Fanau: O le Oa Silisili o le Olioli Uma Faalelalolagi

E ao ona tatou faapelepele ia tatou fanau, aoao i latou i le talalelei a Iesu Keriso, ma aoao ia i latou le ola mama, alofa ma le faamaoni.

Mai le Soifuaga o Iosefa F. Samita

O le alofa o Iosefa F. Samita i le talalelei sa milosia faatasi ma lona alofa faa-Keriso mo le fanau — o ana fanau ma fanau iti uma lava. “O le oa silisili o lo’u olioli uma i le lalolagi o la’u fanau pele,” sa ia saunoa mai ai. “Faafetai i le Atua!”¹

Sa silafia e Charles W. Nibley, o le Epikopo Pulefaamalumalu o le Ekalesia, “o le alofa o Iosefa F. Samita mo le fanau laiti sa leai sona tuaoi. I sana [malaga] e ui atu i nofoaga i saute e agai atu i St. George… , sa savavali ae ai i ona luma ia ni faapotopotoga o fanau laiti, o se vaaiga matagofie lona alofa i nei tamaiti laiti. O lo’u tiute le taumafai e amatalia le savaliga a le faapotopotoga, ina ia taunuu atu i le nofoaga o loo sosoo ai o loo faatali mai ai mo i matou le motu o tagata, ae o se galuega faigata le toso ese o ia mai le fanau laiti. Ua ia finagalo e lulu aao ma talanoa ia i latou uma lava. …

“Sa ou asiasi i lona aiga ao ma’i se tasi o lana fanau. Sa ou vaaia ua sau o ia i le fale mai lana galuega i le po ua vaivai lava, ma o se mea e masani ai pea, sa ia savalivali solo ai i totonu o le fale mo se taimi umi ma sii lona atalii laitiiti i ona aao, … ma le alofa tele, ma faamalosi atu i mea uma i le agalelei atoatoa ma le agaga o le alofa ma le alofa mutimutivale.”²

“Sa faaalia lona agalelei ma le alofa mo lona aiga toatele ma le faaaloalogia. I lana saunoaga mulimuli i lana fanau, i le aso 10 o Novema 1918, sa faaalia ai le alofa faapelepele o lona loto ia i latou i upu nei: “A faataamilo la’u vaai i o’u tafatafa, ma vaai atu i o’u atalii ma ou afafine ua foai mai e le Alii ia te au,—ma ua ou manumalo ai, ona o Lana fesoasoani, ma maua ai lo latou fiafia, ma faaaloalogia ai i le lalolagi — Ua ou maua le oloa faapelepele o lo’u ola, o le mea atoa lea ua ta’uaogaina ai le ola ai i lenei soifuaga.’”³

Aoaoga a Iosefa F. Samita

Aoao le fanau i le talalelei a Iesu Keriso i mataupu ma faataitaiga

O se alii ma se tamaitai ua opogi le talalelei a Iesu Keriso ma ua amatalia faatasi so la’ua aiga, e tatau i lo la’ua malosi, e ala i faataitaiga ma aafiaga ona aoao ai la la’ua fanau ina ia faataitai ia i laua i le olaga o le mama, mamalu, ma le faamaoni i le malo o le Atua ma o le a aafia ai lo latou fiafia ma le faaolataga. E leai se tasi na te fautuaina la’u fanau i le atoatoa o le faamaoni ma le popolega mo lo latou fiafia ma le faaolataga nai lo a’u lava ia. E leai se tasi ua sili atu lona naunautaiga mo le manuia o la’u lava fanau nai lo a’u. E le mafai ona faamalieina a’u e aunoa ma i latou. O i latou o se vaega o a’u. O a au i latou; ua foaiina mai i latou e le Atua ia te au; ma ou te manao ina ia lotomaualalo i latou ma usiusitai i mea o loo manaomia i le talalelei. Ou te manao ina ia latou faia le mea sao, ma ia tonu i mea uma lava, ina ia agavaa ai i latou i le faatulagaga ua tuuina mai e le Alii ia i latou ma avea o ni tagata o lana feagaiga ua filifilia mai tagata uma, ona ua latou ositaulaga mo lo latou lava faaolataga i le upumoni.⁴

“O fanau,” ua tauina mai ia i tatou, “o le tofi mai le Alii;” o i latou foi, ua ta’u mai e le fai Salamo ia i tatou, “o le taui lea mai ia te ia.” [Salamo 127:3.] Afai ua aveesea mai le fanau lo latou tofi, e faapefea ona tauia e le Alii? E lē o i latou e aumai ai le vaivai ma le mativa i le olaga i le aiga, aua ua latou aumaia nisi o faamanuiaga paia ua maua ai le manuia o le aiga ma le atunuu.“ E pei o ufanafana i le lima o le toa, e faapea lava atalii o taulelea. Amuia le tagata ua tumu ai lana utu.” [Salamo 127:4–5.]⁵

O i tatou o tagata Kerisiano, tatou te talitonu i le Alii o Iesu Keriso, ma ua tatou lagona o lo tatou tiute le iloa o ia o lo tatou Faaola ma le Togiola. Aoao atu nei mea ia outou fanau. Aoao i latou o le Perofeta o Iosefa Samita ua toefuataiina mai i ai le Perisitua sa umia e Peteru ma Iakopo ma Ioane, o e sa faauuina i le aao o le Faaola lava ia. Aoao i latou o Iosefa Samita, le perofeta, a o itiiti o ia, sa filifilia ma valaauina e le Atua e faataatia le faavae o le Ekalesia a Keriso i le lalolagi, e toefuataiina le perisitua paia, ma sauniga o le talalelei, o mea nei e manaomia e faaagavaa ai alii e ulu atu i le malo o le lagi. Aoao a outou fanau ina ia faaaloalo i o latou tuaoi. Aoao a outou fanau ina ia faaaloalo i o latou epikopo ma faiaoga o loo asia o latou aiga e aoao i latou. Aoao a outou fanau e faaaloalo i tagata matutua. Aoao i latou ina ia faamamalu ma ia taofi mau i le mamalu e manatua ai pea o latou matua, ma fesoasoani ia i latou uma ua manaomia le fesoasoani. Aoao a outou fanau e faapei ona aoaoina ai outou, e faamamalu i le Perisitua ua outou umia, o le Perisitua ua tatou umia o ni toeaiina o Isaraelu.

Aoao a outou fanau ina ia faamamalu ia i latou lava, aoao a outou fanau e faamamalu i le mataupu faavae o le au peresitene o loo maopoopo ai le faatulagaina o faalapotopotoga ma o loo maua ai foi le malosi ma le mana mo le manuia ma le fiafia ma le atinaeina o tagata. Aoao a outou fanau pe afai e o i le aoga e tatau ona latou faaaloalo i o latou faiaoga ma mea ua moni ma faamaoni, e tatau mo le alii ma le tamaitai, ma mea ua tauaogaina. … Aoao a outou fanau ina ia faamamalu i le tulafono a le Atua ma le tulafono a le setete ma faale-malo.⁶

Ua tatou faitau i le Tusi o Mataupu Faavae ma Feagaiga e manaomia matua ina ia aoao ia latou fanau “ina ia malamalama i mataupu faavae o le salamo, faatuatua ia Keriso le Alo o le Atua Soifua, ma le papatisoga ma le meaalofa o le Agaga Paia e ala i le faaee atu o lima pe a atoa le valu o tausaga o le matua.” “O le a latou aoao atu foi i a latou fanau ia tatalo, ma savavali tonu i luma o le Alii.” Afai ua faatamala matua i le faia o lenei mea, ma ua liliuese le fanau mai le upumoni, ua fetalai le Alii o le a pa’ū le agasala i matua [MFF 68:25, 28]. O se manatu matuia tele ona o se tamā e alofa i lana fanau ma lona loto atoa ae ua faasalaina i luma o le Atua ina ua faatamala ia i latou ua ia alofa i ai ma le faapelepele, seia oo ai i lo latou liliuese mai le upumoni ma ua avea ai ma tagata ua tuliesea. O le liliuese o nei fanau o le a pau i luga o matua, ma o le a fesiligia ai i latou mo lo latou liliuese ma le oo atu i le pogisa. …

Afai ou te faamaonia lo’u lava agavaa ou te ulufale ai i le malo o le Atua, ou te manao ia i ai iina la’u fanau, ma e ua ou fuafuaina ou te ulufale atu i le malo o lo’u Atua. Ua ou saunia mo lena, ma ou te faamoemoe, e tusa ai ma le fesoasoani a le Alii ma e ala i le lotomaualalo ma le usiusitai, ina ia faamaea la’u misiona i luga o lenei fogaeleele ma ia faamaoni i le Atua i o’u aso uma. Ua tonu ia te a’u e faia lenei mea, ma ua ou naunau atu ma le fesoasoani a le Atua o le a ou le toilalo lava. O lea, ou te manao i la’u fanau ia i ai faatasi ma au. Ou te manao i lo’u aiga e faatasi ma au, ma o le mea ou te alu i ai latou te o foi i ai, ma o le a latou maua foi le faaolataga o le a ou maua.⁷

E i ai le aafiaga o matua i a latou fanau; … ma e ui ina tatou le manatu e i ai se aafiaga poo se taua o a tatou faataitaiga, ou te tautino atu ia te outou o le tele o taimi e oo mai le faamanualia e ala i gaioiga ua tatou manatu e le taua e ala i le aafiaga ua latou aumaia i o tatou tuaoi poo fanau. … Ae peitai ua tatou vaai i ni tama ma ni tina ua faia i luma o a latou fanau ni faataitaiga latou te inoino i ai ma faasaina ai a latou fanau. O amioga femoumoua’i a matua e ono faapogisa ai mata ma lē mau tonu le fanau, ma taitaiina ese mai ai i latou mai le ala o le ola ma le faaolataga, aua afai e aoao e matua a latou fanau i mataupu latou te lē o savavali ai foi, atonu o le a lē tele sona aoga vagana ai o le leaga.

Tatou te le o vaai ma toe manatunatu i nei mea e pei ona tatou i ai. Mata o le a se mafaufau o se tamaitiiti i sona matua, pe a amata ona ia mafaufau loloto, ina ua faailoa mai [e lona matua] e talitonu o ia i le Upu o le Poto o se vaega o le talalelei a Iesu Keriso, ma ua tuuina mai e ala i faaaliga, ae ua solia e ia i aso uma lava o lona olaga? O le a ia ola ae ma se talitonuga o lona matua o se tagata pepelo ma ua leai se faatuatua i le talalelei. O i latou ua savavali ai i lenei alafua ua latou aumaia ia i latou lava ni tiutetauave taufaamata’u. E le mafai ona tatou soona tutumau ai i lo tatou alafua, pe tatou te faatuatua tele foi i le faataunuuina o folafolaga.⁸

E ao ona tatou tausia le fanau i le alofa ma le agalelei.

O a tatou fanau o le a avea i latou e faapei ona tatou aoao ai i latou. Ua fananau mai i latou e aunoa ma se poto poo se malamalama— o se meaola sili ona fia maua se fesoasoani nai lo o foafoaga uma o manu ua fananau mai i le lalolagi. O le tamaitiiti laitiiti e amata ona aoao pe a fanau mai, ma o mea uma na te aoaoina e faalagolago tele i le siosiomaga, o le aafiaga ua atinaeina ai o ia, o le agalelei ua tausia ai o ia, o faataitaiga faatupu ua faaalia i ai, o aafiaga paia a le tama ma le tina, poo nisi foi, i lona mafaufau laitiiti. Ma o le a faamoemoe tele i le ala e faia ai e le siosiomaga ma ona matua ma ona faiaoga lona ola aoaoina.

… O le tele o nei mea e faalagolago i aafiaga o loo tausia ai le [tamaitiiti]. O le a outou iloa o le aafiaga malosi sili i le mafaufau o le tamaitiiti ina ia faaosofia ai e aoao, ia alualu i luma, poo le faataunuuina o soo se mea, o le aafiaga lea o le alofa. E sili atu le tele o ni mea e mafai ona faataunuuina mo le lelei e ala i le alofa moni, e tausia ai se tamaitiiti, nai lo se isi lava aafiaga ua taumafai e faaaoga ia te ia. O se tamaitiiti e le mafai ona aoaoina e ala i le sasa pe faafilemu e ala i le faasaua, e mafai ona aoaoina vave e ala i le alofa ma le lagona lelei. Ou te iloa e sa’o lena; ma o lenei mataupu e taua i tulaga uma lava o le soifuaga. … Ia pulea le fanau i ni ala e lē o le ita, o upu faatiga poo le otegia, ae o ala o le alofa ma le manumalo ai i le tuuina mai o o latou faatuatuaga.⁹

Pe a mafai ona outou faamaonia ia outou fanau tou te alolofa ia i latou, ua tuuina atu o outou agaga ia i latou mo lo latou lelei, o outou o a latou uo moni, o i latou foi, o le a latou tuuina atu lo latou faatuatuaga ia te outou ma o le a alolofa ia te outou ma saili e faia a outou faatonuga ma faataunuuina mea ua outou mananao i ai faatasi ai ma lo outou alofa. Ae afai tou te manatu faapito, agaleaga ia i latou, afai ua latou lē talitonuina e te alofa atoatoa ia i latou, o le a latou manatu faapito, ma o le a lē popole pe latou te faamalie ia te outou pe faia o outou manao pe leai, ma o le iuga o le a latou ola lē pulea, leai se mafaufau ma se popole.¹⁰

Uso e ma tuafafine. …, ou te lapatai atu ia te outou e aoao ma faatonu i le agaga o le alofa ma le onosai seia outou manumalo. Afai ua tetee ma faigata ona puleaina le fanau, ia onosai ia i latou seia outou faatoilaloina ai i le alofa, ma o le a outou maua ai o latou agaga, ona mafai ai lea ona outou faasaosao ia latou amio i le ala tou te mananao i ai.¹¹

Puipui le fanau mai le ola lē pulea

Ua le talia e le Atua le i ai o se tasi o i tatou e manatu tuufau, e le mafaufau ma papa’u lo tatou alofa mo a tatou fanau ma ua tatou lē taofia ai lava i latou mai amio lē pulea, i le faia o mea sese atoa ai ma lo latou alofa valea i mea o le lalolagi e sili ae nai lo le amiotonu, ona o le popole ina nei faatiga ia i latou. Ou te manao ou te fai atu le mea lenei; o nisi o tagata [po o matua] ua maua’i lo latou soona faatuatuaina o a latou fanau ma ua latou lē talitonu ai e mafai ona taitaiina i latou [fanau] i le leaga po o le faia o mea sese. Ua latou lē talitonu latou te faia se mea sese, aua ua i ai lo latou faatuatuaga tele ia i latou [fanau]. O le iuga, ua latou tuufau ia i latou. I le taeao, aoauli, afiafi, ma le po; ina ia auai atu i faafiafiaga eseese ma tafaoga i le tele o taimi, ua latou tuuina atu a latou fanau e o ma nisi latou te lē masani ma lē malamalama i ai. O nisi o a tatou fanau e matua manatu mamā lava ma ua latou le masalosalo ai i le tiapolo, ma o lea, ua latou faatamala ai ma maileia ai e le tiapolo.¹²

O a mea tatou te faia i o tatou aiga e aoao ai a tatou fanau; o a mea e faamalamalama ai i latou? O a ni mea e fai e faaosofia ai i latou ina ia faia le aiga ma lo latou nofoaga o tafaoga, ma o se nofoaga e mafai ona latou aumai i ai a latou uo mo suesuega ma faafiafiaga?… Pe tatou te maua ea le lagona naunautai mo i latou ma a latou gaioiga? Poo tatou tuuina atu ea ia i latou le poto faaletino, taumafa faalemafaufau, le faamalositino manuia, ma le faamamaina faaleagaga, e mafai ai ona avea i latou ma tagata mama ma malosi i le tino, tagatanuu poto ma le faamamaluina, tagata o le Au Paia faatuatua ma le faamaoni?

… E tatau ona tatou tuuina atu i o tatou atalii ma afafine se taimi mo gaioiga faafiafia ma le faia o ni gaioiga eseese, atoa ma ni avanoa i le aiga e faamalieina ai o latou manaoga mo gaioiga e faamalosi ai le tino ma le mafaufau, ma ua alagatatau mo tamaiti uma; ma o le a ia saili ai i fafo atu o le aiga poo isi nofoaga e le talafeagai, pe afai ua le maua i totonu o le aiga.¹³

O le uiga ma le tele o le eseesega o a tatou mea faafiafia, ua aafia tele i le soifuaga ma amioga a o tatou tagata talavou; ma ua tatau ai ona malu puipuia ma le faaeteete tele i latou mo le faatumauina o amioga mama ma le tutumau o le autalavou a Siona.

O le mea muamua e lē tatau ona soona fai o latou olaga; e ao i tagata talavou ona taofia mai le tuuina o i latou lava i le agaga faafefeteina o le soona fiafia tele. … E ao ona aoaoina i latou e faamasani i le tele ma le tele o faafiafiaga faale-va-fealoai ma uiga tausaafia po o le atamai. O faatasiga faaleaiga, o konaseti e atinaeina ai taleni a le autalavou, ma faafiafiaga i nofoaga faitele e faatasia ai tagata talavou ma e matutua, e manaomia. …

Lona lua, o a tatou faafiafiaga e ao ona o gatasi ma lo tatou agaga faalelotu o le fegalegaleai faatasi ma le faamaoni. … O le mataupu i mea tau faafiafiaga, o se tulaga ua sili lona taua i le soifua manuia o le Au Paia, ma e ao ai ia i latou ua pulefaamalumalu i uarota uma ona matuai tuu i ai le faautautaga poto ma le tofa loloto.

Lona tolu, o a tatou faafiafiaga e lē tatau ona fai ma faalavelave i le galuega o loo faia i le potu aoga. E matua manaomia lava i aoaoga amata a o tatou tagata talavou ona faataunuuina ma le faaitiitia o le faalavelave i ai. …

O le mea mulimuli, o le taufa’amata’u lea ona o le tele o aiga, ua taofia e matua tulafono uma e faatatau i mea faafiafia mo a latou fanau, ae tuulafoai e fai lo latou fiafia poo fea le nofoaga ma pe o a foi taimi latou te faia ai. E le tatau i matua ona tuulafoai i le pulea lelei o ituaiga mea faafiafia mo a latou fanau i le taimi o lo latou tuputupu ae, ma e ia matua faaeteete lava i uo a a latou fanau i nofoaga o faafiafiaga.¹⁴

Aoao le fanau i le taua o le onosai ma galuega

O le tiute o matua le aoao o le fanau i mataupu faavae o le talalelei ma ia manino le mafaufau ma filigā i taimi o lo latou talavou. E ao ona aoaoina i latou mai le taimi na fananau mai ai seia oo i le taimi e tuua ai le tausiga faamātua i le aiga mo le faatuina o o latou lava aiga ma faia tiute o le olaga mo i latou lava, ma e i ai le taimi e toto ma selesele ai, aua o le mea e lulu e le tagata, o le mea foi lea na te selesele. O le luluina o amioga leaga i le talavou o le a le maua ai se mea lelei sili nai lo le leaga, ma o le luluina o fatu o le paie o lona taunuuga o le mativa ma le le mautu i le taimi e avea ai ma tagata matua. O le leaga e mafua ai le leaga, ma o le lelei o le a aumaia ai le lelei. …

Ia tuuina atu e matua o Siona ia latou fanau ni mea e fai ina ia aoaoina ai i latou i le tomai i galuega, ma faaauupegaina e faataunuu a latou matafaioi pe a tuuina mai i o latou luga. Aoao i latou i ni galuega aoga, ina ia mautinoa ai lo latou gafatia o le soifuaga pe a amataina mo i latou lava. Ia manatua, ua fetalai le Alii “o le paie e le ‘ai i le areto a lē galue,” ae o tagata uma o Siona e ao ona tamaoaiga [tagai MFF 42:42]. E lē tatau foi ona latou faamatuu atu i le ata leoleoa, tautala faaoleole, faamaualuga faalelalolagi ma le manao lasi, aua e le gata o nei mea e le talafeagai, ae o agasala e faa’ono’ono ai i le silafaga a le Alii.¹⁵

O le galue o le ki lea i le fiafia moni o le tagata i le faaletino ma le faaleagaga. Afai ua maua e se tasi se faitau miliona o tupe, e ao ona aoaoina pea i lana fanau le ala e galulue ai i o latou lima; e ao i tama ma teine ona maua ni aoaoga i le aiga e talafeagai ma i latou e mafai ai ona latou galulue i aso uma i le faiga o le fatuaiga.¹⁶

O se tulaga loto malie i matua le mafai ona tali atu i manaoga uma o a latou fanau, ae o le mea moni o se agaleaga le tuuina atu i ai o mea uma ua latou mananao ai. E mafai ona faafitia ma le poto mea mai fanau e tusa lava pe leai se afaina mo i latou. O mea tatou te fiafia i ai e faalagolago tele i ituaiga o manaoga nai lo le faamalieina o manaoga. Atonu o le a tele ni meaalofa mo se tamaitiiti ae laitiiti pe leai foi sona fiafia e maua ai, ona e leai sona manao mo ia mea. O le aoaoga la mo o tatou manaoga o se vaega ua sili lona taua mo lo tatou fiafia i le olaga. …

O ala a le Atua e aoaoina ai o tatou manaoga e faapea, e sili lona atoatoa, ma e afai o i latou ua i ai i lo latou malosi e aoao ma faatonu ai manaoga o fanau ona faataitai i lona finagalo, o le a sili le manuia o le fanau i le faafetaiaia o faafitauli e oo mai i tagata i mea uma ao taumafai ai i le olaga. Ma o le a le auala a le Atua? I mea uma lava i lona natura ua aoaoina i tatou i le lesona o le onosai ma le faatalitali. Tatou te mananao i mea i se taimi umi lava ona faatoa maua lea, ma o le mea moni ona ua tatou mananao i ai i se taimi umi ua mafua ai ona faatauaina ma faapelepeleina pe a oo mai. I le natura ua i ai taimi tatou te lulu ma selesele ai; ma afai ua aoaoina le fanau o manaoga latou te lulu e mafai ona selesele ai i le lumanai e ala i le onosai ma galuega, o le a latou iloa ona faafetaia pe a oo mai le taimi e faataunuuina ai se faamoemoega ua leva ona i ai.¹⁷

E sili atu i lo mea uma, e ao ona tatou aoao a tatou fanau i mataupu o le talalelei a lo tatou Faaola, ina ia latou faamasani ai i le upumoni ma savavali ai i le malamalama o loo susulu atu ia i latou uma o le a latou mauaina. “O lē vave saili ia te au,” ua fetalai mai ai le Alii, “o le a maua a’u, ma o le a lē tuulafoaiina.” [MFF 88:83.] O lea, e manaomia i tatou, ina ia vave amata i le olaga ona savavali i le ala sa’o ma le lauitiiti e tau atu i le faaolataga e faavavau.¹⁸

Fautuaga mo Suesuega

E faapefea ona avea le fanau ua tuuina mai i la tatou tausiga ma “fanau o le tofi lea mai ia Ieova” ma “o le taui lea mai ia te ia”? (Salamo 127:3). O a faamanuiaga paia e maua mai le fanau “e maua ai le tamaoaiga o le aiga ma le atunuu”?
Aisea e tatau ai i matua ona aoaoina a latou fanau e talitonu i le Alii o Iesu Keriso? O a nisi mataupu faavae taua ma mataupu e tatau ona aoaoina ai le fanau? (Tagai foi Mosaea 4:14–15; MFF 68:25–28.) E faapefea ona faia lenei aoaoga?
O le a se iuga o le faatamala e aoao i le fanau mataupu o le talalelei?
Aisea e taua ai i matua ona loto tasi ma ia faifai pea le aoaoina o a latou fanau? Aisea e taua ai i matua ona fai faataitaiga e tutusa ma mea o loo latou aoaoina?
Aisea ua ave ai le alofa “o se aafiaga sili ona malosi i le manatu o se tamaitiiti”? E mafai faapefea e matua ona faatuatuaina e a latou fanau? O le a se iuga o le manatu faapito, ma le agaleaga i le tausia o le fanau?
O le a le uiga o le “manatu tuufau faivale” i le tausia o se tamaitiiti? O a ni tulaga matautia o le tuufau po o le fai faavalea o fanau?
O a “auala a le Atua e aoao ma faatonu ai Lana fanau? E faapefea ona tatou mulimuli i Ana faataitaiga i o tatou lava aiga?
E mafai faapefea ona tatou mulimuli i fautuaga a Peresitene Samita i le faatulagaina o taiala mo faafiafiaga mo le aiga? E faapefea ona aoao le fanau e taumafai mo faamoemoega tauaogaina e ala i le “onosai ma galue”?

home of Mary Fielding Smith — I le 1850, sa nonofo ai Maria Filitia Samita ma lana fanau i lenei fale faigofie o piliki ma palapala malō. I lenei aiga, sa aoaoina ai e Iosefa F. Samita mataupu moni o le talalelei ma faamanuiaina ai o ia i lona soifuaga. O loo i ai lenei fale i le Nuu o Tesareta Tuai (Old Deseret Village) i le O le Nofoaga Lenei i Heritage Park.