Faatomuaga
Na galue Peresitene Iosefa F. Samita mo le 52 tausaga o se Pulega Aoao o le Ekalesia—o se uso o le Korama a le Toasefululua, o se Fesoasoani i Peresitene e toafa o le Ekalesia, ma le 17 tausaga o se Peresitene o le Ekalesia. Na ia aoao atu le talalelei toefuataiina i le manino, alofa, ma le talitonuga maumaututu, ma uuna’ia tagata ina ia “ola e tusa ai ma faamoemoega o lo tatou Tama Faalelagi.”1 Na iloga lona faamaufaailogaina o lana galuega i lana molimau mamana ia Iesu Keriso: “Ua ou mauaina le molimau a le Agaga i lo’u lava loto, ma ou te molimau atu i luma o le Atua, o agelu ma tagata … ou te iloa o loo soifua lo’u Faaola.”2
O loo faaauau pea i ona po nei ona aumaia e ana savali ma saunoaga ia faatonuga paia i lo tatou ala i le alualu i luma e faavavau. O la tatou galuega i lenei lalolagi, e pei ona saunoa mai Peresitene Samita, “o le faia lea o mea lelei, ina ia solipalaina ai i o tatou vae le amioleaga, ia faaeaina i le amiotonu, mama atoatoa, ma le paia i loto o tagata, ma faatuina ai i mafaufau o a tatou fanau, ia sili atu i lo isi mea uma, se alofa i le Atua ma lana afioga.” 3 Na ia tautino mai “ina ia avea o se Au Paia o Aso e Gata Ai e moomia le ositaulagaina o faamoemoega ma tuinanauga faalelalolagi; e manaomia ai le faamaoni, malosiaga o uiga, alofa i le upumoni, faamaoni i mataupu faavae, ma se naunautaiga malosi e vaai i le manumalo, ma agai atu i luma i le upumoni.”4
Ua faatuina e le Au Peresitene Sili ma le Korama a le Au Aposetolo e Toasefululua se faasologa o Aoaoga a Peresitene o le Ekalesia ina ia fesoasoani ai i tagata o le Ekalesia e faaloloto lo latou malamalama i aoaoga faavae o le talalelei ma faalatalata atili atu ai ia Iesu Keriso e ala i aoaoga a perofeta o lenei tisipenisione. O lenei tusi o loo aumaia ai aoaoga a Peresitene Iosefa F. Samita o lē na saunoa mai: “Ina ia avea o tagata le Au Paia o Aso e Gata Ai, e tatau o ni alii ma tamaitai e mafaufau, ma ni tagata e galulue; e tatau ona avea ma ni alii ma ni tamaitai e manatunatu ma le faaeteete i mataupu, o alii ma tamaitai e mafaufau faato’ato’a lelei i taualumaga o o latou olaga ma mataupu faavae ua latou filifili e mulimuli ai … A malamalama tagata i le talalelei a Iesu Keriso, o le a outou vaaia i latou ua savavali sa’o, e tusa ai ma le afioga a le Alii, ma le poloaiga a le Atua, e mata’itu lava i mea e tatau, faamaoni, amiotonu, ma mea uma e finagalo i ai le Alii.”5
O mataupu taitasi o lenei tusi o loo aofia ai ni vaega se fa: (1) o se faamatalaga o loo aotele atu ai le autu o le mataupu; (2) “Mai le Soifuaga o Iosefa F. Samita,” o loo faapupula atu ai aoaoga o le mataupu e ala i se faataitaiga mai le soifuaga o Peresitene Samita po o lona atamai; (3) “Aoaoga a Iosefa F. Samita,” o loo tuuina atu ai aoaoga faavae taua mai le tele o ana savali ma saunoaga; ma le (4) “Fautuaga mo Suesuega,” o loo uuna’ia ai iloiloga ma suesuega a le tagata lava ia, o isi talanoaga, ma le faaaogaina po o le faatatauina i o tatou olaga e ala i fesili.
E Faapefea ona Faaaoga Lenei Tusi
Mo suesuega a le tagata lava ia. Ua faamoemoe lenei tusi e faalautele ai le malamalama o tagata taitasi e uiga i mataupu faavae o le talalelei na aoaoina malosi mai e Peresitene Iosefa F. Samita. O le faitauina ma le agaga tatalo ma le suesue loloto i ai, o le a maua ai e tagata taitoatasi sana lava molimau i nei mea moni. O le a faaopoopo atu foi lenei lomiga i le potutusi faaletalalelei a tagata o le ekalesia, ma o le a avea o se punavai taua o faamatalaga mo aoaoga faaleaiga ma suesuega i le fale.
Mo talanoaga i sauniga po o fonotaga i Aso Sa. O lenei tusi e mo le korama a le Perisitua Mekisateko ma le Aualofa i fonotaga i Aso Sa. E tatau i faiaoga ona taula’i atu i le aano o le tusi ma mau e faasino i ai, ma faaaoga fesili o loo i le faaiuga o le mataupu e uuna’ia ai talanoaga po o fetufaaiga i le vasega. O le iloiloina o fesili a o le’i suesue i upu a Peresitene Samita o le a mafai ai ona maua se malamalamaaga faaopoopo i ana aoaoga.
E ao ona mata’itu sauniga po o fonotaga o le Aso Sa i mataupu faavae o le talalelei, o faataitaiga faaletagata e aoao atu ai nei mataupu, ma molimau o le upumoni. Afai e sailia ma le lotomaualalo e faiaoga le Agaga i le sauniuniga ma le taitaiina o le lesona, o i latou uma lava e auai o le a faamalolosia i lo latou malamalama i le upumoni. E tatau i faiaoga ona faamanatu i tagata o le vasega e aumai a latou tusi i a latou vasega ma e tatau ona faamamaluina sauniuniga a tagata e ala i le aoaoina atu mai afioga a Peresitene Iosefa F. Samita. O le faitauina o le mataupu ae le’i oo i le vasega, o le a saunia ai tagata e fea’oa’oa’i ma siitia e le tasi le isi.
E le tau manaomia le toe faatau e tagata o ni tusi faaopoopo o faamatalaga ma tusi e maua mai ai faamatalaga e lagolago ai mataupu ua i ai i le tusi. Ua uuna’ia tagata e liliu atu i tusitusiga paia po o mau ua fautuaina atu mo suesuega atili o le aoaoga po o le mataupu faavae.
Talu ai o lenei tusi ua fuafuaina mo suesuega a le tagata lava ia ma tusi foi e maua mai ai faamatalaga faaletalalelei, e tele mataupu ua uumi tele mo le aoaoina atoa i se vasega. O le mea lea, e taua ai lava le suesue i le aiga ina ia maua ai le atoaga o aoaoga a Peresitene Samita.
I au suesuega, talosia ia e iloaina ai lenei perofeta lotomaualalo, faamaoni, ma le lē fefe a le Atua, le Susuga a Peresitene Iosefa F. Samita. Talosia ia e talia lenei fautuaga “ia filifili le mea sa’o aua e sa’o, ma ona e fiafia lou loto i le mea sa’o, ma ona e silisili i lo mea uma.”6 Talosia ia e auai faatasi atu ma Peresitene Samita a o ia molimauina le mana o le talalelei a Iesu Keriso: “O lo tatou faatuatua i aoaoga faavae ua toefuataiina mai … ua faamaonia ai ma faamalolosia i tatou ma faatuina i luga atu o se masalosalo po o se lē malamalama, lo tatou faatuatua ma le talitonuga i le misiona paia a le Alo o le Atua.”7