Lagolagoina o i Latou ua Valaauina e Pulefaamalumalu

E tatau ona tatou faamamalu ma lagolago i le faamaoni ma galuega a o tatou taitai perisitua ua valaauina e pulefaamalumalu.

Mai le Soifuaga o Iosefa F. Samita.

Na lagolagoina e Peresitene Iosefa F. Samita ona taitai perisitua i lona loto ma ana galuega. E atagia pea lava pea i ana galuega ia upu faatuatua a Nifae: “Ou te alu ma faia mea ua poloaiina ai au e le Alii” (1 Nifae 3:7).

Ia Oketopa o le 1873, sa toe valaauina ai o ia e Peresitene Polika Iaga e faia se misiona. Sa saunoa Iosefa F. Samita e faatatau i lena taimi: “Sa valaauina au i se misiona ina ua mavae ona ou galue mo le fa tausaga ma faatoaina se nofoaga ma ua alagatatau ia te au le toe nofo mo se tausaga e tasi e faamaonia ma maua loa le pepa e pulea ai le fanua; ae peitai ua finagalo ia Peresitene Iaga ia te au ou te alu i Europa i se misiona, e vaavaaia le misiona iina. Sa ou le faapea atu ia te ia, ‘Le uso e Polika, ou te le mafai ona ou alu; ua ia te au se fanua ua i ou lima, ae afai o le a ou alu o le a ou lē mauaina. Sa ou fai atu i le uso o Polika, ‘Ua lelei Peresitene Iaga, poo fea lava le taimi e te finagalo ai ou te alu o le a ou alu; ua ou saunia e usiusitai i le valaau a lo’u taitai. Ma sa ou alu. Sa ou le maua le fanua, ae ou te le i muimui lava i lena mea; ou te le’i molia foi le uso o Polika ina ua aveesea lea [fanua] ma a’u ona o lenei [valaauga]. Sa ou lagona sa ou i ai i se galuega sili atu le tele nai lo le faasaoina o le 160 eka o ni fanua. Sa auina atu au e folafola atu le feau o le faaolataga i nuu o le lalolagi. Sa valaauina au i le pule a le Atua i le lalolagi, ma sa ou lē faatali e mafaufau muamua ia te au lava ma a’u aia ma avanoa faaletagata; sa ou alu e pei ona sa valaauina ai au, ma e sa lagolagoina ma faamanuiaina au e le Atua i lena galuega.”¹

Aoaoga a Iosefa F. Samita

Tatou te sii lima o le faailoga o se feagaiga e uuna’i ma lagolagoina o tatou taitai.

I la’u faamasinoga, o se tasi o gaioiga sili ona taua e faataunuuina i konafesi a le Ekalesia o le taimi tatou te siilima ai i luma o le Alii e lagolago le pulega a le Ekalesia ma le faalapotopotoga e pei ona i ai. Ae o se tasi o mea taua tatou te fai ae e manatu māmā i ai isi tagata. I se isi faaupuga, o nisi tagata e o ese atu ina ua maea ona sii o latou lima e lagolago taitai o le Ekalesia ma lē toe mafaufau lava i ai, ma latou faia ni tulaga i le tele o taimi e peiseai na ona latou faataunuuina se mea e aunoa ma se faatauaina. Ou te tautino atu le sese o lenei mataupu. … Oi latou ua osi feagaiga e usiusitai i poloaiga a le Alii, ma toe solia lena feagaiga e ala i le lē usitaia o nei poloaiga, ua leai se mea e ese ai mai ia i latou ua sii o latou lima o le faailoga o se feagaiga e sapasapaia ma lagolagoina taitai o le Ekalesia ae lē mulimuli ai i lona faataunuuina. E tutusa lava le mataupu faavae i mea nei e lua: o le solia o le feagaiga ua tatou osia.²

O se mea sese matuia i le silafaga a le Silisiliese mo se tasi e palota e lagolago taitai o le Ekalesia, ona alu ese lea ma tetee ia te i latou ma solia i o latou vae fautuaga latou te tuuina atu; ma o le a faamasinoina i tatou e le Alii ona o lena mea.³

O se tiute taua ua tuuina mai i luga o le Au Paia le palota e lagolago taitai o le Ekalesia, i le faia lea e le gata i le sii a’e o lima, o se faailoga faigofie, faapea foi i galuega ma le upumoni. E lē tatau lava ona misi se aso, e tatau i tagata uma o loo auai i le Ekalesia ona sii ae o latou leo i le tatalo i le Alii e lagolago Ana auauna o ē ua tuuina mai e taitaiina i latou… O nei alii e ao ona i ai le faatuatuaga o tagata e lagolagoina ai i latou i le faatauunuuina o o latou tiute, ina ia latou malolosi ai i le Alii. …

… O le poloaiga a le Alii lo tatou faapotopoto faatasi e… lagolago ia taitai o le Ekalesia, ina ia faafouina ai a tatou feagaiga e sapasapaia taitai a le Atua ua ia faatuina i le lalolagi mo le taitaiina o Lana Ekalesia. Ma e le mafai ona ou faamamafa malosi atu le taua o tagata o le Au Paia o e faamamalu ma lagolago i le faamaoni ma galuega le pule o le Perisitua Paia ua valaauina e pulefaamalumalu. O le taimi e oo mai ai le agaga i se tagata ina ia aloese mai le lagolagoina o taitai filifilia o le Ekalesia, o le taimi lena ua maua ai o ia e le agaga e fiafia e tetee poo le faatuiese; ma afai ua ia faatagaina lena agaga e mauaa i lona mafaufau, o le a le pine ona taitaiina o ia i le pouliuli ma le liliuese.⁴

Ua malamalama lelei e faalua ona tatou faapotopoto faatasi i konafesi aoao i le tausaga mo le faamoemoe e tuuina atu ai suafa o i latou ua filifilia e avea ma taitai i totonu o le Ekalesia, ma ua malamalama foi o i latou ua i ai i nei tofiga e faalagolago i le leo o tagata mo le faaauauina o lena pule, o aia tatau ma avanoa latou te galulue ai. O tamaitai o le Ekalesia ua i ai le avanoa e palota e lagolago ai o latou taitai e faapei foi o alii o le Ekalesia, ma o le palota a le tuafafine agavaa ua faitauina tutusa lava ma le palota a se uso [alii].⁵

I le avea ai o ni tagata o le Au Paia, ua tatou lagolago ma faamamalu ia uso o le Pulega Aoao ua valaauina e pulefaamalumalu.

O lenei, e ui o poloaiga a le Atua e mo le lalolagi aoao, e i ai poloaiga faapitoa e faatatau tonu mo na o tagata o le Au Paia. O a nei poloaiga? O se tasi o nei poloaiga o le, ia tatou faamamalu ia i latou ua taitaiina i tatou; i se isi faaupuga, e ao ona tatou faamamalu i le Perisitua. Ou te le fesili atu i se tagata ina ia faamamalu mai ia te au, seia vagana ua ou faia ma le faamaoni mea e tusa ai ma le agaga o lo’u valaauga ma le perisitua o loo ou umia. E leai se tagata o le Ekalesia e faamalosia lona faamamaluina o au pe afai ua ou laa i luga atu o lena perisitua ma le pule ua faaee mai ia te au i le finagalo o le Atua ma le leo o le Ekalesia. Pe a ou tautala i le Agaga o le Alii e tusa ai ma tiute o lo’u valaauga, e tatau i tagata uma o le Ekalesia ona faalogo i mea ua ou tautala i ai. Afai o loo tuuina atu i le Agaga o le Atua ma tusa ai ma lo’u tiute, o le afioga ia ma le finagalo o le Silisiliese.

“Poo lea lava ua latou tautala ai pe a musuia e le Agaga Paia, o tusitusiga paia, o le finagalo o le Alii, o le manatu o le Alii, o le fofoga o le Alii, ma le mana o le Atua i le faaolataga.

“Faauta o le folafolaga lenei a le Alii ia te outou; au auauna e” [MFF 68:4–5].

O se faamanuiaga i tagata uma lo latou iloa poo o’u tautala i le upumoni i le Agaga o le Atua pe leai. I le Ekalesia a Iesu Keriso o le Au Paia o Aso e Gata Ai ua tuuina mai o se poloaiga le tatau ona tatou faalogo i le leo o le Agaga ua faaalia mai e ala i fesootaiga ua filifilia e le Atua mo le taitaiina o ona tagata. … Afai ou te fautua ma le amiolētonu, o le a faamasinoina a’u. E leai se tagata na te aoao le amioleaga i ona tagata ma faia pea i se taimi umi; aua o le a silafia o ia e le Atua ma faaali mai mealilo o lona loto; lona faamoemoega ma naunautaiga o le a faaali mai i le Au Paia, ma o le a ia tulai ma faamasinoina o ia i le Agaga o le Atua i luma o le Au Paia. Afai tou te talia… le Peresitene o le Ekalesia, ma o ia ma ona fesoasoani o taitai pulefaamalumalu, o le tagata e lē faalogo i a latou fautuaga ua manaomia se faamagaloga aua ua agasala o ia. O nei alii o le a latou lē fautuaina outou i le sese.

… Ou te le manao e vaai i le aso i nei alii, ua outou faatuatuaina i le aiā tatau ma le mana e taitai ai, o le a tapunia o latou fofoga ina ia latou le tautala malosi e uiga i le agasala po o le lē tetee atu i le amioleaga. … O lo tatou tiute le faia o lea. Ua tatou i ai iinei ona o lena faamoemoe. O i tatou o tagata leoleo i luga o ‘olo o Siona [tagai Esekielu 3:17–19]. O la tatou galuega ma le tiute le faailoa atu o mea sese ma vaivaiga o tagata; ma afai o le a le mauaina e tagata nei mea, o le a latou o atu i o latou lava ala ma fetaiai ai ma taunuuga. O i latou o le a lē usitaia fautuaga sa’o, o le a malaia i latou, ae lē o i latou o e ua tetee i le agasala.⁶

Ua matou fautua atu ina ia faia o tatou tiute e tusa ai ma le malamalama ua tatou maua, e ala i le fesoasoani a le Tama alofa. Ou te lē faia se fuafuaga e faia se mea e leai sona faamaoniga e sa’o, e ala i le agaga autasi o o’u fesoasoani, o lo matou maliega faatasi, ma lo matou malamalama faatasi. … ou te le faia lava se fuafuaga e faia soo se mea, poo le faasaina o se mea e aafia ai le malo o le Atua i le lalolagi, seia vagana ua i ai le finagalo autasi, pe sei vagana foi ua matou malilie faatasi i ai, ona ou iloa ai lea o le a i ai le malosi i o matou tua atu, o le a i ai le mana o le Atua faatasi ma i matou, ma o le a siitia ma lagolagoina o matou lima e le Au Paia.⁷

Atonu o le a lē faamalieina le tasi tagata i le isi tagata, atonu o le a latou lē malilie i le Au Peresitene Sili, le Korama a le Toasefululua, poo isi foi, ma faapea ifo i o latou loto, “Ou te le fiafia i lena tagata; ou te le talitonu o ia o se tagata lelei e pei e tatau ona i ai, e tele ona faaletonu ma vaivaiga ma, o lea, e le mafai ai ona ou lagolagoina lana taitaiga, aua e leai so’u faatuatuaga i lena tagata.” E le taumate o loo i ai i latou, ua toatele tele pe a, e i ai lagona faapenei, ae o le faalavelave,… e le faapea ua latou lē fiafia i lena tagata ma ua i ai lagona tiga i o latou loto e faasaga i o latou uso, ua galo ai ia i latou le fuafuaga a le Silisiliese; ua latou fulitua atu i le pule o le Perisitua Paia; ma ona o lo latou pogisa ua faigofie ai ona taitai seseina i latou, ma latou liliu ese mai ai i le Ekalesia i se taimi mulimuli.

O lenei o le a la le mea e tatau ona fai? O le a ou ta’uina atu. O le mea muamua e ao i tagata uma ona iloa e moni le Talalelei, aua o le faamanuiaga lenei mo tagata uma ua papatiso ma maua le Agaga Paia. Atonu e faanoanoa se tagata i ona lagona ona o se va faaletagata o ia ma le [Peresitene o le Ekalesia ma ona Fesoasoani]; atonu e i ai ni lagona i lona loto ua mafua ai ona ia manatu e lē tatau ona ia lagolagoina i matou i lona faatuatua ma le tatalo; ae afai o le tulaga lena, o le a le mea o loo ia sailia? Na te faapea ifo i lona loto, ‘Ua faatuina e le Atua Lona malo, ma ua i ai Lana Perisitua i luga o le fogaeleele; e ui lava ina ou lē fiafia i nisi tagata, ou te iloa e moni le Talalelei ma o loo i ai faatasi le Atua ma Ona tagata; ma afai o le a ou faia o’u tiute ma tausi i Ana poloaiga, o le a tafi esea puao ma o le a mou atu le pogisa, o le a oo mai le atoaga o le agaga o le Alii e fesoasoani mai ma o le a le pine ona mafai lea ona ou vaai,— afai ua ou sese, ma o le mea ou te sese ai, o le a ou salamo mai ai, aua ua ou iloa o mea sese uma o le a mafai ona faasa’o.” Ou te lagona e ao i tagata uma ona lagona faapenei.⁸

Ia tatou lagolago i o tatou taitai i le atunuu ma faalogo i a latou fautuaga.

Ao pulefaamalumalu ia le Au Peresitene Sili o le Ekalesia i le Ekalesia aoao—i siteki uma, uarota uma, ma galuega faafaifeautalai uma i le lalolagi—o nei alii [au Peresitene o le siteki] e pulefaamalumalu i Siteki o Siona, atoa ai ma uarota ma paranesi uma o loo i ai; ma pe a valaau atu i tagata e lagolagoina i latou i mea tonu uma, afai e le talia e tagata ona lagolagoina i latou, o le a i ai le faasalaga i luga o ulu o tagata ae lē o luga o ulu o nei alii. O lo latou tiute le tetee i le agasala ma taofia le amiolētonu. O lo latou tiute le fautua ma faamalosi atu i tagata uma o le Siteki ina ia faamaoni ma ma’elega. … Ou te manao ia outou malamalama lelei i lenei. … [E i ai i le Peresitene o le siteki] le aia tatau e pulefaamalumalu ai, e fautua, e faatonu, ma vaavaaia le manuia o tagata iinei. …

… Ua i ai ia i tatou le upu tusitusia mo se faataitaiga, mo faatonuga, mo apoapoaiga, mo le taofia, mo le uuna’ia. E ao i tagata uma ona faitau ma malamalama i ai, ona iloa ai lea e tagata uma o afioga a le Atua ua ia te i latou. Ae afai latou te le faitau i afioga a le Atua ma lē malamalama i ai, afai e saunoa mai taitai e tusa ai ma afioga a le Atua o le a latou le faalogo i ai. O le Au Peresitene o le Siteki o o outou taitai iinei. Ua filifilia i latou e le Alii. … E ao ona outou lagolago ma siitia i latou, ma faalogo i a latou timaiga. O le a latou le taitai seseina outou; o le a latou le faasino outou i le amioleaga; o le a latou le faia se sese ia latou timaiga mo outou; aua o le a tutu i latou o se moli malamalama i tagata—e le na o le pau lea o le moli malamalama, ae ua tulai mai o se Peresitene o le Ekalesia i lenei Siteki o Siona, ma o le a faaali mai le Atua e ala mai ia i latou i tagata. E le gata i lea, o le aia tatau a alii ma tamaitai uma le maua o faaaliga ma le atamai mai le Silisiliese, e iloa ai o nei alii o ni alii lelei, ma o loo faia o latou tiute.⁹

O le epikopo o le taitai pulefaamalumalu i lana uarota, ma o le i ai o le epikopo i totonu o le uarota, e ao ona usiusitai ona fesoasoani ma tagata o lana uarota i lana taitaiga. E le mafai ona ia faamatuuina atu. E le mafai ona ia tuuina atu i se tasi; pe afai na te faia, ua ia solia se tasi o mataupu faavae paia o le faatulagaga o le perisitua.¹⁰

O le tagata lenei ua faapea mai: “E leai so’u faatuatua i le epikopo. Ou te lē fiafia i le epikopo. Ou te lē talitonu ia te ia, e le agavaa o ia; e fai mea faapito; e le amiotonu; ma ou te le lagolagoina o ia i lona tofiga i le Ekalesia.”… Aua nei galo ia te oe; [o le epikopo ma ona fesoasoani] ua i ai, e le faapea ona o lo tatou manao ua mafua ai ona i ai. Ua i ai ona ua filifilia e le Alii e fai ma faatulagaga o le au peresitene i le uarota, e ala i le pule paia, ma e umia e le epikopo le pule mai le Atua, ae lē mai tagata. …

… A faapea mai se tagata: “O au o se tagata o le Au Paia; o au o se tagata o le Ekalesia, o loo ola ai i tulafono, aua ou te iloa ia mataupu faavae o le talalelei, ma ou te iloa ia mataupu o pulega o loo i ai i le Ekalesia,” mo lena tagata e faapea mai, “Ou te tetee i le epikopo aua ou te lē fiafia i ai” poo le “aua ou te lē faatuatuaina o ia,” e faamaonia ai i lea mea ua ia faia, e lē malamalama o ia i mataupu o pulega ma lē usiusitai i le pule paia. O le mea lea ua avea ai o ia ma faasoesa, lē usiusitai, lē pulea, lē manaomia, ma ua alagatatau ai ona faia i ai e tusa ma ona uiga viia po o le solitulafono foi.¹¹

Atonu e i ai se tagata ua leai sona faatuatuaga i lona epikopo poo se tasi o ona fesoasoani poo la’ua uma foi; … ae talu ai e mafai ona ia lagona faapena, mata e sa’o pe tatau foi ia te ia o se toeaina o Isaraelu, ona avea o ia ma faamasino o le epikopo poo ona fesoasoani ma le Ekalesia aoao? Afai ua i ai se tasi i lenei tulaga, ua faapei i latou o [alii ua liliuese mai le Ekalesia]. … E te manatu e mafai ona e faatalitonuina ituaiga tagata faapenei ua latou liliuese mai le Ekalesia? Leai; o nei tagata ua mautu i o latou lava manatu e lē o liliuese lava i latou. Ua latou faamaualuluga ma latou faafitia malosi lo latou liliuese po o le o ese mai le Ekalesia. … Afai ou te sii lo’u lima e tetee atu i lo’u epikopo, tetee atu i le Toasefululua poo le Au Peresitene Sili, ona ua ou lē fiafia ia i latou, o lena taimi e ao ona tuu ai a’u lava i le tulaga o loo tofia i ai nei alii, ma le toatele o i latou ua maliliu sa i ai i nei tofiga, ma faapea atu: “O le Ekalesia ua liliuese, o Iosefa Samita ma Polika Iaga, ma Ioane Teila, sa liliuese, ae ua ou tumau i le faatuatua; Ua taase tagata uma aua ua latou lē faalogo ia te au.” O iina o loo i ai le tagata ua tetee atu i le pule o le Perisitua, ae o le taimi foi lena ua taumafai ai e pipii i le faatuatua. E leai lava ae ua na o le tasi le tagata ua filifili i le taimi na te umia ki o le malo o le Atua i le lalolagi.¹²

O le mea lea, ou te faapea atu ai ia te outou, faamamalu le Au Peresitene o le Siteki ma o outou Epikopo, ma i latou ua filifilia e taitaiina a outou faalapotopotoga. Lagolago i ai i o latou valaauga i lo outou faatuatua ma le tatalo, ma faailoa atu ia i latou o le a outou fesoasoani ia i latou i upu ma galuega lelei uma, ma o le a faamanuia le Atua ia te outou ona o lenei mea.¹³

O le lagolagoina o o tatou taitai o le faailoga lea o le agaga lelei, faatuatua, ma le feoeoeai ia te outou.

Ou te talitonu o le tiute o le Ekalesia le faailoa ma faafetaia tagata uma ua i ai tofiga i totonu o le Ekalesia, i lona tiute ma lona valaauga. Ou te talitonu i le mataupu faavae o le tiute o le faiaoga e paia faapei foi o le tiute o le aposetolo, i le tiute ua valaauina o ia e galue ai, ma o tagata uma o le Ekalesia ua avea ma o latou tiute le faamamalu o faiaoga ua asia o ia i lona aiga, e pei foi ona ia faamamalu le tofiga ma le fautuaga a le korama pulefaamalumalu o le Ekalesia. Ua ia i latou uma le Perisitua; ua galulue uma i latou i o latou valaauga, ma e taua uma i latou i o latou tulaga, aua ua valaauina i latou e le Alii ma faatulaga i latou i lana Ekalesia. E le mafai ona tatou faatuatuanai ia te i latou; ae afai foi tatou te faia, o le a oo mai le agasala i o tatou luga.¹⁴

E le tatau ona tatou faatagaina i tatou lava e galulue i lea aso ma lea aso i le agaga o le muimui ma le sailiili masei i totonu o o tatou loto e tetee atu ai ia te i latou ua tuuina mai i o tatou luma ina ia lagolagoina i tofiga taua. Afai e i ai se mea i o tatou loto e tetee ai i nisi o nei uso, o lo tatou tiute, i le avea ai o ni tagata sogasoga o le Ekalesia, muamua, e pei ona taitaiina ai e tusitusiga paia, o le alu atu ia i latou na o oe ma faailoa atu o tatou lagona agai ia i latou ma ta’u atu le mafuaaga o nei lagona; e aunoa ma se manatu i o tatou loto e faalautele pe faafaigata, ae ia tatou o atu ia i latou i le agaga o le toe faalelei ma le alofa faaleuso, i le agaga moni faa-Kerisiano, ma afai e i ai se lagona ita o loo i ai i lo tatou va e ao ona matua faatea ese; ma afai ua tatou sese i o tatou uso, ia mafai ona i ai o ia i le tulaga e faaleleia ai le tiapolo. E ao ona tatou saili le alofa o le tasi i le isi ma lagolago le tasi i le isi i le avea o ni fanau a le Atua ma o ni uso ma tuafafine i le galuega a Siona.¹⁵

Ou uso e ma tuafafine, ou te manao e faafetai atu ia te outou… mo le loto gatasi ua faaalia iinei i le siitia o lima o lenei faapotopotoga tele. Ou te malamalama o se faailoga lenei o le agaga lelei, o le faatuatua ma le galulue felagolagomai o lenei faapotopotoga tele i taitai uma, i le tulaga aoao ma le nuu, poo ausilali, ua tuuina atu i o outou luma, ma o le a outou usiusitai uma i le maliega ua outou tuuina atu i le Alii ma isi e ala i le siitia o lima, ua outou malilie uma ai e siitia ma lagolago nei taitai i nei faalapotopotoga uma, mai le amataga seia oo i le faaiuga, o le a outou lē muimui ia i latou, o le a outou le saili masei ia i latou e aunoa ma se mafuaaga, ua outou lē taumafai e faamanualia lo latou taumafai pe faamuta lo latou alualu i luma, poo le faalavelave ia latou galuega lelei ae o lea e ao ona outou faia mea uma tou te mafai e fesoasoani ai ia i latou, e faaleleia ai i latou, faamanuia ai i latou, ma faamalosiau ai ia i latou i galuega lelei ua latou faia.¹⁶

Fautuaga mo Suesuega

Aisea o le lagolagoina o o tatou taitai “o se tasi o gaioiga sili ona taua e faataunuuina i konafesi a le Ekalesia”? E fesoasoani i se a le iloa o le lagolagoina o o tatou taitai o se “feagaiga lea ua tatou osia?”
E faapefea ona tatou lagolago i o tatou taitai, e le na o le “faailoga, ae i galuega ma le upumoni”? Ua e iloa faapefea le fesoasoani o lou faatuatua ma au tatalo i ou taitai?
O le a le mea e tupu ia i latou ua “tetee mai le lagolagoina o taitai filifilia o le Ekalesia”?
E faapefea ona avea ia le Au Peresitene Sili ma le Korama a le Toasefululua o ni “tagata leoleo i luga o ‘olo o Siona”? O lea, o le a lo latou tiute? E faapefea ona tatou lagolago ma faamamalu ia i latou i nei tiute? (tagai foi MFF 107:22.)
O a nisi o tiute o le au Peresitene o le siteki? O a ni auala e faaleleia ai la tatou lagolago ma siitia ai i latou?
Aisea e taua ai le iloa o loo umia e le epikopo le pule i le uarota “mai le Atua, ae lē mai tagata”? E faapefea ona faaleleia la tatou lagolago i le au epikopo i o latou valaauga?
E paia faapefea le tiute o le faiaoga asiasi “faapei ona paia o le tiute o se aposetolo, i le tulaga ua valaauina o ia e galue ai”? E faapefea ona tatou lagolago ma faamamalu i faiaoga asiasi ma faiaoga o aiga?
E faapefea ona avea lo tatou lagolago ma faamamalu i o tatou taitai o se faailoga o lo tatou faatuatua i le Alii?

Joseph F. Smith and Joseph Fielding Smith — O Peresitene Iosefa F. Samita ma lona atalii o Iosefa Filitia Samita, o le sa avea ma se tasi o le Korama a Aposetolo e Toasefululua i le taimi o le ata lenei i le 1914 ma na avea mulimuli ane ma Peresitene lona sefulu o le Ekalesia.