Saolotoga e ala i le Usiusitai

Ua faia i tatou e le Atua e saoloto e filifili i le lelei poo le leaga ma ua ia te i tatou foi le matafaioi mo le faaaogaina o le poto ma avanoa ua Ia tuuina mai ia i tatou.

Mai le Soifuaga o Iosefa F. Samita

E talitonu ia Peresitene Iosefa F. Samita o le filifiliga saoloto a tagata taitoatasi ma le matafaioi e le mavaevae, o vaega taua o le faasologa e mafai ai ona avea le fanau a le Atua e faapei o Ia. “O oe ma au e tatau ona faamautuina faamanuiaga o le ola e faavavau mo i tatou lava, e ala i le usiusitai ma le alofa tunoa o le Atua,” sa ia faamatala mai. “Ua i ai lo tatou faitalia i o tatou lava loto ma e mafai ona tatou filifili le leaga poo le lelei. … E ao ona tatou aoao e tulai pe pau mo i tatou lava, o le tane po o le fafine.”¹

O Peresitene Iosefa F. Samita sa susū atu i luma o sui o le Konekeresi a le Iunaite Setete i le 1904 ma saunoa malosi ai e uiga i le aia tatau a tagata o le Ekalesia e faatino ai lo latou filifiliga saoloto i le faia o filifiliga faaletagata, faalelotu, ma faalemalo. I le aso 26 o Mati 1907, sa lomia ai e le Au Peresitene Sili “Se Saunoaga: O le Ekalesia a Iesu Keriso o le Au Paia o Aso e Gata Ai i le Lalolagi,” lea sa malilie faatasi i ai e faaaoga i le Konafesi aoao o Aperila i le 1907. I le toe faamatalaina o le tele o talitonuga faavae o tagata o le Au Paia, sa faamautu mai e le folafolaga: “Matou te talitonu i le filifiliga saoloto a le tagata, ma o lea ua avea ai ma matafaioi a le tagata lava ia.”²

Sa talitonu Peresitene Samita ma aoao atu o le usiusitai i tulafono o le talalelei a Iesu Keriso ua na o le pau lea o le auala e faataunuuina ai le saolotoga ua folafola mai e Iesu Keriso: “O le upumoni e tuusaoloto ai outou” (Ioane 8:32).

Aoaoga a Iosefa F. Samita

Ua tuuina mai e le Atua ia i tatou le meaalofa o le filifiliga saoloto ma o la tatou matafaioi le faia o a tatou filifiliga.

Ua tuuina mai e le Atua i tagata uma le filifiliga saoloto ma ua aumaia ia i tatou le avanoa e auauna ai ia te ia pe leai foi, le faia o mea tonu poo mea sese, ma o lenei avanoa ua tuuina atu i tagata uma poo le a lava le ituaiga, lanu poo le tulaga o i ai. Ua i ai i le mauoa lenei filifiliga saoloto, ua i ai foi i le tagata mativa lenei filifiliga saoloto, ma e leai se tasi ua taofia mai i soo se mana o le Atua mai le faaaogaina i le atoatoa ma le agaga saoloto.O lenei filifiliga saoloto ua tuuina atu i tagata uma. O se faamanuiaga lenei ua tuuina mai e le Atua i luga o le lalolagi o tagata soifua, i luga o Ana fanau uma. Ae o le a ia silasila totoa i se faamatalaga o lo tatou faaaogaina o lenei filifiliga saoloto, ma pei ona faapea mai e uiga ia Kaino, o le a faapea foi ona faapea mai e uiga ia i tatou; “Pe afai e te amio lelei e te le maua ea le fiafia? Ae afai e te le amio lelei, o loo taoto i le faitotoa le agasala” (Kenese 4:7).³

Tatou te faia filifiliga, ma e mafai ona filifili pe tetee i le talalelei, mulimuli i faataitaiga a le Faaola poo Lusifelo. Ua tuu mai le faitalia ia i tatou. O i tatou o suli o le Atua ma suli faatasi ma Iesu Keriso, ma maua le avanoa e maua ai le mamalu ma le faaeaga i le malo o loo soifua Iesu ma le ua faapaiaina, ae o loo tuu mai le faitalia ia i tatou e filifili pe teena; ua folafola mai e le Atua o le a le manaomia e Ia se mea mai ia te i tatou ae o mea e mafai ona Ia faatagaina tatou te fai. Afai ua Ia fesili mai ma manaomia ia tiute mai ia i tatou e faigata ona tatou faatino, i le vaai i ai faalenatura, o le a Ia aumai ia i tatou le mana e faataunuuina ai. Ae sei vagana ua agavaa i tatou, ma faaaoga uma le malosi ma le poto ua tatou maua faalenatura, o le folafolaga i Lana vaega o le a le faataunuuina, aua o loo i ai le tuutuuga e ao ona faia la tatou vaega.⁴

Ua tuuina mai e le Alii i fanau a tagata la latou filifiliga saoloto. E mafai e tagata ona fai le lelei poo le leaga ina ia fetaui ma i latou lava. … Ua Ia tuuina mai ina ia tatou tali atu ia te Ia mo le faaaogaina o le poto ma le avanoa sa ia tuuina mai ia i tatou iinei i le tino.⁵

E lē faalavelave le Atua ia tatou filifiliga saoloto, ae ua ia faatagaina i tatou e tofotofo i le aafiaga o a tatou filifiliga.

O le filifiliga saoloto a le tagata ua le faalavelaveina e le Atua. Ana le tuua le saolotoga i tagata e filifili ai le lelei ae teena le leaga, poo le feliuai foi, po ua leai se amiotonu poo se mafuaaga e aumai ai i latou i le faamasinoga. O le taunuuga o le i ai o le malosi e filifili ai ua avea ai i latou ma tagata faatuatuaina, ma o lea ua latou maua ai le taui o a latou lava galuega. O le a tauia pe faasalaina i latou e tusa ai ma a latou galuega, pe a fofola ia tusi ma ua faamasinoina i latou mai mea o loo tusia ai.

O le Atua, e leai ma se masalosalo, e mafai ona Ia aveesea taua, puipuia soligatulafono, faamutaina le matitiva, tuliesea le pogisa, taofia mea sese, ma faia mea uma ina ia malamalama, matagofie ma fiafia. Ae peitai o le a aafia ai i lenei mea le faatamaiaina o se uiga faavae taua i le tagata—o le aia tatau i le filifiliga saoloto. E mo le lelei o Ona atalii ma afafine o lea e tatau ai ona latou iloa mea leaga faapea foi ma mea lelei, le pogisa faapea ma le malamalama, o le sese faapea ma le upumoni, faapea ma iuga o le solia o tulafono e faavavau. O lea ua Ia faatagaina ai le leaga lea ua oo mai ona o amioga a Ona tagata, ma o le a puleaina taunuuga aoao mo Lona lava mamalu ma le alualu i luma ma le faaeaga o ona atalii ma afafine, pe afai latou te aoaoina le usiusitai mai mea ua latou tigaina ai. O le eseesega ua maitauina i lenei lalolagi o le fefiloi o le faanoanoa ma le olioli, o le a avea ma ala e faatupula’ia ai e tagata lo latou talisapaia atoatoa o mea uma e moni ma lelei. O le muai malamalama i le Atua ua lē faaalia ai Lona finagalo e aumaia ai mea ua ia silasila mamao iai, pe avea ai foi ma Ana matafaioi i soo se tulaga mea ua faia e le tagata pe lē faia foi.⁶

E tele mea ua tutupu i le lalolagi ua foliga e matua faigata mo le toatele o i tatou ona maua se mafuaaga taua e faafetaia ai le aao o le Alii. … Pau lava le mafuaaga ua mafai ona ou iloa e tatou te faafetaia ai le aao o le Atua i nisi o mea tutupu o le tulaga e faapea o se mea ua tupu ua faatagaina e le Alii. Pe a tuuaulafo atu ni alii se toalua i o la’ua lagona malolosi; i lo la’ua manatu faapito ma le ita, ina ia faamisa ma fefinauai le tasi ma le isi, ma o lenei finauga ma le feeseeseaiga o le a oo atu i se misa ma ni taua i lo la’ua va, e faigata ia te au ona iloa le aao o le Alii i lena mea; pau le mea ua iloa o alii ua feeseeseai, ma fefinauai ma faamisa le tasi i le isi, ua la’ua maua mai le Atua le saolotoga o la la’ua lava filifiliga saoloto e faaaoga ai lo la’ua lava poto, e faamasino ai i le sa’o ma le sese mo i la’ua lava, ma faia amioga e tusa ai ma o la’ua manao. E lei fuafuaina e le Alii nei alii e toalua faapea e tatau ona fefinauai, pe faamatuu atu i lo la’ua ita i se tulaga e oo atu ai i se misa i lo la’ua va, ma, atonu, e faamaligi ai le toto. Sa le i fuafuaina lava e le Atua se mea faapena, pe tatou te tuua’ia mea faapenei i le Silisiliese. …

O le filifiliga saoloto ua tuuina mai e le [Atua] ia i tatou e galulue ai mo i tatou lava—e faia mea lē tonu pe a tatou mananao ai, ua feteenai ma tulafono o le olaga ma le soifua lelei, mea ua lē poto ma faautauta—ma o le iuga atonu e faigata mo i tatou, ona o lo tatou le malamalama poo lo tatou naunautai e faaauau mea ua tatou mananao i ai, ae lē o le usiusitai i le faatulagaga ua faia e le Atua mo i tatou.⁷

O le a outou pagatia i taunuuga o a outou lava mea sese, o o outou lava lē tonu, e ono oo mai ai le faanoanoa, poo le ma’i, poo le oti! Ou te faafetaia le aao o le Alii i lenei filifiliga saoloto ua ia aumaia i fanau a tagata; ae ou te faailoa atu o le tagata lava ia e mafua ai taunuuga o ana lava amioga, e mulimuli lona lē usiusitai i tulafono a le Atua. Ou te le tuuaia vaivaiga, o mea le tonu ma mea sese, o soligatulafono ma le amioleaga o tagata, ma le leaga o loo i ai i le lalolagi i le Atua le Tama.⁸

O loo i ai i le filifiliga saoloto, ma le faaaogaina o le faamasinoga faaletagata o loo afua ai le tele o mea leaga ua tutupu mai i le lalolagi—o le tagatavaleina o le Au Paia, o le faasatauroina o le Alo o le Atua lava ia, ma le tele o le liliuese ma le o ese mai le galuega o le amiotonu, ma mai tulafono a le Atua, ua tutupu i lenei saolotoga ma le faataunuuina o le faamasinoga faaletagata. O le Atua i lona poto matalasi ma lona alofa tunoa ua ia saunia ai ala, ma ua ia faasino mai le ala i fanau a tagata, e oo lava i le li’o o le saolotoga ma le faaaogaina o la latou lava faamasinoga, e ao ona latou o atu taitoatasi i le Atua i le faatuatua ma le tatalo, ma saili poo le a le mea e tatau ona taitaiina ai ma le poto ma faatonuina la latou faamasinoga faaletagata, ma ou te le manao e galo i tagata o le Au Paia o lo latou faamanuiaga lea.⁹

O le Ekalesia a Iesu Keriso e le taofia le saolotoga o tagata taitoatasi.

O le malo o le Atua o le malo o le saolotoga; o le talalelei a le Alo o le Atua o le talalelei o le saolotoga.¹⁰

E te mafai ona e maua se faalapotopotoga, ekalesia poo isi, ua i ai se atoatoaga o le pulega ma le faatulagaga e pei ona maua i le Ekalesia a Iesu Keriso o le Au Paia o Aso e Gata Ai, ua faatuina i musumusuga e ala i le Perofeta o Iosefa Samita? Ma o le a le faamoemoega o lena faalapotopotoga? Pe o le faatigaina ai ea o tagata? Pe ua i ai ea e faamanua ia outou? Pe ina ia outou ifo ai i lalo i le eleele? Pe ua i ai ina ia aveesea mai ia te outou lo outou saolotoga, o a outou aia tatau, po o outou avanoa? Pe ua i ai ea ina ia faapologa ia te outou, auauna, ma olopalaina outou i le palapala? Pe ua i ai e siitia outou i luga o le fua o le poto ma le malosi ma le faateleina o lo outou saolotoga, aua e leai se saolotoga e faapei o le saolotoga o le talalelei a Iesu Keriso? Aua ou te ta’u atu ia te outou e leai se tasi e saoloto pe afai ua saisaitia o ia i le agasala ma le soligatulafono, e leai foi se tagata e saoloto pe a saisaitia i le le malamalama e faatatau i le ata o le ola ma le faaolataga. ¹¹

Ou te talitonu e leai ni tagata ua sili atu ona saoloto, sili atu ona tutoatasi pe sili atu le poto e maua i soo se mea i le lalolagi, o e ua sili ona tutoatasi i le faia o filifiliga o alafua latou te mulimuli ai, i galuega latou te fai ma mea uma lava latou te faataunuu ai, nai lo tagata o le Au Paia. E leai se tagata o le Ekalesia a Iesu Keriso o le Au Paia o Aso E Gata Ai, o loo ola i tulafono, i soo se vaega lava o le lalolagi i ona po nei ua lē ona o lona tutoatasi i ona uiga, o lona poto, atamai ma le tomai e faamasino ai i le sa’o ma le sese mai le lelei ma le leaga.¹²

O le talitonuga o tagata o le Au Paia ua faatatau i amioga i le taimi nei e faapea foi ma le fiafia i le lumanai. Na te faatosina mai e talitonu i ai i mea uma e aafia ai le tulaga o tagata. E mo le tino e faapea foi ma le agaga. Na te aoao tagata i le ala e ola ma galue ai i lenei lalolagi ina ia saunia ai i latou mo mea o le a tutupu i le lalolagi a sau. O le mea lea, o le Ekalesia, e aoaoina mea faaletino e faapea foi i mea faaleagaga, e pei ona faatatau i le Ekalesia, i ana meatotino ma faapotopotoga, ma mafutaga a i latou ua mulimuli ai. Ae le faalavelave i luga o le saolotoga o tagata taitoatasi pe taofia le aia tatau a le malo. O le filifiliga saoloto o le tagata o se mataupu faavae e tusa ai ma talitonuga o le Ekalesia, e oo i le Atua lava Ia na te le aveesea.¹³

O le usiusitai, o le faaaogaina sa’o o le filifiliga saoloto, e aumai ai faamanuiaga e lē mafuatiaina.

O loo i ai … nisi o faamanuiaga ua tuuina mai e le Atua i luga o fanau a tagata i luga o le tuutuuga o le faatinoina o lenei filifiliga saoloto i le amiotonu. Mo se faataitaiga, e leai se tagata na te maua le faamagaloga o ana lava agasala seia vagana ua salamo, ma le papatisoga e se tasi ua i ai le pule. Afai ua tuu saolotoina i tatou mai le agasala, mai ona aafiaga, mai lona mana, e tatau ona tatou usiusitai i lenei tulafono ua faaalia mai e le Atua, po ua tatou le maua lava le faamagaloga o agasala. O lea, a ua tuuina mai e le Atua i luga o tagata uma, e tusa lava poo le a le tulaga, lenei filifiliga saoloto e filifili ai i le lelei poo le leaga, o le a ia lē tuuina atu lava i luga o fanau a tagata le faamagaloga o agasala seia o latou usiusitai i le tulafono. …

O tagata uma ua faamanuiaina i le malosi o o latou tino, i le faaaogaina o o latou mafaufau, ma le aia tatau e faaaogaina ai lo latou poto ua faamanuiaina ai i latou i le ala ua foliga e lelei i la latou vaai, e aunoa ma le manatu i le talitonuga. Ae o le Atua sa le’i ma o le a lē tuuina atu lava le meaalofa o le Agaga Paia i luga o se alii poo se tamaitai, seia vagana ua tausia tulafono a le Atua. O lea, e leai se tasi na te maua le faamagaloga o agasala; e leai se tasi na te maua le meaalofa o le Agaga Paia; e leai se tasi nate maua faaaliga mai le Atua; e leai se tasi na te maua le Perisitua, ma aia, mana ma avanoa o loo i ai; e leai se tasi e avea ma suli o le Atua ma suli faatasi ma Iesu Keriso, seia vagana ua tausisi i mea ua manaomia i le lagi. O faamanuiaga faalauaitele nei, o ni avanoa sili ma le lē mafuatiaina nei e faatatau i le talalelei ma le ata o le ola ma le faaolataga, ua tatala ma tuusaoloto mo tagata uma e tusa ai ma ni tuutuuga, ae le mafai e se tagata o i lalo o le lagi ona fiafia ai, seia vagana ua savali i le ala ua faailoga e le Atua ina ia latou maua ai. Ma o nei avanoa ma faamanuiaga pe a maua e mafai ona aveesea, ma leiloa mo le faavavau atoa, seia vagana ua tatou faaauau ma le faamalosi i le ala ua faailogaina mo i tatou e mulimuli ai. …

E susulu mai le la i luga o le leaga ma le lelei; ae o le Agaga Paia ua alu ifo i luga o na o e amiotonu ma luga o i latou ua faamagaloina a latou agasala. E pau ifo le timu i luga o le leaga ma luga o le lelei; ae o le aia tatau o le Perisitua ua faaee atu, ma mataupu faavae o le Perisitua e pei o le sau ua toto ifo mai le lagi i luga o agaga o na o i latou ua talia i le ala ua saunia e le Atua. O le fiafia o le lagi, o le faafetaia o le Silisiliese o ana fanau i luga o le lalolagi e pei o ona atalii ma afafine, e mafai ona faasaoina e ala i le usiusitai i tulafono ua ia faaali mai.¹⁴

O le fua silisili o le saolotoga e maua mai le usiusitai i le talalelei a Iesu Keriso.

O le talalelei a Iesu Keriso o le tulafono atoatoa o le saolotoga. Ua fuafuaina na te taitaiina le tagata i le tulaga sili ona maualuga o le mamalu, ma faaeaina ai o ia i le afioaga o lo tatou Tama oi le Lagi, “o ia ua leai se faaletumau, poo sina liliu itiiti.” [Iakopo 1:17.]¹⁵

Tatou te talitonu e finagalo le Atua ina ia faaeaina tagata; o le saolotoga e oo mai ona o le usiusitai i le talalelei a Iesu Keriso o le fua silisili lea o le saolotoga ua oo mai i le tagata. E leai se saolotoga ua olioli pe ua foliga e olioli ai tagata i le lalolagi ua le maua i le finagalo ma tulafono a le Atua, ma ua leai se faamaoni mo lona mataupu faavae. O le sese ua saisaitia ai tagata. O le lē moni ua faaleagaina ai tagata soifua. O le sese ma le lē lava o le malamalama i tulafono a le Atua ma lona finagalo ua tuua ai tagata i le lalolagi e faapei o le tulaga o manu o le foafoaga, aua ua leai so latou poto maualuga, leai se mataupu maualuga, leai se naunautaiga maualuga, leai se faamoemoega maualuga, nai lo le lalolagi o manu, pe afai ua leai so latou faamoemoega e sau mai se sosia maualuga nai lo le tagata lava ia.¹⁶

Ua na o le usiusitai lava i tulafono a le Atua, e mafai ai e tagata ona tulai i luga ae o vaivaiga o le ola mama ma faaaoga ai lena manavaga o le agalelei, alofa moni ma le alofa, e tatau ona faatumulia ai loto ma faamoemoega o fanau a tagata.¹⁷

Uso e ma tuafafine, ia tatou sa’oloto. Ou te ta’u atu ma le faamaonima ou te manatu e i ai la’u aia e faia ai–o a’u o le tagata saoloto, e tusa ai ma lo’u tausia o poloaiga a le Atua. Afai ou te faia le sese, ua saisaitia au i lena sese. Afai ua ou soli le tulafono, ua saisaitia au i lena agasala. Afai ua ou solia tulafono a le Atua, o la’u pitolaau lea i luma o le Alii. Ae ou te ta’u atu ma le faamaoni i le tulaga o le saolotoga, o le saolotoga e faaali ai lagona, saolotoga o manatu, saolotoga o gaoioiga– o mea uma lava e faia e tuusaoloto ai se tasi i le lotolotoi o tagata, ou te le talitonu ua ia i se isi tagata i le lalolagi ua sili atu ona saoloto nai lo o au. Amuia o outou agaga. Ou te faia le agasala pe a ou manao i ai. E i ai ia te au le tele o le saolotoga e faia ai le agasala e faapei o isi tagata. E leai se aia a se tagata e faia ai le agasala; ae ua i ai i tagata uma le saolotoga e faia ai pe a latou loto i ai. Ua tuuina mai ia i latou e le Atua lo latou filifiliga saoloto. Pe ua i ai ea se tulaga faatamatane pe a ou faia le agasala ona ua ia te au le saolotoga e faia ai? Ua ia te au le saolotoga ou te alu ai i le fale kalapu ma inu pia ai, pe a ou manao ai, poo le alu atu i le fale o taaloga faitupe ma taalo ai. Ua ia te au le saolotoga e faia ai nei mea e faapei o soo se isi lava tagata o loo soifua i le lalolagi. Ae o le taimi ou te faia ai se mea e pei o lenei, o le a avea au ma pologa ma lē ua saisaitia ona o le agasala. I le isi itu, afai ua le agasala au ona o le asiasi i fale kalapu, poo le pele, poo taaloga faitupe, poo isi soligatulafono ou te mama mai ai ma o au o se tagata ua saoloto. O le upumoni ua tuusaoloto ai au e faatatau i lenei mea.¹⁸

Tatou te le folafola le talalelei o le mata’u. Tatou te le saili e faamatau i agaga o tagata. Tatou te le fesili atu i se tagata ina ia amiotonu ona o le matatau ina nei faatafunaina. Tatou te le mananao ina ia outou lelei aua ua outou matatau i le faasalaga o le amioleaga. Tatou te le mananao ina ia outou faia le mea tonu ona o se faasalaga ua faaopoopo i ai i le faia o le mea sese. Matou te mananao ina ia outou filifili le mea tonu aua e sa’o, aua e fiafia o outou loto i le mea tonu, aua o le filifiliga e sili ae i mea uma lava. Matou te mananao ina ia outou faamaoni, e le ona o le faavae sili, ae i lona faataunuuina ua outou faamamalu ai i le Atua ma ua outou faataunuuina Ona faamoemoega i o outou olaga; aua o le “tagata faamaoni.” O se faaupuga ua leva —”o le galuega sili ona mamalu a le Atua.” Tatou te mananao e faamaoni ona tatou te alolofa i le Atua, ma e le mafai ona avea i tatou ma tagata paia o le Atua [sei vagana] ua avea ai i tatou. E tatau ona tatou amio lelei aua tatou te mananao i le lelei, ae le ona ua tatou matatau i le taunuuga o le leaga.¹⁹

E le talia e le Atua le usiusitai mai tagata sei vagana ua latou faia i le fiafia ma le oliloi i o latou loto, ma e na o le pau lena o le mea e manaomia e ana auauna. O le usiusitai lena e ao ona tatou tuuina atu, ma afai ua tatou lē faia lea, ua ta’usalaina i tatou.²⁰

E le gata ua i ai le poto ia [Iesu Keriso], ae sa ia faaaoga lena poto i le faia o mea lelei ma le faia o tagata ina ia saoloto mai mea sese o le lalolagi ma talitonuga leaga o o latou tama. Sa ia folafola mai i mataupu o le upumoni ma le faamaoni, “Afai tou te tumau pea i la’u mataupu, ona avea lea o outou ma o’u soo moni; ma o le a outou iloa le upumoni, e tuu saoloto foi outou e le upu moni.” [Ioane 8:31–32.] E leai se tagata e faapei o le Atua seia tuu saoloto o ia. O le Atua e saoloto o ia. Aisea? Aua ua ia te Ia le amiotonu uma, mana uma, ma le poto uma. E ia te Ia foi Lana filifiliga saoloto, ma o Lana filifiliga saoloto ua faaaogaina i le faataunuuina o mea lelei, ae lē o mea leaga. O lea e leai se tagata e faapei o Ia sei vagana ua ia tuuina atu ia lava e faia le amiotonu, mama, ma lelei, ma ia mafai ona ia lafoai mea sese ma le agasala ma faatoilaloina ia lava. …

O ia e sili ona faigofie ona aoao ma usiusitai i le finagalo o le Atua e faaalia le poto sili i tagata uma. O le ua faia lona manatu e tetee atu ai i le finagalo ma faamoemoega o le Alii o ia lea o loo mamao ese mai le Atua i lena tulaga. E ui ina sa fausia ma faia o ia i foliga ma le faatusa o le Tama, ae peitai, ua lē faapei o ia o le Alo, seia faapea mai o ia i lona loto, ‘Le Tama e, aua le faia lo’u loto, a o lou finagalo.” [Luka 22:42.] E finagalo le Alii ia tatou maua le agaga, ma malamalama i lana upumoni. E moni ua ia te i tatou le Atua e toatasi, le Tama, ma o tagata uma e ao ona usiusitai ia te Ia ma ua manaomia ina ia usiusitai i Ana poloaiga, ina ia tuu saoloto ai i latou ma avea o soo o Keriso i latou.²¹

Fautuaga mo Suesuega

O le a le filifiliga saoloto? O ai e i ai le filifiliga saoloto? Aisea o le filifiliga saoloto o se faamanuiaga?
E faapefea ona finagalo le Atua tatou te faaaoga ia la tatou filifiliga saoloto? O le a le mea ua ia folafola mai ia i tatou pe afai tatou te filifili e usiusitai ia te Ia? (Tagai foi MFF 58:28.)
Aisea ua faatagaina ai i tatou ia mafatia i taunuuga o a tatou amioga? E faapefea ona faaitiitia lo tatou aafiaga faaletino pe afai e aveesea e le Atua ia taua, puipuia ia le amioleaga, faamutaina le mativa? E faapefea ona outou tali atu i se tasi ua na ia le mafaufauina ona tu’ua’ia le Atua i “le leaga o loo i ai i le lalolagi”?
E ui o le Atua “ua ia faatagaina le leaga ua oo mai ona o amioga a ona tagata, o le a se faamaoniga ua ia i tatou o le a ia pulea lo latou taunuuga mulimuli”? (tagai foi Roma 8:28; MFF 98: 3.)
O le a le uiga o le “faalavelave i le saolotoga o le tagata”? E faapefea e matua ma taitai i le Ekalesia ona fesoasoani i isi ina ia usiusitai e aunoa ma le faalavelave i le saolotoga o tagata taitoatasi? (Tagai foi MFF 121:34–46.)
E faapefea ona fesoasoani le Ekalesia ia i tatou ina ia tatou saoloto moni? E faapefea e le agasala ma le sese ona taofia i tatou?
O a faamanuiaga “sili ma le le mafuatiaina” ua outou maua ina ua outou filifili e usiusitai i tulafono a le Atua? (tagai foi MFF 130:20–21.)
O le a le eseesega o le usiusitai i tulafono a le Atua ona o le alofa ae lē ona o le matau i le faasalaga?
E faapefea ona tatou mulimuli i le faataitaiga a le Faaola i le avea ai ma ē usiusitai i le finagalo o le Tama?

Captain Moroni Raises the Title of Liberty — *O Kapeteni Moronae o Loo Sisiina A’e le Tagavai o le Saolotoga*, tusia e Arnold Friberg. Na opogi e tagata o le Ekalesia i ona po o le Tusi a Mamona le faaupuga o le saolotoga ina ia talosagaina lo latou “taofia pea o la latou pule, ma la latou ekalesia, ina ia faamanuiaina i latou e le Alii le Atua” (Alema 46:20).