Saili ina ia Aoaoina i le Upumoni

E ao ona tatou saili ma le filifiliga mo le upumoni ma taumafai e aoao ma alualu i luma i aso uma.

Mai le Soifuaga o Iosefa F. Samita

Eui lava ina utiuti avanoa o Peresitene Iosefa F. Samita mo aoaoga, sa aafia naua o ia i le mataupu faavae o le talalelei e faapea “o le mamalu o le Atua o le malamalama lea” (MFF 93:36), ma sa ia faamalosi i tagata o le Au Paia ina ia maua le tele o aoaoga e tatau ai i upumoni faaleagaga ma le faaletino. Sa faaauau pea ona lagolagoina e Peresitene Samita ia polokalama faaleaoaoga a le Ekalesia, ua i ai aoga maualuga ma aoaoga faalelotu mo le tele o le Au Paia. Sa ia faataatia foi le faavae mo le faalauteleina o Mataupu tau i Aoaoga a le Ekalesia e pei ona i ai nei e ala i le faatuina o polokalama o le seminare. O le uluai seminare sa tatalaina i le 1912, e sosoo ma le Aoga Maualuga a Granite i le Aai o Sate Leki, Iuta.

I le avea ai ma Peresitene o le Ekalesia, sa ia faamalosia ia ausilali a le Ekalesia—o le Aualofa, Aoga Sa, Peraimeri, ma le Faalapotopotoga o le Mutuale mo le Faaalualuina i Luma (o aso nei o le polokalama a Alii ma Tamaitai Talavou)—i la latou misiona o le aoao o le talalelei. I le taimi o lana pulega, sa faatulaga tutusa ai mataupu aoaoina mo tamaiti ma tagata matutua i ausilali a le Ekalesia, ma o mekasini o loo lomia e le Ekalesia o loo i ai fuafuaga mo lesona faale vaiaso. Sa galue o ia mo le tele o tausaga o le faatonu o le Improvement Era, sa muamua atu i le mekasini o le Ensign; ma le Juvenile Instructor, sa lomia mo le Ausilali o le Aoga Sa, ma tusia ai le tele o tusitusiga e faamalamalama ai mataupu faavae a le Ekalesia. “Sa fiafia o ia e tusitusi,” sa manatua ai e se tasi o ana uo, “ma sa masani ona faaali sona manaoga na te manaomia se taimi tele na te faia ai ni tusitusiga mo le Era.”¹

E pei ona saunoa ai Peresitene Samita, “Mo tagata o le Au Paia, o le faaolataga lava ia, i lalo o le togiola a Keriso, o se tulaga faagasolo o aoaoga. … O le malamalama i le alualu i luma e faavavau.”²

Aoaoga a Iosefa F. Samita

O upumoni o loo i ai i le talalelei

E leai se upumoni i isi faalapotopotoga faalelotu, e le o i ai i le talalelei a Iesu Keriso e pei ona aoao mai e Iosefa Samita, le Perofeta, ma ina ua tuanai o ia, sa aoao ai e taitai ma toeaina o lenei Ekalesia; ae manaomia ai se taumafaiga mai ia i tatou, se uunaiga, se tinoū, e aoao ma olioli ai i nei mea. Afai tatou te faatamala i ai, o i tatou, ioe, ua le avea ma e maua ia faamanuiaga o loo mulimuli mai i galuega, ma e oo mai e ala i le malamalama a’ia’i i nei mataupu. O lea e i ai nisi o le a tuuina mai o latou manatu, e ui ina lē faatusaliaina ma o tatou manatu i se ala faigofie, i faatonuga ma le upumoni, ae ua faalogo pea i ai tagata o ē ua faatalitonuina o nei mea uma e fou, ma e lē o i ai i le talalelei a Iesu Keriso e pei ona aoaoina e tagata o le Au Paia. O se mea taufaasese lenei e taufaamata’u mai, ma e tatau ona puipuia mai e tagata uma e alolofa i le talalelei.³

Afai tou te alolofa i le upumoni, afai ua outou talia le talalelei i o outou loto ma alolofa i ai, o le a faaopoopoina lo outou poto; o le a faalauteleina lo outou malamalama i le upumoni, e tele atu soo se auala. O le upumoni o le mea lea, e sili atu i lo se isi lava mea i le lalolagi, ua tuusaoloto ai le tagata—saoloto mai le paie ma le faatamala, saoloto mai taunuuga taufaamatau o le faatamala, aua o se iuga e matatau ai, pe afai tatou te faatamala i o tatou tiute i luma o le Atua soifua. Afai tou te aoao i le upumoni ma savavali i le malamalama o le upumoni, o le a tuusaolotoina outou mai mea sese a tagata…, o le a outou o ese mai le masalosalo ma le faia o mea sese uma i soo se tulaga. O le a faamaonia outou e le Atua ma faamanuia ia te outou ma a outou fanau, ma faatamaoaigaina ma faatalaulau outou e faapei o se laau mafalā.⁴

O i latou ua i ai le avanoa e aoao ma maua ai le poto o le Atua, ma le ala o le ola… e sili atu lona manuia nai lo le ua maua le oa, poo le oloa tanumia o le lalolagi. … Ua tuusaoloto lona mafaufau e talia le malamalama moni ma le taua ua faaalia mo le faaolataga ma le ola o tagata mai le puna o le upumoni, ma o lona loto e tatau ona tuuina atu atoa i le mafuaaga sili ma le ofoofogia o le faaolataga o tagata.⁵

O fea tou te tuu e o i ai tagata ua lē talitonu i le upumoni? E faigofie le tali. O le a latou le maua le fiafia i mataupu faavae a tagata. E ao ona latou saili i ai i le upu tusitusia a le Atua; ia latou tatalo ia te Ia i o latou afeafe i le mea lilo, i le mea e le mafai e le taliga o le tagata ona lagona ai, ma talosagaina le malamalama i o latou potu; ia latou usiusitai i mataupu faavae a Iesu, ma o le a lē pine ona tuputupu ae lea o i latou i le malamalama o le upumoni. O lenei mataupu o le a aumaia le filemu i o latou agaga, olioli i o latou loto, ma se talitonuga maumaututu e le mafai e se suiga ona faaleagaina. O le a latou faamaonia “o lē silasila i le mea lilo na te avatu faaaliali ia i latou le taui.” [tagai Mataio 6:6.]⁶

E le faapei o teori po o manatu o tagata, o le upu a le Atua e moni ma sa’o pea lava pea.

O o tatou tagata talavou o ni tamaiti aoga filifiligā. Latou te aapa atu e saili le upumoni ma le poto i le maelega atoatoa, ma i le faia o nei mea e ao ona latou faaaoga mo se taimi lē tumau le tele o manatu o tagata. Peitai, pau lava le mea ia latou iloa ua na ona aogā nei mea e lagolago ai le faamoemoega mo suesuega, o le a leai se leaga faapitoa i ia mea. Ae sei vagana ua faamautuina nei teori po o manatu ma avea o se faavae moni ona oo mai ai lea o le faaletonu, ma oo ai lē o loo sailiili i se tulaga mata’utia o le taitaiina ese atu mai le ala sa’o e aunoa ma se faamoemoe. …

E u’umau e le Ekalesia le pule tonu o faaaliga mai le lagi lea e tatau ona avea ma alafua; ma, a’o fesuisuia’i mataupu o le “Saienisi” mai lea taimi i lea taimi i lona faaitiitia, ma talu ai o faaaliga paia o le upumoni ia, ma e ao ona tausia e oo i le faavavau, o lea o manatu i mea maualalo e ao ona usitaia manatu o mea maualuga, ma, le isi mea, o matagaluega ua faavaeina e le Ekalesia mo le aoaoina o mataupu faalelotu, faapea foi ma isi vaega o mea tau aoaoga, o o latou faiaoga e ao ona o gatasi a latou aoaoga ma ona mataupu faavae. …

O aoaoga a le Ekalesia o Aso e Gata Ai e le feteenai ma soo se upumoni, poo se suesuega faasaienisi mo le upumoni. “O mea ua faatinoina, ua matou talia ma le fiafia,” sa saunoa ai le Au Peresitene Sili i la latou faamanuiaga o le Kerisimasi i le Au Paia, “ae o filosofia faivavale, o le poto faaletagata, ma masalosaloga o tagata tatou te le talia, pe tatou te faaaogaina foi se mea e feteenai ma faaaliga paia poo le mafaufau lelei, ae ua na o mea uma lava e faia i le amiotonu, e o gatasi ma le ola mama lelei ma faatupulaia ai le faatuatua i le Atua, tatou te fiafia i ai, e le afaina poo fea lava e maua ai.” [“Words in Season from the First Presidency,” Deseret Evening News, 17 Tesema 1910, 3.]

O se mau lelei e faaaoga e tagata talavou, o e ua naunau e suesue i manatu faa-filosofia, o le sailiili lea i mea uma, ae ia faaeteete ina ia uumau na o mea moni. O le upumoni e tumau, ae o manatu o filosofia e fesuisuiai ma e faatoilaloina. O mea ua faaaogaina e tagata i ona po nei e fai ma lagolago o faamoemoega faasaienisi ina ia iloa ai mea ua le iloa mo le upumoni, atonu e faaleaogaina a taeao, pe a maea ona faataunuuina lona faamoemoega; ae o le faatuatua o le mataupu e faavavau e mafai ai e le tagata talitonu loto maualalo ona faatumauina le filemu e faavavau. Ua na o le pau lea o le ala e maua ai le Atua.⁷

O le saienisi ma le filosofia i le tele o tausaga ua fesuisuiai. E seasea i ai se senituri e tea ese atu e lei faatoai mai ai ni manatu fou o le saienisi ma le filosofia, ua sili atu nai lo tu ma aga tuai faatasi ai ma faatuatuaga tuai ma mataupu faavae tuai ua talitonuina e filosofia ma saienisi. O nei mea e mafai ona fesuisuiai pea lava pea, ae o le finagalo o le Atua e tumau pea lava pea lona moni, e tumau pea lava pea foi lona sa’o.⁸

O se aoaoga ua fai ma faamuamua le sailia o manaoga faale lalolagi ua le tafe saoloto ai le agaga lea e maua ai le saolotoga maualuga ma le olaga atoatoa. Ao tatou faasolo ina matutua ma lava le silafia, o o tatou olaga faaleagaga ua sili ona fua i ai lo tatou fiafia moni. E tele ina liliu atu o tatou manatu i totonu pe a tatou manatunatu i le oo mai o le iuga o lenei olaga ma le amataga o le olaga sili o le a oo mai.⁹

E ao ona tatou faaleleia ma alualu i luma i le fua o le atamai.

Ua tatou “aoaoina e le aunoa ae le au mafai ona oo ina iloa lelei le upu moni.” [tagai 2 Timoteo 3:7.] I le isi itu, ua tatou aoao pea ma ua latalata i le malamalama e tatau ai o le upumoni, o le tiute ma le matafaioi ua i luga o tagata o le Ekalesia ua valaauina i tofiga faapitoa. E le gata e tatau ai lenei mea mo uso ua valaauina e galulue i tofiga faapitoa, ae talafeagai foi… i tagata [uma] o le Ekalesia a Iesu Keriso o le Au Paia o Aso e Gata Ai.

O ai o i ai iina, i le tulaga o loo o tatou i ai, e le o tuputupu ae? O ai o tatou o i ai iina ua le aoao se mea i aso taitasi? O ai i tatou o i ai iina ua le maua se aoaoga a’o tatou faagasolo, ma ua le faia tiute o tagata o le Ekalesia ma tiute o tagatanuu… ? E foliga mai ia te au o se manatu faanoanoa mo le Ekalesia a Iesu Keriso o le Au Paia o Aso e Gata Ai ma ona tagata le manatu ane mo sina taimi ua tatou tutu i le mea e tasi, ua gata lo tatou tuputupu ae, gata le faaleleia ma le alualu i luma i le fua o le atamai, ma le faataunuuina i le faatuatua o tiute i tulaga uma lava ua tofia i ai i tatou o ni tagata ma uso o le Ekalesia a Keriso.¹⁰

O se tasi o mea leaga ua tulai mai. … o le valea, faaluaina i le le manatu mamafa i ai. Ou te faapea afai o le valea ua le manatu mamafa ai i nei mea moni ma lo latou tulaga, atonu o le a uunaia i latou e aoao ni mea sili atu nai lo le mea o i ai. O le faalavelave o alii ma tamaitai, o le moeiini lea o o latou mata poo le lē āno i mea moni o loo tutupu i o latou siosiomaga, ma e foliga mai e ese le faigata mo le toatele o tagata ona aoao ma faaaoga i o latou olaga ia upumoni faigofie e ao ona avea ma upu e masani ai ma mataupu mo tagata taitasi o le Au Paia, ma aiga uma o tagata o le Au Paia. E faapefea ona tatou taofia le faateleina o le tuputupu a’e o lenei tulaga leaga, lenei lē manatu mamafa, lenei valea? E foliga mai ia te au pau lava le auala e fai ai o le tulai mai ma manatu i ai, po o le tatou faaua’i atu o i tatou lava i mea taua ma talafeagai mo le fiafia ma le manuia o le fanau a tagata, aemaise mea ua manaomia mo le fiafia ma le manuia o i tatou lava taitoatasi.

E le o mea uma ia e alagatatau, o le aoao o le upumoni poo le taofia o le valea. E mulimuli mai lena tulaga le faaaogaina o le malamalama ma le poto ua tatou maua, mo galuega ma mea e manaomia mo le puipuia o i tatou ma le puipuia o a tatou fanau, o tatou tuaoi, o tatou aiga, mo lo tatou fiafia.¹¹

Sailiili le faamaoni o upu tusitusia; ia faalogo ma maua le upumoni ua folafolaina mai e perofeta soifua ma faiaoga; faatamaoaiga o outou mafaufau i le poto silisili ma mea moni. O i latou e lauga atu pe tautala atu i lona suafa, e manaomia e le Alii le lotomaualalo, ae lē o le valea. O le malamalama o le mamalu lea o le Atua; ma e le mafai ona faasaoina se tagata i le valea [tagai MFF 93:36; 131:6].¹²

O le auauna atu i le galuega a le Alii o se auala lea e agai atu ai i le mauaina o se aoaoga moni, ma o se aoaoga e faateleina lona aoga mo le ua aoaoina, ma tuuina atu ai le malosi i galuega uma na te fai.¹³

Faatumau i o outou mafaufau manatu lelei, faato’aina manatu autu faagaeetia, ia maualuga o outou faamoemoega ma manaoga. Ia i ai se tulaga maoti o le tutoatasi; se tulaga o le aogā lelei, loto fesoasoani ma le faalagolago o le tagata ia te ia lava, e ui ina leai se tagata soifua e faapea ua matua tutoatasi ma’oti mai o latou uso a tagata, ma e leai se tasi e faafitia lo tatou faalagolago i lo tatou Tama oi le Lagi. Saili ina ia aoaoina i lona tulaga maualuga; ia faia se auaunaga sili mo lou taimi, lou tino ma lou mafaufau, ma ia tuuina atu a outou taumafaiga uma i le alafua paia, ina ia leai se taumafaiga e le aoga, ma leai se galuega e faaiuina i le toilalo poo le leaga.

Saili i se faalapotopotoga sili; ia agalelei, faaaloalo, lotomalie, saili e aoao mea uma e lelei, ma ia malamalama i tiute o le olaga ina ia avea outou ma faamanuiaga ia i latou uma ua outou faatasi, ma ia faia le mea silisili o mea e te faia i le olaga.¹⁴

Ia tatou taumafaiga uma faaleaoaoga ma le faalelalolagi, e ao ona tatou uumau i le ai u’amea.

E taua tele i tagata o le Au Paia ona tuu pea i o latou luma lena alafua iloga o le olaga faalelotu ma le mama ua faatulagaina mai i faaaliga i ona po nei mo le taitaiina o i latou. E tatau ia i latou, i se isi faaupuga, ona uumau i mea ua uma ona faamatalaina matagofie mai o le “ai u’amea.”

I nei vaitaimi ua faatetele mai le malosi o le puleaina o tagata e faalapotopotoga faalauaitele, ma pisinisi. … ae le tatau ai lava ona faataatia ese tiute ma faamoemoega o tagata o le Au Paia ona o nisi tulaga o le olaga.

E ao ona tatou matatau i le taliaina pea lava pea e tagata e fai ma o latou taiala ia amioga masani a i latou o loo siosiomia ai i latou. Afai ua oo mai faiga faaletonu ma ua lagona foi le saisaitia i nei faalapotopotoga o pisinisi, tagata ma vaega faaupu fai, o le a leai lava se mafuaaga e tatau ai fua ona o ese mai tagata ua ta’ua o tagata o le Au Paia o Aso e Gata Ai mai le tulaga saogalemu ae faatafetafea e aunoa ma se faamoemoe faatasi ma i latou e tetee, liliu ese, poo le ola le mama. …

E le tatau ona galo ia i tatou o i tatou, o tagata o le Au Paia faapitoa, poo fea lava e lafo i ai le faatulagaga o lo tatou soifuaga, ma e le tatau ona aveesea le malamalama mai ia te i tatou o lena taitaiga mama ma le faaleagaga ua tuuina mai e le Talalelei ia i tatou. O nisi o o tatou alii talavou ua faaleagaina pe faatama’iaina o latou olaga e mafai ona tepa atu i tua i le mafuaaga o lo latou malaia ma le pa’ū i le uluai sitepu sa latou faia ona o le naunau ina ia avea faapei o i latou sa mafuta i ai i mea sa latou tulimata’ia i le olaga i la le tino.

E i ai taimi e maua ai le fiafia ma e oo atu ai i le tulaga ua sese ese ai alii ma tamaitai ma ua galo ai mea uma sei vagana mea ua latou maua ai le fiafia mo se taimi puupuu poo mea faalelalolagi. O nisi, foi, ua leai ni faatulagaga maualuga o le mama ae ua mulimuli i faatulagaga ua taatele i le lalolagi. A oo mai nei galu o fiafiaga ona latou iloa ai lea e le gata ua latou tafefea e aunoa ma se faamoemoe ae o nisi o taimi ua noanoatia ai i latou i le agasala ma pauu ese. …

E matua taua tele, i taimi uma, aemaise lava ua le gafatia e a tatou faalapotopotoga mo i tatou le lagolago mama faaleagaga tatou te manaomia mo lo tatou alualu i luma, ua alagatatau ai ona tatou o atu i le maota o le Alii e tapuai ma faatasi ai ma le Au Paia ina ia fesoasoani ai lo latou aafiaga mama faaleagaga e faatonu ai o tatou lagona sese ma toe faatuina i tatou i lena olaga o tiute ma faamoemoega o o tatou lagona ma le faatuatuaga moni ua aumaia ia i tatou.

… O lea, i le taulotoaiga o o tatou valaauga faalelalolagi ma fegalegaleaiga, e le tatau ai ia te i tatou, ona galo lena tiute maualuga o loo tatou nofo aitalafu ai ia te i tatou lava ma lo tatou Atua.¹⁵

Fautuaga mo Suesuega

O a ni aafiaga ua e aoaoina ai o mea moni uma “ua i ai i le talalelei a Iesu Keriso”?
O le a se mea tatou te fai ina ia aoao ai mataupu o le upumoni? O a tulaga matautia o le faatamala i lenei tiute? O a taui ua folafola mai mo i latou ua aoaoina le upumoni ma savavali ai i lona malamalama?
O le a le manatu o le Ekalesia e faatatau i le suesuega faasaeanisi mo le upumoni? E faapefea ona eseese ia teori po o manatu ma filosofia o tagata mai le finagalo a le Atua?
O a ia puapuaga pe afai ua faataunuuina se aoaoga e tau ina ia faamalieina ai manaoga faale lalolagi”?
O a ni auala ua taofia ai e tagata “ona faaleleia ma alualu i luma i le fua o le atamai”? E faapefea ona tatou mautinoa ua faaauau pea ona tatou aoao se mea i aso taitasi? (Tagai foi MFF 130:18–19.)
Aisea o le valea i le upumoni “o se tasi o fili silisili”? E faapefea ona tatou taofia lenei fili”?
E faapefea ona outou “maua se auaunaga sili mai o outou taimi, tino ma le mafaufau”? O a amioga e fesoasoani ia i tatou e “faia le mea silisili ma le atoatoa i o tatou olaga”?
O a ni tulaga matautia o le taliaina e avea ma o tatou taiala “amio masani a i latou ua siosiomia i tatou ia tatou taumafaiga i aoaoga ma le olaga i la le tino?
I le “taulotoaiga o o tatou valaauga ma fegalegaleaiga faale lalolagi” o a mea tatou te fai “ina ia le galo ai lena tiute maualuga o mea o loo tatou aitalafu ai ia te i tatou lava ma lo tatou Atua”?

first seminary building — O lenei fale sa faia ai le uluai seminare a le Ekalesia, na tatala i le 1912 e sosoo ma le Aoga Maualuga a Granite i le Aai o Sate Leki, Iuta.

Latter-day Saints’ University — Tamaiti aoga i le Iunivesete a le Au Paia i le Aai o Sate Leki, Iuta, 1903. Peresitene Iosefa F. Samita o loo apoapoai atu i le Au Paia e “faatamaoaigaina o outou mafaufau i le poto silisili ma mea moni… E leai se tagata e faasaoina i le valea” *(Mataupu o le Talalelei*, 206).