Mauaina o le Malologa ia Keriso

O i latou ua maua le molimau ia Iesu Keriso latou te maua le malologa ma le filemu i o latou agaga.

Mai le Soifuaga o Iosefa F. Samita

Sa maliu Iosefa F. Samita i le aso 19 Novema 1918, ao galue o ia o se Peresitene o le Ekalesia mai le 1901. I lona malosi atoatoa, o le maua’i, ma le faamaoni i le faia o le galuega a le Alii, sa tuuina atu atoa ai e ia lona ola e aoao atu ai upu moni o le talalelei a Iesu Keriso. O ia o le failauga o le amiotonu, o le Perofeta a le Atua, sa ia lapatai atu i le Au Paia “Mulimuli mai ia te au, e pei ona ou mulimuli atu i le taiulu, o le Togiola lea o le lalolagi.”¹

O Peresitene Heber J. Grant, o lē sa suitulaga ia Iosefa F. Samita i le Peresitene o le Ekalesia sa saunoa i lona sauniga i le tuugamau, “Mo le 36 tausaga sa ma faatasi ai ma ia, muamua ina ua avea o ia ma fesoasoani, ma mulimuli ane ai ua avea ma Peresitene o le Ekalesia. I ia tausaga uma ou te le iloaina se mea e tasi i lona olaga, i se upu poo se amio, e le agavaa ai o ia i le avea ai o se tagata moni lava. E mafai ona ou faapea atu ma lo’u agaga faamaoni lava, ‘O ia o se tagata ou te manao ia avea ai au e pei o ia.’ I lo’u tu ai i tafatafa o lona oliolisaga tumau, ou te manao e sili atu nai lo mea e mafai ona faamatalaina e le gagana, i le malosiaga ma le malamalama e avea ai o se ituaiga, e manatu alofa, e loto faamagalo, e toa ma e mamalu foi, ma moni ma faamaoni, ma savali i ona tulaga vae uma. E leai se isi mea ou te toe manao ai.

“. … Aua e leai se tasi na soifua sa i ai se molimau malosi i le Atua soifua ma lo tatou Togiola nai lo o Iosefa F. Samita. Mai aso o lo’u laitiiti, sa matua faamanuiaina lava au i le molimau na ia tuuina atu ia te i latou e masani ona latou mafuta, e molimauina ai o loo soifua le Atua ma o Iesu o le Keriso, o le Alo o le Atua Soifua, o le Togiola o le lalolagi. O le agaga o musumusuga o loo i totonu o lea tagata ua matua teu i lo’u loto ma loto o isi tagata e toatele. Ou te alofa tele ia Iosefa F. Samita ma ou te le i alofa faapea muamua i se isi alii sa ou iloaina muamua. Ia faamanuia le Atua ia te ia.”²

O molimau ia sa maua mai se saunoaga a Peresitene Samita sa faia i Provo, Utah, i le aso 13 o Ianuari 1907.³

Aoaoga a Iosefa F. Samita

Tatou te ulufale atu i le malologa o le Alii pe a tatou tuuina atu o tatou agaga ia te Ia ma Lana talalelei.

Ou te manao e faitau mai i tusitusiga a Moronae, i le mea o loo tauina mai ai aoaoga a lona tama, o Mamona.

“O lenei foi, o au o Moronae, ou te tusia ni nai upu a lou tama, o Mamona na ia fai atu ai e uiga i le faatuatua, ma le faamoemoe, ma le alofa…

“ … Ou te tautala atu ia te outou o le Ekalesia, o e o loo mulimuli ma le filemu ia Keriso, o i latou o loo i ai le faamoemoe ua lava, o le mea lea tatou te ulufale atu ai i le malologa o le Alii, mai le taimi lenei e agai atu i luma, ma sei oo i le taimi e malolo faatasi ai ma ia i le lagi.” [Moronae 7:1, 3.]

. … O le a le uiga o le ulufale atu i le malologa o le Alii? Ia te au lava ia, o lona uiga ua Ia manumalo ia te au ona o le alofa o le Atua, ua mafai ai ona ou lagona le malologa ia Keriso, o le a le toe lagona ai le faalavelave o nisi mataupu autu, o le faitogafiti, ma le amio pa’a’a, o loo faatalitali e faaseseina le mea sao; ma ua fausiaina i le malamalama ma le molimau a Iesu Keriso, ina ia leai ai se malosiaga na te tuleieseina au mai le auala sao ma le vaapiapi lea e tau atu i le afioaga o le Atua, ma olioli ai i le faaeaga i Lona malo mamalu; ma e amata atu i le taimi nei o le a ou olioli i lena malologa seia oo i le malologa ma Ia i le Lagi.

Ou te manao ina ia ou faamausaliina lenei mafaufauga i o outou mafaufau, ona ou te manao ia te outou ia malamalama o le uiga lenei sa taumafai e avatu i upu nei: “ulu atu i le malologa o le Atua.” Ou te manao e ta’u atu ia te outou o le tagata e le matua atina’eina i mataupu autu a Keriso, o i latou o e le matua tuuina atu o latou agaga atoa i le Alii, ma le talalelei lea sa Ia aoaoina i le lalolagi, e lei ulufale atu i lena malologa. O loo i ai lava o ia i le vasa, o le mea lava lea ua fai atu ai, e le mautinoa, e le tumau, e faalotolotolua, ua vaivai le faatuatua ua tau le mafai ona minoi, ua saunia e manumalo ai le faitogafiti, ma le amio pa’a’a, o loo faatali na te faasese ma taitai esea i mea sese ma le pogisa. A o le na te mauaina le molimau ia Iesu Keriso i totonu o lona loto, o le foi na te tuuina atu ana mea uma i le Malo o le Atua, ma le mea e finagalo i ai le Tama, o le tagata lena ua matua atinae. Ua tumau lona loto; ua tumau foi lona mafaufau; ua leai sona toe masalosalo, ua aveesea foi lona fefe, ua ia iloaina le e faatuatuaina, ua matua mausali lona faamoemoe ma lona lagona e faapea, “a’o ia ma lona aiga o le a auauna atu i le Atua,” tausi Ana poloaiga ma savali i le mamao e mafai ona savavali ai tagata ola uma, i le mama o le olaga, i le mamalu, faamaoni, ma le le pona i luma o le Alii.

Ou te faafetai i lou Atua ona o le agaga ma lagona o le lē mapu ua aveeseina mai i ou mafaufauga ma le mafaufau e tusa ai ma le galuega o loo tatou feagai ai; ma ua tuuina mai e le Alii ia te a’u le faamautinoaga i luga atu o isi mea uma e faatatau i lenei mataupu. Ua ou olioli i le Talalelei; ua ou olioli i le molimau a le Agaga o le Atua i lo’u loto; ua ou olioli i le molimau a le Perofeta o Iosefa Samita; ua ou olioli i mataupu faavae uma lava o le Talalelei a Iesu Keriso ua tatou masani ai, e tusa ma le mea ua oo i ai lo’u malamalama. E le mafai ona ou toe fesili atu i se isi mea, ou te lē toe manao i se isi mea e sili atu nai lo mataupu faavae o le ola ma le faaolataga ua faaalia mai i lenei fuafuaga sili o le Togiola ua toefuatai mai i le lalolagi i nei aso e gata ai. …

Tatou te naunautai e mulimuli i tulaga mama maualuga ua faatuina e lo tatou Faaola.

… Afai ua faamautu o tatou loto i faamoemoega lelei e auauna i le Atua ma tausi Ana poloaiga, mata o a ni ona fua? O le a le mea o le a aliali mai ai?. … O le a tumu le tagata i le agaga o le faamagalo atu, o le alofa, o le alofa mutimutivale, o le alofa lē faatuaoia. O le a latou lē saili i ni mea e tauaimisa ai pe felotoleagaa’i ai; poo le faavalea foi i ē ua vaivai, poo le au lē taupulea, poo tagata lē malamalama; ae peitai o le a latou faatauaina aia tatau a ē lē malamalama, o e vaivai, o i latou o loo faalagolago mai i lo latou alofa mutimutivale, e pei lava ona latou faia ia te i latou, o le a latou faamamalu i le saolotoga o o latou uso a tagata e pei foi o o latou lava saolotoga; latou te faatauaina le amioatua, mamalu ma le faamaoni a o latou tuaoi ma uso e pei lava foi ona latou talisapaia ma faatauaina mo i latou lava.

E le mafai ona tatou oo atu i le taimi e tasi i le tulaga maualuga mama o le atoatoaga lea na tuuina aloaia mai e Ia. Ma a o tatou malamalama i le mea moni e lē mafai i le taimi nei ona tatou mauaina lena atoatoaga, ma e le mafai foi ona tatou uuina le mea atoa e pei ona sa tatau ai, aua ua i ai le sini iina, ua i ai le tulaga faatonuina i luma o o tatou mata. O loo tatou tulimataia atu nei le taimi tatou te taunuu atu ai i lena tulaga lelei ma le faaeaina ua uma ona saunia e le faataitaiga, le soifua, ma le misiona a le Alii o Iesu Keriso. E ui lava ina tatou toilalo e oo atu i tulaga atoatoa ua saunia e le Atua e auala ia Iesu Keriso, ae o le a tatou salamo lava pe a tatou toilalo, ma o le a faafouina lo tatou naunautaiga, ma faaluaina lo tatou filiga a taeao. Ioe, o le taimi nei o le a faaluaina lo tatou filiga, ma taumafai e faatoilalo o tatou vaivaiga, ma faalatalata atili mai i le faataitaiga ua faatuina e le Alo o le Atua.

O le Talalelei lenei a Iesu Keriso, ma e moni ona mataupu autu. O le tagata na te usiusitai i ai, ma taliaina atoatoa ma ola ai i le agaga o le talalelei, ma talisapaia le agaga o le talalelei i lona loto; o loo i ai le manao o lona agaga ma saili mo lena manao ina ia faasilisili i lo isi manaoga uma, o le a alu ai pea mai lea faatuatua i lea faatuatua, mai le faamoemoe i le atamai, mai le malamalama i le poto ma le malosiaga, ma mulimuli ane ua oo atu i le faaeaga ma le mamalu i le Malo o lo tatou Atua; ma o le a leai se mana i lalo ifo o le malo selesitila e mafai ona taofia o ia mai lona alualu i luma, pe afai o le a taumafai e tausia tulafono ma poloaiga a le Atua. …

… Afai ua tonu lava i o tatou manatu, e pei ona sa faia e Iosua o aso anamua, o le a tatou auauna atu i le Atua i le aso nei, ma e mai i le aso nei ma aso uma o i luma, o le a tatou auauna ia te Ia ma tausi i Ana poloaiga, ma amata ai ona mafai ona vavae mai le pogisa mai le malamalama, le lelei mai le leaga, o le mea mama mai le mea lē mama, ma mai lena taimi o le a saga atili ai ona malosi lou manao i le lelei, ma o le a avea ai oe ma tagata e matua faia le mea lelei ma faataunuuina ai le faamoemoe o le Atua, i le faatoilaloina o ou lava vaivaiga, i le tetee atu ma le filiga i le lafoa’ia o le leaga ma filifili i le lelei, i le naunau lea i le lelei ae aloese mai le leaga, ma le liliuese mai le lalolagi ma tuinanau mataga faanatura o le tagata, ae fesoasoani i le mea ua fuafuaina e faaeaina ai le tagata ma faaeaina ai le manao o le tagata, ma faaeaina ona faamoemoega uma, ma faalautele ai lona alofa, lona agalelei ma lona loto faamagalo atu. Ma o le a mafai ona faamumu le moli, e pei ona fai mai le Perofeta; e ao ona e faia ia manino, ma ia aua ne’i sese e pei ona e iloatino le malamalama o le ao mai le pogisa o le po. [tagai Moronae 7:14-15.]…

Tatou te ola mai lea amioga mama i lea amioga mama seia oo lava ina tatou maua le atoatoa ma avea ai ma suli faatasi ma Iesu Keriso.

Se i ou faitauina atu le mea lenei ia te outou:

“E moni ua faapea mai ai le Alii: O le a oo i tagata taitoatasi o lē lafoai ana agasala ma sau ia te au, ma valaau mai i lo’u igoa, ma usiusitai i lo’u leo, ma tausi mai i a’u poloaiga, o le a vaai i o’u mata ma iloa o loo i ai a’u.”[MFF 93:1.]

O le upu lea a le Alii. E le faigofie i se tagata ona vaai i foliga o le Atua ma iloa o loo i ai o Ia, o lē e lē lafoai i ana agasala, e lē sau i le Atua, e lē valaau i Lona suafa, e lē usiusitai i le Siufofoga o le Atua, e le tausia Ana poloaiga. Pe mafai ea ona ia vaai i foliga o le Atua, ma iloa ai o loo i ai o Ia? E Leai. E leai se folafolaga faapena; ae peitai o le faafeagai. O lē lava e “sau ia te au;” o lē e “lafoai i ana agasala;” o lē e “valaau i lo’u igoa;” o lē e “usiusitai i lo’u leo;” o lē e “tausi i a’u poloaiga.” O ia lena o le a vaai i o’u foliga,” ua faapea mai ai le Atua, ma o ia foi lena na te “iloaina o loo i ai au,” o le a lē gata na te “iloaina o loo i ai au,” ma o le a na iloaina foi o “au o le malamalama moni o loo faamalamalamaina uma tagata o loo o mai i le lalolagi.” [MFF 93:2.]

E maeu le matagofie o le folafolaga o loo ofoina mai mo le fanau a le Atua… Afai o Iesu Keriso, le Alo e Toatasi o le Tama sa fanaua i le tino, na te lei mauaina le atoatoaga muamua a o lea ua tau o le Atalii, ma faaauau pea ona maua lea amioga mama ma lea amioga mama, ma faaopoopo atu i ai lea amioga mama ma lea amioga mama, seia oo ina Ia mauaina le atoatoa, o loo manino mai lava o sē o le a savali i ona tulaga aao, o sē e usiusitai i Ana mataupu, ma faataitai i Lana fuafuaga o le ola ma le faaolataga, e le taumate na te mauaina lea amioga mama ma lea amioga mama, ma faaauau ai pea i lea amioga mama i lea amioga mama; o le a alu ese mai i le lē atoatoa i le atoatoa ma ia mauaina se mea itiiti i i ma se mea itiiti iina, seia oo lava ina ia mauaina le atoatoa e pei ona maua e le Alo o le Atua; ma o le a avea ai e pei o le Keriso le Alo o le Atua, o se suli o le Atua, ma o le a suli faatasi ai ma Iesu Keriso. [tagai MFF 93:11-14.] Ou te lagona lo’u le agavaa ou te tuuina atu la’u faamatalaga i lea mataupu ma se lagona o loo mu pea i totonu o lou loto, ma e fāgua mai pea i le upu lenei a Keriso, lenei avanoa lelei ua aumaia ia te au e auala i le usiusitai i poloaiga a le Atua, e auala i le tausiga o afioga a le Alii, ma avea ai ma au meatotino le tausiaina o le atoatoaga o le mamalu o le Atua, le atoatoaga o le malamalama o le upu moni, le atoatoaga o le mana, le atoatoaga o le poto, o le mauaina o le mana, malo ma le mamalu e pei o le Tama.

Pe le o tuuina atu ai ea i lenei tulaga se mea e afua ai ona e ola, se mea e te faamoemoe i ai? Pe le o i ai ea se taui e lē mafaatauina ua ofoina mai ia te oe; ua ofoina atu ia te oe ona o lou usiusitai, ma lou faatuatua, ma lou taliaina o le malamalama, savali i le malamalama e pei ona savali Keriso i le malamalama; ina ia oulua mafuta ai ma Ia, ma ia faamamaina oe mai au agasala uma i le toto o Iesu Keriso? Ou te faafetai i lo’u Atua mo lenei Talalelei paia; ou te faafetai ia te Ia mo lenei talitonuga ma lenei faamoemoega ua musuia ai lo’u agaga ia ou agavaa ai mo lo’u Tama ma lo’u Atua; agavaa e faatasi ma Ia; agavaa mo le faaeaina i Lona malo; ma olioli faatasi ma Ia ma mea uma o i ai i tausaga e lē mafaitauina o le faavavau.

Ou te iloaina o le Talalelei a Iesu Keriso o le a mafai ai ona ou maua lea faaeaga, ma e leai se isi auala e mafai ai e le tagata ona faaolaina; e leai se isi fuafuaga ua faaali mai i le lalolagi e mafai ai e le tagata ona faaeaina ma toe foi atu ai i le Atua. E leai lava se isi auala. …

Pe ua faaalia mai ea mea uma? E leai. E i ai nisi mea e lei faaalia mai e le Atua i Lana fanau? Ioe, e tele, ae peitai, e lei taitai ona saunia tatou mo se malamalama tele atu nai lo lea ua i ai; aua o le tele e tuuina atu o le tele foi lena e manaomia mai, ma ua tele mea ua uma ona tuuina mai, ma o e tele atu mea o loo manaomia e le Atua mai ia te i tatou i aso nei nai lo mea o loo tatou tuuina atu. O le a tatou le savavali i le malamalama e pei ona i ai o Ia; o le a tatou le usiusitai i le upu moni, e pei ona Ia manaomia tatou ina ia faia. Ua tatou faamatuu atu i o tatou lava vaivaiga; ua tatou faamatuu atu i faaosoosoga o loo feagai ma i tatou; o o tatou tuinanau, o o tatou lava manatu faapito, ma tatou lava faanaunauga faale-tagata nai lo le tula’i a’e i luga atu o vaivaiga i la le tino ma faapea i o tatou agaga, “A o a’u ma lo’u aiga, o le a auauna atu i lo’u Atua ma tausi i Ana poloaiga, ma savali ma le lē pona i Ona luma. Tatou te le o faia, ae o le Au Paia o Aso e Gata ai o ni tagata e sili ona lelei i le lalolagi. O loo tatou ola e latalata atu i lenei tulaga nai lo nisi lava tagata o loo i ai i le lalolagi i aso nei, e ui lava o loo i ai o tatou vaivaiga ma lē atoatoa.

E mafai ona maua le filemu ma le fiafia uma e ala i le talalelei a Iesu Keriso.

O lenei, ia faamanuia le Alii ia te outou. Ia i ai le filemu ia te outou, o ou uso e ma tuafafine. Ia tuu le faatuatua o le Talalelei i totonu o outou loto. Ia outou iloa o le lotu lenei na tuuina atu ia te outou e auala atu ia Iosefa Samita le Perofeta, o le lotu a le Atua, o le tulafono a le Atua, ma o le mea lea o loo manaomia e Lana fanau i luga o le fogaeleele, ma o le mea lea e faatumutumu i mea uma. E tulaga ese lava ia; e i luga atu o le lalolagi, e i luga atu o siliva ma auro, o fale, ma fanua, e i luga atu o le ola i la le tino, aua e le gata ina tatou saogalemu ai ma o tatou aia tatau ma avanoa, ae ua tatou saogalemu ai foi i le meaalofa o le ola faavavau, o le meaalofa silisili a le Atua.

E leai se isi mea e mafai ona faatusatusa i ai. O se mea aupito tele lea i le lalolagi… o se mea aupito tele i le fogaeleele atoa… o se mea aupito taua tele lea mo tatou i le lalolagi atoa. … [o le] upumoni a le Atua, o le lotu a Iesu Keriso, o le mataupu autu o le Togiola ma le Faaolataga mai le agasala, mai i o tatou lava vaivaiga, ma o se mafutaga lelei ma le atoatoa o le agaga, ma le galuega, ma le malamalama, ma le mana, ma le poto o le Atua, o lē na te foai mai mea lelei uma. Ia i ai le filemu ia te outou uma, ia i ai foi faamanuiaga o le soifua maloloina lelei ma ia faateleina le alofa ia te outou, i soo se mea o le olaga tou te faia, ina ia outou matata’u i le Atua i taimi uma

Ae peitai ou te le manao tou te mafaufau i sina taimi faapea o le lotu a Iesu Keriso ua avea o se avega mamafa ma ua mamafatū ia te outou. E leai. Na fetalai mai le Atua, “E avegofie la’u amo, o la’u avega foi e māmā ia.” [Mataio 11:30.] O le faaolataga mai le agasala. O le pologa e lē o le tagata ua faasaoina ma siitia ese mai le noataga o le agasala, ae o le tagata o loo avea pea ma tagata aitalafu ma se pagota i le agasala. O ia lena o le pologa; o ia o le tagata ua noanoatia; o ia lea e manaomia la tatou fesoasoani, o la tatou faamaisega, ma lo tatou alofa. O ia lena e tatau ona tatou taumafai e sii ae i luga mai le nofo pologa ma le agasala, ia olioli ai i le saolotoga mai le agasala ma le solitulafono.

O Iesu Keriso, o le Alo o le Atua, e agavaa, ma sa agavaa o ia i la le tino, ma e agavaa lava o ia e oo mai i aso nei, e mauaina ma le fiafia mea uma e tatau i se tagata amiotonu ona olioli ai; ma e leai se mea se tasi o mea uma sa taofia mai ia te Ia e aoga. E faapena foi le Au Paia o Aso e Gata ai. “Oi” sa faapea mai ai se tasi; “afai o le a ou ola i lau lotu e pei ona e faasino mai ia te au, o le a le toe i ai so’u fiafia, o le a taofia mea ou te fiafia i ai,”O oe na le tagata valea. E mafai ona ou fiafia i taimi uma lava, i fiafiaga amiotonu uma lava e mafai e soo se tagata o le Atua i luga o le fogaeleele ona olioli ai; ma afai e sili atu lo’u faatuatua nai lo soo se uso i le tausia o poloaiga a le Atua, e sili atu lo’u fiafia nai lo ia. E faatusatusa i lou faamaoni, o lou faatuatua, o le tele o lou malamalama i le Atua, o le a mafai ai ona talisapaia le fiafia, e mama atoatoa ma lē lualuagia, aua o le Talalelei e aumaia ai le fiafia moni, ma le saolotoga moni mai noataga o le agasala, ma le āu oona.

Ia fesoasoani mai le Atua ia te i tatou ina ia iloa le upu moni, ma le malamalama e pei ona i ai i le ao ia iloatino ai e pei ona mafai ona tatou iloatino o le malamalama o le ao mai le pogisa o le po, o la’u tatalo lea, i le suafa o Iesu Keriso. Amene.

Fautuaga mo Suesuega

O le a le uiga o le “ulu atu i le malologa o le Alii”? E mafai faapefea ona tatou maua lea malologa?
E faapefea ona tatou tuuina atu o tatou agaga atoatoa i le Alii ma Lana Talalelei?
O le a le mea e mafai ona tatou faia tatou te maua ai le “tulaga faaeaina” ua uma ona saunia e le Faaola?
O le a le uiga o le ola mai “lea amioga mama i lea amioga mama”? O le a le mea e mafai ona tatou faia e mautinoa ai ua tatou ola pea lava pea i le auala lea seia oo ina tatou maua le atoatoa?
O a ni folafolaga lelei ua fai mo latou o loo taumafai ia pei o le Faaola?
A o tuputupu pea lou faatuatua i le Alii o Iesu Keriso, e faapefea ona Ia faamamaina au avega ma tuuina atu ia te oe le malologa? (Tagai foi Mataio 11:28-30)
O a ni mea ua tutupu e fesoasoani e malamalama ai o le filemu ma le fiafia e maua i le Talalelei a Iesu Keriso?
E faapefea i lau suesue atu i le Talalelei a Iesu Keriso, e pei ona aoao mai e Peresitene Iosefa F. Samita, ona fesoasoani ia te oe e aoao atili ai e uiga i le Atua? lagona ai le olioli moni ma le filemu? ma avea ai atili e pei o le Faaola?

Joseph F. Smith — O le Susuga a Peresitene Iosefa F. Samita, 1838-1918. Sa ia aoao mai, “E fuafua i lou faamaoni, o lou faatuatua, o le tele o lou malamalama i le Atua, o le a e mafai ai ona talisapaia le fiafia, e mama atoatoa ma lē lualuagia, aua o le Talalelei e aumaia ai le fiafia moni” (*Millennial Star,* 30 Me,1907, 349).