Sauniuni mo le Afio Faalua mai o Keriso

Matou te talitonu i le moni o le Afio Faalua mai o le Faaola, o lē sa afio a’e i le lagi, ma o le a toe afio mai o Ia e nofotupu e avea ma Tupu o Tupu ma Alii o Alii.

Mai le Soifuaga o Iosefa F. Samita

Sa tuuina atu e Iosefa F. Samita se molimau malosi lava e uiga i le moni ma le faamaoni o le Afio Faalua mai o le Faaola. Sa ia fautuaina le Au Paia ia aoao i afioga a Perofeta a le Atua e faatatau i le Afio Faalua ma ia saunia i latou mo lena mea i le usitaia lea ma faamamalu i a latou feagaiga. Sa ia aoao mai e faapea o le Ekalesia o le “faailoilo faapitoa” lea o le Afio Faalua mai o le Faaola”¹ ma o loo sauniaina le lalolagi mo Lona nofotupu faameleniuma. O le Afio Faalua mai o le Faaola “e le o toe mamao ese atu,”sa tautino mai ai Peresitene Samita, “aua o faailoga o lona Afio mai o loo matuai manino mai lava i le taimi nei.” O ia ma isi o le Au Peresitene Sili sa latou matuai fautua mai i le Au Paia e “galulue ma le matata’u i le Atua ina ia mafai ona tatou faatasitasi ma Lana au paia pe a afio mai o Ia. Aua o le a Ia Afio mai, mai ao, ma laveai Lana au paia ao Ana Agelu o le a latou tauia le lalolagi ma faamama mai le agasala.”²

Sa saunoa mai Peresitene Samita i le agaga o le faamoemoe ma le olioli e faapea: “O ao o mea sese sa salalau solo i atunuu Kerisiano i le augatupulaga lē malamalama ma fefinauaiga ua amata ona mou malie atu, ma ua lautele mai ai mea o le a tutupu ma tatala mai ai le tatou vaavaai atu i le faateletelevave mai o le Meleniuma Tele lea sa valoia mai pea e Perofeta musuia ua mavae. Tatou te saga faamalo atu i le lalolagi atoa i le susulu malosi atu ma le mamalu o le taeao sesegi o lena aso Meleniuma, ma le faalauteleina atu o ona ave i le lalolagi atoa.”³

Aoaoga a Iosefa F. Samita

Ua uma ona tauina mai e Perofeta a le Atua ia faailoga o le Afio Faalua mai o Keriso

E tusa ai. … ma faamasinoga a le Atua lea o le a sasaa atu i luga o atunuu, pe afai e faitau… e tagata valoaga a perofeta e faatatau ia te i latou, ae maise i latou o loo faatatau i ai e le agelu o Moronae, ina ua talanoa ma le Perofeta o Iosefa Samita, i le amataga o lenei Tisipenisione, ou te mafaufau o i latou nei o le a matuai faamalieina ma faaliliuina pe afai lava o loo i ai se faatuatua ia te i latou, o nei faamasinoga o le a oo mai ua lē na o ni taumatematega po o ni manatu lē faavaea, poo ni tu ma aga e tuu faasolo mai i augatupulaga ua mavae, ae peitai o mea moni lava ua faamaonia, e le o toe mamao, ona faataunuuina lea e le Atua ana fuafuaga i e amioleaga ma lē amioatua i le lalolagi. Aua ua le gata ina tautino atu e perofeta ma alii musuia nei mea, ae ua tautino mai foi i le siufofoga o le Alii, ma avefeau paia na auina mai le afioaga o le Atua, e le gata i ona po nei ae faapea foi i aso anamua.

O le Agelu o Moronae, o le sa asiasi ia Iosefa Samita i le aso 21 o Setema, 1823, sa i ai mau e faatatau i ia faamasinoga, ma sa ia ta’ua ai ni Mau e faatatau i nei faamasinoga, ma sa tautino mai ai e le’i faataunuuina lava valoaga a perofeta, ae o le a faataunuuina lava i lenei tisipenisione, ma ua tatou i ai i le amataga, ua i faitotoa lava. O nei upusii o loo i ai se mau ou te fia faatepa outou ia Malaki, mataupu [e tolu]: “Faauta, ou te tuuina atu lau avefeau, na te sauni le ala i ou luma. … ” “Ae peitai, o ai e ono ola i le aso o lona afio mai? Ma o ai foi o le a tulai i le taimi o le a Ia faaali mai ai? Aua o ia e tusa ma le afi a le tunu auro; e tusa foi ma le moli a le tāofu, e nofo o ia, o le tunu ma faamama i le ario,” “Ou te faalatalata foi ia te outou i le faamasinoga; e vave foi ona fai o au ma molimau i e fai togafiti faataulaitu, ma e mulilulua, ma e tauto pepelo, ma e faasaua i le taui i le auauna tauia, o le fafine ua oti lana tane, ma le ua matua oti, atoa ma e faapioina le faamasinoga o le tagata ese, ua latou le matatau foi ia te au, ua fetalai mai ai Ieova o Au.” [Malaki 3:1-3, 5.]

Ma lea foi, i le Mataupu e fa o le tusi a Malaki, sa sii uma mai lava e Moronae. … “Aua faauta, o le a oo mai le aso e mu ai e pei se umu, ona fai ai lea ma tagutugutu o saito o e faamaualuluga uma, atoa ma e fai amio leaga uma, e susunuina foi i latou i le aso o le a oo mai, ua fetalai mai ai Ieova o au; e le faatoeina ai mo i latou se aa poo se la laau.”(Malaki 4:1) E le gata foi i lea, sa sii mai e Moronae le Mataupu e 11 o le tusi a Isaia, o loo i ai foi upu nei e faatatau i lenei mataupu: “A e faamasino o ia ma le tonu i e matitiva, e aoai foi o ia ma le tonu ona o e faamaulalo o i le lalolagi, na te taia foi le lalolagi i le sasa o lona fofoga, o le manava foi o lona fofoga, na te fasioti ai le amio leaga.”[Isaia 11:4.]

Ma lea foi, i le tusi a Galuega o lona mataupu e 3, fuaiupu e 22 ma le 23. … sa sii mai e Moronae e pei lava ona faitauina ai i le Feagaiga Fou.. “E faatuina e le Alii lo outou Atua le Perofeta mo outou. … tou te faalogo ia te Ia i mea uma lava na te fai mai ai ia te outou. E iu foi ina faaumatia nai le nuu o tagata uma lava o e le faalogo i lena Perofeta.” E matua malosi lava lenei gagana atoa ma ua tuusao mai. Sa tautino mai e Moronae o lenei Perofeta o Keriso lea i lona Afio Faalua mai; e le’i faataunuuina lenei mau, ae ua toeitiiti lava ona faataunuuina lea i le Afio moni mai o le Atalii o le Tagata e nofotupu i le lalolagi ma faataunuu lana faamasinoga i le lalolagi. Sa toe taua foi e Moronae le Mataupu e 2 o le tusi a Ioelu i ona fuaiupu e 28 e oo i le 32 e faapea o lenei valoaga ua le toe umi ae faataunuuina loa: “Ou te tuuina foi vavega i le lagi ma le lalolagi, o le toto ma le afi, ma le asu faaniutu. E iu foi ina faaolaina o i latou uma lava o e valaau atu i le suafa o Ieova; aua e i ai le faaolataga i le mauga o Siona ma Ierusalema, faapei ona fetalai mai ai o Ieova, e i ai foi i e o totoe o le a valaauina e Ieova.”[tagai Iosefa Samita… Talafaasolopito 1:36–41.]

I le taimi nei, e foliga mai ia te au e le o le fiafia poo le taua o lenei mataupu ogaoga ua le iloa ona o le faapea ua tatou matele i tu ma aga a o tatou augatama pe na o upu tusitusia foi, poo ni mea lē mautinoa mo le tau faamaoniaina o ia valoaga, ae peitai, na i lo lena, e ao ona fāgua i tatou i le mea moni, o se agelu mai le lagi, o se avefeau moni lava mai le afioaga o le Atua, ua ia toe aumaia ia lava valoaga i le tagata i le lalolagi i lenei augatupulaga.

O nisi o nei fuaitau o tusitusiga paia sa sii mai e le agelu sa i ai le manatu ua uma ona faataunuuina i aso o au aposetolo anamua. A e ona o le valea o le lalolagi ma le vaivai ua faatauaina ai pea lea talitonuga. Peitai, o mea uma lava sa faaletonu ma lē manino i lenei mataupu, ua mou atu ma aveesea, a ua faailoa mai le mea moni i tagata uma. Aua ua tautino mai e Moronae ia Iosefa Samita e faapea o mau uma nei e le i faataunuuina, ae peitai e i ai le taimi sao o le a faataunuuina ai i ona tulaga maoti uma, ma le afio mai o Keriso, o le faataunuuina o le faamasinoga, ma le aumaia o le nofoaiga mulimuli o le filemu, e tatau ona faataunuuina i le tisipenisione lenei. O le malosiaga o atunuu amioleaga uma i luga o le fogaeleele o le a faataapeapeina. O nofoalii o le a tautevateva, o malo o le a pauu, a o Siona o le a tulai ma susulu atu, o le a sulu foi ona ofu, ma faaofuina i le malosiaga, poto, mamalu, ma le pule i luga o le fogaeleele. O Papelonia foi e tatau ona pau, e le tatau ona toe tulai.⁴

O tagata amiotonu o le a latou faalogo i nei faailoga ma saunia i latou mo le afio mai o le Faaola.

O le tele o mauga mu, o mafuie, ma galulolo na tutupu … o faailoga ia na ta’utino mai e le Faaola e ao ona muamua mai i lona afio faalua mai, e ui lava na ia faapea mai o lana sau e pei o le gaoi i le po, a e o loo Ia aumaia lava ni faailoga faapitoa o loo faailoa mai ai o lona afio mai e pei o tatupu o laau ua tau totogo i le tau mafanafana. O le tagata poto ma faautauta o le a faalogo lelei ma saunia i latou ina ia aua nei faafuaseia. O se tasi o faailoga o taimi o lenei, ua folafolaina atu le talalelei i e matitiva, e fai ma molimau i atunuu uma.⁵

E talitonu le Au Paia o Aso e Gata Ai… i faamaumauga o loo i Tusitusiga Paia, e faapea o le a feagai atunuu ma faigata o ni faailoga o le afio mai o Keriso i lana faamasinoga. Latou te talitonu e pule le Atua i afi, mafuie, galulolo, o mauga mu ola, ma afa. Latou te iloaina foi o Ia o le Matai ma le Faitulafono o le Natura ma ona tulafono, ma e latou te iloaina foi na faia e Ia mea uma. Tatou te talitonu o le a sasaa mai ana faamasinoga ina ia iloa ai e tagata lona malosi ma ona faamoemoega, ina ia latou salamo ai i a latou agasala ma saunia ai i latou mo le afio faalua mai o Keriso ina ia nofotupu ma le amiotonu i luga o le fogaeleele.

Tatou te matua talitonu foi o Siona. … o ē loto mama. … o le a sola ese, pe afai o le a tausia mea uma ua faatonuina e le Atua; ae peitai, i le faafeagai o na mea uma, e oo lava ia Siona o le a asia e “tiga e tele, o mai tigaina, o faamai matautia ma mala, o le pelu, o le taui masui, ma le susunuina i le afi” (Mataupu Faavae ma Feagaiga 97:26). O mea uma lava nei ina ia aoaoina ai ona tagata e savavali i le malamalama o le upu moni ma auala o le Atua o lo latou faaolataga.

Tatou te talitonu o ia faafitauli matautia, ma faafatiatamai uma o le natura ua aumaia e le Alii i le tagata mo le lelei o lana fanau, ina ia faaosofia ai le tuuina atu o o latou ola mo isi, ma ia aumaia ai o latou natura lelei ina ia latou alolofa ai ma auauna atu ia te Ia. Tatou te talitonu foi o i latou nei o le a fai ma sui ma avefeau o lana faamasinoga mulimuli, o le a fai foi ma matai faiaoga e aoaoina tagata e saunia ia ola amiotonu mo le afio mai o le Faaola e nofotupu i le lalolagi, ina ua tootutuli tulivae uma, ma tautau atu laulaufaiva uma o Iesu o le Keriso.

Afai e uuna’ia nei lesona i o tatou luga ma tagata o lo tatou atunuu, o le a le toe i ai se tiga o le tino ma le mafaufau, o le maimau o le soifua ma le tigaina tele, o le faanoanoa, o le matautia ma le taufaamata’u.⁶

O a’u. … ou te molimau atu, afai o le a le mafai e le Au Paia o Aso e Gata Ai ona ola i lo latou talitonuga faalelotu, ma tausia a latou feagaiga ma le Atua ma o latou taitai, ma faamamalu le perisitua ua latou maua, ma taumafai ma le faamaoni e aumaia i latou e tausi i tulafono a le Atua, o i latou ia o le a muamua pauu i lalo i le faamasinoga a le Silisiliese, aua o lana faamasinoga o le a amata lava i lona maota.

O le mea la lea, o i latou ua uma ona osia a latou feagaiga ma le Alii i le papatisoga, ma ua solia lena feagaiga, ua faapea o i latou o tagata o le au paia, ae peitai e leai, a e o ni tagata agasala ma le soli-feagaiga, o loo faia agasala a Papelonia, e mautinoa lava o le a “maua e i latou faamai matautia ma mala,”aua ua tusia e toetoe lava ina le faasaoina le au paia amiotonu, a ia o ese ina nei faatasia i latou i agasala ma tofusia foi i latou i ona mala (Faaaliga 18:4; MFF 63:34). O lau molimau lea e faatatau i nei mea. Tatou te faalagolago i afioga a le Alii i nei mea uma, a e le o le upu a tagata, aua ua le gata o Agelu, a o le Atua Silisiliese sa fetalai mai le lagi i lo tatou lava tupulaga o le lalolagi, ma ua tatou iloa ai o ana upu e moni lava ia.

E le gata ina tatau ona saunia o tatou tagata mo faamasinoga, ae faapea foi ma le mamalu o le afio mai o lo tatou Alii, ina ia tatou sao ai mai mala ma faigata o le a liligi atu i luga o tagata amioleaga, a e ia maua le taliaina ma le fiafia o le auauna ma le faamaoni, ma faitauina i e agavaa o le a tutu i luma o le Alii i lona malo mamalu, o la’u tatalo lea.⁷

Ua tatou faalogo e uiga i le ola i taimi faigata. O loo tatou i ai nei i taimi faigata, ae peitai, ou te le o lagonaina le tiga matuitui o lena taimi leaga. E le tupu ia te au lena mea. Ou te taumafai ina ia ou ola ina ia le tupu ia te au. Ou te taumafai ia ou ola ina ia puipuia mai faigata o le lalolagi, pe a fai lava e mafai e au ona ola i le usiusitai i poloaiga a le Atua, ma Ana tulafono ua faaali mai mo lo’u taiala. O le a le afaina lava poo le a le mea o le a tupu ia te au, afai lava o le a faataunuuina o’u tiute, afai ma te vavalalata pea ma le Atua, afai foi ou te agavaa i fegalegaleaiga ma ou uso a tagata, afai e mafai ona ou tu ma le le pona i luma o le lalolagi, e aunoa ma le faaleagaina, e aunoa ma se agasala i tulafono a le Atua, ou te popole ea i se a i le mea e tupu mai ia te au? Ou te matua saunia lava, pe afai o le a ou i totonu o lea faavaa o le mafaufau ma aga malamalama. E matua le afaina lava lea mea. O le mea la lea, o le a le oo mai ai ni faafitauli, poo ni lagona o ni tiga matuitui ma le ootia ma le fefe.

E i ai lava aao o le Alii i mea uma, ma o mea na ou te faailoa atu ai ona aao. Ou te le faapea ua mafua ia te Ia ona feagai tagata ma taua, e le faapea ona ua taumafai isi atunuu e faatoilalo isi atunuu, e le faapea ona ua i ai i le tagata ni fuafuaga faalilolilo le lelei e tetee atu i le saolotoga o ona uso a tagata, e le o i ai lava se mea faapena; ae peitai, e lē pupuu aao o le Atua. O le a Ia faatautaia mea e tupu mulimuli ane ai. O le a Ia tausiaina ma puleaina na mea uma i se auala e le mafai e oe ma au i nei aso ona mafaufau i ai, ma vaai foi i ai, mo se lelei mulimuli ane.⁸

O le usiusitai i le talalelei o le a saunia ai le lalolagi mo le afio mai o le Faaola.

O le usiusitai i le talalelei o le a faasaoina ai le lalolagi mai le agasala, e faauma ai taua, tauaimisaga ma moliaga i le tulafono, poo le leoleo i le nofoaiga faa-Meleniuma. O le a toefuatai ai le lalolagi i lē ana mea uma, ma saunia ai mo le tofi o le amiotonu. E i ai uma lava mataupu faavae o le talalelei a Keriso, ma aafiaga o le a tafe mai i lo latou taliaina ma le faaaogaina e tagata.⁹

O le faaolataga le talalelei, ma a aunoa ma lea ua leai se aoga o mea uma. Sa tatou o mai ma le le lavalava i le lalolagi ma o le a faapena foi ona tatou toe foi atu. Afai o le a tatou maua le afa o le lalolagi, e leai ma se mea tatou te maua ai e tusa lava poo le a le umi tatou te ola ai iinei, pe faamautu ai foi lo tatou ola e faavavau pe a mavae lenei olaga. Ae peitai, ua aoaoina e le talalelei tagata ina ia lotomaualalo, faatuatua, faamaoni ma amiotonu i luma o le Alii ma isi tagata, ma ia ogatasi ma mataupu faavae o loo tauaveina ina ia faalauteleina le filemu ma le amiotonu i le lalolagi, ina ia taofia ai faiga lē tonu uma, o le faamasaa toto, o fefinauaiga, ma le agasala, a ia faamamaina le lalolagi ma avea o se nofoaga e fetaui lelei mo tagata faalelagi; ma avea foi o se nofoaga e afio mai le Alii lo tatou Atua e afio ai, ma o le mea lava lea o le a ia faia i le Meleniuma.¹⁰

O le Ekalesia a Iesu Keriso o le Au Paia o Aso e Gata Ai … e faatatau e faapea o se vaega o lana misiona o le saunia lea o le ala mo le afio moni mai ma le mamalu o le Atalii o le Atua i le fogaeleele, e nofo tupu ai ma nonofo ai ma Ona tagata. O se vaega o lena galuega o le sauniuniga o le Au Paia ia talitonu o Isaraelu, lea sa faataapeapeina i atunuu uma o le lalolagi, o le a toe faapotopotoina faatasi ma toe faafoi i nuu na folafola i o latou tama o so latou tofi e faavavau. …

… O i latou ua maua le Talalelei i le lalolagi … o le a avea ma e tauaveina faamoemoega o le Atua.

O le a avea ma tagata faigaluega e tuu faatasi ma Ia i le aumaia o o latou lava faaolataga i le taimi nei ma le faavavau, ma faapea foi le faaolataga o Isaraelu uma ma Tagata o Nuu Ese o le a mauaina le talalelei. O i latou ia o le a avea ma e faataunuuina ia valoaga anamua. O Isaia, i le pupula mai i musumusuga a le Atua, sa vaai ia te i latou ma a latou galuega ina ua ia tagi leotele ma faapea mai: “O aso e gata ai, e oo ina faatumauina ai o le mauga, o i ai le fale o Ieova i tumutumu o atu mauga, e faamaualugaina foi e sili i mauga, ona gasolo ane ai lea o nuu uma i ai”(Isaia 2:2-3). Sa talanoa mai foi Ieremia e uiga ia i latou ina ua ia toe taua le folafolaga a le Atua ia Isaraelu o le a faataunuuina lava i aso amulī: “A ou te avea outou, e taitasi i aai ma le taitoalua i aiga, ma a’u aumaia outou i Siona. Ou te avatu foi ia te outou leoleo mamoe e tatau ma lou loto, latou te fafaga ia te outou i le poto ma le faautauta”(Ieremia 3:14-15).¹¹

Sa tuuina mai e le Alii se faatonuga sa Ia faapea mai ai e tatau ona silafia e Ona tagata: E faapea e tatau ona amata mai i lena taimi ona manumalo mai i o latou fili, ma e tusa lava poo le a le latou taumafai e faatuatua pea i le tausia o Ana tulafono sa Ia tuuina ia te i latou, sa tuuina mai faatonuga e faapea e tatau ona tatou manumalo pea seia oo ina faatoilaloina le fili. … e le o le faatoilaloina i le faaaogaina o misa ma le agaga o fefinauaiga poo taua, ae faatoilaloina i le malosiaga o le mea moni e faavavau, atoa ma le mamalu ma le mana o le Atua Silisiliese. … O mana faateleina o le amiotonu ma le sa’o o tagata o le feagaiga a le Atua, e tatau ona faalauteleina ma faateleina, seia oo i le taimi e ifo ai le lalolagi ma faailoa atu o Iesu o le Keriso, ma o loo i ai tagata o loo sauni i Lona toe afio mai i le malosi ma le mamalu tele i le lalolagi [tagai MFF 103:5-8].¹²

O le Ekalesia a Iesu Keriso o le Au Paia o Aso e Gata Ai e le o se Ekalesia e lagolagoina e ni tagata se vaega faapitoa. E le o se faalapotopotoga faa-Kerisiano ua fafai mai pe vavae mai i se isi Lotu Tele. O le Ekalesia a Iesu Keriso o le Au Paia o Aso e Gata Ai. Ua na o le pau lea o le Ekalesia o loo i ai nei i le lalolagi o loo tauaveina sa’o le suafa o Iesu Keriso ma Lana pule paia. Ua ou faia lenei tautinoga ma le agaga sao ma le faamaoni i luma o outou ma le lalolagi atoa, ma e tiga foi le mea moni ia i latou o e tetee ma i latou e leai se mafuaaga mo lena tetee. E matua moni lava lena mea ma o le a tumau lava lona moni seiloga e pulea e lē o loo i ai le aia tatau i atunuu uma o le lalolagi ma fanau taitoatasi a le Atua i le lalolagi ma o le a afio mai e nofotupu ma pule ma mauaina le faatoanofotane ma saunia ai mo le afio mai o le Faatoafaiava.¹³

Fautuaga mo Suesuega

Aisea e taua ai ia i tatou e faapea o Perofeta a le Atua “i aso nei ma taimi anamua” sa latou folafola mai le Afio Faalua mai o le Faaola?
Aisea ua aumai ai ia te i tatou faailoga o le Afio Faalua mai? O ai o le a latou iloaina ia faailoga o le Afio mai o le Faaola? E faapefea ona faatatau faamatalaga e uiga i ia faailoga i o tatou olaga?
O a ni auala e avea ai faafitauli faa-le-natura o le olaga “e fai ma mea lelei a le fanau a le Atua?” E faapefea ona tatou tali atu pe afai e tupu ia i tatou ia mea?
O a ni mea e tatau ona tatou faia e “sosola ese mai ai i faigata ia ma puapuaga o le a liligi atu i luga o i latou o e amioleaga”?
O a faamanuiaga e oo mai i le lalolagi pe afai e usiusitai tagata i mataupu faavae o le talalelei?
O a ni auala e puleaina ai e le Atua taunuuga o mea leaga “mo le lelei a’ia’i”?
E faapefea ona manumalo mulimuli le au paia mai i o latou fili uma?
Aisea ua avea ai le Afio Faalua Mai o le aso“Tele” ma le “Matautia”? (MFF 110:16)
O le a se mea e mafai e i tatou uma taitoatasi ona fai e fesoasoani ai e saunia le lalolagi mo le Afio Faalua mai o le Faaola?

the Second Coming — “O Le Autau Talavou e Lua Afe,” tusia e Arnold Friberg. Sa tusia e Helamana se tala e uiga i alii talavou sa ia taita’ia i le taua: “Ma ua sili i o latou manatu le saolotoga a o latou tama ai o latou lava ola; ioe, ua aoaoina i latou e o latou tina, pe afai latou te le masalosalo, e laveaina i latou e le Atua.” (Alema 56:47).