O Tama i Aiga

E ao i tama uma ona tulai i le mamalu o lona tofi paia o le avea ai lea ma ulu i lona aiga

Mai le Soifuaga o Iosefa F. Samita

I lona olaga atoa, sa manatuaina pea e Iosefa F. Samita le tagatavaleina o lona tama, o Ailama Samita. I le aso 27 o Iuni 1918, sa pulefaamalumalu ai Peresitene Samita i le Fanuatanu o le Aai o Sate Leki, sa faatuina ai se maa faamanatu e faamamalu ai lona tama. I lena sauniga, sa ia faapea mai ai: “Ua faamanuiaina au i lenei aso i ni fanau e tolusefulu lima o loo ola, o i latou uma, e tusa ai ma lo’u iloa, o ni tagata lelei o le Ekalesia a Iesu Keriso o le Au Paia o Aso e Gata Ai, ma ou te talitonu o loo i ai o latou loto i le galuega a le Alii. Ou te mitamita i la’u fanau. Ua i ai nei ia te au le silia ma le valu sefuluono fanau a au fanau. … Ua ou mauoa; ua foai mai e le Alii ia te au le oa sili o le fanau ma fanau a fanau. … Ou te manao ina ia outou vaai mai iinei i le lafu laitiiti o fanau a au fanau—o loo iinei, o i latou taitoatasi uma. Ou te alofa ia i latou. Ou te iloa i latou uma. Ou te le’i feiloai ia i latou ae ou te sogi atu ia i latou, e pei ona ou faia i au lava fanau.”¹

Mulimuli ane, o lona atalii o Iosefa F. Samita, o lē o le a galue o se Peresitene o le Ekalesia mai le 1970 seia oo i le 1972, sa ia iloa o le alofa o lona tama mo lona aiga “sa leai sona tuaoi ma e tele na’ua ma mama atoatoa. E le’i iloa e le lalolagi—e le mafai ona iloa—le loloto o lona alofa mo i latou. Na faatauemu e amioleaga i e ua tuulafoaiina ma faatiga ia te ia; ae o le tulaga moni o le olaga o lona aiga ma le alofa matagofie mo lona aiga sa lē oo i ai lo latou malamalama. Na ia talosia ina ia faamaoni pea lava pea lana fanau—faamaoni i le Atua, faamaoni i o latou uso a tagata; faamaoni le tasi i le isi ma faamaoni ia te ia!… Ia tuu i latou, ia faamaoni ia te ia ma faamaoni i le faamoemoega ua avea ai o ia ma sui ma le faamaoni i le taimi o lona soifuaga i le tino, ma o le mea na sili ona alofa i ai i lona olaga atoa.”²

Aoaoga a Iosefa F. Samita

E leai se mea e suitulaga mo le aiga

E leai se mea e suitulaga mo le aiga. O lona faavae ua loa e faapei foi o le lalolagi, ma o lana misiona na faauuina e le Atua mai uluai taimi. … O le aiga ua sili atu i le na o se fale e nonofo ai, o le faalapotopotoga o loo tulai mai mo le faamausaliina ma le alofa i tagata taitoatasi atoa ai foi ma malo.

E leai se fiafia moni e tuu eseese mai i le aiga, ma o taumafaiga uma ua faia e faapaia ma faasao ai lona aafiaga ua maualuga mo i latou ua galulue ma ositaulaga mo lona faatuina. O alii ma tamaitai ua masani ona saili e suia le olaga i le aiga i se isi olaga; ua latou talitonu o le aiga o lona uiga o le faamalosi; o le saolotoga maualuga o le avanoa atoa e fai ai le mea e loto i ai. E leai se fiafia e aunoa ma le galuega auauna atu, ma e leai se galuega auauna atu e sili atu nai lo lea e faaliliu ai le aiga i se faalapotopotoga paia, e faaleleia ma puipuia ai le soifuaga o le aiga.

O i latou e fe’alofa’i i tiute faaleaiga ua le o i ai le elemene taua o le ola faale tagata soifua. Atonu latou te tuuina atu i latou lava i fiafiaga faale soifuaga, ae o lo latou fiafia ua papau ma e iu i le faanoanoa mulimuli ane i le olaga. O galuega a tagata i nisi o taimi e manaomia ai i latou e tuua o latou aiga; ae o le manatu i le foi mai i le aiga o se musumusuga i taimi uma mo tulaga sologa lelei ma le faamaoni.³

I se aiga ua atoatoa, e le galala le agaga i le fiaai, e faapena foi i le tuputupu ae ma le faalauteleina o le lagona lelei ua faatamaia ona o le manatu faapito ma le tau faaosooso i mea e fiafia i ai. O le faamoemoega autu e le o le faaputuputu o oa faalelalolagi, aua e toso mamao ese atu ai mai le upumoni, o le lelei, ma le ola faaleagaga; peitai e sili atu ona fausia oa o le agaga, o le manatu i le mamalu o mea faataunuuina, o le sosolo atu o le alofa ma le loto fesoasoani.

E lē o ata vali taugata, ie su’i, o mea e leai ni aoga, o mea teuteu eseese, meaafale taugata, o fanua, lafumanu, o fale ma fanua e maua ai se aiga ua atoatoa, e lē o le fiafiaga faaletagata ma le faigofie o loo saili e le tele o tagata; ae peitai o le matagofie o le agaga, ua fausia, alofa, faatuatua, agaga moni; o lima e fesoasoani ma loto e alolofa; o le alofa e le saili e ia ana lava mea, o manatu ma gaioiga ua pa’i mai i o tatou olaga ma faaleleia–o nei mea uma ua i ai i le faavae o se aiga ua avea ma aiga ua atoatoa.⁴

Ua i ai i le tama le pulefamalumalu i le aiga.

E leai se pule e sili ae i mea e faatatau i le faalapotopotoga o le aiga, aemaise lava pe afai o lena faalapotopotoga ua pulefaamalumalu ai se tasi ua umia le Perisitua maualuga, nai lo le tama. O le pule e faamamaluina aua ua loa ona faia, ma e faamamaluina i tagata o le Atua i tisipenisione uma ma e masani ona faamamafaina i aoaoga a perofeta ua musuia e le Atua. O le faatulagaga faapeteriaka o se amataga paia ma o le a faaauau pea i le olaga nei ma le faavavau. E i ai se mafuaaga faapitoa e tatau ai i alii, tamaitai ma fanau ona malamalama i lenei faatulagaga ma lenei pule i totonu o le aiga o tagata o le Atua, ma saili e faia le mea e tusa ai ma le faamoemoega o le Atua, o se tulaga manaomia ma se sauniuniga mo le faaeaga maualuga o lana fanau. …

O lenei pule o loo o faatasi ma se valaauga taua lava, faatasi ai ma ona aia ma faamanuiaga, ma o alii e le mafai na o i latou lava ona avea ma faataitaiga sili i o latou olaga, pe saunia foi i latou lava ma le faaeteete e ola e tusa ai ma lenei tulafono o le amio i le faalapotopotoga o le aiga ua faapaiaina e le Atua. I luga o lenei pule o loo faamauina ai ni folafolaga ma faamanuiaga faapitoa, ma o i latou e tausia ma faaaloalo i lenei pule ua i ai ni manatu faapitoa i mea paia e le mafai ona latou maua sei vagana ua latou faaaloalo ma tausia tulafono ua saunia e le Atua mo le faagaoioia ma le puleaina o le aiga.⁵

Ou te manao… e faailoa atu i le au mau tofi o le Ekalesia le taua o le saili atu mo le fautuaga a tamā i mea uma e faatatau i valaauga o o latou atalii i le Perisitua, ma galuega a le Ekalesia, ina ia le faalavelaveina e le Ekalesia le ava ma le faaaloalo e ao i le fanau ona faaali atu i matua, pe soona fai faamalosi foi e ona au ofisa. O lenei auala o le a faatumauina ai le lotogatasi ma le lelei; faapea ai ma le faapaiaina o le aiga ma le olaga faaleaiga, lea o loo faavae ai le puleaina ma le faaauauina o le Ekalesia, ma o le a faaopoopo atu ai i valaauga o le Perisitua paia, e mautinoa ai le nonofo faatasi, le malosi ma le mana i mea uma na te fai.⁶

Tamā, fai lo outou tiute atoa mo o outou aiga.

Afai e i ai i [tama] le Agaga o le Alii i le faataunuuina o o latou tiute faaletino, o le a latou le faagaloina tina o a latou fanau, poo a latou fanau. O le a latou le faatamala e aoao i latou i mataupu o le olaga ma faatuina i o latou luma se faataitaiga lelei. Aua nei faia e outou lava ni mea o le a e fai atu ai i lou atalii, “Aua le faia.” Ia e ola ina ia e fai atu, “Lo’u atalii e, fai e faapei ona ou faia, mulimuli mai ia te au, faataitai mai i a’u faataitaiga.” O le ala lena e ao ona ola ai tamā uma, i tatou uma taitoatasi; ma o se mea e maasiasi ai, o se vaivaiga, o se mea mataga mo se tasi o le Ekalesia le faia o se mea na te iloa e le sa’o ma ua ia manatu e lē tatau i lana fanau ona mulimuli ai. O se mea mataga mo se alii le tuu o se papupuni i ona lava luga, o se faaletonu e taofia ai o ia mai le faia atoatoa o ona tiute mo i latou ua alolofa ia te ia ma e tatau ona ia alofa i ai e sili ae nai lona ia lava ola, ona ua ia faamatuu atu i tuinanau sese ma lagona malolosi e le tonu, ma le faia o mea e lē tatau ona ia faia, ma o le a ia taumafai e puipui lana fanau mai lo latou faia. Fai o outou tiute, ou uso e, ma o le a faia e le Alii Lona tiute mo outou.⁷

Uso e, ua laitiiti tele le faamaoni faalelotu, alofa ma le matau i le Atua, i le aiga; ua tele naua le faale-lalolagi, manatu faapito, o le matau’a ma le leai o se faaaloalo i totonu o le aiga, semanu ua lē tutupu lava nei mea e tele i fafo atu. O lea, o le aiga o loo manaomia e suia. … Ia avea le alofa, ma le filemu, ma le Agaga o le Alii, agalelei, alofa moni, ositaulaga mo isi, ia tumau i totonu o o outou aiga. Ia faatea ese ia upu mamafa, loto leaga, ita, tautala taufaaleaga, gagana masoa ma manatu le manuia, tau faifai, ma ia pulea o outou loto e le Agaga o le Atua. Aoao a outou fanau i nei mea, i le agaga ma le mana, e lagolagoina ma faamalosia e ala i gaioiga faataunuuina. Ia latou iloa tou te naunau malosi, ma ola ai i mea ua outou aoaoina. Aua nei tuuina atu a outou fanau e aoaoina e ni tagata faapitoa i nei mea, ae ia aoao i latou i au lava faatulagaga ma faataitaiga, i lo outou lava aiga. Ia avea oe lava ma tagata faapitoa i le upumoni. . Ia avea a tatou fonotaga ma sauniga, o a’oga ma faalapotopotoga, ma fesoasoani ia tatou aoaoga i le aiga, ae aua ne’i avea faapea ona pau na o o tatou faiaoga taitai.⁸

Ou te tatalo mo outou ma ou te tatalo foi i le Atua e fesoasoani atu ia te outou, tama ma tina, e aoao a outou fanau i upu ma mataupu o le talalelei a Iesu Keriso, ina ia latou ola a’e e aunoa ma le agasala o le faaeaga. Ou te tatalo ia fesoasoani le Atua ia te outou e tausia a outou fanau i le alofa i le upumoni, i le alofa o le amio mama, ia saoloto mai mea leaga faatama’i o le lalolagi, ia saoloto mai le faatausuai, mai le onā, mai le faaaogaina o tapaa, mai meainu malolosi ma fualaau faasaina, ma soo se ituaiga o mea leaga; ia outou aoao i latou ina ia mama atoatoa i o latou olaga–i a latou amioga masani, ina ia avea i latou ma malumalu paia e mafai ona afio ai le Agaga o le Atua soifua ma maua ai sona apitaga lelei. O lo outou tiute le faia, ma o lo’u tiute foi; o le tiute o tagata soifua uma le aoao atu o nei mea i lona aiga, ma aoao i latou e tusa ai ma o latou ala.⁹

Ia soifua pea tama o Isaraelu e pei ona tatau ona latou ola ai; ia tausia a latou ava e faapei ona tatau ai; ia fai o latou aiga ma nofoaga o le fiafia i le mea e tatau ai; ia faamama le avega i luga o a latou soa i le malosi e mafai ai; ia faia ni faataitaiga lelei i luma o a latou fanau; aoao i latou ina ia latou tatalo faatasi, i le taeao ma le po, ma soo se taimi lava e nonofo ai i lalo e aai, e faafetaia le alofa tunoa o le Atua i le foaiina mai ia i latou o meaai latou te aai ai ma lavalava o loo latou oofu ai, ma faafetaia le aao o le Atua i mea uma.¹⁰

O faatasiga faaleaiga ua faamoemoeina mo le faavavau.

O le Atua o le ao o tagata soifua; tatou te vaai atu ia te ia o se Tama o tagata uma. E le mafai ona tatou faamalieina o ia sili atu nai lo le faaaloalogia ma le faamamaluina o o tatou tama ma tina, ia ua mafai ai ona tatou i ai i lenei lalolagi.¹¹

O le faalapotopotoga o le aiga o loo taoto i le faavae o pulega moni uma, ma e le mafai ona soona tuu le faamamafa i le taua o le pulea o le aiga i lona atoatoa e mafai ai, poo le tulaga faapea o mea uma e tatau ona tausisia le faaaloalo mo le puleaina o le aiga.¹²

O le mafutaga a o tatou [aiga] e le faamoemoe mo le na o le olaga nei, mo se vaitaimi, e pei ona tatou faaeseina mai le faavavau. Ua tatou ola mo le taimi nei ma le faavavau. Ua tatou faia ni faatasiga ma fesootaiga mo le taimi nei ma le faavavau. O lo tatou alofa ma o tatou naunautaiga ua talafeagai ma saunia ai e tutumau e le gata i le ola faaletino, ae mo le faavavau. O ai nisi o i ai e ese mai i tagata o le Au Paia ua mafaufau loloto i le manatu o tua atu o le tuugamau o le a tatou faaauau ai pea le faalapotopotoga o le aiga? le tama, le tina, le fanau ua iloa e le tasi le isi i le sootaga o le tasi i le isi ma ua latou tutulai ai foi o le tasi mo le isi? O lenei faalapotopotoga faaleaiga ua avea o se iunite i le faalapotopotoga tele ma le atoatoa o le galuega a le Atua, ua fuafuaina uma e faaauau i le taimi nei ma le faavavau.¹³

Ua ia te au se folafolaga sili o le faatasia o i latou ou te alofa i ai i le faavavau atoa. O le usiusitai i lenei galuega, i le talalelei a Iesu Keriso, o le a ou faapotopoto mai ai lo’u aiga, o la’u fanau, o fanau a a’u fanau, seia faateleina e faapei o fanau a Aperaamo, pe ua le mafaitaulia e faapei o oneone o le matafaga. Aua o la’u aia tatau ma o’u faamanuiaga nei, ma o le aia tatau ma faamanuiaga o tagata uma o le Ekalesia a Iesu Keriso o le Au Paia o Aso e Gata Ai o e umia le Perisitua ma o le a faalauteleina i le silafaga a le Atua.¹⁴

Ae ui o lea, o le faia i le atoatoa o nei mea ua faapaiaina e le Atua e avea ma tulaga lautele mo tagata soifua uma, o le mea silisili moni lea. Ina ia avea ai ma se tama atoatoa poo se tina atoatoa e sili atu nai lo le alii sili ua atoatoa poo le faipule ua atoatoa.¹⁵

Fautuaga mo Suesuega

O le a le “faamoemoega autu” o tamā i le aiga? E faapefea e le tausia o le aiga ona faalautele atu mai le faaletino i le faaleagaga? E mafai faapefea ona fausia e le tama se lagona o le “mauoa i le agaga” i totonu o lona aiga?
O a elemene o loo “i ai i le faavae o se aiga atoatoa”? Aisea ua avea ai ma matafaioi a le tama le vaai ua faia nei mea?
E faapefea e ava ma fanau ona lagolagoina le ulu o lo latou aiga? O a mea e tatau ona fai e tane ma tama ina ia agavaa ai mo lenei lagolagoina mai tagata o o latou aiga?
E faapefea ona saunia e le Alii ia faamanuiaga o le perisitua mo tina nofofua?
E faapefea ona faamalolosia tama ma faamanuiaina aiga pe a logoina i latou ma faaaloalogia e taitai perisitua?
O a mea e manaomia ona suia i o tatou aiga i aso nei? O a mea e ao ona faia e tama e tetee atu ai i le faalelalolagi ma tausia le agaga o le talitonuga i le aiga?
O a faamanuiaga tatou te maua ona ua tatou iloa o a tatou faatasiga faaleaiga e faaauau i le faavavau? O a mea e fai e tama ina ia mautinoa ai le faavavau o o latou lava aiga?

Hyrum Smith — O Ailama Samita, le tuaa o Peresitene Iosefa F. Samita, na ia tuua se faatosinaga malosi i lona atalii, e ui lava o le atalii ua na o le lima tausaga lona matua i le taimi na tagatavaleina ai Ailama.