Aualofa: Faatuina i le Paia mo le Manuia o le Au Paia.

Sa faatuina le Aualofa e le pule paia ina ia avatu ai le filemu ia i latou ua manaomia ma ia atinaeina ai le manuia faaleagaga o tamaitai o Siona.

Mai le Soifuaga o Iosefa F. Samita

Na saunoa Peresitene Iosefa F. Samita o le Aualofa ua “faavaeina i le paia, puleaina i le paia, faatuina i le paia, faauuina i le paia o le Atua.”¹ Sa ia auai i le tele o faamanuiaga ma sauniga faapitoa a le Aualofa, na ia saunoa ai ma le alofa ma le fiafia e uiga i galuega a tamaitai. I le aso 17 o Mati i le 1892, sa faamanatuina ai e le Aualofa lona 50 tausaga talu lona faavaeina i sauniga o le Iupeli Siliva. I le Tapeneko i Sate Leki ma i totonu o paranesi, uarota, ma siteki i le Ekalesia aoao, sa faaalia ai le agaga faaaloalo faapitoa o le au ofisa o le Aualofa ma taitai o le perisitua i le faavaeina o le Aualofa ma le tele o tausaga o le auaunaga ua tuuina mai e le itupa o tamaitai o le Ekalesia.

O nei faapotopotoga i le lalolagi atoa sa faatonuina ina ia auai faatasi i se tatalo e ofoina atu faatasi. O Peresitene Iosefa F. Samita, sa fesoasoani ia Peresitene Uilifoti Uitilafi i le taimi lea, sa ia tuuina atu se tatalo faapitoa o le viiga ma le faafetai i totonu o le Tapeneko: “Ua e foai mai ia i matou le vaega o le malamalama ua mafai ai e o matou loto ona maua le fiafia ma fesoasoani mai ai matou te auauna atu i lau afio. … Ua e foai mai le loto naunautai e faatuina ai lau Ekalesia i le lalolagi, ma ia saili ai le amiotonu,” sa ia saunoa ai. “Faamanuia i … tina o le Aualofa i le lalolagi atoa, i Siona ma atunuu mamao, i atumotu o le vasa, ma poo fea lava o loo latou faapotopoto ai. … Faamolemole ia mafuta atu lou agaga ma i latou ina ia faamanuia ia i latou, ia mafai e o latou loto ona vivii atu i lau afio.”²

Aoaoga a Iosefa F. Samita

Ua faatuina le Aualofa e le Atua.

O se faalapotopotoga maoae, ma le tele ma le malosi le faalapotopotoga a le Aualofa o le Ekalesia a Iesu Keriso o le Au Paia o Aso e Gata Ai, ma galuega o loo latou tauaveina!³

E leai se isi faalapotopotoga o tina o i ai nei i le lalolagi ua tu i luga o le tulaga maualuga o le pule paia e pei o lenei faalapotopotoga i le lalolagi. O isi faalapotopotoga e faia e alii, pe faia e tamaitai. … O lenei faalapotopotoga ua faia i le paia, pulea i le paia, faatuina i le paia, faauuina i le paia o le Atua e auauna atu ai mo le faaolataga o agaga o tamaitai ma alii. O lea e leai se isi faalapotopotoga e faatusatusa i ai,e mafai ona suitulaga ai i le tulaga o tulai mai ai, sei vagana ua faatuina e le Alii se tasi faalapotopotoga.. Afai na te faia, o le a Ia faataunuuina i le ala o le perisitua, le perisitua lava e tasi, ma le ala e tasi o le perisitua na faatuina ai lenei faalapotopotoga, ae lē o se isi lava auala.⁴

Atonu e mafai e tina ona faatulaga ia kalapu, ma faatulaga sosaiete, ma latou pasia ni tulafono, tusia aiaiga mo maliega, ma fausiaina tulafono mo lo latou puleaina, ma isi mea faapena. Ia aua nei galo, e leai se tasi o na mea e faatusalia i le faatulagaga o se Aualofa a se uarota a le Ekalesia a Iesu Keriso o le Au Paia o Aso e Gata Ai. … E le tatau ona taitaiina outou e tamaitai o le lalolagi; o outou e taitai i le lalolagi aemaise lava le taitaiina o tamaitai o le lalolagi, i mea uma e tauleleia, o mea uma lava e foliga i le Atua, o mea uma lava e siitia ae ai ma mama mo le fanau a tagata. … Ia faamuamua le [Aualofa], ia faasilisili, ia faamaualugaina, ia sili ona lelei ma loloto nai lo se isi lava faalapotopotoga o loo i ai i le lalolagi. Ua valaauina outou i le siufofoga o le Perofeta a le Atua e faia lea, ina ia silisili, ina ia tautaua ma maoae, ia sili ona mama, ma faamaoni i le mea moni, ma o lo outou tiute le fiafia i le avanoa ma ia maua mea uma ua i ai i o outou valaauga ma ia outou maua mai le Alii ma Ana meaalofa.⁵

E Ao i le Aualofa ona tausi i e matitiva, ma faamafanafana ma faamama avega.

Ou te talitonu o loo faia e la tatou Aualofa se galuega matagofie mo tagata. … O i latou o se faalapotopotoga taua mo le lelei o Isaraelu, mo le manuia o tuafafine, ma tina, ma afafine i Siona.⁶

O sina upu e tasi pe lua e faatatau i le Aualofa. O le faalapotopotoga lenei na faatuina e le Perofeta o Iosefa Samita. O lea la, o le ausilali sili ona leva i faalapotopotoga a le Ekalesia, ma e faamuamua lona taua. E le gata ina gafa ma mea e manaomia mo e matitiva, o e mamai ma lē tagolima, ae o se vaega o lona tiute— o se vaega tele foi,—o le vaavaaia o le manuia faaleagaga ma le faaolataga o tina ma afafine o Siona; ia vaai ua leai se tasi e faagaloina, ae o i latou uma ua puipuia mai faaletonu, mala, o le malosi o le pouliuli, ma le tiapolo o loo luitauina ai i latou i le lalolagi. O le tiute o le Aualofa le vaaia o le manuia faaleagaga o i latou lava faatasi ai ma tamaitai uma o le Ekalesia.⁷

O fea o le lalolagi tatou te saili i ai mo le lelei, mo le agaga o le upumoni, mo le faamaoni, mo le alofa paia, mo le onosai ma le faamagalo ma le tumau ma le alofa mama ma isi mea lelei uma, pe afai tatou te le sailia i totonu o le faalapotopotoga ua atinaeina ai tina ma afafine o Siona. O le a le mana ua ia te outou, ou tuafafine pele, i le faataunuuina o o outou tiute, i le faia o o outou valaauga e faapei o agelu o le alofa i e puapuaga ma e ua sauaina ma e ua pauu, i e ua sese ma e ua vaivai ma e ua manaomia le fesoasoani, o le mana ua ia te outou ma ua i ai i tagata o le Atua ma tagata uma lava e mafai ona outou mafuta!

Poo fea lava e i ai le tulaga manaomia o se faamafanafanaga, ua faavaeina lenei faalapotopotoga, po ua i ai i o outou aao ma ua saunia e tuuina atu le faamafanafanaga e manaomia. Poo fea lava o i ai le ma’i, o le faalapotopotoga lenei, i ona vaega, o ona faatulagaga eseese, ua i ai na te tuuina atu le mea ua manaomia. Poo fea lava ua utiuti ai le malamalama i mataupu faavae o le olaga, o mataupu faavae o le ola amiotonu, o mataupu faavae o le ola sa’o, o le faalapotopotoga lenei ua i ai i o outou aao e maua atu ai le poto, e faamalamalama ma aoao ai e ala i faataitaiga faapea foi i le upu, i latou ua manaomia le fesoasoani i nei mataupu ma le tausiga.

Poo fea lava o i ai le valea poo le vaivai o le malamalama e tusa ai ma le aiga, tiute o le aiga, e faatatau i matafaioi e tatau ona i ai ma o loo i ai i le va o le tane ma le ava ma le va o matua ma le fanau, o lena o loo i ai i lenei faalapotopotoga po ua i o outou aao foi, ma e ala i le faapaiaga ma musumusuga o loo i ai i le faalapotopotoga, ua saunia i latou e faasafua atu ia aoaoga e faatatau i na tiute taua. O le mea o i ai se tina talavou, ua leai sona poto masani e faafailele ma tausi ai lana tama, poo le faatulagaina o lona aiga ina ia fiafia ma matagofie ma manaia mo ia lava ma lana tane, o loo i ai lenei faalapotopotoga, i nisi vaega o le faalapotopotoga, e faasafua atu aoaoga i lena tina talavou, ma fesoasoani ia te ia i le faia o ona tiute ma faia faalelei. Poo fea lava o i ai le vaivai o le poto masani i le taitaiina ma le saunia o mea taumafa lelei mo le fanau, ma poo fea le mea e talafeagai e tuuina atu ai aoaoga faaleagaga ma mea taumafa faaleagaga i le fanau, o loo i ai i le faalapotopotoga tele o Tamaitai o le Aualofa o le Ekalesia a Iesu Keriso o le Au Paia o Aso e Gata Ai ma le faalapotopotoga a tina ma afafine o Siona, se tasi ua agavaa e tuuina atu lena aoaoga.⁸

Ia vaavaai lelei ia ē lē tagolima ia sili atu nai lo se isi lava taimi. … Matou te popole o loo i ai i latou e puapuagatia ae le talanoa i se isi o loo manaomia se fesoasoani. O lo outou tiute e faamuamua lea mo i latou o loo i o outou alaalafaga. Ia manatua tagata matutua ma vaavaai lelei e ua leai ni matua ma e ua oti a latou tane.⁹

O se faamanuiaga ia te au e lei mamao atu le asiasi i se tasi o o matou nofoaga i le Siteki o Siona i nuu i tua o loo tele ai tagata mamai i le taimi lea, ma e ui ina sa matou malaga i le tele o aso ma taunuu i le nofoaga i le leva o le afiafi, sa manaomia lo matou malaga taamilo ma le Peresitene e asiasi i nisi o loo mamai. Sa matou maua se tuafafine mativa o loo taoto i luga o le moega o loo mai tigaina lava. O lana tane mativa o loo nofo i tafatafa o lona moega ua matua faanoanoa lava i le matautia o le mai o lona toalua o le tina o ni nai tamaiti laiti o loo faapotopoto ai. O le aiga ua foliga mai ua i ai i se tulaga matua faigata lava.

E le’i leva ae savali mai i totonu se tina lelei, o loo taitai mai e ia se ato o loo i ai mea taumafa e aoga i le tino ma ni nai mea taumafa e fiafia tele i ai mo le tausiga o le aiga o loo i ai le ma’i. Ina ua fesiligia sa matou iloa ai ua maea ona tofia o ia e le Aualofa a le uarota e fai ma ana matafaioi le vaavaai ma tausia le tina o loo ma’i i le po. Sa i ai o ia iina ua saunia e tausi ma vaai le fanau iti, ia mautinoa ua faataeele ma fafaga lelei ma faamomoe; ua teu le fale ma fai mea uma ina ia matagofie mo le tina mafatia ma lona aiga. Sa matou iloa ai foi o se tasi o tuafafine lelei na saunia e sui atu i le aso na sosoo ai; ma faapena ai lava, mai lea aso i lea aso, o lenei aiga matitiva ma le pagatia na latou maua se tausiga alofa sili ma le vaaia lelei mai tuafafine o le Aualofa seia oo ina toe faafoisia lona malosi ma aveesea le mai ma lona mafatiaga.

Sa matou iloa ai foi o lenei Aualofa sa matua faatulagaina lelei lava ma aoaoina ina ia maua e tagata mamai uma i le alaalafaga lea lava tausiga ma auaunaga mo lo latou tulaga solo lelei ma le manuia. Ou te le i vaai muamua lava i le manino o le faatulagaga, le faaaogaina ma le matagofie o lenei faalapotopotoga silisili e faapei o le faataitaiga ua tatou molimauina nei, ma e sa ou manatu o se mea matagofie naua ua musuia ai e le Alii ia le Perofeta o Iosefa Samita ina ia faatuina lenei faalapotopotoga i le Ekalesia.¹⁰

O tuafafine o le Aualofa e tatau ona saili e atinae le faatuatua ma le malosi faaleagaga ia i latou lava ma i latou ua latou galulue i ai.

O ai na te faamatalaina le tele o le lelei e mafai ona faia i totonu o le Au Paia e se Aualofa lelei ona faatulagaina ma pulea, e le gata i le tulaga faaletino, ae faapea foi i le tulaga faaleagaga.. O le galuega e faia i le alofa ma e atonu e leai se isi aafiaga malosi ma le sili atu nai lo le alofa mama ma taitaiina lelei, ina ia manumalo mai ai le faatuatuaga ma le alofa o o tatou tagata soifua. Ina ua maua lo latou faatuatuaga e ala i galuega faigofie o le alofa tunoa ua tatala ai le faitotoa e maua ma taitaiina ai o latou agaga i tulaga maualuluga o le faatuatua ma le silisili faaleagaga; ae ia manatua, o le vaega faaleagaga e sili atu lona taua nai lo le na o le faaletino. …

O lona taunuuga, e sili atu le matelaina poo le fano i le manao i meaai faaletino nai lo le faamativaina ma fano ai ona o le leai o se malamalamaga faaleagaga e taua e faasaoina ai le meaalofa o le ola e faavavau, o le meaalofa sili ia a le Atua. O le maua o le malamalama i mataupu o le upumoni e faavavau e sili atu ia te au nai lo mea taumafa poo lavalava. Ae tatou te manaomia ia taumafa faaletino ma le faaleagaga ma ua faauuina e le Atua ina ia mafai ona faigofie ona maua nei mea mo tagata uma, pe afai latou te tausi i ana tulafono ma ola ai pea lava pea.

O se faamanuiaga ia i latou o galulue i le Aualofa le ave o fanau laiti mai lo latou pepe meamea ma fesoasoani e aoao i latou ina ia faamaoni ma ola mama, ia talitonu i le Atua le Tama e Faavavau, ma le misiona paia a lona Alo; ma ia faatonu tina ma aoao i latou ina ia tausia a latou fanau laiti i lenei ala. O se tiute taua lenei, e oo lava, pe a mafai ona fai, nai lo le vaavaaia o manaoga faaletino e oo mai i o outou luga ou tuafafine. Ioe e leai se mutaaga o o outou faamanuiaga poo avanoa e faia ai mea lelei i auala uma ma nofoaga uma e oo i ai lou malosi.¹¹

O galuega a le Aualofa e patino faapitoa i mea faaletino o le soifuaga, i manaoga faaletino o tagata o le Ekalesia, ae peitai o le aafiaga o a latou taumafaiga e oo i tua atu o le olaga faaletino e aafia ai le soifuaga faaleagaga faatasi ai ma manaoga faaletino. … O se vaega o lo outou tiute le vaavaaia o i latou ua leai ni tama ma e manaomia le fesoasoani, e le gata i o latou manaoga faaletino, ae tuusao foi i le tulaga o lo latou atinaeina o le mafaufau ma le agaga. Ioe e tatau ona avea outou ma tina mo i latou ua leai ni tina ma fesoasoani i e ua manaomia le fesoasoani. Mo nei galuega lelei uma ua i ai le Ekalesia e lagolago ma fesoasoani ia te outou.¹²

O mea silisili o mea faaleagaga ia, o mea ia e faatupuina ai le faatuatua o alii ma tamaitai, o mea ia e maua ai le malamalama ma le poto ma le malosi e tetee atu ai i le tiapolo ma faaosoosoga a le tiapolo, o le malosi e iloa ai le taufaasese o tagata ma le pepelo ma togafitiga leaga ua saunia e faasese ai. O lena poto, lena malamalama faaleagaga, poto faaleagaga o le a outou mafai ai ona iloa le upumoni mai le sese, o le malamalama mai le pouliuli ma le lelei mai le leaga, o le mea sili lenei mo i tatou e saili i ai ma ia maua.¹³

Mafaufau ia Aunt Em [Emmeline B. Wells, o le Peresitene o le Aualofa aoao] … i lona sau i le lotu ao laitiiti o ia, ma ui mai i tofotofoga ma puapuaga ma faanoanoaga ma mafuaaga uma e popole ai ma le tausiga i le amataga o le soifuaga o tagata o le Au Paia, ma la latou malaga mai Misuri ma mai Navu agai atu i le Vanu o atumauga, i luga o le toafa e leai se mea e tutu ai o latou vae ma se mea e tuu ai o latou ulu. Pe sa lotovaivai ea o ia? Pe sa lotovaivai ea lo’u tina? Pe sa lotovaivai ea Aunt Vilate Kimball? E leai; sa latou manatu o ni mea faatauvaa ma lē aoga pe a faatusatusa i le malamalama ua latou maua i o latou agaga mo le Atua ma Lana upumoni. Faamata ea e mafai ona e teena ese se tasi o nei tamaitai mai o latou talitonuga i le Ekalesia a Iesu Keriso o le Au Paia o Aso e Gata Ai? Pe e te faapogisaina ea o latou mafaufau i le misiona a le Perofeta o Iosefa Samita? Pe e te faatauasoina ea i latou mai le misiona paia a Iesu Keriso, le Alo o le Atua? E leai, e le mafai ona e faia lena mea i le lalolagi. Aisea? Aua ua latou iloa. Sa faaali atu e le Atua ia i latou, ma sa latou malamalama ai, ma e leai se malosi i le lalolagi na te liliueseina mai i latou mai le mea ua latou iloa o le upumoni. O le oti o se mea noa ia i latou. Pau le mea ua latou lagona ma iloa ma manaomia o le manumalo o le malo o le Atua ma le upumoni ua tuuina atu e le Alii ia i latou.

Lou agaga e, o fea o i ai nei tamaitai i le taimi nei? Ua i ai nisi o i latou iinei, faafetai i le Atua, aua ua toatele o i latou. Ae o loo i ai nisi o i latou iinei e le moni. … A outou tagatagai toto’a i o latou olaga, i o latou loto ma a latou amioga ma faataitaiga i o latou aiga, e le o tulaga ia o loo tatou manaomia, e lē o le tulaga lea e tatau ona i ai tamaitai ma alii ua taliaina le talalelei ma ola ai, auā latou te lē o iloaina e i latou lava le talalelei, latou te lē o ola ai foi. Ae peitai i le vaai laualuga tou te manatu ua ia te i latou mea uma, ma ua latou maua ia le malamalama atoa ma le faatuatua atoa ma le atamai atoa ma le poto atoa; ae lē o i ai iina,—e lē o i ai iina. Afai ua taofia e tamaitai faapea ma alii lo latou valaau atu i le Atua i le tatalo, o loo i ai se mea o loo manaomia. … Ua leai so latou tulaga mausali, ua leai so latou faatuatua, ua leai so latou alofa i o latou agaga e pei ona tatau ona i ai.¹⁴

O le upu ma le tulafono a le Atua e taua i tamaitai o ē ua faia faaiuga poto e faapei foi o alii; ma e ao i tamaitai ona suesue ma manatunatu i faafitauli o lenei galuega o aso e gata ai mai le silafaga a le Atua i ana faaaliga, aua e mafai ona uunaia i latou e lona Agaga, ua ia te i latou foi le aia tatau e maua ai e ala i tatalo faamaoni ma le loto.¹⁵

Ia tatou galulue mo le manuia faaletino ma le manuia faaleagaga o le Ekalesia, ma ia tatou galulue malosi pea mo le siitia o le faaleagaga ma le manuia faaleagaga, ma le olaga faaleagaga ma le faaolataga o le Ekalesia.¹⁶

O le Aualofa e le tutoatasi mai le perisitua o le Alo o le Atua.

O o tatou tuafafine e galulue i galuega a le Aualofa. … ua ia i latou lo tatou faaaloalo, lo tatou faatuatuaga atoa; o le a ia te i latou faamanuiaga a le Alii. Sa ia faia muamua i le taimi ua mavae ma o le a ia faaauau ona faamanuia i latou pe a latou talia ma lagolagoina le Perisitua a le Atua sa tuuina mai i le lalolagi e taitaiina ai le Ekalesia ma fesoasoani i mataupu o le malo o le Atua.¹⁷

Ou te fia fai atu. … i le Aualofa … ma faalapotopotoga uma i le Ekalesia, e leai se tasi o i latou e tutoatasi mai le Perisitua a le Alo o le Atua, e leai se tasi o i latou e i ai mo se vaitaimi i le mafutaga ma le Alii pe afai ua latou o ese mai saunoaga ma fautuaga a i latou ua umia le Perisitua ma taitaiina i latou. Ua ia i latou le pule ma le mana o le Ekalesia, ma e le tutoatasi i latou mai [le Perisitua]; pe latou te faatino ni aia i la latou faalapotopotoga e aunoa ma le Perisitua ma le Ekalesia.¹⁸

Mai le taele o lo’u agaga, e i ai lo’u manaoga e tasi mo i latou nei tamaitai lelei, ua galulue i lenei galuega paia, ma o lea, ia faamanuia le Atua ia i latou, faasaoina o latou ola, fesoasoani ina ia latou tutumau ma faamaoni i lo latou amiotonu mo le lelei o Siona; ma fesoasoani ina ia latou lagona i o latou loto e leai se mea e tatau ona faamuamua i luma o le Ekalesia a Iesu Keriso o le Au Paia o Aso e Gata Ai, ma e leai se mea sili nai lo le Ekalesia i lalo o le malo selesitila. Ua i ai i le Ekalesia le mana o le Atua, amiotonu, upumoni ma le pule paia, e faia ai lona finagalo i le lalolagi.¹⁹

Fautuaga mo Suesuega

O le a le pule sa faatuina ai le Aualofa? E faapefea e le malamalama o le Aualofa sa faatulagaina i le paia ona fesoasoani i tuafafine e faataunuu ai o latou valaauga? E faapefea ona fesoasoani lenei malamalama i e umia le perisitua e lagolagoina le Aualofa?
E faapefea e tuafafine o le Aualofa ona “taitai … tamaitai o le lalolagi” i mea uma e tauleleia, siitia, ma mama? (tagai Mataupu o le Faatuatua 1:13.)
E faapefea e tuafafine o le Aualofa ona faataunuu o latou “valaauga e faapei o ni agelu o le alofa tunoa i e puapuagatia ma e ua sauaina”? E faapefea ona taitaiina i tatou ia i latou ua “puapuagatia ae lē tautala mai”?
E faapefea e le Aualofa o se faalapotopotoga ona tuuina atu le faamafanafanaga? E faapefea ona aoao ai le mataupu o le ola amiotonu? E faapefea ona faateleina ai le malamalama o tamaitai e uiga i tiute o o latou aiga?
Aisea o mea silisili o mea faaleagaga ia? E faapefea e le “alofa mama taitaiina lelei” ma le “galuega faigofie o le alofa tunoa” ona fesoasoani ia i tatou e taitaiina ai o tatou agaga i “tulaga maualuga o le faatuatua ma le atoatoa faaleagaga”?
O le a se mea e te fiafia i ai e uiga i tuafafine o le Aualofa o loo faamatalaina i le mataupu? lenei?
E faapefea ona faamanuiaina le Aualofa e le taitaiga a le perisitua?
E faapefea e le “mafuaaga paia” o le Aualofa ona faamanuiaina ai lou olaga?