Legavia ma le Mama Atoatoa

Ua poloaiina i tatou e le Alii ia tatou mama ma faamamalu le paia o le feagaiga o le faaipoipoga.

Mai le Soifuaga o Iosefa F. Samita

Sa faanoanoa Peresitene Iosefa F. Samita i le 1875, a o avea ma Peresitene o le Misiona i Europa, ina ua ia faamalolo i se faifeautalai ina ua ia solia le tulafono o le legavia. Ao ia manatunatu loloto i le salamo ma le loto tiga ua oo i le alii talavou, sa ia tusia ai, “O se alii ua toeitiiti maea lana misiona poo ola ai i se olaga i le mamalu ma le faatuatua, ae oo i le taimi mulimuli, i se amioga e tasi poo se solitulafono, poo se amioleaga, poo se mea sese, ua liua ma faaleaga ai mea uma i le na o se taimi itiiti lava, ua liua ai le suamalie o le ipu o le ola i le oona ma le matuitui.”

Ona faaauau lea o Peresitene Samita e faaalia lana faafetai ona o le aao puipui o le Alii e fesoasoani ia te ia ina ia tumau faamaoni i ana feagaiga. “Ou te faafetai i lo’u Atua mo lana puipuiga, ma lana tausiga lelei,. … ua faasaoina ai a’u mai le agasala o le lalolagi, ma faafia afe o taimi mai o’u lava vaivaiga ma le faigofie ona sese.” Sa ia naunau e avea o ia o se tagata e “vaai atu i ona tagata i o latou mata, ma le manatu mama i luma o le Atua ua tulai sao ai i le mitamitaga faamaoni i le upumoni, lēgavia ma le mama atoatoa mai feusuaiga.” Ua ia olioli ona ua ia soifua “i le alofa mama ma le matagofie mo lona aiga ma faapea mai, “O le a ou lē faatautala i lo latou alofa ma le faatuatuaga i mea uma ua ia te au poo au lava ia.”¹

Aoaoga a Iosefa F. Samita

O le legavia e aumaia ai le malosi ma le mana i tagata o le lalolagi.

Matou te talitonu o loo soifua le Atua, ma o ia o le faamasino o ē ola ma ē ua oti. Matou te talitonu o loo silasila mai o ia i le lalolagi, ma o loo ia silafia ana fanau i le lalolagi, o ē ua fefefe, o ē ua sese ma ua vaivai i lenei lalolagi. Matou te talitonu ua tatou i ai iinei ona o lana fuafuaga … ; ua tatou i ai iinei e faataunuuina se taunuuga, ae le o le faataunuuina o se manatu faatopetope, poo le faamalieina o ni manaoga faaletino.²

O le mama faaletagata ma manatu talafeagai… o le mafuaaga o amioga tatau uma. Ou te faamoemoe o tagata talavou uma latou te faafetaia le taua o loo i ai i lenei faataitaiga, ma le tuuina atu o o latou aso o talavou i le galuega a le Alii. O le ola, tuputupu ae, alualu i luma, va fealoai, o le faaaloalogia ma le amio tausaafia o tagata e masani ona mulimuli mai i se taitaiga faapea o le autalavou. Sa faatuina e le Faaola se faataitaiga maoae i lenei mataupu, ma sa vave ona i ai o ia i le galuega a lona Tama. … O Samuelu, le perofeta, sa matua saunia o ia i le mama, faaaloalogia a o tamaitiiti sa mafai ai ona atoatoa lona saunia e talia musumusuga a le Atua.³

E foliga mai o loo i ai se mea i luga atu o mafuaaga lauiloa i le mafaufau o le tagata i le ala ua aumaia ai e le legavia le malosi ma le mana i tagata o le lalolagi, ae o loo tupu.⁴

Matou te talitonu i le tulaga e tasi o le ola mama o alii ma tamaitai. Afai ua faatuatuana’i i le mama o le olaga, o le a oo mai isi mafatiaga i o tatou luga e faapei o ni tafega o vaitafe pe a matala faitotoa o lologa.⁵

Matou te mananao ma le faanaunauga paia e faamamafa atu le mata’utia o le agasala o feusuaiga. E ui ina manatu pea e lē taua i tagata ua lē iloa le finagalo o le Atua, ae e inosia e fofoga o le Atua, ma afai tatou te mananao e avea pea o ona tagata alofagia, e tatau ona aloese ai e faapei o faitotoa o seoli. O taunuuga leaga o nei agasala ua faigofie ona iloa i le vaivaiga, solitulafono, faasiasia ma faama’i e foliga mai e tatau ona iloa e tagata uma, pe matutua pe laiti, e tatau ona vaaia ma iloa. Ua latou faatama’ia le lalolagi. Afai e tatau ona faasaoina i tatou, e tatau ona tatou matua inoino i ai, ia lafoaiina, ia aua lava nei faia sina mea itiiti o ia mea, aua latou te faavaivaia ma faaitiitia ai le malosi lelei, ua latou fasioti le tagata i la le agaga, latou te faia ina ia lē mafai ona talafeagai [le tagata] mo le mafutaga a e amiotonu ma le afioaga o le Atua. ⁶

O le agasala i le tulaga feusuai, ua lona lua i le faamasaaina o le toto o le tagata ua leai sana agasala i le vaega o soligatulafono faaletagata. … Matou te folafola atu o se afioga a le Alii: “Aua e te mulilua.” [Esoto 20:14.] “Ai se vaai i se fafine ina ia manao i ai, pe afai e mulilua nisi i o latou loto, o le a le ia te i latou le Agaga, ae o le a faafitia le faatuatua.” [MFF 63:16.]⁷

E faapei o le tele o gasegase faaletino, o le soligatulafono o le tulaga feusuai e aumaia ai ma le tele o isi gasegase. E faapei o le aafiaga faaletino o le tagata ua onā e faaleagaina ai ‘afu’afu o le tino, ma ua faaletonu ai ma vaega faapitoa o le tino, ua faigofie ai ona taia le tino i soo se ma’i po o se faaletonu ua lafoai atu i ai, ma ua faaitiitia ai le malosi e teena ai e oo lava i tulaga faigata, e faapena foi i le legavia pe a oo mai i le agaga ma maua ai le ma’i faaleagaga, ma aveesea mai ai le malosi e tetee atu ai ma toe malosi ai foi. O le augatupulaga mulilulua i ona po o Keriso sa faataliga tuli i le leo o le upumoni, ma o lo latou tulaga faama’ia o le mafaufau ma le loto, ua latou saili ai i ni faailoga ma ua sili atu ai ia te i latou tala fatu e leai ni uiga i lo le savali o le faaolataga [tagai Mataio 16:4].⁸

E le gata i lea, o le lēgavia, ua le gata ina faamautu atu ai lona faasalaga i luga o le tagata ua solitulafono, ae oo atu ai foi ma faasalaga e lē mafaaseseina i augatupulaga e tolu ma le fa, e le gata ina faaleagaina atoa ai le tagata solitulafono, ae atonu e aafia ai foi ma i latou o lona aiga, e faamalepeina ai noataga faaleaiga, nutimomoia ai loto o matua, ma afua ai se vaitafe uliuli o le faanoanoa e lofituina ai o latou olaga.⁹

O le tulafono o le legavia e matua taua i alii, tamaitai, ma fanau.

O le tulafono o le legavia o se tasi e sili ona taua, e le gata mo fanau, ae faapea i alii ma tamaitai. O se mataupu silisili ona taua i fanau a le Atua i o latou olaga atoa, mai le taimi na fananau mai ai seia oo i le oti. Ua saunia e le Atua ia faasalaga matuia mo ē e solia lana tulafono o le legavia, o le amioatua, o le amio mama. Afai o le tulafono a le Atua ua faamalosia i tagata, o le a aveesea i latou o e ua matua lē mama ma lē palapala ma lē pona—o alii atoa ma tamaitai. Tatou te faamoemoe ia mama tamaitai, tatou te faamoemoe ia lē pona i latou ma ia leai se ila, ma e faapei ona taua i alii ona mama atoatoa ma amioatua, e faapena foi tamaitai.¹⁰

O le faatalitali seia mavae amioga leaga poo aga faavalevalea o le talavou ona auauna lea i le Alii, e alagatatau ona talia. … E sili atu pe a faapea le tagata e tuai ona liliu ese mai le leaga, nai lo le faaauau pea i le agasala i aso uma o lona ola, ae peitai … e i ai le faanoanoa ma le loto tiga i le tuai ona salamo i le olaga mai amioga sese ma agasala o le talavou.¹¹

O se mea leaga tele le asosi o tagata e soona faamasino i tamaitai nai lo alii i le tulaga o le solitulafono i le ola mama. O le a se ‘alofaga, e le taulia ai le mafuaaga tatau, e mafai ona maua mo lenei faailoga tagata matuia ma le toilalo?…

Afai ua solitulafono le tamaitai e lē mafai ona ‘alofia lona faasalaga, mo le tauia o le mea moni lava, pe faia loa i le taimi lena pe tolopo i se isi taimi. Ae tusa ai ma le solitulafono a le alii ua faataunuuina i le tamaitai le taunuuga o lana soligatulafono, e tatau ona molia o ia i le tele o le agasala. Ma o le alii e sili atu lona tauaveina o le agasala e faatatau i le amio pulea ma le amioatua, o le avega e masani ona pau i luga o le tagata vaivai na auai i le soligatulafono. …

Matou te talia e aunoa ma le faatuai poo le faamaoniga le talitonuga i le Paia, e ala i se perofeta anamua o sa Nifae: “Aua o au le Alii le Atua, e fiafia au i le legavia o fafine. O le faitaaga foi, o le mea inosia lea i ou luma; ua fetalai mai ai le Alii o Au,” (Iakopo 2:28.)¹²

Tatou te sii a’e o tatou leo, pe tautala atu foi i nofoaga faitele, e tetee atu i le talitane, ma faiga uma o le ola lē mama. Tatou te le’i o mai iinei e faia soo se tulaga o le ola lē mama. E ui lava i mea uma, o le ola lē mama ua sili ona mataga ma matautia i le silafaga a le Atua. … O lea, tatou te sii a’e ai o tatou leo e tetee atu i le ola lē mama, ma isi uiga mataga uma.¹³

O a tatou tautoga i le faaipoipoga e sili ona paia.

O le tuufaatasia faale-tulafono o le tane ma le ava ua faauuina e le Atua, e le gata o le auala mo le faauauina pea o le soifuaga o tagata, ae mo le atinaeina o uiga maualuga ma mamalu o le natura o le tagata, ua na o le alofa musuia lava o le faatasiga a le alii ma le tamaitai e mafaia ona faamaonia. O upu mai Tusitusiga Paia o loo manino i le mafuaaga ma le faamoemoega Paia e faatatau i tane ma ava. E le lelei ona nofo toatasi o le tane; o lea ua uma ona faauuina e faapea “o le mea lea e tuua ai e le tane lona tama ma lona tina, ae faatasi ma lana ava; ona avea ai lea o i laua ma tino e tasi.” [tagai Kenese 2:18, 24.]

O le manatu e paia le faaipoipoga, e moni i aso nei e faapei ona saunoa i ai le Aposetolo anamua [tagai Eperu 13:4]. …

O le faatasiga faale-ulugalii e faatagaina i le tulafono o le faaipoipoga, ma, pe afai e faataunuuina ma le faamoemoega tatau, ua faapaiaina ma faamamaluina. Ae a aunoa ma le noataga o le faaipoipoga, o le faia o amioga feusua’i faaleulugalii o se agasala toilalo, ua inosia i le silafaga a le Alii.¹⁴

O nei aso ua lofituina le lalolagi malamalama i se lologa o le amioleaga. O se tasi o mafuaaga tele, o le lē manatu mamafa i le faaipoipoga; ua aveesea lona paia i le vaai a le toatele. O le toatele lava ua vaai i le faaipoipoga e pei o se konekarate faalemalo, ae o le tele o taimi ua na o se mea tupu faafuasei poo se faapasi taimi, poo se auala e faamalieina ai tuinanau. Ma afai e faatuatuana’i i le paia o le feagaiga pe faagaloina foi, ona avea ai lea o le faaleaogaina o le feagaiga o le faaipoipoga, e tusa ai ma aoaoga o le ola mama o le tele o tagata i le taimi nei, ua na o se mea ua lē taua, o se mea sese ua faaalu ai le taimi.¹⁵

O le lē faamaoni i le feagaiga o le faaipoipoga o se mafuaaga o le tele o faaipoipoga ua tatala, atoa ma le tele o mealeaga e oo mai ai, aemaise ai le maasiasi ma le lē faaloalogia o le a afaina ai le fanau ae leai sa latou agasala. O aafiaga matautia o le mulilua e lē mafai ona faapea e na o ē na sese e aafia ai. Pe iloa e le toatele poo le faalafi i lalo o le nofosala faalilolilo, o i’uga o le tele ai o aafiaga faa-tiapolo. O agaga ola pea na o mai i le lalolagi e nonofo ai i tino faitino, e i ai le aia tatau e fananau lelei mai ai, i ni matua ua tuu saoloto mai uiga feusua’i lē mama.¹⁶

O le agasala o le legavia ua faateleina ona o le solia o feagaiga paia.

O le tulafono ua tuuina mai, matou te talitonu e faalauaitele, e aofia ai le Au Paia uma. Ae le gata i lea, e faaopoopo i ai i le solia o le tulafono o le legavia, ua lepetia feagaiga, ona oo mai lea o le faasalaga ona o solitulafono e lua i le olaga nei poo le olaga a sau, ua sili ona tele ma matautia.¹⁷

Ua faapea mai e sili atu le tele o lanu o le lanumeamata nai lo se isi lava lanu, o lea foi ua tatou manatu ai e sili atu foi ona tele o vaega poo tikeri o le agasala e faatatau i le fesootaiga lē talafeagai o feusuaiga nai lo se isi lava amio sese ua mafai ona tatou iloa. Ua aofia ai se solitulafono mamafa—o le agasala o le legavia, ae i le tele o tulaga, o lenei agasala ua faateleina e ala i le solia o feagaiga paia, o nisi o taimi ua faaopoopo i ai le faa’ole’ole, tau faamatau poo misa.

O le tele o nei agasala e tatau ona faalumaina ma inosia, e mafai ona tatou iloa lava e i tatou le eseesega i le manao ma le taunuuga i le va o le solitulafono a se ulugalii talavou o e, ua faaipoipo, i se taimi lē tapasaina, e aunoa ma le muai mafaufau loloto i ai ma ua pauu atu i le agasala, ma o le tane, o lē ua mae’a ona ulufia le nofoaga paia ma osia feagaiga paia, ua faufau leaga e fāoa le tulaga mama o le ava a lona tuaoi e ala i le faatogafiti poo le faamalosi, ma faataunuuina ai lona faamoemoega inosia.

E le gata ona i ai le eseesega i nei mea sese, pe a fua mai le tulaga o le faamoemoega, ae faapena foi taunuuga. … I le tulaga [o le tane ua uma ona osia ana feagaiga], o isi ua matua aafia ai lava, ua malepelepe aiga, e oo faamalosi atu le faanoanoa i luga o tagata e leai se agasala, e aafia le atunuu… ; o lona uiga, ua sese i ē o loo ola faapea ma ē ua oti, e faapea foi i e le i fananau mai, ia ua lē oo i ai le malosi o le tagata solitulafono e toe faaleleia pe toe faasa’o ai.¹⁸

Ua folafola mai e le talalelei le faamoemoe ia i latou ua naunau ina ia mama.

Ua na o le tagata faasaua ma le amioleaga moni ua le naunau ina ia mama; latou te le fiafia i le mama ma le upumoni. Ou te leiloa pe mafai e soo se agaga ona matua toilalo popo ma lē toe manatu ai i mea e mama ma ta’uleleia, lelei ma tonu ma amioatua. Ou te talitonu o loo i ai pea i le loto o tagata faasaua ma le amioleaga, i nisi o taimi, sina aloiafi o lena paia ua maea ona totoina i loto uma o atalii o le Atua. Atonu e mafai ona matua leaga a’ia’i tagata, ua na o sina vaaiga itiiti ai o lena mamalu musuia ua taumafai e taitaiina i latou agai atu ma fiafia ai i le lelei; ae ou te lē talitonu o loo i ai se tagata i le lalolagi ua leiloa atoa le manatu ma le faananau i mea lelei ma le mama, pe a vaai i ai. E faigata ona talitonu o le tagata ua matua vaivai lava ua ia leiloa ai naunautaiga uma ina ia mafai ai ona ia lelei ma mama, pe afai e mafai ai, ae o le toatele o tagata ia latou lafoai atu i latou lava i le leaga ma ua faia se faaiuga ua leai se avanoa mo i latou. O le mea e i ai le ola e i ai foi le faamoemoe, ma ona ua i ai le salamo ua i ai foi le avanoa e faamagaloina ai.¹⁹

O le talalelei a Iesu Keriso o le vailaau paia ua faauuina mo gasegase ua faaleagaina ai tagata soifua, ma faasilisili ai mo le matautia o le agasala tau feusuai.²⁰

O lenei, matou te fai atu ia te outou o e ua salamo ia outou agasala, o e na tanumia faatasi ma Keriso i le papatisoga, o e na siitia ae mai le tuugamau vai i le olaga faafouina, ua fanau mai le vai ma le Agaga, o e ua avea ma fanau a le Tama, o suli o le Atua ma suli faatasi ma Iesu Keriso—matou te faapea atu ia te outou, afai tou te usiusitai i poloaiga a le Atua, ma tuu le faia o mea leaga, tuu le manao lasi, tuu le ola lē mama, faitaaga poo isi foi, tuu le fai o upu masoa, tuu le lē faamaoni, ma faatuatua i le Atua, talitonu i le upumoni ma maua ai, ia faamaoni i luma o le Atua ma tagata, ina ia faaeaina outou i le mea maualuga, ma o le a tuu e le Atua outou i le ulu, pe a tusa ai ma le tausia o nei poloaiga. Poo ai ua usiusitai i poloaiga a le Atua, e le afaina poo oe poo nisi foi tagata, o le a tutulai i latou ae le pauu, o le a latou taitai ae lē mulimuli, o le a latou agai atu i luga ae lē o lalo. O le a faaeaina i latou e le Atua ma faalauteleina i latou i luma o le nuu o le lalolagi, ma o le a ia tuu foi le pinefaamau o lana faamaoniga i o latou luga, o le a faaigoa i latou o ana lava. O la’u molimau lenei ia te outou.²¹

Fautuaga mo Suesuega

O le a le tulafono a le Alii o le legavia? O a ni auala e aumai ai e le legavia le “malosi ma le mana” i tagata?
E mafai faapefea ona tatou tausi faalelei le ola mama faaletagata ma lagona talafeagai ia i tatou lava? E faapefea ona avea le ola mama faaletagata o se faamanuiaga ia i tatou, i o tatou aiga, ma le lalolagi?
Aisea ua e manatu ai o le solia o le tulafono o le legavia e “tulaga lua i le faamasaa o le toto o tagata amiotonu”? (Tagai foi le Alemna 39:5.)
O a mea o loo aafia ai i le “ tele o mea” e o mai faatasi ma le solia o le tulafono o le legavia? E faapefea e le solia o le tulafono o le legavia ona aafia ai le toatele o isi tagata nai lo ē ua solia le tulafono?
O le a le mea tatou te fai ina ia “siitia ai o tatou leo e tetee atu ai i le ola le mama ma le faitaaga, ma tetee atu ai i uiga mataga uma lava”?
O le a se faamoemoega o le “tuufaatasia faaletulafono o le tane ma le fafine… ua faauuina e le Atua”?
Aisea o le faatuatuanai i le faapaiaina o le faaipoipoga o se “mafuaaga taua” mo le “lologa o amioleaga … ua lofituina ai le lalolagi malamalama”?
Aisea o le solia o le tulafono o le legavia e aofia ai se “solitulafono mamafa” mo i latou ua osia feagaiga paia ma le Atua? O a taunuuga o lenei solitulafono mamafa?
O le a le faamoemoe i le talalelei a Iesu Keriso mo i latou ua naunautai e faamama ia i latou lava ma tausia le tulafono o le legavia?