega. O le talitonu ia Iesu e lelei, ae ia ola ai ina ia mafai ai e le ua talitonu ona galue mo lona lava faaolataga, ma fesoasoani i isi ina ia faapea foi ona fai.¹¹

Tatou te talitonu e tatau ona tatou ola i lo tatou talitonuga i aso uma o le vaiaso, o itula uma o le aso, ma taimi uma lava. O le talitonu ma le faatino o le a faamalosia ai lo tatou faatuatua, o le a faateleina le agaga o le Atua i totonu ia i tatou, o le a faateleina lo tatou malamalama, ma o le a sili atu ai ona mafai ona puipuia le galuega po o le faamoemoega o loo tatou galulue ai.¹²

Ou te tatalo atu, o’u uso e ma tuafafine, o loo i ai a latou fanau i Siona, ma o loo pau i ai le tele o le matafaioi, aoao ia i latou mataupu faavae o le talalelei, aoao i latou ina ia i ai le faatuatua i le Alii o Iesu Keriso, ma i le papatisoga mo le faamagaloina o agasala pe a oo i le valu o tausaga.¹³

O le faatuatua i le Atua o le a puipuia ai i tatou i taimi o puapuaga.

Ina ia mafai ona aveesea le popole vale e faatatau i fesili o loo manaomia ai le taimi mo latou tali, o lea e tatau ai se faatuatua moni ma le talitonuga i le Atua ma le manumalo o lana galuega.¹⁴

O le manaomia o le i ai o se malamalama o le upumoni e taua tele. E faapena foi i tagata uma lava o le Au Paia o Aso e Gata Ai, e ao ona mauaa loloto le talitonuga i le faamaoni o le Atua, ma le talitonuga mautu ma le faatuatua i lona alofa. Ina ia malamalama tonu i le talalelei ma ia mafai ai ona tausia ana poloaiga, o lea e matua manaomia ai lava lea malamalama. Ia fesili ifo le tagata ia te ia lava pe o i ai se talitonuga maumaututu i nei mea. E mafai e se mea e ono tupu ia te oe,… ona sui ai lou faatuatua i le faamoemoega, ma le faamaoni sili ma le alofa o le Alii, poo le mana faaola o lana talalelei, le feau o lana faaolataga? Afai o lea, o lou faatuatua, ua le mauaa loloto, ma e matua manaomia le faatalitonuina o oe.

O loo tele faataitaiga i tusitusiga paia, o tagata ua mauaa le tumau o le faatuatua i le Atua. E i ai le tulaga moomia mo alii talavou uma ina ia faalagolago i lea poutu malosi.

Ina ua leiloa uma ana oloa faale lalolagi, ma e oo lava i le faanoanoa sili na mafatia ai o ia ona o le maliliu o ana fanau, sa faatuatua a’ia’i pea Iopu i le Silisiliese.

O Aperaamo o le isi faataitaiga o le faamaoni atoatoa i le afioga a le Atua, ma le faatuatua i le fefaasoaai o lona agalelei i se tulaga aoao. … I le naunautaiga o Aperaamo e faatuatua i le Atua, o se tofotofoga sili e ono oo mai i se tamā—o le osia o le taulaga i lona atalii—ua tatou vaai i le loloto o le mauaa o le faatuatua ma le talitonuga i le Silisiliese ma mafai ai ona naunau e faataunuuina lana folafolaga, e ui lava ina foliga mai o se tulaga e sili ona faigata. … O le a faia foi e ia faatasi ai ma i latou o e faatuatua ia te ia, aua o le folafolaga e mo tagata uma.

O lenei malamalama, faatauatua, ma le talitonuga, e maua mai ai se vaega taua i le talitonuga faaalia. … Sa aoaoina e Aperaamo le upumoni sili, e ao foi ona tatou faatumauina i o tatou loto, e faamaoni le Atua, ma e faatunuuina lana folafolaga i le mea sili. O lea ua faamanuiaina ai o ia, e faapena foi i tatou, i taimi o tofotofoga faigata, aua ua ia faatuatua i le Alii ma faalogo i lona siufofoga. Sa tauina atu foi ia te ia, Ua fetalai mai le Alii: “Ou te matua faamanuia atu ia te oe, ma ou matua faatoateleina lava lau fanau e pei o fetu o le lagi, e pei o le oneone foi i le matafaga; e maua foi e lau fanau faitotoa o e ita ia i latou, o lau fanau foi e manuia ai atunuu uma lava o le lalolagi.” [Kenese 22:17–18.]

E tutusa lava le tulaga lea ma aso nei; sei vagana ua i ai i le Au Paia le malamalama moni, o le ala o loo latou tulimata’ia o loo talafeagai lelei ma le finagalo o le Atua, o le a vaivai i latou i tofotofoga, ma o le a matapogia i sauaga. … Ae peitai, i le isi itu, i lenei faatuatua i le Atua ua faamautuina i o latou loto, tusa lava poo le a le mea e oo mai, e fiafia i latou i le faia o lona finagalo, ma le iloa e leai se masalosalo i le iuga o le faamanuiaga folafolaina o le a maua e i latou. E faapena foi i le lalolagi, o le a maua le pale o le mamalu sa teuina e le Atua mo i latou e alolofa, faamamalu ma usiusitai ia te ia. …

E leai se tagata na te maua le atoatoaga o faamanuiaga a le Atua, sei vagana ua ia fesootai atu, i se vaega, le faavae o le faatuatua i le faamaoni o le Atua, ua faaalia mai i le faataitaiga o loo taua. E ao ona ia maua i lona lava loto le talitonuga ma le faatuatua i le faamasinoga ma le alofa o le Atua. E ao ona taitoatasi le tagata ma faia, aua e le mafai e se tasi ona faia mo se isi. O lesona faapenei e ao ona aoaoina ma faaaogaina e le autalavou a Siona, ina ia faamalosia i o latou mafaufau le upumoni o le a tuu saoloto ai i latou ma tutumau ai i le faatuatua. A o faatasitasi i latou i a latou faatasiga, ia tuuina atu i latou lava i luma o le Atua, ma ia manatua lana faamanuiaga sili, i le aumaia o le Tusi a Mamona, i le vaaiga i Katelani, i Siona [Jackson County, Misuri], i Navu, i aso faigata o le malaga, ma i le togavao. O lenei ina ia latou maitau ai le alofa o le Atua i ana folafolaga, ma maitau ai o sauaga ma tofotofoga matautia ua liua i le manuia o ona tagata; ma ua faafouina ai a latou feagaiga, faatumulia i le mauaa loloto, talitonuga le maluelueina o le agalelei ma le alofa o le Alii. O tagata taitasi e ao ona aoao i lenei lesona, e ao ona faatumauina i lona loto, i le loloto, ma ia faavae mautu e le mafai ai e se mea e tasi ona tuueseeseina o ia mai le malamalama o le alofa o le Atua, e ui lava o loo tali mai ala le oti ma seoli. …

E lelei le Atua; o ana folafolaga e le mafai ona le faataunuuina; o le faatuatua moni i lona agalelei ma le alofa, o se mataupu faavae sa’o. O lea la, e ao ai ona tuu atu lo tatou faatuatua ia te Ia.¹⁵

E i ai tagata e fiafia e faapea mai o tamaitai o le itupa vaivai. Ou te le talitonu i ai. I le tino, atonu e sa’o; ae i le faaleagaga, faaletagata, faalelotu ma le faatuatua, o ai se alii e faatusatusa i le tina ua matua talitonu? Sa i ai le faatuatua ia Tanielu e faasaoina ai o ia i le lua o leona, ae e i ai tamaitai sa latou vaai atu o saeia lima ma vae o a latou fanau tama, ma sa onosa’ia faiga faasatani uma lava ma sauaga ona o lo latou faatuatua. E masani ona sili atu lo latou naunau e faia osigataulaga, ma o ni paaga a alii e tutumau, e amio Atua, ola mama, ma le faatuatua.¹⁶

Ina ia tutu malosi e faafetaiai i mea faafeagai ua lofituina, pe a uma ona e faia o mea uma e te mafai, o le lototele o le faatuatua ia. O le lototele o le faatuatua o le lototele lea o le alualu i luma. O tagata uma e maua lea uiga faale Atua e faaauau pea; e lē faatagaina i latou e tutū, pe afai e mafai ona latou faia pea. O i latou ua le na o ni tagata ua pulea e lo latou lava malosi ma le poto; a o i latou ua faauuina i le tulafono maualuga ma faamoemoega faale Atua.¹⁷

O le faatuatua tatou te ulu atu ai i le malologa o le Atua.

Na ta’ua e perofeta anamua le “ulu atu i le malologa o le Atua” [tagai Alema 12:34; MFF 84:23–24]; o le a lona uiga? I lo’u manatu, o lona uiga o le ulu atu i le malamalama ma le alofa o le Atua, ina ua maua le faatuatua i ona faamoemoega ma lana fuafuaga, e oo i le tulaga tatou te iloa ai e sa’o i tatou, ma tatou te le o sailiili mo se isi mea, ua le faalavelaveina i tatou i le feaveaiina o matagi uma lava o mataupu, poo le pepelo o tagata i togafiti leaga ua saunia e faasese ai. Ua tatou iloa o mataupu faavae e a le Atua ia, ma e tatou te le fesili i soo se tagata e uiga i lenei; e mafai lava ona faia o latou manatu, lagona ma mafaufauga e le faavaea. O le tagata ua oo i lena tulaga o le faatuatua i le Atua ma ua aveesea le masalosalo ma le fefe mai ia te ia, ua ulu atu o ia i le malologa o le Atua.”¹⁸

A aunoa ma le fesoasoani a le Agaga Paia e leai se tagata e mafai ona iloa le finagalo o le Atua, poo Iesu le Keriso—o le Togiola o le lalolagi, poo le mataupu o loo ia aoao ai, o le galuega ua ia fai, poo lona faatuatua, ua talia e le Atua, ma o lea ua faamautuina ai ia te ia le meaalofa o le ola e faavavau, e sili i meaalofa uma lava.¹⁹

E leai se tasi na te maua le meaalofa o le ola e faavavau sei vagana ua ia manao e ositaulaga mea uma o le lalolagi ina ia maua ai. E le mafai ona tatou faia o lea pe afai e taulai atu pea o tatou manao i le lalolagi.

… Ae afai tatou te toloai oa mo outou i le lagi; afai tatou te aveese mai o tatou manaoga mai mea o lenei lalolagi, ma faapea atu i le Alii lo tatou Atua, “Tama, aua nei faia lo’u loto, a o lou finagalo,” [tagai Luka 22:42] ia faia le finagalo o le Atua i le lalolagi e faapei ona faia i le lagi, ma o le malo o le Atua i lona mana ma le paia o le a faatuina i luga o le fogaeleele. O le a saisaitia le agasala ma Satani, ma tulia ese mai le lalolagi, ma sei vagana ua tatou i ai i lenei tulaga o le mafaufau ma le faatuatua ona mafai ai lea.²⁰

Fautuaga mo Suesuega

O le a le faatuatua? Aisea ua avea ai le faatuatua i le Atua ma Iesu Keriso “o le faavae o lo tatou talitonuga”?
O le a se mea ua tatou iloa i le Atua ma Iesu Keriso e fesoasoani ia i tatou e maua ai le faatuatua ia i la’ua? Aisea e faavae ai lo tatou faatuatua i le upumoni? (Tagai Alema 32:21.)
E faapefea ona maua le faatuatua? E faapefea ona faamauoaina ma faamalosia lo tatou faatuatua? O le a le faiā a le faatuatua ma galuega?
E faapefea ona tatou fesoasoani atoatoa ia tatou fanau e atinae lo latou faatuatua ia Iesu Keriso?
Ina ia onosai i puapuaga, aisea e ao ai i tagata uma o le Au Paia ona atoatoa le faatuatua i le “amiotonu ma le alofa mutimutivale” o le Alii ma le “mana faaola o lana talalelei?”
O le a se mea tatou te aoao e uiga i le faatuatua mai faataitaiga a Aperaamo, Iopu, ma uluai taitai ma tagata o lenei tisipenisione? I le ogatotonu o sau gaioiga sili ona tofotofoina, e faapefea e le faatuatua i le Alii ona faamalosia ma faamanuia ia te oe?
Aisea e taua ai ia i tatou ona iloa o le mataupu o loo tatou tulimatai i ai o loo “talafeagai lelei ma le finagalo o le Atua”? E faapefea ona tatou iloa lea mea?
O le a le “lototele o le faatuatua,” ae faapefea ona aoga i lou olaga i aso fai pea?
Aisea e tatau ai ona tatou naunau ina ia ositaulaga mea uma o le lalolagi ina ia maua ai le meaalofa o le ola e faavavau?
O le a le uiga o le ulu atu i le malologa o le Atua? E faapefea ona tatou ulu atu i le malologa i le taimi nei?

He Is Risen — *O le Tuugamau Avanoa*, tusia e Del Parson. Sa aoao mai Iosefa F. Samita e “tatau ona i ai le faatuatua i le Atua. … ia Iesu Keriso, lona Alo, le Faaola o tagata ma le Puluvaga o le Feagaiga Fou; ma le Agaga Paia” (*Mataupu o le Talalelei*, 100).