O Le Agaga Paia

Ua molimau mai le Agaga Paia i le Tama ma le Alo ma galue o se fesoasoani faamaoni i le upumoni uma

Mai le Soifuaga o Iosefa F. Samita

I le konafesi aoao a le Ekalesia ia Aperila 1854, sa valaauina ai e Peresitene Polika Iaga ia Iosefa F. Samita e faamisiona i Motu o Sanuisi (Hawaii). Ua sefululima tausaga o Iosefa. E le’i leva ona maliu lona tina, ma ua tuua ai o ia o se tagata ua matuaoti. O lana tusi o talaaga mai lena taimi o loo faaalia ai sa ia aoao e faalagolago i le Agaga Paia mo le faamafanafanaga ma le taitaiga.

I le aso 8 o Fepuari, 1856, ina ua maea ona lauga atu i le Au Paia i Hawaii, sa ia tusia, “O le malosi o le oo mai o le agaga sa faaalia mai.” I le aso 19 Mati 1856, ina ua maea le isi lauga, sa ia tusia ai, “Mo le taimi muamua [o le Au Paia] ua latou fetagisi.” I le aso 30 Mati sa ia tusia ai, “Sa ou tulai ma taumafai e tautala, ae ua le mafai i le maligi o loimata. … I le aso 29 Iuni o le tausaga lava lea, na faaalia i ana tusitusiga ua amata ona lagona le atoatoa o le mana o lana talaiga: “Na i ai le agaga o le Atua faatasi ma i matou i le aso atoa. … Sa ou maua le olioli, aua ua molimau mai le Agaga ia te au i le galuega a le Alii.”¹

Mulimuli ane, i le avea ma se uso o le Korama a le Toasefululua, sa faapea mai Iosefa F. Samita: “I la’u misiona muamua sa amata ona ou aoao se mea mo au lava; sa ou talitonu i le molimau a auauna a le Atua ua ou faalogo o talanoa ma laugaina, faapea foi ma aoaoga sa ou maua mai le tina sili ona alofa ma agalelei, ma mea foi ua ou malamalama ai e ala i le faitauina o le Tusi a Mamona, Mataupu Faavae ma Feagaiga, ma le Tusi Paia. Ae i le talaiga, sa ou galue ai ma le faamaoni, sa amata ona ou malamalama atili, e ala i le musumusuga a le Agaga Paia, i mea ua ou faitau ma aoaoina, ma ua faatumauina o ni mea moni i lou mafaufau, sa ou matua talitonu i ai e pei foi ona ou talitonu i lou ola mai.²

Aoaoga a Iosefa F. Samita

O le Meaalofa o le Agaga Paia o se molimau tumau

O le Agaga Paia o le peresona o agaga, o ia o le tagata lona tolu o le Aigaatua. O le meaalofa poo le galuega a le Agaga Paia o le galuega faatino o le tuuina atu o ia i le tagata. O le Agaga Paia i lona peresona e mafai ona asiasi atu i tagata ma o le a asiasi ia i latou ua agavaa ma molimau i o latou agaga i le Atua ma Keriso, ae le mau i totonu ma i latou [vaai MFF 130:22–23].³

“O le meaalofa o le Agaga Paia,” o le faamanuiaga faapitoa ua faamauina i luga o e talitonu salamo ma papatisoina ia Iesu Keriso, ma o le “molimau mautu.” O le agaga o le Atua e mafai ona olioli ai, o se aafiaga le tumau e mafai ai e le malamalama faale Atua ma le mana ona oo mai i tagata mo faamoemoega faapitoa ma sauniga. Ae o le meaalofa o le Agaga Paia, … e tuuina atu i le faamauga, o le molimau tumau ma le faapaiaga maualuga.⁴

E faapefea ona tatou maua le Agaga Paia? O le auala ma le uiga ua manino ona faasino mai. Ua tau mai ia i tatou ina ia i ai le faatuatua i le Atua, e talitonu o loo soifua o ia, o ia foi na te tauia mai o e ua matua saili ia te ia; o le salamo ia tatou agasala, faatoilalo o tatou tuinanauga, o uiga faavalevalea, ma mea e le talafeagai; ia amio mama, faamaoni, ma sa’o i mea uma tatou te fai e le tasi i le isi, ma osi feagaiga ma le Atua o le a amata atu nei ona usitaia ia mataupu faavae o le upumoni, ma tausia poloaiga ua ia tuuina mai ia i tatou, ona papatisoina lea mo le faamagaloina o a tatou agasala, e se tasi ua i ai le pule; pe a tausia lenei sauniga o le talalelei, ona mafai lea ona maua le meaalofa o le Agaga Paia i le faaee atu o lima o i latou ua faaofuina i le pule o le Perisitua. O le Agaga ma le mana o le Atua—o le Faamafanafana— e mafai ona i totonu ia i tatou le vai e puna pea e faavavau. O le molimau o ia i le Tama, molimau ia Iesu, ma “aumaia mea a le Tama ma faaali mai ia i tatou,” faamautu ai lo tatou faatuatua, atina’e ai i tatou i le upumoni, ina ia lē toe felafoaiina ai i tatou e matagi uma o mataupu; ae ia “iloa o mataupu” pe mai le Atua pe mai le tagata [tagai Efeso 4:14; Ioane 7:17].⁵

O le Agaga Paia, o le molimau i le Tama ma le Alo, o lē aveina mea a le Tama ma faaali atu i tagata, o e molimau i a Iesu Keriso, ma le Atua e faavavau, le Tama o Iesu Keriso, ma le molimau i le upumoni—o lenei Agaga, lenei Poto, ua le tuuina atu i tagata uma seia salamo i latou ia latou agasala ma o mai i le tulaga o le agavaa i luma o le Alii [tagai 3 Nifae 28:11]. Ona latou maua lea o le meaalofa o le Agaga Paia i le faaee atu o lima o i latou ua i ai le pule mai le Atua e tuuina atu ana faamanuiaga i luga o ulu o le fanauga a tagata.⁶

O le tuuina atu o “meaalofa” o le Agaga Paia e faaee atu ai i luga o le tagata le aia na te maua i soo se taimi, pe a agavaa o ia ma manao i ai, o le mana ma le malamalama o le upumoni o le Agaga Paia, e ui ina o nisi o taimi e tuu atu i lona ia lava agaga ma lana faamasinoga.⁷

O le Agaga Paia o le moli e faamalamalama ai la tatou savaliga i luma.

O le tofiga o le Agaga Paia e molimau ia Keriso, ma molimau ia te ia, ma faamautu ai lē ua talitonu i le upumoni, i le aumaia lea i lona mafaufau o mea ua te’a, ma faaali mai i le mafaufau mea o loo i ai ma o le a i ai. “Ae o le Faamafanafana, o le Agaga Paia, o le a auina e le Tama i lo’u igoa, o ia lava na te aoao ia te outou i mea uma lava, e faamanatu atu foi ia te outou i mea uma ua ou fai atu ai ia te outou.” [Ioane 14:26.] “E taitai e ia ia te outou i le upumoni uma.” [Ioane 16:13.].⁸

O le tiute o le Au Paia le aoao o a latou fanau… i le taua o le maua o le meaalofa o le Agaga Paia i le faaee atu o lima, e taitaiina ai i latou i le upumoni, ma o le a faaali mai ia i latou mea ua tea ma mea o le a oo mai, ma faaali manino ia i latou ia mea o loo i ai ia i latou, ina ia latou malamalama ai i le upumoni, ina ia latou savavali ai i le malamalama e faapei o Keriso o loo i le malamalama; ina ia mafuta i latou ma ia ma o lona toto e faamama ai i latou mai a latou agasala.⁹

O loo i ai le alatanu ua uma ona faailoga tatou te savavali ai— o le ala sa’o ma le vaapiapi e toe foi atu ai i le afioaga o le Atua; o le moli e faamalamalama ai la tatou savaliga agai i luma o le Agaga Paia, sa tatou maua i le taimi poo ua mulimuli mai i lo tatou fanaufouina. Afai tatou te o ese mai ai, o le a mumū laitiiti la tatou moli ma mulimuli ane ua pe, ma faauta, o le Fesoasoani Sili, o le sosia o faaaliga, o le a tuua i tatou, ma o le a oo mai le pogisa; ma o le a tele lena pogisa! E faatusatusa i le malamalama ua tatou maua, mata e manumalo ea le pogisa ia te i tatou, ma afai e le vave ona salamo, o le a faateteleina le pogisa i totonu ia i tatou seia leiloa o tatou valaauga ma galo ai o Ia o lē na faaolaina i tatou ma ta’ua i tatou o ana.¹⁰

O le tofiga o le Agaga Paia e faamalamalamaina le mafaufau o tagata e uiga i mea o le Atua, e faatalitonuina i latou i le taimi o lo latou liliu mai e tusa ai ma lo latou faia o le finagalo o le Tama, ma ia ia i latou le molimau mautu e fai ma soa po o paaga i le olaga, e galue o se taiala moni ma le saogalemu i upumoni uma lava ma faatumulia ai i latou i lea aso ma lea aso i le olioli ma le fiafia, ma le faamoemoe e faia le mea sili i tagata uma, ina ia pologa ia onosa’i i mea sese ae lē o le faia o le sese, ina ia agalelei ma agaalofa. O i latou uma e maua lenei meaalofa, lenei penina tautele, o le a fiainu pea mo le amiotonu. A aunoa ma le fesoasoani o le Agaga Paia e leai se tagata e savali i le ala sa’o ma le vaapiapi, ua le mafai ona iloa le sao mai le sese, o le moni mai le taufaasese, ua foliga mai e tali tutusa. O lea, ua alagatatau i tagata o le Au Paia ona ola i le mama ma le sao, ina ia faatasi ai lenei Agaga ma i latou; aua ua na o le mataupu faavae o le amiotonu e maua ai. E le mafai ona ou mauaina mo outou, pe o outou foi mo a’u; e tatau ona tu le tagata mo ia lava, pe maualuga pe maualalo lona tulaga, aoaoina pe le aoaoina, ma o le faamanuiaga o tagata uma ina ia latou mauaina.¹¹

Ua afio ifo le Agaga Paia i luga o i latou ua amiotonu ma i latou ua faamagaloina a latou agasala. … Afai lava o tagata o le Au Paia ua naunau ina ia usiusitai i poloaiga a le Atua, e faafetaia le avanoa ma faamanuiaga ua latou fiafia ai i le Ekalesia, ma o le a faaaoga lo latou taimi, o a latou mea, e faamamalu ai le suafa o le Atua, e atinae ai Siona, ma faatuina ai le upumoni ma le amiotonu i le lalolagi. Ua noatia le Tama oi le Lagi i lana tautoga ma feagaiga e puipui i latou mai o latou fili, ma fesoasoani ia latou manumalo mai mea faasoesa uma e mafai ona oo mai ia i latou, ma faalavelave ai i o latou ala; ae o le taimi e manatu ifo ai se faalapotopotoga mo na o i latou lava, ua gaua’i atu i mea o le lalolagi, ma ua faatuatua i oa po o le tamaoaiga, o le taimi lena o le a aveesea ai le mana o le Atua mai ia i latou, ma afai e le salamo i latou o le a alu ese le Agaga Paia mai ia i latou, ma o le a tuua ai na o i latou.¹²

O outou ua usiusitai i tuutuuga o le Talalelei e faavavau, ma ua filifilia mai le lalolagi, ina ua uma ona maua le meaalofa o le Agaga Paia i le faaee atu o lima, o lo outou faamanuiaga le maua o le molimau o le Agaga mo outou lava; o lo outou faamanuiaga le malamalama i le mafaufau ma le finagalo o le Tama e tusa ai ma lo oe lava manuia, ma tusa ai ma le manumalo mulimuli o le galuega a le Atua.¹³

E ala i le mana o le Agaga Paia, o le a toe fanau ai i tatou.

Sa fetalai le Faaola ia Nikotemo e faapea, “A le toe fanau le tagata, e le iloa e ia le malo o le Atua,” [tagai Ioane 3:3] ma e moni lea i nei aso. O le tagata e ao ona fanau mai le valea i le upumoni, o aso nei… Afai ua le fanau faapea o ia, o le a sili atu le tauaso o ia nai lo lea sa faamalolo e Keriso, o le i ai o mata ae le vaai, o taliga, ae le faalogo.¹⁴

O lena suiga e oo mai i aso nei i atalii ma afafine uma o le Atua ua salamo ia latou agasala, ua faamaulaloina i latou lava i luma o le Alii, ma o loo saili le faamagaloga ma le faamagaloina o agasala e ala i le papatisoga i le faatofuina, e se tasi ua i ai le pule e faataunuuina ai lenei sauniga paia o le talalelei a Iesu Keriso. Aua o lenei fanaufouina sa fetalai ai Keriso ia Nikotemo e matua tatau ina ia iloa ai e tagata le malo o le Atua, ma a leai lea e le mafai e se tasi ona ulu atu i le malo. Atonu e manatua e i tatou taitoatasi le suiga na oo mai i o tatou loto ina ua papatisoina i tatou mo le faamagaloina o a tatou agasala… Ou te tautala i le aafiaga ma le mana o le Agaga Paia sa ou iloa ina ua papatisoina au mo le faamagaloina o au agasala. O le lagona na oo mai i ou luga o le filemu mama, alofa ma le malamalama. …

Maimau e, pe ana mafai ona ou taofi lena lava agaga ma lena naunautaiga i lo’u loto i taimi uma o lo’u olaga mai lena aso seia oo mai i le aso. O le tele o i tatou ua maua le molimau, o lena fanaufouina, lena suiga o le loto, atonu sa tatou sese i la tatou faamasinoga poo le faia o le tele o mea sese, ma i le tele o taimi ua tatou le ola ai i tulaga moni i o tatou olaga, ua tatou salamo i le leaga, ma ua tatou saili mai lea taimi i lea taimi le faamagaloina i le aao o le Alii; ma e oo mai i le asō, o le naunautaiga lava lea ma le faamoemoega sa oo mai i o tatou loto ina ua papatisoina i tatou ma maua le faamagaloga o a tatou agasala, o loo tumau pea i o tatou loto, ma o lea foi le lagona o loo taitaiina pea o tatou loto. E ui i ni taimi e maua ai e i tatou le ita, ma o lo tatou ita lea ua mafua ai ona tatou tautala ma fai mea ua le tusa ai ma le silafaga a le Atua, ae peitai ina ua vave ona toe foi i le lelei ma toe faaleleia mai le mana o le pouliuli, ua tatou lotomaualalo, faamagalo, ma ole atu mo le faamagaloga mo le sese ua tatou fai ia i tatou lava, ma isi foi. O le naunautaiga sili ua fanau mai i le upumoni ma le molimau o le Agaga Paia i loto o tagata o e usiusitai i le upumoni, e pulea ma taofiofia o tatou loto, e taitaiina i tatou i le ala o o tatou tiute. O la’u molimau lenei ma ou te iloa e moni.¹⁵

O le agasala ua le mafai ona faamagaloina o le faafitia ma le faifai lea i le Agaga Paia ina ua uma ona maua Lana molimau

E leai se tagata e agasala i le malamalama seia vagana ua maua e ia; poo le [agasala] i le Agaga Paia seia vagana ua maua e ia le meaalofa a le Atua e ala i le auala filifilia. O le agasala i le Agaga Paia, o le Agaga o le upumoni, o le Fesoasoani Sili, o le Molimau i le Tama ma le Alo, o le naunau e faafitia ma faifai ia te ia, ina ua uma ona maua o ia, ua ta’ua o le [agasala e lē mafaamagaloina].¹⁶

E leai se tagata e mafai ona ia faia le agasala lē mafaamagaloina ma lona le iloa. E tatau i le tagata ona maua le malamalama o Keriso; e ao ona i ai sana molimau ia Keriso i lona loto, ma maua le malamalama ma le mana, poto ma le iloa, ao le i mafai ona faia lena agasala. Ae a liliu ese le tagata mai le upumoni, lē faaaoga lelei le malamalama ua ia maua, solia i ona vae, faalumaina o Keriso, faafitia lana Togiola, faafitia le toetu, faafitia le mana ua ia saunia mo le faaolataga o le fanauga a tagata, ma faapea ifo i lona loto, “E lē moni”, ma tumau ai i lena faafitiga o le upumoni, ina ua uma ona maua le molimau o le Agaga, ua ia faia le agasala e lē mafaamagaloin.¹⁷

[Ina ua mavae le Faasatauroga o le Faaola,] aisea na loto galo ai [le Au Aposetolo] ma foliga ua latou le iloa mea uma sa aoaoina ai i latou e le Faaola e tusa ai ma le faamoemoega o lana misiona i le lalolagi? Ona ua leai le mea taua e tasi, sa le i “faapaiaina i le mana mai luga.” [Tagai Luka 24:49.] Sa le i maua e i latou i le taimi lea le meaalofa o le Agaga Paia. …

Pe a na fai na faapaiaina le au soo i le “meaalofa o le Agaga Paia,” poo le “mana mai luga,” i le taimi lea, semanu e matua ese le tulaga latou te i ai … , e pei ona faamaonia e mea na mulimuli mai. Afai o Peteru, o le aposetolo sinia, sa ia maua le meaalofa o le Agaga Paia, ma le mana ma le molimau i le taimi ao le i oo i le po matautia sa ia faafitia ai lona Alii [Tagai Mataio 26:69–75], semanu e ese lona taunuuga, ma o le a agasala ai o ia i le malamalama ma le iloa lelei o mea” ma le Agaga Paia,” e leai se faamagaloina. O le mea moni, o lea, sa faamagaloina o ia, ina ua uma loimata tiga o le salamo, o le faailoga sa le i ia te ia se molimau o le Agaga Paia, e lei maua lava e ia. O isi soo poo aposetolo a Keriso sa tutusa lava i lea tulaga, seia oo i le afiafi o le aso na afio mai ai Iesu mai le tuugamau sa ia tuuina atu ai i o latou luga lenei meaalofa taua [Tagai Ioane 20:22].¹⁸

A o lei tuua e le Togiola toetu le lalolagi sa ia faatonu i ona soo e nonofo i le aai o Ierusalema, seia maua e i latou le mana mai luga. Sa latou faia o lea, ma malilie i le folafolaga, sa oo mai le Fesoasoani Sili a o faatasitasi i latou, ua faatumuina o latou loto i le olioli lē mafaamatalaina, i le tulaga ua latou tautala ai i gagana ma perofetaga; ma o le aafiaga maualuga o lenei tagata paia ua faatasi ma i latou i o latou tiute uma o le talaiga, sa mafai ai ona latou faia misiona tetele ua valaauina ai i latou e le Faaola.¹⁹

O Saulo, le Taso, ua ia te ia le poto maoae ma le aoaoina, ua aoaoina i le aoga a Kamalielu, ua aoaoina i le tonu o le tulafono, na sauaina le Au Paia i le oti, sa fusifusia ma tuuina atu i le falepuipui ia tane atoa ma fafine, ma ina ua faamasaaina le toto o Setefano, sa tulai mai Saulo e leoleo ia i latou ua fasioti ia te ia, ma malie i lona oti. Ma sa ia “soona saua i le Ekalesia, ua ulufale o ia i lea fale ma lea fale, ma fetoso mai i tane ma fafine, ma tuuina atu i le fale puipui.” [Galuega 8:3]. Ma ina ua fasiotia i latou, sa ia tautala atu e uiga ia i latou ma ia “taui soo atu foi ia te i latou i sunako, ma [ia] tauanau atu i latou ia upu leaga, na [ia] faavalemalosi atu foi ia te i latou, ua saua atu e oo lava i aai ese,” [Galuega 26:11] ae o lenei tagata sa le faia e ia se agasala e lē mafaamagaloina, aua sa lē iloa e ia le Agaga Paia.²⁰

Afai e i ai ni tagata i le lalolagi ua mafai ona latou faia le agasala lē mafaamagaloina, tou te maua i latou i totonu o i latou ua uma, poo le a maua le malamalama o le upumoni. … O oe ma au ua maua le malamalama. Ua tatou maua le Perisitua Paia. Ua tatou maua le molimau o le Agaga Paia, ma ua aumaia mai le oti i le ola. O le mea lea, ua tatou i ai nei i le tulaga o le saogalemu poo le matautia foi,—e matautia pe afai ua tatou ta’u faatauvaa i mea paia ua tuuina mai tatou te tausi i ai. O lea ou te lapatai atu ai ia te outou, ou uso e ma tuafafine, aemaise ou uso e tusa ai ma le ta’u faatauvaaina o lou [perisitua]. … Afai o le a e faia, e pei ona o loo soifua le Atua, o le a Ia aveesea lona Agaga mai ia te outou, ma o le a oo mai le taimi o le a maua ai outou ua tetee atu i le poto ma le malamalama ua outou maua, ma avea ai outou ma atalii o le malaia. O lea, e tatau ai ona outou faaeteete ina nei oo mai le oti faalua i luga ia te outou.²¹

Fautuaga mo Suesuega

O le a le eseesega o le aafiaga le tumau poo le faaalia mai o le Agaga Paia ma le meaalofa o le Agaga Paia (Tagai foi i le Moronae 10:4.) E mafai faapefea ona tatou maua le meaalofa o le Agaga Paia? O a faamanuiaga tatou te maua pe a tatou faamamaluina lenei meaalofa?
E faapefea ona taitai i tatou i le upumoni uma e le Agaga Paia?(Tagai Ioane 16:13.) O a upumoni ua molimau mai e le Agaga Paia ia i tatou?
Aisea e avea ai le moli o se faailoga e fai ma sui o le Agaga Paia? O le a le mea tatou te fai ina ia faamaonia ai o lenei moli e mumu malamalama i o tatou olaga?
O le a se mea e mafai ona tatou fai ina ia faateleina ai le aafiaga o le Agaga Paia i o tatou olaga? E faapefea ona tatou fesoasoani i isi ina ia malamalama i le auala e faamanuiaina ai e le Agaga Paia o tatou olaga?
O le a le mea e tatau ona tatou fai ina ia maua ai le fanaufouina ua ta’ua mai e le Faaola? (Tagai Ioane 3:5.) O a ni lagona e maua mai lenei fanau fou? E faapefea ona faatumauina nei lagona? (Tagai Alema 5:14–16, 26.)
O le a le agasala lē mafaamagaloina? O le a le uiga o le ta’u faatauvaa o “mea paia ua tuuina mai tatou te tausia”?