Ia Tatou Faatoilaloina i Tatou Lava

O le fiafia e faavavau e le sau mai le faamalieina o o tatou manaoga faaletino poo le fiafia faalelalolagi, ae mai le loto mama, mama o le olaga, ma le usiusitai i tulafono a le Atua.

Mai le Soifuaga o Iosefa F. Samita

I le taimi o lana taitaiga mai le 1901 seia oo i le 1918, sa matua popole tele Iosefa F. Samita e uiga i le oo mai o aafiaga faale-lalolagi i olaga o tagata o le Au Paia. E lē faapea na pogisa o ia i le lalolagi o loo siosiomia ai o ia. Sa ia iloa le lē mama, sa ia faalogo i upu masoa, ma sa ia faanoanoa i le tele o faiga taatele na i ai. Sa ia uunaia le Au Paia e faaaoga le loto pulea o le tagata lava ia e faafetaia’ia ai nei aafiaga ma ia ola ai i o latou soifuaga i le amio mama, loto mama, ma le lē pona.

O le taua o le faatapulaaina o faafiafiaga mo le Au Paia ma faatasiga faapasi taimi ma le leaga o le gagana masoa, petipetiga, muimui, ma le le mama o mataupu uma ia sa ia saunoa i ai. Ia Setema 1916 sa auina mai ai e le Au Peresitene Sili se tusi i faalapotopotoga o ausilali o le Ekalesia sa faapea mai ai “o loo i ai se manaoga maualuga o le faaleleia ma le faafouina i totonu o o tatou tagata talavou, aemaise ai lava i le tulaga o laei ma ituaiga mea faafiafia o loo latou faia” ma tuu atu ai se lu’i i nei faalapotopotoga e faia se tulaga faaleleia i nei mataupu.¹

Ao tuuina atu faatonuga i nei faalapotopotoga, sa ia silafia foi o le “aafiaga i le aiga … i luga atu o isi mea uma, e ao ona taitai i le suiga o uiga, faatasiga ma laei. O le aiga e ao ona taitai i le galuega o loo faia e faalapotopotoga ua na o ni ausilali i le aiga.”²

Sa ia lapata’i mai: Tatou te mauaina lo tatou fili muamua i totonu o i tatou lava. O se mea lelei le aveese muamua o lena fili ma ia tatou usiusitai i le finagalo o le Tama, ma ia usiusitai atoatoa i mataupu autu o le olaga ma le faaolataga ua ia aumai i le lalolagi mo le faaolataga o tagata.”³

Aoaoga a Iosefa F. Samita

Sei o tatou mulimuli i le Faaola e ala i le puleaina o tatou lava.

E foliga mai ia te au o le faataitaiga sa faia mo i tatou e lo tatou Faaola o le faataitaiga lea e ao ona tatou saili e mulimuli ai. Pe sa Ia [faaaoga sese ea] lona atamai mo le faamalieina o le manao o le tino? Pe sa ia faia ea o mea lelei—faamalolo i e mamai, faapupula i tauaso, faatautala gugu, faalagona tutuli, faamama lepela, faamagalo agasala, faaitiitia le popole? Pe le o faataitaiga ea ia sa ia faia mo le lalolagi? E le o le ala lena sa ia poloaiina ai ona soo e mulimuli ai? Ou te manatu o lena. E i ai se mea i lena ala e viia ma maualuga. O le a ia aumaia le mea moni ma le fiafia e faavavau; ao le fiafia o le lalolagi ua na o sina taimi puupuu.⁴

E leai se tagata ua saogalemu seia ona pulea ia lava; e leai se pule saua e sili le leai o se alofa poo le faanoanoa nai lo se tuinanau lē mataofiofia. O le a tatou maua afai tatou te tuu atu i le mana’olasi o le tino ma mulimuli ai, o le a matua oona matuitui le iuga, faamanualia ma faanoaona, e le gata i le tagata ae faapea foi le nuu. E tiga i le avea ai ma se faataitaiga i isi ae faapea foi aafiaga mo le tagata lava ia, e matautia ma tiga i e lē faautauta; ae o le faafitia o nei tuinanauga… ma se musumusuga mo se mea viia; i soo se taimi e mafai ai, o le faia o mea lelei mo o tatou uso a tagata, e faamoemoe i le lumanai, e faaputuputu oa i le lagi, e leai se mogamoga ma se ele e faaleagaina ai, e leai foi se gaoi e gaoi ai [tagai Mataio 6: 19–20]—o nei mea uma o le a oo mai ai le fiafia e faavavau; fiafia mo lenei lalolagi ma le lalolagi o le a sau.⁵

Aua o la’u vaega ou te le fefe i le faatosinaga a o tatou fili mai fafo, e pei ona ou mata’u i le fili mai totonu. O se fili e vaaia ma e lē ufitia, tatou te vaai ma feiloai i ai i le malae taalaelae, e faalē tele se mata’u i ai nai lo le fili lilo, taufaasese, ma le matautia o loo lafi i totonu ia i tatou, e pei o le tele o vaivaiga o le natura faaletagata, o le tele o taimi ua faataga e alu e aunoa ma le siakiina, ua ufitia ai o tatou mafaufau, ua taitaieseina ai lo tatou alofa mai le Atua ma lana upumoni, seia faaleagaina le faavae o lo tatou faatuatua ma faamaasiasi i tatou i luga atu o le faamoemoe mo le togiola, i lenei lalolagi poo le lalolagi o le a oo mai. O fili nei tatou te tau, o mea aupito sili ona matautia ia tatou te fetaua’i i le lalolagi, ma e sili atu ona faigata ona faaumatia. O i latou o fua o le valea, e afua mai i le agasala ma mea leaga fatufatua’i i o tatou lava loto. O la tatou galuega o le faatoilalo lea o o tatou lagona malolosi, ia faatoilalo o tatou fili mai totonu, ma ia vaai ua sa’o o tatou loto i le silafaga a le Alii, ma ia leai se mea e faanoanoa ai le Agaga ma taitaiina ese ai i tatou mai o tatou tiute.⁶

E toatele i latou ua sili atu le fiafia i mea faafiafia ma tuinanau nai lo le fiafia i le Atua. Ua latou fiafia i tuinanauga o le tino, o le faamalieina o o latou manao, ua i ai manaoga faatama’i, ua ola i le leaga, o amioga lē talafeagai, o patī ma faafiafiaga mataga. E toatele tagata latou te le iloa pe faapefea ona fiafia, latou te le iloa pe faapefea ona faaaoga faamanuiaga ua aumaia e le Atua mo i latou. Afai ua latou maua le lalolagi uma, o le a latou faaaoga lea mo le faamalieina o o latou manao, mo lo latou lava faatafunaga. Ae afai ua ia i latou le agaga sa’o, o le a latou saili e faaleleia le filemu ma le fiafia o tagata soifua ma faalautele atu le aafiaga o le Talalelei o le malamalama ma le upumoni i le lalolagi uma. O le a latou fiafia i le amio mama, loto mama, faamaoni, mafaufau manino, ma le amiotonu.⁷

O faafiafiaga e lē o le faamoemoega lea o le olaga ae ua na ona faafelanulanuai ai.

Tau mai poo a faafiafiaga e sili ona outou mananao i ai ma pe o a outou faafiafiaga ua avea ma mea e puleaina o outou olaga, ona ou ta’u atu lea o ituaiga o tagata e i ai outou.⁸

O a tatou faafiafiaga e ao ona faavasegaina e faatatau i lo latou aoga mo tagata uma. E tatau ona i ai so tatou manatu i le uiga o i latou ua tatou faatasi atu i ai i nofoaga mo faafiafiaga; ma e ao ona pulea i tatou e se lagona maualuga o matafaioi i o tatou matua, o a tatou uo ma le Ekalesia. E ao ona tatou iloa o faafiafiaga ua tatou faia, ua talia ia e le Alii. … E ao ona aloese i faafiafiaga sei vagana ua talafeagai ma le siosiomaga o tagata, ia talafeagai ma lelei atoatoa, e lē fesiligia le amiolelei o paaga ma ta’uleleia nofoaga ma pulea leleia lagona.

E i ai le faatulafonoina o a tatou faafiafiaga i luga atu o mea e le saogalemu ona tatou o i ai. E tatau ona puipuia uiga ma ia faaitiitia le faia soo ina ia taofia ai le soona faia. E le tatau ona latou avea uma lo tatou taimi, pe faaalu ai foi se vaega tele o lo tatou taimi; ioe, e ao ona faia o ni vaega e faatumuina taimi o o tatou tiute ma galuega o le olaga, ae ia aua lava nei avea o se mea e lima taitaiina ai o tatou faamoemoega ma naunautaiga.⁹

O mea uma e soona fai e maimau pe faaleagaina. O faafiafiaga e lē o le faamoemoega lea o le olaga, e ao ona faia mo se isi foi suiga. Afai ua fai ma amio a tagata le faifai pea o faafiafiaga, o lona uiga ua galo le faamoemoega moni o le i ai o le tagata ma o le a inosia ma itagia tiute.¹⁰

Ia tatou ola i le mama, aloese mai le soona fai, ma tuu le agasala.

O le palauvale ma upu masoa o ni agasala mataga i le silafaga a le Atua.

E tatau ona tatou taofia le palauvale ma le fai upu masoa, ma mea uma faapena o loo i ai ia i tatou; aua o nei mea uma e le talafeagai ai ma le talalelei ma lē tusa ai mo tagata o le Atua.¹¹

O le gagana, e faapei o mafaufauga e i ai lona uiga ma e manatua e le mafaufau i le auala e le manaia pe afai e le matautia ia i latou ua faalogo i nei upu lē faaaloalo. O mafaufauga lava ia e le tatau ai e mafai ona faaeaina pe faatoilaloina e le gagana e faaaogaina e faamatalaina ai. Afai o ni faamatalaga e le lelei e tatau ona taofia, o le a le mea e faamatala ai le palauvale?¹²

O nisi o tagata talavou. … ua fai ma mausa po o amio, le faaaogaina o upu masoa ma le palauvale… e le gata ina faatiga ai i tagata aoaoina lelei, ae o se agasala inosia foi i le silafaga a le Atua, ma e le tatau ona i ai i fanau a tagata o le Au Paia.¹³

Ou te faapea atu i tina ma tama o Isaraelu, ma atalii o e ua fananau mai i le Ekalesia a Iesu Keriso o le Au Paia o Aso e Gata Ai: Ou te fai atu i tamā ma tamaiti i le lalolagi aoao, i le mamao e oo atu i ai lo’u leo—ou te talosaga atu ia te outou, ou te lapatai atu ia te outou ia aua nei faatiga i le Alii, pe faatiga foi i alii ma tamaitai faamamaluina, i le faaaogaina lea o upu masoa.¹⁴

O le manao ina ia maua fua se mea o se amio leaga.

O se tasi o mea sese o lenei vaitau o taaloga faitupe po o petipetiga ma ua matua matautia ma ta’usalaina. … Ae e tele ala eseese o loo faalafi ai le temoni o petipetiga i le aiga, i fale kalapu, ma nofoaga o faafiafiaga mo faamoemoega tatau, e tusa foi poo siosiomaga o nofoaga paia. …

O le naunau ina ia maua se mea aoga mo sina totogi laitiiti pe leai foi, o se amio leaga; ma o soo se gaioiga e faamalosia ai lena manaoga o se fesoasoani tele lea e lagolagoina ai petipetiga po o taaloga faitupe, lea ua faamaonia o se temoni o le faatafunaga o le faitau afe o tagata. O le faaaluina o se sefulu sene ma le faamoemoe e manumalo ai i se tālā i soo se taaloga o matematega, o se ituaiga foi lava lena o petipetiga.¹⁵

O le taumuimui e feteenai ma le agaga o le talalelei.

I se tusi sa ou mauaina talu ai nei, sa tuuina mai ai se talosaga ma fesili mo so’u taofi: “Ou te manao ia e faamatala maia le taumuimui. E foliga mai e i ai le eseesega o manatu e tusa ai ma le uiga o le upu. O nisi ua faapea mai afai lava o loo e tautala i le mea moni e uiga i se tagata, e lē o se taumuimui lena, tusa lava poo le a lau tala e te faia pe faapefea foi ona e faia. Pe le sili ea ona lelei, pe a e iloa se tagata ua i ai ni ona faaletonu, ona e alu lea ma talanoa ma ia, nai lo le alu i isi ma talanoa i ai e uiga i ona faaletonu?

E leai se mea e sili ona mamao ese mai le agaga ma tomai i le talalelei nai lo le faapea ua ta’uamiotonuina lo tatou tautala i le mea moni e uiga i se tagata, tusa lava poo le a le faigata ia te ia o le moni. Ua aoao mai e le talalelei ia i tatou mataupu faavae o le salamo, ma e leai sa tatou aia tatau e faamamasagia ai se tagata i le vaai a ona uso a tagata pe afai ua salamo faamaoni o ia ma ua faamagaloina o ia e le Atua. …

I le avea ai o se tulafono, e le alagatatau ona tuuina atu pea o fautuaga ia i latou ua i ai se faaletonu e tusa ai ma lau lava faamasinoga. I le tulaga muamua, atonu e sese la tatou faamasinoga, ma i le tulaga lona lua, atonu o loo tatou feagai ma se tagata ua matua musuia i le agaga o le salamo, ma ua iloa e ia lona vaivaiga, ma o loo tauivi pea lava pea ina ia faatoilaloina. O le mea lea, o le faaeteetega sili, o lea, e ao ona mata’ituina a tatou gagana uma e faaalia ai le tima’iina po o le tuua’ifuaina ai o isi. I le avea ai ma tulafono aoao, o le taumuimui e sili ona iloa e le agaga ma le faamoemoega e mafua ai ona tatou tautala i mea ua tatou manatu o ni masei o isi nai lo upu lava latou.

O se alii poo se tamaitai ua maua le Agaga o le Atua o le a vave ona ia iloa i lona lava lagona le agaga o le taumuimui, aua o lena agaga o loo i ai i manatu o loo faia e uiga i isi. O lea la, o le fesili e uiga i le taumuimui, e masalo e sili ona lelei ona iloa i le tulafono anamua e faapea, “e a le tusi e fasioti, ae a le agaga e faaola.” [2 Korinito 3:6.]¹⁶

O le le faaaloalo e tatau ona le talia e tagata uma.

O le le faaaloalo i le faiga o laei e ao ona lē talia e matua ma tagata mafaufau uma. O le faaaliga e aunoa ma le maasiasi o le tino o le tagata ua vaaia i le ituaiga o laei faaonapo nei, poo le leai foi o ni laei, o faailoga ia o lena lagona toilalo e agai atu i amioga lē tatau ma lē mama i fegalegaleaiga mataga ia ua vave oo atu ai atunuu ma malo i le tulaga faatama’ia. Ia aua nei faapogisaina fuafuaga poto o le meleniuma faamamaluina e le ao tau faamata’u o tu ma aganuu ma teuga ma suiga o nei aso leaga.¹⁷

I la’u lava vaai o teuga o aso nei e matua leaga lava, e taufaaosooso ai le tiapolo, ua fuafuaina e faatupu ai lagona malolosi ma tuinanau, e faaosofia ai manaoga fia feusuai, i loto o i latou o loo tulimata’i atu i teuga, ma i latou e fiafia i ai. … E leaga, ma ou te faamoemoe o le a lē pauu atu afafine o Siona i nei ala leaga, tu ma aga, aua e mataga ma toilalo lona taunuuga.¹⁸

Ua tatou faalogo ua lipotia mai lea taimi i lea taimi, o nisi … ua matua faaleagaina o latou ofusa, ae ua le tausiaina i le paia ma lē faatamaiaina. … Ua tatou iloa nisi o o tatou tuafafine lelei ua o mai i le malumalusa i nisi o taimi ua teuteu mai i teuga mataga faaonapo nei ua faamatagaina ai le tagata paia. E foliga mai latou te leiloa o loo o mai i latou i le maota o le Atua.¹⁹

E faatagaina siva lelei i tagata o le Au Paia.

Matou te manatu ua talafeagai le manatu atu i le mataupu o pati e sisiva ai, o se suiga ua faatagaina i tagata o le Au Paia, ae peitai e i lalo o tulafono faapitoa e ao ona tausia lelei. … E tatau ona matua faasaina meainu malolosi mai falesiva ma o latou siosiomaga. O siva e manaomia ai pe taga ai foi le fusifusi vavalalata ma gaioiga e faaosoosoina ai … e ao ona matua faasaina lava.²⁰

O Tusi o ni paaga mo le lelei poo le leaga.

O tusi e maua ai se faamasaniga mo tagata uma e faitau i ai, ma ua latou faatupuina i totonu o le loto ni lagona lelei pe leaga foi. E i ai nisi taimi e matua faaeteete lava matua i ituaiga uo mo a latou fanau ma e faaeteete tele foi i tusi latou te faitau ai. I le faaiuga o se faitauga tusi leaga o le a aumai ai paaga leaga.

E le na o le tama na te faitau i lenei tusi matautia, ma lē talafeagai o le a aafia ai i lona aafiaga, ae oo mai le taimi na te faaaafia ai ma isi. O nei tusitusiga e avea ma tina o ituaiga o leaga eseese e atiae i faiga a le tiapolo ma aumai ai le lagona o le toilalo ma aveesea mai ai le lelei i le loto o le tagata ma tuuina atu ai le avanoa i le leaga… Afai ua faitau a tatou fanau i tusi e maua ai manatu matautia ma lē masani ai ma lē manaomia i o latou mafaufau, e lē tatau ona tatou ofo pe a iloa ua latou faia ni gaioiga matautia, lē masani ai pe le tusa ai foi. O loo i ai i manatu ma lagona e tatau ona tatou faasagatau atu i le leaga ma faaosoosoga o le lalolagi, ma o le faamamaina o o tatou manatu ma lagona e ao ona faia ma taumafaiga faapitoa a tama ma tina uma. …

Na faamatalaina se tala i se alii ofisa Egelani i Initia, i se tasi aso sa alu ai i le fata tusi e aumai se tusi. Ao aapa atu lona lima i le tusi sa utia lona lima e se gata. Ina ua tuanai ni nai itula sa amata ona fula le lima. Mulimuli ane ua oo atu le fula i lona oga lima, ma mulimuli ane ua aafia uma ai lona tino, ma i ni nai aso sa maliu ai o ia. E i ai gata uogo o loo lalafi i le tele o tusi taugofie ma lapisi. … O lo latou aafiaga i o tatou loto e unooa, ma i le taimi e tatau ai latou te aumaia le oti faaletino ma le faaleagaga. … Ia iloa e le Au Paia ia tusi e oo mai i o latou aiga, aua o o latou aafiaga atonu e ‘ona ma oti ai e pei o le gata lea na oo mai ai le oti i le alii ofisa Egelani i Initia.²¹

O a ituaiga o tagata e tatau ona avea ai i tatou?

Ua na o le usiusitai i tulafono a le Atua e mafai ai e tagata ona tulai ae i luga o vaivaiga o le ola faaletino ma faataunuuina lena manavaga o le alofa, lena alofa moni ma le agalelei, e ao ona oo i loto ma lagona o le fanau a tagata. O le talalelei e pei ona toefuataiina ai ua faamoemoeina e tuu saoloto ai [tagata] ioe, saoloto e filifili le lelei ma lafoai i le leaga, saoloto e faia lena filifiliga mautu o mea lelei, ua latou talitonu ai i le tonu, tusa lava pe o le a le toatele o tagata o le lalolagi e tusitusilima ia i latou. E le manaomia se lototele faapitoa i le vaega o alii e aau ai i le tafega o le lalolagi.²²

Ia faamanuia le Alii ia te outou ou uso e ma tuafafine. Matou te lagolagoina soo se gaioiga e faaleleia atili ai le faapalepale, o le amiolelei, ola mama, ma le faatuatua i le Atua ma le usiusitai i Ana poloaiga. …

… O le a le ituaiga o tagata e tatau ona avea ai i tatou; o a ituaiga tagata taitoatasi e tatau ona avea ai i tatou? E le tatau ea ona tatou faia o ni faataitaiga e talafeagai ai ma a tatou galuega? E le tatau ea ona tatou ola i ni olaga mama? E le tatau ea ona tatou amio sa’o, amio mama, faamaoni, matatau i le Atua ma alolofa i le Atua i o tatou loto i aso uma o o tatou olaga ma tulaga uma ua valaauina tatou te galulue ai; pe le tatau ea ona tatou faia ni faataitaiga mo le lelei? E le tatau ea ona tatou faapei o Keriso, tagata, faamaoni i mataupu uma o le Talalelei, ma faamamalu i le lalolagi ma le aiga… ? O lena le ituaiga o tagata e tatau ona tatou i ai. Ia fesoasoani mai le Atua ina ia tatou faapena o la’u tatalo lea.²³

Fautuaga mo Suesuega

O a ni auala sa faia ai e le Faaola ni faataitaiga o le pulea e ia o ia lava? O le a le”fili ua tatou maua i totonu o i tatou lava”? (tagai foi Mosaea 3:19.) E mafai faapefea ona tatou mulimuli i faataitaiga a le Faaola i le faatoilaloina o lenei fili?
Pe a le avea i tatou ma o tatou lava pule, e faapefea ona tatou faamanualia i tatou ma isi? Pe a tatou pulea i tatou lava, e faapefea ona tatou faamanuiaina isi?
E mafai faapefea ona avea faafiafiaga ma se “lagona malosi e pulea” o tatou olaga? E mafai faapefea ona latou faaali atu o tatou tagata? O le a le tiute e faia e le faafiafiaga i o tatou olaga?
Aisea o le “faaaogaina o upu masoa ma le mataga… o se agasala i le silafaga a le Atua”? Afai o i latou o loo i lo outou siosiomaga o loo faaaogaina upu masoa, e faapefea ona e faailoa atu ia te i latou o loo faatiga ia te oe lena mea?
Aisea e feteenai ai le taumuimui ma le agaga o le talalelei? O le a le gaioiga e tatau ona tatou faia nai lo le tautala e uiga i faaletonu o isi?
E faapefea e laei talafeagai ona uunaia ai le ola amiotonu? E faapefea e nisi o teuga o aso nei ona “faaosooso ai le tiapolo” ma “faatoilaloina” i lo latou aafiaga?
E faapefea e le fautuaga a Peresitene Samita e uiga i tusi ona faaaoga i faafiafiaga i aso nei, e pei o polokalama i vitio, musika, televise, ata, mekasini, ma le initoneti? (tagai foi MFF 88:118.) O le a le auala e manaomia ai le malosi pe afai tatou te feausi ese mai i “tafega o le lalolagi”?
E faapefea ona outou tali atu i le fesili, “O le a le ituaiga tagata e tatau ona tatou i ai”? (tagai foi 3 Nifae 27:27.)

Ruth and Naomi — *O Ruta ma Naomi*, tusia e Judith Mehr. Sa maua e Ruta le filemu ma le fiafia e ala i le ola ai i se olaga mama ma le usiusitai i tulafono a le Atua.