Mataupu 40
O le Tama ma le Alo
Ua aoaoina i tatou i faaaliga o ona po nei i upumoni sili ma le faavavau e uiga i lo tatou Tama oi le Lagi ma Lona Alo, o Iesu Keriso.
Mai le Soifuaga o Iosefa F. Samita
Sa masani ona tuuina atu e Peresitene Iosefa F. Samita lana molimau malosi e uiga i le Tama oi le Lagi ma Lona Alo, o Iesu Keriso, o le faamoemoega silisili o lo tatou faatuatuaga. Na ia saunoa, “Ou te talitonu ma lo’u agaga atoa i le Atua le Tama ma lo tatou Alii ma le Faaola o Iesu Keriso.”1 Ao avea o ia o se Peresitene o le Ekalesia, sa ia saili e faamalamalama le faasinomaga ma le matafaioi a le Tama ma le Alo, aemaise lava ona o nisi o vaega o tusitusiga paia ua faailoa mai ai o Iesu Keriso o le Tama. I se taumafaiga e fesoasoani i le Au Paia ina ia lelei atili lo latou malamalama i nisi o tusitusiga paia e faatatau i le Tama ma le Alo, sa tuuina mai ai e le Au Peresitene Sili ma le Korama a le Toasefululua ia se faaaliga faavae i le aso 30 o Iuni 1916 ua faaautuina “O le Tama ma le Alo.” O lenei tautinoga ua faamautuina ai le lotogatasi o le Atua le Tama ma Lona Alo, o Iesu Keriso, ma faamanino mai ai matafaioi maioio taitoatasi i le ata o le faaolataga. Sa faamatala ai foi auala e faaaogaina ai le upu Tama i tusitusiga paia i lo tatou Tama oi le Lagi ma Iesu Keriso.
E i ai vaega mai le faaaliga o loo taua i lenei mataupu faatasi ai ma isi aoaoga a Peresitene Samita, o le na faamautu mai e faapea o le maua o “le poto o le Atua, ma lona Alo o Iesu Keriso, … o le lesona muamua ma le mulimuli o le olaga.”2
Aoaoga a Iosefa F. Samita
O le iloa o le Atua ma Iesu Keriso o le ola e faavavau.
O se upumoni mai le tusitusiga paia, o le ola e faavavau foi lenei, ia latou iloa oe le Atua moni ma le ola ma Iesu Keriso o le na ia auina mai [tagai Ioane 17:3]. Ou te talitonu o tagata o le Au Paia, e ala mai i aoaoga a tusitusiga paia ma faaaliga ua oo mai ia i latou e ala mai i le Perofeta o Iosefa Samita, ua mafai ai ona latou aoao i le Atua moni ma o loo soifua o ia, ma iloa ai o Ia faapea foi Lona Alo na Ia auina mai i le lalolagi, o ia lava o le ola e faavavau.3
E le gata ina taua le i ai o le faatuatua i le Atua, ae faapena foi ia Iesu Keriso, lona Alo, o le Faaola o tagata soifua ma o le Puluvaga o le Feagaiga Fou; ma le Agaga Paia, o le molimau i le Tama ma le Alo, “e tutusa i tausaga uma lava e oo i le faavavau.”4
O le Tama o o tatou agaga o se tagata e faavavau o loo i ai se tino o aano ma ivi.
O le Atua e i ai lona tino o aano ma ivi. O ia o se tagata lelei e faapei o i tatou, o loo i ai nei i le tino. … O i tatou o fanau a le Atua. O ia o le tagata e faavavau, e leai se amataga o aso poo se gataaga o tausaga. Sa i ai pea lava o ia, o loo i ai, ma o le a i ai pea.5
Ou te le talionu i le aoaoga o loo talitonu i ai nisi e faapea o le Atua ua na o se Agaga ma e ese lona natura e mafai ai ona ia faatumulia le atulaulau, ma o loo i ai i tagata uma ma mea uma, pe o le leai foi o se tagata, aua ou te le mafai ona talitonu e mafai e le Atua ona avea o se tagata, pe a faapea ua faatumulia e ia le atulaulau ma o loo i ai i mea uma i le taimi e tasi. E lē faavaea i le faaletino, o talitonuga faale-lotu e lē ogatasi, le faapea e i ai le Atua le Tama e Faavavau i ni nofoaga se lua, a o se tagata toatasi, i le taimi lava e tasi. E le mafai. Ae o lona mana e oo atu i le atulaulau. O lona mana e oo atu i ana foafoaga uma, ma o lona poto e malamalama ia i latou uma, na te pulea i latou uma ma na te silafia foi i latou uma.6
O le Atua le Tama e Faavavau, o le ua tatou iloa i le suafa faaeaina o “Elohima,” o le Tama moni o lo tatou Alii ma le Faaola o Iesu Keriso, ma agaga o le ituaiga o tagata. O Elohima o le Tama i ona tulaga uma ua tofia i ai Iesu Keriso, ma ua manino lava o ia o le Tama o agaga.7
[Tatou] te tatalo atu i le Tama o lo tatou Alii ma le Faaola, o Iesu Keriso, o lona faatusa ma foliga na faia ai i tatou, ma fanau mai ai i le lalolagi, ma o ona foliga ma faatusa ua tatou maua, aua o i tatou o fanau a le Atua, ma o lea e ao ai ona faapei o lona Alo i le tino, faapea foi i le agaga, o lea tatou te usiusitai ai i mataupu o le talalelei o le upumoni e faavavau. Aua, na muai faauuina i tatou… e avea faapei o lona faatusa e ala i le faaaogaina ma le poto ma le faautauta o la tatou filifiliga saoloto.8
O le Atua, le Tama e Faavavau, o loo silafia pea outou. Ua ia manatu i ona tagata i lenei lalolagi atoa, ma o le a ia taui outou e tusa ai ma lo outou faatuatua i le usitaia o tulafono o le amiotonu ma le upumoni.9
O le Atua lo tatou Tama oi le Lagi o Lē na Foafoaina
O le Alii Silisiliese o le na Foafoaina le lalolagi, o ia o le Tama o o tatou agaga uma. E i ai lana aia e faatonu mai ai le mea e ao ona tatou fai, ma o lo tatou tiute le usiusitai, ma savavali e tusa ai ma lana faatulagaga. O le natura lenei, ma e faigofie ona malamalama ai.10
Ua faigofie ma saga faamautinoaina mai e tusitusiga paia o le Atua o Lē na Foafoaina le lalolagi ma le lagi ma mea uma lava o i ai. I le tulaga e pei ona faamatalaina, o Lē na Foafoa o ia foi Lē na te Faatulagaina. Sa faia e le Atua le lalolagi o se nofoaga faatulagaina; ae lei foafoaina e Ia, i se tulaga na uluai faatinoina ai, o elemene o mea o loo fausia ai le lalolagi, aua o “elemene e faavavau” (MFF 93:33).11
[O le tagata] o loo nofo aitalafu i le Alii Silisiliese mo lona poto, ma mea uma lava ua ia te ia; aua o le lalolagi ma mea ua tumu ai e a le Alii ia [tagai Salamo 24:1]. O le Atua sa amataina ma fuafuaina mea uma.12
Ia faaetete i tagata o e… e taumafai ina ia outou mafaufau ma faalogo faapea o le Alii Silisiliese, o le na faia le lagi ma le lalolagi ma foafoa i mea uma, ua faaitiitia lana pule i mea o le lalolagi ona o le tomai o tagata soifua.13
O Iesu Keriso o le Ulumatua i le agaga ma o le Alo Pele e Toatasi o le Atua i le tino.
I fanau agaga a Elohima, o le ulumatua o Ieova, poo Iesu Keriso, ao isi uma e laiti.14
O Iesu Keriso e lē o le Tama o agaga ua faitino ma o le a faitino i luga o lenei lalolagi, aua o ia o se tasi o i latou. O ia o le Alo, e faapei o i latou o atalii ma afafine o Elohima.15
[O Iesu Keriso] ua sili atu nai lo tagata uma, aua (1) o ia e muamua o le ulumatua; (2) o lona tulaga faapitoa i le tino o le tama a se tina i le tino ma se Tama e soifua pea, po ua toetu ma e paia; (3) o lona filifilia ma le uluai faauuina ua na o ia lava le Togiola ma le Faaola o le lalolagi; ma le (4) ma na faamaualaloina o Ia ae leai sana agasala.16
E leai se faaletonu i manatu o tagata o le Au Paia i le tulaga o le i ai ma uiga o le Alii le Atua Silisiliese, o le Tama o lo tatou Alii ma le Faaola o Iesu Keriso. E leai se faaletonu i manatu o tagata o le Au Paia o Iesu o le Alo o le Atua, ua pele i le Tama i le tino.17
O Iesu Keriso o le Alo o Elohima i le agaga ma le tino; e faapea, o Elohima o le Tama o le agaga o Iesu Keriso ma faapea foi i la le tino sa faatino ai e Iesu Keriso lana misiona i le tino, ma o lena tino na maliu i luga o le satauro ma sa mulimuli ane toetu mai, ma ua avea nei ma tino ola pea o le agaga e faavavau o lo tatou Alii ma le Faaola.18
Na soifua mai Iesu Keriso mai lona tina, o Maria. Sa i ai lona tino faaletino. Sa faasatauroina o ia i luga o le satauro; ma na toetu mai lona tino mai le oti. Sa ia talaia noanoataga o le tuugamau, ma sa agai i luma i le ola faafouina, o le agaga ola, o le tagata ola, o le tagata ua i ai lona tino, ma vaega ma le agaga—o le agaga ma le tino ua avea ma tagata ola pea.19
O le Atua le Tama… o le Tama o o tatou agaga, ma … o le Tama i le tino, o lona Alo Pele e Toatasi, o Iesu Keriso, o le ua faatasi ma le paia o le ola pea ma le ola faaletino, ua faatumau ai le sootaga a le Atua ma le tagata, ua mafai ai e tagata faaletino, ua oo mai i ai le oti, ona maua le ola e faavavau, e ala i le usiusitai i ana tulafono. O lea, e ao ai ona tatou saili i le upumoni ma savavali i le malamalama e faapei o Keriso o loo i le malamalama, ina ia tatou mafuta ma ia, ma isi, ina ia faamamaina e lona toto i tatou mai agasala uma.20
O le Tama ma le Alo e Tasi i La’ua
“… O au o i totonu o le Tama, o le Tama foi o loo i totonu ia te au, ua tasi i ma’ua ma le Tama.” [3 Nifae 11:27.] Ou te le manatu o le a i ai se tasi poto na te faaliliuina nei upu o Iesu ma lona Tama e tasi i la’ua i le tino, ae ua na o le tasi o i la’ua i le poto, i le upumoni, i le atamai, i le malamalama, ma le faamoemoe; e pei ona fautua atu Iesu lava ia i ona soo ina ia tasi i latou ma ia, ma ia i ai i latou i totonu ia te ia, ina ia i ai o ia i totonu ia i latou. O le tulaga lenei ua ou malamalama ai i lenei gagana, ae le faapei ona faaliliu e nisi o tagata, o le Keriso ma lona Tama o le tagata e tasi. Ou te folafola atu ia te outou e le tasi i la’ua i le tino, ae lua tagata, lua tino, e eseese ma vavamamao, ma manino le eseesega e faapei ona i ai soo se tama ma se atalii.21
[O le Tama ma le Alo] e tasi i laua i uiga. E tasi i laua i le alofa, tasi i le poto, tasi i le alofa tunoa, tasi i le mana, tasi i mea uma ua tuufaatasia ai i laua i le malosi, matagofie ma le silisili, aua o totonu o i la’ua ua atoatoa ai le upumoni uma, le mama atoatoa ma le amiotonu uma.22
O Iesu Keriso ua ta’ua o le Tama.
O le upu “Tama” e pei ona faaaogaina i le Mamalu o loo i ai i tusitusiga paia, i o latou uiga faigofie eseese.23
O Iesu Keriso o le Tama o le lagi ma le lalolagi.
O Ieova, o Iesu Keriso le Alo o Elohima, ua taua o le “Tama” ma “o le Tama e faavavau o le lagi ma le lalolagi” [tagai Mosaea 15:4; 16:15; Alema 11:38–39; Eteru 4:7]. I lona uiga faatusatusa o Iesu Keriso ua taua “O le Tama e Faavavau” (Isaia 9:6; faatusatusa 2 Nifae 19:6). …
… O Iesu Keriso, ua tatou iloa foi o Ieova, na faataunuuina fuafuaga uma a le Tama, o Elohima, i le galuega o le foafoaga. … O Iesu Keriso, o le na Foafoaina, ua taua pea lava pea o le Tama o le lagi ma le lalolagi… ; ma ona o ana foafoaga e faavavau lona taunuuga ua alagatatau ai ona taua o le Tama e Faavavau o le lagi ma le lalolagi.24
O Iesu Keriso o le Tama o i latou o e usiusitai i Lana Talalelei..
[O le isi] tulaga ua taua ai Iesu Keriso o le “Tama” ua faatatau i le fesootaiga i le va o ia ma i latou ua talia Lana Talalelei ma ua avea ai ma suli i le ola e faavavau. …
O le usiusitai i le Talalelei e mafai ai e tagata ona avea o atalii o le Atua, o atalii o Iesu Keriso, ma, e ala ia te Ia, o atalii o lona Tama, ua tuuina mai ai i le tele o faaaliga ua aumai i lenei tisipenisione [tagai MFF 11:28–30; 34:1–3; 35:1–2; 39:1–4; 45:7–8]. …
O se faaaliga malosi o lenei sootaga i le va o Iesu Keriso o le Tama ma i latou ua usiusitai i tulaga moomia o le talalelei e pei o lana fanau e pei ona tuuina mai e Apinati, i le tele o seneturi ao le i soifua mai le Alii i la le tino:”… Ma o ai le fanau a [Keriso]? Faauta ou te fai atu ia te outou, poo ai lava na faalogo i upu a perofeta,… ma talitonu o le a togiola e le Alii lona nuu, ma faatalitali i lena aso ina ia faamagaloina a latou agasala; ou te fai atu ia te outou, o i latou na o ana fanau, e o latou foi le malo o le Atua… “ (Mosaea 15: 10–13).
E mafai ona avea tagata o fanau a Iesu Kriso e ala i le toe fanaufou—fanau i le Atua, e pei ona faaalia i upu valoia [tagai 1 Ioane 3:8–10].
O i latou ua fananau mai i le Atua e ala i le usiusitai i le Talalelei e mafai e ala i le gauai atu i le amiotonu ona maua le faaeaga ma oo atu ai i le tulaga o le Aiga a Atua [ tagai MFF 76:58; 132:17, 20, 37]. …
E ala i le toe fanau fou—i le vai ma le agaga—e mafai ai e tagata soifua ona avea o ni fanau a Iesu Keriso, ona ua saunia e ia le ala ua tuuina atu i “atalii ma afafine pele o le Atua” [MFF 76:24; tagai foi 1 Korinito 4:15; MFF 84: 33–34; 93:21–22]. …
Afai e tatau ai ona e talanoa e faatatau ia i latou ua talia ma usiusitai i le Talalelei o ni atalii ma afafine o Keriso–ma o lenei mataupu ua manino i tusitusiga paia ma e lē mafai ona sese pe faafitia—e matua alagatatau lava le tautala e faatatau ia Keriso o le Tama o ē amiotonu, ina ua avea i latou o Ana fanau ma ua avea o Ia ma o latou Tama e ala i le toe fanau mai— o le papatisoga lea o le toefuataiina.25
[O Iesu Keriso] o le faavae ma le maa tulimanu autu o la tatou ekalesia. O i tatou o ana ua taliaina, e ala i le tanumia faatasi ma Keriso i le papatisoga, i le fanau i le vai ma le agaga e fou i le lalolagi, e ala i sauniga o le talalelei a Keriso, ma ua avea ai i tatou o fanau a le Atua, o suli o le Atua ma ua suli faatasi ai ma Iesu Keriso e ala i le taliaina ma le faatuatua.26
A aunoa ma le salamo ma le papatisoga ma le talia o le Agaga Paia, ua atoa i ai le fanaufouina, e le o tatou o se aiga o Keriso, ae o tagata ese, tagata ese mai le Atua ma ana tulafono, ma o le a tatou tumau ai pea i lenei tulaga pa’ū, pe o le tino poo le agaga, mo le taimi nei ma le faavavau, sei vagana ua usiusitai i le ata na fuafuaina i le lagi mo le togiola ma le faaolataga o le fanauga a tagata.27
Ou te iloa e mafai ona ou maua le [faaolataga] i le na o le usiusitai i tulafono a le Atua, i le tausia o poloaiga, i le faia o galuega o le amiotonu, i le mulimuli ai i tulaga aao o lo tatou taitai, o Iesu le Faataitaiga ma le Ao o mea uma. O Ia o le Ala o le ola, o Ia o le malamalama o le lalolagi, o Ia o le faitotoa tatou te ulufale atu ai, ina ia mafai ai ona tatou maua se nofoaga ma Ia i le malo o selesitila o le Atua.28
E leai se isi igoa i lalo o le lagi ua foaiina mai i tagata, ua na o Iesu Keriso, e mafai ai ona faaolaina i tatou poo le faaeaina i le malo o le Atua.29
O Iesu Keriso o le Tama e ala i le pule paia ua tuuina ia te ia
O Ana galuega uma i le fanauga a tagata, o Iesu le Alo sa fai ma sui o Elohima Lona Tama i le mana ma le pule. E moni lenei mea e uiga ia Keriso i lona muai soifuaga, i le tulaga a o le’i liutino tagata, po o le tulaga a o le’i faitino, lea sa iloa ai o Ieova; e faapea foi ina ua liutino tagata; ma i le taimi o Lana galuega o se agaga ua oti le tino; ma talu mai i lena periota i Lona tulaga toetu [tagai Ioane 5:43; 10:25, 30; 14:28; 17:11, 22; 3 Nifae 20:35; 28:10; MFF 50:43]. O lea na tuuina ai e le Tama Lona suafa i luga o le Alo; ma sa fetalai Iesu Keriso ma galue i le suafa o le Tama; ma e tusa ai ma le mana, pule ma le Atua o Ana upu ma galuega e a le Tama ia. …
Peitai, e leai lava se tasi o nei manatu, e mafai ona suia se vaega itiiti o le faamaoni a’ia’i o le tulaga e uiga i le sootaga o le Tama ma le Alo, o Elohima ma Iesu Keriso.30
Ou uso e ma tuafafine, ou te iloa o loo soifua lo’u Togiola. Ou te iloa, e pei ona ou iloa o loo ou ola, i lona tulaga i le tino sa ia asiasi i tagata i o tatou taimi ma aso, ma ua tatou le faalagolago nei i le talafaasolopito o mea ua mavae aua o le poto ua tatou maua, ua maua mai ai faamaumauga e ala i le Agaga o le Atua, ua faamaligi mai i loto o i latou uma ua osia feagaiga o le talalelei a Keriso. Ae ua tatou maua le molimau fou ma le lata mai ma faaaliga faalelagi ma le asiasiga a le Atua le Tama ma Keriso le Alo iinei i le mea e tuu ai o la’ua aao, ma na la faaali mai i la’ua lava, o o la’ua fofoga, ma sa la faaalia mai foi lo la’ua mamalu. Sa la faaloaloa mai o la’ua aao e faataunuuina la la’ua galuega—o le galuega a le Atua, ae lē o le galuega a le tagata. … O la’u molimau lenei ia te outou, ou uso e ma tuafafine, ma ou te molimau atu i ia mea i le suafa o le Alii o Iesu Keriso.31
Fautuaga mo Suesuega
-
Aisea e faapea ai o le ola e faavavau o le iloa lea o lo tatou Tama o i le Lagi ma Iesu Keriso? E faapefea e lo tatou malamalama ia i la’ua ona aafia ai lo tatou sootaga ma i la’ua?
-
Aisea e taua ai le iloa o lo tatou Tama oi le Lagi o se tagata e faavavau ua i ai lona tino mamalu, toetu o aano ma ivi?
-
E faapefea ona faamanuiaina i tatou ona o lo tatou iloa o le Tama i le Lagi o le Tama lea o o tatou agaga?
-
O le a le uiga o le manatu “o le Foafoa o le na te Faatulaga”
-
O le a le auala e ese mai ai Iesu Keriso mai le fanau o agaga a le Tama oi le Lagi? O le a le mea na mafai e le Faaola ona fai ona sa fanau o ia i le lalolagi o le Atalii Pele e Toatasi o le Tama i le tino?
-
E faapefea ona tasi le Tama oi le Lagi ma Iesu Keriso? E faapefea ona tasi i tatou ma le Tama ma le Alo? (Tagai foi Ioane 17:22–24.)
-
Aisea e taua ai le Tama ma le Alo o Lē na Foafoa? (tagai foi Mose 1:32–33.)
-
E faapefea ona avea i tatou o ni atalii ma afafine o Keriso? (tagai foi Mosaea 5:5–8.) O le a le mea tatou te fai ina ia “usiusitai ai i le Talalelei e faapei o atalii ma afafine o Keriso”? (tagai foi 1 Ioane 2:3; 4:7–8.)
-
Aisea e fetalai ai Iesu Keriso i afioga a le Tama e faapei o Ia o le Tama? O le a le mea ua tau mai e lenei mea e uiga i le sootaga a le Tama ma le Alo?
O le faamalama lanu, sa faia i le 1913 mo le falelotu o le Uarota a Adams i Los Angeles, Kalefonia, o loo mamanuina ai le faaali mai o le Atua le Tama ma Lona Alo, o Iesu Keriso, ia Iosefa Samita.