O Faaaliga Faifai Pea mo le Manuia o le Ekalesia

E ao ona tatou laugatasia i le ola ai i faaaliga faifai pea mai le Atua i Lana Ekalesia e ala i alaleo ua Ia filifilia.

Mai le Soifuaga o Iosefa F. Samita

Efaapei o Peresitene e toalima sa muamua atu ia te ia, sa maua e Iosefa F. Samita le taitaiga mai le lagi e taitaiina ai le Ekalesia ma ona tagata. Ae peitai, i masina mulimuli o lona soifua, na matua manifinifi ai le veli sa vavaeina ai i la’ua ma le Atua. O le tele o lenei taimi sa faaaluina i le tatalo lemu ma le mafaufau loloto. I le aso 4 o Oketopa 1918, ua toe o ni nai vaiaso ao le i maliu o ia, sa ia saunoa ai i le konafesi aoao: “O le a ou le faia, ma o le a ou lē taumafai lava e tautala i le tele o mea o loo mamafa ai lo’u mafaufau i lenei taeao, ae o le a tolopo seia i ai se taimi oi luma, pe a finagalo i ai le Alii, e ta’u atu ia te outou nisi o mea o loo i lo’u mafaufau, ma o loo ola i totonu o lo’u loto. Sa ou le nofonofo na o a’u i lenei lima masina ua tuanai. Sa ou ola ai i le agaga o le tatalo, o le olega, o le faatuatua ma le naunautaiga; ma sa i ai a’u sootaga ma le Agaga o le Alii i taimi uma.”¹ O le taimi tonu lea sa ia maua ai le faaaliga o le togiolaina o e ua maliliu ma ua avea ma mataupu e 138 o le Mataupu Faavae ma Feagaiga.

Sa faailoa mai ma le lotomaualalo e Peresitene Samita le agalelei o le Atua i le faaali mai ia te ia o mea sa ia manaomia ia iloa ao ia taitaiina le Ekalesia: “Ou te talitonu ma le loto atoa sa faaalia mai e le Atua ia te au i lo’u tulaga o i ai nei, le tele o mea ofoofogia, mataupu e tele, ma o le tele o taimi na sili atu le atamai nai lo le tulaga o loo i ai i totonu ia te au; ma ou te talitonu o le a ia faaauau le faia pe afai ou te faia, pe afai ou te i ai i le tulaga e faalogo ai pe a Ia fetalai mai, ia faalogo pe a Ia valaau mai, ma talia pe a Ia tuuina mai ia te au mea ua Ia manaomia.”²

Aoaoga a Iosefa F. Samita

Matou te talitonu i faaaliga tuusao mai le Atua i le tagata.

Matou te talitonu… i le mataupu faavae o faaaliga tuusao mai le Atua i tagata.

O se vaega lenei o le talalelei, ae le o se tulaga ese i lenei tisipenisione o le talalelei. E le mafai ona faataunuuina le talalelei, pe faaauau pea foi le Ekalesia a le Atua, e aunoa ma lea. O Keriso o le ulu o lana Ekalesia ae lē o se tagata, ma e na o le mataupu faavae o faaaliga tuusa’o e mafai ai ona faatumauina fesootaiga faifai pea. E le o se mataupu e tuufaasolo, e le mafai ona tuufaasolo mai le tama i le atalii, pe mai le tasi augatupulaga i le isi augatupulaga, ae o se mataupu ola taua e maua ai le fiafia pe a tausia tuutuuga faapitoa, e faapei—e ala i le faatuatua atoatoa i le Atua ma usiusitai i Ana tulafono ma poloaiga. O le taimi e taofia ai lenei mataupu, o le taimi foi lena o le a opeopea ai le Ekalesia ua leai se taitaiga, ma motusia ai mai lona ta’imua soifua. I lenei tulaga o le a le faaauauina ai, ae e ao ona taofia ai le avea ma Ekalesia a le Atua ma, e faapei o le vaa i le sami e aunoa ma se katepeni, tapasa, poo se foeuli, ua felafoaiina i le malolosi o afa ma galu o uiga tuinanau o tagata, ma mea faafiafia o le lalolagi, o le faamaualuga ma vaivaiga, ma oo ai lava ina nuti lilii i faiga a faitaulaga pepelo ma faataulaitu.³

E ao ona malamalama o auauna a le Atua e i ai le aia tatau i la latou pulega e maua vave ai fautuaga paia, ma, ona o lo latou faatuatua, ua latou faaopoopo ai le atamai paia o se malosiaga faatonutonu i a latou galuega, ma afai e maea lena ona maua ai lea o ni tagata e lē mafai ona faatoilaloina i le galuega latou te faia mo le auaunaga i le Atua.⁴

Ou te iloa o mataupu faavae uma o le Talalelei a Iesu Keriso ua faaalia mai e ala ia Iosefa Samita, le perofeta, i nei aso e gata ai e a le Atua ia ma e moni, ma e o le a tulai mai e faavavau—o lona uiga, i lona lava tulaga aloaia, e pei o lana upumoni; e le mafai ona faaumatia. Ou te iloa lenei mea mai lo’u tumua’i e oo i o’u mati’uti’uvae. Na faia au e le Atua ma faamaonia faalua e ala i le auai mai ma le aafiaga o lona Agaga, ma le musumusuga ola i totonu o lo’u agaga e alofa i le mea lelei, ma naunau ina ia lafoai mea leaga.⁵

E faaali mai e le Atua Lona finagalo i tagata i o tatou aso e faapei o soo se taimi i le talafaasolopito.

O tagata o le Au Paia… e tuuina atu a latou molimau i le lalolagi atoa o loo soifua le Atua ma ua ia faaali lona finagalo i tagata o e ua talitonu ia te ia ma usitaia ana poloaiga, i ona po nei e faapei foi o soo se taimi i le talafaasolopito o malo. E le’i tutumu tusi o tusitusiga paia. E le’i faaalia lava e le Atua i se taimi faapea o le a taofia lona talanoa mai i tagata. Afai ua faatagaina i tatou e talitonu ua ia fetalai mai, e tatau foi ona tatou talitonu o le a ia fetalai mai pea lava pea, aua e lē masuia lava o ia. …

O le a ea le faaaliga, ae o le faaalia mai o mea moni fou, e ia o le puna o mea moni uma? O le faapea e le manaomia ni faaaliga fou, ua tusa lea ma le faapea mai ua tatou le manaomia mea moni fou—o se manatu sese. O lea foi, tatou te faapea o le faaaliga sa maua e Aperaamo ua lava mo perofeta; o faaaliga na maua e Enoka ua lava mo Noa, o lana misiona o le fausia o se vaa ma tautau atu le salamo; poo upu sa tauina atu ia Mose ua lava mo taimi uma; poo mea na talia e Aperaamo ua lava lea mo lana fanau i tausaga uma lava. Ae leai e lē o lea. O Aperaamo sa alofagia i folafolaga sili, sa le’i taofia ai afioga a le Atua i lona atalii o Isaako, poo le atalii o lona atalii o Iakopo. Aisea? Aua e le mafai e i latou nei ona faataunuuina a latou misiona i le na o le upu a le Alii i o latou tama ma isi. Ma e faapefea e le Tama o le Au Faatuatua ona faataunuuina lana galuega i luga o faatonuga na maua mai ia Noa? O le a se aoga o faaaliga o muai peteriaka ma perofeta ia Palaama poo Paulo? E moni, sa faaaogaina i latou e avea o ni pine faamau o le mea moni, poo lesona, ae le lava mo i latou taitoatasi.

O lea la o i tatou o loo ola mai i ona po nei, e manaomia tele ni faaaliga faifai pea, ina ia mafai ai e tatou taitoatasi ona faataunuuina a tatou molimau i le ala e finagalo ai lo tatou Tama, ma ia mafai ai ona tatou galulue mo lo tatou lava faaolataga; ma ina ia mafai ai foi ona tatou iloa le finagalo o le Atua e faatatau i lana ekalesia, o ona tagata, ma ona faamoemoega e faatatau i atunuu. Ua na o nisi nei manaoga mai le fia afe o manaoga o loo i ai mo faaaliga.⁶

Sa faaali mai e le Atua Ia lava i le lalolagi e ala i alaleo filifilia aloaia o le perisitua.

E ala mai ia Iosefa [Samita], … sa faaali mai e le Alii Ia lava i le lalolagi, ma na ala mai foi ia te ia ona filifilia uluai toeaina o le Ekalesia—o alii ua faamaoni i o latou loto, o alii ua ia silafia e taliaina le upu, ma galulue fesootai ma Iosefa i lenei galuega tele ma le taua; ma mea uma lava ua faauuina i le Perisitua, ma mea uma lava ua tofia mo soo se valaauga i soo se vaega o lenei Ekalesia ua maua la latou pule ma le faamoemoega e ala i lenei fesootaiga, ua filifilia e le Atua, faatasi ai ma Iosefa i le ta’imua. O le faatulagaga lenei, ma e leai lava se isi tulaga. E le toe faatulaia e le Atua se tasi perofeta ma nisi tagata e faia le galuega ua valaauina i tatou e fai. Na te le faagalo lava i latou o e sa tutulai pea ma le faamaoni ma le faatuatua, ma faaauau pea ma le faatuatua i lo latou talitonuga. E leai se fesili i lo’u mafaufau i lo latou faamaonia o i latou lava o ni tagata faamaoni, aua ai se e le agavaa i lana silafaga, o le a ia aveesea i latou mai o latou tofiga ae valaauina nisi o le ekalesia e faatumu i o latou valaauga.⁷

O le taimi e faapea mai ai se tasi o le a ia le usiusitai i le pule faatulagaina o le Ekalesia, poo faiaoga, o le au epikopo, o le fautua maualuga, o lana korama, poo le Au Peresitene Sili, ma i totonu o lona loto o loo faamaonia ma faataunuuina ai, ua ia faaesea o ia lava i lena taimi mai le avanoa ma faamanuiaga o le Perisitua ma le Ekalesia, ma vavaeeseina ia lava mai tagata o le Atua, aua ua ia le manatu i le pule ua faatulagaina e le Alii i lana Ekalesia. O nei alii e masani ona lavelave mafaufauga [mafaufauga ese] i o latou ulu, e maua musumusuga mai le tiapolo, ma e masani ona mananao e taitai le Ekalesia, ma nofo faamasino i le perisitua. Pau le ala saogalemu mo i tatou e faia, o ni tagata taitoatasi, o le ola lotomaualalo lea, ma le amiotonu ma le faamaoni i luma o le Atua ina ia tatou maua lona Agaga i lena tulaga ina ia mafai ai ona tatou faamasino ma le amiotonu, ma iloa tonu le moni ma le sese, o le sa’o foi mai le sese.⁸

O nisi o taimi e faanoanoa i le vaai atu i tagata faaaloalogia o le Ekalesia, o alii ua tatau ona sili lo latou iloa, ua latou tuuina atu i latou lava e avea o ni mea faigaluega i agaga faatosina taufaaosooso. … E foliga mai e faigata i alii ona malamalama i galuega o le Perisitua, o lana pule tonu, o lona faamoemoega ma le malosiaga; e ui ina faigofie ona iloa i le malamalama o le Agaga, ae lē malamalama ai, e faigofie ona faaseseina alii e agaga faatosina taufaaosooso o loo salalau i le lalolagi. Ua taitaiina i latou e talitonu o loo i ai se mea ua sese, ma o le isi mea e alia’e mai, o lo latou talitonu lea ua filifilia faapitoa i latou e faasa’osa’o ia mea. E le manuia mo se tasi e maua ai i lenei mailei; aua e ao ina malamalama i ai tagata o le Au Paia afai lava o loo ola auauna a le Atua i se olaga mama, o loo faamamalu i le Perisitua ua faauuina ai i latou, ma o loo taumafai i le mea e sili i lo latou poto e faalautele i o latou tofi ma valaauga, ua filifilia faapitoa i latou i ai e leo o tagata ma le perisitua, ma talia i le faamaoniga a le Atua, pe afai e i ai pea se fesootaiga e faia mo le fanau a tagata, poo se faatonuga e tuuina atu i lana Ekalesia, o le a ia faia lena fesootaiga e ala i le faatulagaga aloaia o le perisitua; o le a lē aluese mai ai o ia, pe afai e i ai pea le Ekalesia i lona tulaga e pei ona i ai nei i luga o le fogaeleele.

E lē o se tiute o soo se tagata le tulai mai o se tali faaaliga, o se perofeta, o se tagata vaai, o se tagata musuia, e tuuina atu faaaliga mo le taitaiina o le Ekalesia, poo le tuuina atu o ni faatonuga i e o loo pulefaamalumalu i le Ekalesia i soo se vaega o le lalolagi, i totonu o Siona, i le mea ua toetoe ina atoatoa ai le faalapotopotoga o le perisitua, i le mea ua mae’a ai mea uma, e oo lava i le faatulagaina o se paranesi.⁹

I mea faalelalolagi faapea foi mea faaleagaga, e mafai e tagata o le Au Paia ona maua taitaiga Paia ma faaaliga e aafia ai i latou lava, ae o lenei tulaga e le mafai ona maua ai le pule e taitaiina ai isi, ma e le taliaina pe afai e feteenai ma feagaiga i le Ekalesia, o mataupu faavae poo aoaoga, poo mea ua mautinoa ma iloa, o upumoni, poo le mafaufau lelei. E leai se tasi e i ai sana aia tatau e faasufi ai tagata o le Ekalesia e auai i taumatematega pe avea o se vaega o soo se ituaiga o gaioiga e taufaasese ai i le talitonuga o faaaliga mamana poo vaaiga, poo miti, aemaise lava pe a feteenai ma le leo o le pule ua faamaonia, i le lotoifale [uarota, po o siteki] poo le tulaga aoao. O le Ekalesia a le Alii “o le fale faatulagaina lelei” [MFF 132:8]. E le pulea e meaalofa taitasi poo faaaliga, ae o le faatulagaga ma le mana o le Perisitua Paia e pei ona lagolagoina e le leo ma le palota a le Ekalesia i ana konafesi faatulagaina.¹⁰

O le agaga o faaaliga e mafai ai ona tuufaatasia le fanauga atoa a tagata i le malo o le Atua.

Ua fetalai mai le Alii ia i tatou i se faaaliga e ala i le Perofeta o Iosefa Samita, a lē tasi i tatou e le a Ia i tatou [tagai MFF 38:27]. Ua Ia fetalai mai e ao ona tuufaatasia i tatou. E tatau ona tasi i tatou.¹¹

Afai ua tatou galulue i lalo o le faatosinaga po o le uuna’iga a le [Agaga] ma mulimuli i lona ala i taimi uma, o le a tasi i tatou, ma o finauga, feteenaiga ma le manatu faapito o le a faataatia ese, ma e o le a tatou tausia ma avea o ni faataitaiga mo o tatou tuaoi mo lo tatou lava lelei. Ae o loo tatou vaaia pea i totonu ia i tatou feteenaiga, eseesega o manatu ma lagona, o le tasi i luga o le isi i lalo, ma o le mea e tasi ua vaaia i se malamalama ese e tagata eseese, ma isi foi. Aisea e faapea ai? Aua o le talalelei ua faatusa i le upega ua maua ai i’a eseese uma, ae ona o i tatou ua na o ni fanau o loo i le a’oga; aua ua tatou aoao i mea faavae moni e pei ona i ai, i le ata sili o le Talalelei, ae ua le atoatoa. Ma o le tasi o mafuaaga o le eseesega i o tatou manatu ma lagona ona o nisi e tele lo latou silafia ma iloa le upumoni sili atu nai lo nisi. Peitai pe ua faamaonia mai ea i lenei mea, o le talalelei ua tatou aeae ai nei ua le i ai na mataupu e tatau ai e faatasia ai tagata soifua i le upumoni? Leai, e le mafai. O a nei mataupu silisili ua faavasegaina e tuu faatasia ai le fanauga uma a tagata, ma mafai ai ona latou tapuai i le Atua e tasi, faalogo i le fautuaga e tasi ma puleaina e le leo e tasi? O mataupu faavae ia o faaaliga, o le mana o le Atua ua faaalia i ona tagata, o le talitonuga i loto o tagata e faapea o le aia tatau a le Atua e pule ma faatonu, ma e lē o se aia a soo se tagata le faapea mai o le auala tonu lea; e lē manaomia foi ona usiusitai tauaso tagata i nei mataupu —e aunoa ma le malamalama.¹²

Ia tuu faatasia le Au Paia; ia latou faalogo i siufofoga o auauna a le Atua o loo lauga atu i o latou taliga; ia latou faalogo ia latou fautuaga ma usiusitai i le upumoni.¹³

Saili ina ia maua le mafutaga ma le faatasiga a le Agaga Paia. Ia sailia lenei agaga ma faapelepele i ai ma le maelega i totonu o le li’o itiiti ma le lotomaualalo o se aiga e faapei foi o tagata o se faalapotopotoga maualuga ma korama. Ia susulu atu i loto o uso ma tuafafine, o matua ma fanau o le aiga, e faapea foi i finagalo o le Au Peresitene Sili ma le Toasefululua. Ia faaitiitia ma faamaluluina ia eseesega uma i le va o uso o le Au Peresitene o le Siteki ma Fautua Maualuga, e faapea foi i le va o tuaoi o loo soifua ai i le uarota e tasi. Ia tuufaatasia ai le autalavou ma e matutua, alii ma tamaitai, le lafu ma le taitai mamoe, o tagata ma le Perisitua i le noataga o le faafetai ma le loto faamagalo ma le alofa, ina ia mafai ai ona lagona e Isaraelu le taliaina o le Alii, ma mafai ai ona tatou o atu uma i Ona luma ma le malamalama ma le loto fuatia ifo i luma o tagata. Ona leai lea o se faanoanoa i faamanuiaga ua folafola mai mo i latou o e tapuai ma le faamaoni ia te Ia. O le musumusu malie a le Agaga Paia o le a tuuina atu ia i latou ma oa o le lagi, o le fesootai mai o agelu, o le a faaopoopoina mai lea taimi i lea taimi, aua ua agai i luma Lana folafolaga ma e lē faaletonu lava!¹⁴

Fautuaga mo Suesuega

O le a le faaaliga? O le a le uiga o le faapea mai o le faaaliga o se “mataupu faavae ola ma le taua”?
O le a le mea e tupu i le Ekalesia pe a aunoa ma faaaliga tuusao faifai pea?
O le a le taua ia i tatou o tusitusiga paia e lei faatumulia? E faapefea ona tatou saunia o tatou loto e talia nisi faaaliga e ala mai sootaga filifilia o le perisitua?
Aisea sa taua ai le faaauau o faaaliga i aso o perofeta e pei o Noa ma Mose? O a faamanuiaga o le i ai o se perofeta soifua i le taimi nei? E faapefea e le perofeta soifua ona fesoasoani ia i tatou e faafetauia luitau o o tatou aso?
Aisea o faaaliga mo le Ekalesia e oo mai e ala i le sootaga o le perisitua filifilia? E ui o tagata taitoatasi latou te “mafai ona maua le taitaiga paia ma faaaliga e aafia ai i latou lava,” aisea e le mafai ai e lenei tulaga ona maua le pule e taitaiina ai isi? (tagai foi MFF 42:11.)
O a ni auala i nisi o taimi e faaseseina ai tagata o le Ekalesia i lo latou malamalama i le pule o le perisitua? E faapefea e tagata ona aloese mai le faaseseina i lenei auala?
E faapefea e tagata o le Ekalesia i le lalolagi aoao ona tuufaatasia i le faamoemoe ma le upumoni? E mafai faapefea e le uuna’iga a le Agaga Paia ona tatou tuufatasia? Aisea e taua ai tele le tasi o i tatou? (tagai foi MFF 38:27.)

Swiss German Mission — O Peresitene Iosefa F. Samita ma faifeautalai ma tagata o le Misiona a Swiss German, Aokuso 1910. Sa apoapoai atu Peresitene Samita i le Au Paia ia loto gatasitasi ma “faalogo i siufofoga o auauna a le Atua o loo ua logoina ai o latou taliga” (*Mataupu o le Talalelei*, 261).