Mataupu 45: O le Talalelei Na Te Aumaia le Filemu i le Lalolagi i Taimi o Faigata

Mataupu 45

O le Talalelei Na Te Aumaia le Filemu i le Lalolagi i Taimi o Faigata

O le Talalelei a Iesu Keriso na te aumaia le filemu i le lalolagi i taimi o faigata.

Mai le Soifuaga o Iosefa F. Samita

I tausaga e le mamao atu ma lona maliu, e masani ia Peresitene Iosefa F. Samita ona faamatala atu faanoanoaga sa o faatasi ma le taua muamua o le lalolagi. E toatele tagata o le Ekalesia sa tuuina atu i le taua i isi itu, ma e selau ma selau sa faaumatia o latou ola. E toatele nisi o le fanau lava a Peresitene Samita sa auauna atu i le vaegaau, e toatasi sa faalua ona manua i lea taua.

I se savali o le Kerisimasi sa tuuina atu i lea lava taimi, sa faapea mai ai le Au Peresitene Sili: “A o tatou fiafia i le soifua mai o le Toatasi Lēmafaatusalia, sa ufitia le malamalama o le tatou faanoanoaga i ao o taua sa faapogisaina ai le vateatea o le atu Europa, ma pese ma faafeiloaiga ma le fiafia ma mea lelei o loo tuuina atu ma le faanoanoa ma le le logoleleia o le taavilivili mai o fanatetele ma le ōi mai o e manunua ma e o le a maliliu, o loo faalogoina siuleo mai mea mamao, ae o le faanoanoaga tele ma le tiga i o tatou agaga e pei o le faamalumalu mai o galu fafati o le sami. Ua siitau isi atunuu i isi atunuu, ua siitau uso i uso, o ‘Kerisiano’ i isi ‘Kerisiano,’ o loo taitoatasi ma tatalo atu mo se fesoasoani mai le Atua alofa i lo latou fevataua’i ma manaomia ai se faamafanafanaga mai le Pelenise o le filemu! O se mea e matuai uiga ese le vaaiga o loo tuuina atu i luma o le ‘au a agelu, o se ‘au o loo usuina se pese o le faavavau ‘o le finagalo alofa i tagata’ i le soifua mai o le pepe i Peteleema!”¹

Sa soifua Peresitene Samita ina ia faalogo i tala o le sainiaina o le feagaiga e taofi ai le taua mo sina vaitaimi, o lea sa faaumaina ai taua ma le faatama’iaina o le ola ma mea totino. O lea taofiga o le taua sa sainia i le aso 11 Novema 1918, na o le valu aso ae maliu loa o ia.

Sa ia aoao atu i le au paia i lea vaitaimi e faapea o le filemu moni e sau mai le na o le taliaina ma le ola i le talalelei a Iesu Keriso. O Iosefa Filitia Samita, sa mulimuli ane i le avea ma Peresitene o le Ekalesia, sa ia faapea mai e uiga i lona tama: “ O lona agaga e malu ma alofa. O se tagata e faanoanoa faatasi ma e faanoanoa, e tigaina faatasi ma e tigaina, o se tasi e fesoasoani tele i e manaomia le fesoasoani e amo faatasi le avega, ma toe faatutu i o latou vae i latou sa sauaina, ma e ua le mafai ona maua i tuaoi o Isaraelu. O ia o se tagata na te faatupu le filemu, e fiafia i le filemu.”²

Aoaoga a Iosefa F. Samita

Ua na o le talalelei a Iesu Keriso e mafai ona aumaia le filemu i le lalolagi.

Ua na o le tasi lava le mea e mafai ona aumaia le filemu i le lalolagi. O le mauaina lea o le talalelei a Iesu Keriso, ia malamalama, ma usitaia, ma ola ai le au faitulafono ma tagata foi. O loo ua tala’ia nei ma le malosi i atunuu uma, ma ituaiga, ma gagana uma ma tagata o le lalolagi, e le Au Paia o Aso e Gata Ai, ma e le o toe mamao lea aso, o lea savali o le faaolataga o le a oo atu i le ta’ele o loto o tagata uma, o i latou ia, i le latou manatu tonu ma le naunautai, afai e oo mai le taimi, o le a le gata e tusia i latou e tetee atu i faa-Kerisiano sese, ae o le a tetee atu foi i taua, ma o i latou o loo faatupuina taua o ni tagata solitulafono. I le tele o tausaga sa i ai le talitonuga o le filemu e sau mai le na o le sauniuni mo taua; o le feteenaiga o loo i ai nei [Taua 1 o le Lalolagi] e tatau ona faamaonia ai e faapea o le filemu e maua mai i le sauniuni mo le filemu, e auala lea i le aoaoina o tagata i le amiotonu ma le sao, ma filifilia se au faitulafono poo ni taitai faalemalo e faaaloalo i manaoga amiotonu o tagata.³

Tatou te mananao i le filemu i le lalolagi. Tatou te mananao i le alofa ma lagona lelei e faatupuina pea i le laueleele, ma i ai i tagata uma o le lalolagi; ae peitai e le mafai lava ona i ai i le lalolagi lena lagona o le filemu ma le alofa e tatau ona i ai, seiloga e maua e tagata uma le upu moni a le Atua ma le savali a le Atua ia te i latou, ma iloa e paia lona mana ma le pule, ma e le mafai ona maua i le na o le poto o le tagata.⁴

E fiafia le Alii i le filemu. O le mataupu autu a le Faaola i tagata o le ‘Filemu i le Lalolagi, ma le finagalo alofa i tagata,’o le alofa, ma le alofa faamaoni. O le poloaiga e sili atu i poloaiga uma sa tuuina atu i le fanauga a tagata o le: “Ia e alofa atu i le Alii lou Atua ma lou loto atoa, ma lou agaga atoa, ma lou mafaufau atoa. O le poloaiga muamua lea ma le sili. Ma e faapena foi lona lua, E te alofa atu i le lua te tuaoi e pei o oe lava ia te oe. O na poloaiga uma e lua ua autu ai tulafono ma le au perofeta.” [Mataio 22:37-40] Afai o atunuu ogatotonu uma o le lalolagi e maua ai lea agaga o le alofa, le mataupu faavae lea o le talalelei a Iesu Keriso; afai o lea lapataiga mamalu sa tuuina atu i loto o taitai o ia malo, e le tatau ona toe i ai ni taua, e le tatau ona toe i ai se toto masaa, e le tatau ona toe i ai se faaleaga mea ma ni tulaga faa-tevolo i aso nei. Ua mafua nei mea ona e lei maua e tagata o le lalolagi le talalelei. Ona latou te lei usiusitai i le mea moni. Talu ai latou te lei maua Keriso, o le mea la lea ua tuua ai na o latou, ma o le mea ua tatou iloaina, o mea ia ua mafua mai i o latou lava uiga le lelei ma a latou faiga leaga.⁵

Ua na o le tasi lava le malosiaga, ma e tasi lava, e na te mafai ona taofia taua i va o atunuu uma o le lalolagi, o le mea lena e tau o le lotu moni ma le le matauleagaina i luma o le Atua, le Tama. E leai lava ma se isi mea e mafai ai. … E i ai, ae peitai e tasi le vaifofo e mafai ona puipuia mai ai tagata e o i le taua, ona ua i ai lava le latou manao e aua, ma o le Agaga lena o le Atua, o loo musuia i latou i le alofa, ae aua le feitagai, e tau atu lena i mea moni uma, ae le o se mea sese, lea o loo taumafai le fanau a le Atua e totogi lona eseesega ia te Ia ma ana tulafono ma avae ai i latou i luga o isi mea o le lalolagi.

Sa tauina mai e le Alii ia te i tatou. … o le a oo mai taua. E le o se mea tatou te ofo ai pe o se mea foi e faapea o loo faatalitali, ma o le a tei lava ua pa i luga o atunuu o le lalolagi i soo se taimi. Ua leva ona tatou tulimataia le faataunuuina o afioga a le Alii e faapea e oo mai lava. Aisea? Aua sa manao i ai le Alii? E leai; e leai lava i soo se uiga. Pe faapea sa filifili mamao atu e le Alii, pe faapea sa Ia fuafuaina, i soo se vaega? E leai, e leai lava ma se mea faapena. Aisea? O le mafuaaga lava o le le faalogo o le tagata i le Alii le Atua, aua sa Ia muai silafia mea o le a mulimuli mai, ona o le tagata, ma atunuu o le lalolagi; o le mea la lea, sa ia mafai ona tau mai mea o le a tutupu ia te i latou, ma o le a tietie i o latou luga ona o o latou lava uiga poo mea sa fai, ae le faapea ua Ia tuuina atu ia te i latou, aua o i latou lava, lea o le a latou tigaina ai ma selesele ai i mea ua maua ona o a latou mea sa fai.

. …“O le filemu i le lalolagi, ma le finagalo alofa i tagata,” o le tatou autu lena. O le tatou mataupu faavae lena. O le mataupu faavae lena o le talalelei a Iesu Keriso. Ma a o ou mafaufau e sese lea mea, e matua sese leaga lava, le siitaua atu i isi atunuu, poo luga o isi tagata, ou te talitonu o se mea e matua sao ma amiotonu i tagata uma le puipui o o latou ola ma le saolotoga ma o latou aiga, i sina faatulutulu mulimuli o o latou toto. Ou te talitonu e sa’o, ma ou te talitonu foi o le a lagolagoina e le Alii soo se tagata e na te puipuia lona lava saolotoga e tapuai ai i le Atua e tusa ma musumusuga ma lagona ua oo ia te ia, soo se tagata lava e taumafai e puipuia o latou taitoalua ma fanau mai faatama’iga o taua. Ae peitai, tatou te le mananao e maua i tatou i le lagona faapea e tatau ona puipuia i tatou lava.⁶

Pe a valaauina e auauna atu, ia tausia oe ia mama ma ia lē pona mai i le lalolagi.

Ou te manao i a’u uo. … ia faatumauina i luga atu o mea uma le agaga o le alofa i tagata, ma le agalelei, ma le faatupuina o le filemu, e tusa lava pe valaauina i latou i se taua, ia aua lava nei o latou faaleaogaina, tuueseina ma faaleagaina mataupu faavae o loo tatou talitonu i ai, mea o loo tatou taumafai e faamautu, ma fautuaina ina ia faatumauina: o le filemu ma uiga lelei e faaali atu i tagata uma, e ui ina faamata tatou te tau ma le fili. Ou te manao e fai atu i le Au Paia o Aso e Gata ai o loo ofoina atu i vaegaau a soo se atunuu o loo manaomia ai, afai o le a avea i latou ma fitafita a se Setete poo se Atunuu, ia aua nei galo ia te i latou o i latou foi o fitafita o le Satauro, o i latou o faifeau o le ola ae lē o le oti; ma a o latou o atu, ia latou o atu ma le agaga o le puipuia o le saolotoga o tagata nai lo le faamoemoe e faatamaia le fili.⁷

Afai e valaauina o tatou tama talavou i le vaegaau … , ou te faamoemoe ma tatalo o le a o atu i latou ma le Agaga o le Atua, ae lē o le agaga o le faamaligi toto, o le mulilua, o le amioleaga, a o le agaga o le amiotonu, le agaga e taitaiina i latou e fai le mea lelei, e fausia ma lelei ai le lalolagi, ae lē faatamaia ai ma faamasaa le toto.

Ia manatua le faaupuga o loo i tusitusiga paia … i le Tusi a Mamona, e faatatau i alii talavou mama ua faamavae ma le taua ma le faamasaaina o le toto, ola mama ma le le matauleagaina, saoloto mai le faaleagaina mai mafaufauga o le femisaa’i, o le ita, o le amioleaga i o latou loto, ae peitai afai e manaomia le latou fesoasoani, ma valaau mai loa e o atu e puipui o latou ola, ma ola o o latou tama ma tina, ma o latou aiga, latou te o–ina ia lē faaleagaina, a ia puipuia, ia lē faamasaa le toto, a ia faasao le toto o lē ua leai sana sala, ma faatupuina le filemu i le fanauga a tagata [tagai Alema 56:45-48]

Faamata e galo ea ia i latou ia … mai le Ekalesia a Iesu Keriso o le Au Paia o Aso e Gata Ai a latou tatalo? Pe galo ea ia te i latou le Atua? Pe galo ea ia te i latou aoaoga na maua mai i o latou matua i aiga? Pe galo ea ia te i latou mataupu faavae o le talalelei a Iesu Keriso ma feagaiga ua uma ona latou osia i le vai o le papatisoga, ma nofoaga paia? Pe o le a o atu ea i latou e pei o ni alii, i soo se tulaga lava … o ni alii mama, o ni alii amiotonu, o ni alii faamaoni, o ni alii amioatua, o ni alii o le Atua? O le mea tonu lava lea o loo ou naunau e ta’u atu.

Ou te manao ou te vaai i aao o le Atua ua faaali manino atu i mea e fai e tagata e o atu mai soo se vaega o le Ekalesia a Iesu Keriso … e fesoasoani ina ia puipuia mataupu faavae o le saolotoga ma faatulagaga sao mo le aiga o le tagata. Ou te manao e vaai ua ola i latou ina ia mafai ona latou fesootai ma le Alii, i o latou tolauapiga, ma o latou afeafe, ma mafai ona latou faapea ane i le taimi o le taua:” Tama, o lo’u ola ma lo’u agaga o loo i ou aao ia!”

Ou te manao e vaai i o tatou tama o loo o ese atu iinei i le mafuaaga lenei, e o ma le lagona e pei o faifeautalai pe a auina atu i latou i le lalolagi, o loo o atu i latou ma le agaga o se tina lelei o loo ia lagonaina pe a tetea ma lana tama, i le taimi na alu ese atu ai mo lana misiona. Na te fusi atu ia te ia ma faaali atu i ai le alofa faateleina mai lona agaga!

… Afai o le a na o le o atu o tatou tama talavou i le lalolagi i le auala lea, o le o atu ma le agaga o le talalelei ma amioga sa’o o ni Au Paia o Aso e Gata ai, o le a le afaina poo le a lava le mea o le a oo i ai le olaga, o le a latou faaauau pea ma le lelei atoatoa. O le a mafai lava ona latou faaauau pea e pei lava o se isi tagata e mafai ona faaauau pea i lona vaivai poo lona tigaina, afai e tatau ai, pe afai foi o le a tofotofoina i latou o le a mafai lava ona taliaina! Aua foi e leai se isi o i latou e fefe i le oti. O le a saoloto i latou mai le fefe i mea e tutupu i o latou lava olaga. O le a leai se mea o le a fefefe ai i latou, aua ua uma le latou galuega; ua uma ona latou tausia le faatuatua, e mama o latou loto, ma ua agavaa i latou e vaavaai i le Atua!⁸

E tele mea leaga e masani ona mulimuli mai ona o vaegaau ma mea sa faaaogaina ma le faatulagaina o taua, e sili atu lona leaga nai lo le oti mamalu e ono tupu i feeseeseaiga i taua. E le afaina tele pe a valaauina o tatou alii talavou, poo fea foi e o i ai, ae peitai e afaina tele i o latou matua, uo ma au meamamae i le upu moni, ma i latou lava, pe faapefea ona o. Ua leva ona aoaoina i latou i o latou olaga atoa o ni tagata o le Ekalesia ina ia tausi i latou ia mama ma le le pona mai agasala o le lalolagi, ia faaaloalo i le saolotoga o isi tagata, ia usiusitai i mataupu faavae sao, ia manatua o le amiotonu o se tasi o meaalofa sili mai le Atua. E sili atu nai lo le la, e tatau ona latou faaaloalo i le amiotonu o isi, ma e sili atu le oti faa-afe nai lo le mauaina ua latou faia ni agasala inosia. Matou te mananao ia latou mama, i mafaufauga ma mea e fai, i le faatuatua i mataupu faavae o le talalelei ma le faaolataga o le alofa o lo tatou Alii ma le Faaola. Matou te mananao ia latou iloa, ua na o le ola i se olaga mama ma le faatuatua e mafai ai ona i ai se faamoemoe e maua le faaolataga sa folafola mai e auala mai le faamaligiina o le toto o lo tatou Togiola.⁹

Tatou te matuai taumafai e ola i le filemu ma tagata uma.

Ua matou apoapoai atu i le Au Paia o Aso e Gata Ai ina ia ola i la latou ekalesia poo le latou talitonuga; ia manatua a latou feagaiga sa fai i le vai o le papatisoga; ia faamamalu i le Alii ma tausi ana poloaiga; ia aua nei manumalo ai mea valea a le lalolagi, a ia saili le taitaiga o le Agaga Paia, [ma] ola i le filemu ma tagata uma.¹⁰

O le tausaga fou ma tausaga uma o le lumanai e valaau atu ai i tagata uma o loo nonofo i eleele uma e tuufaatasi uma i le fausiaina o le filemu ma le faalauiloaina atu o le tulaga faauso. O le tauaimisa, feitagai, o le manatu faapito, o le ola le mama o mea leaga ia e tatau ona aveese mai le tagata. E leai se tagata ua maualalo tele pe faapea foi ua le mafai ona fesoasoani. E tatau i tagata taitoatasi ona alofa i lona tuaoi e pei o ia lava ia te ia, ma o auala faatogafiti i le taimi nei e mavae atu, o mea taufaafefe o le lumanai o le a taofia, ma o “tagata taitoatasi uma lava i nofoaga taitasi o le a feiloai o se uso ma se uo.”

O se faataitaiga tautaua ma le mamalu o le olaga sao ma le faauoga mamalu sa tuuina mai e Iesu Keriso i le lalolagi e tusa ma le luasefulu senituri talu ai. O Lana savali o le filemu ma le uiga lelei. Na faavaeina Lana tulafono i luga o le amiotonu ma faatinoina lelei i le poto ma le amiotonu. O le malamalama o Lona tulaga faatulafonoina lea ma o le upumoni o Lana tautinoga lea.¹¹

E ui lava i le “le alofa o le isi tagata i le isi tagata” ua faaali manino mai lava i mea o loo atugalu ai i va o isi atunuu ma isi atunuu, o lea ua taunuu, ua tatou faaaogaina le malamalama o mea o loo tutupu nei mo le fiafiaga ma le tuuina atu o le faafetai, ma vaai atu i ao o taua matautia ina ia faataunuuina folafolaga tumau o le filemu i le taunuu mai o lo tatou Alii ma le Tupu.¹²

Ou te. … tu i luga o lenei mataupu faavae, e faapea o loo i ai le upumoni i le talalelei a Iesu Keriso, o le mana o le togisala, o le mana o le filemu, o le mana o uiga lelei, alofa, alofa mama o Keriso, ma le fefaamagaloai, o le mana o le faauo atu i le Atua, o loo i ai lea i le talalelei a Iesu Keriso, ma o le vaega a tagata e fai o le usiusitai lea i ai. O le mea lea ou te ta’u atu ai, e le gata ina ta’u atu ae ou te tautino atu e faapea, e leai se mea e sili atu o loo i le lalolagi poo le lagi, nai lo le upu moni o le talalelei a le Atua ua uma ona ia toe saunia ma toefuataiina mai mo le faaolataga ma le togiolaina o le lalolagi. Ma o iina e auala atu ai le filemu o le a oo mai i le fanau a tagata, ma e leai lava se isi auala e oo mai ai i le lalolagi.¹³

Fautuaga mo Suesuega

Aisea ua na o le talalelei ai a Iesu Keriso na te mafai ona aumaia le filemu i le lalolagi? O le a le mea tatou te fai e fesoasoani ai i le aumaia o le filemu i le lalolagi?
O fea e amata ai le filemu? E faapefea ona taitaia i tatou i le filemu i o tatou aiga ma tua atu pe afai tatou te tausia ia poloaiga sili e lua?
E mafai faapefea e i latou o loo auauna atu i vaegaau ona avea ma “faifeau o le ola ae le o le oti”?
E mafai faapefea e le au paia o loo auauna i vaegaau ona ave e i latou “le agaga o le talalelei ma aga sao a le Au Paia o Aso e Gata Ai”?
A valaau nisi o le au paia i vaegaau, o a talitonuga, ma uiga o le a fesoasoani ai ia te i latou ina ia aua nei fefe i le oti?
O le a se mea e mafai ona tatou matua faia ma le atoatoa e “ola ai i le filemu tagata uma”?
O le a se mea o loo aoaoina mai ai tatou i le faataitaiga a le Faaola e uiga i le ola i le filemu ma uiga alofa?

Two Thousand Stripling Warriors — “O Le Autau Talavou e Lua Afe,” tusia e Arnold Friberg. Sa tusia e Helamana se tala e uiga i alii talavou sa ia taita’ia i le taua: “Ma ua sili i o latou manatu le saolotoga a o latou tama ai o latou lava ola; ioe, ua aoaoina i latou e o latou tina, pe afai latou te le masalosalo, e laveaina i latou e le Atua.” (Alema 56:47).