Mataupu 26
Tausia o le Sapati: Ina ia Atoatoa Ona Lelei Lou Olioli
O le Sapati o se aso ua faatulagaina e le Atua mo i tatou ina ia tapuai ai, tatalo ai, ma avatu ai a tatou viiga i le Silisiliese.
Mai le Soifuaga o Iosefa F. Samita
Sa silafia e Peresitene Iosefa F. Samita ma aoao atu le matafaioi tele e tatau i tagata o le Au Paia ona faamamalu i le Aso Sapati. Sa ia aoao atu i le Au Paia ina ia tapuai i le Alii i le Sapati ma faaaoga le taimi e aoao ma faamanuia ai o latou aiga. Sa ia saunoa mai: “I Aso Sapati, e tusa ai ma lo’u iloa, i le va o itula o tapuaiga, ou te fiafia e maua le avanoa e nofo ai i lalo i lo’u fale ma lo’u aiga ma talanoa ma i latou, ma feasiasiai ma i latou, ma faamasani atili ia i latou. Ou te fiafia e maua le avanoa e faaalu ai le tele o le taimi e tatau ai i le Aso Sapati mo lenei faamoemoe; ia faamasani ma la’u fanau, fesootai ma i latou, ma fesootai i latou ma tusitusiga paia, ma mafaufau i nisi o mea e ese mai tala malie ma tausuaga ma taliega ma le fiafia, ma mea faapena.”1
Sa ia aoao atu foi le taunuuga o le solia o le aso ua faapaiaina e le Alii. I le Aso Sa, 12 Iuni 1898, i le Tapenako i Sate Leki sa ia saunoa ai: “Ao o’u sau i lenei sauniga, sa ou pasia se tasi o le au uso, ma sa ia faapea mai ia te au e faapea ao pasia e ia le fale e faatali ai pasese o nofoaafi sa ia vaai atu i se faapotopotoga tele o tagata iina ua sauni e o atu i se nofoaga e faafiafia ai. … Afai e i ai se tasi o i latou ua faapea mai o ia o le tagata o le Au Paia, o lona uiga o mataupu o loo latou aoao nei i ai i le aso ua feteenai ma le tulafono a le Atua, feteenai ma le feagaiga sa latou faia i le vai o le papatisoga, ma feteenai ma feagaiga ua osia i nofoaga sili ona paia ua malaga atu i ai tagata o le Au Paia. Ua latou solia le Aso Sapati, ua latou le faamamaluina le poloaiga a le Alii; ua latou faamaonia lo latou lava lē usiusitai i le tulafono, ma ua latou faia mea ua lē matagofie i le silafaga a le Atua, ma o le a afua ai i se taimi mulimuli ane lo latou faamanu’alia, a lē o lea o lo latou liliuese.”2
Aoaoga a Iosefa F. Samita
Ua faailogaina e le Alii ma faapaiaina le aso e tasi mai le fitu.
Ua faia e le Atua ma faailogaina le Aso Sapati o se aso e malolo ai, o se aso e tapuai ai, o se aso mo galuega lelei, ma le lotomaulalo ma le salamo, ma le tapuaiga i le Silisiliese i le agaga ma le upumoni.3
Ua i ai le lagona tuputupu ae pea i le lalolagi ina ia lē toe tausisia le tausia o le Aso Sapati. O le tulafono: “Ia manatua le Aso Sapati ina ia faapaiaina,” o le tulafono o aso nei e faapei ona tuuina atu ia Isaraelu i le Mauga o Sinai [Esoto 20:8].4
O le Sapati o se aso e malolo ma tapuai ai, ua faatulagaina ma faailogaina i le poloaiga faapitoa a le Alii i le Ekalesia a Iesu Keriso o le Au Paia o Aso e Gata Ai, e ao ona tatou faamamalu ma tausia le paia. E ao foi ona tatou aoao a tatou fanau i lenei mataupu faavae.5
E tasi le aso mai le fitu ua faatulagaina ma faamamaluina o se aso e tapuai ai, o le aso o mafaufauga loloto, o se aso o le tatalo ma le faafetai, ma tatou aai ai i le Talisuaga a le Alii e manatua ai o Ia ma Lana togiola lē mafaatusalia. Ia tatou aoao a tatou fanau e ao ona latou tausia le Sapati ma faamamaluina, ma ia latou faia ona o lo latou naunau e fai, ma ona ua poloaiina ai e le Atua. Ona latou maua ai lea o le faafiafiaga ma le malologa, suiga ma le fiafia, i se auala tonu i isi aso. … Ia aua nei o tatou solia le Sapati.6
O a mea e tatau ona tatou faia i le Aso Sapati?
Faamamalu i le Aso Sapati, ma tausia i le paia. Tapuai i le Alii i le Aso Sapati. Aua nei galulue. Aua nei o atu e saili i mea e lē aoga i le Aso Sapati. Malolo, ma faafouina le mafaufau i le tatalo, suesue, ma mafaufau i mataupu o le olaga ma le faaolataga. O galuega tatau nei mo le Aso Sapati. …
Ia o atu tagata mai iinei i o latou aiga ma aveatu lenei feau ma i latou, ma faalautele atu i tagata o o latou aiga e le’i faalogo i ai. Fai atu ia i latou, e tetee le au Peresitene o le Ekalesia a Iesu Keriso o le Au Paia o Aso e Gata Ai i le solia o le Aso Sapati.7
O le tausia lelei o le Aso Sapati o se tiute o tagata uma o le Au Paia o Aso e Gata Ai—e aofia ai ma alii ma tamaitai talavou ma tama ma teine. Atonu e foliga ese le alagatatau o le faia pea lava pea o lenei mea. Ae foliga mai o loo i ai nisi o tagata, ma o nisi o taimi o nuu atoa, ua faatuatuanai i lenei tiute, ma o lea ua manaomia ai lenei fautuaga.
O a mea e manaomia ona tatou faia i le Aso Sapati? O faaaliga a le Alii i le Perofeta o Iosefa e uiga i lenei mataupu e matua manino, ma e ao ona taitaiina ai i tatou, aua ua talafeagai lelei ma aoaoga a le Faaola. O nisi nei o ni mea faigofie e manaomia:
O le Sapati ua atofaina e te malolo ai mai au galuega.
O le Sapati o se aso faapitoa mo oe e tapuai ai, e tatalo ai, ma faaali ai le agaga ma le naunautaiga i lou talitonuga faalelotu ma tiute—ma aveatu ai viiga i le Silisili.
O le Sapati o se aso afai o le a manaomia ai oe e tuuina atu lou taimi ma galuega e tapuai ai i le Alii, poo fonotaga, poo le aiga, poo fea lava le mea tou te i ai—o le manatu lena e ao ona i ai i o outou mafaufau.
O le Aso Sapati o le aso e tatau ai ia te oe ma uso ma tuafafine, ona auai i sauniga o le Au Paia, ia saunia ina ia taumamafa i le faamanatuga o le talisuaga a le Alii; ina ua maea ona tautau atu a outou agasala i luma o le Alii ma ou uso ma tuafafine, ma faamagalo atu uso e pei ona e manao i le Alii e faamagalo ia te oe.
I le Aso Sapati e te le faia lava se isi mea ae tau o le saunia o au meaai ma le loto e tasi, ina ia atoatoa ona lelei lau anapogi, ma ia atoatoa ona lelei lou olioli. O le mea lea ua ta’ua e le Alii o le anapogi ma le tatalo [tagai MFF 59:13–14].
O le mafuaaga o lenei mataupu manaomia e tusa ai ma le Aso Sapati o loo faamatala manino mai i faaaliga. Ina ia e tausi atili ia te oe lava ia mama mai le lalolagi; ma o lenei, foi, e manaomia le Au Paia e ulu atu i le faletatalo ma aveatu ai au faamanatuga i le Aso Sapati [tagai MFF 59:9]…
E lē fiafia le Alii i tagata ua latou iloa nei mea ae lē faia.
Ua le malolo alii mai a latou galuega pe a latou suo tosina, ma totō ma la’u ma ‘eli. Ua le malolo i latou pe a latou feofeoai i totonu o le fale i le aso atoa i le Aso Sa, ma faia galuega mama sa le mafai ona latou faia i isi aso ona o le pisi tele.
Ua le faaalia e alii se agaga ma se naunautaiga i lo latou faatuatuaga faalelotu ma tiute pe a latou faavavevave ese atu i le taeao po o le Aso Sa… i mauga, matafaga, ma asiasi i uo poo nofoaga faafiafia ma a latou ava ma fanau. Ua latou lē tuuina atu la latou viiga i le Silisiliese.
E lē o le saili i le fiafia ma le malologa ua latou ofoina atu ai o latou taimi ma le tautinoga i le tapuaiga i le Alii; latou te le olioli foi i le agaga o le faamagalo ma le tapuai lea e oo mai i le taumamafa i le faamanatuga paia.
O tama ma alii talavou ua lē anapogi ma le tasi o le loto ina ia atoatoa lo latou olioli pe a latou faaalu le Aso Sapati o feoai solo ai i le fale aisa kulimi i le nuu poo le faleaiga, taaalo i ni taaloga, poo tietiega, faiga faiva, fanafanaga manu, poo le faia o ni taaloga, tafaoga ma evaevaga. E lē o le faiga lenei e taofia ai i latou ina ia mama mai le lalolagi, ae o lea o le a le mafai ai e i latou ona maua ia folafolaga mauoa a le Alii, ma aumai ai ia i latou le faanoanoa ae lē o le fiafia, le pisapisao ma le lē mautonu ae lē o le filemu e oo mai ona o galuega o le amiotonu.8
Tatou te maua, pe tatou te maua uma faamanuiaga pe ana fai tatou te tuuina atu ma le atoatoa itula taitasi o le Sapati mo ni galuega, poo mea fia faataunuuina, poo sina suesuega, e faaalualu ai i luma o tatou mafaufau ma faamasani atili ai i tatou ma o tatou tiute i le Ekalesia, ma tulafono o le Ekalesia, ma poloaiga a le Atua, ma mataupu o le talalelei a Iesu Keriso. …
O lo’u talitonuga lenei o le tiute o le tagata o le Au Paia le faamamalu i le Aso Sapati ma faapaiaina ai, e pei ona poloaiina ai e le Alii i tatou ina ia faia. Ia ulu atu i le fale o le tatalo. Faalogo i faatonuga. Tuuina atu a outou molimau i le upumoni. Taumafa i le punavai o le malamalama ma faatonuga, e pei ona tatala mai ia i tatou e i latou ua musuia latou te tuuina mai faatonuga. Pe a tatou o atu i aiga, ia faapotopoto le aiga. Tatou usuusuina ni nai pese. Tatou faitau se mataupu se tasi pe lua i le Tusi Paia, poo le Tusi a Mamona, poo le tusi o le Mataupu Faavae ma Feagaiga. Tatou talanoa i mataupu o le talalelei e faatatau i le faaalualuina i luma i le aoga o le malamalama paia, ma i lenei auala ua faatumulia ai le aso e tasi mai le fitu. …
Ou te manatu o se mea lelei mo i tatou le vaaia lelei o a tatou fanau i le tasi le aso o le vaiaso, ma aoao i latou i le mamalu ma le faamaoni, le faaaloalo mo le mea sao ma paia, ma aoao i latou ina ia faaaloalo i tagata matutua ma vaivai, ma alolofa i tagata ese o loo mau ma i latou… E ao ona tatou aoao i latou i le faaaloalo. Tatou aoao o tatou atalii ina ia avea ma ni alii, ma o tatou afafine o ni tamaitai. Ma pe a ou talanoa e uiga i se tamaitai poo se alii, o lona uiga o le tama poo le teine, poo le tamaloa poo le fafine, o le ua usitaia le ola faamaoni, lotomaualalo, agamalu, onosai, alofa ma le agalelei i fanau a tagata. …
E tele naua mea e mafai ona tatou fai i le Aso Sapati e faafiafia, matagofie, ma aoao ai a tatou fanau i le aiga, i le va o itula o sauniga. … Ia tuu i latou ia maua le fiafia i le taimi e tatau ai, ae ia aoaoina i latou i mea sili i le Aso Sapati.9
O le afiafi o le Aso Toonai e mafai ona faatulagaina lelei o se faatomuaga mo le aso o le Alii.
O le tiute o tagata o le Ekalesia ina ia fuafua a latou galuega ina ia leai ai se faanoi e gaoia le aso o le Alii mai lona mamalu. O lea e ao i tama ma teine ona maua ni o latou [taimi] i le vaiaso, e mafai ona faaaoga lelei mo ni faafiafiaga, ae taatia ai le Sapati mo le aganuu faaleagaga ma le tapuaiga. E tutusa lava le avea ma tiute le fuafua lelei o a tatou faafiafiaga ina ia le faalavelave ai i a tatou tapuaiga.10
O le afiafi o le Aso Toonai e mafai ona faatulaga lelei o se taimi mo talanoaga loloto poo le faitauga tusi e fesoasoani ai e avea ma faatomuaga i le Aso Sapati.11
O se poloaiga fou lelei e mafai ona faitauina faapenei: Aua nei ova a’e le galue ma popole ai i le Aso Toonai ma aveesea mai ai i le Sapati le tautinoga ma le tapuaiga ua i ai o se aso e malolo ai.
I le aiga, o le Aso Toonai o se aso ua faatulagaina mo le faamamaina o le fale, mo le kukaina o meaai, mo le suiina ma faaleleia o le tele o mea ua manatu e manaomia mo le Aso Sapati. I le aufai pisinisi, o le Aso Toonai o le aso e faamaea ai galuega manaomia, ma tapunia ai mea taitasi uma e lei maea o galuega o le vaiaso.
O le taunuuga o a tatou gaioiga i le aso faaiu o le vaiaso e masani ona faaalia mai i le paie ma le le popole e oo mai i o tatou lagona ma le matua leai o se malosi ua le o gatasi ma le agaga e tapuai ai. E leai se alii poo se tamaitai ua lē lavā, ona o le galue malosi i le taeao o le Aso Toonai ma le afiafi po o le Aso Toonai, e mafai ona tapuai lelei i le Atua i le agaga ma le upumoni.12
O tagata ua fai ma amio le solia o le aso o le Alii o le a latou lē maua le Agaga o le Alii.
Ia e faamamalu i le Aso Sapati ma faapaiaina ai. Tatou te faia ea lena mea? E alagatatau ea ona faia lenei mea? E matua alagatatau lava le faia ina ia mafai ai ona tatou o gatasi ma tulafono ma poloaiga a le Atua; ma a oo i le taimi tatou te solia ai lena tulafono poo lena poloaiga ua tatou agasala i le solia o le tulafono a le Atua. Ma o le a le iuga pe afai tatou te faia pea? O le a mulimuli mai a tatou fanau i o tatou tulaga vae; o le a latou le faamamalu i le poloaiga a le Atua e faapaia i le aso e tasi mai le fitu o aso; ma o le a aveesea le agaga o le usiusitai i tulafono a le Atua ma ana faatulagaga, e faapei foi ona aveesea mai le tamā pe a ia faia pea le solia o poloaiga.13
O tagata ua fai ma amio le solia o le aso o le Alii ua lē mafai ona i ai i se fegalegaleaiga faaleusoga, ma o tagata o le Ekalesia ua faatuatuanai le tapuai i nofoaga faitele ma le taliaina o le Faamanatuga ma ua lē manatua e tausi i le Aso Sapati ma faapaiaina, o le a vaivai lo latou faatuatua ma gasegase faaleagaga, ma o le a aveesea le agaga ma le alofa o le Atua, ma mulimuli ane ua faaleaogaina lo latou tulaga i le Ekalesia ma lo latou faaeaga faatasi ma e usiusitai ma faatuatua.14
Sa fetalai le Alii, “Ia manatua le Aso Sapati, ma faapaiaina ai.” O le tulafono a le Atua, e le gata mo nei tagata, ae mo tagata soifua uma. O se tagata o le Ekalesia ua le faamamalu i le Aso Sapati ma faapaiaina, ua solitulafono o ia; o le a le toe faaauauina o ia i le upumoni; ua le o ia o se soo o Keriso; o le a le iloa e ia le upumoni, ma o le a le tuusaoloto o ia e le upumoni seia vagana ua ia iloa ma ola ai.15
O fale tifaga ma isi nofoaga faitele o faafiafiaga ua faia i le Aso Sapati ua feteenai ai ma le faaaliga a le Alii, ma ua faamaonia o se mea moni tele lea na te faatoilaloina le faatuatua o i latou ua faia lenei mea. E ao i matua o le autalavou a Siona ona puipui malu i a latou fanau ina ia tetee atu i lenei mea ma isi agasala uma, aua o le a tauave i o latou luga pe afai ua sese ese mai a latou fanau ona o lo latou faatamala.16
E tutusa lava le tiute o tagata o le Au Paia i le faamamaluina o le Aso Sapati, ma faataunuu nei tiute ua poloaiina ai i latou mo le Sapati, e faapei foi o lo latou faamaoni i o latou tuaoi ma ola ai i se soifuaga amiotonu. … O se tiute foi o matua le faia o ni faataitaiga mo a latou fanau e faamamalu le Aso Sapati, i le tatalo i totonu o le aiga, ma le faia o tiute uma o tagata o le Au Paia. O se tama ma se tina e faatamala e aoao a latou fanau ma faamalosi i ai e faia o latou tiute, o le a lagona le faanoanoa i lo latou lava valea.17
O i latou o e faamamalu i le Sapati e maua faamanuiaga sili faaletino ma le faaleagaga.
O le Aso Sa o se aso e malolo ai, o se suiga mai galuega faifai pea o le vaiaso, ae o se mea e sili atu nai lo lena. O le aso e tapuai ai, o se aso e faamauoaina ai le ola faaleagaga o le tagata. O se aso o le faapaie, o se aso o le toefuatai o le tino malosi faaletino, o se mea ua matua ese mai le aso ua faapaiaina e le Atua o le aso e malolo ai. O le vaivai o le tino ma le faapaie ua le tusa ai ma le agaga e tapuai ai. O le faatulagaga e tatau ai o tiute ma le tuuina atu atoa mo le Aso Sapati, e ala mai suiga ma le ola faaleagaga, o le a maua ai se malologa sili o le a fiafia i ai tagata i le Aso Sapati.18
Ou te manao ma le faamaoni. … ina ia faamalosia i tatou i lo tatou faatuatua; ina ia avea i tatou ma tagata o le Au Paia sili atu ona lelei e faatusatusa i le mea sa tatou i ai i le taimi tuanai. O se tasi lenei o mataupu ogaoga tatou te maua i le tapuai faatasi i le Aso Sapati. … Ua ou lagona ua tatou pau atu i le amio o le o mai i sauniga e aunoa ma se agaga salamo faapitoa o le loto. Atonu e manatu ifo o se mea faigata lenei ua fai atu ai, ma atonu e le aofia uma ai i tatou, ae ua ou mautinoa e toatele ua o mai i sauniga ua leai se agaga, e aunoa ma se faamoemoega faapitoa. Ou te manatu e ao ona tatou o mai i sauniga e faailoa atu ai i luma o le Alii tatou te manatua le Aso Sapati ma ua tatou saunia e aoao ai i Ona ala. …
Ou te manatu e ao i tagata uma ona talitonu i se lagona o loo i ai se vaega o lenei galuega o loo faalagolago i tagata taitoatasi. E tatau i tagata uma ona iloa o le a ia selesele mea na ia lulu. O lea, e ao i tagata taitoatasi ona galulue ma le maelega ma pe a tatou faatasitasi e ao i tagata taitoatasi ona i ai i le agaga tatalo ma ia tuuina atu lona agaga, ua le na o ia lava, ae mo le ekalesia atoa. Afai e faia lenei mea, o le a leai se tasi e aluese mai le fale o le tapuaiga e aunoa ma le maua o le agaga o le Atua.19
O lenei, o le a le folafolaga mo le Au Paia o e ua tausia le Sapati? Ua folafola mai e le Alii e faapea afai tatou te faia nei mea ma le loto olioli ma le mata fiafia, o le atoaga o le lalolagi o la latou ia; “o manu vaefa o le fanua ma manu felelei o le vanimonimo, ma mea e feaei i luga o laau ma savavali i luga o le laueleele. Ioe, ma laau afu, ma mea lelei e maua mai le eleele, pe aoga mo meaai poo ofu, poo fale, poo fale o manu, poo togalaau aina, poo faatoaga, poo tovine.” [MFF 59:16–17.]
O nei mea uma ua faia mo le manuia ma le faaaogaina e tagata ina ia fiafia ai mata ma faafiafiaina ai le loto, ma faamalosi ai le tino ma faaolaola ai le agaga. O nei mea uma ua folafola mai mo i latou ua tausia poloaiga, ma o loo i ai i poloaiga lenei poloaiga taua, o le tausia lelei lea o le Aso Sapati. …
Ia tatou taaalo ma maua le fiafia i o tatou loto i isi aso, ae i le Aso Sapati ia tatou malolo, tapuai, o atu i le fale o le tatalo, taumamafa i le faamanatuga, ia ai a tatou meaai i le loto e tasi, ma aveatu a tatou viiga i le Atua, ina ia avea le atoatoaga o le lalolagi ma tatou, ina ia mafai ai ona tatou maua le filemu i lenei lalolagi ma le ola e faavavau i le lalolagi a sau.20
Fautuaga mo Suesuega
-
O le a se faamoemoega na “faatulaga ma faapaiaina ai” e le Alii le Aso Sapati? O a faamanuiaga i le i ai o se aso e malolo ma tapuai ai?
-
O le a le uiga o le malolo mai a tatou galuega i le Aso Sapati? O a “galuega e talafeagai ai mo le Aso Sapati”? E faapefea ona tatou aoao tagata o o tatou aiga ina ia faamamalu i le Aso Sapati?
-
O le a le uiga o le “mama mai le lalolagi”? E faapefea i le tausia o le Sapati ona fesoasoani ia i tatou e faia ai lenei mea?
-
E faapefea ona avea le fiafia ma le olioli o se vaega o le tausia o le Sapati? (Tagai foi MFF 59:13–14.) E faapefea e le le faamamaluina o le Sapati ona taitaiina i tatou i le faanoanoa, aveesea o le Agaga, ma le liliuese?
-
O a tiute o o tatou aiga i le Sapati? I le Sapati, e mafai faapefea ona tatou aoao a tatou fanau i le “faaaloalo mo le mea sa’o ma le paia”?
-
E mafai faapefea e a tatou gaioiga o le Aso Toonai ona faaopoopo pe toese mai lo tatou tapuai i le Sapati?
-
O le a la tatou matafaioi pe a tatou auai i sauniga o le Aso Sa? O a faamanuiaga tatou te maua pe a tatou maua le agaga moni o le tapuai i a tatou sauniga?
-
O a faamanuiaga faaleagaga tatou te maua pe a tatou faamamalu i le Sapati? O a faamanuiaga faaletino ua folafola mai mo i tatou? (Tagai foi MFF 59:9–23.)
O le Aufaipese a le Uarota 20 i Sate Leki i le amataga o le 1900. Sa saunoa ia Peresitene F. Samita e faatatau i musika sa lagiina e le “aufaipese a le Au Paia” o se viiga malie o le Atua,” sa taua mo la tatou ta puaiga i le Aso Sapati (Mataupu o le Talalelei, 259).