Mauaina o se Molimau ia Iesu Keriso

E taua ia i tatou ona maua o se molimau ia Iesu Keriso i o tatou loto ma faia o mea ua Ia poloaiina.

Mai le soifuaga o Iosefa F. Samita.

I le taimi atoa o lana galuega sa molimau ai Iosefa F. Samita, o Iesu o le Keriso, o le Alo o le Atua soifua. Sa ia aoao atu o atalii ma afafine uma o le Atua e mafai ona maua lenei faaaliga faaletagata lava ia, le meaalofa lenei o le Agaga.

“A o avea au ma tama i le faatoa amataina o le galuega,” sa ia faamatala mai, “Sa masani na ou alu ma fesili atu i le Alii e faaali mai ia te au nisi o mea ofoofogia, ina ia mafai ai ona ou maua se molimau. Ae sa taofi mau e le Alii mea ofoofogia mai ia te au, ae faaali mai ia te au le upu moni, fuaiupu i le fuaiupu, upu i le upu, si mea itiiti iinei ma se mea itiiti iina seia oo ina Ia faailoa mai ia te au le upumoni mai le tumuai o lo’u ulu seia oo i alofivae o o’u vae, se ia aveesea atoatoa mai ia te au le faaletonu ma le fefe. Sa Ia le auina mai se agelu mai le lagi e faia lenei mea, pe ua ia tautala foi ma le pu a le agelu. E ala i le musumusuga o le leo itiiti ma le filemu o le agaga o le Atua soifua, sa Ia tuuina mai ia te au le molimau ua ou maua. I lenei mataupu ma le mana o le a ia tuuina atu i fanau uma a tagata o le malamalama o le upumoni o le a tumau ai ia i latou, ma o le a latou iloa ai le upu moni, e pei ona silafia e le Atua, ma faia le finagalo o le Alii e pei ona faia e Keriso.”¹

Sa molimau mai Peresitene Samita: “ Ua ou maua le molimau o le agaga o le Atua i lo’u loto e sili atu nai lo isi molimau, aua ua ia molimau mai ia te au, i lo’u loto atoa, o loo soifua lo’u Faaola, o Iesu Keriso. Ou te iloa o loo soifua o Ia, ma i aso e gata ai o le a Ia tulai mai i luga o le fogaelele, ma o le a oo mai o Ia i tagata ua saunia mo Ia.”²

Aoaoga a Iosefa F. Samita

E oo mai se molimau ia Iesu Keriso e pei o se meaalofa ofoofogia a le Atua.

Ou te manatu o mataupu uma lava o le Talalelei ua tatou maua o se meaalofa paia a le Atua mo fanau a tagata. O le meaalofa o le atamai, o le meaalofa o le malamalama, o le meaalofa o perofetaga, o le meaalofa o gagana, o le meaalofa o faamalologa, o le meaalofa o molimau, o le meaalofa o le poto, o nei mea uma ua fuafua e le Silisiliese ina ia tatou maua e ala i lo tatou usiusitai i mataupu o le ola ma le faaolataga.³

E le maua e tagata le meaalofa o … le molimau a le agaga o le Atua Soifua i o latou loto, [seia vagana] ua latou saili i ai. O le mataupu: Ia outou tuitui atu ona toina mai ai lea ia te outou; ia outou ole atu, ona foaiina mai ai lea ia te outou; ia outou saili, ona outou maua ai lea [tagai Mataio 7: 7–8]; afai tou te mananao i le poto, ina ole atu ia, e faapei o Solomona; afai tou te mananao i le malamalama ma le molimau o le agaga i o outou loto, saili i ai ma le maelega. Ia tuu oe lava i se tulaga ina ia e agavaa ai e maua, ona oo mai ai lea ia te oe o se meaalofa a le Atua, ma ia viia lona suafa mo le aumaia o le meaalofa.⁴

[O se molimau] e oo mai ia i tatou… aua ua tatou ola e tusa ai ma le mataupu faavae o fesootaiga mai le Atua i le tagata. Tatou te talitonu, tatou te salamo ma tautau atu a tatou agasala, tatou te faia lena e pei ona finagalo ai le Alii ina ia mafai ona maua le faamagaloga o a tatou agasala, ma tatou maua ai le meaalofa a le Agaga Paia. Ua o gatasi o tatou manatu ma le agaga o le Atua, ma le auala ua faaaogaina e le Atua mo le faaalia mai o Lona finagalo i le fanau a tagata.

O lenei, o se mea silisili mo se tasi ona maua le molimau i lona loto e uiga i le misiona paia a le Alo o le Atua ma le misiona paia a le perofeta o Iosefa Samita. … Ua tatou lagona i o tatou loto le moni o mataupu ua toefuataiina mai e ala i le perofeta o Iosefa Samita, ma ua tatou lagonaina lenei mea ona ua tatou, tuu i tatou lava i se tulaga e fesootai ai ma le agaga e faalogo i le leo pe a tautala mai ia i tatou. E tautala mai le Agaga o le Atua i o tatou agaga. E le masani ona fesootai mai le Alii ia i tatou e ala i o tatou tulaga faalenatura, peitai a Ia fetalai mai, e fetalai mai i le vaega o loo ola pea; e maua e le agaga o le tagata le fesootaiga ua tuuina mai e le Alii i Lana fanau, ma o lea e tatau ai ona tatou ola e tusa ai mo le taliaina.⁵

E tatau ona tatou maua le malamalama [o le molimau] mai faaaliga, e le mafai ona tatou faia i lo tatou lava atamai. O le a aumaia e le Atua ia i tatou le poto ma le malamalama, o le a ia taitai i tatou i le ala o le upumoni pe afai tatou te tuuina atu lo tatou faatuatua atoa ia te ia ae le o tagata.⁶

O le meaalofa mai le Atua, pe a tuulafoaia, pe faaaoga faaletatau, o le a aveesea mai i le taimi e tatau ai; o le molimau o le upumoni o le a le tumau ma se tasi ua maua, pe a le faaaogaina lea meaalofa paia mo le alualu i luma o tagata taitoatasi ma tagata lautele.⁷

O lenei faamaoniga sao, e ala mai i le usiusitai ma le faataunuuina o mataupu o le ola e faavavau, o loo faaauau ona faamautuina, e pei ona sa i ai, e ala i le “fuaiupu i le fuaiupu ma le upu i le upu,” e ala i faaaliga a le Agaga Paia, o le punavai faifaipea o le poto, o le fiafia ma le olioli, e faalatalata atu ai le tagata ua ia maua i le Atua, ma mulimuli ane ona avea o ia e faapei o Lē na foafoaina o ia.⁸

E molimau mai e le Agaga Paia i o tatou loto o Iesu o le Keriso.

O Iesu… o lo tatou taitai, o ia o lo tatou faataitaiga. O le ala ua ia faailogaina e ao ona tatou savavali ai, pe a fai tatou te mananao e ola, ma faapaleina faatasi ma ia i lona malo.E ao ona tatou usiusitai ma tuu atu lo tatou faatuatua ia te ia, ma ia iloa o ia o le Faaola o le lalolagi.

E le o se mea faigata ia te au ona talitonu i lenei mea; ou te faitau i le Tusi Paia ma ua ou maua ai faamatalaga o le tele o ana galuega, fetalaiga, finagalo, ma faataitaiga. Ma ou te le talitonu e i ai se alii po o se tamaitai e sao ma faamaoni e maua lenei poto e mafai ona faitau tusitusiga o le Feagaiga Fou ma molimau o loo i ai le Faaola, e aunoa ma se lagona loloto o ia lea e pei ona valoia mai. O tagata uma e sao, ma faamaoni, ua latou maua le Agaga Paia, ma o lenei avefeau paia i loto o tagata e molimauina le finagalo o le Atua; ma pe a maea ona faitauina nei tusitusiga musuia, ma le loto faamaoni ma le agamalu o le agaga, e aunoa ma se faamaualuga ma manatu taufaasese e afua mai i tu masani ma aoaoga sese, o le Agaga o le Alii e molimau mai i gagana e lē mafaaseseina, e mu ai le loto, o lea, ou te talitonu ai o Iesu o le Keriso, le Faaola, le Alo e Toatasi o le Tama; ma lenei foi e ala i le faitau i le Tusi Paia.

Pe tatou te faalagolago ea i le Tusi Paia mo lenei talitonuga maumaututu ma le malamalama? Leai, faafetai i le Alii tatou te le faia. O a nisi auala tatou te ta’u atu ai lenei malamalama ma faamaonia ai lenei molimau? Ua ia i tatou le Tusi a Mamona, o le “ laau a Efaraima,” ua tuuina mai ia i tatou e ala i le meaalofa ma le mana o le Atua, o loo molimau foi ia te ia, o loo faailoa mai ai le talaaga o lana misiona ma galuega ma e sa aumau ai i lenei konetineta, ina ua mavae lona toetu mai i le oti, ina ua ia maliu mai i lenei aai e asiasi i isi o “ana mamoe,” ma tuufaatasia i latou i le lafu e tasi, ina ia avea foi i latou ma ana mamoe, ma ia o lo latou taitai mamoe sili. E ese mai lena lagona o loo i ai le tusi lava ia, o loo i ai le tatou molimau lagolago ia te ia ua faaliliuina e ia, o le na faamauina lana molimau i lona toto; faapena foi ma isi molimau, ua molimau i le lalolagi atoa sa latou vaai i papatusi ma tusitusiga o loo i ai, na faaliliuina mai ai le tusi. …

O lea, la, o molimau e lua—o le Tusi Paia ma le Tusi a Mamona, ua femolimauai i le upumoni e tasi, o Iesu o le Keriso, na ia maliu ma toe soifua mai, ina ua uma ona ia motusia noanoataga o le oti ma manumalo ai i le tuugamau. O lenei molimau faaopoopo o loo i ai tagata o le Au Paia, e sili atu nai lo molimau o loo i ai i le lalolagi Kerisiano o e le talitonu i le Tusi a Mamona.

Ae pe na o le pau ea lea? Leai. O loo ia i tatou se isi tusi, o le Mataupu Faavae ma Feagaiga, o loo i ai faaaliga mai le Atua e ala i le perofeta o Iosefa Samita, o le na soifua faatasi ma i tatou. O afioga ia a Keriso, ua folafola mai o ia lava lea na afio mai i tagata Iutaia, o le sa tuuina ae i luga o le satauro, sa tanumia i le tuugamau, na motusia noanoataga o le oti ma toe tu ae nai le tuugamau. … O lenei, la, o le isi molimau o le upumoni paia; ma ua ia i tatou ni molimau se tolu. Mai le fofoga o ni molimau a se toalua poo se toatolu, ua ta’u mai ai ia te i tatou, o le a faataunuuina mea uma; ma o le molimau a le toalua poo le toatolu o le a faamaonia ai pe faamalaiaina ai i tatou.

Ae pe o le a faamalieina ai au i lenei mea? Atonu, pe afai ou te le toe maua se isi malamalama sili poo le poto. Ae afai e oo mai le malamalama sili, ma ua ia te au le avanoa ou te maua ai o le a le mafai ona faamalieina au i le malamalama itiiti. E le mafai lava ona faamalieina pe faafiafiaina tatou mulimuli ane, sei vagana ua tatou maua le atoatoaga o le malamalama ma faamanuiaga ua saunia mo e amiotonu. …

Ua tuuina mai ia i tatou ina ia iloa nei mea mo i tatou lava. Ua fetalai le Atua o le a ia faaalia nei mea ia i tatou; ma o le ala lea ua tuuina mai ai le Agaga Paia ia i latou uma e tatau ona latou maua e tuuina atu i latou lava, e molimau i le Tama ma le Alo, ma ave foi mea a le Alii ma faasino atu i tagata. O talitonuga maumaututu atonu sa tatou maua muamua e tusa ai ma le upumoni ua faamaonia mai e le Agaga Paia, ua aumai ai le faamaoniga tonu o lo latou sa’o, e ala i lenei tatou te maua ai le malamalama faaletagata, e le pei ona sa ta’uina mai muamua, ae o le sa vaaia, lagona, faalogoina, ma iloa e ia lava.

O lenei, i le tulai atu ai i o outou luma, ou uso e ma tuafafine, o se mea faigaluega lotomaualalo i aao o le Atua, ou te molimau atu, e le ona o le poto ua ou maua mai tusi, ae ala mai faaaliga a le Atua ia te au, o Iesu o le Keriso. Ou te iloa o loo soifua lo’u Togiola; ou te iloa e ui ina faaumatia lenei tino, ae ou te iloa atu le Atua i lo’u tino, ma o le a ou talia o ia mo au lava ae le mo se isi. Ua oo mai le malamalama ia te au, ma o loo i totonu o lo’u loto ma lo’u mafaufau, ma o lena ou te molimau ai, ma e ala ai o lau molimau, ma ou te iloa mea ou te tautala i ai. …

Pe ua na o au ea? Leai; o loo i ai le faitau fia sefulu o afe i le asō e mafai ona molimau atu. O i latou foi, ua iloa mo i latou lava; ua faaalia e le Atua ia i latou, ua latou maua le Agaga Paia, o le ua molimau i nei mea i o latou loto, ma o i latou foi ua le faalagolago i tusi, poo upu a isi, aua ua latou maua le poto mai le Atua e i latou lava, ma iloa ai e pei ona ia silafia ma vaai e faapei ona ia silasila e faatusa i nei mea faigofie ma le taua.⁹

O le molimau ia Iesu Keriso e musuia ai i tatou e faia mea ua ia poloai ai.

Ua tatou talanoa e uiga i le Faaola, o Iesu le Alo o le Atua, ma e tatou te lagona le saogalemu ma le malosi ia te ia, ma o tatou vae ua faalagolago i luga o le faavae tonu o le upumoni e faavavau pe afai o le agaga o Keriso ua i totonu o o tatou loto.

Ou te fia faapea atu i ou uso ma tuafafine, afai e i ai se tagata i le lalolagi atoa ua ia maua i le loloto o lona loto ma le faamoemoe i lona agaga le alofa o Keriso e faapei o au, ou te fia vaai lava ia te ia, ou te fiafia e fesootai ma lenei tagata. O Keriso o le Faaola lava o lo’u agaga, o le Faaola o tagata. Sa ia ositaulaga i lona soifua mo i tatou ina ia faaolaina i tatou, sa ia talaia noanoataga o le oti, ma sa manumalo i le mana o le tuugamau, ma finagalo ia tatou mulimuli ia te ia. Ua ia toetu mai le oti i le toe maua o le ola, sa ia folafola mai o ia o le ala o le faaolataga, le malamalama ma le ola o le lalolagi, ma ou te talitonu i ai i lo’u loto atoa. E le gata ina ou talitonu i ai, ma e pei ona ou iloa o loo susulu le la, ua iloa foi o le talitonu ia te ia e faaosofia ai le lelei ae le o le tiapolo; ma e pei ona ou iloa o lona agaga e faaosofia ai le mama o le ola, ia faamamalu, ia faasa’o, i le faamaoni ma le amiotonu, ae lē o le tiapolo, ina ia ou iloa ai i faamaoniga uma e mafai ia te au ona talitonu o Iesu o le Keriso, o le Alo o le Atua Soifua, o le Faaola o tagata soifua.

E ui i nei mea uma, ma lenei faamaoniga i lo’u loto, ma lenei iloa ua ou maua, afai o le a gata ai iinei, mata o le a le aoga ia te a’u? O le a le aoga o lenei malamalama ia te au? O le a le mea e maua ai i lenei malamalama lava ia? O le a maua ai le mea lenei, ina ua maua le molimau i lo’u loto, ina ua maua i lo’u agaga le molimau i le agaga o le Atua soifua, o Iesu o le Keriso, ma taofi ai iina ae lē faalauteleina atili, o lena lava molimau i lo’u agaga o le a faaopoopo i lo’u faasalaga e faavavau. Aisea? Aua e le gata o lo tatou tiute o le iloa o Iesu o le Keriso ae faapea foi ma le aafiaga o le agaga i o tatou loto. E le gata ina tatau ona i ai o lana molimau i totonu o o tatou loto, ae taua foi lo tatou faia o mea ua ia poloaiina, ma le galuega o le amiotonu sa ia faia, ina ia mafai ai ona tatou maua le faaeaga o loo saunia mo ana fanau o e faia e faapei foi ona talitonu; ma o i latou ua lē faia nei mea e mautinoa lo latou toilalo. “E lē sao atu i le malo o le lagi i latou uma o e fai mai ia te au, Le Alii e, le Alii e; na o le na te faia le finagalo o lo’u Tama oi le Lagi.” [Mataio 7:21.]

Ua fetalai mai le Faaola: “E toatele latou te fai mai ia te au i lea aso, Le Alii e, le Alii e, matou te le i perofeta ane ea i lou igoa, o lou igoa foi na matou tulia ai temoni, o lou igoa na matou faia ai vavega e tele? Ona ou tautino atu ai lea ia te i latou, ou te le i iloa lava outou; ina o ese ia outou ia te au, o outou o e fai amioleaga.” [Mataio 7:22–23.] Ma aisea? Aua ua outou fai mai tou te alolofa ia te au, i o outou laugutu, ua outou fai mai ua outou talia au, i o outou gutu, poo a outou upu, ae ua outou lē faia o mea ua ou poloaiina outou e fai; ua outou le salamo ia outou agasala, ua outou le alolofa atu i le Atua ma o outou loto atoa, manatu ma le malosi, ua outou lē alolofa i o outou tuaoi e faapei o outou lava, ua lē papatisoina outou e se tasi ua i ai le pule e papatiso ai mo le faamagaloina o agasala; ua outou le maua le meaalofa o le Agaga Paia i le faaee atu o lima; ua outou le faailoa mai outou faatasi ma ou tagata; ua outou le o mai i la’u lafu; ua le faitaulia faatasi outou ma a’u mamoe, ma ua ou le iloa outou, “o ese atu ma au, outou e fai le amioleaga.” O le iloa o le faia o le lelei ae lē faia o le agasala lea. (Iakopo 4:17). O le tulaga lenei mo i latou ua na ona talitonu. Afai tou te talitonu, o le a le mea tou te lē faia ai mea ua ia finagalo ai?…

… E le lava ia te outou le faapea ifo o oe o le tagata o le Au Paia ae o au mea e fai, i lou olaga, i gaoioiga poo mea e fai, ua na ona e faia o ni taga faata’ita’i… o le tagata ua le talitonu i le Atua ma le misiona paia a Iesu Keriso. E le o le ala lea. O le a pulea oe e le tiapolo, o le a ia taitai seseina oe, ma faaleaga oe pe afai e te le salamo i gaoioiga poo mea e fai ua le tusa ai, ma le talafeagai ai, ma le talalelei ua e maua.¹⁰

E tatau ona tuuina atu o tatou loto ma agaga atoatoa i le alofa mo le Faaola.

O se molimau moni o se ‘olo malosi i taimi uma lava.¹¹

Ou uso e ma tuafafine, ua ou naunau e tuuina atu la’u molimau ia te outou; aua ua ou maua le faamaoniga ua puleaina ai lo’u tagata atoa. Ua magoto i le ta’ele o lo’u fatu; ua faatumulia aa uma o lo’u agaga; ma ua lagona ai e tatau ona fai atu i luma o nei tagata, ma e fiafia e maua le avanoa e fai atu ai i luma o le lalolagi atoa, ua faaali mai le Atua ia te au o Iesu o le Keriso, o le Alo o le Atua Soifua, o le Togiola o le lalolagi.¹²

Ua i ai ia te au le talitonuga faamaoni ia [Iesu Keriso]. O lo’u fatu ma lo’u loto atoa ua tuuina atu ma le alofa ia te ia. O ou faamoemoega ua fausia i luga o Lona uiga matagofie ma Lana upu. Sa leai se agasala ia te ia; sa leai Sona pona, ma sa pule i le mana i le ola e faavavau; sa ia tatalaina le faitotoa mai le tuugamau i le ola e faavavau mo au ma fanau uma lava a tagata. E leai se tuaoi o lo’u talitonuga ia te ia. Ua sili a’e lo’u alofa mo Ia i lo mea uma lava o i le lalolagi, pe afai ua ia te au le agaga o le talalelei e pei ona tatau ona i ai, ma e muamua ma silisili o Ia ia te au. E silisili o Ia i mea uma ua i ai i lenei lalolagi, ma sa afio mai o Ia e avea ma moli o le malamalama, o le taiala ma le faataitaiga, ma o la tatou matafaioi o le mulimuli lea ia te Ia.¹³

Fautuaga mo Suesuega

O le a le molimau? E faapefea ona tatou maua se molimau ia Iesu Keriso? O le a le vaega a le usiusitai i mataupu o le ola ma le faaolataga e fai i le atinaeina o se molimau?
E faapefea ona ola lau molimau “fuaiupu i le fuaiupu ma le upu i le upu”? O a faamanuiaga e maua e i latou o e maua pea faaaliga o le Agaga Paia?
O le a se mafuaaga e mafai ai ona aveesea le meaalofa o le molimau? E faapefea ona tatou tausi ia tatou molimau? O a ni taunuuga e mulimuli mai i le faatamala e tausi ma fafaga a tatou molimau?
E faapefea ona faaali atu le agaga faafetai mo le meaalofa o le molimau?
E faapefea ona avea le suesue i tusitusiga paia e fesoasoani ia i tatou ina ia maua ai se molimau ia Iesu Keriso? O le a le agaga tatou te suesue ai i tusitusiga paia ina ia ola ai a tatou molimau?
E faapefea ona tatou maua se malamalamaga faaletagata o Iesu o le Keriso, “e le’i ta’uina atu i ai muamua, ae o lē sa vaai, lagona, faalogoina, ma iloa e ia lava”?
E faapefea e le molimau ua maua e ala i le Agaga Paia ona sili ae i isi faamaoniga uma? Ina ua faamanuiaina oe i le molimau mai le Agaga Paia, o le a sou lagona?
Aisea e alagatatau ai ona fai o mea ua poloaiina e le Faaola faatasi ai ma le talitonu ia te Ia? E faapefea ona faamalosia lau molimau e galuega o le amiotonu? E faapefea ona tatou “tausia le aafiaga o le agaga o le [Faaola] i o tatou agaga”?
E faapefea e le malosi o le molimau a Peresitene Samita i le Faaola ona pa’i atu i lou loto? E faapefea e molimau a le Au Peresitene Sili ma le Korama a Aposetolo e Toasefululua ona faamanuia outou? Ao tatou tuuina atu a tatou molimau, aisea e tatau ai ona taulai atu o tatou manatu ia Iesu Keriso?