Perisitua, o le Malo Paia

O le perisitua paia o le pule ma le mana o le Atua ua tuuina mai i le tagata e pulea ma faamanuia ai ona tagata.

Mai le Soifuaga o Iosefa F. Samita

Ina ua 28 ona tausaga, sa auauna Iosefa F. Samita o se failautusi i le Aufono a le Au Peresitene Sili ma le Korama a le Toasefululua. I le aso1 o Iulai 1866, ina ua tolopo le fono tatalo masani a le Aufono, sa folafola ai e Peresitene Polika Iaga i le au uso: “Ou te lagona i taimi uma le fiafia pe a uunaia a’u e le Agaga. Ua ou mafaufau ia faauuina ia le uso o Iosefa F. Samita i le Au Aposetolo, ma avea o se tasi o o’u fesoasoani.” Sa ia valaauina Au Uso taitasi e faaali o latou lagona e uiga i le valaauga, ma e sa latou lagolagoina uma ia Peresitene Iaga ma le “loto fiafia.”

Ona tuu faatasi lea o o latou lima i luga o le ulu o Iosefa F., ma sa faapea mai ia Peresitene Iaga: “Le uso e Iosefa F. Samita, ua matou tuu faatasi o matou lima i luga o lou ulu i le suafa o Iesu Keriso, ma i le pule o le Perisitua Paia matou te faauuina oe e avea o se Aposetolo i le Ekalesia a Iesu Keriso o le Au Paia o Aso e Gata Ai, ma avea o se molimau faapitoa i atunuu o le lalolagi. Matou te faamauina i ou luga le pule uma, mana ma ki o le Au Aposetolo paia; ma e matou te faauuina oe e avea o se fesoasoani i le Au Peresitene Sili o le Ekalesia ma le malo o le Atua i luga o le fogaeleele. O nei faamanuiaga matou te faamauina i ou luga i le suafa o Iesu Keriso ma i le pule o le Perisitua Paia. Amene.”¹

I le aso 8 o Oketopa, 1867, sa taliaina ai ma lagolagoina Iosefa F. Samita ma faamanuiaina o se tasi o le Korama a Aposetolo e Toasefululua i le konafesi aoao, o se laasaga taua i lona soifua tautua o se tasi o le aufono o le perisitua o loo pulea le Ekalesia. I le taimi o lana auaunaga i le sili atu i le 50 tausaga, o lona silafia tele ma le atamai i le pulega o le perisitua ma le Ekalesia sa faamanuiaina ai le Ekalesia i le lalolagi atoa.

Aoaoga a Iosefa F. Samita

O le perisitua o le pule e pulea ma faamanuia ai e le Atua ona tagata.

O le Perisitua Paia o le pule ua tuuina mai e le Atua i le tagata, e mafai ai ona ia ta’u atu le finagalo o le Atua e peiseai ua i ai iinei agelu e tauina atu e i latou lava; ua mafai ai ona faamanaina tagata e fusifusia i le lalolagi mea o le a fusifusia i le lagi, ma soo se mea e tala i le lalolagi ia tatalaina i le lagi; ina ia mafai ai e le upu a tagata, ua tuuina atu i le malosi o lena mana, ua avea ma finagalo o le Alii, ma tulafono a le Atua i tagata, tusitusiga paia, ma poloaiga paia. … O le pule e pulea ai e le Alii Silisiliese ona tagata, ma avea ai, i le taimi o le a oo mai, ma ia pulea ai atunuu o le lalolagi.²

E tele mea e mafai ona tauina mai e faatatau i le pule ma aia o le perisitua. O le mataupu maualuga o malo ma faalapotopotoga, e taitaiina ai galuega ma le malosi o tagata o le Atua i soo se augatupulaga. O le mataupu e pulea ai e le Atua Silisiliese ia Lona atulaulau. O le mataupu o loo pulea ai le Ekalesia a Iesu Keriso o le Au Paia o Aso e Gata Ai. … O le pule ua faaali mai e le Atua ma toefuataiina mai i le fanau a tagata mo le latou puleaina ma le taitaiina o le atinaeina o Siona ma le folafolaina o le Talalelei i atunuu o le lalolagi, seia maua e atalii ma afafine uma o Atamu le avanoa e faalogo ai i le leo o le Talalelei, ma aumai ai i le malamalama o le upumoni, e le gata i luga o lenei fogaeleele, ae faapea foi i le lalolagi o agaga.³

[O le] Perisitua Mekisateko po o le Perisitua Paia. … o le pule e mafai ai e tagata taitoatasi poo. … korama. … o loo aofia ai i le perisitua a le Ekalesia, ona galue i le suafa o le Alii; poo le avea ma sui e faagaoioi, taitaiina, vaavaaia, puleaina poo le faamalumalu, o le aia ma le pule, o loo i le Aiga Atua ae ua tuuina atu i tagata mo le faamoemoe o ana aoaoga, o le aumaia i totonu o le Ekalesia, o le taitaiga faaleagaga ma le faaletino, o le puleaina ma le faaeaina.⁴

Ua faatuina e le Alii i le fogaeleele le Perisitua i lona atoatoaga. … e ala mai faaaliga tuusao ma poloaiga mai le lagi; … ua ia faatulagaina se faatulagaga poo le malo ua sili atu lona maoae, ua maoae nai lo le atamai ma le aoaoga ma le malamalama o tagata, e pei ona i ai, e foliga mai ua le gafatia e le mafaufau o le tagata, e aunoa ma le fesoasoani a le Agaga o le Atua, ona malamalama i le matagofie, mana, ma le uiga o le Perisitua Paia. E foliga e faigata i le tagata ona malamalama i le galuega a le Perisitua, o lana pule e tatau ai, o lona mana; ae peitai i le malamalama o le agaga e faigofie ona malamalama ai.⁵

Poo le a lava le le atoatoa o loo latou o i ai, ua faaofuina alii i lenei pule, e mafai ai ona latou tautala atu ma galulue i le suafa o le Tama ma le Alo, ma ua i ai le Atua, pe afai latou te tautala i lona Agaga i le faatunuuina o o latou tiute e faapei o ana auauna, ia faamamalu ma faataunuu mea ua latou fai mai ai, aua ua latou tautala ma le pule ua ia tuuina mai. … Ioe, e ao ona faia mea uma i le amiotonu. E lē faamamaluina e le Atua se tagata na te faia se mea i le amiolētonu. Ae afai e faia e le tagata o loo umia le perisitua le mea amiotonu, ua noatia foi le Atua na te faailoa maia e faapei na Ia faia lava e Ia.⁶

O le fatu po o le autu o le mataupu e faapea: ua faatuina e le Alii lana Ekalesia, faatulaga lana Perisitua, ma tuuina atu le pule i luga o nisi o tagata taitasi, aufono ma korama, ma o le tiute o tagata o le Atua le ola ina ia latou iloa ai e talia e ia nei mea.⁷

E ui lava o le perisitua ua na o alii ua faaee atu i ai, ae ua faamanuiaina uma ai lava alii ma tamaitai.

O le Perisitua sa muai faataunuuina i le faatulagaga faapeteriaka; o i latou sa i ai le perisitua sa faaaoga lo latou mana, muamua ona o le aia o i latou o ni tama. E faapei foi ia Elohima. O le tautinoga muamua ma le malosi i lo tatou alofa, faaaloalo ma le usiusitai o loo faalagolago i luga o le manatu o ia o le Tama, o le Foafoa o tagata uma. … O alii ua umia le Perisitua paia ua tatau ai. Ae a faapea o alii i luga o le fogaeleele ua le mafai ona galulue mo le Atua e avea ma ona sui e aunoa ma se pule, valaauga ma le faauuga o le a mulimuli mai. E leai se aia a se tagata e ave ai lenei mamalu mo ia lava, seia vagana ua valaauina o ia e le Atua e ala i faatulagaga ua ia silafia ma faamamaluina.⁸

O le faatulagaga faapeteriaka e paia lona amataga ma o le a faaauau pea seia oo i le faavavau. … O alii, tamaitai ma tamaiti e ao ona malamalama i lenei faatulagaga ma lenei pule i le aiga o le Atua, ma saili e faia e pei ona finagalo i ai le Atua, o le faailogaina ma le sauniga mo le faaeaga maualuga o lana fanau.⁹

Poo a lava ia mamalu, avanoa, poo paia e maua e le tane e ala i le Perisitua, e maua foi ma fiafia ai le ava. Ua tasi i la’ua ia Keriso, o ona mamalu uma o ona mamalu foi ia, o ona faamanuiaga o ona faamanuiaga foi ia, o ona paia o ona paia foi ia, aua ua tasi i la’ua—e le mavaevae. … E pei ona fai mai Paulo, “E leai se tane pe a le o i ai se fafine, e leai foi se fafine pe a leai se tane i le Alii.” [tagai 1 Korinito 11:11.] I se isi faaupuga, e le mafai ona maua e le tane le paia, mamalu poo le faaeaga e aunoa ma le fafine, e le mafai foi e le fafine e aunoa ma le tane. Ua fesoasoani le tasi i le isi ina ia maua ai le tasi. … O le Perisitua o le Alo o le Atua ua faauuina i luga o le tane, o le mauaina o lea lava tulaga maualuga ma le atoatoa, e mafai ai ona ia galue e faapei o Keriso ma faapei o le Atua. … E ui o le tane. … ua tuusao mai i ai le mana ma le mamalu o le Perisitua, ma o ia o lē na te faataunuuina le galuega, e maua foi e le fafine faamanuiaga, o ona mana, o ona aia ma avanoa, faatasi ma ia o se vaega e faaatoatoa ai o ia lava. … O le mana e le tuuina i le fafine e galue toatasi ai o ia mai le tane, e le mafai foi ona tuuina i le tane e galue toatasi ai o ia mai ia Keriso.¹⁰

Ua i ai i fafine po o tamaitai le matafaioi mo a latou lava amioga e faapei foi ona i ai i luga o tane mo a latou gaioiga, e ui o le tane, o loo umia le pule o le perisitua, ua ta’ua o le ulu, o ia o le taitai. … I le ma lea, afai tatou te talanoa agai i tane, ua talanoa foi agai i fafine, aua ua i ai faatasi le fafine ma le tane ma e le mavaevae i la’ua o se vaega o tagata soifua.¹¹

E manaomia ki o le perisitua mo le puleaina o le Ekalesia.

O le Perisitua i lona aotelega o le pule ua tuuina mai i alii latou te galulue ai mo le Atua. O alii taitasi ua faauuina i soo se vaega o le Perisitua ua i ai lenei pule ua tuuina atu ia te ia.

Ae peitai o gaioiga uma e faia i lalo o lenei pule, e ao ona faia i le taimi ma le nofoaga e tatau ai, i le auala e tatau ai, ma mulimuli i le faatulagaga e tatau ai. O le mana e taitaiina ai lenei galuega ua i ai lea i ki o le Perisitua. I lona atoatoaga, o ki e umia e le tagata e toatasi i taimi taitasi, o le perofeta lea ma le Peresitene o le Ekalesia. E mafai ona ia faamatuu atu se isi vaega o lenei mana i se tasi, i lea tulaga o lena tagata ua umia ki mo lena matafaioi faapitoa. O lea, o le Peresitene o le malumalu, o le Peresitene o le siteki, o le epikopo o le uarota, o le Peresitene o le misiona, o le Peresitene o le korama, ua taitasi ma umia ki o galuega e faataunuuina mo lena vaega poo le nofoaga faapitoa. O lona perisitua ua le faalauteleina ona o lona valaauga faapitoa;… o le Peresitene o le korama a toeaina, mo se faataitaiga, ua le sili ae lona perisitua nai lo i latou o loo i ai i le korama. A ua ia umia le mana e taitaiina ai le galuega faatulagaina e faia e le korama, pe a tuu i se isi faaupuga, o ki o lena vaega o le galuega.¹²

[O le] Peresitene o le fofoga taumomoli o le Atua, o le tali faaaliga, o le faamatala upu, o le tagata vaai, ma o le Perofeta a le Atua mo le Ekalesia atoa. O ia o loo umia ki o lenei Perisitua Paia—o ki e talaia faitotoa o le Malumalu o le Atua ma sauniga o lona maota mo le faaolataga o le ua ola ma le faasaoina o le ua oti. O ia o loo umia le mana e faamau ai, e mafai ai e tagata ona fusifusia i le lalolagi e pei ona fusifusia i le lagi, ma mafai ai e alii ua tofia ma valaauina e ia o le ua umia ki ona tālā i le lalolagi e pei ona talaia i le lagi. O le faatulagaga lenei o le Perisitua Paia.¹³

O le Perisitua e puleaina pe taitaiina i le tulafono o le alofa.

Ua faaali mai e le Alii le mataupu sili o le faatulagaga, e taitaiina ai lana Ekalesia, sa faatuina e le Alii lava ia i le Ekalesia, o le mana o le Perisitua Paia, o le Perisitua Maualuga, o le Au Aposetolo, o Fitugafulu, ma Toeaina, ma le faatulagaga o le Perisitua Maulalo— o le Epikopo, o Ositaulaga, o Aoao, ma Tiakono—Ua faatuina e le Atua nei faatulagaga i le Ekalesia mo le puleaina po o le taitaiina o tagata. Aisea? E faatigaina ai i latou? Leai. E faamanualia ai i latou? Leai, mo le afe o taimi, leai. Ae mo le a? Ina ia manuia ai i latou ma a latou fanau i nei faatulagaga mo aoaoga, mo fautuaga, mo taitaiga, mo faaaliga, mo musumusuga e faia ai le mea ua finagalo i ai le Alii mai ia i latou, ina ia atoatoa i latou i o latou soifuaga.¹⁴

Ua taitaiina i tatou e le tulafono, ona tatou te alolofa le tasi i le isi, ma ua uunaia e le onosai ma le alofa mama, ma le agaga lelei; ma o la tatou faalapotopotoga atoa ua faavae i luga o le manatu o le amio pulea; o le mataupu o le fetufaai, ma le agaga ina ia tiga i le sese nai lo le fai o le sese. O la tatou savali o le filemu i le lalolagi ma le finagalo alofa i tagata; alofa, alofa mama, ma le faamagalo atu, e ao ona uunaia ai i latou uma ua i ai i le Ekalesia a Iesu Keriso o le Au Paia o Aso e Gata Ai. O la tatou [Ekalesia] o le Ekalesia e faamalosia ai le tulafono, ae o le tulafono o le tulafono o le alofa.¹⁵

E leai se tagata e tatau ona tigaina. E leai se pule i le Perisitua e taitaiina pe tuuina atu i soo se tulaga amioletonu, e aunoa ma le faatiga ai i le Atua. O lea, afai tatou te feutagai ma tagata e lē tatau ona tatou feutagai ma i latou ma le faamaualuga i o tatou mafaufau.¹⁶

E leai se alii e umia se tofiga faaletaitai i le Ekalesia, e mafai ona faia lona tiute e pei ona tatau ai i se isi agaga ese mai i le agaga faaletamā ma le faaleuso ia i latou o loo ia pulefaamalumalu ai. O i latou ua i ai le pule e lē tatau ona avea ma pule, poo taitai pulepule tutū; e le tatau ona pule saua; e ao ona latou manumalo mai loto, le faatuatuaga ma le alofa o i latou ua latou taitaiina, i le agalelei ma le alofa faamaoni, i le agamalu, i le faatauanau atu, i faataitaiga ua sili atu i lo le faaalia o le lē malie ma e lē popole i faitioga lē tonu. I lenei auala, i le agalelei o o latou loto, i lo latou alofa mo o latou tagata, ua latou taitaiina i latou i ala o le amiotonu, ma aoao i latou i ala o le faaolataga, e ala i lo latou faapea atu ia i latou, i mataupu ma faataitaiga: Mulimuli mai ia te au, e pei ona ou mulimuli atu i lo tatou taitai.¹⁷

Faamamalu i le mana ma le pule o le perisitua paia.

O se mea talafeagai ia i tatou ona talia ma faamamalu i le Perisitua Paia ua toefuataiina mai i le lalolagi i lenei tisipenisione, e ala ia Iosefa le Perofeta. Ou te iloa ua lelei lena, aua ua fuafuaina e faatuina le upumoni, ma talia le Ekalesia, ma saunia tagata i le poto, i galuega lelei, i le faamaoni i le faamoemoega o le Alii, ma e alagatatau mo le taitaiina sa’o o tagata o le Atua i le lalolagi, ma le puleaina o i tatou taitoatasi, taitaiina o o tatou aiga, le puleaina o a tatou mataupu faaletino ma le faaleagaga, a tagata taitoatasi faapena foi ma le aotelega.¹⁸

Ia faamamalu i lena mana ma le pule ua tatou taua o le Perisitua Paia, e tusa ma le faatulagaga a le Alo o le Atua, ma ua tuuina atu i luga o alii e le Atua lava ia. Ia faamamalu i lena Perisitua. O le a lena Perisitua? E le sili ae pe itiiti ifo foi nai lo le pule paia ua faamatuu atu i le tagata mai le Atua. O le mataupu lena e ao ona tatou faamamalu i ai. … O le Perisitua a le Alo o le Atua e le mafai ona faaaogaina i se isi lava tulaga lē amiotonu, e faapena i lona mana, i lona mama ma le pule ona i ai i se tasi ua faifai mea leaga, ua faalata i lona loto agai i le Atua ma agai i ona uso a tagata. O le a lē i ai le malosi ma le mana i lē ua lē faamamalu i lona olaga e ala i le usiusitai i mea ua manaomia ai e le lagi.¹⁹

Pe e te faamamaluina ea lenei Perisitua?… Pe mafai e oe o loo umia le Perisitua, ma o loo i ai le aia ma le pule mai le Atua e taitai ai i le suafa o le Tama, ma le Alo, ma le Agaga Paia, ona solia le faatuatuaga ma le alofa o le Atua, le faamoemoe ma le finagalo o le Tama o i tatou uma? Auā, i le tuuina mai o lena ki ma le faamanuiaga i o outou luga, ua ia finagalo ma manaomia outou ina ia faalautele i o outou valaauga.²⁰

Afai tou te faamamalu muamua outou i le Perisitua paia, o le a outou faamamalu foi ia i latou o loo taitaiina outou, ma e o loo faataunuuina valaauga eseese, i le Ekalesia aoao.²¹

E lē. … lelei i tagata o le Au Paia ma fanau a tagata o le Au Paia ona latou manatu faatauvaa i lenei mataupu paia o le pule ua faaali mai le lagi i le tisipenisione o loo tatou ola ai … E paia, ma e ao ona tausia i le paia e tagata. E ao ona faamamaluina ma faaaloalogia e i latou, poo ai lava ua umia, ma poo le a lava le valaauga ua tofia i ai i le Ekalesia. O alii talavou ma tamaitai talavou ma tagata i le tulaga lautele, e tatau ona faamamalu i lenei mataupu ma ia iloa o se mea e paia, ma e le mafai ona ta’u faatauvaaina pe ta’umāmāina foi e aunoa ma se faasalaga. O le faatuatuanai i lenei pule e taitaiina ai i le pogisa ma le liliuese, ma aveesea mai ai aia tatau uma ma faamanuiaga o le maota o le Atua; aua o le mana o lenei pule e faataunuuina ai sauniga o le talalelei i le lalolagi atoa ma nofoaga paia uma, ma a aunoa ma lea e le mafai ona faataunuuina. O i latou ua umia lenei pule e ao ona latou faamamalu i ai ia i latou lava. Ia ola i latou ina ia agavaa mo le pule ua tuuina atu ia i latou ma ia agavaa mo meaalofa ua tuuina mai ia te i latou.²²

Fautuaga mo Suesuega

O le a le Perisitua? O le a le faamoemoega ua tuuina mai ai e le Alii i le tagata le pule o le perisitua?
E faapefea ona tatou “malamalama i galuega o le Perisitua”?
O a ni auala e maua ai e alii ma tamaitai ia faamanuiaga, mana, ma avanoa o le perisitua?
E faapefea ona faamanuiaina lou olaga ona o le perisitua? E faapefea ona faamanuiaina ai i latou i lou aiga?
O a ki o le Perisitua? Aisea ua tuuina mai ai? O ai e umia ki uma o le Perisitua? O ai e umia ki i le tulaga o le uarota ma le siteki?
O le a le agaga e ao i e ua umia le perisitua ona faataunuu ai o latou tiute? (Tagai MFF 121:41–46.) O a aafiaga o le ua umia le perisitua i le aiga ma le Ekalesia pe a ia faaalia le “alofa faamaoni” ma le “agalelei o le agaga”?
E mafai faapefea ona tatou faamamalu i le perisitua ma tausia le paia? O a ni auala tatou te manatu mama ai i lenei pule paia?
E faapefea e le faataitaiga a le Faaola ona fesoasoani tatou te malamalama ai i le ala e faaaoga ma faamamalu ai le pule o le perisitua?

Joseph F. Smith — O Peresitene Iosefa F. Samita i le 1860, o se uso o le Korama a le Au Aposetolo e Toasefululua ma o le Fesoasoani ia Peresitene Polika Iaga.