5–11 Aokuso

Roma 1–6

“O Le Mana o le Atua mo le Olataga”

O a ni uunaiga e te mauaina a o e faitauina le Roma 1–6? E mafai ona fesoasoani nei uunaiga e te filifili ai mai nei manatu faafaiaoga.

Tusifaamaumau Ou Lagona Uunai

Valaaulia le Fefaasoaai

Valaaulia ia tamaiti e faasoa mai mea sa latou faia e tali atu ai i soo se valaaulia sa e tuu atu ia i latou i le lesona o le vaiaso ua te’a. Mo se faataitaiga,, pe na latou talanoa i o latou aiga e uiga i le folauga na afatia o loo faamatala mai i le Galuega 27 ma le mulimuli i le perofeta?

Aoao atu Aoaoga Faavae

Tamaiti Laiti Ifo

Roma 1:16–17

E mafai ona ou faaalia lo’u faatuatua ia Iesu Keriso e ala i le mulimuli ia te Ia.

Na aoao atu e Paulo e faapea o le talalelei o loo i ai le mana e aumaia ai le olataga i tagata uma o e ola i le faatuatua ia Iesu Keriso. E mafai faapefea ona e fesoasoani i tamaiti e faaalia lo latou faatuatua ia Iesu Keriso e ala i le mulimuli ia te Ia?

Gaoioiga e Mafai Ona Fai

• Fesoasoani i tamaiti e sue Roma i se faafanua. Faamalamalama atu o le tusi a Roma o loo i ai se tusi na tusia e Paulo i le Au Paia i Roma e fesoasoani ai ia latou malamalama i mataupu faavae o le talalelei e pei o le faatuatua.

• Faitau le Roma 1:17 i tamaiti, ma fesoasoani ia latou taulotoina le fasifuaitau “E ola le tagata amiotonu i le faatuatua.” E mafai ona e tofia i tamaiti taitoatasi se upu se tasi i le fasifuaitau ma fai atu ia i latou e ta’u mai le upu lena pe a e tusi i ai. Faamalamalama atu o le fasifuaitau lea o lona uiga e tatau ona tatou ola i aso taitasi ma le faatuatua ia Iesu Keriso. Pe o iloa e tamaiti le uiga o le faatuatua? Faaali atu se ata o Iesu Keriso ma faamalamalama atu tatou te talitonu e moni o Ia tusa lava pe tatou te lei vaai ia te Ia. O le faatuatua lena–o le talitonu i se mea tusa lava pe tatou te lei vaai i ai.

• Faamalamalama atu tatou te faaalia lo tatou faatuatua ia Iesu Keriso e ala i le usiusitai ia te Ia. Nana solo i le potu ia ata o tagata e faia mea na poloaiina ai e Iesu i tatou e fai. Tuu i tamaiti e feauauai i le sueina ma le faamatalaina o ata. O le a se mea e mafai ona tatou faia e mulimuli ai ia Iesu?

• Fusi mata o se tasi o tamaiti, ma ta’ialaina o ia i le potu agai i se ata o Iesu. Tuu atu i tamaiti taitasi ia maua se avanoa. Fesoasoani ia malamalama tamaiti e tatau ona latou mulimuli i aoaoga a Iesu e pei lava ona sa latou mulimuli ai i lau taitaiga.

Roma 6:1–11

O le papatisoina e pei ua avea o se tagata fou.

O tamaiti o loo e faiaoga ai o loo sauniuni mo papatisoga. O le a se mea e mafai ona latou aoao mai i faatonuga a Paulo e “savavali i le ola toefuataiina”?

Gaoioiga e Mafai Ona Fai

• Valaaulia ia tamaiti e toe fai mai le fasifuaitau “Savavali i le ola toefuataiina” (Roma 6:4). Faamalamalama atu a papatisoina i tatou, e faamagaloina i tatou ia tatou agasala. Ua tatou maua le avanoa e agai ai i luma e ala i le faia o filifiliga lelei, salamo pe a tatou faia ni mea sese, ma taumafai e avea atili e faapei o Keriso. Faaaoga le itulau mo gaoioiga o le vaiaso lenei e aoao atu ai tamaiti e faapea o le papatisoga e fesoasoani ai ia tatou avea ma se tagata fou.

• Ta’u atu i tamaiti ou lagona ina ua e papatiso, ma valaaulia i latou e faasoa mai o latou aafiaga ina ua latou auai atu i se papatisoga. Valaaulia i latou e tusi ni ata o i latou lava i le aso o i luma o le a latou papatiso ai ma faasoa mai mea e mafai ona latou faia e saunia mo o latou papatisoga.

• Usu faatasi ma tamaiti se pese e uiga i le papatisoga, e pei o le “Pe A Ou Papatiso” (Tusipese a Tamaiti, 53). O le a se mea ua tatou aoao e uiga ia Iesu mai lenei pese?

O le papatisoga e faatusa i le amataga o se ola fou e avea o se soo o Keriso.

Aoao atu Aoaoga Faavae

Tamaiti Matutua Atu

Roma 1:16–17

E mafai ona ou faaalia lo’u faatuatua ia Iesu Keriso e ala i le mulimuli ia te Ia.

Na aoao atu e Paulo e faapea o le talalelei o loo i ai le mana e aumaia ai le olataga i tagata uma o e ola i le faatuatua ia Iesu Keriso. O le faatuatua o le uluai mataupu faavae o le talalelei. Na te faaosofiaina i tatou e usiusitai i poloaiga. E mafai faapefea ona e fesoasoani i tamaiti ia malamalama atili i le faatuatua?

Gaoioiga e Mafai Ona Fai

• Fai i se tamaitiiti e sue ia Roma i se faafanua. Fesoasoani ia malamalama tamaiti i nai vaiaso o lumanai, o le a latou aoao ai mai tusi na tusia e Paulo i tagata o le Ekalesia i nofoaga eseese, e amata i lana tusi i tagata Roma.

• Tusi le anotusi mai le Roma 1:16 i le laupapa, ae sui ni nai upu i ni avanoa. Fai i tamaiti e sue ia mau ma faatutumu avanoa. Faasino i ai le fasifuaitau “Ou te le ma i le talalelei a Keriso,” ma valaaulia ia tamaiti e faasoa mai le uiga o lenei fasifuaitau ia i latou.

• Valaaulia se tamaitiiti e faitau leotele le Roma 1:17, ma fai i isi tamaiti e faalogologo mo se upu o toe ta’ua. O le a le uiga o le “ola e ala i le faatuatua”? Fesoasoani i tamaiti e sue se faauigaga o le faatuatua i se punaoa e pei o le Taiala i Tusitusiga Paia, “Faatuatua,” scriptures.lds.org. Mata e ese faapefea o tatou olaga pe ana faapea e leai so tatou faatuatua ia Iesu Keriso?

• Faaali atu i tamaiti se laau ma se fatu, ma fesili pe tatou te fesoasoani faapefea i se fatu ia avea ma laau? Faamalamalama atu a tatou totoina ma fui se fatu, ua tatou ta’u atu ai ua i ai lo tatou faatuatua o le a ola. E faapefea ona faaalia lo tatou faatuatua ia Iesu Keriso? Mafaufau e usu se pese e uiga i le faatuatua, e pei o le “Faatuatua” (Tusipese a Tamaiti, 50), o se vaega o lenei gaoioiga.

Roma 3:23–24

Tatou te manaomia uma lava Iesu Keriso ina ia mafai ai ona faamagaloina a tatou agasala.

Sa manao Paulo i tagata Roma ia malamalama o le faaolataga e na o Iesu Keriso ma Lona alofa tunoa e auala mai ai. Mafaufau pe mafai faapefea ona e aoao atu lenei upumoni i tamaiti.

Gaoioiga e Mafai Ona Fai

• Valaaulia se tasi o tamaiti e faitau le Roma 3:23–24. O a ni manatu o tamaiti i mea o aoao mai e nei fuaiupu ia i tatou? Faamalamalama atu o le “alofa tunoa” i le fuaiupu 24 o lona uiga o le meaalofa a le Faaola o le alofa ma le alofa mutimutivale, lea ua mafai ai mo i tatou ona maua le faamagaloga mo a tatou agasala.

• Faatautau se lole po o se ata faamaualuga i se puipui po o se isi nofoaga e le mafai ona au i ai tamaiti na’o latou. Tuu atu latou te taumafai ia au i ai, ma faatusatusa lea mea i mea o loo aoao mai e Paulo i le Roma 3:23. Ona fesoasoani lea ia i latou ia au i ai. O le a se mea na faia e le Faaola mo i tatou e le mafai ona tatou faia mo i tatou lava? Valaaulia ia tamaiti e faasoa mai pe o a ni o latou lagona e uiga i le Faaola pe a latou mafaufau e uiga i le mea sa Ia faia mo i latou.

Roma 6:1–11

O le papatisoina e pei o le avea o se tagata fou.

Na aoao mai e Paulo e faapea o le papatisoga e faatusa i le oti ma le Toetu mai o Keriso. E faatusa foi i le “maliu” o i tatou lava tagata agasala ma toe faatutuina mai ia “savavali i le ola toefuataiina” (Roma 6:4). Tatou te toefaafouina a tatou tautinoga e savavali i le ola toefuataiina i taimi uma tatou te aai ai ma feinu i le faamanatuga.

Gaoioiga e Mafai Ona Fai

• Valaaulia se tamaitiiti e faitau le Roma 6:3–6. O le a le tala a Paulo i le mea “ua faatusa i ai” le papatisoga?

• Talanoaina pe faapefea ona faatusa le papatisoga i le oti ma le toetu. Mafaufau e faaali le vitio “O Le Papatisoga o Iesu” (LDS.org). Aisea ua avea ai le oti ma le toetu ma faatusa lelei o mea e tutupu pe a tatou papatiso?

• Ia faitau faatasi ia tatalo o le faamanatuga (tagai MF&F 20:77, 79). Faamanatu i tamaiti a tatou aai ma feinu i le faamanatuga, ua tatou toefaafouina le tautinoga sa tatou faia ina ua tatou papatiso e mulimuli ia Iesu Keriso. E fesoasoani faapefea le faamanatuga ia i tatou e “savavali i le ola toefuataiina”?

• Valaaulia ia tamaiti e fai ni pepa faasalalau e faaalia ai le latou faauigaina o le “savavali i le ola toefuataiina.” E mafai e tamaiti ona faatautau nei pepa i o latou potu e fesoasoani ai ia latou manatua e faia ia filifiliga lelei.

Fautuaina le Aoaoina i le Aiga

Fautuaina tamaiti e fai i tagata o o latou aiga e ta’u atu ia i latou pe a vaai ua latou faia se mea e faaalia ai le faatuatua.

Faaleleia o Lo Tatou Aoao Atu

Ia fausia le talitonuga mautinoa o tamaiti. Ina ia fesoasoani i tamaiti e fausia le talitonuga mautinoa faapea e mafai ona latou aoaoina le talalelei e i latou lava, ia faaviivii atu ia i latou pe a latou faasoa mai i le vasega.