O le Auala Sese o le Faatautala po o le Faasaunoa

E le tatau ona tatou faia faatautala pe faasaunoa i isi ae ao ona faaali atu le alofa ma le agamalu i tagata uma, aemaise lava i tagata o le aiga.

Mai le Soifuaga o Iosefa F. Samita

O Peresitene Iosefa F. Samita o se alii agamalu ma le agalelei o lē sa faaalia lona faanoanoa i soo se ituaiga faasaunoa po o le faasaua. Sa ia iloa lelei o le faamisa e mafua ai misa, ma o lona ia olaga o se tulaga moni o le alofa ma le onosai, alofa ma le malamalama.

I se tasi o mea sa saunoa ai Peresitene Samita: “Sa ou molimauina se mea laitiiti na tupu i la matou sauniga i le aoauli nei i le vai nofoa e savavali ai tagata; o se tamaitiiti laitiiti sa nofo i tafatafa o lona tina i luga o se nofoa. Sa sau se tasi ma aveese le tamaitiiti mai lona nofoa, ae nofo ai i le nofoa lea, ona tutu lea o le tamaitiiti. Ou te fia fai atu ia te outou, o’u uso e ma tuafafine, o lena gaioiga na tiga ai lo’u loto. Ou te le mafai, mo soo se mea lava… ona faatiga i le loto o se tamaitiiti laitiiti i le maota o le Atua, ona o le popole nei faatumauina ai se lagona i lona mafaufau ma avea ai le fale tapuai o se nofoaga e lē fiafia i ai, ma o le a sili ai ia te ia le lē sau i totonu, nai lo le sau ae tiga ai [le loto].”¹

E masani ona fautua mai Peresitene Samita i ona uso ma tuafafine ina ia tausi le tasi i le isi i le agalelei atoatoa. O le faamisa poo amioga e tauleaogaina ai se isi tagata sa le mafaufauina e ia. O tane ma ava e ao ona faatumauina e le tasi le isi i le tulaga sili ona maualuga ma aoao a latou fanau e ala i faataitaiga ina ia fefaaaloaloai tagata o le aiga ma isi tagata uma.

Aoaoga a Iosefa F. Samita

E ao ona tatou tausi le tasi i le isi i le faaaloalo sili ma le migao.

Ia tatou manumalo ia i tatou lava, ona o atu lea ma ia tatou faatoilalo i mea leaga uma tatou te vaai i ai i o tatou siosiomaga, i le mea e gata mai ai lo tatou mafai. Ma o le a tatou faia e aunoa ma le faaaogaina o le faamisa; o le a tatou faia e aunoa ma le faalavelave i le filifiliga saoloto a alii ma tamaitai. O le a tatou faia e ala i le faatauanau, o le faapalepale, onosai, ma le loto faamagalo, ma le alofa faamaoni, o lea o le a tatou manumalo mai ai i loto, o lagona ma agaga o fanau a tagata i le upumoni e pei ona faaali mai e le Atua ia i tatou.²

[O le Atua] sa faia i tatou i lona faatusa ma foliga, ma o i tatou nei o alii ma tamaitai, o matua ma fanau. Ma e ao ona tatou faapei o ia—faapei o ia i le alofa, i le agalelei, i le loto faamagalo, i le onosai, faapalepale, i le mama o manatu ma gaoioiga, poto, ma mea uma lava, ina ia tatou agavaa ai e faaeaina i lona afioaga.³

O matua… e ao ona alolofa ma faaaloalo le tasi i le isi, ma tausi le tasi i le isi i le faaaloalo sili ma le agalelei i taimi uma. E ao i le tane ona tausi i lana ava i le migao silisili ma le faaaloalo. E lē tatau i le tane ona faatiga ia te ia; e lē tatau ona ia soona tautala e faamamasagia ai o ia, ae ao ona tuuina o ia i le mea e sili ona maualuga i le aiga, a o faatasi ai lana fanau. … O le ava foi, e tatau ona ia tausi lana tane i le faaaloalo ma le migao silisili. O ana upu ia te ia e lē tatau ona ‘ina’inā ma ta’ufaatauvaaina ma faa’amu’amu. E le tatau ona ia fai atu ni upu faauigalua ma faatiga ia te ia. E le tatau ona ia otegia pe vaavaai masei ia te ia. E le tatau ona ia taumafai e faaoso lona ita poo le faia o mea e lē maua ai le fiafia i totonu o le aiga. E tatau ona avea le ava ma fiafiaga o lana tane, ma ia ola ma faia ina ia avea le aiga ma nofoaga silisili ona fiafia, o le nofoaga e sili ona faamanuiaina i le lalolagi i lana tane. O le tulaga lenei e tatau ona i ai le tane, ava, o le tama ma le tina, i totonu o lena nofoaga paia ma le mamalu, o le aiga.

Ona faigofie ai lea i matua ona tuuina atu i loto o a latou fanau e le gata i le alofa mo o latou tama ma tina, e le gata i le faaaloalo ma le migao i o latou matua, ae o le alofa ma le faaaloalo ma le ava o le fanau i le aiga. O uso laiti o le a faaaloalo i o latou tuafafine laiti. O tamaiti o le a faaaloalo le tasi i le isi. O teineiti o le a faaaloalo le tasi i le isi ma o teine ma tama o le a faaaloalo le tasi i le isi, ma tausi le tasi i le isi i le alofa, ma le ava ma le faaaloalo e tatau ona tausia i le aiga o se vaega a le fanau laiti. Ona… o le faavae o le aoaoga sa’o ua faataatia i loto ma mafaufau o le tamaitiiti i le aiga.⁴

E ao i tane ona tausi i a latou ava i le alofa faapelepele.

Mafaufau i le uiga o le umia o ki o le pule —afai e faaaoga i le atamai ma le amiotonu—o le a faaaloalogia e le Tama, le Alo, ma le Agaga Paia! Pe e te faamamalu ea i lenei Perisitua?… Mata e te mafai, i le avea ai o se toeaina o le Ekalesia a Iesu Keriso, ona lē faamamalu i lau ava poo lau fanau? Pe ete tuua ea le tina o lau fanau, o lau ava pele, o le meaalofa a le Atua ia te oe, ua sili atu lona taua nai lo le ola lava ia? Aua a aunoa ma le fafine o le a lē atoatoa le tane i le Alii, e lē atoatoa foi le fafine pe a leai le tane.⁵

Ou te le malamalama pe mafai faapefea e se alii ona agaleaga i se tamaitai, e sili atu foi ona faigata ia te au ona malamalama pe mafai faapefea ona ia agaleaga i lana pele, ma le tina o lana fanau, ma ua ta’u mai ia te au o loo i ai i latou ua matua saua lava, ma ua lē agavaa lava e taua o ni alii.⁶

Pe a ou mafaufau i o tatou tina, o tina o a tatou fanau, ma iloa ai e ala i musumusuga o le Talalelei ua latou ola ai i ni olaga paia, mama, mamalu, ua faamaoni ia latou tane, ua faamaoni ia latou fanau, ua faamaoni ia latou tautinoga i le Talalelei, oi, e momomo lo’u loto i le alofa mama mo i latou; e paia ma ua foaiina mai e le Atua, ua filifilia, ua manaomia ma e le mafai ona suia i latou i le ausiaina o le faamoemoega o le Atua ma le faataunuuina o ana folafolaga. Ou uso e, pe tou te le tausi lelei ea ia outou ava, o tina o a outou fanau? E mafai ona outou fesoasoani e tausia i latou i le alofa ma le agalelei? E mafai ona outou fesoasoani e taumafai e avea o latou olaga ma olaga filemu ma le fiafia e tatau ai, e faamama i a latou avega i le malosi sili e oo i ai le mafai, ma faafiafia i o latou olaga mo i latou ma a latou fanau i o latou aiga? E faapefea ona outou fesoasoani i ai? E mafai faapefea e se tagata ona fesoasoani e lagona se fiafiaga loloto mo le tina o lana fanau, ma lana fanau foi? Afai ua tatou maua le Agaga o le Atua, tatou le faia se isi lava mea. Seia vagana ua o ese alii mai le agaga sao, ma ua faaitiitia mai o latou tiute, ona latou faagalo lea ma lē faamamalu i soo se agaga ua tuuina atu mo la latou tausiga. E ao lava ona latou faamamalu ia latou ava ma fanau.⁷

O alii popoto, o alii fai pisinisi, o alii o mataupu, o alii o loo galulue pea lava pea i galuega o le soifuaga, ma ua tuuina atu lo latou malosi ma manatu ia latou galuega ma tiute, e le mafai ona latou fiafia i le filemu sili ma o latou aiga e pei ona latou mananao i ai, ae afai ua ia i latou le Agaga o le Alii i le faataunuuina o o latou tiute faaletino, o le a latou lē faagaloina lava tina o a latou fanau, poo a latou fanau.⁸

Tama ma tina, aua nei faasino eseina pe tuliesea a outou fanau.

Oi! o’u uso e, ia faamaoni i o outou aiga, ia faamaoni ia outou ava ma fanau. Aoao i latou i le ala o le ola. Aua nei faatagaina i latou e o ese mamao mai ia te outou ina nei faalēano mai ia te outou poo se mataupu o le mamalu, mama ma le upumoni. … Afai o le a outou faalatalata mai o outou atalii i o outou fatu, ma mafai ona opo mai i o outou lima; afai tou te faailoa atu ina ia latou lagona ai tou te alolofa ia i latou, o outou o o latou matua, o i latou o a outou fanau, ma faalatalata mai ia te outou, o le a lē o ese mamao i latou mai ia te outou, ma o le a latou lē solia ni agasala matuia. Ae ina ua outou tuli ese i latou mai le aiga, tuli ese mai a outou mafutaga—i fafo atu i le pogisa o le po i le faalapotopotoga o le lē faamaoni ma le toilalo; ona ua latou fiu ia te outou, po ua outou le lavāvā i lo latou lava pisapisao mama ma le tautala soo i le fale, ona outou faapea lea, “O ese atu i se mea,” o le ituaiga faiga lenei o a outou fanau ua mafua ai lo latou o ese mai ai ia te outou.⁹

O a tatou fanau e faapei foi o i tatou; sa le mafai ona tulieseina i tatou; e le mafai ona tulieseina i tatou i le taimi nei. E faapei i tatou o nisi o meaola tatou te iloa i le lalolagi. E mafai ona outou tauanau i latou; e mafai ona outou taitai i latou, e ala i le faaaliali atu o mea e fiafia ai i latou, ma le tautala ma le alofa ia i latou, ae le mafai ona outou tulieseina i latou; e le mafai ona tulieseina i latou. E le mafai ona tulieseina i tatou. E le o se amio a le tagata le tuliese; e lei faia i latou e amio ai faapena. …

E le mafai ona e faamalosia ou atalii poo ou afafine i le lagi. Atonu e mafai ona e faamalosia latou i seoli, e faaaoga ai uiga matuia i le taumafaiga ina ia lelei ai i latou, ae o oe lava ia e lē o lelei e pei ona tatau ona i ai. O le tama e ita i lona atalii, ma taumafai e faasa’o o ia a’o ita o ia, ua i ai i se sese tele; ua sili atu ona faanoanoa ma teena o ia nai lo le tamaitiiti ua sese. E na o le alofa e mafai ona e faasa’o ai lau fanau, o le agalelei, o le alofa pea, o le faatauanau, ma le mafuaaga lelei.¹⁰

Tama, afai ua outou naunau ina ia aoao a outou fanau mataupu o le talalelei, afai ua outou mananao ina ia latou alolofa ma fiafia i le upumoni ma malamalama ai, afai tou te mananao ina ia usiusitai i latou ma faatasia ma outou, alolofa ia i latou ma tautino atu ia i latou tou te alolofa ia i latou i upu ma gaioiga uma tou te faia. Mo lo outou lava lelei, mo le alofa e tatau ona i ai i le va o outou ma o outou atalii—poo le a lava le lē tonu o loo i ai i latou, poo le tasi poo le isi, pe a outou talanoa ia i latou, aua nei faia i le ita, aua nei faia ma le faatiga, po o le agaga o le tetee. Tautala ia i latou i le alofa; faanofo i lalo ma fetagisi faatasi ma i latou pe a manaomia ma ia latou fetagisi foi ma outou pe a tatau ai. Ia faamalulu i o latou loto; ia latou maua le lagona alofa mo outou. Aua nei faaaogaina le sasa ma ia leai se lima tētē, ae ia… talanoa ia i latou i le mafaufau lelei, i le faatauanau ma le alofa faamaoni.¹¹

Ia ola tamā o Isaraelu i le ala e tatau ona latou ola ai; ia tausi ia latou ava i le ala e tatau ona latou tausia ai; ia avea o latou aiga ma nofoaga o le filemu e tatau ai; faamama avega i luga o a latou soa i le mafai e sili ai; fai ni faataitaiga lelei mo a latou fanau; aoao i latou ina ia latou mafuta i le tatalo, i le taeao ma le po, ma soo se taimi e nonofo ai i lalo e talia taumafa, ia faafetaia le alofa tunoa o le Atua ua foaiina mai meaai ua latou aai ai ma lavalava ua latou oofu ai, ma faafetaia le agalelei o le Atua ona o mea uma.¹²

Fautuaga mo Suesuega

O le a le uiga o le “manumalo ia i tatou lava”? E faapefea ona tatou “manumalo i loto” o a tatou fanau ma isi i le upumoni?
E faapefea e tane ma ava ona tausia le tasi i le isi i le “migao silisili” ma le “faaaloalo maualuga”? O a faamanuiaga o le faia o nei mea? Pe a fetausia’i matua i le faaaloalo ma le migao, e faapefea e amio a matua ona aafia ai amio a a latou fanau?
O a ni auala silisili e mafai ona tatou faaaafia ai isi ina ia ola amiotonu? (Tagai MFF 121:41–44.) O a nisi o amioga faasaua e feteenai ma lenei fautuaga mai le Alii?
E faapefea i nisi o taimi ona tatou tulieseina a tatou fanau mai ia i tatou? O le a le mea e ono tupu ia i tatou ma a tatou fanau pe a tatou tulieseina i latou?
Aisea o se matua ua faasa’o i se tamaitiiti i le ita ua sili atu lona sese nai lo le tamaitiiti? O le a se mea e ono fai e se matua pe a lagona le ita i le fanau?
Sa faapefea ona tausia e le Faaola ia tamaiti laiti? (Tagai Mataio 19:13–15; 3 Nifae 17:11–24.) O le a lana timaiga ia i latou ua faasaua i tamaiti laiti? (tagai Mataio 18:1–6.)
E faapefea ona tatou faalatalata mai a tatou fanau ia i tatou ma mataupu o le talalelei? O a faamanuiaga e oo mai ia i latou o e tausi a latou fanau “faalatalata i o [latou] loto”?

Christ with the Children — *O Keriso ma Tamaiti*, tusia e Harry Anderson. E alofa Iesu Keriso i tamaiti ma ua ia aoao mai “ai se na te faatausuaiina se tasi o i latou nei e faatauvaa o e faatuatua mai ia te au, e lelei ia te ia pe ana noatia se maaolo i lona ua, ma lafoaiina o ia i le moana” (Mareko 9:42).