Tatalo Faamaoni, Faatuatua, Faatauanau.

O le tatalo faamaoni e tupu ae mai le agaga o le Atua i le suafa o Iesu Keriso.

Mai le Soifuaga o Iosefa F. Samita

I le tautoulu o le 1847, o Iosefa F. Samita ua iva ona tausaga; o lona tina ua oti lana tane, o Maria F. Samita; ma le tuagane o lona tina o Iosefa F. sa tolauapi i luga o le auvai o le Vaitafe o Misuri i la latou malaga atu i Winter Quarters. I le taeao na sosoo ai sa latou iloa ai ua toesea a latou povi sili ona lelei e tosoina a latou taavale.

Sa saili atu ma le malosi mo se taimi umi ia Iosefa F. Samita ma le tuagane o lona tina mo povi, ma ua latou “ susū pala, lē lavavā, faanoanoa ma sa toeitiiti oo mai le faavaivai.” Sa fai mai Iosefa F. Samita: I lenei tulaga faigata o au na muamua foi atu i a matou taavale, a o ou latalata atu sa ou vaai atu o tootuli mai lo’u tina o loo tatalo. Sa ou tu mo sina taimi ma soso atu lemu ma faalatalata atu ina ia ou lagona lana tagi atu i le Alii ina ia aua nei tuulafoaiina i matou i se tulaga ua le mafai ona maua ai se fesoasoani, ae ia taitaiina i matou ina ia maua la matou ’au ua leiloa, ina ia mafai ona faaauau la matou malaga i le saogalemu. Ina ua ia tulai mai i ona tulivae sa ou tu ai i ona tafatafa. O le lagona muamua sa ou maua i ona foliga aulelei o lana ataata lalelei, e ui ina sa ou faanoanoa tele, ae ua maua ai se faamoemoega fou ma se faamautinoaga sa ou le lagonaina muamua.”

Sa ia faamalosi atu ma le fiafia ia Iosefa ma lona tuagane ina ia nonofo i lalo ma fai fiafia le ti o le taeao ua ia saunia ma faapea mai, “Ou te fia savali atu ma vaai pe ou te maua ia povi.” E ui ina sa tetee lona tuagane e faapea ua le aoga se isi sailiga, sa alu ese atu ia Maria, ae tuua o ia ma Iosefa F. e fai la la’ua ti o le taeao. Sa la fetaia’i ma se tausimanu latalata ane o le sa faapea mai sa ia iloa povi ua leiloa o loo i le itu e faafesagai ma le mea o loo ia malaga agai atu i ai. Na faapea mai Iosefa F. Samita, “sa faigofie la matou faalogo atu i le mea ua ia fai mai ai, ae sa faasasao atu pea le tina, e aunoa ma le liliu o lona ulu e vaai atu ia te ia.” Sa le pine ae talo atu ia Iosefa F. ma lona tuagane, e tamomoe atu i le nofoaga o loo tu mai ai o ia. O iina na latou iloa atu ai povi o loo noanoa mai i le pupuvao.

Mulimuli ane sa faapea mai Iosefa F. Samita, “O se tasi lea o faataitaiga faatino muamua i le mana o le tatalo ua ou molimauina. Ua aumai ai se ata tumau i lo’u mafaufau, ma avea ma sosia o faamafanafanaga, faamautinoaga ma le taitaiga ia te au i lo’u olaga atoa.”¹

O Aoaoga a Iosefa F. Samita

Ia iloa ona faalatalata atu i le Atua i le tatalo.

Ou te tatalo ina ia outou iloa ona faalatalata atu i le Atua i le tatalo. E le o se mea faigata tele le aoao o le ala e tatalo ai. E le o upu o loo tatou faaaogaina faapitoa e maua ai le tatalo. E le na o upu e fai ai le tatalo. O le faamaoni, faatuatua, ma le tatalo faatauanau o loo i ai lagona e afua mai i le loto ma lagona i totonu o o tatou agaga e tatalo ai i le Alii i le lotomaualalo ma le faatuatua, ina ia tatou maua ana faamanuiaga. E le afaina poo le a le faigofie o upu e faaaoga, pe afai o o tatou manaoga e amiotonu ma tatou o atu i luma o le Alii ma le loto momomo ma le agaga maulalo e talosaga ia te ia i mea tatou te manaomia.²

E le o tau mamao o Ia. E le faigata ona fesootai ma ia, pe a faapea tatou te faia i le loto momomo ma le agaga maualalo, e faapei o Nifae o anamua. O le auala lenei sa fesootai ai Iosefa Samita, a o tamaitiiti, ma Ia. Sa ia alu atu i le togavao, tootuli i lalo, ma i le loto maualalo sa ia saili ma le naunautai e iloa poo fea le ekalesia sa taliaina e le Atua. Sa ia maua le tali i lana tatalo, sa ia tuuina atu mai le taele o lona agaga, ma e sa ia maua i se auala sa le i faamoemoeina e ia.

Ou uso e ma tuafafine, aua le aoao e tatalo na o outou laugutu. Aua le aoaoina se tatalo faatauloto, ma faia i taeao ma afiafi taitasi. O se mea lena ou te le fiafia tele i ai. E moni o le toatele o tagata ua amio ai i le faia o tatalo e faapei o ni tatalo masani. Latou te amata i se vaega patino, ona ta’ua lea o mea masani seia oo atu i le faaiuga, a mae’a, ou te le iloa pe na pasia le fa’alo o le potu e le tatalo pe leai.³

O’u uso e ma tuafafine, ia tatou manatua ma valaau atu i le Atua ma faatauanau mo ana faamanuiaga ma lona alofa i o tatou luga. Ia tatou faia loa, i le poto ma le amiotonu, ma a tatou tatalo ia tatou valaau atu ia te ia i le ala sa’o e tatau ai. E le tatau ona tatou talosaga atu i le Alii i mea e le tatau ai ma e le aoga mo i tatou. Ia tatou talosaga atu mo mea tatou te manaomia, ma ia tatou tatalo atu i le faatuatua, “aua le masalosalo, aua o le masalosalo,” e pei ona fai mai ai le aposetolo, “e tusa ia ma peau o le sami ua sousou i le matagi ma felafoaiina. Aua lava nei manatu lea tagata na te maua se mea e tasi mai le Alii” [Iakopo 1:6–7]. Ae pe a tatou talosaga atu i le Alii mo ana faamanuiaga ia tatou tatalo atu i le faatuatua o le talalelei, i lena faatuatua ua ia tautino mai e tuuina atu ia i latou e talitonu ia te ia ma usiusitai i ana poloaiga.⁴

Sa ou matua fiafia tele ma faagaeetia ia [Peresitene Heber C. Kimball] i lana auala e tatalo ai i lona aiga. Sa ou le faalogo muamua i se tasi tagata o tatalo e faapei o ia. Sa ia le talanoa atu i le Alii e faapei o loo mamao o ia, ae peiseai o loo la talanoa faafesagai. I le tele o taimi, ou te matua fiafia ai lava i le manatu faapea o loo i ai moni le Atua, a o talanoa ma ia i le tatalo, ma sa le mafai ona taofia lo’u tilotilo atu poo i ai moni o ia ma mafai ona iloa atu.⁵

Alu atu i luma o le Alii e le aunoa i le lotomaualalo ma le faatuatua.

Tatou … talia e aunoa ma se fesili mataupu faavae ua aoaoina ai i tatou e le Perofeta o Iosefa Samita ma le Alo o le Atua lava ia, tatou te tatalo i le Atua, le Tama e Faavavau, i le suafa o lona Alo pele e toatasi, o lē sa tatalo foi i ai mai lava le amataga lo tatou tamā o Atamu ma ana fanau.⁶

Ou te iloa e alagatatau mo i tatou ona filifili lelei a tatou upu pe a tatou tatalo atu i le Alii. Na te faafofoga ia i tatou i le mea lilo, ma e tauia faaaliali ia i tatou. Tatou te le tau tagi atu ia te ia i ni upu se tele. Tatou te le faavaivaia o Ia ia tatou tatalo uumi. O le mea e manaomia, ma e ao ona tatou faia o ni tagata o le Au Paia, mo lo tatou lava lelei, o le o atu i ona luma e le aunoa, ma faailoa atu ia te ia tatou te manatua o ia ma o loo tatou naunau e tauave i o tatou luga lona suafa, ma tausia ana poloaiga, galulue ma le faamaoni; ma manaomia lona Agaga e fesoasoani ia i tatou. Afai ua puapuagatia i tatou, ia tatou o atu i le Alii ma fesili sa’o ia te ia ma tautino atu ina ia fesoasoani mai e aveesea i tatou mai puapuaga ua tatou i ai; ma ia sau le tatalo mai le loto, ia le na o upu ua faaaoga soo ma ua fai ma masani, e aunoa ma se manatu ma lagona i le faaaogaina o nei upu.

Ia tatou faaaoga upu faigofie, e faaalia ai o tatou manao, o le a fiafia i ai le Foai o meaalofa lelei uma ma le matagofie. Na te lagona i le mea lilo; ma ua ia silafia manaoga o o tatou loto ao le i talosaga atu i tatou, a ua ia faia o se galuega ma se tiute e ao ona tatou valaau atu i lona suafa —ia outou ole atu ona foaiina mai ai lea ia te outou; ia outou tuitui atu ona toina mai lea ia te outou; ia outou saili ona outou maua ai lea [tagai Mataio 7:7]. O lea, ua faia e le Alii o se tiute matagofie ina ia tatou manatua pea o ia, ia tatou molimau atu ia te ia i le taeao, aoauli, ma le po, tatou te le faagaloina le ua Foai mai meaalofa lelei uma mo i tatou.⁷

Usitai i lena poloaiga sili ua tuuina mai e le Matai, ia manatua pea le Alii, ia tatalo i le taeao, ma le afiafi, ma manatua pea ona faafetai ia te ia mo faamanuiaga ua outou maua i lea aso ma lea aso.⁸

E leai se tapulaa mo le tuuina atu o le tatalo ma le tuuina atu o le viiga i le Foai o Mealelei, aua ua poloaiina i tatou e tatalo e le aunoa, ma e le manaomia se pule faapitoa poo se tulaga o le Perisitua i le Ekalesia ina ia mafai ai ona tatalo.⁹

Atonu e tatalo ma anapogi le tagata seia oti o ia, ma e leai se mafuaaga mo lena; poo se atamai i le faia o lena. Ou te fai atu i ou uso, afai tou te anapogi ma tatalo mo e mamai, ma i latou o loo manaomia le faatuatua ma le tatalo, aua nei sili atu na i lo le atamai ma le faaeteete e tatau ona anapogi ma tatalo ai. E faafofoga le Alii i le tatalo faigofie ua tuuina atu i le faatuatua, i le afa taseni o upu, ma e na te silafia foi le anapogi ua lē faaauau i le sili atu i lo le luasefulufa itula, na te tali mai atoa e faapei ona ia tali mai i le tatalo e afe upu ma le anapogi i le masina.¹⁰

O le a le mea tatou te fai pe afai ua tatou faagalogalo ia tatou tatalo? Ia tatou amata ona tatalo. Afai ua tatou faatamala i nisi tiute, ia tatou saili atu i le Alii mo lona Agaga, ina ia tatou iloa ai poo fea o loo tatou sese ai ma misia ai o tatou avanoa, pe ua aveese atu ma i tatou ae tatou te le faaaoga lelei. Tatou saili atu i le Alii i le lotomaualalo, ma le agaga o le a lafoai mea uma e ono fai ma faalavelave i lo tatou maua o le poto ma le malamalama tatou te manaomia, ma o le tali ia tatou talosaga, ina ia tatou fesootai ai ma ia i le faatuatua o le a faafofoga mai o ia i o tatou manaoga, o le a liliu mai lona agaga ia i tatou i le alofa, o le a faamagaloina a tatou agasala, o le a faamalamalamaina o tatou mafaufau e ala i aafiaga ma le mana o le Atua, ina ia tatou malamalama i o tatou tiute ma ia i ai le naunautaiga e faataunuu ai, e aunoa ma le toe tolopoina, pe faataatia.¹¹

E ao ona tatou tauave le agaga o le tatalo i o tatou tiute uma tatou te faataunuuina i le olaga. Aisea tatou te faia ai? O se tasi o mafuaaga faigofie o loo tu mai i lo’u mafaufau ma le malosi lava e faapea o le tagata ua matua faalagolago o ia i le Atua! E le aoga i tatou pe a aunoa ma ia; e laitiiti mea tatou te fai pe a aunoa ma lona alofa tunoa mo i tatou!¹²

Afai e le galo ona e tatalo, o le a le galo oe i le Atua, ma o le a le alu ese o ia mai ia te oe pe a e le alu ese mai ia te ia. Aisea e liliuese ai tagata? Aisea e leiloa ai le faatuatua? Aisea ua faapogisaina ai o latou mata? Aua ua latou o ese mai le ala sao; ua latou faatuatuanai i o latou tiute ma ua galo ona tatalo, ma faafetai i le Alii ma ua ia aveese lona Agaga mai ia i latou ma ua tuua i latou i le pogisa. … [O le a le tupu lenei mea] i le tagata o le a tatalo i le taeao, aoauli ma le po ma lotomaualalo o ia i luma o le Alii, ma tatalo atu i le Alii i taimi o lona manuia e tusa foi ona ia tatalo atu ia te ia i le taimi o puapuaga. O lena tagata o le a lē liliu ese lava.¹³

O le fale o le malumalu o le aiga e tatalo ma vivii ai i le Atua.

O le fale masani o le “Mamona” o le malumalu lea o le aiga, e faapotopoto ai tagata o le aiga i le taeao ma le afiafi, e tatalo ma vivii ai i le Atua, e faia i le suafa o Iesu Keriso, ma e masani ona faitau ai tusitusiga paia ma usu ai pese faaleagaga.¹⁴

O se mea faigofie le tatalo, ae ua tele ina faatalale i lenei tiute. Ua galo i matua ona faapotopoto faatasi ia tagata o le aiga ma tuuina atu ia i latou faamanuiaga a le Atua; ua tele ina masani ona pisi, poo le manatu tele i mea o le olaga ua galo ai le tiute o loo feagai ai mo le Silisiliese. O le tatalo i totonu o le aiga ua mafai ona manatu i ai nisi o tagata o le Au Paia o se mea faigofie, ae o le faatalale o le a maua mai ai faaiuga faigata. … O nisi o tagata o le Au Paia e manatua o ia i na o taimi e oo mai ai puapuaga ia i latou; a o le taimi o le manuia e galo ia i latou o ia. O lenei pe afai e finagalo le Alii e faagalo ia i tatou i le taimi o loo tatou manaomia tele ai lana fesoasoani, ma afai e faia e ia lea mea o le a maua i tatou i se tulaga pagatia. Aua nei faagalo i le Atua; saili ia te ia i le tatalo i le taeao ma le po. … Ia tatalo i le taimi e lagilelei ai ma susulu le la, ma pe a oo mai le pogisa ia te oe, e mautinoa o le a oo mai le fesoasoani.¹⁵

Tama e, tatalo ma o outou aiga; punonou ma i latou i le taeao ma le po; tatalo i le Alii, faafetai ia te ia ona o lona lelei, alofa ma le agalelei faale tama, e faapei o tatou tama ma tina faaletino sa latou matua agalelei mai ia i tatou le fanau matitiva, le usiusitai ma le faatautee.

E te tatalo? O le a le mea e te tatalo i ai? E te tatalo i le Atua ina ia silafia oe e le Atua, ina ia faafofoga i au talosaga, ina ia faamanuia mai oe e ia i lona Agaga, ma ia na taitai oe i le upumoni uma lava ma faaali atu ia te oe le ala sao; ma o le a ia aoao oe ina ia aua le faia le mea sese ma taitai oe i le ala sao; ina ia le pau oe i le malaia, ina ia le sese ese i le auala sese agai atu i le oti, ae ia e tutumau i le ala vaapiapi.¹⁶

Afai e punou se tamaitiiti i se tulaga faigofie atoatoa ma tatalo atu i le Tama mo se faamanuiaga, e faafofoga mai le Tama i lona leo ma o le a tali mai i se faamanuiaga i luga o lona ulu, aua o le tamaitiiti e leai sana agasala ma ua tatalo atu ma le faatuatua atoa ma le mautinoa. O mataupu faavae faigofie nei ua ou taumafai e tuuina atu i o outou mafaufau. E faigofie, ae taua, ma talafeagai.¹⁷

Ua faatonuina i tatou e valaau atu i le Atua i le suafa o Iesu Keriso. Ua poloaiina i tatou e ao ona tatou manatua o ia i o tatou aiga, tausia lona suafa paia i taimi uma i o tatou mafaufau, ma alofa ia te ia i o tatou loto; e ao ona tatou valaau atu ia te ia mai lea taimi i lea taimi, mai lea aso i lea aso, ma, o le mea moni, i taimi uma lava o o tatou olaga o loo tatou ola ai ina ia mafai ai e manaoga o o tatou loto ona avea ma tatalo i le Atua mo le amiotonu, mo le upumoni, ma mo le faaolataga o le tagata.¹⁸

Ia tatalo atu lou loto mo le lelei o isi.

A tatou faatasitasi e ao i tagata uma ona maua le agaga tatalo ma ia oo atu lona loto, ia le na o ia lava, ae mo le Ekalesia atoa. Afai e faia lenei, e leai se tasi e alu ese mai le fale tapuai e aunoa ma le maua e ia o le agaga o le Atua. … [Afai e tatalo,] o tagata uma lava… e ao ona faamaonia e ala i le faapea atu amene.¹⁹

Afai e saili e le tagata ia le agaga o le atamai ma le musumusuga mai le Silisiliese, … o le a atiae o ia e le Alii, aua ua i ai le matau i le Atua i ona fofoga, aua ua alofa o ia i lona tuaoi e pei ona alofa o ia ia te ia lava, ae lē o tatalo o ia faapea:” Le Alii e, faamanuia a’u ma lo’u toalua, o lo’u atalii o Ioane ma lona toalua; na o i matou e toafa, ae leai ma se isi, Amene.” E le tatalo o ia faapenei, ae e tatalo mo le manuia o Siona, ma mo le umi o le soifua o nei alii ua atiae e le Alii e avea ma o tatou taitai, o o tatou faufautua i mataupu faavae o le Talalelei. E tatalo foi mo lona tuaoi.²⁰

O le tagata e agaga tatalo i luma o le Alii o le a fai ma faataitaiga mo le toatele o isi o e ua vaai ma iloa lana amio.²¹

E le mafai ona ou tatalo i le Alii e aunoa ma le manatuaina o ana auauna o loo i atunuu o le lalolagi o loo talaiina le Talalelei. O le mamafa o la’u tatalo e faapea, “Le Atua e, ia tausi ia i latou ina ia mama ma lē pona i le lalolagi; fesoasoani ia tausisia lo latou faamaoni, ma ia aua nei pulea i latou e o latou fili; taitai i latou i le loto faamaoni.” O la’u tatalo lenei mai lava i le taimi sa ou i ai i le misiona, ma o le a faaauau ona ou tatalo faapenei i le taimi atoa o loo ou ola ai.²²

[I lona atalii faifeautalai o Iosefa Filitia, sa tusi atu ia Iosefa F. Samita i le aso 18 Iulai 1899:] Ua tutumu o matou loto i faamanuiaga mo oe ma… faatasi ai ma au soa uma ua matou tuu atu outou ina ia manatua i luma o le Alii i taimi uma matou te tatalo ai. Le Atua e, lo’u Tama, faamanuia, faamafanafana, talia ma faaatoatoa o’u atalii, ma au auauna uma i le misiona. Afai e tapunia faitotoa i o latou luma, tuu atu ia i latou le alofa, faapalepale ma le loto faamagalo. Afai e tuliesea i latou e tagata le mafaufau, faamafanafana i latou i lou alofa matagofie, pe a sauaina i latou ma le ita, ia e faatasi ma puipui i latou i lou mana. Ia iloa e au auauna o oe o le Atua, ma ia lagona lou faatasi atu. Fafaga i latou i le ola faaleagaga ma le alofa atoatoa e faateaina ese ai le fefe ma ia maua uma mea e tausi ai o latou tino. Fesoasoani ia i latou ina ia faatumulia o latou mafaufau i le poto aoga, ma ia tumau le manatua pea o au upumoni ma faatumuina i oa. Ia latou lotomaualalo i luma o lau Afio ma agamalu ma maulalo e pei o lou Alo! Ia tuuina atu lo latou faatuatua ia te oe, i lau upu, ma au folafolaga alofa. Ma ia avea le atamai ma le faamasinoga, faautauta ma le amio pulea, saolotoga ma le alofa mama, upumoni ma le mama, le mamalu ma le matagofie e faamatalaina ai la latou talaiga ma faaofuina i latou e faapei o le ofu talaloa paia. Le Atua e, faamanuia tele au auauna talavou i meaalofa manaomia uma ma le alofa ma le mafaufau paia, ma le mana e avea ai ma ou Atalii i mea uma e fai!²³

Fautuaga mo Suesuega

Ole a le uiga o le “ ole atu i le Alii i le lotomaualalo ma le faatuatua”? O le a le uiga o le maua o le loto momomo ma le agaga maualalo? E faapefea ona fesoasoani ia i tatou le loto momomo ma le agaga maualalo tatou te fesootai ai ma le Tama oi le Lagi i le tatalo?
Aisea e manaomia ai le faatuatua pe a tatou tatalo? (Tagai foi i le Helamana 10:5.) E tatau i se a ona taofia ai le tautu i upu o le tatalo? O le a le mea tatou te fai ina ia i ai se uiga o a tatou tatalo?
Aise e ao ai ona tatou naunautai e “lafoai mea uma o loo fai ma faalavelave” i le maua mai o le tali i le tatalo? O a nisi o nei mea faalavelave?
E faapefea ona tatou “tauave e i tatou le agaga o le tatalo i o tatou tiute uma e fai i le olaga”?
O a ni “faaiuga matautia” tatou te feagai pe afai tatou te lē faia tatalo faale-aiga?
O le a le mea e sili ai le atoatoa o le tatalo a le tamaitiiti? E faapefea ona faapei i tatou o tamaiti ia tatou tatalo?
Aisea e taua ai le “faamaonia” o tatalo a isi “i le faapea atu amene”?
Aisea e taua ai le tatalo mo isi? E faapefea i le tatalo mo taitai aoao ma le atunuu ona faamanuiaina i latou? E faapefea ona faamanuiaina i tatou ma o tatou aiga?