O le Avea ma Tagatanuu Faamaoni

E ao ona tatou usitaia le tulafono a le Atua ma tagata, faamamalu lo tatou auai i le Ekalesia ma le avea ai ma tagatanuu i le atunuu o loo tatou ola ai.

Mai le Soifuaga o Iosefa F. Samita

O le soifuaga faaletagata o Peresitene Iosefa F. Samita o se faataitaiga o se tagatanuu lelei ma le auaunaga i lona nuu. Sa auauna o ia o se faitulafono i le Aufono o le Teritori o Iuta mo ni vaitaimi eseese mai le 1865 seia oo i le 1882; sa ia auauna i le aufono a le aai i le 1867; sa avea o ia ma se sui o le aufono sa tusiaina le faavae o le setete o Iuta.

O Peresitene Samita, o le sa vaai tino i le matautia o tagata faatupu faalavelave i Navu, sa masani ona saunoa i le taua o le tausia o le tulafono i se atunuu malamalama. O ia ma ona fesoasoani i le Au Peresitene Sili sa latou uunaia le Au Paia ina ia tausia le tulafono ma avea ma tagatanuu faamaoni poo fea lava o nonofo ai, ma ia faamaoni i la latou tautinoga i lo latou malo.¹ I se tasi o tulaga ina ua faaalia e se ofisa o le malo le lē ava i le Faavae o le Iunaite Setete, sa faaalia ai e Peresitene Samita: “E le mafai e tagata o le Au Paia ona talia lenei ituaiga agaga. E leai se pulega faautauta. O lona uiga o le faatamaiaina. O le agaga ina ia pulea e tagata faatupu faalavelave, ma ua silafia e le Alii ua lava lo tatou pagatia mai le taitaiina e tagata leaga, ma e tatou te lē toe manaomia nisi tulaga faapena. … E le mafai ona tatou usitai i lena agaga pe fesoasoani i ai i soo se tulaga. E ao ona tatou tulai ma le mausali e faasagatau atu i agaga uma poo vaega e lē matatau ma lē faaaloalo i le faavae o lo tatou atunuu ma tulafono faavae o lo tatou laueleele.”²

Aoaoga a Iosefa F. Samita

E faamaoni tagata o le Au Paia i o latou atunuu

Ia tatou faia le mea sa’o, tausi i tulafono a le Atua, ma tulafono a tagata, faamamalu lo tatou auai i le malo o le Atua, o tatou tagatanuu… i le atunuu o loo avea ai i tatou o se vaega, ma o le a talia ma faatumauina i tatou e le Atua, ma o le a faaauauina ona tatou alualu i luma e pei ona tatou faia mai le amataga, ma o le a faatele’a’i lo tatou agai i luma ma o le a sili maoae nai lo le mea sa i ai i le taimi ua tuanai.³

Aoao a outou fanau ina ia faamamalu i le tulafono a le Atua ma le tulafono a le setete, ma le tulafono a lo tatou atunuu. Aoao ina ia latou faaaloalo ma faamamalu ia i latou ua filifilia e tagata e fai ma o latou taitai e faia le faamasinoga tonu ma taitaiina le tulafono. Aoao ia latou faamaoni i o latou atunuu, faamaoni i le amiotonu ma le ola i le mea sa’o ma le mamalu, ma o iina o le a latou ola ai e avea o ni alii ma ni tamaitai ua sili ae i luga o alii ma tamaitai uma o le lalolagi.⁴

I le avea ai o se tagata o le Au Paia i gaoioiga uma o le avea lea ma se tasi o tagata silisili o le Atua poo fanau i le lalolagi. … O se tagata lelei o le Au Paia o le a avea ma tagatanuu lelei, e tusa lava poo ia o se tagatanuu o Peretania Tele, le Iunaite Setete, Holani, Siamani poo soo se atunuu i le lalolagi. Afai o ia o se tagata lelei o le Au Paia e ao foi ona avea o ia o se tagatanuu lelei o le laueleele na fanaua mai o ia pe ua filifilia foi e avea nei ma ona aiga. … O se tagatanuu o le malo o le Atua e ao ona tu malosi e avea o ni tagata silisili o tagata o le Atua i le lalolagi aoao.⁵

Ou te tatalo e le gata mo le manuia o Siona, ae mo le manuia o lo tatou atunuu. E ao ona tatou manatua pea e le gata o i tatou o ni tagatanuu o le malo o le Atua, ae o tatou o tagatanuu o le. … setete o loo tatou nonofo ai. Ia tatou faamaoni pea lava pea i lo tatou setete ma lo tatou atunuu, e faapena foi i le Ekalesia a le Atua. … Ua tatou naunau e tau le taua mo lo tatou atunuu, e puipui i lona mamalu, e faatumauina lona igoa matagofie, ma ua tatou fautuaina ina ia faaauau i lenei faamaoni i lo tatou atunuu ma o tatou tagata e oo i le iuga.⁶

Afai o le lotonuu ma le faamaoni o uiga faaalia i taimi o le filemu, e ala i le tonu, manuia, agalelei, agaga atiae ma le ola mama; i taimi o tofotofoga, e ala i le onosai, tetee atu i le na o ala o le tulafono i mea sese o loo tutupu, ma le usiusitai lea i le tulafono o le laueleele, e ui lava o loo i ai le tiga ma le faanoanoa; ma i le taimi o taua, e ala i le naunautai e tau i le taua o le atunuu,— ona, lē fesiligia lea, o tagata “Mamona” e lotonuu ma faamaoni.⁷

Ia faamanuia le Alii le Atua Silisiliese ia te outou. Ua tumu lo’u loto i faamanuiaga mo tagata o le Au Paia. Ma lo’u loto atoa, ou te alofa i le tagata, ua ou iloa o se tagata o le Au Paia e faamaoni, amio sao, moni, ma le faatuatua. O se tagata ua faamatalaina faapenei o se tasi o tagatanuu silisili i soo se atunuu; o ia o se tagatanuu lelei o soo se aai, o soo se atunuu, o soo se setete, poo soo se atunuu poo fea lava le mea o i ai; ma o ia o se tasi ua silisili. O se tagata moni o le Au Paia o se tane po o se toalua lelei, o ia o se tamā lelei, o ia o se tuaoi lelei, o ia o se tagatanuu lelei, ma o ia o se tagata lelei i ona itu uma.⁸

O le amiotonu e faaeaina ai le nuu

O le fale masani o “Mamona” o le malumalu lea o le aiga. … O iinei e aoao ai ma faamalosia lemu ai, mataupu i le ola mama ma le upumoni o le talalelei, pe a tuu faatasia, e maua ai le amiotonu ua faaolaina ai se atunuu, ma puipuia mai ai lena agasala ua avea ma faaleaga i soo se tagata. … O o tatou atalii ma afafine nei, ua tuuina atu i latou i soo se suega faatusatusa e te manao i ai; le uiga mo le upumoni, ia matau i e matutua, faaaloalo i le Atua, alofa i tagata, faamaoni i le atunuu, tausia o le tulafono, faaleleia o uiga, ma le mulimuli, … o le mama o le mafaufau ma le nofo mama i amioga. E le o se fia viia o le tagata lava ia e faapea atu ai i augatupulaga o o tatou tagata, ua soifua ma tausia i aiga “Mamona” o le a faatusatusa lelei i latou i amioga mama faa-Kerisiano, ma o ia mea uma e avea ai ma tagatanuu lelei, i soo se nuu i lenei atunuu poo isi foi.⁹

O le “Faa-Mamona” ua i ai i le lalolagi mo le lelei o le lalolagi. O le aoaoina pea lava pea o le upumoni, o le ola mama, o le puipuia o le mama o le aiga, faaaloalo i e ua i ai le pule ma le malo, atinaeina o aoaoga, ma le faaolaina o le alii ma le tamaitai, ua faatamaia e lo tatou talitonuga ia mea leaga ma o se fili i le pulega lē i soo se ituaiga. E saili e le “Faa-Mamona” ina ia siitia malo, ae lē o le faatamaiaina.¹⁰

O se tagata lelei o le Au Paia o se tagatanuu lelei i tulaga uma. Ou te manao e faapea atu i alii talavou o lo tatou nuu: ia avea o ni tagata o le Au Paia e fai ma faataitaiga lelei, ma ia leai se mea e faalavelavea ai outou mai le manaomia i tulaga maualuluga ua faaavanoa mai e lo tatou atunuu. Pe a maua lea avanoa, ia avea lau amio mama, lau amiotonu, lou faamaoni, lou tomai, au aoaoga faalelotu, na toto i totonu o outou loto i le tausiga a o outou tina “Mamona” na galulue punoua’i, “ia faapea ona susulu atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le lagi.” [Mataio 5:16.]¹¹

Ia faamanuia e le Alii lo tatou malo ma taitaiina i latou ua i ai le pule i o latou lima ina ia faia le amiotonu, fiafia ma talia gofie i luma o le Atua.¹²

Tatou te tumau i mataupu faavae o le tuueseese o le Ekalesia ma le malo.

O tagata o le Ekalesia ua poloaiina mai i faaaliga mai le Lagi… ; “Aua nei solia e se tasi tulafono a le malo, aua o lē tausia tulafono a le Atua e le aoga ia te ia ona solia tulafono a le malo.” [MFF 58:21.]¹³

E tusa ai ma tulafono a le Ekalesia, ua faamanino mai e faapea: …

“Faauta, o tulafono ua outou maua mai ia te au o tulafono ia a le Ekalesia, ia faapea foi ona outou tausisi i ai.” [MFF 58:23.]

O lona uiga, e leai se tulafono poo se poloaiga e faia, poo se faaaliga ua maua e le Ekalesia, ua faamanino mai mo le malo. O nei tulafono ma faaaliga e pei ona tuuina mai ua na o le taitaiina o le Ekalesia.

O le Ekalesia a Iesu Keriso o le Au Paia o Aso e Gata Ai ua tumau i le mataupu o le tuueseeseina o le ekalesia ma le malo; o le lē aia o taitai o le ekalesia i mea faalemalo; ma le saolotoga atoa ma le tutoatasi o tagata taitoatasi i le faataunuuina o ona tiute faale-malo. Afai e i ai se taimi ua i ai se amioga ua ese mai lenei mataupu, ua solia ai loa le mataupu ua uma ona faatulagaina lelei ma le faavae o le Ekalesia.

Matou te tautino atu mai mataupu ma faavae, ua matou talia: Le matua tuueseeseina o le ekalesia mai le malo; E le pulea mai e le ekalesia ia le malo; E leai se aia a le ekalesia i gaoioiga a le malo; E leai se aia a le malo i gaioiga a le ekalesia, poo le saolotoga e tapuai ai i lotu; O le saolotoga atoa o le tagata mai le pulea e taitai faale-ekalesia i mataupu tau i le malo; O le tutusa o ekalesia uma i luma o le tulafono.¹⁴

E lē aia le ekalesia i tulaga faaupufai; o ona tagata e auai i vaega faaupufai i lo latou lava faitalia. … E le fesiligia i latou, pe manaomia foi, e palota i le auala lenei poo lena. … Ae le mafai ona aveesea la latou aia o ni tagatanuu, ma e leai se mafuaaga e alagatatau ai, aua, i le averesi, ua tutusa lo latou faamaoni, faaloalogia, aoaoina lelei, amiotonu, poto masani, amio mama, ola mama, faaeteete, ma agavaa i isi uma tulaga e faapei o soo se tagata o le atunuu, poo le lalolagi.¹⁵

Ia tatou usiusitai i e o pule seia nofo tupu le malo o le Atua

O le Tusi Paia, o se tasi o tusi faavae o le “Ekalesia” Mamona, ua faatumulia i valoaga ma folafolaga i le faatuina o le tulafono Paia i luga o le fogaeleele; o le toe oo mai o le nofo tupu o le amiotonu e oo atu i vaega uma o le kelope. O le Keriso o le a avea ma Tupu ma o atunuu uma ma tagata e auauna ma usiusitai ia te ia. O le Malo moni lena o le Atua. O le Ekalesia a Iesu Keriso o le Au Paia o Aso e Gata Ai ua faatulagaina e saunia ai mo lena Malo. O lana talalelei o le “talalelei o le malo.” O ona mataupu, sauniga, pulega ma meaalofa e afua mai le lagi. O lea ua avea ai o le “malo faaleagaga o le lagi,” o loo i ai i totonu le aafiaga ma le mana o le a tatala ai le ala mo le faataunuuina o valoaga e faatatau i le pulea aoao o le Alo o le Atua.¹⁶

O nisi o taimi ua faasino mai ai, o tagata o le Ekalesia o loo vaai i le oo mai o le malo o le Atua i le lalolagi, o le a faapotopoto ai malo uma o le lalolagi i le malo vaaia tele e tasi, o le a nofo tupu ai le Mesia toetu.

O nei mea uma, ua faia, ua faigata ai i se tagata “Mamona”ona tuuina atu le lotonuu moni i lona atuunuu, poo soo se atunuu i le lalolagi.

… Tatou te teena e faapea o lo tatou talitonuga i faaaliga mai le lagi, poo lo tatou faatalitali i le oo mai o le malo o le Atua o le a faaitiitia ai i soo se tulaga le faamaoni o lo tatou lotonuu i lo tatou atunuu. Afai o le a faatuina le malo mamalu, atonu o le a le mafai loa ona tatou toe iloa nai lo isi tagata Kerisiano o loo tatalo, “Ia oo mai lou malo, ia faia lou finagalo, i le lalolagi e pei ona faia i le lagi;” [Mataio 6:10] aua ua tatou iloa ua faamalosia lo tatou lotonuu ma le faamaoni i lo tatou atunuu ona o lea mafuaaga, ao tatou faatalitali i le toe oo mai o le malo o le Mesia, ua tatou i lalo o le poloaiga mai le Atua ina ia usiusitai i le mana o loo i ai, seia afio mai o ia “o i ai le pule e nofo tupu ai.” [MFF 58:22.]¹⁷

Fautuaga mo Suesuega

Aisea e ao ai i tagata o le Au Paia ona faamaoni i le atunuu o loo nonofo ai? (Tagai MFF 134:5.) E faapefea ona tatou faaali atu le faamaoni ma le ava i lo tatou atunuu e ui ina tatou le talitonu i nisi o faigamalo?
E faapefea ona tatou aoao ia tatou fanau ina ia avea o ni tagatanuu lelei?
O a a tatou matafaioi o ni tagatanuu? Aisea e alagatatau ai i se tagata o le Au Paia faatuatua ona avea “o se tasi o tagatanuu sili ona lelei i soo se atunuu”?
E faapefea e le amiotonu faaletagata ona faaolaina ai le atunuu? Aisea o le amiotonu faaletagata o se elemene po o se uiga taua o se tagatanuu lelei? O le a le vaega e ao ona faataunuu e le amiotonu faaletagata i soifuaga o i latou o loo saili poo umia tofiga faalemalo?
E faapefea ona fesoasoani le tuueseeseina o le ekalesia ma le malo i tagata e faataunuu ai o latou talitonuga faalelotu? (Tagai foi MFF 134:7, 9.) Aisea e taua ai ona i ai o le saolotoga o tagata taitoatasi mai le pulega faale-ekalesia i mataupu faalemalo?
O le a le malo o le Atua o le a oo mai, ma o ai e usiusitai i lenei malo?