O Musumusuga ma le Paia o Tusitusiga Paia

O uso o le Ekalesia e ao ona suesue ma le faamaoni i tusitusiga paia ma ia taumafai e ola ai i mataupu faavae o loo aoaoina i tusitusiga faavae.

Mai le Soifuaga o Iosefa F. Samita

I le malaga atoa agai atu i le Vanu o Sate Leki i le 1848, sa nonofo ia Maria Filitia Samita ma lana tama o Iosefa ma isi tagata o le aiga ma suesue i tusitusiga paia i le moli ma le malamalama e maua mai i le afi. O aso ia o uluai aoaoga faaleagaga a Iosefa mai lona tina i le faleie, i le togalauapi, ma luga o le laufanua laugatasi.¹ Mulimuli ane i le soifuaga, sa taua e Peresitene Iosefa F. Samita: “A o ou laitiiti, sa loloto lo’u fiafia i le manatu, ma faamautu ai le talitonuga, i lo’u agaga, o faaaliga sa tuuina atu ia Iosefa le Perofeta… o afioga a le Atua, sa faapei o upu a soo anamua ina ua latou molimau i le Tama ma lona Alo. O lena lagona sa ou maua i lo’u laitiiti sa faaauau i taimi uma o le lelei ma le faigata i le sili atu i le 60 tausaga o le galue ai i le misiona, i atunuu o le lalolagi atoa, ma le aiga faatasi ai ma auauna filifilia a le Atua.”²

I le konafesi aoao sa faia i le aso 10 o Oketopa 1880, o le Au Peresitene Sili o le Ekalesia—Peresitene Teila ma ona Fesoasoani o George Q. Cannon ma Iosefa F. Samita— sa latou tauaaoina atu i le Ekalesia le Penina Tautele ma isi vaega faaopoopo o le Mataupu Faavae ma Feagaiga “o ni faaaliga mai le Atua i le Ekalesia a Iesu Keriso o le Au Paia o Aso e Gata Ai, ma le lalolagi atoa.”³ I se palota autasi, sa talia ai e tagata o le Ekalesia nei faaaliga, ma ua faalauteleina ai le aoaoga o tusitusiga paia o le Ekalesia. Mo Peresitene Samita, na avea pea tusitusiga paia ma sosia o “oa faaleagaga.”⁴ Sa ia faaaoga tusitusiga paia i ana aoaoga i lona olaga atoa, ma a o manatunatu loloto i tusitusiga paia sa oo mai ia te ia se faaaliga ua lauiloa nei o le vaega e 138 o le Mataupu Faavae ma Feagaiga.

Aaoaoga a Iosefa F. Samita.

O tusitusiga paia e faaali atu ai upu o le alofa ma oa faaleagaga.

Mo [i latou] ua le mautinoa le mea a fai, i totonu o le tele o aoaoga o loo i ai i lenei lalolagi, ou te faapea atu: Suesue i tusitusiga paia, saili i le Atua i le tatalo, ma faitau mataupu faavae ua folafola mai e Keriso i lana lauga i luga o le mauga, e pei ona tusia i le Mataio, ma pei ona toe tau atu i le au paia anamua i luga o lenei konetineta [Amerika] (III Nifae). Ina ua maea ona sailiili i nei tusitusiga faavae matagofie, ma suesue loloto i le taua o nei lagona le faatuaoia, e mafai ona e luitauina le filosofia o le lalolagi, poo nisi o ona talitonuga ina ia faatusatusa i nei mataupu. O le atamai o tagata e le faatusalia ma i latou. Ua latou taitai e mulimuli ia Keriso i le malolo ma le filemu, ma mafai ai e tagata ona faaatoatoaina e pei ona atoatoa o ia. E leai se isi lava filosofa ua faapea mai e pei ona fetalai Iesu, “O mai ia te au.” Mai le amataga o le lalolagi, seia oo mai i le taimi nei, ua leai se isi tagata poto ua alagaina atu ni upu faapena o le alofa, pe faamaonia ma folafola atu le mana o ia te ia lava e faaola ai. “Ia outou o maia ia te au o outou uma o e tigaina ma mafatia i avega, o au foi e malolo ai outou,” o lana valaau lea i atalii ma afafine uma o tagata [Mataio 11:28].

Ua tali atu le au paia i le valaau, ma e afe ma afe i latou ua maua le malologa, ma le filemu e silisili i mea uma e manatu i ai, e ui lava i le faiga tau faamatau, le fenumiai ma le fe’aina’i, ua latou o ese mai ai. Ua malolo i latou i le malamalama e leai se tagata na te folafola pe aoao atu nei mataupu faavae; o le upumoni a le Atua.⁵

O lē faamatalaina silisili i mea uma lava le faaaliga ma le mana o Tusitusiga paia o le agaga sa tusia ai ma le oa faaleagaga o loo folafola mai ai ia i latou ua faatuatua ma sogasoga e faitau i ai. O o tatou lagona, mo tusitusiga paia e ao ona o gatasi ma le faamoemoe ua tusia ai. Ua faamoemoe e faateleina ai le faapaiaina faaleagaga o le tagata ma faaalia ma faamalosia ai noataga o fesootaiga i le va o ia ma lona Atua. O le Tusi Paia, e pei o isi tusi uma ua paia ona tusia, ina ia talisapaia, e ao ona suesue i ai i latou ua i ai le faamoemoega faaleagaga ma e o loo saili i le upumoni faaleagaga.⁶

O le mea silisili a le tagata e mafai ona faataunuuina i lenei lalolagi o le faamasani lea o i latou i le mana o le upumoni, i lona auiliiliga, i lona atoatoaga, ina ia le mafai ai e faataitaiga ma amioga a meaola uma i lenei lalolagi ona liliueseina i latou mai le malamalama ua latou maua. “I tulaga aao o le Matai,” o le faiaoga sili ua maua e lenei lalolagi, o le ala sili ona saogalemu ma faamaonia e mulimuli ai ua ou iloa i le lalolagi. Tatou te mitiia mataupu, mataupu faavae ma le mana o upu a le Matai, e aunoa ma le fefe o le a toilalo le ua fai ma faataitaiga i le tauaveina ma le faia o ana lava mataupu ma le faataunuuina o ana ia lava mataupu faavae ma mea manaomia.⁷

O tusitusiga paia fou ua aoao mai ia i tatou afioga a le Atua ma molimau o Iesu o le Keriso.

I le molimau a le Agaga Paia o le Atua ia te au, ou te iloa o lenei tusi, o le Tusi o Mataupu Faavae ma Feagaiga, o loo ou umia i lo’u lima, o le afioga a le Atua e ala mai ia Iosefa Samita i le lalolagi, aemaise lava i tagata o le Ekalesia a Iesu Keriso o le Au Paia o Aso e Gata Ai i le lalolagi, ma i le meaalofa ma le mana o le Atua sa ia faaliliuina ai lenei tusi (O le Tusi a Mamona) mai lana gagana faavae, ma tusitusiga i luga o papatusi auro i le gagana ua tatou iloa faitau ai nei i totonu o ona faavaa; ma o loo i ai le atoatoaga o le Talalelei e faavavau. O le a ia taitai tagata ina ia maua le malamalama o le upumoni ina ia faaolaina ai ma toe foi mai i le afioaga o le Atua ma maua ai lona mamalu ma le ola e faavavau.⁸

O Keriso lava ia sa talepeina le noataga o le tuugamau, na manumalo i le oti ma le tuugamau ma ua toe faatuina mai “ua avea ma faapolopolo o e ua momoe.” [1 Korinito 15:20.]… [ O ona] soo sa molimau i le toetu, ma o la latou molimau e le mafai ona faamaluelueina. O lea e tulai mai ai e lelei, ma e moni ma faamaoni.

Pau ea lenei o le molimau tatou te faamoemoe i ai? E leai ea se isi mea a ua na o le molimau o soo anamua e tatou te faamoemoe i ai? Faafetai i le Atua o loo i ai ma isi molimau. Ma o isi molimau faaopoopo o loo ia i tatou ua mafai ai ona avea i tatou o ni molimau i le faamaoni o le molimau a soo anamua. Tatou te o i le Tusi a Mamona; ua ia molimau i le maliu ma le toetu o Iesu Keriso i le gagana faigofie ma e le sese ai; e mafai ona tatou o i le Tusi o Mataupu Faavae ma Feagaiga o loo i ai faaaliga o lenei tisipenisione, ma tatou te maua ai faamaumauga manino ma lelei lona faamatalaina iina. Ua ia i tatou le molimau i le Perofeta o Iosefa Samita, le molimau ia Oliva Kaotui, ma le molimau ia Sini Rikitone, sa latou vaai i le Alii o Iesu—lea na faasatauroina i Ierusalema—ma sa faaali ia lava ia i latou [tagai MFF 76:22–24].⁹

O le Tusi a Mamona [o le ] tusi o tusitusiga paia sa faaliliuina i le meaalofa ma le mana o le Atua, aua o le siufofoga o le Atua ua folafola mai i e molimau e toatolu ua faaliliuina i le meaalofa ma le mana o le Atua ma e faamaoni lea. O molimau e toatolu sa folafola ma molimau i lona faamaoni, ma e valu isi molimau, e ese mai le Perofeta o Iosefa, sa folafola mai sa latou vaai ma fetagofi i papatusi, ma sa vaai i togitogiga o i ai, ua latou mautinoa o loo ia Iosefa Samita ia papatusi na faaliliuina mai ai le Tusi a Mamona.¹⁰

O le Tusi a Mamona, sa avea ai Iosefa Samita o se meafaigaluega i aao o le Atua i le aumaia i lenei augatupulaga, ua faaliliuina i le gagana Siamani, Farani, Tenimaka, Suisi, Uelese, Hawaii, Hindu, Sipaniolo, ma Take, ma o lenei tusi o le a faaliliuina i isi gagana, ma e tusa ai ma le folafolaga o loo i ai, ma e tusa ai ma folafolaga a le Alii e ala mai ia Iosefa Samita e ao ona auina atu i atunuu uma, ituaiga, ma tagata i lalo o le lagi, seia oo ina maua uma e atalii ma afafine o Atamu le faamanuiaga e faalogo ai i le talalelei e pei ona toefuataiina mai i le lalolagi i le tisipenisione o le atoaga o taimi.¹¹

O le Atua o le a ia faailoa mai lona finagalo i sa Lamana i lona lava taimi ma le ala e leai se masalosalo i manatu o i latou o e talitonu i le mana o le amataga mai o le Tusi a Mamona—aua o le tusi o loo manino mai ai le savali e aunoa ma se sese, ae pe faapefea ona ia faataunuuina i vaega uma, ma poo a auala e faaaoga e ia e faataunuuina ai lona finagalo i lenei mea, atonu o se mataupu e i luga atu o mea ua uma ona faaalia. O se tasi o auala, ua tatou iloa, o le Tusi a Mamona lava lea.¹²

Ou te fai atu i ou uso o le tusi o le Mataupu Faavae ma Feagaiga o loo i ai nisi o mataupu faavae sili ona matagofie e le i faaalia muamua mai i le lalolagi, o nisi ua uma ona faailoa mai i le atoaga atoa nai lo le taimi muamua i le lalolagi; ma o lenei, i le faataunuuina o le folafolaga o perofeta tuai o aso e gata ai o le a faaali mai e le Alii mea i le lalolagi sa natia mai le faavaeina o le lalolagi; ma ua faaalia mai e le Alii e ala i le Perofeta o Iosefa Samita.¹³

Ou te talitonu i le mana o Iesu Keriso, aua e sili atu nai lo se isi lava taimi ua ou latalata ai i le mau o le malamalama moni o Iesu le Keriso, o le Alo o le Atua soifua, e ala i le molimau a Iosefa Samita o loo i lenei tusi, le Mataupu Faavae ma Feagaiga, sa ia vaai ia te ia, sa ia faalogo ia te ia, sa ia maua faatonuga mai ia te ia, sa ia usitaia ia faatonuga, ma o le aso o loo tulai ai i luma o le lalolagi o se molimau ola tele mulimuli i le mana o le misiona a Keriso ma lona mana e faaola ai tagata mai le oti faaletino faapea foi ma le oti faalua pe a mulimuli i le agasala a le tagata lava ia, e ala i le usiusitai i sauniga o le talalelei a Iesu Keriso.¹⁴

Suesue i tusitusiga faavae ina ia maua ai le malamalama i afioga a le Atua.

Ou te masani ona maua mai pe a ou faitautusi se fasifuaitau o Tusitusiga Paia, o le Agaga ua aumaia le malamalama fou i lo’u mafaufau, ma ua faaali mai i lo’u malamalama manatu ma lagona e foliga mai e fou ia te au, e ui lava o loo ou iloa ia tusitusiga paia ma ua faitau foi i ai mai lea taimi i lea taimi.O le mea moni e i ai le mea ese ua ou maua e oo mai i le taimi e faitauina ai le finagalo o le Atua, pe a faitauina ua fuafua e faafouina ai le agaga, o le toe faaolaina o le agaga o le tagata, ma faalatalata mai o ia, pe afai e mafai, i le puna o le malamalama, upumoni, atamai, alofa ma le poto. O lea, o se mea lelei i tagata o le Au Paia le faitau pea i afioga a le Atua e pei ona faamauina i le Tusi Paia, Tusi a Mamona ma le Mataupu Faavae ma Feagaiga, ma e pei ona talanoaina foi e uso o loo taitai i le Ekalesia atoa ai ma se manatu ina ia faafaigofie ai tulafono a le Atua ina ia malamalama ai le fanau a tagata.

Ma i le faitauina o le afioga a le Alii e ao ona tatou manatunatu i lona faaaogaina ia i tatou e faatatau i tulaga o loo tatou o i ai, ma faailoa atu ai poo tatou usitaia tulafono o le Talalelei pe leai, ma pe o i ai le agaga i o tatou loto e galulue faatasi ma le finagalo o le Alii. E le tatau ona tau ina tatou faitau ina ia faapea ai ua tatou faitau ai; ae ao ona tatou faitau ma le agaga ma le malamalama, ina ia manuia ai i tatou, ma faaalia ai le mea moni, i le ala e tatau ai, ia tatou malamalama, ma faamauina ai i le mafaufau ma le toe te’a ese ma i tatou, ae o le a i totonu ia i tatou e faapei o se punavai ola o le a puna ae i le ola e faavavau, ma e le faaletonu lava le avea pea lava pea ma punavai o le upumoni, o le malamalama, o le olioli ma le filemu o i tatou.¹⁵

O tagata uma lava o le Ekalesia a Iesu Keriso o le Au Paia o Aso e Gata Ai e ao ona faamasani atili i afioga o loo faamauina i le Feagaiga Fou, aemaise o loo faasino i mea sa fetalai i ai le Faaola ao faamauina e aposetolo. O le Tusi a Mamona e ao ona faitauina ma le faaeteete, ma o le Tusi o le Mataupu Faavae ma Feagaiga e ao ona faitau ma le faaeteete e tagata o le Au Paia. O tusitusiga faavae o le Ekalesia o loo i ai le upumoni, e le sese, e le na o upu ma manatu o tagata, e le o ni tala fatu, e le o ni masalosaloga, ae o le upumoni, o le finagalo o le Atua, aua o lana upu e moni, ma e o mea nei e ao i o tatou afafine, ma atalii, o tatou tama ma tina ona iloa lelei. Ia tatou iloa le upumoni aua o le upumoni e tuu saoloto ai i tatou mai le sese, mai le masalosalo, mai faiga faanuupo, mai saienisi pepelo, ma manatu lē faavaea o tagata ma le faafiapoto o le lalolagi. Afai tatou te aoao i le upumoni ona tuu saoloto ai lea o i tatou mai mea sese ma le malosi o le sese ua aafia ai le lalolagi.

… Tatou te mananao i o tatou atalii ma o tatou afafine ia iloa le upumoni a le Atua ae le o manatu lē faavaea o le lalolagi ma e matou te mananao ina ia outou suesue i na tusi e tou te maua ai le malamalama o le upumoni a le Alii ia i tatou.

O nisi o tatou tagata lelei ua faitau i le tele o tusi ua lomia i lenei vaitaimi, tusi lauiloa e le moni ae leai so latou taimi e faitau ai le Afioga a le Alii. O le tele o nei tusi e matagofie, ae o le masani o le tele o manatu o loo faamatala e na o ni upu matagofie, o fuaiupu ua lelei ona sosoo poo lagona e faapei o fugalaau o loo mataala i luga o le lala e aunoa ma se aa. O le upumoni e te maua mai tusi ua faamaonia o tusitusiga faavae mo le Ekalesia. Ou te vaai atu i le tele o o tatou tagata e sili le lelei i le faitau i mea sa tusia e nisi o tusitala lauiloa nai lo mea tau i le Atua. Latou te le iloa se mea e tasi e uiga i le taua moni o le Talalelei a Iesu Keriso, latou te le iloa pe malamalama i se mea e tasi e uiga i le tiute o le Perisitua ma mataupu faavae o le malo ua faaali mai e le Atua i fanau a tagata ina ia tumau ai le malo o le Atua i le lalolagi. E sili atu lo latou iloa i tusi faitau o tala fatu nai lo le Tusi Paia, Tusi a Mamona, ma le Mataupu Faavae ma Feagaiga—ioe e matua sili atu.¹⁶

E ofo i le faalogo atu i le tele o fesili o loo auina pea i le Au Peresitene Sili o le Ekalesia, ma isi o o’u uso o loo ta’ita’i, mo ni faamatalaga i ni mea faigofie tau le Talalelei. E faitau fia selau fesili, fesootaiga, ma tusi o loo auina mai ia i matou mai lea taimi i lea taimi e fesiligia ai ni faamatalaga poo ni faatonuga i mataupu o loo faigofie lona tusiaina i faaaliga a le Atua—o loo i ai i le Tusi a Mamona, Mataupu Faavae ma Feagaiga. Penina Tautele, ma le Tusi Paia—e foliga mai soo se tasi e iloa faitau e ao ona malamalama.¹⁷

O loo i ai i le talalelei le upumoni. Afai o lea, ma ou te molimau atu o lea lava, o lea e alagatatau ai a tatou taumafaiga uma ina ia malamalama i le upumoni, le tagata ia te ia lava, ma faasoa atu i le agaga ma faataunuuina i a tatou fanau. … O le mea lea e ao ona fai i aso uma, i le aiga, i mataupu, aoaoga ma faataitaiga. … Faaalu le sefulu minute e faitau ai se mataupu mai afioga a le Alii i le Tusi Paia, o le Tusi a Mamona, o le Mataupu Faavae ma Feagaiga, ae e te le’i malolo, pe te le’i alu foi i au galuega o le aso. Fafaga lou ola faaleagaga i le aiga, e faapea foi i nofoaga faitele.¹⁸

Fautuaga mo Suesuega

E faapefea e tusitusiga paia ona “taitai e mulimuli mai ia Keriso i le malologa ma le filemu” ma mafai ai e i tatou ona atoatoa? E faapefea ona fesoasoani ia te oe ina ia avea ma soo filemu o Keriso?
O a “faamoemoega ua mafua ai ona tusia ia tusitusiga paia”? E faapefea ona latou faateleina le noataga o fesootaiga i le va o i tatou ma le Atua?
O le a lou lagona pe a e suesue i tusitusiga paia? I lena lagona e ao ea ona e suesue i tusitusiga paia?
O a vaega o le Tusi a Mamona, Mataupu Faavae ma Feagaiga, poo le Penina Tautele ua faamalosia tele lau molimau o Iesu o le Keriso? O a vaega ua faamalosia lau molimau i le paia o le valaauga o le Perofeta o Iosefa Samita?
E faapefea ona faaalia faamoemoega o le Atua i le taimi nei i tupuaga o tagata o le Tusi a Mamona?
O a nisi o mataupu faavae sili ona matago fie ua faaali mai i le lalolagi” o loo maua i le Tusi a Mamona, Mataupu Faavae ma Feagaiga, Penina Tautele? O a suiga ua maua mai nei mataupu faavae i lou olaga?
O le a le uiga o le faitau i tusitusiga paia ma le faaeteete? Aisea tatou te faia ai lea mea? Pe faapefea ona sili ona lelei le faitauina ma le suesueina o tusitusiga paia?
E mafai faapefea ona tatou mautinoa ua lē faatagaina e i tatou ma o tatou aiga ia tusi taateele, televise, ma isi faafiafiaga mai le avea ma faamuamua, ae suesue i tusitusiga paia?
O le a le aoga o le suesue i tusitusiga paia o le tagata lava ia ma le aiga i aso uma? O faapefea ona faaofi lelei atu le suesueina o tusitusiga paia i olaga pisi faaletagata ma faaleaiga?

first Hawaiian Book of Mormon — O le kopi a Peresitene Iosefa F. Samita o le uluai lomiga i Hawaii o le Tusi a Mamona, 1905. Faatasi ai ma le faaliliuina o le Mataupu Faavae ma Feagaiga, ma le Penina Tautele, ua tauaaoina atu ia te ia i le faapaiaina o le laufanua mo le Malumalu i Hawaii i le 1915.