O le Faaeaina o Fanau Laiti

O fanau laiti ua maliliu ae le i oo i tausaga e papatisoina ai ua faaolaina i le toto o Keriso.

Mai le Soifuaga o Iosefa F. Samita

E ui ina silafia e Peresitene Iosefa F. Samita le tiga, lagona nofo toatasi, ma le alofa e oo mai i le maliu o se tamaitiiti, o lana aoaoga i le faaeaina o fanau laiti sa musuia ma mautinoa. I le va o le 1869 ma le 1898, sa ia tanuina ai tamaiti e toaiva o lana lava fanau.

Ina ua mavae le maliu o lona uluai afafine, o Mercy Josephine, i le aso 6 o Iuni 1870, sa ia faaalia lona faanoanoa tele: “Ua na o le Atua na te silafia lo’u alofa tele i lo’u afafine, o ia o le malamalama ma le olioli o lo’u loto. I le taeao nei ao le’i maliu o ia, ina ua tuanai le po atoa o ma feala faatasi ma ia, aua sa ou vaavaaia o ia i po uma, sa ou faapea atu ia te ia, ‘E le’i moe si a’u pele i le po atoa.’Sa lulu lona ulu ma faapea mai, ‘O le a ou moe i le asō, papa.’ Oi! Na tuia lo’u loto i na upu laiti. Na ou iloa, e ui ou te le talitonu, o se isi leo ese, o lona uiga o le moe o le oti ma e sa moe lava o ia. Auoi! ua mou ese atu le malamalama o lo’u fatu. Na toeitiiti mou ese atu le ata o le lagi na faamauina i lo’u agaga. … O oe o le meaalofa tuusa’o mai le lagi i lo’u loto.”¹

I le aso 6 o Iulai, 1879, sa tusia ai e Iosefa F. Samita i lana tusi faamaumau lona faanoanoa i le maliu o lona afafine o Rhonda: “Sa ou sii ae ia te ia i le aluga ma ma savavali ma ia, sa toe ola mai o ia ae sa gaioi pe na o se itula ma maliu ai i o’u lima i le 1:40 i le taeao. Ua na o le Atua na ia silafia le loloto o lo matou faanoanoa. O le maliu lona lima lenei i lo’u aiga. O a’u fanau iti uma e sili ona alofagia! E! Le Atua e fesoasoani mai ia i matou e tauaveina lenei mafatiaga!”²

Ae sa ia maua le mafanafana i le malamalama, o le Togiola a le Faaola, e mafai ai ona lelei mea uma mo ana fanau faapelepele. I le maliu o lona afafine o Ruta, i le aso 17 o Mati 1898, sa ia maua ai se faaaliga ofoofogia: “Lo’u agaga e! Ua ou vaai i lima o lo’u lava tina lelei ua faaloaloa mai e faafeiloai ma opo atu ai ia te ia le agaga ofoofogia ua faaolaina o la’u lava pepe lalelei! Oi lo’u Atua e! Ona o lenei faaaliga ofoofogia, ou te faafetai ai ia te oe! Ma o iina foi o loo faatasitasi ai a’u pele lalelei i le maota o lo’u Tama; e lē o le tulaga o tamaiti ua tuulafoaiina, ae i le malosi ma le mamalu uma lava o agaga faaeaina. Ua tumu i le poto, o le olioli ma le alofa tunoa, ma le upumoni.”³

Aoaoga a Iosefa F. Samita

O fanau laiti uma e maliliu ae le’i oo i le tausaga e faamasinoina ai, e faaolaina.

O fanau laiti ua aveesea a o laiti ma amiotonu, ao le’i oo i le tausaga e faamasinoina ai, ma ua le iloa ona fai o le agasala, ua ta’u mai e le talalelei ia i tatou o le mea moni e faaolaina i latou, ma ua lē oo i ai le malosi o Satani. E leai foi se malosi o le oti ia i latou. E faaolaina i latou i le toto o Keriso, ma ua faaolaina i latou e faapei ona oo mai o le oti i le lalolagi e ala i le pau o o tatou uluai matua. …

… O a tatou uo faapelepele o ē ua aveesea a latou fanau iti, ua i ai le mafuaaga tele e olioli ai ma le fiafia, e ui lava o loo i ai i le taulotoaiga o le faanoanoa tele ua latou lagona ona o le aveesea o la latou pele laitiiti mo se taimi. Ua latou iloa o loo manuia o ia; ua latou maua le faamaoniga ua maliu la latou pele laitiiti e aunoa ma se agasala. O nei tamaiti o loo i ai i le fatafata o le Tama. O le a latou maua lo latou mamalu ma lo latou faaolataga, ma o le a le aveesea mai ia i latou ia faamanuiaga e o latou; aua, i le faatulagaga o le lagi, ma i le atamai o le Tama, o le ua faia mea uma i le lelei, o i latou ua maliliu ao laiti, ua leai ni o latou tiute ona ua toesea i latou, o i latou lava, ona ua leai le poto ma le atamai e tausia ai i latou lava ma malamalama ai i tulafono o le olaga; ma, i le atamai ma le alofa tunoa ma le faatulagaga a le Atua lo tatou Tama o i le Lagi, o i latou uma lava manu e maua mai ma fiafia ai i latou pe ana faapea e maua le avanoa e soifua ai i le tino, o le a tausia i latou i le taimi o mulimuli mai. O le a leai se mea e taofia mai ia te i latou ona ua aveesea mai i latou i lenei auala. …

E tusa ai ma nei manatu i lo’u mafaufau, ou te maua le faamafanafanaga i le moni o lo’u toe feiloai atu i a’u fanau ua laasia le isi itu o le veli; ua feololo nisi ua aveesea, ma ua ou lagonaina foi lagona uma e mafai ona maua e matua, talu le toesea o la’u fanau. Sa ou lagonaina lava, aua ou te alofa i tamaiti, ma e sili ona ou fiafia i tamaiti laiti, ae ou te lagona le faafetai i le Atua ona o le malamalama i nei mataupu, aua o lea ua ou maua le faamautinoaga sili i lana fetalaiga ma lana folafolaga o le a ou maua i le taimi o i luma mea uma o loo ia te au, ma o le a faatumuina a’u i le olioli. O le a lē aveesea mai ia te au i soo se avanoa poo se faamanuiaga ua ou agavaa ai ma ua faatulagaina lelei mai ia te au. Ae o meaalofa uma, ma faamanuiaga uma ua alagatatau ona ou agavaa i ai e tatau ona ou maua, i le olaga nei poo le faavavau, ma e le afaina, ae ou te faafetaia ai le aao o le Atua i nei mea uma, ma faapea ane i lo’u loto, “O le Alii na te foai ma o le Alii foi na te toe aveesea, ia manuia le suafa o le Alii” [Iopu 1:21]. O le ala lenei e ao ona tatou maua e faatatau i a tatou fanau, poo o tatou aiga, poo uo, poo a lava suiga ua valaaulia i tatou e oo i ai. ⁴

Ina ua tuanai le toetu, o le a tupu le tino o le tamaitiiti e talafegai ma le faatusa o le agaga.

Tatou te malilie ea e vaai atu i tamaiti ua tatou tanumia a o iti i latou o tumau ai o ni tamaiti, i le tele o tausaga o le faavavau? Leai! E oo foi i agaga sa faatasi ma tino o a tatou fanau e le fiafia e tumau ai i lena tulaga. Ae tatou te iloa o a tatou fanau o le a le faamalosia e tumau ai e faapei o se tamaitiiti i lena tulaga, aua ua faaali mai e le Atua, o le puna o le upumoni, e ala mai ia Iosefa F. Samita le perofeta, i lenei tisipenisione, i le toetu o e ua maliliu o le tamaitiiti sa tanumia ao laitiiti o ia o le a alu ae o ia i le foliga o le tamaitiiti e faapei ona i ai ina ua tanumia o ia; ona amata lea ona tupu. Mai le aso o le toetu, o le a tupu le tino seia oo i le fua o le matua o lona agaga, e tusa poo se alii poo se tamaitai. Afai o le agaga ua i ai le poto o le Atua ma le faamoemoega o agaga faaletino, e le tatau ona faamalieina i se mea e itiiti ifo nai lo lenei. O le a outou manatua ua ta’u mai ia i tatou o le agaga o Iesu Keriso sa asiasi atu i se tasi o perofeta anamua ma faaali atu o ia lava ia te ia, ma folafola atu lona faasinomaga, o ia lava lea o le Alo o le Atua e sau i le vaeluaga o taimi. Sa ia fetalai mai o le a ia faaali mai i le tino e faapei ona ia faaali atu i lena perofeta [tagai Eseta 3:9, 16–17]. Ua le o ia o se tamaitiiti; o ia o le agaga ua tupu, ma ola; ua ia te ia foliga o le tagata ma foliga o le Atua, o foliga lava ia ina ua ia oo mai ma tauave i ona luga le tino ma tausia seia oo i le matua o lona agaga.⁵

O agaga uma ua oo mai i lenei lalolagi e tauaveina i ona luga se tino o se atalii poo se afafine o le Atua, ma ua i ai le malamalama uma ma uiga uma e olioli ai soo se atalii poo se afafine, i le lalolagi o agaga, poo lenei lalolagi, sei vagana i le agaga, ua tuu eseeseina mai le tino, o le a le maua le tino ua faapei o le Atua le Tama. Ua ta’ua o le Atua o le agaga, ma o i latou o e tapuai ia te ia e ao ona tapuai ia te ia i le agaga ma le upumoni [tagai Ioane 4:24]. Peitai o ia o le agaga o loo i ai le tino o aano ma ivi, e pei lava o le tagata ma o lea ina ia faapei o le Atua ma Iesu e ao i tagata uma ona i ai le tino. E le afaina poo nei tino o le a matua i lenei lalolagi, pe faatali seia matua i le lalolagi a sau, e tusa ai ma saunoaga a le Perofeta o Iosefa F. Samita, o le a tupu le tino, i le olaga nei poo le olaga e faavavau, i le atoatoaga o le agaga, ma pe afai ua le maua e le tina le avanoa e maua ai le fiafia ma le olioli e tausia ai lana pepe seia oo ina tama pe teine matua i lenei olaga, e ala mai i le oti, o le a toe faafouina lena avanoa ia te ia i le taimi mulimuli mai, ma o le a maua ai e ia le fiafia i se taui tele nai lo le avanoa semanu e maua e ia e faia ai iinei. Ao faataunuuina e ia iina, o le a i ai se malamalamaaga faapitoa o lona taunuuga o le a leai se faaletonu; ae o iinei, o lona taunuuga e le ma iloa seia vagana ua maea ona tatou pasia le suega.⁶

O agaga o a tatou fanau e faavavau ao le i o mai i latou ia i tatou, ma o o latou agaga, ina ua mavae le oti faaletino, o le a faapei ona iai ao le i o mai i latou. Ua faapei i latou e pei ona latou faailoa mai pe ana ola i latou i le tino, e tupu a’e seia matutua, ma atinae o latou tino faaletino seia atoatoa e pei o foliga o o latou agaga. Afai e te vaai i se tasi o au fanau ua maliu atonu e foliga mai ia te oe i se tulaga e mafai ai ona e iloa o ia, o foliga o se tamaitiiti; ae afai ua sau ia te oe o se avefeau o loo faaali mai le upumoni taua, atonu o le a sau o se agaga e faapei o le atalii o Epikopo Edward Hunter (o le na maliu ao tamaitiiti o ia) na sau ia te ia, i foliga o se alii ua atoatoa lana tupu ma avea o se tagata matua, ua ia faaali mai i lona tama, ma faapea mai: “O au o lou atalii.”

Sa le i malamalama Bishop Hunter i lenei mea. Sa ia alu atu i lo’u tama ma faapea atu: “Ailama, o le a le uiga o lena mea? Sa ou tanu i lo’u atalii ae ua na o se tama laitiiti o ia, ae ua sau o ia ia te au o se tagata matua— o se alii talavou ua sili ma maoae ua ia faapea mai o ia lava o lo’u atalii. O le a le uiga o lena mea?”

Sa ta’u atu e lo’u tama o (Ailama Samita, le Peteriaka) o le Agaga o Iesu Keriso sa atoatoa lona tupu ao le i soifua mai o ia i le lalolagi; ma o a tatou fanau foi sa atoatoa lo latou tupu ma i ai foliga atoatoa o le agaga, ao le i oo mai i le lalolagi, o le foliga lava lea o le a latou maua pe a tea ese i latou mai le lalolagi, ma o le a faailoa mai ia i latou pe a mavae le toetu, ina ua maea ona faataunuuina la latou misiona.

Sa aoao e Iosefa Samita le mataupu faavae o le tamaitiiti ua oti o le a toetu mai o se tamaitiiti; ma, a o tusi atu lona lima i le tina ua oti lana tama, sa ia faapea atu ia te ia: “O le a maua e oe le olioli, le fiafia, ma le malie i le faafaileleina o lenei tamaitiiti, pe a mavae le toetu, seia oo i le atoatoa o foliga o lona agaga.” E i ai le taui, e i ai le tuputupu ae, e i ai le atinaeina, pe a mavae le toetu mai le oti. Ou te alofa i lenei upumoni. E aumaia e le upumoni le fiafia tele, le olioli ma le faafetai i lo’u agaga. Faafetai i le Alii ua ia faaalia mai nei mataupu ia i tatou.⁷

O loo lelei mea uma mo fanau iti ua maliliu.

Afai ua tatou maua le molimau o le agaga o le upumoni i o tatou loto ua tatou iloa ai o loo atoatoa mea uma mo a tatou fanau laiti ua oti, e le mafai ona tatou faia, pe a faapea tatou te faia, le faaleleia o o latou soifuaga; ma pe faaleleia ea o latou olaga pe afai tatou te toe valaau ina ia latou foi mai iinei, ona o se mafuaaga afai e i ai pea le tagata i le lalolagi, i lona tino faaletino, ua siosiomia i amioleaga o loo i ai i le lalolagi, o le a lamatia i faigata, ma o le a i ona luga ni matafaioi atonu e taofia ai lona manuia alualu i luma, fiafia ma le faaeaina.⁸

O se mataupu e ese le faigata ona tautala i ai i le taimi o le faanoanoa ma le faavauvau e pei o le taimi nei e mafai ai ona tuuina atu se faamama avega vave i le loto faanoanoa o i latou o loo tagitui. O nei faanoanoaga e mafai ona faamamaina atoatoa pe a tuu atu i ai se taimi ma o le aafiaga o le agaga lelei i luga o loto o i latou o loo faanoanoa, o le a latou maua ai le faamafanafanaga ma le faamalieina i lo latou faamoemoe mo le lumanai. … Ua ou aoaoina e i ai ni mea tetele e sili atu lo latou matautia nai lo le oti. Faatasi ai ma le tele o o’u lagona ma manatu i le taimi nei ma lo’u malamalama i le olaga ma le oti, e sili atu lo’u vaai atu i a’u fanau uma i le tuugamau ua mama e leai sa latou agasala, nai lo le vaai atu ua tuputupu ae i latou e avea o ni alii ma ni tamaitai matutua ma faatoilaloina i latou i faiga faalafua o le lalolagi, ua faagalo i le talalelei, faagalo i le Atua ma le ata o le ola ma le faaolataga, ma ua fulitua i le faamoemoe e tasi o le taui e faavavau ma le faaeaina i le olaga o le a oo mai.⁹

Afai tatou te faamaoni, o le a toe faatasia i tatou ma a tatou fanau i tua atu o le veli.

O le perofeta o Elia na te totoina i loto o le fanau o folafolaga na faia i o latou tama, ua folafolaina ai le galuega tele ua faia i malumalusa o le Alii i le Tisipenisione o le Atoaga o Taimi, mo le faaolaina o e ua oti ma le faamauina o fanau i o latou matua, ina nei taia le lalolagi atoa e le malaia ma faaleagaina atoa ai i le taimi o lona afio mai.¹⁰

Afai tatou te ola ma fulitua i le upumoni o le a vavaeeseina mai i tatou i le tele o tausaga o le faavavau mai le faapotopotoga o i latou tatou te alolofa i ai. O le a le i ai sa tatou aia ia i latou, ma e leai sa latou aia ia i tatou. O le a iai se tofē tele lava i lo tatou va ua le mafai ai ona tatou sopoia, mai le tasi itu i le isi. Afai tatou te oti i le faatuatua, ina ua mavae ona ola amiotonu, o i tatou o a Keriso ia, ua tatou maua le faamaoniga o le taui e faavavau, ina ua maua mataupu o le upumoni e faavavau ma o le a faaofuina i le mamalu, tino ola pea, ma le ola e faavavau. Ao tatou malaga atu i le tino tatou te pasia le tele o se vaega o lo tatou olaga i le faanoanoa; o le oti na te tuueseeseina i tatou mo sina taimi puupuu, o nisi o i tatou o le a ui i tua atu o le veli, ae o le a oo mai le taimi o le a tatou feiloai ai ma i latou ua o ese atu, ma fiafia ai le tasi i le isi e faavavau. O le tuueseeseina ua na o sina vaitaimi e pei ona i ai. E leai se mana na te toe tuueseeseina i tatou. O le Atua ina ua ia tuufaatasia i tatou ua i ai le aia a le tasi i le isi—o le aia e le faafitia—e tusa ai ma le tuufaatasia o i tatou e le mana o le perisitua i le Talalelei a Keriso. O lea, e sili ai le tuueseeseina i le olaga nei mo sina vaitaimi, e ui ina o le a oo ia i tatou le faigata, faanoanoa, faalavelave, galuega, nofo toatasi, leai ni matua ma le tele o isi tulaga, nai lo le tuueseeseina i le faavavau atoa.¹¹

Ua pele i tatou i le faatusa o Keriso lava ia. Sa tatou nonofo faatasi ai ma le Tama ma le Alo i le amataga, o ni atalii ma afafine o le Atua; ma ina ua valaauina, sa tatou o mai i lenei lalolagi ina ia maua e i tatou tino faaletino, ina ia mafai ona tatou maua le faatusa ma foliga o Iesu Keriso ma avea e faapei o ia; ina ia maua le tino faitino, ma ia oo mai ai le oti e pei foi ona maliu o ia, ina ia toetutu ai i tatou mai le oti e faapei ona toetu mai o ia mai le oti. … O le manatu e feiloai atu i la’u fanau ua muamua atu ia te au i le isi itu o le veli, ma le feiloai atu i o’u aiga ma uo, o se fiafiaga sili lea ua maua! Aua ua ou iloa o le a ou feiloai ia i latou iina. Ua faaali mai e le Atua ia te au e moni lenei. Sa ia faamanino mai ia te au, i le tali mai i a’u talosaga ma le faanaunauga, e pei foi ona ia faamanino mai i le malamalama o tagata uma o e ua saili ma le maelega ina ia iloa o ia.¹²

[Mo Elder Joseph H. Dean i Oahu, Hawaii, sa tusi atu ai Peresitene Iosefa F. Samita:] Sa ou faalogo ma le faanoanoa tele i le maliu o lau pepe i lou aiga. Ou te iloa ona faamafanafana, aua sa ou sau ai foi i lea tulaga oona ao ou i ai iina. Sa tatau ona ou tusi atu ia te oe, ae sa ou nofo lava a’u ma faamasino oe ma lē faia ai lea tulaga. O ia tulaga, ou te lagona ai le fia alu ese atu i se nofoaga mamao, filemu, ma e na o au, ua leai se isi na te iloa ae ua na o le Atua ma a’u, ma o iina, ua na o a’u lava, ou te faalogo ma lagona ai lo’u mafatiaga, ua na o le Atua na te silafia. … O le taimi, ua na o le taimi lava—o lena fomai sili o tiga—na te pa’i mai i lo’u loto, ou te iloa o le a lē mafai ona e lē maua foi nei lagona. Ae pe a mavae ese nei muai tiga o mafatiaga ma ua filemu le loto i le taimi ma le tulaga o i ai, ona pa’i mai ai lea o le upu talafeagai i le vaega malu o le mafutaga mai le tasi loto i le isi loto i le faanoanoa o aiga. E silafia lelei e le Alii le mea sili ma ua tatou iloa ua toe valaauina atu mai le lalolagi i latou e lē ponā, e lei leva ona oo mai i latou e lei aafia i elemene e faaleaga ai i lenei lalolagi toilalo, ua toe foi atu ia te Ia o lē na latou o mai ai, i le mama ma le paia, ua toe faaolaina mai le amataga, e ala i le taulaga a le na fetalai “e faapei i latou o le malo o le lagi.” O la’u tatalo faatauanau mai lo’u agaga e faapea, Oi! Le Atua e fesoasoani mai ia te au ina ia ou ola ma agavaa e feiloai ma au fanau lē ponā i lo latou aiga ma lau afio!¹³

Fautuaga mo Suesuega

O a faamanuiaga ua folafola mai mo fanau iti ua oti ae le i oo i le tausaga e faamasinoina ai? (Tagai MFF 29:46.) E faapefea ona aumaia e lenei mea le mafanafana ma le faamoemoe pe a tatou tagitui i le maliu o se tamaitiiti laitiiti?
Afai ua oti se tamaitiiti laitiiti, o le a le tulaga o lona agaga? O afea e tupu ma matua ai le tino o le tamaitiiti?
O ai e feagai ma le tausia o se tamaitiiti ua oti a o itiiti o ia? O a faamanuiaga ua folafola mai i le isi olaga mo matua amiotonu ua oti a latou fanau ao iti?
E mafai faapefea i le malamalama i mataupu o le ata o le faaolataga ona faamafanafana ma fesoasoani ia i latou ua mafatia ona o le oti o se tamaitiiti laitiiti?
E mafai faapefea e le sauniga o le faamauga i le malumalu ona aumai le faamafanafanaga ma le faamoemoe i matua pe a oti se tamaitiiti? O le a le mea tatou te fai ina ia toe faatasia ai ma a tatou fanau laiti ua oti?
E mafai faapefea e se upu talafeagai ua tautalagia ona aumai le mafanafana i le loto faanoanoa i le oti o se tasi ua alofagia? E faapefea ona saunia i tatou ina ia tautala i nei upu?