Ua Faaolaina e Iesu Keriso Tagata Uma Mai le Oti Faaletino

O le maliu o Iesu Keriso ua mafai ai ona faatoilaloina le oti faaletino ma maua ai e tagata uma le meaalofa o le toetu ma le ola e faavavau

Mai le Soifuaga o Iosefa F. Samita

I le avea ai ma faifeautalai ma lona olaga atoa sa fetufaai atu ai e Iosefa F. Samita le feau o le tala lelei toefuataina o le faaolataga mo i latou e faalogologo atu ia te ia. Sa ia aoao atu o le Togiola a Iesu Keriso o le totonugalemu ma le galuega sili lea ona taua i le talafaasolopito o tagata.

O le Togiola o lo tatou Faaola ua aveesea ai le oti faaletino ma maua ai e tagata uma le meaalofa o le toetu ma le ola faavavau. E le gata i lea, o le Togiola a Iesu Keriso ua faatoilaloina ai le oti faaleagaga e ala i le faaolaina o tatou mai ia tatou agasala ma mafai ai lo tatou faaeaina pe a tatou salamo ma tausia poloaiga. O tulaga lē faatuaoia o le Togiola o loo talanoaina i lenei mataupu; o vaega faatuaoia o loo talanoaina i mataupu ua mulimuli mai.

I le maliu o lona afafine e 19 tausaga o Alice, o lana Pele o Alibo, [o se igoa e faaigoa ai e Peresitene Samita lona afafine o Alice] i le aso 29 o Aperila 1901, sa faaali atu ai e Iosefa F. Samita lona faatuatua i le Togiola i se tusi i lona atalii: “O loo ifo pea o matou loto i le eleele o loo i ai vaega o totoe o tino maliu o lo ma afafine pele ma isi ona uso ma tuagane ua tanumia i le palapala. … Ae o le a tatou faia le mea e sili ona fai, e ala i le fesoasoani mai o le Alii, ma e mai i o ma loto, ma te lagona o a ma oloa o loo momoe ua i ai i Lona nofoaga paia ma o le a lē pine ae ala mai le palapala i le ola e faavavau. Peitai, i le faamaoniga matagofie ma le faamoemoe maualuga i le Talalelei a Keriso, o le olaga e le gata o le a leai se aoga e ola ai, ae o le a avea foi ma se mea ulagia po o se ata mataga. “Ae, O, lea ua olioli ai, Ua ou iloa, o loo soifua lo’u Faaola! Faafetai i le Atua.”¹

Aoaoga a Iosefa F. Samita

Ua faataunuuina e Iesu Keriso le togiola viia mo le faaolataga o tagata.

Matou te talitonu i le Alii o Iesu Keriso ma i le mana ma le faaolataga o lana misiona i le lalolagi, ma i le togiola, le togiola maoae ma ofoofogia, ua ia faataunuuina ai le faaolataga o tagata.²

E lei maea le galuega a Iesu ina ua fasiotia o ia, e le i uma foi ina ua toetu mai o ia mai le oti; e ui ina sa faataunuuina le faamoemoe sa ia sau ai i le lalolagi, e lei maea lana galuega uma. O a fea e uma ai? E le uma seia togiolaina e ia ma faaolaina atalii ma afafine uma o lo tatou tama o Atamu ua fananau mai ma o le a fananau mai i le lalolagi i le iuga o taimi, sei vagana ai atalii o le malaia. O lana misiona lena.³

O Iesu Keriso o le Alo o le Atua soifua, o le faataitaiga moni mo tagata uma e mulimuli ai, o le faataitaiga mo tagata uma. E le o Ia o se tagata agasala; sa le’i amioleaga o ia. O ia e leai sana amioletonu, poo se le talitonu, poo se uiga le mafaufau. Ua matua faapaiaina o ia i le atamai o le Atua mai lona fanau mai seia oo i le tuugamau, ma ina ua maea lona toetu mai ua ia te ia le mamalu o le Tama, ma avea ua faapei foi o le Atua, ua i ai le mana e pei ona i ai i le Atua, aua na Ia folafola mai ua tuuina atu ia te ia o mana uma lava, ma ua nofo o Ia i le itu taumatau o le nofoalii o le Silisiliese, o ia o lo tatou Puluvaga, o le Uso matua, ma e tatau ona tatou mulimuli ia te Ia ae lē o se isi.⁴

E leai se isi igoa i lalo o le lagi ua tuuina mai ua na o Iesu Keriso, e mafai ona faaolaina ai outou ma faaeaina i le malo o le Atua.⁵

O loo i ai ni upumoni tetele taua o loo i ai i le ata o le togiola. E le mafai ona faagalogalo; e leai nisi mea e mafai ona tuu e faamuamua ai. O le tulaga faatamā o le Atua, o le taua o le togiola o lo tatou Alii ma le Faaola, o le toefuataiina mai o le talalelei i aso nei e gata ai, e ao ona tatou talia ma o tatou loto atoa.⁶

O le Pau o Atamu ua oo mai ai le oti i le lalolagi.

O le oti e le o se faanoanoa. O loo i ai iina nisi upumoni taua ma le matagofie o le olaga. E ui ina tiga ia i latou ua faanoanoa i le toesea o e ua pele ia i latou, ae o le oti o se tasi o faamanuiaga tupito i le fuafuaga a le Atua.

Ua fanau mai i tatou ina ia maua le ola i la le tino, o lona uiga ia faaofuina o tatou agaga i se tino. O lenei faamanuiaga o le laasaga muamua lea i se tino faaletino, ma o le laasaga lona lua o le oti. O le oti o se tasi o vaega o le alualu i luma e faavavau; ma e ui ina faigata ona talia, e leai se tasi e talitonu i le talalelei a Iesu Keriso, aemaise i le toetu, na te suia lea mea. … O le mea moni, o le oti o se mea e tatau ona i ai, ma o se faamanuiaga foi, ma … e le mafai ona faamalieina i tatou pe atoatoa le fiafia e aunoa ma le oti.⁷

Ina ua agasala [Atamu] i lena tulafono faalelagi, lea na faasaina ai o ia ona tagofia mea o le lalolagi, ina nei avea ai o ia ma se tasi o le lalolagi, ona oo mai ai lea ia te ia o le oti faaletino, e pei ona folafola mai e le Atua, o le a oti o ia pe afai e ai i le fua faasaina.⁸

Aua o le oti o le faasalaga o le soligatulafono, ua le mafai e le tagata ona teena, lena poloaiga a le Atua, “aua o le aso e te ’ai ai, e te oti ai lava,” [Mose 3:17] ma o lenei faasalaga ua oo atu i tagata uma, ua leai se mea e mafaia e tagata uma na o i latou, ma ua faalagolago atu [i se tasi] e pei foi o ia i lenei tulaga.⁹

Ua ta’ua i tatou o tagata i la le tino aua ua i ai i totonu o i tatou le fatu o le oti, ae i le tulaga moni lava ia, o i tatou o tagata ola pea, aua o loo i ai foi i totonu ia i tatou le fatu o le ola e faavavau. O le tagata e lua ona itu, e aofia ai le loto po o le agaga e maua ai le ola, malosi, poto ma le tulaga e tatau ai mo se tagata, ma le tino o le nofoaga o le agaga, ma ua talafeagai ma lona tulaga, e fetuutuunai i mea e manaomia ai, ma galulue faatasi ai, ma i se malosi e mafai ai, e faamatuu atu ma le usiusitai i le mea e manao i ai le loto. E tuufaatasi ia mea e lua ona maua ai lea o le agaga. E faalagolago le tino i le loto, ma o le loto i le taimi o nofo ai i le tino, ua puipuia i tulafono o le ola faaletino. I totonu o lenei tino faaletino, o loo i ai fatu o vaivaiga ma le pala (decay), lea, afai e pula pe matua atoatoa pe lia’iina foi ae le’i oo i le taimi e tatau ai, i le gagana faatusitusiga paia, e ta’ua “o le oti faaletino.”¹⁰

O tagata uma lava ua fananau mai i le lalolagi e oti. E le afaina poo ai lava, poo fea e i ai, pe fanau mai o le mauoa ma mamalu, poo le maualalo ma le mativa i le lalolagi, o ona aso e faatapulaaina e le Ali, ma e oo mai le taimi o le a oo mai ai le iuga ia te ia. E ao ona tatou mafaufau i lenei mea. E le tatau ai ona tatou maua le loto popole ma le agaga toilalo; e leai lava. Ou te fiafia ua ou fanau mai ina ia ou ola, oti, ma toe ola. Ou te faafetai i le Atua ona o lenei poto. E aumai ia te au le olioli ma le filemu e le mafai e le lalolagi ona tuuina mai, pe aveesea foi e le lalolagi.. Ua faaali mai e le Atua lenei mea ia te au, i le talalelei a Iesu Keriso, ou te iloa e moni. O lea, e leai se mea ou te faanoanoa ai, e leai se mea o le a ou faanoanoa ai.

Pau lava le mea ou te faia i le lalolagi o le fuafua e siitia lo’u agaga, ia maua e au le olioli ma le filemu, faamoemoe ma le faamafanafanaga i lenei olaga, ma le faamoemoe maualuga i le faaolataga ma le faaeaina i le afioaga o lo’u Atua i le lalolagi o le a oo mai. E leai se mafuaaga ou te tagitui ai, e ui lava i le oti. E moni, ou te vaivai ma ou te tagi i le oti o a’u uo ma aiga. Atonu e maligi foi o’u loimata pe a ou vaai i le faanoanoa o isi.

E i ai le tiga alofa i lo’u agaga mo le fanau a tagata. Ou te tagi ma i latou pe a latou fetagisi; Ou te olioli ma i latou pe a latou olioli; ae leai se mea e ala ai ona ou faavauvau, poo le faanoanoa ona o le oo mai o le oti i le lalolagi. O loo ou talanoa atu i le oti faaletino, o le oti o le tino. … Ua iloa e [Tagata o le Au Paia] a oo mai le oti i o latou luga ona o le agasala a Atamu, o le amiotonu o Iesu Keriso o le a oo mai ai le ola ia i latou, ma e ui ina oti, o le a toe ola i latou.¹¹

O le Togiola a Iesu Keriso ua faatoilaloina ai le oti faaletino e ala i le toetutu o tagata uma.

Na oo mai le oti ia i tatou e ui e le i i ai sa tatou filifiliga saoloto; sa leai sa tatou mea na fai i le aumaia i o tatou luga; ua oo mai ona o le agasala a o tatou uluai matua. O lea, o le tagata, sa leai sona aafiaga i le aumaia o le oti i ona luga, o le a leai sana mea e fai mo le toe aumaia o le ola ia te ia lava; a o oti o ia ona o le agasala a Atamu, o le a toe ola o ia, ona o le amiotonu a Iesu Keriso, ma le mana o le toetu. O tagata uma lava e oti o le a toe ola.¹²

O Iesu Keriso… o uluai fua o le toetu mai le oti, e pei ona faatuina i luga, e faapena ona ia faatuina o fanau uma lava a lona Tama ia ua oo mai i ai le faasalaga o Atamu. Ona o le tagata e toatasi ua oo mai ai le oti faaletino i tagata uma, o le amiotonu o Keriso o le a toe ola ai tagata uma, e ala i le toetu mai le oti o tagata uma lava; pe lelei pe leaga, uliuli pe paepae, pologa pe saoloto, aoaoina pe le aoaoina, talavou pe matua, e le afaina [Tagai 1 Korinito 15:21–22; Alema 11:44]. O le oti na oo mai talu o tatou uluai matua ua soloia e le toetu o le Alo o le Atua, ma e le mafai e oe ma au ona faia.¹³

Ua iloa uma e i tatou o le [Alo o le Atua] sa siitai a’e i le satauro sa tuia lona itu, ma o lona toto na tafe mai i lona tino; ma sa ia tiga i luga o le satauro ma tuuina atu lona agaga; sa aveeseina mai lona tino mai le satauro … aui i le ie lino ma tuuina i totonu o le tuugamau fou na foa i le papa e le i tuu ai lava se tasi.¹⁴

O Keriso lava na soloia ia pa pupuni o le tuugamau, ua manumalo i le oti ma le tuugamau ma sa tulai mai “ua avea ma faapolopolo a e o momoe.” [1 Korinito 15:20.]¹⁵

Sa ia afio mai i le lalolagi … ua faaofuina i mana e lua—mana o le oti, na maua mai i lona tina; ma le mana e tetee ai i le oti, pe a ia finagalo i ai, sa ia maua mai i lona Tama. Sa ia te ia le mana e ola ai e faavavau ma le mana e oo mai ai le oti, ina ia tigaina o ia mo tagata uma, ma tulai mai le tuugamau i le faafouina o le ola— o le tagata toetu, ua faaofuina i le ola ma le ola e faavavau, ina ia mafai e tagata uma ona tulai mai le tuugamau i le ola e faavavau, pe afai e usiusitai ia te Ia.. O le a tulai mai i le tuugamau, a le o ni ipu o le mamalu, po o ni ipu foi o le lē mamalu. E le mafai ona fesoasoani ia i latou lava. Tatou te le mafai ona fesoasoani i le tiga o le oti faaletino ua oo mai ia tatou, pe tatou te tetee foi i le toetu o lenei tino mai le tuugamau; aua e faapei ona tulai mai le Atua mai le oti, e faapena foi tagata uma.¹⁶

Tatou te talitonu atoatoa o Iesu Keriso lava ia e moni, ma ua na o ia e moni lona toetu mai o tagata mai le oti i le ola. Tatou te talitonu e leai se isi lava ituaiga o toetu mai le oti i le ola; ao tulai mai o ia, ma faatumauina lona tagata, e oo lava i ma’ila o ona manua i ona lima ma vae ma le itu, ina ia mafai e ia ona faamaonia o ia lava ia i latou o loo lē talitonu i le mafai ona toetu mai i le oti, o ia lava, o le Alii sa faasatauroina, sa tanumia i le tuugamau, ma toetu mai le oti i le ola, e faapena foi ia te outou o atalii ma afafine uma lava o Atamu, ua fananau mai i le lalolagi.¹⁷

O le a tatou tulai mai le tuugamau, pe a ilia le pu, ma o tatou tino o le a toetutu mai ma o tatou agaga o le a toe ulu atu i ai, ma o le a avea ma tagata ola, e le toe tuu eseeseina, ae o le a ola pea e faavavau.¹⁸

O elemene o loo fausia ai le tino faaletino o le a le pala, o le a le toe taofia lona i ai pea, ae i le aso o le toetu o nei elemene o le a toe faatasia, ivi i le ivi, ma le aano i le aano. O le a oo mai le tino e pei ona sa faataoto ai mo se malologa, aua e leai se ola ma se alualu i luma i le tuugamau. E pei ona taoto ai i lalo, o le a toetu foi, ma suia i le atoatoa o le a oo mai i le tulafono o le toetu. Ae o le agaga o le a faaauau ona faateleina ma tuputupu a’e, ae o le tino, ina ua maea le toetu o le a faatuina i le tulaga atoatoa o le tagata.¹⁹

O le a toe faatasia le tino ma le agaga. O le a tatou toe vaai i le tino, i le tino lava e tasi sa tatou i ai ao ola ai i le lalolagi. O le a tulai mai o tatou tino e pei ona faataooto ai i lalo, e ui o le a i ai le toefuataiina; o totoga uma, o sooga o ivi na gaui, o faaletonu uma na mafua i se faalavelave faafuasei po o soo se mea lava, o le a toe faafou ma faasa’o. O ivi atoa ma gaugaivi e toe faatuina i le tino e tatau ai. O le a iloa e le tasi le isi ma fiafia faatasi i tausaga uma e lē gata o le faavavau, pe afai tatou te tausia poloaiga a le Atua.²⁰

E maeu le viia o lea mafaufauga, ia te au lava ia, ma e tatau foi ona faapea i tagata uma ua fananau i le upumoni pe ua taliaina foi le upumoni i o latou loto, o i latou ua tatou faamavae atu i ai i lenei olaga, o le a tatou toe feiloai ma fevaaiai e pei ona masani ai. O le a tatou toe feiloai atu i tagata na tatou faifai mea faatasi i le olaga nei—e lē o se isi agaga, po o se isi tagata, pe o le tagata lava e tasi ae ua ese lona tino mai, peitai o le tagata lava e tasi ma lona ituaiga ma ona uiga, o le tagata lava e tasi na tatou iloa ma tatou faifai mea faatasi i la le tino, e oo lava i manu’a i le tino. E le faapea o le a faamatagaina i ni ma’ila, o manu’a, faaletonu po o tulaga lē atoatoa, aua o le a aveesea uma nei mea, i le taimi e tatau ai, e tusa ai ma le alofa mutimutivale o le Atua. O le a aveesea tulaga faaletonu ma lē atoatoa; o le a leai ni faaletonu, ma o le a maua e alii ma tamaitai le atoatoa o o latou agaga, o le atoatoaga na fuafuaina e le Atua i le amataga. O lona faamoemoega lea, ina ia avea alii ma tamaitai, o lana fanau, e avea ma suli o le Atua, ma suli faatasi ma Iesu Keriso, ia atoatoa, e le gata i la le tino ae faapea foi i la le agaga, e ala i le usiusitai i le poloaiga na ia saunia ai le ala e oo mai ai le atoatoa i ana fanau uma.²¹

A o faaalia mai laasaga o le alualu i luma e faavavau e ala i faaaliga paia, e ao ona tatou malamalama e na o tagata toetutu ma faamamaluina e mafai ona avea ma matua o fanau agaga. E na o tagata faaeaina ua ausia le tulaga e tatau ai i lea faamoemoega filifilia o le ola e faavavau; ma o agaga ua latou fanauina i lalolagi o le faavavau, o le a oo atu i le faasologa e ala atu i vaega eseese o esetete ua maua ai e matua ua faamanuiaina le faaeaga.²²

E leai se isi mea e mafai ona ou mafaufau i ai faapea e sili atu ona manaomia nai lo mea ua tuuina mai ia i tatou i le talalelei a Iesu Keriso—e ui lava ina tatou oti, ae tatou te toe ola, ma e ui ina tatou oti ma toe foi atu i elemene na gaosia ai o tatou tino, ae o le a toefuatai mai nei elemene ma toe faatulagaina, ma toe avea ai i tatou o ni tagata ola e pei lava ona faia e le Faaola; ma o lona faia o lea tulaga ua mafai ai foi e i tatou uma lava.²³

Fautuaga mo Suesuega

O le a le “misiona paia, faaola” a Iesu Keriso i le ata o le faaolataga?
Aisea e tatau ai ona “tatou taliaina ma o tatou loto atoa” le moni ma le mana o le Togiola? O a faamanuiaga e maua e i latou e faia faapea?
E faapefea ona “lua itu” o le tagata? (Tagai foi i le MFF 88:15–16.) O a faamanuiaga tatou te maua ona ua tatou iloa lenei mea?
O le a le oti faaletino? E fesoasoani faapefea ia te oe i lou iloaina “e tatau ona i ai le oti i le ala o le alualu i luma e faavavau?”
O a aoaoga faavae e fesoasoani ia i tatou e aveesea ai le mata’u i le oti faaletino mai o tatou olaga? Aisea e mafai ai ona tatou olioli “ua tatou fananau mai ina ia ola, ia oti, ma toe ola foi?”
Na faapefea ona “faaofu [Iesu Keriso] i mana e lua?”
O le a le uiga o le toetutu? O le a le ituaiga o le a i ai o tatou tino pe a tatou toetutu?
O le a sou lagona ina ua e iloaina ua mafai ia Iesu Keriso ona e toetu ma ola e faavavau? E fesoasoani faapefea lenei tulaga ua e iloaina, e te tausisia ai feagaiga ua e osia ma le Atua?
E taua i se a ona manatua e i ai se aso o le a tatou oti moni ai ma toetu?