Faamalolosia o Aiga i Afiafi Faaleaiga

O afiafi faaleaiga e faamalosia le alofa i totonu o le aiga ma le faatuatua i loto o tagata taitasi o le aiga.

Mai le Soifuaga o Iosefa F. Samita

Sa pele ia Peresitene Iosefa F. Samita, lona aiga, o le mea moni e matua taua naua. Sa ia saunoa soo ma le malamalama i le “aiga paia faauuina” ma faapea mai “o le faavae lava o le malo o le Atua, o le amiotonu, o le alualu i luma, ma le atinaeina” ua faatuina lava lea i le aiga.¹

I le 1915 sa amataina ai e Peresitene Iosefa F. Samita ma ona Fesoasoani ia le polokalama o afiafi faaleaiga i vaiaso taitasi i le Ekalesia, ma faamalosi atu i matua e faaaoga le taimi lea e aoao ai a latou fanau i le finagalo o le Atua. Mulimuli ane, ao ia faamatala le polokalama o afiafi faaleaiga, sa valaauina e Peresitene Samita ia aiga ina ia “faaalu se itula pe sili atu e faatasi ai i se sauniga— o le lagiina o viiga, pese, tatalo, faitauina o tusitusiga paia ma isi tusi lelei, o laau faamusika, o mataupu a le aiga, ma ni aoaoga faapitoa i mataupu o le talalelei ma faafitauli o le olaga, faapea foi ma tiute ma galuega a le fanau i matua, le aiga, le Ekalesia, nuu ma le atunuu.”²

O le polokalama o afiafi faaleaiga ua faaalia ai le molimau maumaututu a Peresitene Samita e faapea o le “tiute taua ma le sili ua tuuina mai i nei tagata o le aoaoina lea o a latou fanau mai le taimi na fananau ai seia avea ma ni alii ma tamaitai, i mataupu uma o le talalelei, ma taumafai, pe a faapea e i ai i le malosi o matua, e faamatuu atu i o latou loto le alofa o le Atua, le upumoni, mama, faamaoni, mamalu ma le faamaoni i mea uma e lelei.”³

I le 1917 sa lipoti atu ai e Peresitene Samita i le Au Paia e faapea o afiafi faaleaiga sa “faia e le tele o aiga, ma o ni afiafi manaia tele ma le aoga sa faaaluina.”⁴ O aso nei, ua faaauau pea e le Ekalesia ona faamamafa le tele o mea taua o le uluai polokalama sa faatuina e Peresitene Samita.

Aoaoga a Iosefa F. Samita

Aoao o outou aiga e alolofa ma fiafia i le Atua ma mataupu o le talalelei.

O le faavae sili o le malo o le Atua, o le amiotonu, o e alualu i luma, o le atinae, o le ola e faavavau ma le faateleina e faavavau i le malo o le Atua, o loo i ai i le aiga paia ua faauuina.⁵

O le aiga “Mamona” masani o le fale o se malumalu lea o le aiga, ua faatasitasi mai i ai tagata o le aiga i le taeao ma le afiafi, mo le tatalo ma le viiga i le Atua, e ofoina atu i le suafa o Iesu Keriso. … O iinei o loo aoaoina ai ma faamalosi lemu ai, manatu mama ma upumoni o le talitonuga, afai e tauave faatasi, e avea ma amiotonu e faaeaina ai se atunuu, ma taofia ai lena agasala lea ua avea ma faafitauli i soo se tagata.⁶

Aoao a outou fanau i le alofa o le Atua. Aoao i latou ina ia fiafia i mataupu o le Talalelei a Iesu Keriso. Aoao i latou e alolofa i o latou uso a tagata, aemaise lo latou alolofa i uso i le Ekalesia, ina ia latou faamaoni ai i a latou fegalegaleaiga ma tagata o le Atua. Aoao i latou e faamamalu i le perisitua, e faamamalu i le pule ua tuuina mai e le Atua i luga o Lana Ekalesia mo le pulea lelei o lana Ekalesia. O le fale o le Atua o le fale e faatulaga tonu, ae le o se fale o le faasoesa… E leai se fale o se fale e faatulaga tonu pe a faapea e le faatulagaina lelei e faapei o le faatulagaga o le Ekalesia a Iesu Keriso o le Au Paia o Aso e Gata Ai.⁷

Ua laitiiti tele le faamaoni faalelotu, alofa ma le matau i le Atua, i le aiga; ua tele naua le faale-lalolagi, manatu faapito, o le matau’a ma le leai o se faaaloalo i totonu o le aiga, semanu ua lē tutupu lava nei mea e tele i fafo atu. O lea, o le aiga o loo manaomia e suia. … Ia avea le alofa, ma le filemu, ma le Agaga o le Alii, agalelei, alofa moni, ositaulaga mo isi, ia tumau i totonu o o outou aiga. Ia faatea ese ia upu mamafa, loto leaga, ita, tautala taufaaleaga, gagana masoa ma manatu le manuia, tau faifai, ma ia avea le Agaga o le Atua e pulea o outou loto. Aoao a outou fanau i nei mea, i le agaga ma le mana, e lagolagoina ma faamalosia e ala i gaioiga faataunuuina. Ia latou iloa tou te naunau malosi, ma ola ai i mea ua outou aoaoina. Aua nei tuuina atu a outou fanau e aoaoina e ni tagata faapitoa i nei mea, ae ia aoao i latou i au lava faatulagana ma faataitaiga, i lo outou lava aiga. Ia avea oe lava ma tagata faapitoa i le upumoni.. Ia avea a tatou fonotaga ma sauniga, o a’oga ma faalapotopotoga, ma fesoasoani ia tatou aoaoga i le aiga, ae aua ne’i avea faapea ona pau na o o tatou faiaoga taitai.⁸

I afiafi faaleaiga, aoao o outou aiga e savavali ma le sao i luma o le Alii.

Matou te fautua atu i tagata o le Au Paia e usiusitai lelei i poloaiga a le Alii o loo tusia i le vaega e 68 o le Mataupu Faavae ma Feagaiga (25–28):

“Ma o lea, afai lava o loo i ai fanau a matua i Siona, poo se siteki ua faatulagaina, e lē a’oa’o ia te i latou ia malamalama le mataupu o le salamo, ma le faatuatua ia Keriso, le Atalii o le Atua soifua, ma le papatisoga ma le meaalofa o le Agaga Paia i le faaeeina o lima, pe a valu tausaga o lona matua, o le a pa’ū lea agasala i matua;

“Aua o le a avea lenei mataupu ma tulafono i e nonofo i Siona, po o soo se tasi o ona siteki ua faatulagaina.

“O le a papatisoina foi a latou fanau mo le faamagaloina o a latou agasala pe a valu tausaga le matua, ma maua le faaeega o lima.

“O le a latou aoao atu foi i a latou fanau ia tatalo, ma savavali tonu i luma o le Alii.”

O fanau a Siona e ao ona usiusitai lelei i poloaiga a le Alii ua tuuina mai i Isaraelu anamua, ma toe faamanatu mai ai i tagata o le Au Paia: “Ia e ava i lou tama ma lou tina; ina ia faalevalevaina ai ou aso i le nuu ua foaiina mai e le Alii lou Atua ia te oe.” [Esoto 20:12.]

O nei faaaliga ua faaaogaina ma le malosi tele mo tagata o le Au Paia, ma ua manaomia ai tama ma tina i lenei Ekalesia ina ia aoaoina nei poloaiga ma faaaogaina i o latou aiga.

O lenei la, matou te fautua atu ai ma uunaia le amatalia o “Afiafi Faaleaiga” i le Ekalesia aoao, o se taimi e mafai ai e tama ma tina ona faatasitasi o latou atalii ma afafine o loo i ai i le aiga ma aoao i latou i le finagalo o le Alii. Atonu o le a latou aoao atoatoa ai i manaoga ma mea e moomia e o latou aiga, ma o le taimi foi lena e faamasani atili ai i latou lava ma a latou fanau i mataupu o le Talalelei a Iesu Keriso. O lenei “Afiafi Faaleaiga e ao ona faaautu i le tatalo, lagiina o viiga, pesega, musika, faitauga o tusitusiga paia, mataupu faaleaiga ma aoaoga faapitoa i mataupu o le talalelei, ma faafitauli e uiga i le soifuaga, atoa ai ma tiute ma galuega fai a fanau i matua, le aiga, le Ekalesia, nuu ma le atunuu. Mo tamaiti laiti o tauloto talafeagai, pese, tala ma taaloga e ao ona faia. E mafai ona faia sina taumafataga mama e saunia i le aiga.

O le faamamalu ma le faamaaa e tatau ona taofia, ma e tatau i tagata uma o le aiga ona auai i gaioiga.

O nei faatasiga o le a maua ai avanoa e maua ai le faatuatuaga feavatai i le va o matua ma fanau, i le va o tuagane ma tuafafine, atoa ma le maua ai o le avanoa mo upu o lapataiga, fautuaga ma aoaoga mai matua i o latou atalii ma afafine. O le a latou tuuina atu ai le avanoa mo tama ma teine e ava i le tama ma le tina, ma faaali atu ai lo latou faafetai ona o faamanuiaga o le aiga ina ia mafai ai ona faataunuuina le folafolaga a le Alii ma ia faalevalevaina ai o latou ola ma ia maua ai le fiafia. …

Matou te… talosaga atu i au ofisa uma o faalapotopotoga o ausilali i le Ekalesia aoao e lagolagoina lenei polokalama ma uunaia le autalavou ina ia i ai i le aiga i le afiafi lena, ma tuuina atu lo latou tomai ina ia avea o se polokalama e aoao ai, aoga ma fiafia ai.

Afai e usiusitai le Au Paia i lenei fautuaga, matou te folafola atu o le a maua ai faamanuiaga silisili. O le alofa i le aiga ma le usiusitai i matua o le a faatupulaia. O le a atinaeina le faatuatua i loto o le autalavou o Isaraelu, ma o le a latou maua le malosi e teena ai aafiaga a le tiapolo ma faaosoosoga e oo mai ia i latou.⁹

I le Ekalesia aoao o loo i ai le agaga o le galulue faatasi, galulue malosi, ma le faatuatua. … O le faatomuaga o le polokalama o afiafi faaleaiga ua avea ma fesoasoani i lenei taitaiga. E tasi le afiafi i le vaiaso… mo le malologa o le aiga, faaleleia ma le fiafia e taitaiina i le faaaloalo ma le agaga o le talitonuga, ua faamaonia lona atoatoa i le ala o loo moomia, ma ua tatau ona fautuaina i nofoaga uma.¹⁰

E ao ona tauaveina o tatou tiute ma le faamaoni e faapei o matua i Siona.

Ua tatou faitau i le Tusi o le Mataupu Faavae ma Feagaiga e manaomia e matua le aoao o a latou fanau “ia malamalama i mataupu faavae o le salamo, faatuatua ia Keriso le Alo o le Atua soifua, ma le papatisoga ma le meaalofa o le Agaga Paia e ala i le faaeeina atu o lima pe a valu tausaga le matua.” “E ao foi ona latou aoao a latou fanau e tatalo ma savavali i le ala sa’o i luma o le Alii.” Afai e faatamala matua i le faia o nei mea, ma ua o ese le fanau ma liliu ese mai le upumoni, ona fetalai lea o le Alii e faapea o le agasala o le a i luga o ulu o matua [MFF 68: 25, 28]. …

E ao ona tatou iloa lelei atu o mea tatou te fai, ma vaai ia tatou faia o tatou tiute i le faamaoni e faapei o matua i Siona. O ava e ao ona faatasia ma a latou tane, o tane foi ma ava, i le tuuina atu o lo latou faatosinaga i luga o a latou fanau i le ala lenei. … O la’u fanau e le tatau ma o le a lē o ese mai e aunoa ma lo’u maliega. Afai ua liliuese i latou, ua tetee, ma ua faasagatau i la’u faataitaiga. O le a ou oleole atu i la’u fanau; o le a ou taumafai i le malosi uma ua ou maua ina ia latou faamaoni ma faatuatua i lenei talalelei e pei ona ou mafaia ai ona fai; aua a aunoa ma i latou uma i le malo o le Atua ou te lagona o le a le atoatoa lo’u aiga. …

Ou te manao i la’u fanau, ma fanau uma i Siona, ia latou iloa e leai se mea o i ai i lenei lalolagi e i ai sona taua sili ia i latou nai lo le malamalama o le Talalelei e pei ona toefuataiina mai i le fogaeleele i aso nei e gata ai e ala i le Perofeta o Iosefa Samita. E leai se mea e mafai ona tauia ai pe a leiloa. E leai se mea oi le lalolagi e mafai ona faatusatusa ma le atoatoa i le atamai o Iesu Keriso. E ao loa, i matua uma i Siona ona tausi ia latou fanau, ma aoao ia i latou mataupu o le Talalelei, ma taumafai i le mea e sili ona mafai mo le faia o o latou tiute—e le na ona tau ina fai ona ua uunaia i latou e fai, ae taumafai ina ia oo i totonu o loto o le fanau le agaga o le upumoni atoa ai ma le alofa moni mo le Talalelei, ina ia latou le na ona fai o o latou tiute ona e maua ai le fiafia e o latou matua, ae e maua ai foi le fiafia e i latou lava.¹¹

Ou uso e ma tuafafine pele, tausi lelei ia outou fanau; aoao i latou a o laiti i mataupu o le upumoni; aoao i latou e ola i se olaga mama, ia i ai le faatuatua i le Atua, ma ia valaau atu i le Alii i le faatuatua ina ia latou maua ai le faatasiga atoatoa ma le Alii ma avea ma suli o le faaolataga i Lona malo.¹²

Fautuaga mo Suesuega

O a auala e faatuina ai le faavae o le malo o le Atua i le aiga? O a ni mataupu taua e ao ona aoaoina i le aiga e mafai ona saunia e faamalosi ai lo tatou atunuu?
E faapefea ona tatou aoao a tatou fanau e alolofa i le Atua ma alolofa i isi tagata? E faapefea ona tatou aoao i latou e faamamalu i le perisitua?
O le a le fautuaga na tuuina mai e Peresitene Samita mo le faateleina o le galulue malosi i le faatuatua ma faaitiitia le faalelalolagi i o tatou aiga? O faapefea ona e taumafai e faamulimuli ia manatu faale-lalolagi i lou aiga?
E faapefea e le afiafi faaleaiga ona fesoasoani i matua e tausia ai poloaiga ua tuuina mai e le Alii i le Mataupu Faavae ma Feagaiga 68: 25–28? E faapefea e le afiafi faaleaiga ona fesoasoani i le fanau e tausia le poloaiga o loo tusia i le Esoto 20:12?
O a faataitaiga ua fesoasoani ia te outou e faataunuuina ai afiafi faaleaiga i le atoatoa? O a taiala na tuuina mai e Peresitene Samita mo afiafi faaleaiga?
O a faamanuiaga e oo mai ia i latou o e fai afiafi faaleaiga? O a ni taunuuga o le lē faia o afiafi faaleaiga?
Aisea e le tatau ai ona tatou fiu i le faia o o tatou tiute o ni matua e aumaia o tatou aiga i le upumoni? (tagai foi 3 Ioane 1:4; Mosaea 27:14.)
Aisea e tatau ai i tane ma ava ona “tutu faatasi… i le tuuina atu o o latou faatosinaga i luga o a latou fanau”? E faapefea e tane ma ava ona faato’aina pe atinae lenei tulaga autasi?

Smith family — Tagata o le aiga o Peresitene Iosefa F. Samita i le Aai i Sate Leki i le 1891. Na ia saunoa, “Ou te manao i la’u fanau, ma fanau uma a Siona, ia latou iloa e leai se mea o i lenei lalolagi e tutusa lona taua ma le malamalama o le Talalelei ia te i latou” (*Deseret News: Faalua I le Vaiaso*, 28 Iuni 1898, 1).