Ua Togiola e Iesu Keriso le Tagata Salamo mai le Oti Faaleagaga

O le Togiola a Iesu Keriso ua laveaiina mai ai i le oti faaleagaga i latou ua salamo ma faatuatua.

Mai le Soifuaga o Iosefa F. Samita

“Ou te talavou ma e lē lava lo’u tomai i le taimi nei,” sa tusi mai ai Iosefa F. Samita a o i ai i lana misiona i Hawaii. “O lea ou te naunau ai ina ia ou lotomaualalo, tatalo i luma o le Alii, ina ia ou agavaa mo faamanuiaga ma le alofa o le Atua.”¹ I le amataina o lana auaunaga i Hawaii, sa maua ai e le faifeau talavou se aafiaga faaleagaga o loo faamanino mai ai le mana faamamā ma le faamafanafana o le Togiola a Iesu Keriso: Na fai mai a ia, sa ia “matua mafatia” i lana misiona ma sa i ai i se “tulaga o le mativa, lē lava se poto ma le malamalama.”

“A o i ai i lena tulaga sa ou miti sa alu sa’u malaga, sa malosi so’u lagona e ao ona ou faanatinati—faanatinati ma lo’u malosi atoa, ona o le fefe ina nei ou tuai. Sa ou faatopetope atu loa i le vave e sili ona ou mafaia, ma sa na o sina afifi laitiiti na ou iloa o loo ia te a’u, o se solosolo o loo nonoa ai sina afifi laitiiti. Sa ou leiloa poo le a, a o ou faavave atu i le vave sa mafai ai; ma mulimuli ane sa ou taunuu atu i se maota tele matagofie, pe a faapea e mafai ona taua o se maota tele. Sa foliga mai e matua tele na’uā, ua tele lava ailoga e mafai ona fausia e ni lima, ae sa ou manatu ou te iloa o le mea lea ou te alu i ai. A o ou latalata atu i ai, i le vave sa ou mafaia, sa ou vaaia se upu o loo tusia ai ‘Faletaele.’ Sa ou liliu ane loa faavave ma alu atu i le faletaele ma ou taele mama ai. Sa ou tatalaina le afifi laitiiti sa ia te au, ma maua ai se ofusa mama, o se mea ou te le’i vaai i ai i se taimi umi lava. … Sa ou faamauluina loa. Sa ou faavave atu i se mea e foliga mai o se avanoa tele, poo se faitotoa. Sa ou tuitui ma sa tatala mai le faitotoa, ma o le tagata sa tu ai iina o le Perofeta o Iosefa Samita. Sa ia vaai mai ia te au ma le mateletele ma o ana uluai upu sa saunoa mai ai: ‘Iosefa, ua e tuai.’ Ae sa ou faapea atu ma le mautinoa:

“‘Ioe, ae o loo ou mama—O loo ou mama!’

“ … O lena vaaiga, lena faaaliga ma le molimau sa ou fiafia ai i lena taimi, na mafua ai ona ou i ai i le tulaga e pei ona ou i ai nei, pe afai o au o se tagata lelei, pe mama, pe amiotonu i luma o le Alii; pe afai foi e i ai se mea lelei o ia te au. Ua fesoasoani lena mea ia te au i tofotofoga ma mea faigata uma lava.”²

Aoaoga a Iosefa F. Samita

Ona o le Pau o Atamu, ua oo mai ai le oti faaleagaga i le lalolagi.

Ou te fia tautala i se upu e tasi pe lua e uiga i se tasi ituaiga oti, o le oti sili atu ona matautia nai lo le oti o le tino. Ina ua ’ai e Atamu lo tatou uluai matua le fua o le laau faasaina, ua solia le tulafono a le Atua, ona ua usitai ia Satani, ona tulia lea o ia mai luma o le Atua. … O le oti muamua lea. E ui ina sa ola, a ua oti o ia—oti i le Atua, oti i le malamalama ma le upumoni, oti faaleagaga; tulia ese mai le afioaga o le Atua; o le fesootaiga i le va ma le Tama ma le Alo ua motusia. Sa matua tulieseina o ia mai le afioaga o le Atua e faapei ona tulieseina mai Satani ma ana au sa mulimuli ia te ia. O le oti faaleagaga lena.³

Ou te fia faamanino i o outou mafaufau— “ina ua oti faaleagaga Atamu.” O le a lona tulaga ina ua tuuina o ia i le Faatoaga o Etena? Sa vaai o ia i le Tama. Sa i ai o ia i ona luma. Sa savali ma talanoa faafesagai ma Ia e faapei ona savali ma tautala le tasi i le tasi. O le tulaga lea o Atamu ma Eva a o i ai i le faatoaga. Ae ina ua aai i la’ua i le fua faasaina, sa tulia ese ia laua ma faateaeseina mai le afioaga o le Atua, … “na oti ai i laua i le oti faaleagaga, o le uluai oti lea.” [Tagai MFF 29:41.] Ma e sa le mafai ai e Atamu i lena tulaga ona tuu saolotoina o ia mai le tulaga ua i ai o ia. Ua i ai o ia i lima o Satani. … Ua “oti faaleagaga” o ia—tulieseina mai le afioaga o le Atua. Ma a na leai le auala ua saunia mo ia e faaolaina ai o ia, semanu ua faifai pea lona oti, leai se iuga, oti e faavavau, e aunoa ma se faamoemoe o le toe togiolaina mai ai.⁴

E leai se tasi e mafai ona faasaoina i le malo o le Atua i le agasala.

E leai se tasi e mafai ona oo atu i le afioaga o le Atua i ana agasala, ma e leai se tasi e maua le faamagaloina o ana agasala sei vagana ua salamo o ia ma [tanumia] ma Keriso [tagai Roma 6:4]. Ua tuusaolotoina i tatou e le Atua, e filifili le lelei poo le leaga, e savali i le malamalama poo le pouliuli, e tusa ai ma a tatou filifiliga, e faapei ona ia faauuina ai ina ia mafai ona faapei i tatou o Ia, pe a tatou faamaonia lo tatou agavaa mo le ola e faavavau ma le mamalu i Lona afioaga, e mafai ona ua tatou salamo i a tatou agasala ma usiusitai ma tausia Ana poloaiga.⁵

E le faasaoina se tasi i le malo o le Atua i le agasala. E leai se tasi e mafai ona faamagaloina o ana agasala e le Faamasino faamaoni, sei vagana ua salamo o ia i ana agasala. E leai se tasi e tuusaolotoina mai le mana o le oti [faaleagaga] sei vagana ua toe fanau o ia e pei ona folafola mai e le Alii Silisiliese.⁶

Ua tuuina mai e le Atua i tagata uma le filifiliga saoloto ma ua ia foaiina mai ia i tatou le avanoa e auauna ai ia te ia pe leai, ia faia le mea tonu poo le mea sese, ma o lenei avanoa ua tuuina atu i tagata uma i soo se ituaiga, lanu poo tulaga o loo soifua ai. O e mauoa ua maua lenei filifiliga saoloto, ua maua e matitiva lenei filifiliga saoloto, ma ua leai se tasi ua faaitiitia e le mana o le Atua e faaaoga ai i le atoatoa ma le saolotoga. O lenei filifiliga saoloto ua tuuina atu i tagata uma. O se faamanuiaga lenei ua tuuina mai e le Atua i luga o le lalolagi o tagata soifua, i luga o ana fanau uma. Ae ua ia maitauina ma le totoa lava la tatou tali atu e tusa ai ma lo tatou faaaogaina o lenei filifiliga saoloto, ma e faapei ona ta’ua o Kaino, e faapena foi ona ta’ua o i tatou; “Pe afai e te amio lelei e te le maua ea le fiafia? Ae afai e te le amio lelei o loo taoto i le faitotoa le agasala” ( Kenese 4:7). … Ina ua tuuina mai e le Atua i tagata uma, e tusa lava poo le a le tulaga o le soifuaga, lenei filifiliga saoloto e filifili ai le lelei poo le leaga, sa le i tuuina atu ma o le a le tuuina atu foi e Ia i luga o fanau a tagata le faamagaloga o agasala sei vagana ua latou usiusitai i le tulafono. O lea, ua agasala le lalolagi uma ma ua teena, e pei ona oo mai le malamalama i le lalolagi ma ua le saunia e tagata i latou lava i le tulaga e tatau ai i luma o le Alii.⁷

O le Togiola a Keriso ua faaolaina ai i tatou mai le oti faaleagaga e ala i le salamo ma le usiusitai.

Sa fuafua e le Alii mai le amataga e tuuina atu i luma o le tagata le malamalama i le lelei ma le leaga, ma tuuina atu ia te ia se poloaiga ina ia pipii i le lelei ma inoino i le leaga. Ae afai ua pau o ia, o le a ia tuuina atu ia te ia le tulafono o le taulaga ma saunia se Faaola mo ia, ina ia mafai ai ona toe foi mai o ia i le afioaga ma le fiafia o le Atua ma maua le ola e faavavau faatasi ma ia. O le ata lenei o le faaolataga na filifilia ma faatinoina e le Silisiliese ao le’i i ai le tagata i le lalolagi. Ae ina ua pau le tagata ina ua soli le tulafono sa poloaiina ai o ia, sa tuuina atu ai e le Alii le tulafono o le taulaga, ma faamanino atu ina ia malamalama o ia, o le faamoemoega ina ia faamanatu ai ia te ia o lena galuega matautia o le a oo mai i le vaeluaga o taimi, o le a mafai ai ona aumaia o ia ma ana fanau uma i le mana o le togiola ma le toetu mai e ua oti, ma maua le ola e faavavau ma le Atua i lona malo.⁸

Sa i ai le fuafuaga sa faataatia mo le faaolataga o [Atamu]. Sa poloaiina e le Silisiliese ina ia le tigaina o ia i le oti faaletino seia aoaoina o ia i le ala e faasaoina ai mai le oti faaleagaga ua oo mai i ona luga ona o le agasala. O lea na oo mai ai le agelu ma aoaoina o ia i le talalelei o le faaolataga, ua tuuina atu i ona luma ia Keriso, o le Faaola o le lalolagi, o le na maliu mai le vaeluaga o taimi ua i ai le mana e manumalo ai mai le oti ma faaolaina Atamu ma ana fanau mai le pa’ū, ma mai le pu’eina e Satani. … E tatau i se tasi ona aapa ifo i lalo ma fesoasoani e ava’e ia te ia. O se mana maualuga ese mai ia te ia e ao ona aveeseina mai o ia mai le tulaga ua ia tuuina i ai o ia lava; aua ua pulea o ia e Satani ma ua leai se mana ma se fesoasoani mo ia lava.

O lea sa aoao atu ai le Talalelei ia te ia, ma o le auala e faasaoina mai ai le oti faaleagaga sa tuuina atu ia te ia. O lena auala e faasaoina ai e ala mai le faatuatua i le Atua, salamo mai agasala, papatisoina mo le faamagaloga o agasala, o le meaalofa o le Agaga Paia e ala i le faaee atu o lima. O lea na ia maua ai le malamalama o le upumoni ma le molimau ia Iesu Keriso, ma faaolaina ai mai le oti faaleagaga sa oo mai ia te ia, o le uluai oti lea, ma o le oti atoatoa ma le lelei, e tusa ai ma le faaleagaga, e ui lava sa ola o ia ma gaoioi ma i ai lona tulaga faaletagata, e pei ona i ai muamua ao le’i ’ai o ia i le fua o le laau faasaina ma oti ai faaleagaga; sa i ai lona taunuuga ma lana faatulagaga; ae ua oti faaleagaga o ia, ma e sa faaolaina mai o ia mai lena tulaga.⁹

O Atamu… e ao ona faaolaina mai le [oti faaleagaga] e ala i le toto o Keriso, o le faatuatua ma le usiusitai i poloaiga a le Atua. O lona uiga sa faaolaina Atamu mai le uluai oti, ma toe foi mai i le afioaga o le Atua, toe foi mai i le fiafia o le Silisiliese, toe foi mai i le ala o le ola faateleina ma le alualu i luma.¹⁰

Afai ua faaali e le Alii i le lalolagi le ata o le faaolataga ma le togiola mai le agasala, ina ia faaeaina ai tagata i lona afioaga ma maua ai le ola e faavavau ma ia, ou te tuuina atu, o se fautuaga e le mafai ona aveesea, e le mafai ona faaolaina se tasi i le afioaga o le Atua ma maua le atoatoa o le mamalu ma le fiafia i lona malo ma lona afioaga, sei vagana ua ia usiusitai i le ata sa fuafua ma faaalia mai e le Atua.¹¹

Afai tatou te ola e tusa ai ma fuafuaga a lo tatou Tama o i le Lagi, afai ua uunai atu o tatou loto ia te ia, ma lo tatou Uso Matua, o le Alo o le Atua, o le Silisiliese mamalu, ona o ia ua ala ai ona tatou toetutu mai le oti, ma ua faaolaina foi, po o le mafai foi ona faaolaina, mai le oti faaleagaga, ma toe aumai ai i le afioaga o le Atua.¹²

Sa valaaulia faapitoa Keriso ma auina mai i le lalolagi ina ia faaolaina tagata soifua mai le agasala e ala i le salamo; faaolaina le tagata soifua mai le oti ua oo mai i o latou luga ona o le agasala [solitulafono] a le uluai tagata. Ou te talitonu i ai ma lo’u agaga atoa.¹³

Pe a tatou solitulafono, e tatau ona tatou salamo mai ai ma toefuatai i le malosi e mafai ai. Afai tatou te le toefuatai ona o mea sese sa tatou fai, o lea e ao ona tatou valaau atu i le alofa tunoa ma le alofa mutimutivale o le Atua e faamama ai i tatou mai na agasala.

E le mafai e tagata ona faamagalo a latou lava agasala; e le mafai ona latou faamama i latou mai taui o a latou agasala. E mafai e tagata ona tuu le agasala ma fai le meatonu i le lumanai, pe afai e talia a latou amioga i luma o le Alii ma agavaa ai mo se faamaoniga. Ae o ai e faaleleia le sese ua latou faia ia i latou lava ma isi, aua e foliga mai e le mafai ona latou toe faaleleia e i latou lava? Ona o le togiola a Iesu Keriso, o le a faamamaina ai agasala a le tagata ua salamo; e ui ina mumu ae o le a faasinasina e pei o le fulufulu mamoe [tagai Isaia 1:18]. O le folafolaga lenei na tuuina atu ia te outou.¹⁴

O le Togiola ma lo tatou faatuatua, e mafai ai ona tatou suli faatasi ma Iesu Keriso.

O le a tatou tutu i luma o le nofoa faamasino o le Atua ina ia faamasinoina. Ua faapea mai ai le Tusi Paia, ua faapea mai ai le Tusi a Mamona, ma ua faapea mai ai foi faaaliga ua tuu sao mai ia i tatou e ala mai le Perofeta o Iosefa F. Samita. A o i latou sa le i usiusitai i le tulafono faale-selesitila o le a le faaolaina i se vaega o le mamalu selesitila. A o i latou sa le i usiusitai i le tulafono faale-teresitila o le a le faaolaina i se vaega o le mamalu teresitila. A o i latou sa le i usiusitai i le tulafono faale-telesitila o le a le faaolaina i se vaega o le mamalu telesitila; ae o le a latou maua le malo e leai se mamalu.¹⁵

O tino uma lava o loo taooto i tuugamau o le a valaauina; e lē o i latou uma i le uluai toetu, poo le taeao o le uluai toetu, ae o nisi o le toetu mulimuli; ma o agaga uma o le a manaomia ina ia oo atu i luma o le nofoa faamasino o le Atua ma faamasinoina e tusa ai ma a latou galuega sa faia ao i ai i le tino. Afai o ia galuega sa lelei, o le a ia maua le taui o le galue lelei; afai [sa latou] amioleaga, o le a tuliesea i latou mai le afioaga o le Alii.¹⁶

O lea, ua tatou ola, tatou te le oti; tatou te le mafaufau i le oti ae ua tatou mafaufau i le ola, o le tino ola pea, mamalu, ola e faavavau, ma ola i le mamalu o le malo o selesitila, ma maua lava mai lena o le atoatoaga lava. O lo tatou taunuuga lenei; o le tulaga faaeaina lenei e ao ona tatou maua ma e leai se mana nate aveesea pe faoa mai ia i tatou, pe afai tatou te faatuatua ma faamaoni i le feagaiga o le talalelei.¹⁷

O le faamoemoega o lo tatou i ai i lenei lalolagi ina ia tatou maua ai le atoatoa o le fiafia, ma avea ai i tatou o ni atalii ma afafine o le Atua, i le uiga atoatoa o le upu, o le avea ma suli o le Atua ma suli faatasi ma Iesu Keriso, e avea ma tupu ma ositaulaga i le Atua, ina ia maua le mamalu, malo, faaeaina, nofoalii ma mana uma ma uiga ua i ai i lo tatou Tama oi le Lagi. O le autu lea o lo tatou i ai i lenei lalolagi. Ina ia maua lenei tulaga faaeaina, e ao ona tatou uia nei aafiaga faaletino, po o le olaga faataitai, ina ia faamaonia ai lo tatou agavaa, e ala i le fesoasoani a lo tatou uso matua o Iesu.¹⁸

E na o le amiotonu e mafai ai ona faasaoina tagata ma faaolaina i le malo o le Atua, o lea e ao ona tatou salamo ia tatou agasala, ma savavali i le malamalama e faapei ona i ai Keriso i le malamalama, ina ia faamamaina e lona toto a tatou agasala uma, ma ia tatou maua se mafutaga ma le Atua ma maua lona mamalu ma le faaeaina.¹⁹

Tatou te manatuaina Iesu Keriso ma Lana Togiola pe a tatou talia pe taumamafa i le faamanatuga

O Atamu, ina ua uma ona tulieseina mai le faatoaga, sa poloaiina ina ia osi atu taulaga i le Atua; i lenei galuega, o ia faatasi ma i latou uma sa auai i le osia o taulaga, ua faamanatu mai ai le Faaola i lona afio mai ina ia faaola i latou mai le oti aua, ana leai le togiola sa saunia e ia, semanu ua aveeseina ai i latou e faavavau mai le toe ola ai i le afioaga o le Atua. Ae o lona afio mai ma lona maliu, sa faataunuuina ai lenei poloaiga; ma sa ia faia ai le Tausamaaga ma poloaiina ona soo ina ia aai ai i taimi uma i le lumanai, ina ia latou manatua ai o ia, ia manatua ua ia togiola ia i latou, ma ua latou osia foi feagaiga latou te usitaia ana poloaiga ma savavali ma ia i le toe faafouina faaleagaga. O lea ua alagatatau ai ona faia le Faamanatuga, o se molimau ia te ia o loo tatou manatua o ia, ma naunau ina ia tausia ana poloaiga ua ia tuuina mai ia i tatou, ina ia tatou maua pea le Agaga e faatasi ma i tatou—e oo lava i le iuga, ma ia faaauau ai pea le faamagaloina o agasala.²⁰

Ina ua afio mai Iesu ma puapuagatia, “o le amiotonu mo le amioletonu,” o ia sa leai sana agasala mo le tagata sa agasala, ma ua faasalaina i le sala e tusa ai ma le tulafono na solitulafono ai lē ua agasala, ua faataunuu ai le tulafono o le taulaga, ma sa ia tuuina atu ai le isi tulafono, ua tatou ta’ua “O le Faamanatuga o le Talisuaga a le Alii,” e faamanatu mai ai lona soifua ma lana misiona, lona maliu ma le toetu, o le taulaga sili sa ia ofoina atu mo le faaolataga o le tagata, e ao ona manatua pea e faavavau, e pei ona ia fetalai, “ia outou faia lenei mea … ma faamanatuga ia te au, o aso uma tou te aai ai i lenei areto ma inu i lenei ipu, tou te faailoa atu ai le maliu o le Alii seia afio mai o ia.” O lea, o lenei tulafono e mo i tatou e faapei o le tulafono o le taulaga ia i latou sa ola ai a o le i afio muamua mai le Atalii o le Tagata, seia toe afio mai o ia. O lea e ao ona tatou faamamalu ma faapaiaina, aua e i ai le faasalaga pe afai e solia [tagai 1Korinito 11:25–29].²¹

O le Faamanatuga o le Talisuaga a le Alii … o le mataupu faavae o le Talalelei, o se mataupu e ao ona mulimuli ai i latou uma o e talitonu, e faapei o isi sauniga o le Talalelei. O le a le faamoemoega o lenei mataupu? Ina ia mafai ai ona tatou manatua pea le Alo o le Atua sa togiolaina i tatou, mai le oti e faavavau, ma toe faaolaina i tatou e ala i le mana o le Talalelei. A o le i afio mai Keriso i le lalolagi, o lenei mea sa manatua pea e i latou sa aumau ai i le lalolagi o e sa talai atu i ai le Talalelei, e se tasi o sauniga, e aafia ai le taulaga e faia i manu, o se sauniga o se vaega o le taulaga sili o le a oo mai i le vaeluaga o taimi.²²

Fautuaga mo Suesuega

O le a le Togiola? O anafea na malosi ai lou lagona i le mana o le Togiola i lou olaga?
O le a le oti faaleagaga? Aisea “e sili ai lona matautia nai lo le oti faaletino”?
Ana faapea “e leai se auala e faasaoina ai na saunia” mo Atamu ma ana fanau, o le a se taunuuga mo i tatou? (Tagai 2 Nifae 9:6–9.)
O le a le mea sa faia e le Faaola ua mafai ai ona faasaoina mai i tatou mai le oti faaleagaga? O le a se mea e tatau ona tatou fai ina ia aloese mai ai i le oti faaleagaga? E faapefea ona tatou faaaoga le alofa tunoa ma le alofa mutimutivale o le Atua e faamama ai a tatou amioleaga”?
O a ni faamanuiaga ua oo mai i lou olaga ona ua e iloa e mafai e Iesu Keriso ona faamama mea sese tatou te fai ia i tatou lava ma isi? E faapefea ona tatou iloa nei foi faamanuiaga i olaga o isi?
O le a le uiga o le faaolaina? E faapefea ona faaolaina faaleagaga i tatou i le taimi nei? (Tagai Mose 6:64–68.) O a faamanuiaga e maua e i latou ua “faaolaina e le mamalu o le malo o selesitila”? (tagai foi MFF 88:28–29.)
O le a le “faamoemoega o lo tatou ola ai i lenei lalolagi”?
E faapefea ona avea le talia o le faamanatuga e fesoasoani e faatoilalo ai lo tatou oti faaleagaga? E faapefea ona tatou manatua pea le Faaola? O le a le mea tatou te fai e faamamalu ai le faamanatuga ma tausia le paia?
E faapefea ona tatou talia ma le faafetai le meaalofa o le Togiola i o tatou olaga?

Christ in Gethsemane — *O Keriso i Ketesemane*, tusia e Harry Anderson. E ala i Lana Togiola, sa faaolaina ai e Iesu Keriso ia tagata uma mai le oti faaletino. Ua ia faaolaina foi le tagata salamo mai le agasala.