Aua Nei I Ai Se Feitagai i Soo Se Tasi.

Ia tatou mulimuli i le faataitaiga a le Faaola o le faaalia o le loto faamagalo ma le alofa mo i latou ua faatausuai mai ia i tatou.

Mai le Soifuaga o Iosefa F. Samita

Ole tele o lona soifuaga, sa molimau ai Iosefa F. Samita i le matautia o sauaga na faasaga tonu i le Ekalesia ma ona tagata. Sa faasauaina pea o ia e i latou na tetee i le galuega a le Alii ma Lana Ekalesia, ma sa matua mafatia o ia e le gata i a latou faaupuga a o faiga. E ui i nei faiga saua, sa ia faia lana galuega ma le filemu, e leai ma se fefe ma sa seāseā ona tali atu i ona fili—o fili sa ia faamatalaina e faapea “e lē ni a a’u,” ae “o ia o loo ou taumafai e auauna atu i ai.”¹

Sa manatua e lona afafine o Edith Eleanor se taimi mai lona talavou sa “matua sauaina ai e faasalalauga tusitusia ia lo’u tama. O nisi o tagata sa i le aoga sa umia ni lipoti taufaasese ma le pepelo e uiga i lo’u tama. Sa ou foi atu i le fale mai le aoga i se tasi aso ma le ita tele. Ina ua foi mai Tama i lena afiafi sa ou fai atu ia te ia, ‘Papa, aisea e te le faia ai se mea? E te le o faia se mea e tasi, ae o nei tagata leaga ua latou faifai ia te oe, ma lomia ai nei pepelo uma, ma e te le o faia lava se mea e tasi i ai!” Sa tilotilo ifo lona tama ia te ia ma soisoi ma faapea mai, “Pepe, aua e te ita. Ua latou le faatiga ia te au i se mea e tasi; ua na ona latou faatiga ia i latou lava. E te le iloa ea, Pepe, pe a tautala se tasi i se pepelo ua na ona latou faatiga ia i latou lava e sili atu nai lo se isi lava?”²

Sa manatu ia Peresitene Samita e taui atu le leaga i le lelei ma sa naunau lava e faia le lelei aua afai ua ia iloa ua ia faatiga i se tasi, ua lē malolo o ia seia pepē ona manu’a. Sa ia faapea mai i se aso: “Pe ua ou faia pe tautala atu i se mea e faatiga ai oe? Afai sa ou faia, ou te manao ou te faapea atu sa leai se faamoemoega faapena. E le’i i ai se faamoemoega i lo’u olaga atoa e faatiga se lagona o se tasi. … O i latou uma ua ou faamanu’alia, o i latou uma ua ou sese ai, pe afai e i ai, ta’u mai ia te au le mea ua ou sese ai ia te oe, ona ou faia ai lea o mea uma i lo’u malosi e faasa’o ai ma faalelei ma oe. E leai se faatiga i lo’u loto e faasaga i o’u uso; ua na o le alofa o loo ia te au, alofa moni ma le naunautaiga sili e faia le lelei.”³

Aoaoga a Iosefa F. Samita

Aua nei feitagai ma soo se tasi.

Matou te apoapoai atu, matou te talosaga atu i o tatou uso ma tuafafine, i le talalelei a Iesu Keriso, ina ia le gata ona faamamalu ai i latou lava e ala i le ola ai i le tulaga e tatau ai, ae ia faamamalu ma alofa ma agalelei i o latou tuaoi, i latou uma lava. Matou te fautua atu ia te outou e le gata ina tausia le poloaiga sili ua tuuina mai e le Atua i le tagata, e alofa i le Alii lou Atua, i lou loto atoa, ma manatu, ma le malosi, ae ua matou faailoa atu foi ina ia tausia le tulafono e lua, e pei o le muamua, e alofa i le lua te tuaoi e faapei o oe lava ia te oe [tagai Mataio 22:36–40]; taui atu le leaga i le lelei, aua le faifai atu ia i latou o e faifai mai. E le tatau ona tatou faaleaga fale o isi tagata (faaaoga le faamatalaga lenei o se faataitaiga). Ua matou naunautai i le atoatoa ina ia latou nonofo i fale ua latou fausia mo i latou lava, ona matou taumafai lea e faaali atu ia i latou le auala sili atu. … ma fausia ni fale lelei, ona valaauina lea o i latou i le agalelei, i le agaga o Keriso, o le Kerisiano moni, e ulufale atu i le nofoaga sili.⁴

Uso e ma tuafafine, matou te mananao ina ia outou lotogatasi. Matou te faamoemoe ma tatalo o le a outou o atu… i o outou aiga ma le lagona mai i ta’ele o o outou loto ina ia faamagalo le tasi i le isi, ma ia amata atu i lenei taimi e oo atu i le lumanai ona lē i ai se feitagai o le tasi i le isi o uso a tagata. Ou te le popole poo o ia o se tagata o le Ekalesia a Iesu Keriso o le Au Paia o Aso e Gata Ai pe leai, poo se uo poo se fili, pe lelei o ia pe leaga. E matua tiga lava mo soo se tagata o loo umia le Perisitua, ma o loo maua le meaalofa a le Agaga Paia, ona faatautaia se agaga o le losilosivale, poo le feitagai, poo le taui atu, poo le le talia e faasaga atu i ona uso a tagata. E ao ona tatou faapea ifo i o tatou loto, ia faamasino le Atua i le va o a’u ma ia, ae o a’u, o le a ou faamagalo. Ou te fia faapea atu ia te outou o tagata o le Au Paia o loo i ai lagona o le le fia faamagalo i o latou agaga ua sili atu ona agasala ma faasalaina nai lo le tagata ua agasala ia i latou. Ia malaga atu i le fale ma faate’a ese le feitagai mai o outou loto; aveese le lagona o le lē loto faamagalo; ma toto i o outou agaga le agaga o Keriso o le sa valaau mai i luga o le satauro, ‘Tama e, faamagalo ia i latou; aua ua latou le iloa le mea ua latou fai.” [Luka 23:34.] O le agaga lenei ua tatau ona maua e tagata o le Au Paia i aso uma.⁵

Ana ou iloa sa i ai nisi sa i ai ni lagona lē fiafia ia te au, ou te alu atu ia i latou ma le fiafia, ma lē malolo seia ou asiasi i ai ma iloa ai mea sa ou sese ai ia i latou. Afai e mafai ona faailoa mai sa ou faia se mea e faamanualia ai lo’u uso, o le a ou lē fesili atu ia te ia ina ia faia se faaleleiga o le faafitauli—O le a ou alu loa a’u lava ma faia mea uma i lo’u malosi e faasa’o ai ma faalelei ma ia. O la’u misiona e lē o le faamanu’a, e lē o le faia o le sese; ae o le faia o le lelei.⁶

Sui le faamoemoe o lou lagona, ma lau vaai, mai le vaai mo le tiapolo i le vaai mo mea lelei, mea mama, ma taitaia ma musuia i latou ua sese e agai atu i le auala e leai se sese o i ai, ma o le a lē talia ai ni mea sese. Vaai i mea lelei o loo i tagata, ma o mea o loo faaletonu ai, taumafai e atiae lena i totonu ia i latou; taumafai e faateleina le lelei o loo ia i latou; vaai mo mea lelei, atiae le lelei; lagolago i mea lelei; ma ia faaitiitia i le mea e te mafaia le tautala i mea leaga. E leai se lelei e maua ai pe a faalautele le leaga, faasalalau le leaga, poo le folafola atu i le laulaufaiva poo tusitusiga. E leai se mea lelei e maua mai ai. E sili atu le tanumia o le leaga ae faalautele le lelei, ma ia lapataia tagata uma ina ia faagalo i mea leaga ma ia aoao i mea lelei; ma ia avea ma a tatou misiona le faaolaina o tagata ma ia aoao ma faatonutonu le ala o le amiotonu, ae lē o le nonofo o ni faamasino ma faia faamasinoga mo e ua faia amio leaga, ae ua lē avea ma faaola o tagata.⁷

Tatou te manaomia le alofa tunoa; o lea e tatau ai ona tatou alolofa. Tatou te manaomia le alofa moni; e tatau foi ona tatou alolofa moni. Tatou te manaomia le faamagalo; e ao ona tatou faamagalo atu. Ia tatou faia i isi e faapei ona tatou mananao e faia mai e isi ia i tatou [tagai Mataio 7:12].⁸

Ia alolofa atu i o outou fili.

Ia alofa atu le Alii le Atua ia i latou ua saili e faaleaga i le faamoemoega o Siona. Le Atua e, fesoasoani i lē taitai seseina, lē ua sese, lē ua valea, lē ua lē poto. Ia tuu atu lou Agaga i o latou loto, ia liliu ese mai i latou mai le sese o o latou ala ma o latou vaivaiga, ma faafoi mai i latou i le ala o le amiotonu ma le mea e te finagalo i ai. Ou te talosagaina le alofa tunoa mo o’u fili—i latou ua pepelo faia faamatalaga pepelo e uiga ia te au ma faaleaga ai au, ma ua latou tautala leaga ma tuuaiina pepelo au. I le taui atu i ai, ou te tagi atu i le Atua lo’u Tama oi le Lagi ina ia alofa ia i latou. Ou te le faaleagaina se lauulu o o latou ulu, i lo’u malosi ou te i ai i lenei lalolagi. O le a ou lē faalavelave i o latou ala i le manuia. Leai; ma ou te tagi atu i ou uso ina ia aua nei tagolima se tasi i le fili o o tatou tagata ma i latou ua saunia o latou ala i le faatafunaina ma ua lē salamo, o ē ua agasala ma o latou mata ua pupula ua latou iloa ua latou solia le tulafono a le Atua ma faia upu mataga ma pepelo faasaga i auauna a le Alii. Ia i ai le alofa tunoa i o latou luga. Aua nei tagofia i latou; aua o le mea tonu lena ua latou mananao i ai. Tuu pea ia i latou. Tuu latou e o.⁹

Ou te tautino atu e faigata ia te au ona alofa i o’u fili—o fili o le Ekalesia a Iesu Keriso o le Au Paia o Aso e Gata Ai—e faapei ona ou alofa i a’u uo. O se galuega fita ia te au ona fai. Ou te tautino atu ou te le faia ma le atoatoa; e faigata ia te au; e ui i lea, i nisi o taimi, o le Agaga o le Alii ua pai mai ma faamaluluina lo’u agaga ou te mafai ai ona ou faapea atu: Ou te tuu atu le faamasinoga i aao o le Alii.¹⁰

O le alofa moni i tagata uma ma le alofa i le Atua ua manaomia mai ia te outou i le talalelei a Keriso. O le alofa i ou uso a tagata, o le agaga o le faamagalo, ma le alofa tunoa i ou uso a tagata, ua manaomia mai ia te outou, e pei ona faamanino atu i le tatalo a le Faaola i luga o le satauro—”Le Tama e, faamagalo ia i latou, aua ua latou le iloa le mea ua latou fai.” [Luka 23:34.] O lea e ao ona tatou mafaufau i o tatou fili, ia tatou tatalo mo i latou, ina ia latou lē taase, ae ina ia mafai ona oo atu ia te i latou lona alofa faaola, ma le mana faaola o le talalelei a Iesu, ia faamaluluina o latou loto, ina ia latou salamo ai mai a latou agasala ma faaleleia i le mafai e tatau ai mai mea sese ua latou fai, ma foi mai i le usiusitai ma faamamaina mai a latou agasala, e ala i le salamo ma le papatisoga mo le faamagaloga o a latou agasala, e se tasi ua i ai le pule e faataunuuina ai lena sauniga paia.

Tatou te alolofa i tagata uma. E leai se mea tatou te ita ai i tagata soifua, ma ia lē tetee lava ia i latou pe afai latou te tuu ai pea i tatou. Tatou te lē faasagatau i isi, tatou te lē faasagatau i a latou ekalesia, poo o latou talitonuga faalelotu. E le o so tatou faamoemoe le faia o lea mea, ma e lē o se vaega o la tatou misiona le faia o lea, ia tuu i latou e tapuai i le ala ma le nofoaga ua latou fiafia i ai. … O lo tatou tiute o le agai sa’o i luma, fai o tatou tiute, talai le talalelei e ala i faataitaiga lelei ma mataupu, ma ia susulu atu lo tatou malamalama i luga o lo latou malamalama ina ia latou iloa le malamalama e pei ona silafia e le Atua, ma talia ai, ma savavali ai, pe afai latou te mananao ai.¹¹

O le galuega a le Alii e i ai ona fili, ae lē tuulafoaiina e le Atua a tatou taumafaiga ina ia faaleaogaina.

O loo i ai le fili i le galuega a le Alii, e faapei ona i ai le fili i le Alo o le Atua. O loo i ai i latou ua tautala lava na o le leaga i tagata o le Au Paia. O loo i ai i latou… ua tapunia o latou mata i mea mama uma ma mea lelei uma e fesootai ma le galuega o aso e gata ai, ma o le a tafe mai lologa o mea pepelo ma le lē tonu e faasaga atu i tagata o le Atua.¹²

“Afai o ni tagata o le lalolagi outou, po ua alofa mai le lalolagi i ona tagata; ae lē o ni o le lalolagi outou, a ua ou filifilia outou mai le lalolagi, o le mea lea e inoino ai le lalolagi ia te outou.” (Ioane 15:19). O soo o Iesu o ona tagata filifilia, ma ina ua filifilia i latou e ia, o lea ua inoino ai le lalolagi ia i latou. … O le inosia o se mea e oo i tagata filifilia. Pe ua tatau ea ona tatou saili ina ia inosia e le lalolagi? E leai. I le isi itu, e lē tatau ona tatou faavaivai aua e oo mai ia i tatou e aunoa ma le tau sailia.¹³

Ou te le talitonu sa i ai ni tagata sa taitaiina e faaaliga, pe faailoa mai e le Alii o ona tagata, sa le’i inosia ma sauaina e tagata leaga ma le amioleaga.¹⁴

Mai le aso sa muai folafola mai ai e Iosefa Samita lana faaaliga seia oo mai i le taimi nei, o loo maopoopo pea e tetee i lenei galuega le fili o le amiotonu uma, o le fili o le upumoni, o le mama, o le mamalu, amiosao, ma le mama o le olaga, o le fili o le Atua moni e toatasi, o le fili i faaaliga tuusao mai le Atua ma musumusuga e oo mai le lagi i tagata.¹⁵

E leai ni o’u lava fili. O o’u fili e lē ni a a’u, ae o ona fili o lē o loo ou taumafai e auauna i ai! E le popole tele le tiapolo ia te au. E lē taua tele au, ae ua inoino o ia i le Perisitua, o loo tusa ai ma le faatulagaga a le Alo o le Atua!¹⁶

O le mea moni o le talalelei o loo tauaveina i tatou i se itu e ese mai le ala o le lalolagi. Ua tatou faalavelave i le ala o le lalolagi ma faasoesa i le ala o loo ola ai i le lalolagi i le tele o ala ma le tele o nofoaga. O tagata ua lelei mea e nonofo ai ma maua mea e tausi ai, ua lē fiafia e faalavelaveina. E feitai ai i latou. … E lē saogalemu lava le Au Paia i le mulimuli i le tetee ma fautuaga a i latou ua latou taumafai ina ia tatou o gatasi ma le lalolagi. Ua i ai la tatou misiona faapitoa e faataunuu; ma o lena e ao ona tatou faia i le ala e tatau ai ma le faamoemoega paia, o loo tatou feteenai ma ala o le tagata. Ua lē fiafia tagata ia i tatou. O le matau’a o le lalolagi ua i o tatou luga.¹⁷

Aua tou te matatau; aua nei faatuai a outou galuega mo le upumoni; ola e faapei o tagata paia. Ua outou i ai i le ala sao, ma o le Alii o le a lē tuulafoaia a outou taumafaiga. O lenei Ekalesia ua tulai e aunoa ma se faalavelave mai le tetee ma sauaga mai fafo atu. E sili atu le fefe i le faatamala, agasala ma le manatu faasausili, mai totonu; e sili atu faafitauli o le a faaletonu ai le tagata i le faia o le meatonu ma le faatulagaina o lona olaga e tusa ai ma mataupu faavae faaalia o lo tatou Alii ma le Faaola o Iesu Keriso. Afai tatou te faia le meatonu, o le a manuia mea uma, o le a lagolagoina i tatou e le Atua o o tatou tama, ma o tetee uma, o le a na ona fesoasoani ai e faalautele le malamalama i le upumoni.¹⁸

Ia tatou tuu atu o tatou fili i aao o le Atua.

Ua tusia, ma ua ou talitonu ua faamaoni, e ui ina tatau ona oo mai le solitulafono, ae oi talofa ia i latou ua oo mai ai [tagai Mataio 18:7]; ae ua i ai i latou i aao o le Alii e pei foi ona tatou i ai. Tatou te le aumaia ni tuuaiga faasaua e faasaga ia i latou. Tatou te naunau ina ia tuu i latou i aao o le Silisiliese e faamasinoina i latou e pei ona ia silafia ai. O la tatou galuega o le galulue amiotonu i le lalolagi, o le sailia o le alualu i luma o le malamalama i le finagalo o le Atua ma ona ala, ma lana upumoni sili ma le matautia ua ia faaalia e ala i le tufugaaao o Iosefa, le perofeta, e le gata mo le togiola mo e o loo soifua ae mo le faatuina ma le faaolataga o e ua maliliu.¹⁹

O le a taulimaina e le Atua o [tatou fili] i lona lava taimi ma lana lava auala, ae ua manaomia ina ia faia o tatou tiute, tausia le faatuatua mo i tatou lava, ia tatou galulue i tatou lava i le amiotonu i le lalolagi, ae tuuina atu le faaiuga i aao o ia o lē pule i mea uma mo le manuia o i latou ua alolofa ia te ia ma tausia ana poloaiga.²⁰

Ua leai se lagona tiga i o tatou loto e uiga i soo se meaola. Ua tatou faamagalo atu ia i latou ua ita mai ia i tatou. O i latou ua taufaaleaga ia i tatou, ma ē ua latou faauiga sese i tatou i le lalolagi, ua leai se matau’a i o tatou loto e uiga ia i latou. Ua tatou faapea atu, ia faamasino le Atua i le va o i latou ma i tatou; ia taui atu e Ia ia te i latou e tusa ma a latou galuega [tagai MFF 64:11]. O le a tatou le sii taua atu ia te i latou; ae o le a tatou faalautele atu le agaga o le faamasani ma le fefaauoai ia i latou, pe afai latou te salamo ia latou agasala ma foi mai i le Alii ma ola ai. Tusa lava poo le a le ituaiga ita o loo latou i ai, poo le valea o a latou gaioiga, afai latou te salamo mai ai o le a tatou talia i latou ma le lima mafola ma o le a tatou faia mea uma lava e fesoasoani ai ina ia faaolaina i latou.²¹

Fautuaga mo Suesuega

O le a sou lagona ina ua e faamagalo atu ia i latou ua latou faatiga ia te oe? Aisea ua e manatu ai o tagata o le Au Paia ua lē fia faamagalo atu ua sili atu lo latou agasala nai lo i latou ua agasala ia i latou? (Tagai foi MFF 64:9–11.)
Afai ua tatou iloa o loo i ai se tasi ua i ai ni lagona tiga e faasaga mai ia i tatou, o le a la tatou mea e ao ona fai?
E faapefea e le “faalauteleina o le lelei” i isi tagata ona fesoasoani ia i tatou e faataunuuina atili ai la “tatou misiona… o le faaolaina o tagata soifua”?
Aisea e tatau ai ona i ai ia i tatou le alofa tunoa ma le agalelei e oo lava i o tatou fili? O a mea e mafai ona tatou tuuina atu i a tatou tatalo mo o tatou fili?
Aisea e masani ai e le Au Paia ona latou fetaiai soo ma le “mataua o le lalolagi”? E faapefea ona tatou tali atu i lenei mataua? Aisea e “le afaina ai le [Ekalesia] mai e tetee ma sauaga mai fafo atu”?
Pe a tatou tiga ona o isi, aisea tatou te naunautai ai e taatia atu lo latou faasalaga “i aao o le Silisiliese”?
Sa faapefea ona tali atu le Faaola i ona fili? (Tagai Luka 23:34.) E mafai faapefea ona tatou mulimuli i ana faataitaiga e ala i le faaloaloa atu o le “aao o le faamasani ma le fefaauoai” i o tatou fili?

Jesus Christ on the cross — E ui ina sa mafatia o Ia i luga o le satauro, sa le’i fia taui ma sui Iesu Keriso ia te i latou na sauaina o Ia, ae na tatalo, “Tama, faamagalo i latou; aua ua latou le iloa le mea ua latou fai” (Luka 23:34).