Ia Lototoa i le Galuega a Keriso

E ao ona tatou lototoa i le galuega a Keriso ma faamaoni ia tatou feagaiga, i lo tatou Atua, ma le galuega a Siona.

Mai le Soifuaga o Iosefa F. Samita

I le tautoulu o le 1857 ina ua faatoa 19 tausaga o Iosefa F. Samita, sa tuua lana misiona i Hawaii ma toe foi atu i lona aiga. Sa ia ui atu i San Francisco, Los Angeles, ma San Bernardino. “I Saute o Kalefonia, e lei leva ona tuua e taavale toso laiti se vaega puupuu o le auala ma faia la latou togalauapi, ae osofaia loa le togalauapi e tagata leaga sa tietie mai i solofanua, e lē fiafia i latou i Mamona. Sa latou upuvale ma soona lafo upu masoa ma faamata’u atu i mea o le a latou faia i ‘Mamona.’ O Iosefa F. Samita e le i mamao ese mai le togalauapi o loo faaputu fafie mo le afi, sa ia iloa o isi o la latou vaega toaitiiti ua o ese atu ma le faaeteete i le alia, ma e le o iloa atu. Ina ua ia iloa lena tulaga,… sa oo mai le manatu i lona mafaufau, ‘Pe ou te sola ese ea mai nei tagata? Aisea o le a ou fefe ai ia i latou?’ O lea na ia savali atu ai ma ona lima ua tumu i fafie i le mea o loo i ai le afi, o loo i ai se tasi o tagata leaga taufaamatau, o loo uu le fana i lona lima, o loo leoleoā ma taufaifai agai i ‘Mamona,’ ma i se leotele sa faapea atu ai ia Iosefa F.

“‘O oe o se “Mamona”?’

“Ma sa tuusa’o mai le tali, ‘Ioe, alii: e o’oo’o i soo se vaipanoa o lo’u tagata: e faamaoni a’ia’i atoatoa’.

“O lea na toso atu ai loa lona lima e le tagata taufaamatau ma faapea mai:

“ ‘Ia, o oe … o le tagata aupito sili ona lelei ua ou feiloai i ai! Malo, alii talavou, ua ou fiafia e feiloai i se tagata e puipui i ona talitonuga maumaututu.’”¹

Sa ola Iosefa Samita i se olaga e faamaoni i le Alii, e tusa lava poo a faigata poo faafitauli. Na faapea mai se uo vavalalata ma o le Epikopo Pulefaamalumalu, o Charles W. Nibley, e uiga ia te ia, “E leai se fatu e sili ona faamaoni lana tātā i mataupu faavae uma o le olaga faa-tamatane ma le amiotonu ma le faamasino tonu ma le alofa tunoa nai lo o ia; o lona loto tele, o loo malu i totonu o lona faavaa matagofie, ua avea ai o ia o se alii ua sili ona maoae, sili lona toa, sili lona amio agamalu, sili lona mama ma silisili nai lo se isi lava alii ua savali i luga o le laueleele i ona taimi!”²

Aoaoga a Iosefa F. Samita

E ao ona tatou faamaoni ia tatou feagaiga, i lo tatou Atua, ma le galuega i Siona.

E ao ona tatou faia ni faataitaiga; e ao ona tatou faamaoni i le talitonuga. … E ao ona tatou faamaoni ia tatou feagaiga, faamaoni i lo tatou Atua, ma faamaoni le tasi i le isi, ma le tulaga moomia o Siona, e tusa lava poo le a le taui, tusa lava poo le a le iuga. … O le tagata e tumau i le malo o le Atua, o le tagata e faamaoni i ona tagata, o le tagata e tausia ia lava i le mama ma lē pisia mai le lalolagi, o le tagata lea o le a talia e le Atua, o le a siitia e le Atua, ma o le a faatumauina e ia, ma o le a tamaoaiga i le laueleele, pe o loo fiafia i lona saolotoga poo le saisaitia i le falepuipui, e leai se eseesega poo fea e i ai o ia, o le a manuia lava o ia i le iuga.³

Ua tatou iloa le mea ua agai i ai le lalolagi i nei aso i le tulaga tau lotu. Afai e taugofie mo i latou, afai e le alu ai tele se taumafai, o le a le afaina le maua mai ai o sina mea itiiti. Ae le o le tulaga lea i le Au Paia o Aso e Gata Ai. E le faapea foi se lotu o loo ola. Aua ou te fia ta’u atu ia te outou o le lotu a Keriso e le o se lotu ua na o se Aso Sa; e le o se lotu e totogi ai ni tupe; o le ekalesia e le gata; ma e manaomia ai le faia o tiute o ona tagata ma le faamaoni i le Aso Gafua, Aso Lua, Aso Lulu ma aso uma lava o le vaiaso i le faamaoni, i le malosi, e faapei foi ona faia i le Aso Sapati. Ma e ou te le tuuina atu lefulefu o se laau ua mu, mo se ekalesia ua na o le Aso Sa, poo se lotu o loo fausia e tagata, poo ositaulaga poo faifeau.

O la’u lotu o le ekalesia a le Atua. O le ekalesia a Iesu Keriso, ana lē o lea po ua matua leai lava se aoga mo au, ma ua lē aoga foi i tagata uma lava, e tusa ai ma tulaga tau i le lotu. Afai e lē o i totonu o lo’u agaga, a faapea e lē talia i lo’u loto, pe a ou lē talitonu i ai i lo’u loto atoa, manatu ma le malosi atoa ma avea ma faataitaiga, e ola ai, ma faapelepele i ai i lo’u loto i aso uma o lo’u ola—i aso o le vaiaso atoa ai ma aso Sapati, i nofoaga lilo ma nofoaga faitele, i le aiga ma atunuu mamao, e tutusa lava i mea uma; ona avea ai lea o le ekalesia a Keriso, o le ekalesia o le faia o mea lelei, o le ekalesia o le amiotonu, o le ekalesia o le mama, o le ekalesia o le agamalu, faatuatua, faaolataga mai le agasala faaletino, ma le faaolataga ma le faaeaga i le malo o lo tatou Atua—o la’u ekalesia o le a le avea ma talalelei o le Alo o le Atua ia te au. O le “Talitonuga Faamamona” lenei ma o le ituaiga o ekalesia lenei tatou te mananao e aoao atu ia tatou fanau. E ao ina tatou talia e i tatou lava ma aoao atu mai i o tatou loto i o latou loto, ma mai o tatou lagona alofa i o latou lagona alofa, ona tatou faaosofia ai lea o i latou ona o lo tatou lava faatuatua ma lo tatou lava faatuatuaga ma talitonuga i le Ekalesia.⁴

O lo tatou tiute le tutu mausali pe a oo mai le fili.

O se tasi o faailoga maualuga o le taitai faamaoni o le maualuga o le tulaga o le lototoa. A tatou talanoa i le lototoa ma le taitaiga, tatou te faaaogaina ia fuaitau e faapei o le tulai mo le tulaga maualuga o le olaga, lea e iloa lelei ai e tagata le ala sa’o e tulimata’i ma puipuia ma lagolagoina ma le faamaoni o latou talitonuga. E le’i i ai lava se taimi i le ekalesia sa le manaomia ai ni taitai lotototoa; e lē na o le lototoa e mafai ai ona faafetaia’ia tulaga matautia, ae faapea foi, i le tulaga e mausali ai ma faamaoni i le talitonuga manino ma le tonu.⁵

E faanoanoa ona o loo i ai se vaega o le Au Paia, o loo taumafai, ma ua faatauvaaina ai mataupu faavae, e faalauiloa ia “Talitonuga Faamamona.” Ua latou mananao ina ia faafetaui atu la tatou ekalesia ma mataupu faavae ma manaoga o isi tagata. E foliga mai ua latou popole tele ina ia ogatasi ma tagata o le lalolagi, nai lo le ola e tusa ai ma mataupu o le talalelei. … O nei uso e ao ona manatua o teori o le atamai faale-lalolagi e lē mafai ona avea o se vaega o mataupu o le talalelei. …

… O le avea ai o se tasi o le Au Paia, e manaomia ai le lafoai o moomooga ma manaoga o le lalolagi; e manaomia le amio sao, le malosi o le loto, alofa i le upumoni, faamaoni i mataupu ma le naunautaiga malosi e vaai atu i le manumalo, i le savali agai i luma i le upumoni. O lona uiga o le tele o taimi e inosia ai lo tatou tulaga. O lona uiga o se taua e lē uma e tetee atu ai i le agasala ma le faale-lalolagi. E lē o se auala e faigofie ona uia,… ae sei vagana ai ua tatou faatuina le upumoni, atinae uiga, ma tausia i le mama ia mataupu o le talalelei ua tuuina mai ia te i tatou.⁶

E i ai tagata ua lototoa i le faia o mea uma latou te mafaia ina ia maua ai ni taunuuga manaomia. O le a latou faasagatau atu i le tiapolo ma taofia mea sese ua oo mai i o latou luga ma luga o isi; ae ina ua faatoilaloina i latou, i lo latou iloa o le mea moni ae ua latou tigaina ai, ma manumalo ai tagata ua tumu i le tiapolo, ona latou le toe taumafai ai lea. O le a le aoga? O le fesili lena ua sili ona taua i o latou mafaufau. Ua latou iloa ia tagata amioleaga ua manuia. Ua latou iloa tagata leaga ua talia ma faamamaluina e o latou tagata seia oo ina latalata ona latou talitonu e i ai le taui o le faia o mea sese. Mo i latou, o le tulaga ua foliga mai ua toilalo le mafuaaga ua leai ai se naunautaiga i se faamoemoe. Ua toilalo, ua latou faapea mai ai, ma o le a tatou faia le mea sili, ma faauma ai. Ua lotovaivai. O nisi ua toetoe ina latou fesiligia le faamoemoega o le Atua. Ua ia i latou le malosi o tagata e totoa o latou loto, ae ua leai se malosi o le faatuatua.

E ese mai lava i lo Paulo! Sa ia galue ma le le fefe, sa ia tuuina atu se feau paia, sa ia tetee atu i le fili, ae sa latou manumalo ia te ia. Sa ave faapagotaina o ia ma faasala ma faalumaina e i latou e pulea le tulafono. Sa saisaitia o ia; ma sa faatalitali o ia i le oti, ae sa to’a pea o ia. O lona toa o le toa o le faatuatua. Faitau i ana faamatalaga faagaeetia loto nei sa auina atu i tagata i Efeso, o loo tusia i le Efeso 6:13, na auina atu ina ua manatu le tele o tagata ua toilalo lo latou taumafai: “O le mea lea ia outou tago ai i ofutau atoatoa mai le Atua, ina ia outou mafaia ona tetee atu pe a oo i le aso vale, pe a uma ona o outou faia o mea uma, tou te tutumau ai lava.”

Pe a maea ona tatou faia o mea uma lava ona o le upumoni, ma tetee atu i le leaga ua aumai e tagata i o tatou luga, ma ua faatumulia i tatou i o latou sese, o lo tatou tiute o le tutumau pea. Tatou te le faamaamulu; tatou te le taooto i lalo. O le taua tele e le manumalo i se augatupulaga e tasi. O le tutumau malosi i le feagai ai ma le tele o le tetee, ina ua uma ona e faia o mea uma lava, o le lototoa o le faatuatua. O le lototoa o le faatuatua, o le lototoa lea o le alualu i luma. O tagata ua i ai lena uiga paia e agai i luma; ua le faatagaina i latou e tu e le gaioi pe a mafai ai. Ua le o i latou o ni meaola o lo latou lava mana ma le atamai; o i latou o ni mea faigaluega o tulafono maualuga ma le faamoemoega paia.

O nisi ua faamaamulu, ua latou aloese mai puapuaga. … O nei tagata ua faitau i talafaasolopito, pe afai o lea, pe afai ua latou faia; latou te le iloa atu le aao o le Atua i galuega a tagata, aua ua vaai i latou i mata o le tagata ae le o mata o le faatuatua. Ua aveesea le tetee uma mai ia i latou—ua latou le toe ta’ua le Atua. Ua latou le oofu i ofutau atoatoa. A aunoa ma lena o le a faatoilaloina i latou i le fefe ma le matau, ma ua magoto i latou. O tagata faapea, e manatu o mea uma lava e aumai ai puapuaga ua talafeagai lea. I le avea ai ma Au Paia a le Atua, o lo tatou tiute le tutumau e ui ina lofituina i tatou i le tiapolo.⁷

Afai ua faia se faaiuga a se tagata e lafoai i le lalolagi ma mea sese ma agasala, ma faailoa atu o ia faatasi ma tagata o le Atua, o e o loo tauemua e le tiapolo i mea uma lava, e manaomia le lototoa, tulaga faatamatane, tutoatasi i uiga, atamai silisili, ma le agaga finau e lē masani ona i ai i le tele o tagata; aua o le tagata ua aloese mai le tulaga e tauvalea ai, mai le tulaga e le maua ai so latou viiga ma le fiafia, mai se tulaga e faaleagaina ai le mamalu ma le igoa tauleleia.⁸

Ia avea le agaga o lenei talalelei e faamauina i lou loto ina ia ui lava ina ou ola ai i le mativa, pe faaosoosoina, sauaga, poo le oti, o au ma lo’u aiga e auauna i le Atua ma tausi i ana poloaiga. Peitai, o le poloaiga lena o le a faamanuiaina outou ona o lo outou usiusitai. E faamamaluina e le Atua i latou e faamamaluina o ia, ma manatua i latou o e manatua o ia. O le a ia faatumauina ma talia i latou o e talia le upumoni ma faatuatua i ai. Ia fesoasoani mai le Atua ia i tatou, o lea, ia faatuatua i le upumoni, i le asō ma le faavavau.⁹

E mafai ona avea i tatou o ni fitafita totoa i le galuega a Keriso.

A o ou faalogologo i nisi o le Au Uso i le aoauli nei sa taitaiina au ou te toe tepa i nisi o a matou uo ua maliliu. Pe a vaai atu i tua ma manatunatu ia Peresitene Iaga, Heber C. Kimball, Williard Richards, George A. Smith, Orson Pratt, Parley Pratt, Peresitene John Taylor, Erastus Snow, ma le afe o le Au Paia faatuatua ma le totoa a le Atua o e na tiga i sauaga i Ohio, i Misuri, ma Ilinoi, ma tulia ese mai i o latou aiga i le tele o taimi, ae mulimuli ane ua i le vaomatua, e aunoa ma se malamalama, sei vagana ai le folafolaga a le Agaga Paia i o latou loto, o le a latou le maua se nofoaga e malolo ai o latou vae ua vaivai—ua tuliesea mai o latou aiga, nuu, ma a latou uo, ma se faamoemoega laitiiti i le lalolagi, e tusa ai ma le malamalama o tagata poo le muai malamalama, pe oo i se nofoaga e malolo ai, ae o le a latou sasavali atu i nuu lafulafua ma le vaivai o a latou laa, ae peitai e le faamaluelueina le talitonuga i le Atua ma lē faavaivaia le faatuatua i lana upu— ao matou vaai atu i tua ma manatunatu i na tulaga e le mafai ona galo ia i matou alii ma tamaitai faatuatua na malaga mai ai. Sa le i matelaina i latou i le ala, e lei toe foi i uiga tuai, e lei liliu ese mai le upumoni. O le faigata o tofotofoga ma puapuaga, o le sili atu foi lena ona faigata o le malaga, o le ogaoga o le faafitauli, o le faateleina foi lea o le tutumau ma le faamaoni o i latou.¹⁰

Sa ou auauna mai lo’u talavou faatasi ma alii e pei o Polika Iaga, Heber C. Kimball, Williard Richards, George A. Smith, Jedediah M. Grant. Daniel H. Wells, John Taylor, George Q. Cannon, ma Wilford Woodruff ma e na latou galulue faatasi, ma Lorenzo Snow ma i latou foi na latou galulue faatasi, o aposetolo e toasefululua, o fitugafulu, ma faitaulaga sili i le Ekalesia a Iesu Keriso o le Au Paia o Aso e Gata Ai i le sili atu i le 60 tausaga; ma, ina ia lagona mai la’u upu i le malosi e oo atu i ai lou leo, e tagata uma ou te lē masani ai, ou te fia molimau atu ia te outou o ni alii e sili atu nai lo i latou nei e lei soifua mai i le taimi o lo’u iloa. E mafai ona ou molimau atu ai aua sa ou masani ma nei alii, sa matou ola ae faatasi ma i latou a o laiti, sa galulue faatasi ma i latou i aufono, i le tatalo ma le faatauanau, ma femalagaai mai lea nofoaga i le nofoaga i totonu o lo tatou atunuu nei, ma le sopoia o fanua lafulafua. Sa ou faalogo ia i latou i nofoaga faapitoa ma nofoaga faitele, ma ou te molimau atu ia te outou o i latou o tagata o le Atua, o alii faamaoni, o alii mama, o alii taua a le Atua.¹¹

O tatou tuafafine nei ua galulue i le galuega a le Aualofa. … O i latou o tuafafine ua fesootai ma le sosaiete o le Mutuale mo le Alualu i luma, ma o i latou foi ua fesootai atu i le galuega a le Peraimeri ma manaoga o le Aoga Sa. … Ua ia i latou a tatou faamanuiaga, aua ua tuu atu ia i latou lo tatou faatuatuaga. Ua tatou talitonu ua latou iloa le upumoni e i latou lava ma ua latou lē faalagolago i le molimau a isi. Tatou te iloa o lo latou faamaoni e le fesiligia; tatou te iloa e alolofa i latou i le Atua ma le upumoni ma e sili atu lo latou alolofa i le galuega nai o latou lava manaoga faaletagata. Matou te iloa le toatele o i latou, ma e matou te iloa o o latou lagona nei. Matou te alolofa ia i latou; ua ia te i latou la matou faaaloaloga, lo matou faatuatuaga atoa; o le a i ai faamanuiaga a le Alii ia te i latou.¹²

O tuafafine o le Aualofa, e toaaga ma fesoasoani i taimi uma, latou te i ai pea i taimi uma e manaomia ai le fesoasoani, e fesoasoani i e matitiva, faamafanafana i e faataotolia, asiasi i e ua oti a latou tane ma e ua leai ni tamā, ma malaga i le tele o nofoaga mamao ma tuuina atu ia aoaoga taua.¹³

O Peresitene Heber C. Kimball o ia o se tasi o auauna faamaoni a le Atua. Tutumau e pei o se sila i mea uma. Ia mama e faapei o auro faamamaina. E le mata’u i le fili poo le oti. E naunautai i lagona, tumu i le agaga o perofeta. E musuia e le Atua. E malosi i le molimau ia Keriso; o se uo e lē solomuli ma o se molimau i le valaauga paia ma le misiona a Iosefa Samita. Sa valaauina o ia i le alofa tunoa o le Atua, sa faauuina e lē o loo soifua ma ua i ai le pule, ma sa soifua ma maliu o se aposetolo a le Alii o Iesu Keriso.¹⁴

Ou te talitonu o le au uso o le Toasefululua ua i ai i o latou valaauga, ma faia o latou tiute, ua tulai malosi mo le faaalualuina i luma o le malo o le Atua, ma e ua loto gatasi i o latou manatu ma galuega mo le atinaeina o Siona. … Ua agavaa i latou mo le faatuatuaga o le Au Paia, ua toa la latou molimau mo le upumoni, ma ua faamauina ma mataala i lo latou vaavaaia lelei o mea e manaomia mo Siona.¹⁵

O lenei, ia faamanuia le Atua ia te outou. Ia i ai le filemu i o outou loto, ma le alofa o le upumoni ia fusia ai outou. Ia tutumu outou loto i le alofa i outou ala uma. Ia outou ola i le sao ma le faamaoni i luma o le Alii, ia tumau le faatuatua, ma ia totoa i le molimau ia Iesu Keriso; aua o lē ua toa o le a maua lona taui. Ia faamanuia le Atua ia te outou, o la’u tatalo lea i le suafa o Iesu, Amene.¹⁶

Fautuaga mo Suesuega

O le a le uiga o le toa i le molimau ia Keriso? E faapefea ona tatou faaalia i o tatou olaga o aso uma le naunautai ina ia faamaoni i o tatou talitonuga ma lo tatou Atua?
Aisea o le ekalesia a Keriso “e le o se ekalesia ua na o se Aso Sa”? E faapefea ona tatou aoao atu lo tatou talitonuga i a tatou fanau “mai o tatou loto i o latou loto ma o tatou lagona i o latou lagona”?
E faapefea e i tatou o uso o le Ekalesia i nisi o taimi tatou te taumafai ai e “faata’uta’ua” le talalelei “ae faamamasagia ai mataupu faavae”?
E faapefea ona tatou faaalia lo tatou taliaina pe onosa’ia foi manatu o isi tagata ma a latou aga e aunoa ma le lafoaiina o lo tatou faamaoni i mataupu faavae?
E mafai faapefea ona tatou aoao atu i isi, e aofia ai ma a tatou fanau, mataupu e pei o le lototele, faamaoni i mataupu, ma le ola lototoa i le talalelei?
O a nisi o auala sa faaalia ai le toa o le molimau a uluai taitai o le Ekalesia? O le a se aoaoga mo i tatou e uiga i le lototele ma le toa mai soifuaga o nei taitai?
O le a le “lototele o le faatuatua”? O anafea na e faaalia ai lenei lototele i taimi o le tetee?
E faapefea ona tatou lototoa i le faataunuuina o o tatou valaauga i le Ekalesia?
O a faamanuiaga e oo mai ia i tatou ma o tatou aiga ona o lo tatou ola lototoa i le talalelei? (Tagai foi i le MFF 14:7.) O a taunuuga e faavavau mo i latou e palaaai i le talalelei a Iesu? (Tagai foi i le MFF 76:79.)

Apostle Paul writing — *Tusitusiga a le Aposetolo o Paulo*, tusia e Robert Barrett. Na saunoa mai Peresitene Iosefa F. Samita o Paulo sa “saisaitia, ma sa faatalitali o ia i le oti, ae sa toa pea o ia. O lona toa o le toa o le faatuatua.” (*Mataupu o le Talalelei*, 119).