O Le Faasoasoa ma le Faautauta o Tupe, o le Faavae o le Manuia

E ao ona tatou totogi a tatou aitalafu ma faasaoina mea manaomia ina ia mafai ona lelei la tatou auaunaga i le malo o le Atua.

Mai le Soifuaga o Iosefa F. Samita

I le 1918 na tusia ai e Iosefa F. Samita se tusi i lona atalii na ia faamatala ai ni aoaoga e faatatau i le Kerisimasi mai lona talavou a o “mativa pea” lava o ia. Sa ia faapea mai i le amataga o lona olaga ina ua faaipoipo: “Sa ou lē aitalafu i se tasi i na aso uma, ma e sa ou galue—sa ou lē nofonofo.” Sa ia faapea mai o ia ma lona aiga sa galulue “ma tauivi” ma lo matou malosi atoa ina ia tuufaatasia le agaga ma le tino. O nei tulaga sa ia alu ai ae toeititi oo i le Kerisimasi ma le manatu e faia se mea faapitoa mo lana fanau. Sa ia faapea mai, “Ou te manao i se mea e faafiafia ai i latou, ma faailoga ai le aso Kerisimasi mai isi aso uma lava—ae aunoa ma se sene e faataunuuina ai! Sa ou savali agai i luga ma lalo o le Magaala Autu, ma vaavaai i faamalama o faleoloa … ona ou savali faanana mai lea ne’i iloa mai e tagata ma nofo i lalo ma tagi ua faapei o se tamaitiiti, seia oo ina masua ese uma atu lo’u mafatia ma māmā mai le tiga o lo’u loto; ma ina ua mavae sina taimi sa ou toe foi atu i le fale, e aunoa ma se mea e pei o le taimi na ou tuua ai ma matou taaalo ma la’u fanau, i le loto faafetai ma le fiafia ona o i latou. …

“Ina ua mavae nei tofotofoga ma faigata, sa amata ona sologa lelei o’u ala. Sa ou amata ona faaleleia, e ala i le galue malosi, tamaoaiga ua mautu, loto pulea, ma le alofa i le Atua, sa ou manuia.”¹

O Epikopo Charles W. Nibley, o lē sa galulue vavalalata ma Peresitene Samita, na faapea mai: “Sa ia matua faaeteete tele i ana tupe faaalu. … Sa ia inoino i le aitalafu, ma e ou te le’i iloa muamua se tagata sa faamaoni i le vave ona totogi o mea e tatau ona ia totogiina i le pene mulimuli. … Sa ia inoino i le aitalafu; ma sa ia lē faia lava, i lalo o soo se tulaga, ona faaaafia le Ekalesia i lena tulaga. Sa ia lē faaaafiaina foi ia lava i se aitalafu, ae sa ia tausisi pea le faaupuga ua leva, ‘Totogi ona ave ai lea.’²

Sa faamamafa e Peresitene Samita ia le faatinoga o le talalelei ina ua ia aoao atu, “E masani ai lava o se aoaoga taua mo tagata o le Au Paia, o se lotu e leai se malosi e faasaoina ai tagata i le faaletino ma maua ai e i latou le manuia ma le fiafia iinei, e lē mafai ona faalagolago i ai e faasaoina ai i latou faaleagaga, ma faaeaina i latou i le olaga a sau.”³

Aoaoga a Iosefa F. Samita

Aloese mai le aitalafu ona e saoloto ai lea i tulaga tau tupe faapea foi ma le faaleagaga.

O lenei, ou te talitonu faamaoni o se tasi o mafuaaga tupito o le popole po o mafatiaga o loo maua ai i tatou—ma ou te talitonu o le mea foi lea o le a oo i le toatele o loo salalau i le laueleeleo le faaaluina e tagata o tupe sili atu nai le mea latou te mauaina (ua aitalafu). Ua latou nono se tupe tele, mokesi o latou fale, a latou faatoaga, ma toeititi o mea uma ua latou maua, ina ia tali tutusa ma o latou tuaoi, tauva le tasi ma le isi i se faafoliga ma le faia o a latou pisinisi i tulaga faaaitalafu (credit) ua talia ma faaaogaina tele i le lalolagi. …

… O le toatele o i tatou ua nono mai tupe… ina ia faafoliga ai ua tutusa ma o tatou tuaoi, ana tatou le faia lena, ae ola ai i mea ua tatou maua, ma faaputuputu ese mo taimi leaga, o le aso lenei ua avea i tatou ma tagata tutoatasi sili i luga o lenei konetineta. … E tusa ai ma lo’u manatu ou te manao ina ia ou vaai … pe afai tatou te faatau ni mea e tālā le tau, e ao ona tatou totogi le tālā mo le faatau po o se mea foi e fai ma sui o le tālā, ma e tatou te faia e aunoa ma le faatigaina o i tatou lava i le aiga, poo le tauaveina o se mokesi i o tatou luga ma luga o a tatou fanau. O tagata uma lava ua ola i le tulaga faaaitalafu, ua latou tuuina filifili mamafa i ona luga ma luga o lona aiga. …

Pe ua e vaai ea i se tagata ua ola aitalafu ma mokesi ma saisaitia mea ua ia te ia, o saoloto, ola tutoatasi, ma ua fiafia e faapei o le tagata e faatau ma totogi ana mea? E tatau ona tatou ola e tusa ai ma mea ua tatou maua, ma faataatia se faavae e mafai ona tatou atiae ai, ma e mafai ona atiae ai a tatou fanau pe a mavae i tatou, e aunoa ma le totogi o se tupe tului i se aitalafu sa tatou fai ma ua saisaitia ai. Ou te iloa ou te le o folafolaina atu le talalelei o tulaga tautupe o le lalolagi. Ou te manatu ua ou faamanino atu e a’u lava ia se tulaga o loo ta’ua faapea o se tagata e matua’i faaanamuā a’ia’i, e leai se alualu i luma, ma isi mea faapena. O nei fasi fuaitau e lafo atu i tagata e lavātia ta’u atu i tagata ina ia ola i mea ua latou maua. … O nisi o taimi ua tatou i ai i ni tulaga ua alagatatau ai ona tatou nofo aitalafu. Afai e tatau ai, ia faapea ona fai. … Ae ou te le’i talitonu lava na alagatatau mo le soifua lelei o augatupulaga o le vaitaimi nei ma le lumanai, ona saisaitia la’u fanau ona o a’u mea e fai.⁴

O se tulaga faamanuiaina o le a i ai Siona pe a faapea… e mafai ona faamanino lelei i tagata uma o le Au Paia, talavou pe matutua, le leaga o le aitalafu! Ioe, o le a faapea lava, pe a faapea o nisi o avega tauave o le mokesi ma ona faanoanoaga e o mai ai faatasi, o le a lagonaina ma malamalama ai tagata uma ua manatunatu e faamatuu atu lona fale ma le fanua mo se tupe—ina ia malamalama ai i lona pologa ma le mata’utia—ia matua malamalama i ai ma le faaeteete a o le’i faia e pei foi ona o le a ia lagonaina pe a mae’a.⁵

I le taimi o le manuia, … e matua tatau i le tagata o le Au Paia ona alu ese mai le aitalafu. … E mafai ona ou faapea atu, i lona fesootaiga ma le mataupu lenei, o se tasi o auala sili ua ou iloa e totogi ai a’u aitalafu i lo’u uso, o lo’u tuaoi, poo le paaga faipisinisi, o a’u lea ina ia muamua ona totogi a’u aitalafu i le Alii. E mafai ona ou totogi le tele o a’u aitalafu i lo’u tuaoi, pe afai na matou ioe i ai ma i latou, pe a mavae ona ou totogi faamaoni a’u aitalafu i le Alii, nai lo lo’u faagalogalo i le mea lona lua; ma e mafai ona e faia foi le mea lea. Afai ua e naunau ia manuia, ma avea ma alii ma tamaitai saoloto ma ni tagata saoloto, e muamua ona e faataunuu au folafolaga faamaoni i le Atua, ona totogi ai lea o au aitalafu i tagata.⁶

O le taimi lenei mo tagata uma e suesue ai i le tamaoaiga moni, ma ia amata ona faasao ma tuusaoloto i latou mai le nofo aitalafu, ma avea o ni tagata saoloto ma tutoatasi. … Pe ana faapea e fai lava o tatou tiute o tagata o le Au Paia ma ia atamamai i le faaaogaina o mea ua tatou maua, semanu ua i ai le suiga o le tulaga ua tatou i ai, o a tatou galuega o le a faamanuiaina ai i tatou, o le a fua tele mai le laueleele, o le a matua faateleina a tatou seleselega ma tatou olioli ai; aua o le a liligi mai e le Atua Lona agalelei i luga o Ana fanau faatuatua. … O le taimi lenei e faaitiitia ai le faaalu o tupe. O le taimi lenei e faaitiitia ai i lalo le manao tele ma faafitia e i tatou lava le fiafia i mea o le lalolagi. Ae ao ina tatou alolofa atu. Aua nei outou fetuatuana’i. … Aua nei e alu atu i lau auauna, o lē ua nofo aitalafu i ni nai sene ma faamalosi atu e totogi mai mea ua ia nono mai ia te oe, ma, afai ua ia faapea mai e faatali mo sina taimi laitiiti, a ua e ave ia te ia i le falepuipui. Manatua le faataoto i le Faaola i lenei mataupu, ma ia alofa atu ma alofa mutimutivale le tasi i le isi (tagai Mataio 18:23–35].⁷

Ia tuu saoloto au meatotino mai le nofo aitalafu. Ia alo ese mai le nofo aitalafu i le vave e mafai ai, ma ia taumamao mai le aitalafu, aua o le auala lena e faataunuuina ai le folafolaga a le Atua i tagata o lana Ekalesia, ina ia avea ai i latou ma tagata e silisili ona mauoa i tagata uma o le lalolagi. Ae o le a lē mafai ona tupu lenei mea pe afai o loo mokesi ou fale ma au faatoaga, poo le nofo aitalafu sili atu nai lo le mea e te mafaia ona totogi, ma o lea, atonu, o lou igoa ma lou ta’uleleia o le a lē faamamaluina ona o lou manao lasi.⁸

E masani ona lapata’ia pea tagata o le Au Paia ma o lea ua matua apoapoa’i atu ma le malosi ina ia aua le tuuina o latou aiga i se tulaga faigata e lamatia ai, faatasi ma i latou ma a latou avā ma fanau, i luga o le fatafaitaulaga o taumatematega o tulaga tau tupe. … Afai e usiusitai tagata o le Au Paia i le apoapoaiga poto ma le faautauta ma lesona ua tuanai, o le a latou faateletelegese ai e mokesi o latou fale, o nofoaga o a latou pisinisi, o faatoaga, ma le faamoemoe taumatemate e ola ma mauoa, ona o faaosoosoga faatosina loto ia ua i ai i soo se vaipanoa.

O timaiga o loo tuuina atu iinei o loo faasino tonu faapitoa mo i latou ua manatu e mokesi ma le faamoemoega mo se faasiliga, ae lē mo i latou ua manatu e taua mo le atinaeina o vaega o le atunuu, pe faamautuina ai foi o latou fale e ala i le totogiina ta’i masina poo isi faatulagaga faavaitaimi. O le faiga mulimuli, e mafai ona lima taitaiina ai i le amio masani i le tausia lelei o tupe, ae o le faamoemoega e maua ai se faasiliga e masani ona afua ai le agaga o le soona faaaoga.⁹

Ou te faanoanoa ou te faapea atu o le toatele o loo foliga mai e faananau i le manao lasi ma ua oo i se tulaga ua matua saisaitia ai o latou loto i le alofa i le lalolagi. … A o faaputuputu e tagata taitoatasi a latou oa ma ua matua gauai atu i ai i le tausiga, ua vave ona galo ia i latou. … le Atua o lē o loo latou faalagolago pea i ai pe a maua le oa e faapei foi ona manaomia i le taimi o le matua mativa masaesae.¹⁰

Afai e i ai se tasi o iinei o loo manao ina ia nofo aitalafu ona o le manao lasi, … ou te lapatai atu ia te ia ina ia tuu, tatalo mo lenei mea, ma ia manatunatu i ai ma le faaeteete a’o le i faia se faaiuga e nono mai ai se tupe ma nofo aitalafu ai. I se isi faaupuga, aloese mai le nofo aitalafu pe a mafai ona e faia. Totogi au aitalafu i le vave e mafai ai.¹¹

O le tupe o se mea e tatau i le tagata ona tausia lelei ma faaaoga tatau pe afai o i ai; afai na te leiloa ona tausia lelei, o le a solaese mai lana taga, o le a vave lona faaaluina e faapei ona mou vave ese atu o le taeao.¹²

Ou te toe apoapoai atu i tagata o le Au Paia ina ia mata’itū ma taumafai ma le ma’elega ina ia tuusaoloto i latou lava mai le nofo aitalafu. Alu ese mai le nofo aitalafu, ma aloese mai le nofo aitalafu, ona tuusaoloto ai lea o oe i tulaga tau tupe faapea ma le faaleagaga.¹³

E tatau ona sili lo tatou alofa i le Atua nai lo le tatou alofa i tupe ma le sailia o le fiafia.

O loo i ai le vaivaiga i le tagata—ma … o se vaivaiga matuia—o le auauna mo ia lava, o le faamalieina o ona lava manaoga, o le faataunuuina o ona lava faamoemoega, e tusa lava poo le a le tau i isi tagata. E tusa lava pe o a taunuuga leaga o le a oo atu i isi tagata, e saili lava o ia e faamalieina ona lava faamoemoega, o ona manaoga mo lona lava viiga, ma le faalauiloaina o ona lava manaoga. O se tasi lenei o mea sese o le taimi o loo tatou ola ai. O se tasi o ia vaivaiga ua lē avea ai le tagata e faapei o lona Matai, ua vavaeeseina mai ai o ia mai le Atua ma le upumoni, ma avea ai o ia ma tagata e faia na o le mea e manao lava ia i ai. E sese lenei mea.¹⁴

O le tagata poto … o le a ia faatautaia ese mai lona ala mai le oti, o le sailia ina ia maua le fiafia po o lona loto malie. O le a lē saisaitia o ia pe nofo aitalafu e faatau se taavale afi ma isi taavale toso taugata ina ia faafetaui ma le olaga teleai o le saili ina ia maua le fiafia.

O le taunuuga o lenei sailiga mo le fiafia ma le taumafai e faafetaui i le saosaoa i mea ua na o tagata mauoa lava e mafai ona fai ae lē tatau ona fai, o le toatele ua faamalosia e faia ituaiga uma o faatulagaga lē talafeagai ina ia maua ai ni tupe e faamalieina ai le manao. O le mafuaaga lea o le ola sese i mea tau tupe. E tele ia metotia leaga ua faaaoga ina ia maua ai le mea o manaomia, e oo lava i le gaoi ma le pepelo ma le taufaasese i uo ma tuaoi ua sailia pea lava pea ina ia maua ai se tupe e faamalieina ai le manao silisili o le fiafia po o le lotomalie.¹⁵

Ou te faanoanoa i se tagata mauoa ua sili lona alofa i ana tupe nai lona alofa i le Atua. … E oo mai se aso o le a fua ai tatou i le fua faatautau, ma o le a iloa ai pe sili lo tatou alofa i le lalolagi nai lo le tatou alofa i le Atua. … Ua fetalai le Alii e faigata i le mauoa ona sao atu i le malo o le lagi. E le ona o le tagata ua mauoa—aua ua fuafua e le Alii ia avea i tatou ma tagata sili ona mauoa o tagata uma lava. O le iuga e leai se solitulafono i le maua o le oa. O le solitulafono e le o le maua o le tupe. E masani ona tatou faalogo o faamatala mai “o le tupe o le pogai o mea leaga uma.” Ae leai. E lē o faapea mai ai tusitusiga paia. O loo faapea mai o le alofa i le tupe o le pogai lea o mea leaga uma [tagai 1 Timoteo 6:10].¹⁶

Na o le pau lava le mea matuia moni ou te iloa i le ala o le tagata o le Au Paia o le faaiuga o loo mulimuli mai i le maua o le oa—faamaualuga ma le fiasili, o le tuinanau ma le faagalogalo o le Atua, ma le faatuatuanai o galuega ma tiute paia e tatau ona tatou faia mo Ia ma le tasi i le isi; ona o le tele o faamanuiaga faalelalolagi ua Ia aumai mo i tatou ona o Lona agalelei. Ua faapea mai i le taimi o puapuaga e ao ona tatou tapatapa atu i le Alii, ae i le taimi o le fiafia ua tatou faagalo ia te Ia. E foliga mai ia te au o iinei o loo taatia ai le tulaga matautia sili o loo luitauina ai i tatou i le taimi nei.¹⁷

E sili atu le faamanuiaina o le tuuina atu o le filemu ma le fiafia i o tatou uso a tagata nai lo le tuuina mai ia i tatou lava. Ae i le agaga ma le aafiaga o loo i ai le lalolagi i le taimi nei, o le manatu lenei e le o talia e le toatele. O tagata o le lalolagi o loo lolofi atu i mea ua latou manatu e maua ai lo latou fiafia. E le popole i latou pe faapefea ona maua le fiafia pau lava le mea ia latou maua. I se tulaga aotele, o le auro poo le tupe o le mea o loo sili ona maua ai lo latou fiafia. Ae peitai, i ni nai tausaga, o le a valaauina ese mai i latou mai lenei lalolagi, ae o le a tuua a latou oa ma mea uma lava sa latou maua ma fiafia i ai. O le a latou le aveina ni auro ma i latou, aua o mea ia a le lalolagi. Afai o le a oo atu i latou i tua atu o le veli ua saunia ina ia maua ai e i latou le fiafia ae o le a latou lē maua. Ua mou ese le pogai o lo latou fiafia. …

O le a se mea o i ai i lenei lalolagi e aumaia ai le olioli sili ma le fiafia sili nai lo le iloa ua faamagaloina a tatou agasala; ua tatou tulai ma talia i tatou e le Atua lo tatou Tama oi le Lagi; ua tatou le faamanua i se tasi o o tatou uso a tagata; ua tuusaolotoina i tatou mai le nofo aitalafu; ua le saisaitia i tatou e le lalolagi, poo o tatou uso a tagata? O lenei mea na te aumaia le fiafia sili nai lo se isi lava mea ua i ai i le lalolagi. E lē mafai e le tupe ona aumaia. E lē mafai e le oa o le lalolagi ona aumaia lenei olioli i le tagata.¹⁸

Ia tatou atamamai i a tatou mataupu faaletino ina ia mafai ai ona tatou atinaeina le malo o le Atua.

O se tasi ou te mautinoa, o lenei, e ao ona tatou saili e faamasani i aoaoga faavae o le tamaoaiga. E ao ona tatou faaaoga le atamai sili, le faamasinoga ma le malamalama tatou te mafai ona maua i lo tatou ola faaletino ma faapea foi ma lo tatou ola faaleagaga. … Ua tele na’uā lo tatou manatu faapito. Ua le tatau ona popole le tagata mo na o ia lava, ae ua toatele na’uā i tatou ua manao tele. Ua manaonao o tatou loto ina ia maua mea uma ua maua e lo tatou tuaoi tusa lava pe o ni mea o loo tatou manaomia pe leai foi. Ina ia mafai ona faapei o lo tatou tuaoi; ina ia mafai ona tatou fegalegaleai faatasi ma ia, ina ia mafai e o tatou afafine ona mafuta ma ona afafine, o o tatou atalii ma ona atalii, e ao ona sili ona matagofie lo tatou fale, o meaafale taugata, … ma le tele o mea matagofie pe tatou te gafatia le tau pe gafatia foi e lo tatou tuaoi pe leai. O lenei, o nei mea uma, ua matua faavalevalea a’ia’i. E sese. …

… E ao i tagata uma o le Au Paia ona aoaoina—aemaise lava o talavou taitasi o Isaraelu e tatau ona aoaoina—e tatau i tagata uma o i latou ona taumafai ona faaleleia le lalolagi i se ala laitiiti e ala i lo latou i ai, pe afai latou te mafai ai. E ao ia i tatou uma ona taumafai e fai mea lelei. Afai tatou te faia o lea, ona i ai lea o se mafuaaga o lo tatou ola ai. O le a faamanuiaina i tatou e le Atua ia tatou galuega ma taumafaiga; ma pe afai o le a tatou galulue faatasi i mataupu faaletino ma faia a tatou pisinisi i mataupu sa’o, o le a sili ona lelei le lalolagi mo i tatou, ma o le a sili ona lelei i tatou i le lalolagi. O le a tele ni auala e atinaeina ai le malo o le Atua; o le a tele tatou te faaaoga mo le faapotopotoina o e matitiva, mo le atinaeina o Siona, mo le manuia o tagata o le Au Paia, ma so tatou lava manuia.¹⁹

Ia tatou tausia poloaiga a le Atua, teu a tatou tupe. … totogi a tatou aitalafu, ia avea o ni alii ma ni tamaitai saoloto, ae le saisaitia, e pei ona i ai le toatele o i tatou i nei aso. O le toatele o i tatou o loo saisaitia i le nofo aitalafu, atonu e faigata ia i tatou ona o ese mai ai; ae afai e mafai ona tatou o ese mai ai ma le mamalu, ia taulai a tatou taumafaiga uma i lena taunuuga ma faia loa; pe a valaauina i tatou e faia se misiona e mafai ona tatou faapea atu, “Ioe ua ou sauni ma manao ina ia alu,” ma le isi e sili atu, “Ou te lē o nofo aitalafu i se tasi, ma o loo i ai tupe ou te alu ma au, ma tausi ai lo’u aiga.”²⁰

Ou te talitonu o lo tatou tiute o le saunia lea i le taimi o le oge, faamai, afa ma mafuie, ma le taimi o le a siitia ai peau o le sami ma oo atu i talaatu o ona tuaoi. E faapefea ona tatou faia? … E ala i le suesue ma faataunuu ia mataupu o le tamaoaiga moni i o tatou olaga, ma se faatulagaga o le usoga ma le alofa e fesoasoani ai le tasi i lona uso, ma tulai faatasi, ina ia le mafatia se tasi mai manaoga pe afai o i ai le malosi i isi e taofia ai. O se tasi o poloaiga sili sa faia e le Alii e faatatau i ona tagata, e pei ona tusia i le Tusi o le Mataupu Faavae ma Feagaiga, e faapea o le a avea i latou ma tagata sili ona mauoa i tagata uma [tagai i le MFF 38:39]. O lenei, e faapefea ona faataunuuina lenei pe afai o aso uma tatou te faaaoga ai tupe uma tatou te maua ma aitalafu sina tupe itiiti e faaopoopo i ai mai o tatou tuaoi?…

… Ia tatou galulue malosi ma faaaoga tatau, ma faasaoina a tatou tupe. E le faapea ua tatou fausia o tatou faamoemoe i luga o a tatou oa, e le faapea ua tatou faia ma o tatou atua; ae mo le a? Ina ia tatou mafai ai, pe a oo mai aso leaga, ona faafetauia manaoga o le taimi ma galuega ua oo mai i luga o tagata o le Atua e faataunuuina ai le faamoemoega o le Silisiliese i le lalolagi.²¹

Fautuaga mo Suesuega

Afai ua tatou mananao ina ia manuia faaleagaga ma le faaletino, o le a le mea e tatau ona tatou fai? E faapefea e le manaonao fua ona faatamaia le manuia?
O a faamanuiaga e maua pe a tuuese le nofo aitalafu? O a faafitauli e oo mai ia i latou ua le manatu lelei ma ua tele le aitalafu? O le a le mafuaaga e masani ona faaaoga e tagata e mafua ai ona tele aitalafu faavalevalea?
O le a le mea tatou te fai i le “taimi o le manuia” ina ia tuusaoloto ai i tatou mai le nofo aitalafu? O a a tatou tupe e totogi atu i le Alii? Aisea e tatau ai ona faia muamua lenei mea?
E ui o fale e tatau ona faatauina pea e ala i le “totogi faavaitaimi” o a faaeteetega e tatau ona tatou faia e uiga i mokesi? E faapefea e le “agaga o le soona faaalu” ona taitaiina ai tagata e aveesea ai o latou fale ma tupe teu faaagaaga mo le manuia? E faapefea ona tatou taofia nei mea?
E faapefea e le manatu faapito ma le saili ina ia maua le fiafia ona aveeseina i tatou mai le Atua? O le a le matautia o le alofa i tupe e sili atu nai lo le Atua?
E faapefea ona tatou saunia faaletino ma le faaleagaga “mo aso o le oge”?
E faapefea ona tatou faaaoga a tatou tupe e “faataunuuina ai le faamoemoega o le Silisiliese”? E faapefea ona avea le saunia i tulaga tau tupe e mafai ai ona tatou auauna atu?
E faapefea ona tatou aoao a tatou fanau i mataupu o le atamai e faaaoga ia tupe?

Ina ia faamalosia le faalagolago o le tagata lava ia i lona tamaoaiga, o lea na fausia ai e paionia o le Au Paia ia kamupani e pei o Zion’s Cooperative Mercantile Institution.