O se Molimau Tino i le Perofeta o Iosefa Samita.

O le Perofeta o Iosefa Samita sa filifilia e le Atua e toefuataiina mai le atoatoaga o le talalelei i le lalolagi.

Mai le Soifuaga o Iosefa F. Samita

I le popofou o lona soifuaga, sa maua ai e Iosefa F. Samita se molimau o le Perofeta o Iosefa Samita sa filifilia e toefuataiina le talalelei a Iesu Keriso i le tisipenisione mulimuli lenei. Ina ua mavae ni tausaga, sa ta’uina mai e Peresitene Samita: “A o ou tamaitiiti sa ou iloa le Perofeta o Iosefa Samita. Ao ou tamaitiiti sa ou faalogo ia te ia o folafola atu le talalelei e faapea ua tuuina atu atoa e le Atua le faatuatua i lana tausiga ma le vaavaaiga. A o ou tamaitiiti, sa ou masani i lona aiga, i ona aiga, e pei ona ou masani i le fale o lo’u lava tama. Sa ou faamautuina le molimau a le Agaga sa ou maua, ao ou tamaitiiti, ma e sa ou maua mai i lo’u tina paia, o le talitonuga mautu o Iosefa Samita o le perofeta a le Atua; sa musuia o ia i se tulaga e le’i musuia ai se isi lava tagata i lana augatupulaga, po o seneturi i luma atu, ua filifilia o ia e le Atua e faataatia le faavae o le Malo o le Atua.”¹

A o avea ma Peresitene, sa faamaonia e Iosefa F. Samita le faatauina mai o fanua o loo ta’ua i le soifuaga o le Perofeta o Iosefa Samita ma le tuputupu a’e o le Ekalesia, e aofia ai ma le nuu sa soifua mai ai le Perofeta i Sharon, Vermont; o le falepuipui i Karefasi, Ilinoi; ma le faatoaga a Iosefa Samita Matua i Manchester, Niu Ioka.

Na saunoa ia Peresitene Iosefa F. Samita e uiga i le galuega a le Perofeta: “Ou te molimau atu ia te outou ma le lalolagi, o Iosefa Samita sa faatuina e le mana o le Atua na te faataatia le faavae o lenei galuega tele o aso e gata ai, e faaalia ai le atoatoaga o le talalelei i le lalolagi i lenei tisipenisione, e toefuataiina le Perisitua a le Atua i le lalolagi, ina ia mafai ai e alii ona galulue i le suafa o le Tama, ma le Alo, ma le Agaga Paia, ma ia talia e le Atua; e faia foi i lana pule. Ou te molimau atu i lea tulaga; ou te iloa e moni.”²

O Aoaoga a Iosefa F. Samita

O le Perofeta o Iosefa Samita o le meafaigaluega filifilia a le Atua na te toefuataiina le talalelei o le faaolataga.

O Iosefa Samita o le meafaigaluega filifilia a le Atua ma sa faapaiaina i lana pule e toefuataiina mai ai le Perisitua paia, o le mana o le Atua e fusifusia ai le lalolagi ma le lagi,– le mana o le Perisitua e mafai ai e alii ona faia sauniga o le talalelei a Iesu Keriso mo le faaolataga o tagata. E ala mai ia Iosefa Samita, ua toefuataiina mai ai le talalelei o le salamo, papatisoga i le vai mo le faamagaloina o agasala, o le papatisoga o le Agaga Paia ma le afi, ma o le malamalama o Iesu o le Keriso, le Alo Pele e Toatasi o le Atua, ua faaalia mai le agaga o le upumoni. Tatou te tuuina atu i tatou i lenei auauna loto maulalo ua filifilia e le Alii e faataatia le faavae o lenei galuega mo sauniga o le talalelei o le Alo o le Atua, i le taimi lea e lei iloa tele lava e le lalolagi, ina ia mafai ai ona faatasia o tatou aiga, o ituaiga, i lalo o noataga o le feagaiga fou ma le faavavau, mo le olaga nei ma le faavavau atoa.

Ua tatou tuuina atu atoa i tatou i le Perofeta o Iosefa Samita, ua avea o se meafaigaluega i le aao o le Alii, mo le malamalama ua tatou maua o le galuega ua tatau ona faataunuuina i le maota o le Atua, mo le faaolataga o e ola ma le faaolaina o e ua maliliu, ma le toe tuufaatasia e faavavau o agaga ua faatasia i lenei olaga i le mana o le Atua, i lalo o le noataga o le feagaiga fou e faavavau. Ua tatou nofo aitalafu i le Perofeta o Iosefa Samita, o se meafaigaluega i aao o le Atua, i le malamalama ua tatou maua nei e le mafai e se tane, na o ia, ona faaolaina i le afioaga o le Atua ma le atoatoaga o le fiafia o lona mamalu. E lei fuafuaina ina ia nofo toatasi le tane, aua e leai se tane pe a leai se fafine, e leai foi se fafine pe a leai se tane, i le Alii.³

O loo soifua le Atua, ma o Iesu o le Keriso, o le Faaola o le lalolagi. O Iosefa Samita o le perofeta a le Atua—o loo soifua, e le o oti; aua o lona igoa e le mafai lava ona faaumatia. O le agelu na asiasi ia te ia ma folafolaina i ai le feau a le Atua ia te ia, sa fai atu ia te ia o lona igoa o le a iloa i mea lelei ma le leaga i le lalolagi atoa [tagai Iosefa Samita–Talafaasolopito 2:33]. O lenei folafolaga sa faia i le taimi o talavou o ia, ao le i faavaeina le Ekalesia, ae le i i ai se fuafuaga o mea uma ua faataunuuina. Sa faia le folafolaga, ma e foliga mai e le mafai lava ona faataunuuina; ae mai le taimi na fofogaina ai seia oo mai i lenei taimi, ma e mai le taimi nei seia oo i le aso mulimuli o le lalolagi, o le suafa o Iosefa Samita le Perofeta o le sefuluiva seneturi, sa faalauiloa, o loo faalauiloa, ma o le a faalauiloa i atunuu o le lalolagi, ma o le a faaalia le mamalu poo le tauemua e tagata o le lalolagi… ; ona sa ia faia ma o loo ia faia le galuega a le Matai. Sa ia faataatia le faavae i le tisipenisione lenei mo le toefuataiina o mataupu faavae sa aoaoina e le Alo o le Atua, o mataupu faavae sa soifua ai, aoao, ma maliu, ma toetu mai le oti.⁴

I le mea o loo ta’uta’u ai [le igoa o Iosefa Samita] mo le lelei, o i latou na sa maua le faamanuiaga e faalogo ai i le talalelei ua oo mai i le lalolagi e ala ia te ia, ma e sa matua faamaoni ma loto maulalo latou te talia. Latou te ta’uta’u o ia ma le malamalama ua latou maua mai musumusuga a le Agaga Paia, e ala i le usiusitai i mataupu faavae sa ia aoao, o se perofeta ma o se tagata musuia. Latou te ta’uta’u lona paia ma lona mamalu ma e manatua pea lona igoa i le mamalu. Latou te faaaloalogia o ia, ma alolofa ia te ia, e le faapena i isi tagata, aua ua latou iloa o ia o le meafaigaluega filifilia i aao o le Silisiliese i le toefuataiina o le talalelei o le ola ma le faaolataga mo i latou, i le tatalaina o o latou malamalama i le lumanai, i le susueina o le pupuni o le faavavau, e pei ona i ai, mai o latou mata. O i latou ua maua mataupu faavae ua ia folafolaina, ua latou iloa e le gata e tatau ai mo lo latou faaolataga, fiafia ma le filemu, i le faaleagaga ma le faaletino, ae faapea foi mo le manuia, fiafia, faaolataga ma le ola e faavavau o o latou ituaiga ua maliliu ae le malamalama i mataupu o le upumoni.

O le galuega ua faia e Iosefa Samita ua le faapito lea i le na o le olaga nei, ae aofia ai foi ma le olaga a sau, ma le olaga sa i ai. I se isi faaupuga, e faatatau ia i latou sa soifua mai i le lalolagi, mo i latou o loo soifua ma i latou o le a soifua pe a uma i tatou. E le o se mea ua faatatau i le na o le tagata ao soifua i lenei lalolagi i le tino o aano ma ivi, ae mo le aiga uma o tagata mai le faavavau i le faavavau. … Ma o lenei foi e le faapito i se nuu, po o se setete, po o se atunuu, ae faalauaitele atu i atunuu uma, ituaiga, gagana ma tagata.⁵

Ia te au, e matua matautia lava le tele o le ita ua faaalia e le lalolagi faasaga atu ia Iosefa Samita. Sa tutusa tagata uma ia te ia. O au ou te molimau i lena mea, aua ou te iloa lona soifuaga. Sa ou iloa o ia i le tino, ma sa ou faitau i ana saunoaga. Sa ou faitau i le faaaliga sa tuuina atu e le Alii ia te ia. Ou te masani i lana galuega, ma e ou te iloa sa le i faamasino sese e ia se agaga soifua. Sa ia le faamanua ona uso a tagata, ae sa ia faia mea e tele e faaolaina ai i latou. Ae ui i lea, o se mea matautia, o tagata e matua le malamalama ia te ia, ua aupito sili ona ita tele ia te ia, ma i ai lagona inoino e le tatau i tagata ona latou lagona. Na ou fesili ia te au lava. Aisea ua faapea ai? E lē faapea lagona o tagata i tagata taufaasese, po o nisi foi o faalauiloa ma tau atiae se faalapotopotoga fou faalelotu e faia e tagata. Ae o le mea e ese ai, toeitiiti lava a itagia i taimi uma e ta’ua ai le igoa o le Perofeta o Iosefa Samita! E ui e matautia lenei mea mai le vaaiga masani, o loo ogatasi ma le tautinoga sa tuuina atu ia te ia i le amataga e se tasi o avefeau mai le lagi sa auina mai e faatonu o ia. …

… O le faavae o le galuega sa faataatia e le Perofeta o Iosefa Samita sa faavaeina i le upumoni e faavavau. E le mafai ona aveesea. E peiseai o se fale ua fausia i luga o le papa. E oo mai afa, e to mai timuga, e oo mai matagi malolosi, o le a vevesi ia loto o tagata i le ita ma sauaga e faaleaga ai; ae o loo malosi e pei o mauga e faavavau, aua o loo faavae i luga o le upumoni [tagai Mataio 7:24–25]. O le faamaoni, loto mama, amio mama, faatuatua i le Alii o Iesu Keriso ma lona toetu, usiusitai i tulafono a le Atua o mataupu faavae maualuga ia o lo tatou talitonuga. Tatou te iloa e moni mataupu faavae.⁶

O le Muai Faaaliga ia Iosefa Samita o se mea sili ona taua talu mai le Toetu o le Faaola.

O le mea sili ona taua ua tupu i le lalolagi, talu mai le toetu o le Alo o le Atua mai le tuugamau ma lona aveina ae i le lagi, o le oo mai o le Tama ma Lona Alo i le tama o Iosefa Samita, e saunia le ala mo le faataatiaina o le faavae o lona malo—e le o se malo o le tagata—e le taofia ma liliuina. Ina ua talia lenei upumoni, sa faigofie ia te au ona talia o mea moni uma lava ua ia tauina mai ma folafola mai . … Sa le i aoao mai e ia se mataupu faavae sa le i moni. Sa le i ola o ia i se mataupu faavae sa le i poloaiina o ia e ola ai. Sa ia le faia se sese. Sa le faaseseina o ia. Sa ia vaai; sa faalogo; sa faia e pei ona poloaiina ai o ia e fai; ma, o lea, o loo pule le Atua i le galuega ua faataunuuina e Iosefa Samita—e le o Iosefa Samita. O loo pule le Alii i lenei, ae le o se tagata.⁷

I le tau totogo o le 1820, sa maua ai [e Iosefa Samita] le uluai faaaliga faalelagi. Sa sefulufa ona tausaga i le taimi lea. O le mea moni tatou te le faamoemoe tele i ni mea e fai e se tamaitiiti ua na o le sefulufa ona tausaga, ae foliga mai foi o le tamaitiiti laitiiti faapea e lē amio paaa ma leaga, aemaise ai lava pe afai sa fanau ma ola mai i se faatoaga, e ese mai mea faafatiatama’i o aai, ma leai se fesootaiga ma le matautia o le amioleaga. E le i foliga mai sa tele sona taimi sa faaalu lē aoga i tausaga sa galue ai o lona soifuaga seia oo i le sefulu fa tausaga; aua o lona tama sa galue mo le tausiga o le aiga ma maua mai le eleele i galuega a ona lima, o se tagata mativa ae toatele lona aiga e tausi.⁸

E uiga i lana faaaliga faaleagaga, e mafai ona faapea sa faaseseina i ni uluai lagona o le tama, aemaise se tamaitiiti e faapei o ia, i lana faamatalaga faigofie i le mea na ia vaai ma faalogo i ai? Leai; e le mafai ona fauina i le mafaufau o le tamaitiiti lava ia ia le tali na tuuina mai e avefeau mai le lagi ia te ia. O le molimau a Iosefa Samita e uiga i lana faaaliga faalelagi, mulimuli ane i lona soifuaga, sa faigofie, tuusao, ma moni, e pei ona i ai i le taimi o itiiti o ia; o le lototele, ma le alofa ua totoina ma ua avea ma vaega o lona soifuaga a o itiiti ma sa le i suia ina ua matua. O lona poto na oo mai i le faaaliga mai le Atua ia te ia.⁹

O e na faitio na faapea mai o se ata faalemafaufau sa vaai i ai le Perofeta o Iosefa, ae sa le i fai mai ai o ia. Na ia faapea mai o tagata sa faaali mai ia te ia o tagata moni . … Ua oo mai ia i tatou le tala o le fanau mai, soifuaga ma galuega a Keriso, ma e leai ma se mea o i le faamatalaga e ao ai ona tatou talitonu ese mai le tala a le Perofeta o Iosefa Samita. Sa femaliua’i Keriso ma talanoa ma fefautuaa’i ma ana uo ina ua afio mai o Ia mai le lagi, ua silia nei ma le 1900 tausaga talu ai. E i ai ea se mafuaaga e le mafai ai ona le toe sau o ia, aisea e le toe asiasi mai ai i lenei lalolagi ma talanoa ma tagata i nei aso? Afai e i ai, o le a ou fiafia e faalogo i ai. O le mea ou te manao ou te faamamafa atu ia te outou, o le Atua e moni, e i ai le tino o aano ma ivi, e faapei foi o oe ma au. O Keriso e faapena foi, ae o le Agaga Paia o le peresona o agaga.¹⁰

Sa Faaliliuina e le Perofeta o Iosefa Samita le Tusi a Mamona e ala i le meaalofa ma le mana o le Atua.

Ina ua i le va o le 17 ma le 18 tausaga [o Iosefa Samita], sa ia maua se isi faaaliga faalelagi, ma sa faaali mai ia te ia nisi o mea tautaua ma le matagofie, ma mo le fa tausaga mulimuli ane sa ia maua ia asiasiga mai se avefeau mai le lagi . … O le tagata lenei, sa ia faapea mai ai, sa faaali mai ia te ia le mafaufau ma le loto o le Alii, ma sa faaali ia te ia le uiga o le galuega tele, i lalo o aao o le Atua, o le a fai ai o ia ma meafaigaluega i le faataunuuina i le lalolagi pe a oo mai le taimi. O le galuega lenei sa faia e le agelu o Moronae, i le fa tausaga i le va o le 1823 ma le 1827. I le 1827 sa ia mauaina ai mai aao o le agelu o Moronae, papatusi auro ia sa faaliliuina mai ai e ia lenei tusi [Tusi a Mamona] e ala i le musumusuga a le Silisiliese ia te ia, ma le meaalofa ma le mana o le Atua.. …

Sa i ai ea se avanoa ia Iosefa Samita e avea ai o se tagata leaga i le va o le 1827 ma le 1830, a o galue o ia i ona lima mo nai mea mo le tausiga o lona soifua, tetee atu i ona fili, ma taumafai e sola ese mai ia i latou o loo saili e faaleaga ia te ia ma taofia ai le faataunuuina o lana misiona, ao taumafai pea e tali atu i le tele o faalavelave lē maalofia ma le faanoanoa i le ma le tau faamae’aina o le faaliliuina o lenei tusi? Ou te le manatu sa i ai ia te ia. Ina ua maea ona ia faaliliuina le Tusi a Mamona ua na o se tama lava o ia, ae peitai, i le tuufaatasia o lenei tusi sa ia faapotopotoina ai mea moni o le talafaasolopito, valoaga, faaaliga, faamoemoega, molimau ma mataupu faavae, mataupu ma mataupu autu e sili ae i le mana ma le atamai o tagata aoaoina. O Iosefa Samita o se talavou e le i aoaoina lelei, e tusa ai ma aoaoga o lenei lalolagi. Sa aoaoina o ia e le agelu o Moronae. Sa ia maua ana aoaoga mai luga, mai le Atua Silisiliese, ae lē mai a’oga e faia e le tagata; ae o le fāifāi o ia e valea ua le talafeagai ma sese; e leai se tagata poo se tuufaatasiga o ni tagata e sili atu lo latou atamamai nai lo ia, e oo foi i le tuufaatasia o le atamai ma le poto o tagata na latou soifua faatasi e tali tutusa ma mea na ia faia. E lē valea o ia, aua sa aoaoina o ia e Lē o loo aumai ai le poto uma. Sa ia te ia le poto o le Atua ma lana tulafono, ma le faavavau.¹¹

O le Tusi a Mamona sa faaliliuina e le meaalofa ma le mana o le Atua, e ala i le atamai o le alii talavou; ae le o se tagata aoaoina, o se tagata tusitala aoaoina lelei, ae sa faia e se tama e lei aoaoina lelei, e leai se poto faalelalolagi, e leai se agasala. Ma o lena tama e lei aoaoina lelei, leai se poto faalelalolagi, leai sana agasala, o Iosefa Samita lava lea. E leai sona atamai, o le poto poo sona lava tomai faapitoa e faaliliu ai i le Gagana Peretania ia tusitusiga na i luga o le papatusi sa tanumia e tagata anamua o lenei konetineta. Sa ia le faapea mai sa ia faaliliuina nei tusitusiga anamua i lona lava poto. Ae, sa ia tausisi sa ia faia i le meaalofa ma le mana o le Atua sa ia te ia.¹²

Sa faia e le Perofeta mea e sili atu mo le faaolataga o le tagata i lo se isi na soifua mai, sei vagana ai Iesu.

Sa talaia [e Iosefa Samita] ia fesootaiga ma le lagi i lona talavou. Sa ia aumaia le Tusi a Mamona, o loo i ai le atoatoaga o le talalelei; ma faaaliga o loo i le Tusi o le Mataupu Faavae ma Feagaiga; sa toefuataiina mai le Perisitua paia i le tagata; faatuina ma faatulagaina le Ekalesia a Iesu Keriso o le Au Paia o Aso e Gata Ai, o se faalapotopotoga e lē faatusalia i le lalolagi atoa, ma o loo i ai le poto ma le atamai o tagata i le tele o tausaga ua le mafai ona maua ma faia se mea, ma e le mafai lava. Sa ia faatuina ia kolone i le setete o Niu Ioka, Ohio, Misuri ma Ilinoi, ma faasino le ala mo le faapotopotoina o le Au Paia i le Mauga Papa; auina atu le talalelei i Europa ma motu o le sami; sa ia faatuina le taulaga o Katelani, Ohio, ma sa fausia ai le malumalu e faitau fia afe tala lona tau; sa ia faatuina le aai o Navu i le taulotoa’iga o sauaga; sa faapotopoto i Navu e tusa ma le 20,000 tagata, ma amatalia le fausiaina o le malumalu iina, ina ua maea ona fausia e tusa lona tau ma le tasi le miliona tala; ma i le faia o nei mea uma sa ia fetaia’i ma le faamaualuga o tagata matutua, fetaia’i ma sauaga, o vaega faatupu faalavelave, ma le taufaaleaga ma le suesue masei, ua faaputu mai i ona luga mai le tele o tagata eseese ua le faatuaoia. I se faamatalaga puupuu, ua sili atu ana mea na fai mai le sefulufa i le luasefulu o ona tausaga mo le faaolataga o tagata nai lo se isi lava tagata ua soifua mai, vagana ai o Iesu [tagai MFF 135:3], ae sa tauleagaina o ia e ona fili o se tagata paie ma le le aoga!

O fea tatou te o e saili ai se tasi tagata ua ia ausia le tasi vae afe o vaega o le lelei sa ausia e Iosefa Samita?… E leai se tasi i le senituri sefuluiva, sei vagana o Iosefa Samita, sa faailoa mai i le lalolagi le malamalama e uiga i ki ma le mana o le Perisitua paia, poo sauniga o le talalelei, mo e o loo soifua poo e ua maliliu. E ala ia Iosefa Samita, ua faaalia mai e le Atua le tele o mea sa tanumia mai le faavaeina o le lalolagi i le atoatoaga o fetalaiga a perofeta . … Ma o loo faatumauina tonu lava i le faamoemoega ma le uiga o lana galuega i aso e gata ai, ua faatulagaina e faaleleia le faamoemoega sili ma fuafuaga a le Atua e faatatau i le tisipenisione o le atoaga o taimi.¹³

O Iosefa le Perofeta … sa avea ma auala, i le galuega mana a le Atua, e toefuataiina mai ai le upumoni tuai o le faavavau o le talalelei a Iesu Keriso, o le ata o le faaolataga, e matua atu nai lo le fanauga a tagata. E moni foi, o ana aoaoga e fou i tagata o ona taimi aua sa latou liliuese mai le upumoni—a o mataupu faavae o le talalelei o le upumoni sili ona leva o loo i ai. Sa fou i le augatupulaga a Iosefa, e pei foi ona i ai i se vaega o i tatou, aua sa o ese tagata, ua felafoaiina e pei o peau, ma feaveaiina i matagi uma lava o mataupu i le pepelo o tagata— ua taua o tagata e talitonu i mataupu fou—ua alualu i luma. O le mea lea ua fai ai le Perofeta o Iosefa Samita ma lē e toefuataiina, ae lē o lē e faatamai, o le upumoni tuai. Ma e le avea lea e fai ma mea tatou te faatuatuanai ai le faigofie o mataupu faavae taua o le talalelei ae mulimuli vave atu i faiga ma manatu fou.¹⁴

Ou te folafola atu ia te outou i le faamaoni atoa, ma le naunautaiga atoa o le agaga, ou te talitonu i lo’u loto atoa i le mana o le misiona a Iosefa Samita, le Perofeta, ua ou talitonu i vaega uma o lo’u tagata sa saunia o ia e le Atua na te toefuataiina i le lalolagi le talalelei a Keriso, aua o le mana lava lea o le Atua e ola ai. Ou te molimau atu ia te outou o Iosefa Samita sa faaaupegaina i le aao o le Alii i le toefuataiina mai o le upumoni a le Atua i le lalolagi, ma e faapea foi ma le Perisitua paia, o lana pule ua faamatuu atu i le tagata. Ou te iloa e moni lenei, ou te molimau atu ai ia te outou. Ia te au o le atoaga lea; o lo’u ola lea, o lo’u malamalama lea; o lo’u faamoemoe, ma lo’u fiafia; e aumaia le faamaoniga sili ia te au o le faaolataga, mo lo’u toetu mai le oti, faatasi ma i latou ou te alofa i ai ma faapelepele i ai i le olaga, ma e sa ou mafuta i ai i lenei lalolagi—alii mamalu, mama, loto maulalo, o e sa usiusitai i le Atua ma ana poloaiga, o e sa le mama i le talalelei a Keriso, poo lo latou talitonuga poo le malamalama i le upumoni o le talalelei; o alii sa sauaina, ma e sa tuuina atu i latou i soo se taimi e oo lava i o latou ola mo Keriso, ma le talalelei, pe a tatau ai, sa latou talia ma le molimau a le Agaga Paia i o latou loto. Ou te manao ina ia faatasia ma nei alii pe a mae’a la’u tausinioga iinei. A maea la’u misiona iinei, ou te faamoemoe ou te oo atu i le lalolagi o agaga o loo i ai i latou, ma toe faatasia ma i latou. O le talalelei lenei a le Alo o le Atua o loo aumai ai ia te au le faamoemoe o loo ia te au mo lenei faatasiga, ma le faataunuuina o lo’u manao i lenei ala. Ua tuuina atu a’u atoa i lenei talalelei, ma e ou te le i faia i se faalialia vale. Ou te iloa lē ou te faatuatua i ai. Ua ou iloa o loo soifua lo’u Togiola; o aso amuli foi e tulai mai ai o ia i luga o le fogaeleele.¹⁵

O Fautuaga mo Suesuega

O a ni auala sa avea ai Iosefa Samita “o se meafaigaluega i le aao o le Alii”? O a ni auala ua faamanuiaina ai oe i mea ua faaali mai e le Alii e ala mai i le Perofeta o Iosefa Samita?
Aisea e taua ai le i ai o le molimau o Iosefa Samita o le perofeta a le Atua i lenei tisipenisione?
O a ni mataupu moni taua sa aoao mai e Iosefa Samita mai le Muai Faaaliga? O a ni mataupu moni taua ua e aoao mai le Muai Faaaliga? E faapefea ona avea le molimau o le Muai Faaaliga e fai ma faavae e talia ai isi mataupu moni o le talalelei?
Aisea e taua ai le iloa o le Tusi a Mamona “sa faaliliuina i le meaalofa ma le mana o le Atua”?
O a nisi o auala sa iloa ai o Iosefa Samita sa sili atu mea na ia faia “mo le faaolataga o tagata nai lo se isi lava tagata, vagana ai Iesu”?
Aisea e taua ai le iloa o le Perofeta o Iosefa Samita “o le fuatai, ae le o se faatamai, ia mataupu moni tuai”?
E faapefea ona faamalosia oe e ala i le galulue faatasi ma alii, tamaitai, poo tamaiti o e malolosi a latou molimau ma e “le mama i le talalelei a Keriso”? E faapefea ona tatou faamalolosi i isi ia latou molimau?
O le a se mea e sili ona e fiafia i ai i le molimau a Peresitene Iosefa F. Samita i le Perofeta? O le a sa oe molimau i le mana o le misiona a le Perofeta o Iosefa Samita?

Joseph Smith — Sa ta’utino mai e Peresitene Iosefa F. Samita o le Perofeta o Iosefa Samita o “le meafaigaluega ua filifilia e le Atua ma faamanuiaina i lana pule e toefuataiina mai le Perisitua paia” (*Mataupu o le Talalelei*, 478).