Mataupu 36
O le Upu o le Poto: O se Tulafono mo le Soifua Maloloina o le Tino ma le Agaga o le Au Paia.
O le tausia o le Upu o le Poto o le a malosi ai o outou tino, faaeaina ai agaga, ma tatou latalata atili atu ai i le Atua.
Mai le Soifuaga o Iosefa F. Samita
Sa aoao mai Peresitene Iosefa F. Samita o le Upu o le Poto o se tulafono e sili atu nai le na o le faasaina o le lauti ti, kofe, tapaa, ma le ava malosi; o loo i ai ni fautuaga faataitai mo le soifua maloloina lelei ma le ola faaleagaga, ma o tagata o le Au Paia e usiusitai i ai o le a latalata atili atu ai i le Alii ma avea faapei o Ia. Ina ia faamanatu atu i le Au Paia le taua o le Upu o le Poto, o nisi taimi e masani ona ia faitauina atu ai atoa le Mataupu Faavae ma Feagaiga e 89 i se fonotaga po o se sauniga. “O lenei, e foliga mai e le tatau ai ma e le o le nofoaga foi, atonu, i le toatele, ou te faaalu ai le taimi o lenei faapotopotoga toatele e faitau ai lenei faaaliga,” sa ia faapea mai ai, ae sa ia faitau pea ia upu uma lava ina ia faamalosia ai le taua tele o le savali.1
Sa ia saunoa mai: “Ou te manatua se mea na tupu i le tolu tausaga talu ai i ni tagata sa matou malaga faatasi. Sa i ai le toatasi pe toalua sa naunau pea e inu la latou lauti ma le kofe i nofoaga uma latou te malolo ai. Sa ou laugaina le Upu o le Poto i le taimi atoa, ae sa latou fai mai, “O le a le mea e afaina ai fua? E i ai foi lea tagata ma lea tagata, o loo inu i le lauti ma le kofe! … Sa ou faapea atu i se tasi o taimi, ‘Ioe, ua outou fai mai o se mea lelei le inu o sina lauti laitiiti poo se kofe, ae ua fetalai mai le Alii e leai. O lē fea ou te mulimuli i ai?’ Ua fetalai le Alii afai tatou te tausi i le Upu o le Poto o le a tatou maua le poto ma oa sili o le malamalama e oo lava i oa natia; latou te taufetuli foi ae le vaivai, ma savali ae le matapogia; ma o le agelu o le faafanoga o le a laaloa, e pei o le fanauga a Isaraelu, ae le fasia i tatou. … Ou te tatalo atu ma faatoga atu ia te outou ou uso ma tuafafine,… ia taofia le faaaogaina o nei mea faasaina, ma ia tausia le tulafono a le Atua.”2
Aoaoga a Iosefa F. Samita
E ao ona tatou tausia le Upu o le Poto mo lo tatou manuia ma le tamaoaiga.
Tatou te iloa mafuaaga silisili o mataupu o loo i ai i lenei mataupu i le tusi o Mataupu Faavae ma Feagaiga [mataupu 89] ua aoaoina i le lalolagi, aemaise ai lava i le Au Paia. E leai lava se mea sili pe itiiti ifo nai lo le faigofie o le Upu o le Poto sa tuuina mai i le 1833, mo le manuia, avea ma fesoasoani, ma le tamaoaiga o tagata o le Au Paia, ina ia faamamaina ma saunia i latou ina ia faalatalata atu i le afioaga o le Alii, ma i le tausia o lenei tulafono o le a latou siitia ai i latou lava e maua le faamanuiaga ua sili ona ia fiafia e tuuina mai i o latou luga, pe afai e agavaa i latou. …
Pau lava le mea ou te fia tau atu ia te outou ou uso e ma tuafafine, e leai se isi lava auala tatou te ui ai i le lalolagi, e faatatau i lo tatou manuia faaletino ma le soifua maloloina, e sili ae nai lo lena ua faasino mai e le Alii le Atua ia i tatou. Ua le mafai i se a ona tatou iloa lenei mea? Aisea o le a tatou le maua ai se malamalamaga sili o lenei mea? Aisea o le a tatou le lafoa’ia ai o tatou lava tuinanauga? Aisea e le mafai ai ona tatou tausia le finagalo o le Alii e pei ona faaali mai ia i tatou i lenei faaaliga?… Afai e tausia e tagata uma lenei faaaliga, o le tele o tupe o loo faaaluina i le taimi nei e le lalolagi mo ava malosi ma isi o mea ua faasaina i le upu o le poto, o le a faasaoina mo le aiga, ma o le a faateleina le soifua maloloina, o le tamaoaiga ma le faaolataga faaletino o tagata. E leai se tagata na te solia le tulafono a le Atua e faatatau i le soifua maloloina ma le faaolataga i la le tino, ma maua ia faamanuiaga i le tulaga lava e tasi na te mafaia, ma o le a mafai pe afai na te usiusitai i poloaiga a le Atua. …
E le tatau i se tagata o le Ekalesia a Iesu Keriso o le Au Paia o Aso e Gata Ai ona faia mo ia lava se tulaga e le faamamaluina ai ia lava, poo le aumaia i ona lava luga le maasiasi, i lona ulu atu lea i le faleava malosi ma petipetiga po o taaloga faitupe. … E leai se tagata o le Au Paia, leai se tagata o le Ekalesia e mafai ona faia, aua e faamaasiasiina ai o ia, e mataga ia te ia ona ia faia, ma o le Atua o le a faamasinoina o ia e tusa ai ma ana galuega. O se alii poo se tamaitai ua matua talitonu faamaoni i mataupu faavae o le Ekalesia pe ua ta’ua foi o se uso i le Ekalesia, o sē ua talitonu ma faatinoina ia mataupu o loo i ai i le “Upu o le Poto,” o le a lē faitauina faatasi lava ma i latou o le a aumaia lenei maasiasi i o latou luga, i luga o o latou tuaoi poo luga o le Ekalesia ua latou auai; o le a latou lē faia lava.
… E le fiafia le Alii i le lē mafaufau, onā, pe fiafia foi o ia i le mativa, i le toilalo ma tulaga faaleagaina e afua mai i nei faiga ma ua faatama’ia ai i latou o ē onana ma i latou foi o loo faalagolago i nei tagata inu’ava ma lē mafaufau, ma faatamaia ai foi faalapotopotoga faaleaiga ma faamamasagia ai i latou o loo faia, ma matitiva ai, faatafunaina, ma oo mai ai le oti ia i latou lava faapea o latou aiga. O tagata uma o le Ekalesia, alii ma tamaitai, e tatau ona malolosi e tetee atu i soo se mea e soli ai le tulafono a le Atua, ina nei le mafai ona manumalo i latou mai faaosoosoga a le tiapolo. E ao ona i ai o tatou nuu po o alaalafaga e sili ona mama, o nuu ua le pulea e amio ma faiga leaga ma le faatamai. …
Atonu o i latou ua masani ai i nei amioga ua manatu o se mea laitiiti pe le taua tele lenei mea e talanoaina i se faapotopotoga tele e pei o lenei, ae o taimi uma lava ou te vaai ai i se tama poo se tamaloa, laitiiti pe matua, ua masani i lena amio ma ua faia i luma o tagata, e uuna’ia lava a’u e faia se faaiuga o le talitonuga i lo’u mafaufau atonu ua lē malamalama o ia i le finagalo o le Atua mo tagata, pe ua teena foi e ia le finagalo o le Atua ma ua lē popole i se mea e uiga i le upu a le Alii, ma ua lava lena e aumai ai le faanoanoa i le loto o soo se tasi ua ava ma migao i le finagalo o le Alii ma ua ia manao ina ia usitaia. …
… Tatou te tatalo i le Atua e faamalolo i tatou pe a tatou mamai, ona tatou liliu ese lea mai a tatou tatalo ma faaaoga ia mea tonu lava ua Ia fetalai mai ia i tatou e lē lelei mo i tatou! E ese le le talafeagai i le tagata o le ole atu i le Atua e faamanuia i latou, ae o loo faia e i latou mea e faamanu’alia ma aumai ai le leaga i o latou luga. E le tioa a lē talia mai a tatou talosaga e sili atu nai mea o loo tatou manaomia, e le tioa foi le sili a’e le soifua maloloina e pei ona i ai nei, ina ua tatou masani i amioga ua fetalai le Atua e lē lelei mo i tatou, ma ua oo mai ai le leaga i o tatou olaga ma le tino; ma toe liliu atu i le Alii ma tagi atu ina ia aveesea taunuuga o a tatou mea sese ma faiga faasoesa; mai aafiaga o le tiapolo na tatou aumaia i o tatou lava luga ma ua tatou iloa lelei e le tatau ona faia. E ese le valea o lenei mea!3
A ou vaai i se alii ua faapea mai o ia o se tasi o le Au Paia, pe faapea mai foi o ia o se uso o le Ekalesia,… ae ua eleelea lana manava i le ava malosi, ma le asu o le tapaa, poo le faaaogaina o tui, e faanoanoa ai lo’u agaga, e mafatia lo’u loto i le faanoanoa mo ia, ma ou te faapea ifo pe aisea e le iloa ai e le tagata lava ia lona sese, lo tatou lava toilalo e usiusitai i nei amioga faalafua e le gata ina le aoga pe taua, pe manuia ai, ae ua faalafua. Aisea ua tatou le tulai ai i lena tulaga o le poto e mafai ai ona tatou faapea atu ia Satani, “Ina alu ia i o’u tua,” ma tatou fulitua i faataitaiga a le tiapolo. E matua maasiasi naua se tagata mafaufau pe a ia lagona ua saisaitia o ia i ona manaoga, poo se amioga lē aoga ma le faasoesa, faanaunauga, poo tuinanau.4
O le faatinoina o le Upu o le Poto, o le a mafai ai ona tatou talisapaia.
E ao ona tatou usiusitai i le Upu o le Poto ua tuuina mai ia te i tatou. … O le tagata onā ua avea ma pologa i lana ‘ava; o isi ua avea ma pologa i le faaaogaina o le lauti, kofe ma le tapaa, ma o lea, ua latou manatu ai ua tatau nei mea mo lo latou fiafia; ae peitai, o le mea moni e lē aoga mo lo latou fiafia poo lo latou soi-fua maloloina. Ioe, e faaleagaina ai le soifua maloloina. … O le faaaogaina o le afioga a le Alii e ola ai, o le a mafai ai ona tatou talisapaia, e lē na o le vaai i ai ae le faaaogaina. Afai tatou te faia le finagalo o le Alii, o le a tatou iloa ai le upumoni, e mai le Atua; ona tatou atiae ai lea i luga o le papa; ona to mai lea o uaga, ua oo mai foi tafega i le fale, ae lē pau lava ia.5
I le vevesi solo o le olaga mo mamalu faale lalolagi ma le maua o mea e pala o lenei lalolagi, e lē faatali alii se’ia vaivai, e le malolo foi seia o latou matapogia. E foliga mai latou te manatu o le mea e tatau ona fai mo i latou pe a latou vaivai ma lē lavā o le faaaoga lea o vailaau faasaina e toe faafouina ai i latou, ina ia mafai ai ona latou tamomoe i sina mamao sili atu mo sina taimi. O lenei tulaga e faamalosi ai e le tagata faipisinisi ia lava e ala i le faaaogaina o meainu malolosi. O le tina tausi fale ma le tina ua i ai le tausia o le aiga i ona lima, e galue o ia seia matapogia, ua lagona ina ia maua pea lona malosi, e ao ona ia taumafa se iputi, ona faamalosia ai lea o ona uaua ma faamalosia o ia lava mo sina taimi ina ia mafai ai ona faamaea ana galuega o le aso. O lenei, afai o le malamalama moni o le Agaga o le Atua o le a suia mo le aafiaga faaosofia o le ti ma mea inu malolosi; o se mea lelei tele ia te i tatou, pe afai e mafai i se faiga ona lava se vaega o le Agaga o le Alii e maua i totonu ia i tatou, tatou te iloa ai le mea moni e tatau ona faia pe a tatou lagonaina le vaivai ma le matapogia, e aunoa ma le tagofia o meainu malolosi ma vailaau faasaina ia e faamanu’alia ai o tatou tagata ma avea ai i tatou ma pologa i se manaoga.. …
E sili atu ia te au ona ou lē lava ma mafatia mai galuega, ma tuu le avanoa i le natura e toe faafouina ai ia lava, nai lo lo’u taumafai e faaleleia a’u lava e ala i le faaaogaina o fualaau faamoe ma fualaau faasaina o le a faatoilaloina ai le faavae o lo’u ola maloloina faaletino ma le faaleagaga. Ae pe a tatou le tausia pea le Upu o le Poto, e faapefea ona tatou maua le atamai, le poto ma le malamalama, e mafai ai ona tatou pulea a tatou amio? O le folafolaga lenei afai o le a tatou tausia lenei mea o le a tatou maua le iloa, ma o le a laaloa le agelu o le faafanoga mai ia i tatou, ma o le a tatou sosola ese mai na mea leaga o le a oo mai i luga o e amioleaga.6
O le usiusitai i le Upu o le Poto o le a tatou latalata atili atu ai e avea faapei o le Alii.
Ou te talitonu ua tatou latalata i le tulaga e mafai ai ona tatou usiusitai i lena tulafono sili ma le ofoofogia o le fua ua tuuina mai e le Alii Silisiliese ia i tatou, ua Ia faapea mai ai o mea inu malolosi e le lelei, o le tapaa e le mo le faaaogaina i aso fai pea e le tagata, e le mo le manava. … Ua tatou oo mai i le taunuuga ua sili ona silafia e le Alii, ina ua ia tuuina atu i le Ekalesia, e ala i le Perofeta o Iosefa Samita, o le “Upu o le Poto,” o loo i ai i le tusi o faaaliga mai le Alii. … O le toatele o tagata o le Ekalesia a Iesu Keriso o le Au Paia o Aso e Gata Ai ua latalata mai i le usitaia lelei o le tulafono ua tuuina mai e le Alii ia i tatou mo lo tatou soifua maloloina, mo le faaleleia o o tatou olaga; ina ia mafai ona tatou o gatasi ma Lona Agaga ma Lona Finagalo, ina ia tatou mama ma lē pona, ina ia tatou latalata atu ia faapei o Ia o lē sa leai sana agasala, o le sa mama atoatoa ma paia e pei o le Atua e mama ma paia.7
O le alii talavou ua mafai ona galue ai i le lalolagi, o lē ua tumu i le malosi, ma faafouina mo le taua o le olaga, o le a maua lona malosi e ala i le ola e tusa ai ma le finagalo o le Alii; aua o le folafolaga lena mo i latou uma “o e manatua ona usiusitai ma faia nei mea, e savavali i le usiusitai i poloaiga, o le a maua le maloloina i o latou pute, ma ga’o i o latou ivi, ma o le a maua le poto ma oa e tele o le poto, e aofia ai ma oa natia; ma o le a momoe ae lē vaivai, ma savali ae lē matapogia; ma o a’u le Alii, e tuuina atu ia i latou le folafolaga, o le a laaloa le agelu o le faafanoga ia i latou, o le fanau a Isaraelu, ma o le a lē fasiotia i latou.” [tagai MFF 89: 18–21.]8
Pe le’i lava ea nei folafolaga ofoofogia e faatalitonu ai i tatou ina ia usiusitai i lenei Upu o le Poto? E leai ea se mea o iinei e alagatatau ai lo tatou manatu? Pe le o ni mea moomia ea “oa silisili” o le poto, e oo lava i “oa natia,”? Ae pea tatou vaai atu i alii ma tamaitai ua amio ai i le faaaogaina o le ti ma le kofe, poo mea inu malolosi, poo le tapaa i soo se uiga, ou te faapea ifo ia te au lava, o alii ma tamaitai nei ua lē talitonu i le folafolaga ua tuuina mai e le Atua ia i latou. Ua latou solia i lalo o o latou vae, ma ua faaleaogaina ia mea. Ua latou ita i le upu a le Atua, ma ua tetee i ai i mea latou te fai. Pe a oo mai puapuaga ia i latou, ua toeitiiti latou saunia e faate’a ese le Atua, aua ua Ia lē faafofoga ia latou talosaga, ma ua tuua i latou e tutumau ai i le ma’i ma le tiga.9
O lenei, ou te moomoo ma lo’u agaga atoa—e le faapea ona ua ou fai atu ai, ae ona o loo tusia i le finagalo o le Alii—o le a outou usiusitai i lenei Upu o le Poto. Sa tuuina mai ia i tatou… mo le taitaiina o i tatou, mo lo tatou fiafia ma le alualu i luma i mataupu uma e faatatau i le malo o le Atua, i le taimi nei ma le faavavau, ma ou te tatalo ia outou tausi i ai. O le a lelei mo outou; o le a faapaiaina ai o outou agaga; o le a tuu saoloto ai o outou mafaufau ma o outou loto mai le agaga o le faatafunaga; o le a outou lagona ai e faapei o le Atua, o lē na te tausia e oo lava i manu iti, ina ia le pau i le eleele e aunoa ma lona silafia, o le a faalatalata mai ai outou i le faatusa o le Alo o le Atua, le Faaola o le lalolagi, o le na faamalolo i e mamai, faasavavali pipili ma ua osooso ai i le olioli, o lē sa faafaalogo le tutuli ma faapupula i le tauaso, o lē na faasoasoaina atu le filemu, olioli, ma le mafanafana ia i latou uma sa ia fesootai i ai.10
Fautuaga mo Suesuega
-
O a faamoemoega ua tuuina mai ai le Upu o le Poto ia i tatou? (tagai foi MFF 89:1–4.)
-
E faapefea e vailaau ma faiga e mafua ai amioga ona saisaitia o tatou tino ma faagesegese ai o tatou lagona i le aafiaga a le Agaga?
-
O a ituaiga o “toilalo ma le faatama’i” e o faatasi ma le lē usiusitai i le Upu o le Poto? Afai ua le manatu tagata i le fautuaga i le Upu o le Poto, ae e faapefea la ona mafatia ai i latou e pele ia te i latou?
-
E faapefea e le usitaia o le Upu o le Poto ona fesoasoani ia i tatou ia maua le “nuu mama, o nuu ua le pulea e le leaga, ma amioga ma faiga faasoesa”?
-
O a ni auala ua outou aoaoina tou te talisapaia ai le Upu o le Poto e ala i le “faataunuuina o le afioga a le Alii”? (tagai Ioane 7:17.)
-
O faapefea ona faataunuuina i lou lava olaga ia folafolaga o loo tuuina mai i le Mataupu Faavae ma Feagaiga e 89 po o olaga foi o isi tagata? (tagai foi MFF 89:18–21.)
-
E faapefea e le usiusitai i le Upu o le Poto ona fesoasoani ia i tatou e maua ai le ‘atamai, poto ma le malamalama’ e mafai ai ona tatou pulea a tatou amio?
-
E faapefea e le tausia o le Upu o le Poto ona faapaiaina o tatou agaga? E faapefea ona tuu saoloto o tatou manatu ma loto mai le agaga o le faatafunaga? E faapefea e le tausia o lenei tulafono ona aumaia i tatou “faalatalata i foliga o le Alo o le Atua”?
O Tanielu ua Faafitia le Aano o Manufasi ma le Uaina a le Tupu, tusia e Del Parson. Ua faafitia e Tanielu ma ana uo meaai a le tupu o Papelonia ma inu i lana uaina aua ua latou iloa e lē lelei mo i latou. Sa latou ola maloloina ma malolosi ma sa faamanuiaina i le atamai aua sa latou filifili e aai i meaai sa sili atu mo i latou.