Ou Te Iloa o Loo Soifua Lo’u Faaola

E ala i le molimau a le Agaga Paia, e mafai ai e i tatou taitoatasi ona iloa o Iesu o le Keriso, o le Alo o le Atua soifua.

Mai le Soifuaga o Iosefa F. Samita

E sili atu i le afa senituri, sa auauna ai Peresitene Iosefa F. Samita o se molimau faapitoa o le Faaola a o avea ma se Aposetolo, o se Fesoasoani i le Au Peresitene Sili, ma se Peresitene o le Ekalesia. O lana molimau—e pei ona laugaina mai le pulelaa, i le aiga ma nuu mamao, i aufono a le Ekalesia, ma i le li’o o lona lava aiga—sa ta’ua ai le loto ma le agaga ua tuuina atu atoa ia Iesu Keriso ma Lana talalelei matagofie. O ana faaupuga e susua, o lana savali e manino: “Ou te manao ou te faapea atu o se auauna a le Atua, e ese mai molimau a tagata uma ma tusi uma ua mae’a ona tusiaina, ua ou maua le molimau a le Agaga i lo’u lava loto, ma ou te molimau atu i luma o le Atua, agelu ma tagata, e aunoa ma le fefe i taunuuga, ou te iloa o loo soifua lo’u Faaola, ma o le a ou vaai ia te Ia ma faafesagai ma Ia, ma tu faatasi ma Ia i lo’u tino faaolaina i luga o le fogaeleele, pe afai ou te faatuatua; aua ua faailoa mai e le Atua lenei mea ia te a’u. Ua ou maua lea molimau, ma e ou te faia la’u molimau, ma e moni lava la’u molimau.”¹

I le iuga o lona soifua, o se sauniga faapitoa i le tuugamau sa faia i le Fanua Maliu i le Aai o Sate Leki, sa lagiina ai e le Aufaipese a le Tapeneko se tasi o ana pese e fiafia i ai, “Ua Ou Iloa Lo’u Fa’aola.”O lenei fasi fuaitau ia te ia, o se mea taua o lona faatuatua ma autu o lana savali faaperofeta: “Ou te iloa o loo soifua lo’u Faaola. Ou te lagonaina i vaega uma o lo’u tino. Ua matua faatalitonuina a’u i ai e pei ona ou iloa o loo ou ola. E le sili atu le faamaonia o lo’u lagona ia te au lava nai lo lo’u iloa o loo soifua lo’u Faaola.”²

O le molimau o loo ta’ua i lalo sa aumai mai se saunoaga sa faia e Peresitene Samita i le konafesi a le Siteki o Weber i le aso 18 o Oketopa 1896.³

O Aoaoga a Iosefa F. Samita

O le soifuaga ma aoaoga a le Faaola o faamaoniga ia o Lona paia.

Ua tatou iloa lelei le talaaga o lo tatou Faaola e pei ona faamauina i le Feagaiga Fou; i Lona fanau mai i se taupou; sa Ia soifua mai i le lotolotoi o ona uso ma avea ma tagata matua, o mea ofoofogia sa Ia faia a o itiiti o Ia e ala i le mana o Lona faauuina ma le misiona; i Lona aoao atu i aoao o le tulafono ma aoao i le sunako ma le malumalu, ma le auala na Ia faapogisa ai i latou na sailiili e faasalaina o Ia ona o Lana upu. Ua tatou masani uma i le mana ua Ia faaalia i le faamaloloina o e mamai, i le faapupulaina o tauaso ma faafaalogo e ua tutuli, ma le faamamaina o le lepela, ma le pipili na toe osooso ma le fiafia.

Ua tatou masani i mataupu faavae ua Ia aoao; ma e foliga mai ia te au e le toe manaomia nisi o faamaoniga i le mana o Iesu Keriso nai lo le mataupu faavae ua ia aoao e ao i tagata ona alolofa atu i e ua ita mai ma faasaua ia i latou, ma ia taui atu le leaga i le lelei. E oo mai i Lona taimi, o le mataupu sa aoaoina i le lalolagi e faapea, “e sui le mata i le mata, ma le nifo i le nifo.” [Mataio 5:38.] O le filosofia lena o lea vaitau. Ae sa aoao sa’o mai e Iesu le faafeagai o lea tulaga. Sa Ia faatonu i Ona soo e le tatau ona latou taui atu le leaga i le leaga, ae ia latou taui atu le leaga i le lelei. “Ai se na te po mai i lou alafau taumatau, ia e liliu atu ia te ia le isi.” [Mataio 5:39.] O lenei mataupu faavae e fou i le lalolagi. O le mataupu faavae e lē tusa ai ma le natura o le tagata pa’ū. … O lea, e lē a le tagata lea. E le mafai e tagata ona aoao lenei mataupu faavae ma faaaoga i o latou olaga e aunoa ma le musumusuga ma le mana mai luga.

“Amuia e loto maulalo; aua e o latou le malo o le lagi.

“Amuia e faanoanoa; aua e faamafanafanaina i latou.

“Amuia e agamalu; aua e fai mo latou tofi le nuu

“Amuia e fia aai ma fia inu i le amiotonu, aua e maoona i latou.” [Mataio 5:3–6.]

Faitau le Lauga i luga o le Mauga [tagai i le Mataio 5–7], ma fesili ifo ia te oe lava pe le sili ma maoae i lo mea uma ua aoaoina e le tagata. Ua faamautu mai e lenei mea lo’u talitonuga o Iesu ua lē na o se tagata, ae o Ia o le Atua ua faaalia i le tino. O le mataupu faavae lenei o le ola e faavavau, pe afai e ola ai le tagata e le oti lava ia; afai e savali ai e savali o ia i ala fiafia; ma afai o le a usitai i ai o ia, o le a ia iloa le upumoni, ma o le a tuusaoloto o ia i le upumoni.

Ona tatou oo mai lea i le aso o lona faamasinoga, o se tasi sa ia filifilia o se Aposetolo ma se molimau ia te Ia ua liua o se faalata ma ua ia faalata le Alii i Ona fili. Sa latou o mai ma pelu ma uatogi e pue ai le tagata o le filemu, le tagata sa taofia le faasaua, sa le siisii lona siufofoga poo lona aao e faasaga tau i le amiotonu ma le lelei, pe faasaga tau i soo se tagata lava, sei vagana ai le faasaga tau atu ia latou faiga leaga ma le tiapolo—sa latou o mai e ave faapagota o Ia ma tuuina atu o Ia i se faamasinoga, ina ia latou saili ai se mafuaaga latou te faasala ai o Ia i le oti.

I se tasi o avanoa, a o aoao atu e Ia tagata i mataupu faavae sa’o ma molimau atu o Ia o le Alo o le Atua, sa latou fetogi ia te Ia i maa. Sa tali atu Iesu, “E tele galuega lelei ua ou faaalia ia te outou mai lou Tama o le fea ea o ia galuega ua outou fetogi mai ai ia te au?” [Ioane 10:32.] E leai se galuega leaga ua Ia faia ia te i latou; o mea uma sa Ia faia e lelei; ae peitai ua latou saili e fasioti ia te Ia. Ina ua se’i e Peteru lana pelu ma tipiesea le taliga o le auauna a le faitaulaga sili, sa faaseā Iesu ia te ia ma faapea atu, “Toe sulu lau pelu i lona faamoega: aua o i latou uma o e tago i le pelu, e oti i latou i le pelu.” [Mataio 26:52.] I le ogatotonu o Lona faamasinoga, ina ua tauemua, ma sasaina, ma tuuina le pale tuitui i Lona ao, ina ua latou faatiga mai, sa le i faatiga atu o Ia, ae sa loto maulalo ma tuuina atu o Ia ma sa puapuagatia e pei ona faatagaina e le Atua ē amioleaga e sauaina o Ia.

Sa tuuina mai o Ia i le tulaga sa tofotofoina ai mataupu faavae sa Ia aoaoina, ma o mea uma lava, sa faamaonia le moni o Ana aoaoga. E oo lava i taimi o Lona tiga i luga o le satauro, sa Ia fetalai, “Lo’u Tama e, ia e faamagalo atu ia i latou; aua ua latou le iloa le mea ua latou fai.” [Luka 23:34.] Ou te fesili, e moni ea lenei? Afai e moni, ona ou faapea atu lea e leai se tagata e mafai ona ia ta’u atu ni upu e pei o lenei i taimi faapenei; e manaomia le mana ma le agaga, o le alofa, alofa mama ma le loto faamagalo o le Atua lava ia. Ou te molimau atu ia te outou o se tagata ua valaau atu i le Atua e faamagalo tagata ua latou sauāina fua ae leai se mafuaaga, e lē itiiti ifo nai le Atua. Afai e leai se isi faamaoniga nai lo lenei i le misiona paia a Iesu Keriso, ua mafai e lenei ona faatalitonuina a’u o Iesu o le Faaola o le lalolagi. Sa Ia aoao ma faata’ita’i i Lona soifuaga mataupu faavae tonu lava nei e faaolaina ai le lalolagi. …

Sa ofoina atu e Iesu Lona soifua o se togiola ina ia faataunuuina ai le ata o le faaolataga.

O Iesu … sa faasatauroina. Sa tuuina ifo lona tino maliu mai le satauro e Ana uo, faamama ma aui i le ie lino, ona tuu ai lea i le tuugamau na foa i le papa, e lei tuu ai lava se tasi. Peitai, e muamua atu i lena, sa aoao ai e Iesu ona soo o le Atalii o le Tagata o le a fasiotia. Sa Ia faapea mai i se gagana faigofie, “O le mea lea e alofa mai ai lo’u Tama ia te au, aua ou te tuuina atu lo’u ola, ina ia ou toe aumai ai. E leai se tasi na te aveeseina ia te au, ae peitai au, ou te tuuina atu e a’u lava. O ia te a’u le pule e tuuina atu, o ia te au foi le pule e toe aumai ai.” [Ioane 10:17–18.] Ua sau o Ia e faataunuu le valoaga a perofeta; aua e faapei ona oti uma ia Atamu, e faapena foi ona faaolaina uma ia Keriso [tagai 1 Korinito 15:22]. … Afai ua oo mai le agasala i le lalolagi talu le solitulafono a le tagata e toatasi, ma o le taui o lenei solitulafono ua pau i luga o tagata uma e aunoa ma sa latou na fai, pe ua tonu ea lea, pe ua talafeagai ea i le tagata ona tuusaoloto mai nei taunuuga ona o le mea na faia e le tagata e toatasi? O le fuafuaga lenei sa amata mai le amataga, ma ua na o le amiotonu lava o i ai. Sa ofoina atu e Iesu Lona soifua ina ia faataunuu ai lenei. Sa fasiotia o Ia e tagata agasala, o e sa faaleaga ia te Ia ae le amiotonu, ma e ua moeiina o latou mata ma tapunia o latou loto i mataupu faavae moni sa Ia aoao atu.

Ina ua uma ona tanumia o ia, ua tatou faitau i Tusitusiga Paia o le uluai aso o le vaisapati ua alu ane ai Maria le Makatala i le tuugamau; ae peitai, ua aveesea le maa ma ua leai o Ia. Sa ia vaai atu i le tuugamau ma iloa atu ai agelu e toalua ua ofu sisina, “o le tasi e i ulu, o le tasi e i vae,” [Ioane 20:12] ma sa la’ua faapea mai ia te ia:

“Funa e, se a le mea e te tagi ai? Aua ua latou aveese lo’u Alii, ma ua ou leiloa le mea ua latou tuuina ai o ia.

“Na ia fai atu na upu, ona faliu lea i tua, ona iloa atu lea e ia o Iesu ua tu mai, ae le iloa e ia o Iesu lava lea.

“Na fetalai atu Iesu ia te ia, Funa e, o le a le mea e te tagi ai? O ai ea e te sailia? A o le fafine, fa te ia o le leoleo ia o le fanua, ua fai mai ia te ia, Le Alii e, afai ua e aveese ia te ia, tau mai ia te au poo fea le mea ua e tuuina ai o ia, ona ou aveeseina lea o ia.

“Ua fetalai atu Iesu ia te ia, Maria e, ona faliu lea o ia ua fai mai ia te ia, Raponi e; o lona uiga, Le Aoao e.

“Ua fetalai atu Iesu ia te ia, Aua e te tago mai ia te au; aua ou te le i alu ae lava i lo’u Tama, a ia e alu i ou uso, ma fai atu ia i latou, Ou te alu ae i lo’u Tama, ma lo outou Tama; i lo’u Atua ma lo outou Atua.” [Ioane 20:13–17.]

Ona alu atu lea o Maria ma ta’u atu i soo ua ia vaai i le Alii, ma sa Ia faaali foi ia i latou.

Sei o tatou mafaufau i lenei mea mo sina taimi. O se faamaumauga faasolopito lenei ua ta’u mai sa alu ia Maria i le tuugamau, ma iloa ai agelu e toalua iina, ma mulimuli ane ua ia vaai i le Faaola lava ia ua toe tu mai. Ua i ai lana molimau i avefeau a le lagi, ua faamauina e le Alo o le Atua lava ia, ua toetu mai le Faaola. O ana upu ua tuuina mai ia i tatou i se molimau. E te fesiligia ea lenei? E te masalosalo i lana molimau? … Mulimuli ane sa Ia faalatalata i ona soo e toalua sa malaga atu i Emau, ma malaga faatasi ma i la’ua; ae “ua punitia o la’ua mata, o lea ua le iloa ai o ia e i laua.” [Luka 24:16.] Na fesili Iesu pe aisea ua mata faanoanoa ai i la’ua, ma sa la’ua tali mai: “Pe na o oe ea lē aumau i Ierusalema ae le iloa mea ua tutupu ai i ona po nei? [Luka 24:18.] Mulimuli ane, ua pupula o la’ua mata, ma ua la iloa o Ia.

Ina ua tuanai lea sa ia faailoa atu i ona soo. Ua faalogo le tasi o ona soo ua toe tu mai Iesu, ae ua faapea mai e le talitonu o ia seia vagana ua tuu lona lima i lona itu ma tuu ona tamatamailima i le mea na tutui ai fao i ona aao. E faapei foi tagata i ona po nei o Toma. Sa ia toe faaali foi i le au soo, ma sa i ai faatasi Toma ma i latou

“Ona fetalai atu lea o ia ia Toma, aumai ia lou tamatamai lima iinei, vaai mai foi i ou lima; aumaia foi lou lima, ma tuu mai i lou itu; aua foi e te masalo vale, a ia e talitonu.

“Ona tali mai lea o Toma, ua faapea mai ia te ia, Lou Alii e, ma lou Atua e.

“Ua fetalai atu Iesu ia te ia, Toma e, ua e talitonu aua ua e vaai mai ia te au; amuia o e le vaai mai ae talitonu mai pea.” [Ioane 20:27–29.]

Ona o le mana o le Agaga Paia tatou te iloa ai o loo soifua lo tatou Faaola.

Sa talai atu Iesu i ona soo ina ua toe tu mai o ia, ma faamautu i lo latou malamalama le manatu ua le faaseseina i latou, ae o ia lava o le Alo moni o le Atua, ua toe tu mai le oti i le tino ola pea ma le ola e faavavau. Sa latou vaai ae le o mata faaletino. E mafai ona tatou vaai i le tele o mea i o tatou mata faaletino, ae e mafai ona faaseseina. E mafai ona tatou faalogo i o tatou taliga, ae mafai ona faaseseina. O o tatou senisori e faigofie ona faaseseina. … Ae sei ou tau atu pe a faailoa mai e le Silisiliese o Ia lava i le tagata, e iloa o Ia e ala i le mana o le Agaga Paia, ae lē o le vaai o mata faaletino po o taliga faaletino. E fetalai o Ia i tagata faapei o talanoa ia te ia e ese mai lona tino faaletino; Nate talanoa i le agaga. O lea, afai e fetalai mai ia te oe le Atua Silisiliese ma molimau i Lana upumoni e ala i le mana o le Agaga Paia, … o le a e iloa e faapei ona silafia e le Atua. E le o se mea ua na ona e talitonu i ai; o se mea ua fesootai atu ia te oe e ala i ou senisori, e mafai ai ona faaseseina oe; ae o le a fetalai atu le Atua i lou loto, i le agaga soifua, i le tagata faavavau, e faapei o le Atua, e le faaleagaina ma e faavavau.

O le ala lea na tatala ai e Iesu ia mata faaleagaga ma le malamalama o Ona soo ina ua tuanai Lona toetu, ina ia latou iloa ai o Ia o le Alii ma le Keriso. Ua latou iloa ua toetu mai o Ia mai le oti. Ua latou iloa o Ia o le Alo o le Atua Soifua, aua na faailoa mai e le Atua ia i latou. O lea, latou te fai mai ai e faapei ona fai mai le tusi solo,

“O lea, ua ou olioli ai:

“[Ua] ou iloa o loo soifua lo’u Faaola.” [“Ua Ou Iloa Lo’u Faaola,” Viiga, nu. 73.]

… O ai na te iloa le fiafia ma le lotomalie e oo mai i le tagata ua ia maua le molimau mai le Atua Silisiliese? E le mafai e se tasi ona tautala i ai. E le mafai ona ou ta’u atu ia te oe. E leai ni upu a tagata e faamatala ai. Ua na ona lagona. Ua na ona malamalama i ai o le vaega o le tino ola pea o le tagata. E le mafai ona faamatalaina le fiafia e maua e le tagata ua i ai lenei molimau mai le Agaga Paia. …

O le Agaga Paia o le Atua ua tautala mai ia te au—e lē ala mai i le taliga, e lē ala i mata, ae i lo’u loto, i le vaega o au o loo ola ma faavavau, —ma ua faailoa mai ia te au o Iesu o le Keriso, o le Alo o le Atua soifua. Ou te molimau atu ia te outou ou te iloa o loo soifua lo’u Faaola. E le gata i lea, ou te iloa o le a ou vaai ia te Ia i lenei lalolagi, ma o le a ou vaai ia te Ia e pei ona i ai. … O le a afio mai o Ia e toe asiasi i le lalolagi; e le faapei ona afio muamua mai, ae i le mana ma le mamalu tele, o le a taui ma sui i e amioleaga ma lē amioatua o ē le gauai i le leo o le Agaga, ae ua faamaaa o latou loto e faasagatau i le upumoni ma tapunia lo latou malamalama i molimau a auauna a le Atua. O le a faamasinoina i latou; e lē o le faalogo o taliga, po o le vaai o mata, ae o le amiotonu o le a faamasinoina ai, ma o le a faasalaina i latou aua ua oo mai le malamalama i le lalolagi a ua fiafia i latou i le pogisa ae le o le malamalama. … Ua faailoa mai e le Alii lenei mea ia te au. Ua ia faatumulia lo’u agaga i lenei molimau, seia oo lava ina leai se avanoa e masalosalo ai. …

Ua ia i tatou le molimau a soo o Keriso i le konetineta i Asia ma le molimau a soo o Iesu i lenei konetineta, e molimauina ai le upumoni e tasi. O loo ia i tatou le Tusi o le Mataupu Faavae ma Feagaiga, o loo i ai faaaliga ma molimau i le Atua i Ana auauna ma le Au Paia i aso nei o loo tatou ola ai, o le molimau lona tolu i ia mea. E faaopoopo i nei mea uma, … ua ia i tatou le molimau a le Agaga Paia i o tatou loto, e le mafai ona teena; aua o le ua ia maua lenei molimau e ala i musumusuga a le Agaga Paia, e lē faaseseina. E le molimau le Agaga o le Atua i mea e lē moni. O lea, afai ua e maua le molimau o le Agaga Paia i lou loto, ua e iloa o loo soifua lou Togiola. …

… Ou te molimau ia te outou o loo soifua le Togiola. Ia i ai se avanoa o lenei molimau i o outou loto. … Afai tatou te alolofa le tasi i le isi ma agalelei le tasi i le isi, o le a tatou tauaveina le mataupu o le Talalelei o le Alo o le Atua, o mataupu faavae a Keriso, ua fuafuaina e togiola ma faaola le lalolagi ma toe aumaia tagata i le afioaga o le Atua, ou te tatalo ina ia tatou maua uma le avanoa e maua ma fiafia ai.

Fautuaga mo Suesuega

O a ni mea na tutupu po o ni aoaoga mai le soifuaga o le Faaola ua fesoasoani e maua ai lau molimau o Ia o le Alo o le Atua?
E faapefea ona taui atu e Iesu Keriso le leaga i le lelei a o sauaina o ia? O a faamanuiaga na maua talu ai le mulimuli i Ana aoaoga ina ia taui atu le leaga i le lelei? E faapefea ona tatou mulimuli atoatoa i lenei mataupu faavae? (Tagai Mataio 5:38–47.)
E faapefea ona tatou faatinoina le fautuaga “e toto le upu i o outou loto, ina ia outou tofotofo i lona lelei” (Alema 34:4) i fuaiupu sa ta’ua e Peresitene Samita mai le Lauga i le Mauga? (Tagai Mataio 5:3–6.)
E faapefea ona avea le agamalu e fai ma o tatou malosiaga? Aisea e faigata ai i le tele o tagata i le lalolagi ona atinae le agamalu?
E faapefea i saunoaga mulimuli a le Alii a o tautau o Ia i le satauro ona faailoa mai ai le “alofa, alofa mama ma le loto faamagalo”? E faapefea ona tatou mulimuli i Ana faataitaiga i o tatou taimi o faaosoosoga ma tofotofoga?
E faapefea ona faamalosia lau molimau e le molimau a Maria le Makatala o le Togiola toetu? (Tagai Ioane 20:11–18.)
E faapefea ona tali tutusa ia Toma ma tagata o aso nei”? O a faamanuiaga ua tatou maua pe “a tatou le vaai ae talitonu pea”? (Ioane 20:29).
O a mea ua e aoao mai ia Peresitene Samita e uiga i le tuuina atu o le molimau i le Faaola?
O le a se lagona ua e maua mai le molimau a Peresitene Samita i le Faaola? E faapefea ona avea lana molimau e fesoasoani ia te oe e faamalosia ai lau lava molimau ia Iesu Keriso, o le Alo o le Atua?

Jesus Christ — O Le Alii o Iesu Keriso. Mai le atavali *O Keriso ma le Tagata Faitulafono Mauoa*, na tusia e Heinrich Hofmann.