Malumalu Paia o le Alii

I malumalu paia tatou te faia ai sauniga o le faaolataga mo e o soifua ma e ua maliliu ma osia ai feagaiga e ao ona tatou faamaoni i ai i aso uma tatou te ola ai.

Mai le Soifuaga o Iosefa F. Samita

I le sauniga o le faapaiaga o le Tapeneko o le Siteki o Uintah i Vernal, Iuta, ia Aokuso 1907, sa saunoa ai Peresitene Iosefa F. Samita i le Au Paia na potopoto ai e faapea o le a le ofo o ia pe afai o le a i ai se aso e fausia ai se malumalu i le nofoaga o loo latou i ai.¹ Ia Novema 1997 sa faapaiaina ai le malumalu ua toe faafouina ma taua o le Malumalu i Vernal, Iuta, o le malumalu lona 51 o le Ekalesia.

O le soifuaga o Iosefa F. Samita ma ana aoaoga sa fusia vavalalata ma galuega faale-malumalu. O lona soifuaga sa amata mai Navu i le taumalulu o le 1845–46 ao “galulue malosi i le galuega sa faia i le malumalu” ia lona tina ma lona tuafafine o Mercy R. Thompson. Mulimuli ane na saunoa Peresitene Samita, “O iina na faamauina ai le fanau a lo’u tama i o latou matua.”² Sa i ai o ia i le faataatiaina o le maa tulimanu o le Malumalu i Sate Leki i le 1853 ma le faapaiaga o le malumalu i le 1893. I le sauniuniga mo le faapaiaga, sa ia saunoa ai: “Mo le fasefulu tausaga o faamoemoega, manaoga, ma naunautaiga o le Ekalesia aoao sa taulai atu i le faamaeaina o lenei fale tele.. … O lea ua maea ona fausia le galuega tele ma ua saunia mo lona faaaogaina mo faamoemoega paia, e tatau ea ona tatou faapea ifo ua tatou latalata i se gaioiga o lona faaaogaina ia i tatou o tagata, o se tulaga tatou te maua ai lona faatulagaga maualuga?”³ Sa ia galue o le Peresitene o le Malumalu i Sate Leki mai le 1898 seia oo i le 1911, o le iva o na tausaga sa avea ai o ia ma Peresitene o le Ekalesia.

Sa auai Peresitene Samita i le faapaiaga o Malumalu i St. George, Logan ma Manti. I le 1913 sa ia faapaiaina ai le nofoaga mo le malumalu lona ono a le Ekalesia i Cardston, Alberta, i Kanata; ma i le 1915 sa ia faapaiaina ai le fanua i lona atunuu-fai faapelepele, o Hawaii, mo le uluai malumalu i fafo atu o Amerika i Matu. Sa ia silafia foi, o le Ekalesia faatoa tau amata i le fausia o malumalu: “Ua ou muai vaai atu i le tulaga moomia o nisi malumalu. … e faapaiaina i le Alii mo le faia o sauniga o le maota o le Atua, ina ia maua ai e tagata le manuia o le maota o le Alii e aunoa ma le malaga i le faitau selau o maila mo lena faamoemoe.”⁴

Aoaoga a Iosefa F. Samita

O Malumalu e mo le faia o sauniga paia mo le faaolataga.

Ua tatou i ai i le faataunuuina o galuega faale-malumalu. Ua tatou fausia malumalu e fa i lenei laueleele, ma ua tatou fausia malumalu e lua i le itu i sasae ae tatou te le i o mai iinei. I le soifuaga atoa o le Perofeta o Iosefa Samita sa fausia ai se tasi o ia malumalu e lua ma faapaiaina, ma sa fausiaina le faavae o le isi malumalu ma le tino o le fale, ae tagatavaleina loa o ia. Sa mae’a ona o taumafaiga a tagata sa faia i se vaitaimi e sili ona faigata, i le mativa, ma sa faapaiaina lava mo le Alii. Sa faataunuuina ai sauniga o le maota o le Atua iina e faapei ona sa aoaoina ai ia taitai o le au pulega a le Ekalesia e le Perofeta o Iosefa Samita lava ia. … O le talalelei lava lena o loo tumau i le asō, ma o sauniga foi lava ia o loo faataunuuina i aso nei, mo e soifua ma e ua maliliu, e pei ona faataunuuina e le Perofeta lava ia, ma tuuina atu e ia i le Ekalesia.⁵

Matou te faamoemoe e vaai atu i le aso o le a i ai ni o tatou malumalu ua fausia i vaega eseese o le laueleele i nofoaga o loo manaomia ai ina ia faafaigofie mo tagata; aua ua tatou iloa o se tasi o matafaioi sili ua tuuina mai i tagata o le Atua i aso nei o le uunai atu lea o o latou loto i o latou tama, ma o le a latou faia galuega e tatau ona fai mo i latou ina ia faatasia ai i latou i le faatasiga o le Feagaiga Fou e Faavavau mai lea augatupulaga i lea augatupulaga.⁶

E le tatalaina le malumalu i tagata lautele. E mo le faia o sauniga paia, o le faamoemoega mo le faaolataga o e o loo soifua ma e ua maliliu. O sauniga faavae e i ai le papatisoga, faaeega paia, faaipoipoga, faamauga. … O le tele o lenei galuega, mo i latou ua maliliu, o se sauniga e suitulaga ai e o ola mo e ua maliliu. O le i ai o tagata o le Au Paia, ua i ai foi ma le faamoemoe mo le faaolataga mo i latou ua tuua lenei olaga e aunoa ma le usiusitai i le talalelei, pe afai latou te usiusitai i ona faatulagaga i le isi lalolagi, o le nofoaga mo agaga ua tuua lenei olaga. O le a talaiina le talalelei ia te i latou e auauna a le Alii ua ulufale atu i le parataiso, ma o i latou ua molimauina le faatuatua ma salamo ai iina e mafai ona faia le papatisoga mo i latou iinei, ma maua ai foi isi talaiga i lea lava tulaga, ina ia faaeaina ma faamamaluina i latou i le iuga.⁷

E leai se tasi e ulufale i le malo o le Atua sei vagana le faitotoa ma le tulaga ua ofoina mai e Iesu Keriso i fanau a tagata. … E leai se tagata e soifua mai i lenei lalolagi ma e ua maliliu e solaese mai le avanoa e faalogo ai i le talalelei a Iesu Keriso. Afai latou te maua ma usiusitai i ai, o le a faataunuuina ia sauniga o le talalelei mo i latou, e o latou aiga, poo a latou fanau i ni augatupulaga fai mai pe a mavae i latou, ina ia faataunuuina ai tulafono ma faatulagaga uma o le talalelei a Iesu Keriso, ma o tautinoga ma sauniga o le a faataunuuina mo le faaolataga o e ua soifua faapea foi ma le faaolataga o e ua maliliu.⁸

O le mea lea, e leai se alii ma se tamaitai, o tagata o le Au Paia, ua le mafai ona iloa le taua o sauniga o le Maota o le Atua, o le lē usiusitai i faatulagaga o le talalelei i ona tulafono ma sauniga uma, o le a leai se malamalamaaga lelei o le galuega tele ua valaauina ai tagata o le Au Paia e faia i lenei vaitau, e na te le maua foi le faamanuiaga e oo mai ona o le usiusitai i le tulafono e maualuga atu nai lo tulafono a tagata.⁹

Ia aua nei manatu māmā se tasi i sauniga o le maota o le Atua.¹⁰

Ua tatou le ola mo na o ni nai tausaga faigata ua tatou i ai i lenei lalolagi, ae mo lena olaga ua leai sona iuga; ma ua tatou naunau ina ia tatou maua faamanuiaga uma i nei tausaga e tele o le faavavau, ae peitai, seia vagana ua faamaonia mo i tatou e lena mana o le faamauga sa tuuina atu e le Alo o le Atua i le Aposetolo o Peteru, e le mafai ona tatou maua. Seia vagana ua tatou faamauina i luga o lena mataupu, i le olaga a sau o le a leai so tatou tama, tina, uso, tuafafine, ava, fanau, poo uo, poo le mauoa, poo le mamalu, mo “folafolaga, feagaiga, faamauga, tiute, tautoga, tautinoga, sootaga ma mafutaga,” uma faalelalolagi [tagai MFF 132:7] ua faaumatia i le tuugamau, seia vagana i latou ua faamauina ma faamaonia e le mana o le Atua.¹¹

Ia tatou ulu atu i le malumalu ma le naunautaiga faamaoni e faia le finagalo o le Atua.

O se tasi o alii. … na sau ma lona pepa faataga mai le epikopo… ma talosagaina se faatagana e papatiso ai mo nisi o ona tagata ua maliliu, ma ina ua ia sau ma le faatagana sa’o, sa ia maua ai lena avanoa. Sa papatisoina o ia mo ona tagata maliliu. Ma sa faatagaina o ia e alu atu ma faataunuuina isi sauniga mo i latou. O le taimi lava na mae’a ai le galuega, sa ia faasalalauina loa lona naunautaiga e alu ese mai le Ekalesia. O lenei, sa ou fiafia i lena lava alii, aua sa ia naunautai e faia mea uma lava mo ana uo ua maliliu a’o le i aveesea e ia le avanoa e faataunuu ai. E mafai ona faapea mai se tasi, “e talia lena galuega e le Alii?” Atonu e mafai, e tusa ai ma i latou ua maliliu, ua faamauina le lipoti ma sa faataunuuina le sauniga e tusa ai ma le tulafono ua faatulagaina e le Atua. Sa faia mea uma lava i le ala e tatau ai, ma e sa faia i le taitaiga a le pule e tatau ai o lea aisea o le a le sao ai e tusa ai ma e ua maliliu? Ae e fia ni togi o le a maua e lena alii ona o le mea sa ia faia? E le tele tele. “Aua se a le aoga i le tagata, pe afai na te maua le lalolagi, ae maumau ai lona ola?” [Mareko 8:36.]

O le faatatauina o lenei mea mo le tagata ua saili e maua le avanoa i le maota o le Alii i se tulaga sese, o lenei: O tagata ua taumafai e taufaasese i le Atua e ala i le faafoliga o tagata moni ia, ina ia mafai ai ona latou faagaoi i avanoa ma faamanuiaga mai le maota o le Atua, o le a le faamanuiaina. Afai tatou te naunau ina ia maua faamanuiaga ma sauniga i le maota o le Atua, ia tatou mauaina ma le loto faamaoni, ma ia tatou ulufale atu i le maota ma le naunautaiga faamaoni e faia le finagalo o le Atua i nei mea uma, e le na o se taimi, ae faia e pei ona ia poloaiina ai i tatou i aso uma o lo tatou olaga. A tatou tumau i le fiafia i le agaga sao, o le a tumau nei faamanuiaga ma i tatou, ma o le a faailoaina e le Atua i tatou o ana fanau; ae se’i vagana ua tatou o ese mai le ala sa’o ma faatamala e faataunuu o tatou tiute, o le a aveesea ai e le Atua lona agaga mai ia i tatou ma tuua ai na o i tatou lava.

Afai ou te lagona i lo’u loto ua ou sese i se tasi o o’u uso; pe ua le usitai i se tasi o tulafono a le Atua; po ua ou le faamamalu i se tasi o le Ekalesia, poo se alii ua pulefaamalumalu ia te au i le Ekalesia a le Atua, e ao ona ou lagona o lo’u tiute le alu ma faasa’o ae ou te le’i alu i le maota o le Alii. … Afai ua ou faia ia te oe se mea sese, afai ua ou aveesea mai te oe se aia tatau; poo ua ou le faamaoni i la’u folafolaga ia te oe; poo ua ou faia se mea i soo se tulaga ua faamaualaloina ai au mai le silafaga a le Atua poo ou uso, e ao ona ou alu ma faia le faaleleiga ae ou te le’i taumafai ou te alu i le maota o le Atua. Ae peitai ou te le manao e faia lenei ona o le faamoemoe e alu i le maota o le Atua. E tatau ona ou manao e faia lea aua o lo’u tiute le faia o lea mea; ma ina ia mafai ona ou agavaa e alu ai iina, ma tulai ai i soo se taimi i nofoaga paia i luma o le Alii, e ao ona faia o mea sa’o uma ma soo se uso ua ou sese ai.

E ao ona ou faaali atu le faaaloalo i e ua tatau i ai le faaaloalo. E ao ona ou ava i le Atua lo’u Tama oi le Lagi, nei, mai le taimi nei, le lumanai ma le faavavau. O le mataupu lena e tatau ai ona ou faia le sao, faia ai le faaleleiga ma foia ai faafitauli. Ua ou faalogo i uso ua faatasitasi aiga, ma faia faamauga o feagaiga fou e faavavau, ae ua feeseeseai ma isi, faatasi ma le loto tiga, o le tasi i le isi, ma ua leai lava se tasi e loto maualalo e alu atu ai i le isi ma tautau atu ona sese, poo le faia o se faaleleiga, ua faatupu teleina ai vaivaiga o lona tuaoi, ma ua lē faatonutonuina ai ona lava faaletonu ma vaivaiga. Ae peitai… afai ua teena le avanoa e malaga atu ai i le maota o le Atua, ona latou faapea lea ua matua sese tele lenei mea ua fai ia te i latou.

Ae sei ou fesili atu ia te outou, O nei ea alii ua agavaa e o iina? E mafai ea e se tagata ua tiga lona loto i lona tuaoi, ua ia le faamagalo ia te ia poo ua lē saili foi e fai se faaleleiga, ona agavaa e ulu i le maota o le Atua? Ma e le mafai ona e faafiti ia te ia. O le a faitau selau i latou e o iina i lenei tulaga, e ui lava i mea uma ua tatou faia ma tautala i ai. Pe mafai ea ona latou faamoemoe o le a faatasi le Atua ma i latou, ma o le a susulu Lona mamalu i o latou luga? Aua nei outou faa’ole’ole ia te outou lava. Afai tatou te agavaa, o le a faaali mai e le Atua Ia lava ia i tatou. Afai tatou te saunia, o le a tatou vaai ia te Ia e pei ona i ai o Ia, ma o le a tatou iloa o Ia, ma o le a iloa foi i tatou e pei ona i ai i tatou. Ae e le mafai, seia vagana ua tatou agavaa.¹²

Ia faamaoni i feagaiga ua outou faia i le maota o le Alii.

E tusa ai ma lo tatou faatuatuaga, poo a tatou feagaiga e faavavau, e leai se feutagaiga tatou te fai, poo mataupu e fesuiai; e mafua mai le Atua ma o loo faavae i luga o le papa o augatupulaga e faavavau; o le a ola i latou ma tumau pea pe a soloia ma pala ia mālō, o pulega ma atunuu; o le fesoasoani a le Silisiliese o le a tatou puipuia ai le paia o a tatou feagaiga ma faatumauina o tatou naunautaiga ma faamaoni i lo tatou Atua, ao i ai le taimi nei poo le faavavau.¹³

O lenei, ia faamanuia outou e le Alii, ma i le suafa o le Alii ou te faamanuia ia te outou—I lenei faalapotopotoga, o tagata o le feagaiga a le Alii, ma e faamaoni e faapei o Isaraelu anamua o tagata o le feagaiga a le Atua, aua ua outou ulufale atu i le feagaiga paia o le Talalelei a Iesu Keriso, o le a outou tausi i poloaiga a le Atua, o le a outou aloese mai le tiapolo ma le agasala. Ua outou iloa mea ua outou fai, ua outou iloa le natura o feagaiga ua outou faia i luma o le Atua ma molimau ma luma o agelu o le lagi; ma, o lea, ua outou osia ai le feagaiga fou e faavavau ma o outou o tagata o le feagaiga o le Atua i aso e gata ai.¹⁴

E pei ona fesoasoani le Alii ia te au i aso ua mavae ina ia ou faamaoni i a’u feagaiga, ua ou osia ma Ia ma outou, … o lana fesoasoaniga ma ana faamanuiaga ou te folafola ai o le a ou faamaoni i lo’u olaga uma i le lumanai, pe faaumiumi lo’u ola pe puupuu; e le afaina ia te au. A o ou ola, ou te faamoemoe e avea o se tagata moni, o se tagata faamaoni, o se tagata sa’o i le va feagai ai ma isi, atoa ai ma le avea ma se e mafai ona tu i luma o le Atua, o lē faamasino i e o ola ma e ua oti, ma le le fefe mo mea na ou faia ai i le lalolagi.

… Ou te tatalo ina ia outou faamaoni ia outou feagaiga; ia faamaoni i feagaiga sa outou osia i le vai o le papatisoga, i feagaiga sa outou osia i le maota o le Alii, ma faamaoni i tiute amiotonu uma ua oo mai ia te outou. I le avea ai o ni tagata o le Au Paia, o alii ma tamaitai e ao ona avea o ni tagata mafaufau, ma galulue; o ni alii ma tamaitai e manatunatu loloto, o ni alii ma tamaitai e faautauta i le taialaina o o latou soifuaga ma mataupu ua latou aoaoina. E le mafai ona avea ni alii ma tagata faamaoni o le Au Paia sei vagana ua latou suesue ma malamalama, i mataupu o le talalelei ua latou maua. … Pe a malamalama tagata i le talalelei a Iesu Keriso, o le a outou iloa ua latou savavali i le ala sa’o, e tusa ai ma le finagalo o le Alii, ma tulafono a le Atua, faamaoni e tusa ai ma mea e tonu, sa’o, amiotonu, ma i ona tulaga uma e talia e le Alii, o lē ua talia na o mea ua tonu ma lelei i Lana silafaga; aua ua na o mea tonu lava e fiafia i ai o Ia.¹⁵

Fautuaga mo Suesuega

Aisea tatou te fausia ai malumalu? O a faamanuiaga tatou te maua pe a tatou auai i le malumalu ma tausia feagaiga ua tatou osia iina? (Tagai foi MFF 109:10–23.) O le a sou lagona pe a e auai i le malumalu?
O a ni auala i nisi o taimi e “manatu māmā ai tagata i sauniga o le maota o le Atua”?
O le a le uiga ia te oe o le “maua o faamanuiaga uma i nei tausaga e tele o le faavavau”? E faapefea ona fesoasoani ia sauniga o le malumalu ina ia tatou faia ai nei mea? E faapefea e le auai i le malumalu ona fesoasoani tatou te mafaufau ai i le “uiga paia loloto o le faavavau”? (MFF 43:34).
O le a le uiga o le agavaa e malaga ai i le maota o le Atua? O a tatou mea e fai ina ia lava saunia ai i tatou lava e auai i le malumalu? Aisea tatou te le “aveesea ai avanoa ma faamanuiaga mai le maota o le Atua”?
O le a sou lagona i mea e manaomia mai ia te outou ina ia faamaoni ai i feagaiga ua outou osia i le malumalu?
O a ni mea tatou te fai ina ia faataunuuina ai le lu’i a Peresitene Samita ina ia avea o ni tagata “mafaufau, ma galulue”?
E faapefea ona tatou faaali atu le ava i le maota o le Atua? E faapefea ona fesoasoani matua ia latou fanau e aoao ina ia faamamalu i malumalu?

Vernal Utah Temple — O le Malumalu i Vernal Iuta. I le 1997, sa faafouina ai le Tapeneko a le Siteki o Uintah ma avea ma Malumalu o Vernal Iuta.