Tutumau i le Upumoni Ina Nei Faaseseina Outou

E ao ona tatou ola ai i le mama, moni o mataupu o le talalelei a Iesu Keriso ma lafoai mea pepelo ma mea sese a i latou e tau faasese.

Mai le Soifuaga o Iosefa Samita

Na foi mai Iosefa F. Samita i lona aiga mai le misiona i Peretania Tele mo na o le lima masina ina ua valaauina o ia e Peresitene Polika Iaga e galue mo lana misiona lona tolu—o lana misiona lona lua sa i Atumotu o Hawaii. Ona o lona tomai i le gagana a Hawaii, sa valaauina ai e Peresitene Iaga ia galue o ia e fai ma faamatala upu mo Elder Ezra T. Benson ma Lorenzo Snow, o uso i le Korama a le Toasefululua. Ina ua latou tuua mo Hawaii i le tautotogo o le 1864, ua 24 tausaga o le soifua o Iosefa F. Samita.

Sa faapea mai Iosefa F. Samita i lana misiona: “O le faamoemoega faapitoa o la matou savali [o le] faamutaina lea o le gaoioiga pepelo a se tagata taufaasese. … o lē sa taufaasese i tagatanuu o loo auai i le Ekalesia, e le gata i mataupu faavae, ae faapea foi i faaaliga pepelo ua faia i lona lava malosi ma le pule. Na ia toe faatulaga le Ekalesia e tusa ai ma ona lagona, sa faauuina Aposetolo e Toasefululua ma isi au taitai, faatau atu ia i latou o latou faauuga, ma uuna’i faamalosi atu o ia i tagata e faapea o ia o se taitai ositaulaga tautupu, e ao ona latou matua faaaloalo i ai. Sa matou faafesagai ma ia, faamasino ia te ia e tusa ai ma ana gaoioiga sese, ma galulue ma le faatuatua e toe faafoi mai o ia, ae ua ia malosi pea e tumau e fai le mea sese ma ua faateaese mai ai i le Ekalesia. Ona faaaluina lea o lo matou malosi e toe faafoi mai i latou sa ia faaseseina, ma i lenei galuega, e tusa ai ma faamanuiaga a le Atua, sa matua manuia lava i matou.”¹ Ina ua tuua e Elder Benson ma Elder Snow ia atumotu, sa nofo ai pea Iosefa F. Samita seia oo i le taumalulu na sosoo ai e faaauau pea ona faatulaga mataupu o le Ekalesia i se tulaga lelei. I le taimi lea sa ia aoao ai i uso o le Ekalesia o e sa taitaiina i le mea sese e lenei tagata liliuese, ma manao ina ia salamo. I aso uma na totoe o lona soifua, sa aoao ai e Peresitene Samita ia le Au Paia i le taua o le iloa ma le tetee atu i aoaoga sese.

Aoaoga a Iosefa Samita

O tagata o le Au Paia e tatau ona tutumau i le upumoni e tusa poo le a le mea e oo mai.

Ua tatau ona lava lo tatou iloa i lenei taimi tatou te iloa ai e leai se tagata, leai se tasi, leai se vaega, ma e leai se faapotopotoga faalilolilo e mafai ona tuufaatasi i le malosi ma le pule e tatau ai e aveesea ai le faamoemoega o le Silisiliese, pe suia foi le alafua o Lana galuega. E toatele tagata taitoatasi ua tulai mai i le taimi ua tuanai, ma o nei tagata ua faaseseina o latou manatu o le a latou galueaina le toe faatulagaina maoae o le Ekalesia; sa latou manatu mo se taimi puupuu lava o le a lafoai ai e tagata uma o latou tulaga, o tulaga o le upumoni sa latou faaputuputu ma saunia mai le amataga o le Ekalesia seia oo mai i le taimi nei. O nei tagata sa manatu o le a mulimuli ia tagata i “leoleo mamoe fou,” ae o tagata o le Atua ua latou iloa le leo o le leoleo mamoe moni, ae o le leo o le tagata ese latou te lē iloa, e oo foi i le fautuaga a lē ua manatu ua i ai le pule ae lē o ia te ia. E lē mulimuli lava i so latou. O tagata o le Au Paia ua iloa le agaga o le Talalelei; ua latou malamalama i le agaga o le upumoni. Ua latou aoao i o latou tiute, ma o le a tutumau i le upumoni, e tusa lava poo le a le mea e oo mai.

Mai le amataga seia oo mai i le taimi nei, ua tatou faafesagai nei ma le lalolagi atoa; ma o le lalolagi atoa, pe a faatusatusa atu i ai, ua maea ona faatulagaina e faasagatau atu i le galuega a le Alii, e le ona o le inoino, poo le lagona i o latou loto e faia le agasala poo le faasagatau atu i le upumoni, ae ona ua latou lē iloa le upumoni, ma ona ua latou lē iloa le mea ua latou fai. E toatele ua faaseseina i le leo o le leoleo mamoe pepelo, ma ua faaseseina i uiga sese. Ua faaseseina i latou; ua latou le iloa le upumoni; ua latou le iloa la latou mea ua fai ma, o lea, ua latou faasagatau atu, e pei ona iai, i le upumoni, ua faasaga atu i le galuega a le Alii; e pei ona iai mai le amataga.Mai le aso sa muai faalauiloa mai ai e le Perofeta o Iosefa Samita lana faaaliga e oo mai i le taimi nei, o le fili o le amiotonu uma, o le fili o le upumoni, o le ola mama, o le mamalu, o le amio sao, ma le mama o le ola, o le fili o le Atua moni e toatasi, o le fili i faaaliga tuusao mai le Atua ma faaaliga mai le lagi i tagata, ua faasagatau atu i lenei galuega.

E te lē maua lava le uo i le amiotonu, le uo i faaaliga, le uo i le Atua, le uo i le upumoni, le uo i le ola amiotonu ma le mama o le olaga, poo lē ua faamaoni i le ola amiotonu ma ua lava le malamalama e iloa ai le upumoni mai le sese ma le malamalama mai le pogisa—Ou te faapea atu e te lē maua lava e pei o nei ua faasagatau atu i le galuega a Siona. O le faasagatau atu i le galuega a Siona o le faasagatau atu lea i le Atua, faasagatau i faaaliga mai le Atua, faasagatau i le agaga ua taitaiina tagata i le upumoni atoatoa lea e sau mai le sosia o le malamalama ma le poto, faasagatau atu i lena mataupu faavae ua aumai faatasi ai tagata ma aveesea ai a latou agasala, ia saili i le amiotonu, ia alofa i le Atua ma o latou loto atoa, manatu ma le malosi, ma alofa i o latou tuaoi e pei o i latou lava.²

Ia faaeteete i aoaoga pepelo

O nisi o tagata ua latou faagata le mana o le Atua nai lo le mana o tagata, ma o loo i ai nisi o nei tagata ia i tatou ma o loo i ai i o tatou faiaoga o aoaoga. Latou te aoao outou ina ia le talitonu i mataupu musuia o Tusitusiga Paia, e faalagolago ia matagi ma galu i le mana o le Atua; ma talitonu i le mana o le Faaola e tuli ai temoni, faatutu i e ua oti, poo le faia o mea ofoofogia, e faapei o le faamamaina o le lepela, ua o se tala fatu. Ua latou aoao atu ina ia outou talitonu e le’i faaalitino mai le Atua ma lona Alo o Iesu Keriso ia Iosefa Samita, ma ua na o se tala fatu, ae ua tatou iloa lelei lava; o le molimau a le Agaga ua molimau mai o le upumoni lenei. Ma ou te fai atu, ia faaeteete i tagata e o mai ia te outou ma a latou lava faamatalaga o mea e afua mai i tulafono faanatura e feteenai ma mataupu faavae o talitonuga faalelotu, ma faapea mai o le Atua e leai sona mana.³

I tagata o le Au Paia, o le talaiina o mataupu sese ua faafoliga mai o ni mataupu moni o le talalelei, atonu e mafua mai i ni vasega o tagata e lua, o i latou nei o:

Muamua—O le tagata valea ua leai se faamoemoe, o le leai o se poto ua mafua ona o lo latou lē magafagafa ma le faatamala, e galulue ae vaivai le taumafai, pe afai e i ai se taumafai, e faaleleia i latou lava e ala i le faitau ma suesue; o i latou ua mafatia i le ma’i e faapopoleina ai e mafai ona avea ma se ma’i e lē mafai ona togafitia—o le paie

Lua—O tagata faamaualuluga ma le fia iloa, o e ua talitonu ua sili atu lo latou iloa ma le malamalama nai lo se isi; o e ua faaliliuina tulafono i a latou lava faaupuga; ua avea i latou ma tulafono ia i latou lava, ma ua manatu o i latou lava o faamasino ia latou lava amioga. E sili atu le mata’utia o le valea nai lo le muamua.

Ia faaeteete i e paie ma e mitavale.⁴

O le taimi lenei, ua tatau i tagata o le Au Paia ona mautu i le molimau ua faavaeina e le Atua lana Ekalesia i le lalolagi mo le taimi mulimuli, ia tumau, e lē toe faatoilaloina pe faaleagaina; ma o le fale o le Atua o le fale o le tulaga maopoopo, o le tulafono, o le tulaga talafeagai, ma o tagata faatupu vevesi ma faalavelave, o ē ona o le vālea ma le manatu ia i latou lava, ua avea ai ma tagata ua tautatala i mea lē aoga, ae peitai ua faafoliga tele o ni perofeta ua i ai le mana ma isi tulaga faaleagaga ma meaalofa, ua lē tatau ona i ai se aafiaga ma i latou, pe faalavelavea foi le Au Paia i o latou agaga e nei uiga ma teori poo manatu. O le Ekalesia a Keriso o loo i le Au Paia. Ua tuuina atu atoa i ai le tulafono a le Atua mo lona lava puleaina ma lona faauauina. O loo i ai auala uma mo le faasa’oina o sese uma poo le taufaaleaga poo le sese e oo mai i lea taimi ma lea taimi, ma e faia e aunoa ma se vevesi, poo le misa; e mafai ona fai i le ala o le faasologa faifai malie— atinae, i le faatupulaia o le malamalama, atamai, onosai ma le alofa mama.

O korama pulefaamalumalu o le Ekalesia o le a fausia pea lava pea mai i alii faapenei, o le a tofia i latou i lenei ala, ina ia mautinoa ai e le Au Paia o le malosi o le atamai, amiotonu, ma le faataunuuina ma le maelega o tiute, o le a faatulagaina ai aiaiga a i latou ua faatuatuaina i le pulega o mataupu o le Ekalesia.⁵

Mai i vaitaimi o Hiram Page, (MFF, Vaega 28), i ni vaitaimi eseese sa i ai ni faaaliga mai agaga leaga i tagata o le Ekalesia. O nisi o taimi ua oo mai nei faaaliga i alii ma tamaitai ona o a latou soligatulafono ua faafaigofie ai ona avea ma mailei a le tiapolo. O nisi o taimi o tagata ua faamaualuluga ia i latou lava ona o le tausia lelei o tulafono ma sauniga ma faiga a le Ekalesia ua taitaiseseina ai e agaga sese, o e ua faaaogaina ia aafiaga ua faafoliga o lena ua oo mai le Mana mai luga e oo lava i nei tagata, ua manatu ua “filiflilia lava,” ua faigata ona latou iloa le eseesega taua [Mataio 24:24]. Ua faaliliuina e Satani ia lava ina ia avea ma “agelu o le malamalama” [2 Korinito 11:14; 2 Nifae 9:9].

A faapea o faaaliga, miti, gagana, perofetaga, uiga faaalia poo nisi lava meaalofa matautia poo musumusuga ua faaali mai ai se mea ua le o gatasi ma faaaliga ua talia a le Ekalesia po ua feteenai ma faaiuga a ona taitai filifilia, e mafai ona iloa e tagata o le Au Paia e lē ā le Atua ia, e tusa lava poo le a le talafeagai ua faafoliga mai ai. Latou te iloa foi o le taitaiga o le Ekalesia e oo mai e ala i faaaliga, e ui mai i lona ao. O tagata faatuatua uma lava o le Au Paia ua agavaa mo musumusuga a le Agaga Paia mo i latou lava, mo o latou aiga, ma i latou ua tofia ma faauuina latou te taitaia. Ae soo se mea lava e lē ogatasi ma mea e sau mai i le Atua e ala mai le ao o le Ekalesia, e le tatau ona taliaina o se mea e aloaia pe faatuatuaina.⁶

O meaalofa a le Agaga ma le mana o le Perisitua paia e a le Atua ia, ua tuuina mai mo le faamanuiaina o tagata, e faamalosiau ia i latou, ma faamalosia ai lo latou faatuatua. Ua iloa lelei e Satani, o lea ua ia saili ai e ala i vavega faafoliga e faapogisaina ma faaseseina ai le fanau a le Atua. Manatua mea sa faia e taulaitu o Aikupito i lo latou taumafai e faasese Farao e uiga i le mana o le misiona a Mose ma Arona. …

O le mana e faia ai mea ofoofogia e mafai ona sau mai le tiapolo e pei ona folafola mai e Keriso i ana perofeta e uiga i le faamasinoga tele: “E toatele latou te fai mai ia te au i lea aso, Le Alii e, le Alii e matou te lei perofeta ane ea i lou igoa, o lou igoa foi na matou tulia ai temoni, o lou igoa foi na matou fai ai vavega e tele? Ona ou tautino atu ai lea ia te outou, ou te lei iloa lava outou; ina o ese ia outou nai ia te au, o outou o e fai amioleaga.” (Mataio 7:22-23.)

O le matautia ma le mana o le tiapolo i togafiti faataulaitu ua le o i togafiti faataulaitu lava ia, ae ona o le naunautaiga valea ua talitonu ma iite ai tagata e faatatau i nei mea. E matautia le talitonuga e faapea e mafai e le tiapolo ona faatiga pe faamanua se alii poo se tamaitai aemaise lava pe a faapea o ni tagata o le Ekalesia a Keriso—[sei vagana] o le alii poo le tamaitai ua ia faatuatua e mafai ona faamanualia o ia e le aafiaga ma tulaga faapenei. Afai latou te fiafia i ai i lenei manatu, ona avea ai lea o i latou ma e faatuatua i nei talitonuga o i latou lava. E leai se malosi o i togafiti faataulaitu lava ia, se i vagana ua talitonu i ai ma talia.⁷

Aloese mai le taulai atu na o se mataupu faalelotu e tasi.

Uso e ma tuafafine, aua nei i ai ni faiga masani e taulai atu ai i se mataupu e tasi o le talalelei. O faiga faapenei e matuia i le Ekalesia a Keriso. E matautia aua latou te ave ai le faamuamua i nisi mataupu poo manatu ae faagalo ma faaitiitia ai le taua o isi e tutusa lava lo latou taua, tutusa le tuufaatasiga, tutusa le faaolaina e faapei o mataupu faavae poo poloaiga manaomia.

O le taulai i le na o se tasi o mataupu [faalelotu] ua maua ai e i latou o loo faataunuuina se vaaiga sese i le talalelei a le Togiola; latou te faaseseina ma aveesea ai le sologa lelei o ana mataupu ma aoaoga. O le manatu e le talafeagai. O mataupu ma lona faaaogaina uma e faaalia mai le Atua, ua alagatatau mo le faaolaina o tagata, ae o le ave o le faamuamua i le na o se tasi o ia mataupu ua faalafi ma faaitiitia ai isi mataupu uma, ua lē poto ma e matautia; ua aveesea ai lo tatou faaolataga, aua ua faapogisaina ai o tatou mafaufau ma faapuaoa ai lo tatou malamalama. O lenei manatu, poo fea lava e agai i ai, e faapulaitiiti ai le vaai mamao, e faavaivai ai le vaai faaleagaga, ma faapogisa ai le mafaufau, o lona taunuuga i le tagata ua aafia ma pisia ai i lenei vaaiga faalemafaufau ua maua ai o ia i se tulaga e faaosoosoina ai e le tiapolo, a lē ala i le faaitiitia ai o le malamalama poo le faaseseina ai o le vaai, ma faamasino sese ai ona uso ma maua ai le avanoa i le agaga o le liliuese. Ua lē faamaoni o ia i luma o le Alii.

Ua matou iloa lenei faafitauli; o tagata o le Au Paia ua taulai i na o ni mataupu taitasi ua faigofie ona faamasino ma teena o latou uso ma tuafafine o e le o taulai i se ala e tasi o mataupu e fiafia i ai e faapei o i latou. O le tagata ua na o le Upu o le Poto i lona mafaufau, ua faigofie ona sailiili i mea sese e tele i tagata uma o le Ekalesia o e o loo fiafia i le manatu lautele o le taua o isi mataupu faavae o le talalelei.

E i ai le isi vaega o lenei faafitauli—o le tagata o loo i ai lenei masani ua faigofie ona manatu “O au ua sili ae lou tulaga” ua lagona le faafefeteina ma le faamaualuga, ma ua vaai atu ma le le talitonu, atonu e le o se lagona malosi tele, i ona uso ma tuafafine o e e le o atoatoa ona ola ai i lena lava tulafono. O lenei lagona e faatiga ai ona uso a tagata ma faamaasiasi ai i le Alii. “E muamua le faamaualuga i le malaia, e muamua foi le loto faasiasia i le pa’ū.”—(Faataoto 16:18.)

O loo i ai upumoni sili i le ata o le togiola e taua. E le tatau ona faatuatuanai; e leai se isi e ao ona faamuamua i o latou luma.. O le tulaga faatamā o le Atua, o le mana o le faaolataga a lo tatou Alii ma le Faaola, o le toefuataiina mai o le talalelei i nei aso e gata ai, e ao ona talia i o tatou loto atoa. E le mafai ona tatou faapea e suia le lē lava o le faatuatua i nei aoaoga faavae taua e ala i le matua alo ese mai mea lē mama, e ala i le totogi faamaoni o le sefuluai mai o tatou “aneto ma le kumina” [tagai Mataio 23:23], poo le tausia o soo se sauniga e faataunuuina. O le papatisoga lava ia e aunoa ma le faatuatua i le Atua ua le aoga lea.⁸

O le tausia o le upumoni e tuusaoloto ai i tatou mai le agasala ma le pogisa.

Ina ia lē olegia i tatou, taitaiina i le sese, faafelafoaiina e matagi uma o mataupu faavae, o manatu valea, poo togafiti leaga a tagata, poo le mulimuli i le valaau pepelo, Le Alii e, o iinei le Keriso, po o iila [tagai Mataio 24:23], o lea ua faatuina ai e le Atua le faatulagaga moni e fesootai ai i le va o ia ma le tagata, ma ua faatuina i lana Ekalesia, ma lana upumoni o le a lelei ona faia e tagata uma e usiusitai, sei vagana ua olegia i latou. O mea e talafeagai ma lenei e ā le Atua ia, o mea e feteenai ma lenei e sau mai lalo.⁹

O le faatinoga i aso uma … o le saili i le alofa tunoa paia ma le faamagaloga a o tatou savavali i luma, ua aumai ai ia i tatou le mana e sola ese mai ai i le tiapolo, e mafai ona foia e ala i le o ese filemu mai ia i latou.¹⁰

E matua leai lava se avanoa mo le tagata o loo fiafia i le Agaga Paia o le Atua e talitonu ai e i ai ni aafiaga a [togafiti faataulaitu ma isi tiapolo faapena] i luga ia te ia. O le fiafia i le Agaga Paia o se faamaoniga mautu lea e tetee atu ai i aafiaga uma a le tiapolo.¹¹

Ou te talitonu o le toatele o tagata o le Au Paia o loo faatupulaia lo latou faatuatua. Ou te talitonu foi, o le toatele o tagata o le Au Paia ua lava lo latou poto, ua lava lo latou malamalama ma ua lava le vaega o le Agaga o le Atua soifua i o latou loto, e filifili ai i le moni ma le lē moni, i le sa’o ma le sese, ma le malamalama ma le pouliuli; ma ou te faapea atu ou te talitonu ua lava lo latou iloa e usiusitai ai i le mataupu faigofie, mama, ma le moni o le talalelei a Iesu Keriso, e sili ae nai lo talitonuga o tagata atamamai, poo saienitisi, poo soo se isi lava. E leai se saienisi, leai se filosofia e sili ae i le upumoni a le Atua Silisiliese.

Sa fetalai le Alii, “O lau afioga o le upumoni” [tagai Ioane 17:17], ma ioe o lea lava; ma ou te talitonu ua lava le iloa e tagata o le Au Paia e uiga i le afioga a le Atua e iloa ai o lana upu pe a latou vaai i ai ma faateaese pe afai ua lē o lea; ma o le a latou talia afioga a le Atua, aua o le upumoni lea. E pei ona fetalai le Faaola, “Afai tou te tumau pea i la’u mataupu, o ou soo moni outou, ioe; e iloa foi e outou le mea moni, e tuu saoloto foi outou e le upumoni.” [tagai Ioane 8:31–32].

Ou te talitonu o tagata o le Au Paia, aemaise lava alii ua taitai ia Isaraelu, ua lava lo latou iloa ma le malamalama i mataupu o le talalelei ua latou iloa le upumoni, ma ua tuu saoloto i latou ona ua latou maua lea—saoloto mai le agasala, saoloto mai le sese, saoloto mai le pogisa.¹²

Fautuaga mo Suesuega

E mafai faapefea ona tatou aloese mai le “faaseseina e le leo o le leoleo mamoe pepelo” ma iloa le leo o le Leoleo Mamoe Moni? E faapefea ona fesoasoani lenei ia i tatou ina ia “tumau ai i le upumoni, poo le a lava le iuga”?
E mafai faapefea ona tatou tulai atu e tetee i aafiaga i lo tatou siosiomaga ua “faasaga agai mai i le galuega a le Alii”?
O a ni auala ua taumafai ai tagata o nei aso e “faaitiitia le mana o le Atua i le malosi o tagata”?
E mafai faapefea ona taitaiina e le faamaualuga i tatou i le sese? E faapefea e le paie ona faia e pei o lea? Aisea ua taua tele ai le lē faaseseina o i tatou i le “laugaina mai o mataupu pepelo” e “le paie ma le faamaualuga”?
O a ni timaiga ua tuuina mai e le Alii e faatatau ia i latou ua “faafoliga ua i ai le mana o perofetaga”? (tagai foi MFF 42:11.)
E mafai faapefea ona matautia le gauai i le na o se tasi o se mataupu faalelotu, i tagata taitoatasi ma le Ekalesia? Ua lē lava i se a le usiusitai faamaoni i se sauniga faaalia e faafetauia ai le vaivai o le faatuatua i “mataupu faavae taua”?
E mafai faapefea ona tatou aloese mai le faaseseina ma taitaiina i le “felafoaiina i matagi uma o mataupu faavae”?
E faapea ona tuu saolotoina i tatou e le upumoni? E faapefea ona tatou faaaogaina le meaalofa o le Agaga Paia e fesoasoani ia tatou iloa ai le lelei mai le leaga ma taofia ai aafiaga uma a le tiapolo?