Usiusitai i le Tulafono o le Sefuluai

O i latou e usiusitai i le tulafono o le sefuluai ua fesoasoani e faataunuuina le faamoemoega o le Alii ma ua agavaa ai mo ana faamanuiaga.

Mai le Soifuaga o Iosefa F. Samita

I le faaiuga o le 1800, sa feagai ai le Ekalesia ma le aitalafu tele, e sili atu i le miliona tala. O lenei avega tau tupe sa mamafa lava i le finagalo o Iosefa F. Samita. I le Konafesi aoao ia Oketopa 1899 sa ia saunoa ai: “Ua tele a tatou faatonuga aoga e faatatau i o tatou tiute o tagata o le Au Paia, e le gata e faatatau i le tulafono o le sefuluai, ae faapena foi ona aafia ai ma isi mataupu, ua tutusa le taua i lo latou faatulagaga e faapei o le tulafono o le sefuluai. E leai se mea, e sili atu lona taua mo le manuia o le Ekalesia i le taimi nei nai lo le manatunatu i lenei tulafono, o nei mea o le a tuuina i le fale teu oloa a le Alii, e faafetaia’ia ai manaoga o tagata.”¹

I se tasi o aoauli i le fitu tausaga mulimuli ane, sa sau ai Peresitene Samita mai lona ofisa ma maua lona afafine o Rasela i luma o le poletito o le Fale o le Ofagapi.

“O fea lou tina?” sa ia fesili ai.

“Ou te le iloa,”

“Mata o fea se mea o i ai?”

“Ou te le iloa.”

“O le a le taimi e sau ai iinei?”

“Ou te le iloa, Papa, e le tele so’u iloa. Faatoa ou taunuu mai le aoga.”

“Ia, pepe,” sa ia faapea atu ai, “Ou te manao i lou tina ina ia muamua ona ia iloa, ae ona e te lē o iloa se mea o lea la o le a ou ta’u atu ia te oe.” Sa ia umia se fasipepa i lona lima.

“O e vaai mai i le pepa lenei?”

“Ioe alii,”

“O lona uiga ua lē o toe i ai nei se aitalafu a le Ekalesia.” Sa ia soisoi. “O lea la ua i ai se mea moni ua e iloa!”²

Aoaoga a Peresitene Iosefa F. Samita

O le usiusitai i le tulafono o le sefuluai ua faatumauina ai lo tatou faamaoni i le malo o le Atua.

Ua manaomia e le Atua le tasi o vae sefulu o a tatou mea ina ia teuina i lona fale teu oloa; ma ua tuuina mai lenei mea o se tulafono tumau i Siteki uma o Siona.³

E ala i lenei mataupu (sefuluai) o le faamaoni o tagata o lenei Ekalesia o le a suesueina. O lenei mataupu o le a iloa ai poo ai e mo le malo o le Atua ae pe o ai foi o loo tetee i ai. E ala i lenei mataupu e mafai ai ona iloa poo ai ua tuuina atu o latou loto e faia le finagalo o le Atua ma tausia ana poloaiga, ma ua faapaiaina ai le laueleele o Siona i le Atua, ma pe o ai foi i latou ua tetee i lenei mataupu ua aveesea i latou mai faamanuiaga o Siona. E tele le taua o le fesootai ma lenei mataupu, aua o lenei o le a iloa ai poo tatou faatuatua pe le o faatuatua foi. I lenei tulaga e faapei o le taua o le faatuatua i le Atua, e faapena foi le salamo mai agasala, ma le papatisoga mo le faamagaloga o agasala, ma le faaee atu o lima mo le meaalofa a le Agaga Paia.⁴

O le tulafono o le sefuluai o se suega e faamaonia ai tagata taitoatasi. Soo se tasi e le usiusitai i lenei mataupu o le a iloa ai o se tagata ua tetee i le manuia o Siona, o le ua tuulafoai i lona tiute o se tagata o le Ekalesia, ma se ua leai se mea e faia i le faataunuuina o le alualu i luma faaletino o le malo o le Atua. Ua ia le foai se mea, e le gata, i le faasalalauina o le talalelei i malo o le lalolagi, ae ua ia faatuatuanai foi i le faia o mea e mafai ona agavaa ai o ia e maua faamanuiaga ma sauniga o le talalelei.⁵

O le tausia o le tulafono o le sefuluai e faia i le loto fuatia ifo. E mafai ona ou totogi la’u sefuluai pe leai foi, e pei ona ou filifili ai. O se mataupu o le filifiliga ia te au, pe ou te faia pe leai; ae peitai, o le lagona ou te maua, faamaoni i le Ekalesia, faamaoni i ana mea o loo fai, ma talitonu ua sa’o ma fetaui le tausia o le tulafono o le sefuluai ua ou usiusitai i ai—i lea lava mataupu faavae ou te manatu e sa’o ia te a’u le tausia o le tulafono o le salamo, ma le papatisoga, mo le faamagaloga o agasala.⁶

O i tatou e le’i totogia a tatou sefuluai i le taimi ua tuanai, ma o loo nofo aitalafu ai i le Alii, ma ua tatou le i ai i se tulaga e ono mafai ai ona totogi, e lē o toe manaomia e le Alii lea tulaga, ma o le a faamagalo i tatou mo le taimi ua tuanai pe afai o le a tatou tausia lenei tulafono ma le faamaoni i le lumanai. E matua agalelei lena, ma e ou te matua faafetai ai.⁷

Sa ou fai atu, ma e o le a ou toe fai atu, o le alii ma le tamaitai e totogi pea lana sefuluai o le a lē liliuese lava. E le afaina pe o le a le itiiti pe tele; o le tulafono lenei a le Alii; o la tatou sosia o mea tautupe mo le Ekalesia, o le finagalo o le Atua, ma e sa ia saunoa mai o i latou o e lē usiusitai ua lē agavaa mo se tofi i le malo o Siona. E leai se tagata e liliuese pe afai o loo totogi lana sefuluai. O se tulaga talafeagai. Aisea? Aua pe afai o i ai le faatuatua e totogi ai lana sefuluai ua i ai foi lona faatuatua i le Ekalesia ma mataupu o le Talalelei, ma o loo i ai ni mea lelei ia te ia, ma o loo i ai foi sina malamalama ia te ia. Afai na te faia lea mea, o le a lē faatoilaloina lava o ia e le tiapolo ma o le a lē taitai seseina o ia.⁸

O le sefuluai o le tulafono a le Alii o tupe maua mo Lana Ekalesia ma le faamanuiaina o le Au Paia.

O le tulafono o le sefuluai o le tulafono o tupe maua mo le Ekalesia a Iesu Keriso o le Au Paia o Aso e Gata Ai. A aunoa ma lenei, o le a le mafai ona faaauau le faamoemoega o le Alii.⁹

O le Alii … sa ia tuuina mai le tulafono o le sefuluai, ina ia mafai ai ona maua ni mea i le fale teu oloa a le Alii mo le faataunuuina o le faamoemoega ua Ia finagalo i ai; mo le faapotopotoina o e matitiva, mo le folafolaina o le talalelei i nuu o le lalolagi, mo le tausia o i latou o e ua manaomia e tuuina mai pea o latou loto, i aso uma, i le galuega a le Alii, ma i latou ua alagatatau ona tuuina mai so latou sao. A aunoa ma lenei tulafono o le a le mafai ona faia nei mea, e le mafai foi ona fausia ma tausia ia malumalusa, pe fafaga ma faalavalava i e matitiva. O lea o le tulafono o le sefuluai ua alagatatau mo le Ekalesia, o lona taua ua mafua ai ona faataatia e le Alii le faamamafaga i ona luga.¹⁰

[O le sefuluai] ua faaaoga e faaauauina ai sauniga o le maota o le Atua i totonu o. … malumalusa. O le faitau afe ma afe o tala o le sefuluai o loo faaaogaina mo le aoaoina o le autalavou a Siona, ma le tausia o aoga a le Ekalesia. O le faitau afe o tala o loo faaaluina e fafaga ma faalavalava ai e matitiva, ma tausia i latou ua faalagolago i le Ekalesia. Ua latou vaai atu i lo latou “tina” mo le fesoasoani ma le lagolago, ma e ua sa’o ma alagatatau i le Ekalesia ona tausia ona tagata matitiva ma ua lē tagolima, vaivai ma leai se fesoasoaniga, i le mafai e tatau ai.¹¹

Ua faaali mai e le Alii le auala e vaavaaia, ma tausia ai lenei tupe [sefuluai], e faapitoa lava, e le Au Peresitene o le Ekalesia ma Fautua Maualuga o le Ekalesia (o i latou ia, o Aposetolo e Toasefululua), ma le Au Epikopo Pulefaamalumalu o le Ekalesia. Ou te manatu ua i ai le faautauta i lenei mea. Ua le tuua i se tagata e toatasi na te faasoaina, pe vaaia na o ia, i soo se auala. O loo taulimaina e alii e le itiiti ifo i le sefuluvalu, o alii o le atamai, o le faatuatua, o le poto, e pei o nei alii e sefuluvalu. Ua ou fai atu ua tauaveina i o latou luga e faasoasoaina le sefuluai a tagata ma faaaogaina poo le a lava le faamoemoega i la latou faamasinoga ma le atamai o le a faataunuu ai le mea sili mo le Ekalesia; … o lenei tupe o le sefuluai ua faasoa atu e nei alii ua tofia e le Alii ua i ai le pule e faia ai, mo le aoga ma le manuia o le Ekalesia.¹²

O le Alii … ua faamamafa faapitoa mai i alii o loo taiulu i lenei Ekalesia ma ē ua gafa mo le puipuiina ma le taitaiina o tagata o le Atua ina ia latou vaai tino ua tausia le tulafono a le Atua o le [sefuluai]. O lo tatou tiute le faia o lenei mea. … Ua avea ma matafaioi i luga o taitai o le Ekalesia le ta’u atu o lenei mataupu, ia le gata i tagata ina ia faia o latou tiute e tusa ai ma lenei tulafono, ae ia i ai se mea i le fale teu oloa a le Alii e tausia ai manaoga o tagata; aua o manaoga o le Ekalesia o manaoga foi ia o tagata. O tagata o le Ekalesia ua fausia mai ai le Ekalesia, ma o lea poo a lava matafaioi o loo i ai le Ekalesia, ua i ai lea i luga o tagata taitoatasi o le Ekalesia e fuafua i mea ua ia maua. Ua finagalo le Alii ina ia tatou vaai tino ua tausia lana tulafono e tagata.¹³

Ou te fia fai atu i o’u uso ma tuafafine iinei i lenei taeao, i lo’u taofi e leai se taimi muamua na sili atu ai le olaga o tagata o le Ekalesia a Iesu Keriso o le Au Paia o Aso E Gata Ai, ua sili atu le faatuatua ma sili atu le maelega, nai lo i latou ua i ai i le taimi nei. E tele a tatou auala e faamasinoina ai lenei mea. O se tasi auala sa’o e iloa ai, o le tausia lea o le tulafono o le sefuluai. … O se faailoga lelei lenei e iloa ai o loo faia tiute o tagata o le Au Paia, ua i ai lo latou faatuatua i le Talalelei, ua latou naunau e tausia poloaiga a le Atua, ma ua latou galulue ma le faamaoni sili nai lo se isi lava taimi muamua.

Ou te manao e fai atu ma le isi mea ia te outou, ma ou te faia e ala i le faafetai, ma o lena, ua i ai tatou, e ala i faamanuiaga a le Alii ma le faatuatua o le Au Paia i le totogiina o a latou sefuluai, ua mafai ai ona totogi uma a tatou aitalafu. O le taimi nei, e lē o toe aitalafu le Ekalesia a Iesu Keriso o le Au Paia o Aso e Gata Ai i se tālā ua le gafatia ona ia totogiina i le taimi lava lena. Ua tatou i ai nei i se tulaga e aloese mai ai i le aitalafu. Ua tatou lē toe nono mai ni tupe, ma tatou te lē toe faia pe afai e faaauau e tagata o le Au Paia ona ola i lo latou talitonuga ma tausia le tulafono o le sefuluai. O le tulafono o tupe maua mo le Ekalesia.

E le gata i lea, ou te fia fai atu ia te outou, atonu e le mafai ona tatou ausia i le taimi lenei, ae tatou te talitonu o le a tatou vaai i le aso o le a matou le toe fesiligia ai outou mo se tala e tasi e foai mai mo soo se faamoemoe, seia vagana ua outou loto fuatia ifo e foai i lo outou lava loto malie, aua o le a lava a tatou sefuluai i le fale teu oloa a le Alii e totogi ai mea uma ua manaomia mo le faaalualuina i luma o le malo o le Atua. … O le aiaiga po o le tulafono moni lena, o le faamoemoega moni o le Alii i le puleaina o mea o Lana Ekalesia.¹⁴

O le mea autu e uiga i le totogi o le sefuluai o le usiusitai lea i le tulafono.

E le taumateina, e tele naua mea e mafai ona faitau mai i tusitusiga paia e faatatau i lenei mataupu o le sefuluai, ua faaali mai e le Atua ia i tatou i lenei tisipenisione, ma ua Ia finagalo tatou te usiusitai i ai, ina ia mafai ona faapaiaina i tatou, e ala i le usiusitai i ana tulafono, o lenei laueleele ina ia avea ma laueleele o Siona ia i tatou; ma o le folafolaga lenei, pe afai tatou te usiusitai i tulafono a le Atua, afai tatou te tuuina atu lo tatou faatuatua ia te ia, afai tatou te faalatalata ia te ia o le a ia faalatalata mai ia te i tatou, ma o le ia tauia i tatou i Lona alofa ma ana faamanuiaga. O le a ia lē taliaina lē na te ‘aina, ma o le a ia faia ina ia fuatele le laueleele, ina ia faalogo i lona malosi i le tane, lē faamalu i le eleele, ma lē tausi lafu o manu. O le a ia faateleina ana povi, ma o le a faamauoaina o ia i lona lima taumatau ma lona lima tauagavale, ma o le a faateleina, aua ua ia tuu atu lona faatuatuaga i le Atua; ua ia faalatalata atu ia te ia, ma ua ia naunau ina ia faamaonia atu ia te ia, ma vaai pe na te le tatalaina pupuni o le lagi ma sasaa mai faamanuiaga i luga ia te ia ma o le a leai se avanoa e faaputu ai [tagai Malaki 3:10]. Ia avea tagata uma ua talia le talalelei a Iesu Keriso ia maua lenei faaaliga, ma faalogo i nei upu, aua e taua i latou. O nisi o alii o le a latou manatu mama i ai, ma o i latou e [manatu mama i ai], o le a lē mafai ona faalatalata i ai, o le a latou lē faamaonia le Alii, o le a latou lē faataunuuina poloaiga ua ia tuuina mai, ma o le a latou le iloa lava o le Atua na te fetalai i le upumoni, ma e mafai ona ia faataunuuina lana upu ma folafola atu i tagata pe afai ua latou naunau e usiusitai ma tausia ana tulafono. …

… Sa ou feiloai i se uso—ou te le fia ta’ua lona igoa, aua o ia ua na o se tasi mai le afe e mafai ona latou tuuina mai le molimau lava e tasi, e le gata i le tautala mai ae faapea foi i faamaoniga o le tamaoaiga, o le manuia, o le alualu i luma ma le faaleleia ua siosiomia ai o ia i le totonugalemu o le toafa. I le tau lenei sa ia faapotopotoina ai se seleselega lelei, o ana faatoaga ua fua mai ni fua se tele, ae o faatoaga a le toatele o ona tuaoi ua faatumulia i le vao, ma o a latou seleselega ua na o le afa poo le tasi o vae tolu o lana seleselega. E faapefea ona outou faamatalaina lenei mea? Ou te faamatalaina aua o le mea moni ua faamanuiaina o ia e le Atua; ma e faapena foi o ia, aua o ia o se alii atamai, o se alii e le gata ina galue o ia ma le atamai ma le faaeteete, ma i le matau i le Atua, ma le naunau o lona loto e usiusitai i ana tulafono. … Na te totogi lana sefuluai, na te manatua ana taulaga, e usiusitai o ia i tulafono a le Atua, ma e le fefe o ia e tuuina atu lana molimau i ana uo ma tuaoi e faapea o le usiusitai ua faamanuiaina ai o ia e le Atua, ma avea ai o ia e pei ona i ai nei. E lē na o ia e faapea; e i ai nisi ua faamanuiaina i le tulaga lava lea. Ma ou te molimau atu ona o le Atua ua faamanuiaina o ia, ma lona eleele, ma ana galuega, ua mafua ai ona ia maua le faaopoopoga, ma maua ai faamanuiaga sa ia saili ma galue ai. Sa ia galue i le faatuatua lelei i le Alii; ma e sa silafia e le Alii lona loto, ma sa faamanuiaina o ia e tusa ai ma ia mea.¹⁵

O lea ua ou oo mai ai i se faaiuga o le mea tupito e uiga i le totogiina o le sefuluai o le usiusitai i le tulafono, ma o le a oo mai mea lelei e tele ia i tatou e ala i lena usiusitai nai lo se isi lava. Atonu tatou te agavaa i le sefulu o afe, ma totogi faamaoni le sefuluai mai a tatou tupe maua, ma faateleina la tatou sefuluai; ae peitai o le lelei o le a oo mai ia i tatou lava e ala i le usiusitai i le tulafono a le Atua o le a sili atu i le iuga nai lo le lelei o mea ua tatou faia mo e matitiva. E sili le manuia o le na foai nai lo le na te talia.

O le faalavelave, a mauoa le tagata ona amata lea ona ia lagona ua mativa tele ma ua lē mafai ai ona usiusitai i tulafono a le Atua. O oa e faamativaina ai le tagata pe a oo mai i le tulaga e faatatau i le Silisiliese. O le tagata mativa e faigofie ona totogi lana sefuluai ma foai atu si ana mea laitiiti mo le manuia o le ua mativa; ae afai o le a avea o ia ma milionea, poo se mea faapena, ona amata lea ona vaapiapi lona loto. O le iuga, o le a ia aveesea mai ia te ia o avanoa e maua ai faaaliga silisili o le agalelei ma le alofa tunoa o le Atua ia te ia, e mafai ona ia maua e ala i le faateleina o mea lelei na te faia mai ana mea e tele.

O le usiusitai o le mea lea ua finagalo i ai le Silisiliese. O le usiusitai sa ia finagalo i ai mai ia Aperaamo. Ou te talanoa atu nei i le usiusitai i le Atua, ae le o le tagata; ma e ou te luitauina se tagata na te faamaonia mai o le usiusitai i le Atua, e oo lava i le totogiina o le sefuluai, e le sili ae nai lo le lē usiusitai—sili ae i le tagata lava ia, ma sili ae mo tagata uma. Afai e usiusitai se tasi i lenei tulafono o le sefuluai, ua ia agavaa mo faamanuiaga a le Atua lava ia ma, e tusa ai ma lona finagalo, o loo i ai mea i le fale teu oloa a le Alii mo le fafagaina o e matitiva, mo le auina atu o le Talalelei i nuu mamao, mo le fausiaina o malumalusa, ma mo le faataunuuina o ona faamoemoega, ae afai ua le usiusitai o ia i lenei tulafono, o le a leai se mea iina, ma o ia lava o le a le maua ia faamanuiaga sa tatau ona tuuina mai e le Alii ia te ia.¹⁶

Fautuaga mo Suesuega

O le a le tulafono o le sefuluai a le Alii? (Tagai foi MFF 119:3–4.) O a mataupu o le talalelei ua tatou faataitai i ai pe a tatou totogi a tatou sefuluai? Aisea o le usiusitai i le tulafono o le “mea tupito” e uiga i le totogiina o le sefuluai?
O a mea e mafai ona fai e tagata o le Ekalesia pe afai ua latou le totogiina a latou sefuluai i le taimi ua tuanai ma ua mananao nei e tausia lenei poloaiga? O a nisi o mafuaaga ua pauu ai i tua tagata i le totogiina o a latou sefuluai? E faapefea e le tele o oa ona faaitiitia ai le loto?
O a nisi o faamoemoega ua faaaogaina i ai le sefuluai? E faapefea e le sefuluai ona fesoasoani ina ia faamalieina ai manaoga faaleagaga ma faaletino o tagata o le Ekalesia ma isi?
O ai e faatonuina le ala e faasoaina ai sefuluai a le Ekalesia? (Tagai foi MFF 120.)
E faapefea ona aoaoina i totonu o le aiga le totogiina o le sefuluai?
O a faamanuiaga ua folafola mai e le Alii ia i latou ua totogi a latou sefuluai? (tagai foi Malaki 3:10–12.) O anafea ma e faapefea ona faamanuiaina outou ona o le usiusitai i le tulafono o le sefuluai?

Prove Me Now Herewith — Ia Outou Tofotofo Mai ia te Au I Lenei Mea, tusia e Glen S. Hopkinson, ua faaalia ai paionia faatuatua o le Au Paia o loo aumai a latou sefuluai, sa masani ona totogi i meaai ae le o tupe, i le ofisa o le sefuluai i tafatafa o le Malumalusa i Sate Leki.