O le Galuega Ofoofogia o le Salamo ma le Papatisoga

O le salamo ma le papatisoga e taua i le avea ai ma suli o le malo selesitila

Mai le Soifuaga o Iosefa F. Samita

Sa papatisoina Iosefa F. Samita i le aso 21 o Me i le 1852 i City Creek i tafatafa o le tulimanu i matu i sasae o le Lotoa o le Malumalu i le Aai o Sate Leki. O le sauniga sa faia e Peresitene Heber C. Kimball, o se tasi o le Au Peresitene Sili ma o se uo vavalalata a le tamā o Iosefa lea sa tagata valeina. I le faamatalaina o lea aso, sa faapea mai ai Iosefa F. Samita: “Sa ou lagona i lo’u loto e faapea afai sa ou agasala—ma e moni lava sa faapea e leai sa’u agasala—ma ua faamagaloina au; ua ou mama lava mai le agasala; sa lagona i lo’u loto, ma e sa ou manatu o le a ou lē faamanualia se iniseti laitiiti i lalo o o’u vae. Sa ou lagona le ola faafouina, sa faafouina lo’u manao e fai le mea tonu. Sa leai lava se vaega e tasi o le naunautaiga mo le agasala o totoe i lo’u loto. E moni, ua na o au o se tama laitiiti, ina ua ou papatiso; ae o le aafiaga lenei na oo mai i o’u luga, ma ou te iloa e mai le Atua, ma sa avea ma o loo avea pea ma molimau ola ia te au i lo’u taliaina o le Alii.”¹

I lona soifuaga atoa, sa saili Peresitene Samita e faamamalu feagaiga sa ia faia i lona papatisoga. Sa ia aoao o le salamo mai le agasala ua tatau ai i le tausia o ia feagaiga: “Ou te talitonu i le mataupu faavae o le salamo, aua sa suesue i ai ma ou te iloa e lelei. Afai e i ai se taimi leaga ua ou tautala pe faia ai se mea ua faaleaga ai lo’u uso, e le mafai ona faamalieina au, pe lagona saoloto mai le tulaga o le saisaitia seiloga ua ou alu i lena uso ua ou sese ai, ma salamo mai la’u agasala ma toe faalelei ma ia. Ona aveesea ai lea o le avega ma o le a ou lagona ai le aafiaga lelei o le salamo mai le agasala.”²

Aoaoga a Iosefa F. Samita

O le Salamo ma le papatisoga o mataupu faavae moni o le talalelei.

Ou te fia fai atu ia te outou, o mataupu faavae o le talalelei e moni—o le mataupu faavae o le faatuatua i le Atua, o le salamo mai le agasala, o le papatisoga mo le faamagaloina o agasala e i latou e i ai le pule a le Atua, ma le faaee atu o lima mo le meaalofa o le Agaga Paia; o nei mataupu faavae e moni ma e matua manaomia mo le faaolataga o le fanau a tagata, e le afaina poo ai poo fea foi o i ai. … E leai se tasi e ulu atu i le malo o le lagi sei vagana ua toe fanau i le vai ma le Agaga. O nei mataupu faavae e le mafai ona suia aua ua folafola mai e le Atua. E le gata ua folafola mai e Keriso i lona lava siufofoga, ma ona soo mai lea augatupulaga i lea augatupulaga, i taimi anamua, ao aso nei e gata ai, ua latou toe amata ai le molimau lava lea ma folafola atu nei mea i le lalolagi. E moni i le taimi nei e faapei ona moni i lena taimi, ma e ao ona tatou usiusitai i nei mea.³

E tatau ona tatou usiusitai i le finagalo o le Tama. E masani ona ou faalogo i tagata o faapea mai, “Pau lava le mea e manaomia mai le tagata i lenei lalolagi, o le faamaoni ma faamasino tonu, ma o lena tagata o le a maua le faaolataga ma le mamalu. O i latou e faia lena faaupuga, ua latou lē manatua le fetalaiga a le Alii, “a le toe fanau le tagata, e le mafai ona iloa e ia le malo o le lagi.” [Tagai Ioane 3:3.] … E tusa lava pe o le a le lelei, pe o le a le mamalu, pe o le a lona faamaoni, e ao ona ia ui atu i lena faitotoa ina ia mafai ai ona ulufale atu i le malo o le Atua. E manaomia e le Alii. O lea, afai e musu pe lē fiafia foi e ulufale mai i le faitotoa o le lafu mamoe, o le a le mafai lava ona avea ma suli o le Atua ma suli faatasi ma Iesu Keriso.⁴

O le salamo i le agasala o se mataupu faavae e faavavau, ma e matua taua lava, ma o se tasi o vaega taua o le talalelei a Iesu Keriso e pei o le : “aua e te fasioti tagata,” poo le “aua nei e fai mo oe ni atua ese i o’u luma.”

O le papatisoga mo le faamagaloina o agasala, e se tasi ua i ai le pule, o se mataupu faavae e faavavau, aua ua fuafuaina e le Atua, ma ua poloaiina mai, ma o Keriso lava ia sa le’i tuusaolotoina mai le usiusitai i ai; a ua ia usiusitai i ai ina ia mafai ai ona faataunuuina le tulafono o le amiotonu.⁵

Sa aoao mai le Alii e ala ia Iosefa Samita; o le salamo mai agasala, ma le papatisoga i le faatofuina faatasi ma Keriso, sa tanumia faatasi ma Ia i le vai, i le tuugamau vai, ma toe alu ae mai le tuugamau vai e faatusa i Lona toetu mai le oti i le ola, papatisoga i le faatofuina, ma le papatisoga a le Agaga Paia, e ala i le faaee o lima; o mea nei e tatau ai mo le faaolataga o fanau a tagata.⁶

Ua na o le salamo moni e talia e le Atua

E na o le amiotonu e faasaoina ma faaolaina ai tagata i le malo o le Atua, o lea e ao ai ona tatou salamo ia tatou agasala, ma savavali i le malamalama e pei o Keriso o le malamalama, o lona toto foi e faamamaina i tatou mai agasala uma, ina ia tatou mafuta ma le Atua ma maua lona mamalu ma le faaeaina.⁷

E i ai i le salamo le faanoanoa mai mea sese ua fai? Ioe, ae pe na o le pau lea? E leai. Ua na o le salamo moni e talia e le Atua, e leai se mea e itiiti ifo nai lo le salamo moni, e faataunuu ai le faamoemoega o le salamo. O le a la le salamo moni? O le salamo moni e le na o le faanoanoa ona o le agasala, ma le loto faatoese maulalo i luma o le Atua, ae atoa ai foi ma le taua o le liliu ese mai ai, o le taofia o mea leaga uma ma gaioiga, o le toe faatulagaina atoa o le olaga, o se suiga taua mai le leaga i le lelei, mai le lē atoatoa i le mama, mai le pogisa i le malamalama. E le gata i lea, ae ia faia se faaleleiga, i le mea e tatau ai, mo mea sese uma ua tatou fai, ia totogi a tatou aitalafu, ma toe faafoi atu i le Atua ma tagata la latou aia— e tatau ai mo i latou. O le salamo moni lenei, ma e matua manaomia le faatinoina e le loto ma le malosi uma o le tino ma le mafaufau, e faaatoatoa ai lenei galuega ofoofogia o le salamo; ona talia lea e le Atua.⁸

E le talia e le Atua na o le ta’uta’u atu i laugutu ua salamo, sei vagana ua faatinoina. E tatau ona i ai a tatou galuega faapea foi ma le faatuatua; ia tatou faia e pei ona tatou faafoliga mai e fai.⁹

O ai e fai mai i lona loto, i luma o le Atua ma le tagata, “Ua ou matua salamo i au agasala uma.” … E tele ou vaivaiga ma faaletonu. E tele ou vaivaiga e pei foi o le toatele o outou, ae ou te le iloa pe tele atu ou leaga nai lo le toatele o outou. … Ua le mafai ona ou ola ai ma faamamalu lenei mataupu faavae e lua o le talalelei a Iesu Keriso; ma ou te fia vaai i se tagata o loo ola ai. Ou te fia vaai i se failauga ua ia faia. Ae o loo ou taumafai, ou te manao ina ia outou malamalama, ou uso e ma tuafafine, o loo ou taumafai pea.¹⁰

E le mafai ona e aveina se fasioti tagata,… se mulilua, se pepelo, poo se tasi sa faia ma o loo faia pea amio inosia i lona olaga iinei, ma e le faapea o le faia o se sauniga o le talalelei, e faamamaina ai o ia mai le agasala ma auina atu ai o ia i le afioaga o le Atua. E le’i saunia e le Atua se fuafuaga faapena, ma e le mafai ona fai. Ua ia fetalai e ao ina e salamo i au agasala. E tatau ona salamo tagata amioleaga mai a latou agasala. O i latou ua oti e aunoa ma le malamalama i le talalelei, o le a maua e i latou lea malamalama, ae o i latou ua agasala i le malamalama e ao ona latou totogi atu tupe uma lava, mo lo latou soligatulafono ma le o ese mai le talalelei, ao le i toe foi atu i latou i ai. Aua nei galo lena mea. Aua nei galo, outou toeaina o Isaraelu, po o outou foi tina o Isaraelu; ma, pe a outou saili e faaolaina lē o loo ola poo lē ua oti, ia manatua, e na o le mataupu faavae o lo latou salamo ma le talia o le fuafuaga o le ola e mafai ai.¹¹

Ua oo mai le taimi o le faaleleiga … e ao ona tatou… tagi atu i le Alii mo le agaga o le salamo, ma, afai ua maua, mulimuli i ana musumusuga; ina ia lotomaulalo i tatou i ona luma ma saili atu le faamagaloga mai le tasi i le isi, e ao ona tatou tuuina atu lena alofa ma le agalelei ia i latou o loo manaomia le faamagaloga tatou te saili atu ma maua mai le lagi.¹²

Ina ua i ai le ola, e i ai foi le faamoemoe, a o i ai le salamo o loo i ai le avanoa mo le faamagaloina; ma afai e iai le faamagaloina, o loo i ai le avanoa mo le alualu i luma seia atoatoa i le malamalama o nei mataupu faavae o le a faaola ma faasao ai i tatou ma saunia ai i tatou e ulu atu i le afioaga o le Atua le Tama.¹³

E ala i le papatisoga tatou te ulu atu ai i le Ekalesia ma le malo o le Atua.

Afai ua salamo, o le isi mea e sosoo ai o le papatisoga, o le mataupu faavae taua o le talalelei—e leai se tagata e ulu atu i le feagaiga o le talalelei e aunoa ma lena. O le faitotoa o le Ekalesia a Keriso, e le mafai ona tatou ulu atu iina i se isi lava auala, ua fetalai Keriso, “o le faatulutulu,” poo le “sasaa”, e le o se papatisoga. O le papatisoga o lona uiga o le faatofuina i le vai, ma e tatau ona faia e se tasi ua i ai le pule, i le suafa o le Tama, ma le Alo, ma le Agaga Paia. O le papatisoga e aunoa ma le pule paia e lē aoga. O le faatusa o le tanumia ma le toetu o Iesu Keriso, ma e ao ona faia e pei o lena, e se tasi ua tofia e le Atua i le auala ua saunia, afai e leai, e lē faaaogaina ma e lē taliaina foi e ia, ma e lē aoga foi mo le faamagaloina o agasala, o le faamoemoe na fuafua ai, ae o lē ua i ai le faatuatua, ua salamo faamaoni ma ua “tanumia ma Keriso i le papatisoga,” e se tasi ua i ai le pule paia, o le a maua le faamagaloina o agasala, ma ua tatau ona ia maua le meaalofa o le Agaga Paia e ala i le faaee atu o lima.¹⁴

Ua papatisoina i tatou i le suafa o le Tama ma le Alo ma le Agaga Paia. Ua tatou oo atu i le Ekalesia ma le malo o le Atua i le suafa o le Tama le Alo ma le Agaga Paia, ma tatou te tapuai i le Tama. Tatou te saili e usiusitai i le Alo ma mulimuli i ona tulaga aao.¹⁵

O le tiute o le tagata o le Au Paia, o le aoao o a latou fanau i le upumoni, ia aoao i latou e tusa ma o latou ala, ia aoao i latou i muai mataupu faavae o le talalelei, le taua o le papatisoga mo le faamagaloina o agasala, ma le auai i le Ekalesia a Keriso.¹⁶

O le papatisoga o le faatofuina mo le faamagaloina o agasala, e se tasi ua i ai le pule, o se mataupu faavae moni, aua ua aoao mai e Keriso; sa usitaia e Keriso, ma e le taofia, nai soo se mea. Ia faataunuuina—e le faapea ona ua agasala o ia ma ua manaomia le papatisoina mo le faamagaloina o agasala, ae ua ia manaomia e faia ina ia faataunuuina ai le amiotonu, o le faataunuuina lea o le tulafono.¹⁷

Sa faataunuuina e Iesu lava ia sauniga o le papatisoga; sa ia saunia le faamanatuga o le talisuaga a le Alii, ma faapaiaina lona faataunuuina; ma faia isi sauniga ua ia finagalo e tatau mo le faaolataga o tagata. I le tala ia Nikotemo, ua ia faamamafa atu le papatisoga ua ia faaaogaina ai le fanau i le vai ma le Agaga ua tatau ai mo le faaolataga o le tagata [tagai Ioane 3:1–5].¹⁸

E foliga mai, i nisi o o tatou tagata, le le lava o le manatu i le faapaiaina o le auai i nisi o sauniga o le Perisitua Paia. E moni, o le faataunuuina e i latou ua i ai le pule ia i tatou ua le faia ai ni … faaaliga e pei o sauniga faale-lalolagi … , ae o le mea moni o le Ekalesia a Iesu Keriso o le Au Paia o Aso e Gata Ai ua i ai le Perisitua ua lava lea e faataunuuina ai sauniga uma e lē ua i ai le pule i totonu o le Ekalesia, o se mea e sili ona taua. I le faia o ia sauniga o lē ua ta’ita’i e tautala ma galue, e lē mo ia ma lana pule faaletagata, ae ona o lona valaauga o loo avea ma sui o mana faale-lagi. Tatou te lē faia le sauniga o le papatisoga o se faaaliga faapitoa; ae o le faatulagana faigofie ua faatuina i le Ekalesia a Keriso, e ao ona faaopoopo ai tulaga paia o le sauniga, ae lē o le toese mai ai.¹⁹

E faaeaina e le Atua i latou e salamo, ma papatisoina, ma tumau le faatuatua.

E i ai faamanuiaga e faatatau i le talalelei a Iesu Keriso ma le lalolagi o le a oo mai, e le mafai ona maua mai le aafiaga faaletagata, pe faatauina foi i tupe, ma e le mafai e se tagata i lona lava poto poo le atamai ona ia maua sei vagana ua savali ai i sauniga faapitoa, tulafono ma poloaiga ua uma ona tuuina mai. Ma e lelei, i la’u lava faamasinoga, mo le Au Paia ina ia faaauau ona iloa o faamanuiaga o le talalelei ua faapaiaina ai i latou e ala i lo latou faatuatua, o le faamagaloina o agasala ua maua mai le papatisoga ma le salamo, ma e na o le tumau ai i le faatuatua e mafai ai ona latou maua meaalofa ma faamanuiaga e faatatau i le ola e faavavau.²⁰

O lenei, matou te faapea atu ia te outou ua salamo ia outou agasala, o e ua tanumia ma Keriso i le papatisoga, ua faatuina mai le tuugamau vai i le ola faafouina ina ua fanau mai le vai ma le Agaga, ua avea ma fanau a le Tama, o suli o le Atua ma ua suli foi faatasi ma Iesu Keriso— matou te faapea atu ia te outou, afai tou te usiusitai i tulafono a le Atua, ma tuu le faia o le leaga, … ma faatuatua i le Atua, talitonu i le upumoni ma mauaina [le upumoni], ma faamaoni i luma o le Atua ma tagata, o le a faatuina mai i le mea maualuga, o le a tuuina outou e le Atua i luma, e pei ona outou usiusitai ai i nei poloaiga. O ai e usiusitai i poloaiga a le Atua, e le afaina poo outou poo nisi tagata, o le a tutulai i latou ae lē paʻūʻū, o le a taitai ae lē mulimuli, o le a agai i luga ae lē o lalo. O le a faaolaina e le Atua i latou ma faateleina i latou i luma o atunuu o le lalolagi, ma o le a ia faamau faailogaina lana faamaoniga i luga ia i latou, o le a faaigoa i latou e faapei o ana. O la’u molimau lenei ia te outou.²¹

O le talalelei lenei a Iesu Keriso, o le iloa o le Atua soifua moni ma lona Alo ua ia auina mai i le lalolagi, o le malamalama e oo mai i le usiusitai i ana poloaiga uma, faatuatua, salamo i agasala, papatisoga e ala i le faatofuina mo le faamagaloina o agasala, o le meaalofa o le Agaga Paia i le faaee atu o lima o ē ua i ai le pule paia, ae lē o manatu o tagata. O lenei, o le talalelei a Iesu Keriso o le mana o le Atua i le faaolataga: usiusitai i le upumoni, usitai i le faatulagana a le Atua ua faatuina i lona fale, aua o le fale o le Atua ua faatulagaina tonu ma tatau ae lē o le fale o le faasoesa.²²

Ua matou molimau o pa pupuni o loo tuu eseese ai tagata mai le Atua ua soloia, ua toe fesootai mai le finagalo o le Alii i tagata. “Ae peitai,” ua fai mai ai se tasi, “E faapefea ona tatou faamasani i nei mea? E faapefea ona matou iloa ua le faaseseina outou?” I nei mea uma ua matou faapea atu, salamo ia outou agasala ma le loto fuatiaifo, ona papatisoina lea, ma faaee atu lima i o outou luga mo le meaalofa o le Agaga Paia, ma o lena agaga o le a molimau ia te outou i le moni o la matou molimau, ma o le a fai outou ma molimau e pei o i matou, ma mafai ona tulai atu i luma ma le le fefe ma molimau i le lalolagi e pei ona matou faia.²³

Fautuaga mo Suesuega

O le a le salamo moni”? Aisea e muamua ai le salamo i le papatisoga?
O le a lo tatou aafiaga pe a tatou le usiusitai i tulafono a le Atua? Aisea e sili ai le usiusitai i tulafono a le Atua nai lo le faia o le agasala ma le faamoemoe e salamo?
E faapefea e le mataupu faavae o le salamo ona aumai le faamoemoe ia i tatou? (Tagai foi i le Moronae 7:41.) E faapefea ona vaai atu i le salamo o se “avanoa mo le alualu i luma”?
O le a se lagona e te maua ona ua e iloa o se tasi ua tofia e Iesu Keriso ua papatisoina i tatou i le suafa o le Tama ma le Alo ma le Agaga Paia? (Tagai foi i le MFF 20:73.) O le a sou lagona ina ua e papatiso, pe ina ua e auai foi i papatisoga o isi?
Aisea e sili ai le taua o le pule o le perisitua e papatiso ai i sauniga o le papatisoga nai lo se isi “sauniga faale-lalolagi”? E faapefea ona faasaoina ma tausisia pea le faigofie o le sauniga o le papatisoga?
O le a se malamalama ma faamanuiaga ua e maua e ala i le salamo ma le papatisoga? E faapefea ona faatumau nei faamanuiaga?
O le a le feagaiga tatou te faia pe a papatiso i tatou? (Tagai foi i le Mosaea 18:8–10; MFF 20:37.) Mai le taimi o lou papatisoga, o faapefea ona e faamamaluina au feagaiga ma le Faaola?